الفصل 4
دوزو صباح كلو تما تا وصلات 11:45 عاد تحركو بالحاح من سارة لي خاصها تمشي عند جداتها، بعد مدة ديال الطريق وصلو لوجهتهم هبطات سارة بعيدة على حومة جداتها باش ما يشوفوهاش جيران،هزات بارفان ديال لمياء مجهد و قاصح رشاتو عليها مزيان تا ولات ريحتها كتشم منين و منين و دازت للحانوت شرات كلوريكس و حلوة ديال فليو دارتها ففمها كتمص فيها تا كملاتها عاد كلات كلوريكس،وصلات قدام باب دارهم شمشمات راسها مزيان على ريحة لگارو عاد بدات كدق على جداتها تسناتها تا حلات و تلاحت عليها كتعنق و تبوس فيها،دخلو بجوج معانقين و جدتها الضحكة واصلة ليها لفييين،جلسو فوق سداري قابطين فيدين بعضياتهم.
الجدة:توحشتك اكبيدتي كي دايرا مع بااك و مع ديك اللفعة ديال زهور عنداك تكوني كتجبدي معاها صدع هي و بنتها.
سارة:صدع جبدناه نهار الاول.
الجدة:هااا ويلي حاااي هادشي غير وصيتك ساعة نتي كديري غير لي فراسك.
سارة:بغيتيني نسكت ليهم نخليهم يديرو ما بغاو بيا و نبقى انا حانيا رااس ياكي.
الجدة:لي بغا لعسل كيصبر لقريس نحل نتي بغيتي تعيشي فمستوى مزيان اوا صبري على مراة باااك و ديري عين ميكا ماشي تتجاوبي معاها فكلشي.
سارة:ايييه واخا تعايرني و تمسح بكرامتي الارض و نحني ليها راس تريشني و تحاما عليا هي و بنتها و نحني ليها راس تحرش عليا بابا و تخليه يضربني و نحني ليها راس ياكي هادشي لي باغاني ندير نعيش مدلولة معاهم باش نتفادا صدع،اوا اللالة هاداك نهار هو لي عمرها تحلم بيه او را طرف من نفس كيعيش(الجدة بقات حاطة يديها على حنكها و كتشوف)مالكي كتشوفي فيا هاكا،واش كذبت؟.
الجدة:لي قلتو دابا ما عندو فاش ينفع و لكن لي غنوصيك عليه دابا هو رخفي شوية اللعب باش ما تقلقيش باك.
سارة:بااا تابع مرتو دونك راه الى ما رضيتش مرتو عمري ما غنتفاهم انا وياه و مريتو و الله لا عمري حنيت ليها راس واخا نعرف يجريو عليا.
الجدة:الله يهدي ما خلق الله يهديكم ابنيتي.
ناضت الحاجة كتوجد لغدا و سارة واقفة معاها كتنقب من لخضرة لي كتنقي،وجدو لغدا بجوج و الجدة فرحانة حيت سارة معاها،تجمعو بجوج على طبلة كياكلو و مجمعين مع بعضياتهم تا كملو عاد ناضت سارة غسلات يديها و فمها عنقات ميمتها و توادعات معاها هزات صاكها و خرجات،توجهات لبلاكة كتساين لبيس تا وقفات عليها اللوطو ديال كريم. كريم هبط زاجا:ساالي سارة اش كديري هنا؟!
سارة:واقفة فلبلاكا شنو غنكون كندير هنا فنظرك؟!!.
كريم بلع لقمعة:ههه اوا طلعي نوصلك بلاش عليك من لبيس و صداعو.
سارة:سي جونتي مي نوو ميرسي مولفا نمشي فلبيس بلاما تعدب راسك.
كريم بإلحاح:نو نووو بلعكس ما كاين لا عذاب لا والو غير طلعي.
سارة بدات كتسوط:واا الله اهديك را قلت ليك لا هي لا و راك واقف فحومتي و بنادم كولو كيتفرج سير اخويا الله اسهل عليك قبل ما نهز شي حجرة و نشخشخ ليك لباربريز.
كريم:امممم تا هادا كلااام ما قلتي عيب(هبط نظاظرو على عينيه)مي باقين لايام يلاقيونا ا زين😉.
