الفصل 3
لا تستفز انوثتي
الفصل 3
الحاجة : اللع يطول ليه فلعمر ... قول ليه سلمات عليك الحاجة فخيتة ... راه غيكون مزال عاقل عليا
محمد : نشاء الله مرحبا بسلامك
الحاجة : ايوا عندك شي وليدات اخرين .
محمد : هاد الساعة كاين غير هاد بوراس فيه عشرة مشاء الله
الحاجة : الصلاة على النبي الله يخليه ليك ...ايوا اوليدي شماش نقولك ... رانيا مسيكينة راه مرى وحدانية عايشة معايا هي ولينا بنتها .. اما انا ولادي ... مشاو وخلاوني مابقاوش كيسولو فيا لوكان ما رانيا الله يرضي عليها هي اللي مونساني وهازاني .
تنهد محمد وقال بأسف : الله ماخلق الحاجة ... نخليك دابا والله يلاقينا فساعة حسن من هادي
الحاجة : جلس باقي الحال ... جلس والله ماتمشي حتى تاكل الحلوة (رجع محمد جلس) ايوا قلت ليك اوليدي ... انا مريضة ماسكيت عليك ... و ولادي عاارفيني مريضة ومكيجيوش عندي! ايوا شفتي ولاد اخر الزمان .. درت ديك البنية رانيا مسيكينة معمرة عليا هاد الدار .. كي شفتي دابا من نهاار طلقات ... الراجل مشااا! مشافش وراه !!! ايوا شفتي الرجال ديال اخر الزمان !!! مكيسول حتى على بنتو عيفة الرجال الله يعطيه مصيبة ...
محمد : لا حولة ولا قوة الا بالله
الحاجة : ااايه ... وفالمزتمع ديالنا ... المرا الى طلقااات كيتحلو عليها الفام وكتقال على واليديها ... ايوا مسيكينة رانيا بنتي ... حتى هيا مابعاوش يقبلو عليها واليديها وهي مطلقة بالبنية !! اايه !!! وخلاوها تهز همها بوحدها ... وهي مسيكينة ثالت اللهم نخرج نعري على كتافي ونسكن بوحدي .. ولا نبقا نسمع الهضرة بالليل وبالنهار والبنية كانت ماشي تعقد ليها ....
سكتاتها رانيا اللي وقفات عليها كتسوط من مناخرها وقالت
- ااالحاجة راه وقت الدواء دابا وخاصك تنعسي ...
محمد : الله يشافي الحاجة ... خليت الراحة هاد الساعة
الحاجة : ااباقي الحااال ... خليني مابغيتش نعس دابا بغيت نتجمع اااجي بلاتي نعاود ليك راه مزااال فالرزمة مايتعاود
محمد : مرا اخرى الحاجة ... مرا اخرى
رانيا : سمح لينا السي بناني ...
قاطعها : نتوما اللي سمحو لينا
مشات معاه رانيا للباب وحلات ليه باش يخرج .. تلقت وراه شاف فيها بابتسامة ومد يدو وقال
- فرصة سعيدة هادي لاللة رانيا
مدات ليه يدها صافحاتها حسات بيها سخوونة وبعداتها بسرعة وقالت
- متشرفين السين بناني
محمد : كنتمى ماتخرجيش بنتك من لقرايا بسبب هاد المشكل ... وكنواعدك عمرو يتكرر مرا اخرى
قالت بابتسامة حشمات من الصواب ديالو
- نشاء الله السي بناني ... حتى نتا سمح لينا
حنا راسو بابتسامة وقال : مرحبا لاللة رانيا (جبد كارط فيزيت ) هادا الكارط ديالي ... الى وقع شي مشكل .. ولا شي حاجة بحال هاكا تاصلي بيا
خدات الكارط : شكرا السي بناني
محمد : صباحك مبروك الاللة
: شدات رانيا الكارط فيدها من بعد ما سدات الباب وبقات كتشوف فيه وتقرا " MOHAMMED ALI BENNANI
Promoteur immobilier "
داتها معاها ورجعات لأيامها العادية حتى لواحد الصباح فنفس الاسبوع هزات البلاطو فيه الدواء وطلعات لبيت الحاجة حلات الباب ولقاتها مزالة ناعسة ..
