الفصل 3
:ناضو لبنات كيتناگرو و يتعايرو و زهور وسطهم كتغوت عليهم باش يتكالماو تا ناضت سارة طارت على نجوى من شعرها كديها و تجيبها و الاخرى طالقا حلقها لله العلام و زهور كتفك شعر بنتها من يدين سارة لي كنزااات عليها.
زهور شافت فسامي لي جالس كيتفرج:نوووض يا ولد لحراااام تفك ختك من هاد لمجنونة ونتا كتفرج عاجبك لحاااال.
سامي باقي جالس:لبنات بينااااتهم انا ما سوقيش.
زهور شافت بنتها كتاكل دق ديال بصح و هي تشد سارة من شعرها،قلبوها تما كومبا دقة فيا دقة فيك و سامي ناض كيتقاتل معاهم يفكهم و هوما بثلاتة تشربكو مع بعضياتهم.
زهور كتنهج:طلقي من بنتي نطلق منك.
سارة:والله غير الى ما قلتها لبابا او وريتكم شناهي تحاماو عليا.
سامي:سارة ختي الله احفظك لاما طلقي منها و تفاكو را لواليد الى جا ولقاكم فهاد لحالة غيخلطكم بثلاثة.
وقفو بثلاثة جامدين فبلايصهم سارة ناتفة نجوى بيد و زهور بيد و زهور ناتفة سارة بيد و مطاكيا على بنتها بيد و نجوى حاطا يديها بجوج فوق يد سارة لي ناتفاها بيها(ههه غير ركزو غتفهمو).بقاو هاكاك تا بدات سارة كترخف يديها من فوق شعر زهور عاد بدات تا هي كترخف و كل وحدة فيهم حاضيا مع الاخرى لا تغدرها و تعطيها شي دقة على غفلا،طلقو من بعضياتهم و هوما حالتهم حالة،جر سامي سارة جلسها فوق سداري و هي شعرها واقف بنتيف و جلد راسها كيدرها بتجباد اما وجهها مع بيض ولا حمر و فيه قمشة صغييييرة جهة عينيها،زهور تاهي مشات شدات بنتها لي كتبكي وتعاير فسارة و بجوجهم شعرهم واقف ولكن نجوى لي بزاااف حيت شعرها حرش او واقف من عند الله بنتيف زاد طلع او وجهها كلو قميش هو وعنقها مهم تجرتلات ديال بصح.
زهور معنقا بنتها:الى بقات فيك يا صفرة يا لاوية تبقى فيا بلااااتي يجي باااك و غنوريك تفرعين اش كيسوا،الى ما نخليه يعلقك ما نتسماش زهووور.
سارة كتجمع شعرها:لي فجهدك ديريه يا خطافة رجالة يا دنفيلة يا شياطة لعيالات(سامي طار عليها سد ليها فمها و هي كتنتر باغا تزيد تعاير و تخرج لي فقلبها).
زهور:والله يا لكلبة تا نعاااود ليك تراابي من جديد الى ما نخليك تكرهي نهااار لي فكرتي تجي فيه هنا فينما تشوفي هاد لخليقة دفلي عليها.
نجوى كتمسح دموعها:انا والله و بقات هي فداار تا نخويها ليكم لقحبة لاخرى ناقصة ترااابي.
سارة دفعات يد سامي على فمها:كيتك ياااا خلااااك انا قحبة بدراعي وحاضيا قاعي كيتك نتي يا لقحبة لي حلاه فرحبة و لي جا تقولي ليه مرحباااااا.
بداو تاني كيتعايرو و يتعاطاو و سامي وسطهم لعاب لاربيط بيناتهم.بقاو على ديك لحالة تا ناض سامي جر سارة و خرجها من دار.مشا داها لواحد جريدة قريبة ليهم جلسها تما و جلس حداها كيشوف فيها كتنفس بزربة و عينيها هازاهم لفوق باش ما ينزلوش دموعها اما رجليها فمابغاوش يرصاو ليها بالاعصاب.
سامي حط يدو على كتفها و هي شافت فيه بعينيها عامرين دموع:بكي خلي دموعك يهبطو علاش حابساااهم.
سارة هبطو دموعها ديك ساعة بغزارة كتبكي و تشهق،جرها سامي خشاها فحضنو و هي معنقاه و كتنخصص،سامي فعلا صغر منها مي هو اقرب واحد ليها حيت تفكيرو كبير و عمرو دار فيها ديك النظرة ديال انها ختو غير من باه ولا نقص منها بحال لي كدير ختو بلعكس هو ديما كيوقف ضد مو و ختو على ودها،بقاو هاكاك شي نص ساعة تا رتاحت عاد جلسات مقادة و دموعها باقين هابطين كتمسحهم و يعاودو ينزلو...