تحرك من حداها و خلا سارة كتسب و تعاير موراه،هو واخا عجبها شكلا مي كيبقى صاحب صاحبتها،صباح معاها و لعشية جاي كيتبسل على صاحبتها اوا الله انعل لي ما يحشم،جا لبيس و ركبات فيه و بعد مدة ديال الطريق كانت واقفة قدام باب ليسي،بقات واقفة تا جاو لبنات تسالمو معاها و دخلو ياخدو ورقة الدخول،سارة خداتها بزز حيث لقات واحد لحارس ضريف شوية مي فاتي و لمياء ما خداوهاش حيت كيغيبو بزاف و ما يقدروش يكتبو سمياتهم مع سارة حيت هي سيونص و هوما اداب.
سارة:شنو غديرو دابا؟!
لمياء:غنخرجو تا نكونو داخلين عند لفرونسي عاد ندخلو حيت ما كيقيدش لغياب.
فاتي نغزات لمياء و هضرات:سارة يلاه خرجي معانا.
سارة:لا لاااا اختي سلتنا صباح اوا الله اجعل البركة.
فاتي:طفرتيه سلتنا صبااح،تا هداك سليت معاك درتي لينا طرنونو فراااس تا صدقنا راجعين قبل لوقت.
سارة:اوا شنو غندير ليكم نتوما عارفين لميمة كتسناني ما نقدرش ما نمشيش عندها.
لمياء: صبح جداتك و لعشية بااك،اوا و نتي فينك من هادشي كااامل.
فاتي قاطعاتها:بلاما تعيي راسك معاها هاد لهضرة قلتها ليها كاملة صبااح و هانتي كا تشوفيها دابا.
سارة:واا صافي البناات ما ديروووش ليا هاكا.
فاتي:شوفي ا سارة حنا صحابات و بحال لخواتات يعني خاصنا نديرو كلشي بثلاثة الى سلتنا نسلتو بثلاثة و الى دخلنا نفس شي.
سارة:وااش من نيتك راه الى تبعتكم نتوما عمري ندخل شي ساعة،نتوما كتسلتو نهااار على قدو اوا بغيتوني ندير بحالكم.
لمياء:دابا حنا ما قلنا ليك والو سلتي ولا جلسي سوقك هاداك(قبطات فاتي)زيدي يلاه نمشيو بحالنا. خرجو لبنات بحالهم و سارة دخلات تقرا مي الحصة كاملة و بالها غير مع لبنات و هادي اول مرة غتوقع ليها لقراية ديال القسم ما بقاتش منتابها و بالها غير مع الجرس وقتاش يصوني باش دردب بحالها و داكشي نيت لي كان غير سمعات الجرس كانت هي اول وحدة خارجا فحين كانت كتبقى جالسة هي الاخيرة كتسول فالاستاذ على الدرس و كتستفسر على اي حاجة ما فهماتهاش و خصوصا فمادة الفيزياء لي كتعتبر مهمة فلباك..واخا كتسلت مي كتبقى هي المتفوقة في القسم و هادشي لي كيخلي الاساتذة يشفعو ليها على غيابها بعض المرات....ما وقفات سارة تال قدام لباب و طلقات رادارات ديال عينيها كيسكانيو فالمكان باش تشوف لبنات فين قبل ما يجي باها يديها،عيات ما تقلب حدا لباب و تسول مي والو ما لقاتهمش...تحركات جهة درب صبليون بجري كتقلب عليهم تما و لكن ما بانوش ليها،ضربات دورة راجعة بحالها ويلاه غتقطع شانطي و هي حانيا راسها كانت غضربها طوموبيل و من زهرها لعوج صدقات اللوطو ديال باها.
محمد خرج عينيه و خنزر فيها:طلعي😠😠.
سارة طلعات و هي كتقفقف حيت لقاها خارجة من جهة لڤيلات دونك غيفهم كولشي بالمقلوب:بابا.
قاطعها محمد و هضر كارز على سنانو:ما نسمعش حسك.
سارة:غير نشرح ليك.
محمد بحدة:غير غتسكتي ولا غنجمع عليك ليسي كااامل.