رانيا : اويلي لحاجة ناعسة ! غربية هادي مامولفاش تصبح ناعسة! (حطات لبلاطو ) لحاجة ... الحاجة ... لحاجة !!! اويلي لحاجة فيقي !!! لحااجة ...بصوت مرتفع ) لحاااااااجااااااااا
يااايتها النفس المطمأنة ..ارجعي الى ربك راضية مرضية ... وادخلي في عبادي وادخلي جنتي .
جالسة كتسنط للقرآن مع الناس
: اللي معمرين الفيلا وشادة بنتها عندها حتى خوات الدنيا وبقاو غير ولادها جالسين مناقشين على الورث في حين ناضت رانيا للكوزينة وخلاتهم . شوية دخل عندها الابن الكبير بكوستيم وغوباشة وقال
- رانيا .. هزيييتي الواليدة و ماسمحتيش فيها ماعندي مانقول . هاكي هاد البركة باش تقضي .
شدات رانيا الجوا الابيض فيدها وقالت : الله يرحمها ويوسع عليها دائقة القبور
الابن : اميين يا ربي . تقدري تمشي دابا
هزات عينها شافت فيه متفاجأة وقالت بارتباك
اه .. واخا ... غدا نشاء الله نمشي فالصباح
الابن : نشاء الله الله يعاونك
خرج من الكوزينة وخلاها جالسة ساهية كتخمم ... اش هاد الاولاد ! ولاد اخر الزمان خلاتها الحاجة الله يذكرها بلخير .. كيقول فيها وببرودة بحال الى كانت متقلة عليهم ! ولاكن هادا هوا حال الدنيا الله يستر وصافي .
صبح الحال وصبحات رانيا كتجمع فحوايجها وكتبكي غير بوحدها ... شنو دابا غترجع لدار باها وتبقا تصبح وتمسي على النكير وبنتها كتسمع فديك الهضرة ؟ وشنو غدير دابا مللي ماتت الحاجة ؟ باش غتخلص لبنتها المدرسة ؟ وفين غتخدم ؟ وشنو المعمول ؟
خرجات جارة بنتها فيدها وشدات طاكسي لدارهم فالحي ونزلات جارة باليزتها وبنتها فيدها وهازة راسها مابغاتش تبين حقيقتها المأسفة قدام الناس او تخلي شي واحد يشفق عليها ، هي ماعندهاش فلحقيقة ومقاتلة مع الوقت .. ولاكن قدام الجيران والناس مكترضاش وخصوصا من بعد الطلاق مابغات تبين ليهم باللي تلات بيها الايام . لبسات احسن ما عندها ولبسات حتى لبنتها باش تعطي صورة مضهرية يحتارموها عليها الناس وطلعات للعمارة فدارهم ودقات وهي كتسرط بيضة وتحط بيضة كارهة نضرة واليديها ليها ودواسكمهم المتكررة . حلات ليها امها ومع الحلة قالت فدهشة
الام : رانيا !!!
رانيا : اه شنو منجيش لدار با
الام :وشكون جرا عليك .. زيدي دخلي
دخلات رانيا لدارهم المتواضعة لقات خوها جالس قدام البيسي والكاسك ماتلفتش كاع عندها ومامسوقش . حيدات الجلابة ديالها وقالت
- فين بابا؟
الام : مشا عندو شي خدمة ديال شي ناس يركب ليهم السراجم . علاش جيتي ياك لاباس ؟ ياكما دابزتي مع الحاجة ؟
رانيا : الحاجة ماااتت الله يرمحها ماتت لبارح وجاو ولادها يفرقو الورث ديالها .
الام : مسكينااااا ... الله يرحمها ويوسع عليها ..بقات فيا . . . جلسو تجمعو غنحط لغدا مافيا اللي بقا يفرق
جلسات رانيا وجلسات بنتها حداها دارت ليها السربيتة على حوابجها و بداو يتغداو
الام : حمزااا واش مغتجيش تغدا طفي عليا داك المشقوف
قال حمزة من الصالة : واتغداو خلي ليا شوية
الام : الى خليت ليك اجي خركو عليا . بقا تما ... (تنهدات ) ايوا الحاجة ماخلات ليك والو !!!
