الفصل 1
لبطلة ديال حكايتي هي بنت مراهقة سميتها سارة،من نهار فتحات عينيها على الدنيا و هي يتيمة،و اليتم ماشي غير فحالة فقدان الوالدين،لا حيت كاينين لي والديهم عايشين و فاقدينهم و هاد الحالة كتكون قصح من الموت لانهم ادا ماتو غتبكي عليهم و تبرد حرقتهم مع لوقت مي منين كايكونو عايشين و ناسيينك هنا كتكون الدقة مضوبلة و الحرقة زايدة،سارة وحدة من هاد الاطفال لي ميتمين فحياة والديهم لانها منين عقلات على راسها و هي عايشة مع جداتها،مامات ماماها،الاب و الام ديالها تزوجو زواج تقليدي يعني إرضاءا للعائلتين،عمرهم تفاهمو ولا حسو بأي انجدب لبعضياتهم،حياتهم كانت عبارة على شد ليا نقطع ليك ديما نگير و صدع ما كان كيجمعهم غير لفراش(هادي لحاجة الوحيدة لي لمغاربة ما كيدابزوش فيها😏)او من بعد عام ديال الزواج قررو ينفاصلو باش يرتاحو بجوج من هاد الصراع المستمر بيناتهم و فعلا داكشي لي كان و تهناو نسبيا مي نساو ثمرة هاد الزواج لي هي سارة لبنيتة لي من صغرها و هي فالمحاكم الام كتجري على النفقة و الاب كيجري على الحضانة و لكن هادشي كان غير ف6 شهور الاولى،من بعد الاب تزوج سيدة لي كان كيخون مرتو معاها و أسس حياتو بجنبها و بهادا الحضانة تعطات اوطوماتيكمون للأم،الأم لي ما كملاتش عام تا هي تزوجات بحكم أنها تقهرات بالمصروف و متطلبات الحياة الصعبة زائد انها باقا صغيرة و زوينة دونك ما بغاتش ضيع راسها و تفني شبابها فتربية بنتها،هاد المرة ما كان لا صراع على لبنت لا والو لأن مراة الأب ما قبلاتش سارة تعيش معاها كربيبة ليها خصوصا و انها كتولد يعني ماشي عاقر باش تربي ولاد ناس و راجل الأم تا هو رفضها و بهادا تعطات المسؤولية ديالها للجدة و من تما و سارة عايشة يتيمة فحياة والديها....
×××××××××××××××
بأحد الاحياء الشعبية بمدينة القنيطرة و داخل شقة متواضعة يعني على قد لحال كانت مرأة كبيرة جالسة كتحنزز فحفيدتها و تنگر عليها كيف كل نهار مع هاد لوقيتة.
الجدة(مرا كبيرة شوية من لعيالات لقدام عاقدا راسها بفولار و لابسة قفطان خضر كيعقل على جد نمل باقين حروف زين باينين على ملامحها و كيف قالو ناس زمان الى مشا زين كيبقاو حروفو):ااافين غاديا تاني اديكاااااه؟
سارة:عندي ليكوغ الميمة
الجدة(كدور فراسها):لكوعر مع 8 دليل و مالكي على هاد تقزيبة كاملة على قْلْتْ شراااوط عندك وداك لعكر لي يعكرو معاك 10 فيه مالكي ابنيتي على هاد لحالة.
سارة جلسات حداها:وا الله اهديك الميمة ليكوووغ ليكوووغ ماشي لكوعر و باراكا من نگير هاااا لعااار ويلاه عطيني باش نشد طوبيس و نخلص الاستاد راني غنتعطل.
الجدة:ياكي العطلة هادي اشمن(بغات تقول ليكوغ و ما عرفاتش)هاداك لي كتمشي ليهم و علاااه اختي شحال من مرة فالشهر كيتخلص هاد الاستاد ياكي عاد جوج سيمانات هادي باش عطيتك خلصتيه. سارة بدات كدور فعينيها:على نسيتي داك شهر لي كنت خلصت الما و ضو بفلوسو اوا راه بقا كيتسالني شهر من داك لوقت او العطلة راني جالسة كنپريپاري فيها للناسيونال ماشي كنرتاح.