سامي:باراااكة اختي صااافي طيبتي عينيك بلبكا.
سارة شافت فيه كتبتاسم و حناكها مزنگين بلبكا و دموعها باقين مفزگينهم،هزات يديها و دوزاتها على راسو:ههه كبرتي ألبعلووك او وليتي تسكتني من لبكا هههههه.
سامي:شفتي على هاد ضحكة لي ضحكتي و ديك حفيرت زين لي بانت غير زيدي عايري فيا ههههههه.
بقاو الاخوة بجوج جالسين فجريدة كيهضرو و سامي كيحاول يخفف على سارة شوية تا رتاااحت مزيااان و حسات براسها بيخير عاد ناضو رجعو للدار.طلعو للطابق الثالت نيشان دخلو جلسو فصالون بعد ما شعلو تلفزة و ما بانت ليهم لا زهور لا بنتها لا محمد حيت شافو اللوطو ديالو برا.
سارة:فين مشاو هاادو.
سامي:العلم الله اختي.
يلاه غتهضر سارة تا بان ليها محمد خارج من بيت نعاس مخنزر و غوت بسمية سارة تا قفزات من بلاصتها.
محمد بعصبية:سااااااااااااارة.
سارة وقفات بلاصتها كتشوف فيه واقف فباب صالون:ن نعااام.
محمد:اجي لهنا(سارة ما تحركاتش من بلاصتها)قلت ليك اجي لهناااااااااااا،تحركييييييي.
مشات سارة لعندو بخطوات بطيئة و راسها فالارض مع وقفات قدامو مع جمعها معاها بسقلة تا بانو ليها نجووم فوق راسها،و قبطها من يديها بعنف:الى داااابزتي مع نجوى نقووووولو قدك و لعقل مااااا كااااينش و بنااااااات مع بعضيااااهم هاااانية،ولكن بااااااش تجمعي البنت او مها و ديري فييييهم ديك لحاااالة لااااااا،نتي يلااااه نهارك الاول شوفي اش درتي.
سارة جاوباتو وصوتها بزز باش مفرز بلبكا:اهههههئ هوماااا لي تحاماااو عليا ماااشي انا.انا ما درت والو.اهههههئ.
محمد:تحاماو عليك او ما جات فيك تا دقة سبحااان الله(جرها موراه طالع بيها للبيت لي فسطح)انا غنوري مك تكدبي عليا،نتي ما مربيااااااش و انا غنعاااود ليك تراااابي من جديد.تبرييييت فيك صبااااااح او وصيتك و ليني نتي كديري غير لي فراسك.(دخلها للبيت لي لفوق كيديرو فيه گاع داكشي لي ما عندهم ما يديرو بيه ولا ما عندهم فين يحطوه و سد بساروت من براااا)هاد لمرة غتكون غير قرصة وذن ليك اما المرة الماجية غنربط مك و نخليك شي يومين ولا ثلاثة تا ترباي و تحرمي باقي ديري شي حاجة عاد نطلقك. لتحت دار سامي شاف فماماه و ختو لي كيتغامزو و يضحكو.
و هو يهضر معاهم بعصبية:ماشي حشومة عليكم ديرو ليها هاد لحالة ضاربينها و زايدينها بلكدوب.
زهور شافت فيه و هي كطل على دروج لا يكون محمد هابط و هضرات بصوت خاافت:هاااي هاااااي على لبعلوك تا هو ولا يعرف يهضر و يخنزر،ااا والله يا مك او ما دخول سوق راسك تا نعرف شغالي معاك.
نجوى:تفووو على دري كي داير ما عرفت شكون ختك واش انا ولا هي.
زهور:صااافي سكات باكم غيهبط ويلقاكم مناگرين تا نتووما.
هبط محمد من عند بنتو معصب و دخل تلاح فوق سداري،مشات زهور جلسات حداه كتمسكن.
زهور كتشوف فيه:رخف على راسك ا محمد، كون نصحابك غدير هاد لحالة كاملة كون ما قلت ليك والو(قبطات ليه فيديه و بتاسمات)او صافي اسيدي انا مسامحة ليها راها بحال بنتي.
محمد شاف فيها:خاااصها تعااقب باش ترباا و تحرم دير شي مشكل مرة اخرى.
زهور:وا صافي رجوووع الله و صلي عنبي راها بنتك زعمة.
محمد تنهد:اللهم صلي عليك ارسول الله.
زهور:وا مد سوارت نطلع نحل عليها مسكينة غتلقاها حماقت بلبكا.
محمد عطاها سوارت:بهاد طيبوبة لي فيك غتخليها تزيد تدسر.
زهور وقفات مبتاسمة:اسيدي بيني و بينها و اي بنت تقدر تغلط فماماها.