سارة دارت خمسة على فمها و قطعات زي،اللهم شوهة فدار ولا قدام صحابها،تحرك باها من تما و طول طريق و هو كيسب فيها و يعاير و مرة مرة كيعطيها بيديه تا كتلاقا مع لباب و ترجع لبلاصتها،بعد مدةديال الطريق وصلو للدار و غير وقف محمد اللوطو خرجات منها سارة كتفرفر و بدات فدقان البوليس حطات يد على لباب و يد على لانطيرفون ما هزاتهمش و عينيها على باها غير جاوب سامي قالت ليه يحل ليها مي قبل ما يتحل لباب شدها محمد من قرفادتها،دفعها لداخل تا تلاقات مع لحيط بيديها بجوج ما جات فين دور تا جاتها طرشة ثلاثية الابعاد خلط ليها فيها عين 👀 و فم 👄 و كلشي،حطات سارة يديها بجوج على حنكها و كتمت شهقتها فيها.
محمد قبطها من يديها بعنف:فييين كنتي يا لقحبة مخليااا مدراستك و غادا كتسلگطي فدرووووبا هاااااا دوي يا لكلبة(عطاها بطرشة اخرى)قووووولي معاااامن كنتي معاااااامن كنتي.
كانو هادو آخر كلمات قالهم قبل ما ينزل عليها بالضرب طرشا تابعة ختها و نتيف للشعر خلاها تحس بجلدةديال راسها غطير ما عتقها من يدو غير زهور و سامي لي هبطو كيجريو على اثر لغوات لي سمعو.
زهور قبطاتو من يدو:اويلي مااالك ياااك لاباااس شنو وقع.
محمد كيدفعها و ينهج:حيدي عليا ليووم نقتل ديلمها لكلبة انا كنسيفطها تقرا و هي كتخيط ليا دروبا مع سلااااگط لعااالم الله شحال من وااحد داايز عليهااااا.
سامي عاون سارة لي حالتها حالة بالضرب و بلبكا تا وقفات دورات يديها على كتافو و هو قبطها من خصرها و طلعو بجوج مسندها عليه تا وصلها لبيتها دخلها حطها فوق الناموسية و هي كتشهق بلبكا و غوات باها لي واصل لمسمعها زايد مكمل عليها. اض سامي خرج و رجع هاز فيديه ميكة ديال دجاج مكونجلي،دخل و سد لباب موراه و جلس قدامها مقرد،هز لميكة حطها ليها على حنكها و هي تقفز.
سامي رجع لور:سمحي ليا...قصحتك؟!.
سارة هزات وجها و عاد بانو طرشات لي كلات،صباع باها مصورين فحناكها صبع حدا لاخر و دغيا تنبلو ليها اما تحت عينيها حماار بزاااف و تنفخ و عاد جنب فمها كاين شوية ديال دم هابط،هضرات بصوت مبحوح:ماشي مشكل اهههئ(حطات يديها على حنكها كتحسسو)اهههئ تنفخ؟!
سامي شاف فيها بأسف:غير نديرو ليه ثلج غيتفش ما تخافيش.
سارة هزات ليه راسها بأه و دموعها هابطين شلال على حنيكاتها.
الصراحة اصعب موقف ممكن يتعرض ليه الانسان هو هادا لي كتعيشو سارة دابا،حيت كون كبرات وسط والديها من صغرها كانت غتكون شوية ديال الثقة بيناتهم واخا ما تكونش بينها و بين باها غتكون بينها و بين مها و العكس صحيح و اهم حاجة الى الاب زير و ضرب الام كطبطب و تواسي و هادشي لي كانت مفتاقدا ليه سارة فهاد اللحظة،تضرباات و تعايرات بأسوأ الصفات من الاب ديالها و فالاخر ما لقات لي يطبطب عليها و يواسيها من غير خوها.
سامي ماصا ليها حنيكاتها بديك الميكة و دار ليها فاصمة جهة فمها عاد ناض باس ليها راسها و خرج بحجة انها بغات تبدل حوايجها،ناضت سارة سدات لباب بساروت و رجعات لبلاصتها و باها باقي طالق حلقو عليها كيسب و يعاير،تكات بلاصتها فوضعية الجنين و يديها بجوج تحت حنكها و دموعها كيقطرو على الناموسية،بقات على ديك الوضعية تا نعسات بلاما تحس.
فصالون كان محمد باقي جالس كيسب و يعرعر عليهم.
محمد:والله يا مها تا نعاود ليها ترابي من جديد او من غداااا ما غتعتب داااك ليسي من غير فالامتحانات.
زهور لقاتها فرصة نيت الى جلسات فدار غيكون جاب ليها الله خدامة فابور:وااا صراااحة ما دااارت فيها مااا يصلاااح اويلي تخلي قرااايتها و تمشي تخيط دروباااا حشوووومة لااا والله الى حشووومة و راها زعمة القدوة ديال خوتها.