وقفات رانيا اللقمة ففمها وقالت : شغاتخلي ليا مالي بنتها !!
الام : ايوا مالكي ياك شحال ونتي هازاها حتى دا مول الامانة امانتو
رانيا : هزات حاجبها ) هزيتها
داكشي اللي قسم الله وهزاتني حتى هي الله يكتر خيرها ويرحمها وصافي ... ماتت دابا مغنهزها لا فقبرها ولا هي غتهزني فالدنيا .
الام : اويلي ماعطاتك حتى باش تقضي !!
رانيا : عطاني ولدها سي بركة الله يخلف
الام : ااه ... ايوا شحال عطاك
سرطات رانيا اللقمة ةقالت بميوعة : ماحسبتش .. جمعت حوايجي وجيت بحالي حتى نقلب على شي خدمة
الام : واقلبي ليك على شي راجل مقاد كي الرجال يهزك نتي وبنتك
رانيا : طفروه حتى اللي عمرهم تزوجو بقيت غير انا اللي مطلقة وعندي البنت من لفوق .. شكون هادا اللي غيتزوج بيك ببنتك ... انا اصلا ماعندي مانظير بشي زواج الى كان مكفس بحال داك اللولاني الله يعطيه شي موصيبة
الام : ايوا نتي اللي بغيتيه ونتي اللي تزوجتيه ... مابززو عليك حد .. وكن درتي ريي كن رجعتي ليه
هزات رانيا حاجبها وقالت : هييه !! الله ينجيني انا متنفست حتى تفكيت منو عاد شميت لهوا ونرجع عندو !! اصلا هوا ماشي قد المسؤولية ... ماعندو لا طموح ولا احلام ولا حتى لعبة ! السيد ماباغيش يزيد لقدام باغي غير ياكل وينعس ويتصاحب ... الجدارمي الخانز الله يلكيها ليه كحلة زحلة
الام : سيري خودي غير نفقةبنتك بعدا
رانيا : وقال ليا ندوزها حبس ومانعطيهاش ليك !! السيد مسااالي قبو وماعندي ماندير انا بلحبس ديالو .. نخاف على راسي نحيد ليه ديك الكسوة اللي كيموت عليها ويفديها فيا بشي طريقة يندمني بلااااش منو ونفاقتو انا قااادة ببنتي
الام : الحمد لله (مسحات يديها ) انا غنوض نمشي للخدمة غسلي معاك هاد الماعن
رانيا : باقاخدامة مع مرت لكوميسير ؟
الام : باااقا وعاجباني .. ماعندهاش الروينة بزاف وكنمشي غير نمسح الغبرة وندور شوية بالدار ونجي .
ناضت الام لبسات جلابتها وطلات من لكوزينة
- عندك شي ربعالاق نقصي بيها حتى نتخلص ؟
مسحات رانيا يديها ومشات جبداتهاعطاتها لمها ورجعات كملات شغلها . فلعشية رجع باها لقاها فالدار وسلم عادي ومشا تكا مقال والو حتى رجعات مها فلعشية .
دوزات معاهم اسبوع فالسكات حتى لواحد الليلة بغات تنعس وهي دخل عندها مها جلسات كتجمع معاها وقالت
- ايوا ابنتي راه خاصك تخلصي مع باك الضو والماء وتعاونيه فالتقدية
حلات رانيا عينيها وقالت : منين جاوني مالي خدامة ؟
الام : ايواراه كيتشكا ... قالك بنتك كتفيق مع النبوري تشعل التلفازة ويوميا كدوشي ليها والماكينة مكتسكتش نهار ومطال وهي كدور ... والتلاجة مابقاتش كتعمر
رانيا : مالي اعصاااار! راه بحالي بحالكم اشنو زدت كااع !
الام : هادشي اللي كاين ... راه خاصك تعاوني شوية راه الضو كيجي غالي والماء والمصاريف ديال الدار وبنتك ...