الجدة:اييينا شهر؟؟شوووفي هاااااه أنا رااا كثرثي عليا بهاد تنوووعير ديالك،يااا والله او ما تشدي معايا طريق تا نسيفطك عند مك ولا باك هوما يتكلفو بيك اما انا عييييت.
سارة وقفات معصبة:وااا غير سيفطيني اللهم العيشة معاهم والا معاك را انا لي عييت ماشي نتي،هووما عايشين بيخير مع ولادهم لي بغاوها يحضروها ليهم و انا الى تفكروني بديك 1000 درهم مرة ف5شهور.
الجدة:وا والله يا بنيتي غير الى ما درتها ليك على قد فمك هاد المرة و عنداكي ترجعي عندي كتبكي و تشكي را والله غير الى ما شديتك و رجعتك ليهم من جديد.(سارة هزات صاكها و خبطات الباب موراها)دييييه معاك حسن،الله انعل بوها ترابي يخخخخ كيفك كيف مك و باااك.
+++++++++++++
مشات سارة لي ولا فعمرها 17 سنة بنت متوسطة الطول و ضعيفة، بيضة و حروفها زوينين شعرها اشقر فالاصل مي هي زادت فتحات اللون بصبايغ و لي كيميزها عويناتها لي كبار و لونهم ازرق فاتح زائد حفرة زين لي ثاقبة ليها حنكها،معروفة عند الجميع بباربي الگرواضة حيت كتنطق حرف الراء بطريقة مختالفة،هاد لعام عندها لباك دايرا سيونص ماط،واخا هاد الشعبة صعيبة مي هي كانت مزططا راسها فيها قبل ما تتعرف على اصدقاء السوء و تنجارف مع تيار سليت و ما جاوره ،وصلات لبلاكة و جلسات كتساين فصحاباتها يجيو،ولي داز من حداها كيبسل عليها بحكم جمالها لي بارز و لي كيخلي الكل يظن انها گاورية زائد اللبس لي لابسة،كسيوة قصيرة فوق من الركبة لاصقة مع سوبر ستار بيضة فرجليها و كويرة قصيرة من لفوق محلولة و مگفضة ليها كمامها،هازة صاك صغير و شعرها الاشقر طالقاه على طولتو.
لمياء(صديقة سارة تا هي مقزبة على خزيت واشما حجبانها و شعرها دايرا ليه زعورية زعفران و كولو بوكلي و المسكة ففمها كتلوك فيها كي شيخة):ا مال زين مكشر هههه.
سارة وقفات كتسلم عليهم:اودي غير خليها على الله راني 0 درهم الميمة شداتها تاني لكشة.
فاتي(هي سميتها فاطنة و لكن كولشي كيعيط ليها فاتي،او تاهي واحد لمعيطة كثر من صاحبتها):ما ضربي حسبة ليوم كاين لي يخلص علينا ههه غير نوضو تحركو راهم من صباح و هوما يعيطو😉.
سارة شافت فيها عاقدة حجبانها:شكون هادو تاني؟؟ياك قلتو غنخرجو غير بوحدنا!!
لمياء:والو غير شي دراري بغاو يسهرو معانا.و طبلة لي تهز 3 تهز 6😉.
سارة وقفات ليهم:تهز تا 10 ماسوقيش انا و شتي راااا والله لا سهرت مع شي تااامل بغيتو نمشيو نسهرو غير حنا مع بعضياتنا مرحبا،غتجيبو ليا شي بوركابي غنرجع بحالي دابا نيت و بناقص منها خرجة معاكم اصلا را نهار باين من صباحووو.
فاتي:اهاااه ازين نمشيو غير بوحدنا مي ديري فبالك بلي نتي 0 درهم و انا عندي 20 درهم هي لي نكساب ما هي تا ثمن شيشة لي غنشد،شكون بغيتي يخلص علينا مثلا مول شي ؟؟!.
سارة خنزرات فيها:الصمت.
فاتي:وا ديري عقلك ازين الى بغيتي نشطو هاد ليلة و اصلا را ماشي اول مرة غنديروها.
