الفصل 2
الجدة مقوية راسها بزز:طريق سلامة و ديري عقلك ماشي لي جبدك تعطيه حني راسك و ماتجبديش صدع مع مراة باك،ديري فبالك بلي هاد الدار لي غاديا ليها دابا هي داركم تما غتكون حياتك جديدة مع باك او خوتك،يعني ماشي غير تقلقي منهم و تهزي راسك و ترجعي عندي لا دابا باك راه مديك بالقااانون فهمتي(تلاحت سارة فحضن جداتها منين بدا باها كيكلاكصوني عليها باش تركب و طلقات دموعها كتبكي و تشهق)الله ارضي عليك ابنتي ديري عقلك ما تعانديش مراة باك باش ما تجبديش صدع لراسك.
سارة:اهههئ غنتوحشك الميمة اههههئ سمحي ليا على لبارح والله ما قصدت شي حاجة من داكشي لي قلت ليك اهههههئ نتي را كثر من ماما اههههئ(تقابلات معاها كتشوف فيها)سمحتي ليا ياكي اههههئ ما بغيتش نمشي و نتي مقلقة مني اهههئ.
الجدة مسحات دموعها:اههههئ اه ابنتي مسامحة ليك غير ما تغيبيش عليا اههههئ نتي لي كنتي معمرا عليا دويرتي هانتي مشيتي وخليتيني اهههههئ احححح غنتوحشك يا كبيدتي.
سارة:حتا انا ألميمة اههههههئ.
الجدة:(حلات ليها باب اللوطو منين شافت محمد بدا كيسوط)ركبي ابنيتي را تعطلتي على باباك اهههئ(عنقاتها سارة لآخر مرة و هوما دايرين جنازة بجوج حتا خلاو ناس كلشي حاضيهم،تباوسو و تعانقو و ركبات سارة مع باها لي تحرك مع طريق و هي حاطا يديها بجوج على زاجة حاضيا جداتها و متبعاها بعينيها لي مهبطين شلال ديال دموع على حنيكاتها حتى ختافات الجدة على مرآها عاد جلسات مقادة و خلات دموعها كيعبرو على الحزن لي حاسة بيه).
محمد شاف فيها:اوا باراكة من لفشووش ياكي نتي لي بغيتي تجي تعيشي معانا؟(سارة هزات ليه راسها بآه)اوا مسحي دموعك او باراكة من لبكا.
سارة مسحات دموعها و هضرات بصوت منغنغ بلبكا:او لمدرسة شنو غندير فيها؟
الاب:دابا حنا فشهر 2 ما يمكنش نجيب ليك انتقاال مهم غنبقى نديك صباح و تقيلي عند جداتك و ندوز عليك لليسي منين تكوني خارجة.
سارة:صافي واخة. دازت مدة ما طويلاش بزااف باش وصلو للعاصمة الرباط و توجهو نيشان للحومة لي كيتواجد فيها منزل محمد الاب لي كيتكون من ثلاثةديال الطوابق الاول كلو گراجات مكريين و الطابق الثاني كامل صالونات مفرشين بفراش فاااخر و الطابق الثالث هو فين كينعسو و يجلسو، وقف الاب اللوطو قدام لباب و دار عند سارة.
الاب:سارة بنتي ما نبغيش نسمعك جبدتي صدع مع شي حد و خصوصا مع زهور(مرتو)حيت هاديك دابا غتكون فمقام ماماك،تفاهمنا؟
سارة شقلبات عينيها بنرفزة:هممم ان شاء الله.
الاب بجدية:راني داوي معاك ا سارة تفاداي صدع باش تعيشي هانية.
سارة:وا صااافي ابابا غير كون هاني.
هبطو بجوج بعد ما كمل محمد التوصيات ديالو لسارة عاد دخلو للدار.طلعو للطابق الثالث نيشان،جلسات سارة فصالون و محمد مشا لبيت نعاس يفيق مرتو.
محمد كيحركها:زهور زهوووور نوضي را لبنت برا فصالون.
زهور بعينين مغمضين:اووووف ا محمد خليني نعس.
محمد:وا نوضي غير ديري معاها صواب و رجعي نعسي.