طلعات زهور كتلعب بسوارت فيديها و محمد بقا جالس كيبتاسم على طيبوبة مراتو.
سارة بقات جالسة كدور فداك لبيت لي كلو غبرة كي لحمقة و دموعها هابطين على حنكها لي مصور فيه صبعين باباها،ما تسرطاتش ليها انها ضربات قدامهم و لي زاد كمل عليها انه ضربها ظلم ما عطاهاش فرصة تا دافع على راسها و يسمع منها كيفما سمع منهم هوما،و هي باقا كتهضر مع راسها و تبكي تحل لباب هزات عينيها و شافت زهور واقفة كدير ليها ديك ضحكة ديال الاستفزاز.
زهور دخلات و سدات لباب موراها:كي بقيتي ا ربيبتي لحبيبة
سارة مسحات دموعها:جايا تشفاي اشياطة لعيالات.
زهور:كيبان ليا باقي ما تربيتي.
سارة:شفتي داكشي لي باغا توصلي ليه را عمرك تحلمي بيه معايا انا.
زهور:دوزي تهبطي ايلا باغا تهبطي و ديري فبالك ما حدك هازا خنافرك للسما غتجيبيها غير فضلوعك.
سارة دفعاتها و هبطات كتحلف عليها فلداخل ديالها،دخلات للصالون و جلسات مربعة يديها و عاطياهم بظهر. .بعد مرور اسبوع.
من داك نهار المشؤوم و سارة فالحرب مع زهور و بنتها،الى حنات ليها راس و ناضت دارت شغال ديال دار و خملات راها بنت ناس و درويشة و الى هضرات على حقها و غوتات كتشري ليها صدع مع باها تا كتخليه يهلكها عصا،ليوم الاثنين،فاقت سارة صباح لبسات حوايجها وجدات صاكها و هبطات لتحت كتساين باباها تا نزل عاد ركبات فاللوطو و تحركو فاتجاه القنيطرة،بعد مدة ديال طريق وصلو للوجهتهم و لي هي ثانوية "عبد الرحمن الناصر"،نزلات سارة من اللوطو او وقفات قدام لباب كتساين لمياء و فاتي،بقات شادا ستون مع شي بنات تما تا وصلو شيخات ديال صحاباتها عاد مشات عندهم سلمات عليهم.
فاتي:اوا اش كتعاودي و كي جاتك لعيشة مع باباك.
سارة:اودي غير خليها على الله.
لمياء:مالكي اش كاين.
سارة بدات كتعاود ليهم و تستاراح:او دابا راني غنتسطا والله ما عرفتش شنو ندير.
لمياء:بقييتي فيا والله.
فاتي:لبنات فيكم ما دخلو تقراو؟؟
لمياء:انا بعدا ما فياش.
سارة:تا انا ما فياش مي عندي لماط اختي ما نقدرش نسلت وعاد راني مكحلاها غياب بسبابكم يا لكلبات عمري ما سلتت تا عرفتكم ايييخخخ لاساتذة ولاو كلهم شادين معايا زكير.
فاتي:هههه تفووو عليك وا لماط فهميه غير فيوتيب مع مصطفى اضرضور حسن من لقسم.
لمياء:والله تا غتندمي الى دخلتي،يلاه معانا و غتنساي لهم كامل.
مهم من بعد الإلحاح ديال لبنات قبلات سارة و خصوصا ان لباب تسد اصلا.تحركو من تما على رجليهم كيتمشاو و يهضرو و سارة كتعاود ليهم و تشكي عليهم و هوما جالسين يزيدو عليها بالهضرة انا فبلاصتك ندير ليها و ندير ليها انا فبلاصتك والله تا نشدها نعمل ليها و نترك ليها مهم ديك لهضرة ديال تعمار لي كتخليك تولي كترعد على شي حد،وصلو لواحد درب تما جهة ليسي كيسميوه درب صبليون جا وسط لڤيلات و مستور،جلسو تما فوق واحد طروطوار كيهضرو و يتعاودو تا وقفات عليهم كاطكاط داسيا فلون لكاراميل هبط منها واحد لولد طويل و شعرو مارون مطلعو لفوق داير نظاظر ديال شمس فعينو و لكونطاك فيدو كيلعب بيهم مهم تيتيز بجهد او ولد لوقت،وقفات لمياء كضحك سلمات عليه بلابيز و هي كاملة كتعوج و تلعب بخصلات من شعرها بدلع.
فاتي باقا فبلاصتها هي و سارة:اححح ليوم غدوز خرجة مقودة.
سارة:شكون هادا؟!
فاتي:هادا كريم صاحب لمياء جديد و بوكووو حبة عرفتي العطلة كاملة و هو مشبعنا خرووج و عاد كيتهلى فينا بالمزيان.
سارة:سيرو غير نتوما معاه انا غنبقى هنا.