سارة:درتها مرة و ندمت عليها و اصلا بسبابكم،نتوما لي بقيتو عليا وا دراري ولاد ناس غير غنسهرو و نضحكو و صافي،تا صدق ولد لكلبة باغي ياكل ليا لحلوة.
فاتي:اممم ربعة لعدوية نتي.
سارة:فااااطنة😡😡 فاتي هازا يديها بجوج و كديرليها غير بشوية عليك:كااالما ا زين كااالما بلاما تعصبي مي بيني و بينك الى بغيتي تمتلي دور الشريفة ما تلعبيهش قدامي حيت راحنا عشرت عمر😉.
سارة دارت يديها على جنابها:على مالي اختي بنت ليك كنقيل هازا رجلي للتوامل بحالك ولا لقيتيني بايتا فدار عويفية،الحمد الله بشرااافي كيتك نتي و راكم بجوووجكم عارفين سارة اش كتسوا دونك خليني ساكتة حيت راكي عارفة فمي خاااسر و خاسو غير ما يجبد😉.
لمياء غمزات فاتي:صااااافي البنااات اويلي واااش غتنوضوها على هادشي(وجهات كلامها لسارة)و تانتي اصاحبتي كلمة جوج كتحطي ليها لمزيودا ديالها كاااملة.
سارة:لمياء راكي عارفاني عندي نص عقل و كنوض على نقشة اواا قوليليها تفوتني عليها باش ما نوليوش دراري صغار و نفرج فيها لبشري.
لمياء:وا صافي غير سكتو،ليوم لعراضة على حسابي غير تهناو اووووف(شافت ففاتي)عيطي للدراري قوليليهم ما بقيناش جايين(و داكشي نيت لي دارت فاتي دوزات نمرة ديال دراري و مشات كتعتاذر منهم،تا قطعات معاهم عاد رجعات عندهم)
تحركو لبنات لنايت كلوپ ديال اوطيل جاكاراندا بمدينة القنيطرة على رجليهم،ومنين دخلو و هوما فضحك و النشاط معا لڤيدورات مع البارمان و سرباية حيت كيعمرو تما بزااف فا ولاو معروفين عند الجميع.
مشاو تقنتو فواحد لكوان كيتفرجو و يضحكو بيناتهم،لي يشوفهم ما يقولش هوما لي كانو منوضينها دابا شوية.
جات لمياء من جهة لبارمان هازا فيديها كاسها ديال لعصير مخلط مع شوية دلكحول و جلسات كتشطح فبلاصتهاو قابطا لگارو فيديها،دارت شافت فسارة و قالت:اوا زين اش ناويا ديري مع جداتك.
سارة:ويلي تناااكت على بويا فكرتيني فيها شحال فساعة الى تعطلت تاني تفرج فيا جيران و انا راسي مفروع عليا بنگيرها.
لمياء صغرات عينيها و قربات ليها:واش ما كيجيكش راسك اوووڤر بزاااف اختي؟؟.
سارة بعدم فهم:كيفاش!!
فاتي جالسة كتشيش حداهم:انا نشرح ليك الحبيبة يعني ازين مك و باك لي عندهم لحق عليك و بجوجهم عاطيينك حريتك و نتي ضاربا لحساب لجداتك كثر منهم(ساطت دخان عليها)طلقيها تسرح مالكي هازاها منين تقالت.
سارة هزات ريدبول ديالها كباتها فكاس و بدات كتشرب منو و تهضر:ليوم نوضتها معاها غير على هادشي و قالت ليا غتسيفطني عند لواليد ولا لواليدة.
لمياء:اوا مزيااانة هادي ياكي بااك ميسوور اوا سيري عندو و تهناي.
سارة:وا نمشي مي انا او مرتو ما كانتفاهموش اصاحبتي كيف لمش مع لفار و بنت لحرام كتجبد ليا صدع مع لواليد بزاااف غير كيدخل و تبدا تعمر ليه فراسو.
فاتي:واخا هاكاك نتي شوفي لاڤونطاج لي غيكون عندك تما.