زهور حلات عينيها و تنهدات:ففففف سير سبقني هانا جايا(تحنى عليها الأب باسها من راسها و خرج)
ناضت زهور (مراة طويلة و بيضة و فرمتها عامرة عندها 43 سنة)غسلات وجهها و لبسات قفطان ديال جوهرة فالبيض و طلقات شعرها لي صابغاه اكاجون و جمعات شوية منو بقراص لور عاد خرجات من بيتها بحال شي عروسة جارا شربيلها فرجليها و شعرها كيلعب موراها.
زهور سلمات عليها:مرحبااا مرحبااا ببنت راجلي.
سارة عوجات شفايفها:الله ابارك فيك اااا مراة لواليد.
الاب:قوليليها ماما دابا راها فمقام ماماك.
زهور خنزرات فيه:ويلي يا محمد على ماما راحنا ما مفاوتينش ببزاف و كون كانت عندها ختها كبر منها كانت غتكون قدي.
سارة دارت فيها ديك شوفة ديال من نيتك:لاوااه لااواااه على ختي راكي تولديني و تفوتيني لهيه او بلاما تحتاجي تقوليلي شنو نقوليك حيت انا اصلا غنعيط ليك يا مراة لواليد يا زهور حيت مي لي كنعرف هي لميمة.
زهور ما عجبهاش لحال:اوا منين هي لي كتعرفيها لاش جرات عليك و عطاتك للباك.
سارة:نتي قلتيها بفمك بابا و هو احق واحد بيا او مي ما جراتش عليا انا لي ختاريت نجي نعيش هنا.
محمد بانت ليه غتشبك بيناتهم و هو يتدخل:اوا ا سارة شفتك ما سولتيش على خوتك.
سارة:عارفاهم باقين ناعسين عليها ما سولتش.
محمد:زهور فيقي دراري يجيو يسلمو على ختهم.
زهور:ماكيفيقوش دابا و ختهم ما عندها فين تمشي وقتما فاقو غيشوفوها. محمد خنزر فيها و غوت بسمية واحد من ولادو:ساااامي ساااااااامي اجي اولدي تشوف شكون جا عندنا.
دازت شي ربع ساعة عاد خرج من لبيت دري سمر شويا طويل و ضعيف عندو 14 لعام و هو لوسطاني فخوتو،لابس سروال ديال بيجامة و سوفيطما بيضة و جار فرجليه كلاكيطة هضر و هو باقي كيتفوه:صباح لخير.
سارة بابتسامة(حيت علاقتها مع خوها سامي مزيانة و تا هو كيهزها فوق راسو منين كتجي عندهم):وااا صباااح نور انعاس.
سامي ضحك و طار عندها عنقها تا تهزو رجليها من الارض:بااااربي ديالنا لاباس عليك توحشتك اختي شحال ما جيتي.
سارة هزات راسها فيه حيت طول منها:هههه تا انا توحشتكم ازين و هانا جيت نجلس معاكم ديما.
سامي:حلفي بالله،والله الى صرعتيها دابا.
جلسو سارة و خوها مجمعين تا خرج ايوب آخر العنقود عندهم،واحد لبرهوش كيطير مع طيور لي فسما عندو 5سنين هو عزيز على سارة مي منين كيبسل و يعصبها كتعطيه علاش كيقلب،جا كيجري عندها سلم عليها و جلس قدامها كيهضر معاها و كل ساعة يدور ليها وجهها بيدو باش تشوف فيه.
وجدات زهور لفطور ماشي على وديت سارة و إنما حيت ولادها فاقو،جلسو على طبلة كياكلو و يهضرو و دراري مجمعين مع سارة،تا خرجات واحد البنت من بيت آخر عندها 15 سنة هي لبنت البكرى لزهور و هي عينيها باش كتشوف ولادها كاملين عزاز عندها و لكن نجوى زايدة عليهم،لبنت كانت ضعف من سارة،تا هي بيضة و شعرها واقف او دايرا ليباگ ووجها فيه حب شباب رقييييق لي كيكون فأغلبية لبنات فهاد سن،توجهات لجهتهم و هي كتخنزر غير من لتحت و جلسات بلاصتها حدا ماماها بحال الى سارة ما كيناش.
محمد عقد حجبانو بغضب و شاف فبنتو:نجوى شهاد قلت الادب،علاش ما سلمتيش على ختك؟
زهور:ماالك كتغوت عليها راها باقا دايخة بنعاس ولا حيت جات بنتك هادي ولات غا زايدا عندك.