قاطعاتها رانيا : بنتك بنتك بنتك مالها بنتي اش كدير كااع متقلة عليكم ! صافي صافي براكة .. اصلا من نهار جيت ونتوما خاص هادي خاص هادي وكنعطي
ناضت لدوك لفلوس اللي عندها جبدات شي براكة عطاتها لمها ورجعات نعسات معنقة بنتها وكتبكي عليها حتى صبح الحال وناضت داتها للمدرسة ديالها ودخلات عند المدير خلصات ليه 3 شهور متابعة ديال لقراية اللي بقات لبنتها قبل العطلة دالصيف باش متخسرش لفلوس ودازت عند السمسار كتقلب على شي دار للرهن حتى لقا ليها دار زوينة نقية وصغيورة وقررات تخبر دارهم . شدات مها باللي فالبيت وفاتحاتها فالموضوع
رانيا : ماما .. راه لقيت واحد الدار للرهن وغنرحل ليهاانا وبنتي
الام : علاااش!!! ها دار باك علاش مشيتي ترهني
رانيا : مامرتاحاش اماما بغيت نرتاح حسن ليا .
الام : بشحال رهنتي؟
رانيا : ب 6 ديال المليون
الام : هيييه!!!! 6 .. وكتكدبي كتقولي ماعنديش باااز ومخليا باك كيتقاتل بوحدو
رانيا : اااش كيتقاتل ااش مالي شكاناكل انا وبنتي اش كنديرو كااع ياك ديما كنمشي نتقدا ليها وكطيبي منو ... والضو مابقتيش كاع كنشعلو وكنصبن بيدي باش متصدعيش ليا راسي شكنو كاااين اااو زدتو فيه !!! علاش كي كنتو عايشين قبل منجي ! تقلت عليكم هانا غنخوي
هزات رانيا حوايجها مدابزة مع دارهم عاوتاني وخرجات مشات للدار اللي رهنات . دخلات لقات غير لحيوط وهي تنهد ... ااراك عاوتاني للجرا والفراش والمقاتلة . بدات تفرش شوية بشوية وتشري شوي من لقديم شوية من الجديد حتى فرشات الدار وتولاتها بأشياء بسيطة وجميلة ونقاتها ومابقا كيدور فجيبها حتى ريال باش تكمل الشهر وبدات تبعي فحوالقها ومرة تبيع سنسلتها ومرة خاتم وفنفس الوقت كتقلب على خدمة . دارت حتى عيات فالمدارس و الروض كتلقا غير الميناج هوا اللي تقدر تخدم فيه .
فاقت الصباح فدارها المتولة وفيقات لينا لبسات ليها حوايجها ولبسات جلابتها السوداء الجميلة وجمعات شعرها الاسود كوتشوفال وبلغة كحلة . كما سبق قلت ليكم .. واخا محتاجة ومخصوصة كتحاول تلعب على المهضر باش تنال احترام الناس وتقديرهم حيت هادي هي الحقيقة .. الدنيا مضاهر .
رانيا : لبسي ابنتي صباطك نديك نحيد ليك الكبص راه برات يدك ... يالاه لبسي باش ندي بنتي لحمام باليديدة ديالها ندوش ليها
لينا : غيقصحوني؟
رانيا : لا مغتقصحيش ... يالاه ابنتي مشا الحال 8 هادي
شدات ليها فيدها وخرجات سدات باب دارها ومشات وقفات مع الناس كتسنا الطاكسي والطموبيل اللي دازت كتبداتكلاكصوني عليها عاين باين وكاين اللي كينزل ويلسق فيها حتى كيطلع ليها الدم وتبدا تغوت . طلعات فالطاكسي مع الناس وجلسات بنتها حداها وزادو . شوية حسات بيد تحطات فوق فخدها وهي تلفت لقات الراجل اللي حداها كيتحرش بيها بيدو وكيشفو قدامو . مااشعراتش براسها حتى عطاتو بيدها للفم وخشات ليه راسو فالزاج وضربات ليه اكبر شوهة وسط الطاكسي والناس كيفكو