لمياء:اه اصاحبتي لفلوس بزاايد لخروووج و دوران طول نهار😉.
فاتي:و هاكا غتعيشي نتي بيخير و حتا مراة باك ما غتخليليها فين تجبدك حيث ما غتقييليش معاها.
سارة:خليوني ندورها فراسي و نشوف.
لمياء:اوا نتي تعرفي لي غيسلكك حنا غير باغين مصلاحتك.
سارة:عارفة لي كاين ابب.
فاتي مدات ليها شيشة:شدي جبدي شي جبيدة و نساي لهم.
سارة بامتناع:لا لا عارفاني ما عنديش مع هاد لويل.
لمياء شافت ففاتي:هاااا لفقيهة سارة خرجات لينا من جديد(ضحكو عليها بجوج عاد كملات هضرتها)،احبيبتي را حنا كانعيشو مرة وحدة ماشي 100 دونك باراكا ما تعقدي فالامور و عيشي حياتك كيف بغيتي نتي ماشي كيف باغين ناس...
سارة ما رداتش بيهم يضحكو عليها و هي تمد يديها وخداتها:اش فيها بعدا؟
فاتي بابتسامة:غير المعسل ما تخافيش😉. كملو لبنات سهرتهم تال 11 دليل عاد تحركات كل وحدة لدارهم، فاتي و لمياء عندهم دنيا هانية حيت وحدة مها خدامة فالخليج او وحدة عايشة مع جداتها و لاعبة عليها ل10،اما سارة غير دخلات و هي تجرها جداتها من شعرها.
الجدة كديها و تجيبها من شعرها:اجي يا لكلبة فين كنتي علخانزتاعبوووك..دووووي يا بنت لحراااام ما تهناااي تا تجيبي ليا شي كرش دلحرام عااد ترتاااحي.هاااا گاااع لبنات دخلو لديورهم و نتي جاياني تال نصاصات دليل.و كولك ريحت عوااافي تقولي كنتي فالفرناتشي
سارة كتفك شعرها منها:وااا طلقي مني اااااي،حيدي عليااااااا(هزات صبعها فوجه جداتها بتهديد و غواتها كيتسمع من راس درب)هااااه مااانتي مي مانتي باااا باش تحكمي فيا كتسمعي ولا لا،ربيتيني الله اكثر خيرك ولكن باش تحكمي فياااا لاااااا و ألف لاااااا،الى كانو مي و باااا لي والديني عاطييني حوريتي شكووون نتي باش تحرميني منهاااا،نتي ربيتي و هوما خلصووووك يعني ما درتيش داااكشي في سبيل الله ماشي حباااا فيا كووولشي على ود لحبة💰💰،منين كنت صغيرة كنت كنشوف لفلوس لي كيسيفطو ليك باش تصرفي عليا كتخبيهم و تخليني بجووووع ما كاااانش عندي لقدار نقوليك عطيني منهم تا درهم مي دابااااا صاااافي مااا بقاااا عندي علاااش نسكت،و الى مولفين بناااتك يجيبو ليك كرش من زنقة اناااا مااااشي بحاااالهم.
الجدة:ياااااك ابنيتيييي يااااااك،وليناااااا كنتعاااايرو هناااا،صاافي تقااادو لكتاااااف،ولينااا قد لقب قد سطل ااااا(ضربات بيديها فصدرها)نستاااهل اييه نستااااهل كااااع لي ديرييي فياااا سررررري اناااا لي باغاااا ندييير لخيييير فبنت بنتيييي،قلت نربييهاااااا و نكسب فيهااااا الااجر ساااعة معاااك نتي جمعت غير ذنوووب(شافت فيها بعينين دامعين ونطقات بصوت كيرجف من كثرة لغوات)اووو تاااا داااابا ماااا طلبتي غير حقك من غدا غنمشيو للمحكمة حنااا و بااااك باش ياخد الحضاااانة ديالك حيت مك الى خداااااتك غترجعك ليا اللهم باك(تمشات لجهة السداري فين كتنعس حيت بيتها عاطياه لسارة)عشااك فالكوزينة،منين تسالي عيطي لباك باش يتلاقا معانا فالمحكمة.