محمد:دابا اش وصلنا لهاد لهضرة راهم بجوج بناتي و لي دارت فيهم الغلط غندور فيها.
نجوى بتمسكين:ما كتغوت عليا ابابا تا كتجي هادي عندنا.
سارة بعصبية:هادي عندها سميتها لي هي لالاك سارة و هاد دار لي هي داركم ولات دارنا تا انا ازين دونك حتارمي راسك شوية باش تطوال لعشرا بيناتنا😉.
نجوى:هييييه سمعتي ابابا ياك سمعتي حمدالله لي باقي جالس وسمعتيها بودنيك حيت فينما كنقوليك شي حاجة عليها كاتردني كدابة.
زهور:اواااا ها لبسااالة لي ما كتعجبنيش را نتي لي خاصك تحتارمي راسك شوية باش طولي معانا فهاد الدار ولا رجعي منين جيتي.
سارة بعصبية:مالي جاية حوااازة عندك،هاد دار اللالة دار باا و كيفما عندكم حق فيها تا انا حقي فيها و نتي و لگصبة لاوية ديالك غتفرقوني عليكم ولا غنقلب للوجه الاخر لي راكم عارفينو بجوووج.
محمد خبط بيدو فوق الطبلة:واااااش ما بقيتو تحتارمو حد جالسين تعاطاااو قدااامي،لااا نوضو تشادو حسن نووووضو.
زهور:را نتا....
قاطعها محمد بحدة:سكااااات ما باغي نسمع واااالو هادا يلاه نهار الاول و شوفو اش درتو فيه اما من بعد غتوليو تهزو زراوط واقيلة.
من بعد كلام الاب عم الصمت فالمكان كلشي ساكت غير الاعين لي كدور و طلق شوفات ديال القرطاس زهور و بنتها كيخنزرو فسارة و سارة ما كرهاتش طير عليهم من فوق طبلة اما الاب فا كيخنزر فكلشي و لولاد جالسين كطرف محايد.نرجعو عند الجدة لي بقات جالسة فدروج المحكمة طالقة رجليها قدامها و طالقة معاهم دموعها لي ما حبسوش منين مشات سارة،جاو شي عيالات دارو بيها كيسولو فيها مالها و شكون مشدود ليها حيت حالتها ديال شي وحدة مقبوط ليها ولدها ولا بنتها،بقاو كيسولو و يجاوبو راسهم وما حدها هي ساكتة و كتبكي ما حدهم هوما فضولهم كيزيد يدفعهم يسولو فيها اكثر و اكثر....ناضت الحاجة من وسطهم بعد ما ضروها فراسها و هي كتنعل و تسب فهاد القاعيدا زينة لي كتخلي بنادم يدخل فلي ماشي سوقو فيه و تحركات غادا على رجليها تا وصلات لبلاكة ديال طوبيس جلسات تما تا جا عاد ركبات و مشات لدارها،بعد مدة ديال الطريق وصلات لوجهتها و منين دخلات للحومة و جيرانها كيسولو على سارة واخا شافوها صبح هازا معاها باليزتها مي هادي هي القاعيدة ديالنا واخا تكون عارف اش طاري كتبقى تحك على ضبرا و تحرج فالانسان لي قدامك تا كيخرج على طوعو و داكشي نيت لي دارت لحاجة،بقاو عليها بكثرة الاسئلة و الهضرة لخاوية تا تگرعات عليهم لي كانت جامعة فقلبها كامل و عرقات ليهم من طاسيلة للفاصلة عاد طلعات لدارها و هي مرتاحة شوية،ماجات فين تحيد جلابتها و تجلس تا سمعات لخبيط فالباب.مشات كتغوت على لي كيدق باش يحبس كي حلات لباب دخلات مراة قصيرة و بيضة و عامرة تكون فديك ثلاتينات لابسة جلابة خفيفة و جامعة شعرها لفوق بقراس و كتشبه لسارة بزااااف فالوجه و حتا العينين.
كريمة دفعات مها و دخلات معصبة:فين بنتي ا مي؟
الحاجة سدات لباب و دخلات جلسات حدا بنتها:عاد تفكرتي بنتك.
كريمة:فيييين ساااارة ا مي(ناضت دخلات لبيت بنتها كتقلب فيه)سااااارة سااااارة(حلات لماريو لقاتو خاوي و هي تخرج عند الحاجة)فيييين ديتي بنتي فيييين ساااارة واااا جااااوبيني.