فاتي:سيري تخراي واش حنا سالتين باش نبقاو حدا ليسي(سارة هزات ليها بكتافها)غير قوليلي اش كيجيك النكد آووو اصاحبتي فدار باك دباز و بكا و حتا فزنقة هاكاك مالكي على حالتك اختي غتشرفي قبل لوقت،را احسن مرحلة كدوز فحياة بنادم هي ديال ليسي كدوزي فيه لحماق مع صحاباتك باش منين تكبري تلقاي ما تفكري او ما تعاودي لولادك،عيشي حياتك و نساي لبشري ما كاينش لي ما دوزهاش فصغرو و منين كيكبر بنادم كيدير عقلو اوطوماتيكمون و داكشي لي دوز فصغر كيبقاو ذكرايات بينو و بين راسو. سارة بقات كتشوف فيها و هضرتها كدور ليها فراسها،فعلا هي واخا كتسلت و كتخرج معاهم للنايت كلوب و داكشي مي عمرها فاتت لحدود عمرها دارت شي مخاطرة ولا شي مغامرة لي تبقى تفكرها و تقول وا دوزتهاااا ديااال بصح فصغري.
لمياء وقفات عليهم:كريم هادي سارة صاحبتي اما فاتي راك ديجا عارفها.
كريم مد يدو ليها و عينو عليها كيطلعها من راسها لرجليها:بونجووغ سارة ساڤا؟؟(شاف ففاتي و رجع تاني كيشوف فسارة)فاتي ساڤا؟؟
لبنات بجوج:حمدالله.
لمياء:اوا لبنات كريم عارض علينا ليوم اش بان ليكم.
فاتي وقفات:انا معاكم بيانسييغ.
لمياء:سارة ما تقوليش ليا ما غتمشيش معانا.
سارة وقفات تا هي كضحك:نمشي علاش ما نمشيش هههه.
كريم:ههه bien(حل ليهم اللوطو)يلاه نتحركو.
طلعو سارة و فاتي لور و لمياء لقدام،دازو من قدام ليسي طايرين جلس كريم كيزلق باللوطو على واحد رومپوان تما و لبنات محيحين بلغوات و بنادم حاضيهم تا بانو ليهم لبوليس عاد تحركو من تما،مشاو لكافي ڤينيسيا آيس هي لاولى فطرو فيها و بقاو مقشبين تما عاد تحركو لمهدية،سطاسيوناو و هبطو گفضو سراولهم و حيدو سبرديلاتهم حطوهم فاللوطو و سدوها عاد تحركو هبطو للبحر لمياء و كريم مشاو كيترومانساو اما فاتي و سارة فمشاو كيجريو و يضحكو و سارة فينما تجي ترش فاتي بالما تهرب حيت خايفة على شعرها و الميكاب.سارة ضحكات و لعبات بحال شي بنيتة صغيرة حسات براسها اول مرة داقت طعم السعادة و الحرية و عليها بغات تنسا كلشي و تعيش هاد اللحظة بكل ما فيها بغات تتمرد على راسها و تجرب اي حاجة كانت باغا تجربها،جرات غوتات بكاات ما خلات ما دارت تا حسات براسها عيات عاد جلسات فالرملة هي و فاتي مربعين رجليهم بجوج و مقابلين لمااج لا تعواج.
سارة:هادي را خدمت لحمداوية اصاحبتي ههههههههه.
فاتي:شدي لعسة عليها و سكتينا ههههه.
سارة شافت فيها:بغيت نطلبك.
فاتي:اممم اشنو.
سارة:بغيت گارو،باغا نجرب داك شعور ديال لكمايا.
فاتي ما عطلاتهاش:گارو عادي ولا جوان؟
سارة:لا لا غير گارو.
فاتي خشات يديها فصاكها جبدات واحد عطاتو ليها و مدات ليها بريكة،سارة دارتو ففمها بتردد فالاول مي من بعد تشجعات حطاتو فشفايفها و شعلات لبريكة و لكن مع ريح ما بغاتش ليها تا درقات بيديها عاد شعل،نترات منو المرة الاولى بقوة تا حسات بصدرها غيخرج من بلاصتو بالكحبة رماتو و هي مخنوقة و ماقادراش تنفس،وقفات كتمشي و تجي فبلاصتها كتنش على راسها و عينيها حمرين و عامرين دموع.
فاتي مدات ليها لما:شدي شدي رزيتيني فگارو هاكاك.
سارة شربات من لقرعة:كححح كححح اناااري غير قوليلي كي كديري ليه اويلي روحي كانت غطلع كححح كححح.
فاتي:غير فالاول كتحسي هاكاك مي من بعد كتولفيه.
سارة:لا دابا لا مرة اخرى هادي و توبة اختي عمرو لا باقي تحط ففمي.