رانيا : يااا لحماااار يا لكللللب ... يا قللليييل التراااابي الله يحرق طواسل مك الحيوااااان ... ماني لابسة مقزب ولا معري ولا جابدة عبادالله يا لبغللللب ( خنقاتو بيديها ) ياك لابسة جلااااابة يا الدحش وكترمي فيديك الله يحرق جد بوك الكلب
الراجل صفار ومزال دافع الجبهة كيتجبه
- نتي اللي محلوووولة ورامية عليا رجليك جمعي عليا رجليك
تعصبات رانيا وخرجو عينيه وزدات ليه حنكو مع الزاج كترعد عليه ووجها حمر
- ونتحل .. ولا نتسد ... ونكووون حمقاااا انا كاااع ولا درية صغيييرة ماتحاااااطش عليا يدك ... تجلس حدام حمقة وتلوح رجلها ماعنكدش الحق تقيسها ... انا مابقيتش غادا لسبيطار غنديك للكوميساااارية مامفاكاش معاك ... انا محلولة يا الكلب ... انا نوري ديلمك محلولة
الشيفور : انعلو الشيطان العواشر هادي
رانيا : الشيطان راه فلحبس دابا... هل الشيطاااان هوا هادا واللي بحالو ... خخخخختفووووو (لاحت ليه بزقة على وجهه ) الله ينعل ديلمك
الراجل : وقف هنا .. وقف نزل انا كاع بناقص
وقف الشيفور ونزل الراجل كياكل فلعصى من عند رانيا . اما الناس فالطاكسي غير كيشوفو ماهضروش بحال الى شافو لعجب وهادشي عمرو ماكان اول مرة !! طبعا حيت ماشي هما اللي فالموقف بقاو غير من المتفرجين وكيشوفو بطريقة احتقار حتى فرانيا واخا ماشي هي اللي لاحت راسها . بنادم خايب ماقدرو حتى يهضرو مع الراجل اللي ماحشمش ويا حسرا كاينين حتى لعيالات واللي ممكن يكونو هما فبلاصتها كن جلسو حداه .. حتى هما بقاو كيشوفو بنص عين مكمشين فمهم بحال الى رانيا غتمسح فيهم ولا طليهم من داكشي اللي واقع ليها . كملات طريقها كتنكر وتسوط حتى للسبيطار ونزلات كتجمع شعرها من جديد وتسب .. جرات بنتها ودخلات حناكها حومر غيطوش منهم الدم وبدات تسول فسبيطار العام لكبير وسيفطوها لجناح العضام وطلعات كتجر فبنتها . خدات الورقة وشدات النوبة فوق الكرااسة مع الناس حتى وصلات نوبتها وهما يسيفطوها ثاني لديال الاطفال ومشات كتنكر
رانيا : من اللول يسيفطوني لديال البز يخخخ ماشي يخليوني كنتسنا ساعتاين تفو
مشات تاتي لجناح الاطفال وجلسات كتسنا النوبة وبنتها ساكتة حداها حتى وصلات نوبتها وناضت دخلات عند الطبيبة .. دقات وفتحات الباب وهي تلقا نفس المرى ... ام جود جالسة فالمكتب دايرة رجل على رجل لابسة طبلية محلولة ومعاها ولدها جالس حداها كيقرا ويكتب ومعاهم طبيبة اخرى كتقشر الزريعة . شافتها رانيا ودارت ابتاسمة .. اكيد غادي تعاملها مزيان كما تعامل راجلها معاها . لاكن صدمة الطبيبة كانت قوية فاش شافت رانية وطلعاتها وهبطاتها ورجعات تحنات عند ولدها اللي مخرج عينيه مصدوم
الطبيبة : نعام ؟
رانيا : بابتسامة وخجل ) جيت نحيد لبنتي الجبص حيت وصل رونديفو ديالها
الطبيبة : اري نشوف ) اممم ... سري حتى 15 فالشهر ورجعي
رانيا : ولاكن راه وصل وقتها !