الحاجة ببرود:مشات عند باها.
كريمة ضربات على فخاضها و جلسات:اويلي ا مييي هادي هي الامانة لي مخليا ليك اااا عطيتيها لبااها و حرمتيني منهااااا.
الحاجة:لبنت كبرات و مشاكلها كبرو معاها و انا ما بقا عندي جهد ليها باش نبقى تابعاها.
كريمة:ديييك ساااااعة جيبيهااااا ليااااا ماشي تعطيهااااا لداااك شمااااتة و تزيدي تخبيهاااا عليا تا توصلني لخبااار غير من جيراااان.
الحاجة:كنجيبها ليك و كترجعيها ليا ديما كديريها و على هادشي عطيتها لباااها حيت نتي كتشديها يومين ثلاثة و كتجي تلاوحيها هنا و تمشي تقابلي ولادك ودارك كاينا ولا ما كايناش(كريمة حنات راسها حيت مالقات ما تقول)لبنت خرجات على طوعي و ما بقاتش قد يدي ولينا كلمة بكلمة و كون بقات معايا غير غنخرج عليها،لبنت خاصها لي يحكمها و يحضي معاها خاصها لي جهدو قد جهدها لي يتبعها و يشوف معامن مرافقة.
كريمة:غيحرمني منها ما بااقاش غنشوفها ا مي و كولشي بسباابك.الحاجة:المحكمة عاطياك تشوفيها جوج دلمرات فسيمانة غير تهناي.
كريمة:اويلي على المحكمة،لمحكمة ا مي عطيتيها ليه بالقانون(ضربات فخاضها)اويلي وحدي على مي لي خاصها تشد ليا بنتي و تحافظ عليها مشات عطاتها ليه بالبوليس اويلي وحدي حرماتني منها حياتي كاملة اويلي وحدي شوااتني فكبدتي.
الحاجة:اشمن كبدة ولا گانصا لي كتهضري عليهم ونتي عطيتيها ليا منين كانت باقا فلگمااااط(ضربات صدرها بيديها) هاديك بنتي انا و انا لي نبكي عليها و انا لي نووووح و نقول بنيتي مشاااات عليا انا لي نقوول خوااات عليا داااار انا لي نقول تشوييييت فقلبي😭😭😭😭انا لي نبكي و نزيد نبكي اما نتي غير تمشي لدارك و تشوفي ولادك و تنسايها،انا لي بقيت بووووحدي😭😭😭😭😭😭.
كريمة بقات غير كتشوف فمها و ما لقات باش تجاوب حيت فعلا كلامها كولو على حق:ماا نسمحش ليك ا مي على هادشي لي درتي عمري نسمح ليك حرمتيني من بنتي(وقفات كتمسح فدموعها لي نزلو بالحرقة ديال بنتها وخرجات بحالها).
هزات لحاجة واحد تصويرة ديال سارة عنقاتها و كملات على بكاها و تنخصيصها.
نرجعو عند سارة لي ناضو من فوق الطبلة بعد ما هدات النفوس شوية،جمعو لماعن بسكات و شي ما كيهضر مع شي كملو شغلهم و جلسو تاني كيشوفو فبعضياتهم تا هضر محمد.
محمد:سارة غتجلسي مع نجوى فبيتها بينما وجدت ليك بيتك بوحدك.
نجوى دارت عند ماماها و نطقة بشوية:ماماااا😠.
زهور شافت فيها بمعنى سكتي:ايييه ماشي مشكل راهم خواتااات و بيت واحد كافيهم.
نجوى بدات كتلعب برجليها بعصبية و قيسيها دير بييييق.
محمد :انا غنخرج نمشي للقيصارية نشوف المحلات و نتوما ديرو عقلكم ما نبغيش نلقا صدع منين نرجع.
وقف بعد ما هزو ليه راسهم بآه عاد هز سوارتو و خرج.
نجوى هضرات بعصبية:وااااش من نيتك اماما غنجلس انا و هادي فبيت وااااحد را امپوسيبل توقع و بيتي ما غندخل ليه تا خيتي.
سارة:الحااااجة راني قلت عيطي ليا بسميتي ولا سدي كابينتك عليا و لبيت غنجلس فيه ماشي حيت ما عندي فين ننعس توتوتوووو غنجلس ضد فيك الحبيبة باش تعلمي تشدي معايا لعكس.