تمددات فبلاصتها بصعوبة و هي كطلع نفس بزز و عطات بضهرها لسارة لي بقات واقفة بلاصتها كتنهج و عينيها عامرين ندم خصوصا منين سمعات الشهقات ديال جداتها،عمرها تصورات غيجي نهار لي تقول كلام قاسي بحال هادا لميمتها،جرحاتها و صدماتها فيها و تصدمات تا هي فراسها،دخلات لبيتها و جلسات فوق ناموسية كتشوف قدامها و دموع مجموعين فعينيها و لداخل ديالها كيغلي،عيات ما تعاتب فراسها و تلوم مي صافي دابا ما غتنفعها ندامة حيت لهضرة الى خرجات من الفم ما كترجعش و خصوصا لهضرة لقاصحة لي كتمشي لهادا ❤ نيشان،هاديك هي صعيبة...
بكات شوية باش تبرد على راسها عاد هزات تيليفونها عيطات لباباها هضرات معاه و فهماتو شنو كاين قاليها مرحبا و دار معاها باش يتلاقاو فالمحكمة مع 9 دصباح و هو غيتكلف بكولشي.أصبح الصباح و طلعات شميشة لي علنات عن قدوم يوم جديد،ناضت سارة لي ما نعساتش ليل كامل براسها بسباب شيشة لي ضربات، لبسات حوايجها لي كانو عبارة عن سروال سليم و كبيتشو و سبرديلة،جمعات شعرها على شكل ديل حصان و هبطات باليزتها من فوق الماريو حلاتها و بدات كتخشي فيها لحوايج،كملات شغلها عاد خرجات من لبيت جارا باليزتها موراها و صاكادوها فظهرها و هي ما عندهاش لوجه لي تهزو فجداتها من بعد لي طرا بيناتهم لبارح،مشات جلسات فوق سداري كتفرك يديها مع بعضياتهم بتوتر و كتشوف فجداتها كتوجد لفطور فلكوزينة.
بقات كتساين فيها تا كملات فطورها و جمعات لماعن عاد لبسات جلابتها و خرجو بجوج وحدة ما كتهضر مع الاخرى....بعد مدة ديال الطريق وصلو للمحكمة الابتدائية بمدينة القنيطرة.
وقفو تما وسط زحام و صداع ديال ناس،بقاو واحلين لوسط ما بين داخل و لخارج،تا بان ليهم محمد واقف حدا اللوطو ديالو مع شي راجل هاز شكارة كحلة،مشاو عندو سلمو عليه و على الراجل لي معاه و لي عرفو بأنه المحامي ديالو عاد دخلو للمحكمة باش يحضرو للجلسة ديالهم،بعد مرور مدة ديال المداولة و داك تخربيق تصدر الحكم و تعطات حضانة سارة للأب ديالها...
قدام باب المحكمة كانت سارة واقفة و قابطة لباليزة ديالها فيديها و كتشوف فالجدة ديالها كتهضر مع باباها و باين من حركاتها كتوصيه عليها...سالاو هضرتهم عاد جاو حداها خدا باها لباليزة خشاها فالكوفر...
الاب محمد:الحاجة ركبي نوصلوك معانا.
الجدة:لا اوليدي الله ارضي عليك باقي عندي ما يدار ما غنمشيش لدار دابا.
الاب:على خاطرك(مد يدو ليها سلم عليها و عطاها شي باراكة)شدي الحاجة هاد البراكة او مرحبا بيك فأي وقت را دار دارك.
الحاجة بخجل:الله اكثر خيرك اوليدي ديما مفكرني و هاز ليا لهم او مرحبا بيك تا نتارا دار دارك.
الاب:عارف لي كاين الحاجة(وجه كلامو لسارة لي حانيا راسها للأرض و حابسة دموعها بزز)انا فاللوطو سلمي على الحاجة و ركبي باش نمشيو را باقا تابعانا طريق.
سارة هزات ليه راسها بأه و سايناتو تا ركب فاللوطو عاد دارت عند جداتها كتشوف فيها و هضرات بصوت منكاسر:لميمة أنا غنمشي😔.