الطبيبة : دابا نتي غتعرفي حسن مني !!! قلت ليك سيري حتى لهاد لاداط واجي
بقات رانيا ساكتة كتجمع النفس وتشوف فيها
الطبيبة : يالاه ... الله يعاون اش مزال كديري ؟(هزات طيلي ) الو وي ... معايا طلع عندي خودو راه عندي الخدمة مانقدرش نهبط
خرجات رانيا ماراضياش وكتسوط وحاسة بلحكرة والدموع فعينها .. يالاه دارت مع الكولوار وهي تلاقا بالشي بناني جاي زربان كيشوف فتيليفون بدجين وقميجة نص كم .. هز عينيه شافها وهواا يوقف بالزربة مستغرب
: السي بناني : مدام رانيا !!
وقفات رانيا متوثرة وهها احمر وقالت باستغراب
- السي بناني !!
السي بناني : اش كديري هنا ياك لاباس ؟
رانيا : غير جيت نحيد لجبص لبنتي وصافي
عقد حجبانو شاف فيها وحنا راسو عند لينا اللي هازة فيه عينيها ويدها معلقة .. تحنا القرفصاء عند لينا وقال بابتسامة
- اهلا عمو ... لاباس عليك ؟ صافي برات ليديدة ؟ ( باسها فحنكها ووقف ) الله يصلح ، ايوا وشنو قالو ليك ؟
رانيا : مشيت عند الطبيبة وقالت ليا حتى ل 15 فشهر ونرجع
استغرب : شكون الطبيبة ؟
دورات وجهها وتنهدات : السيدة اللي جات معاك للادارة ديك الخطرة
محمد : اااه ... هي اللي قالت ليك سيري حتى لهاد التاريخ واجي (تيلي كيصوني ) الو وي ... بلاتي خليه معاك نسالي شي حاجة ونجي (قطع ) اري دوك الاوراق واجي معايا
عطاتو الاوراق ومشات معاه وهوا كيقراهم داها لجناح اخر وعدا لوحدة فالاستقبال الاوراق وبدا كيهضر معاها ورانيا بعيدة واقفة كتسنا هي وبنتها
لينا : مغيقصحونيش اماما ؟
وقف عليها محمد بابتسامة ودوز يدو على راسها
- مغيقصحوكش ماتخافيش .. اجيو ندخلو عند الطبيب
دخلو عند الطبيب رحب بيهم بالفرحة عليه ورانيا مبتاسمة اول مرة كتحس براسها عندها قيمة كبيرة و الطبيب براسو مكبر بيها . شعور لا مثيل له خلاها تبقا ضحك غير بوحدها ورجع ليها الثقة فنفسها .. عطاتها الممرضة كرسي جلسات
: وكاس ديال الماء وجلسو لينا فوق كرسي بالطبلة وكيضحكو معاها ويلهيوها والطبيب كيقطع فالجبص بشوية .. تلفتات رانيا بابتسامة لقات محمد كيشوف فيها وبسرعة شتت النضر .. حصلاتو ما مرة ماجوج ما ثلاتة .. كل مرة تشوف فيه كتلقاه كيشوف فيها حتى دخلات عليهم الطبيبة المعلومة بابتسامة صفرا لقات عندهم لجو صافي وهي تبتاسم لرانيا وقالت
- تبارك الله عليك قادة بشغلك
لبنات خمرتوووو تحركو شوية
: تلفت محمد هز يديه من فوق البيرو كيسوط ويقلب فعينيه
- اسماء .. اجي معايا لبرا
بعدات اسماء وقالت بعصبية فوجه رانيا
- ياك لاباااس ياك عطيتك الغونديفو شنو مزالة كديري هنا ولا انا بنتك انا المكلفة بيها واش ماعلموكش تحتارمي القوانين
وقفات رانيا وخرجات عينيها بحال المشة فاش كتستاعد للهجوم وقالت
- القوانين سيري راجعيهم نتي ماشي انا وبنتي مابغيتكش تحيدي ليها الحبص نتي تحيديه ليها بزز ؟ بنتي الطبيب اللي يحيد ليها الجبص ماشي سطاجيرة
حلات اسماء عينيها مصدومة وقالت : اش هاد المستوى هادا واش عارفة راسك معامن كتهضري ولالا انا مغطيحش للنيفو ديالك سمعتي
ــــــــــــــــــــــــــــــ
تم مشاركة الفصل من تطبيق روايتك
https://play.google.com/store/apps/details?id=com.akram.novels