محمد:لكلبة داااارتهاااا بيااااا تلقايها خلطااات صباااح و عشية و لكن والله لا بقااات فيهااااا.
زهور:وا صااافي احبيبي برد و باراكا ما تفقص فراسك اوووف بحالها بحاال مهاااا يخليها سلعة حگل جداتها ما لاوحاتها ليك اناري شكون يقدر على وحدة بحالها جاهناما عندها رجلين.
محمد زفر بقوة و حط يدو على وجهو بتعب:حمقااتني هاد لبنت و الله الى حمقاتني. الساعة تشير لل11 مساءا،محمد داير هو و عائلتو على مائدة العشاء كيساينو زهور تجيب طبسيل ديال لمرقة من لكوزينة باش يبداو ياكلو.
سامي:لواليد نعيط لسارة؟!
محمد شاف فيه و عاود دور وجهو:زهوووور غنباااتو هنا؟؟ جيبي زمر خلينااااا نوضو نعسووو.
زهور جايا لناحيتهم:ها هو غير سكووت.
محمد هضر مع سامي بلاما يشوف فيه:نوض عيط ليها.
سامي ناض كيجري لبيت سارة جا يحلو لقاه مسدود.
بدا كيدق عليها و يعيط:ساااارة ساااااارة سااااااااارة.
سارة كانت باقا جابدا عليها تا سمعات دقان فالباب و صوت سامي عاد فاقت،ناضت حلات لباب فظلام و عينيها مصغراهم من ضو ديال صالة لي ضرب فوجهها.
سامي:اجي تعشاي.
سارة:ما فياش،باغا غير نعس.
سامي:لواليد لي عيط ليك وا ديري عقلك و دوزي تاكلي.
سارة:واا مااا فياااش جوووع.
سامي قبطها من يديها و جرها موراه:ما فيك ما تاكلي،جلسي و حنززي فينا،مهم لواليد يشوف كولشي داير على طبلة.
سارة حنات راسها و جلسات فوق سداري جامعة يديها فوق فخاضها و خلات شعرها هابط على وجهها و مدرقها كاملة.
بداو الاخرين فالاكل و هي باقا على نفس الوضعية،كتسمع غير صوت لمضيغ ديالهم،كملو ماكلتهم و ناضو يغسلو يديهم يلاه غتنوض سارة ترجع لبيتها تا و قفها صوت محمد.
محمد:جلسي نهضر معاك(رجعات بلاصتها و راسها باقي فالارض)من غدا ما كاينا مدرسة.
سارة هزات وجهها و شافت فيه بصدمة:واااش من نيتك كتهضر،بااغي تجلسني من قرايتي.
محمد:قرايتك كون كنتي باغاها غديري راسك فيها ماشي تخلي مدراستك و تمشي تسلگطي وسط لڤيلات مع زوام اوووف ستغفر الله العظيم.
سارة بداو دموعها كيهبطو:ما ديرش ليا هاكا ما تحرمنيش من الحاجة لوحيدة لي باغا نكمل فيها اههههئ.
محمد وقف:كلمة وحدة قلتها و نلقاك معتبة برا دار ندبحك و نشرب من دمك سمعتي ولا لا.
سارة بقات غير كتشوف فيه و دموعها نازلين،عارفا باها الى قال كلمتو را والله لا طاحت للارض عليها سكتات و خلاتو زعما تا يبرد و تمشي طلبو.ناضت توجهات لبيتها دخلات تكات و فراسها كيدور الف بلان و بلان،بقات هاكاك تا نعسات.
اصبح الصباح و تسللات اشعة الشمس لغرفة سارة،حلات عويناتها و بدات كتجبد بلاصتها و تكسل عاد رمات لغطا او وقفات مشات نيشان لقدام لمراية تشوف وجهها كي صبح اصلا من لبارح ما شافتو كيف داير،مع جات عينيها على لمراية مع تصدمات حناكها منفوخين و مصورين فيهم صباع باها و تحت عينيها زراق و عاد جهة فمها لي مدرق بالفاصمة مهم لي شافها يقوليك دخل فيها رموك.دوزات يديها على وجها بشوية و عينيها مغرغرين بدموع،عاد خرجات توجهات نيشان للطواليط غسلات وجها غير بشوية و مشات للكوزينة جات تحل لباب لقاتو مسدود.