35 الفصل الاول
الحلقـة الـ 35 والأخيـــــــــرة
ستكون الحلقة مقسمة لثلاث فصول ..
الفصل الأول
" صراع مع الموووت !! "
*****
" ساره ياروح مازن "
"لا تظنين إني بيـوم التفت لغيرك "
" فراقك دمار "
" فراقك عذاب "
" أنا عايش بهالدنيا عشان أحبك "
" عايش عشان أهواك "
" عايش عشان أضوي السعادة بقلبك "
" ســاره يا أعـذب الأسمـاء .. ساره يافتنة الكـون والفضاء .. كيف أحيا أنا بدونك بحق السمـاء "
" فاتنتي ياملكة قلبي .. يابلسم روحي وكيــاني "
" إليك قلبا لم يعشق غيـرك على مر الأزمــاني "
" في قلبي وحدها ساكنة "
" في قلبي وحدها قابعة "
" روحي وهواي وأنفاسي ودمي وعروقي عشقــوها "
" أشعر أن حبك يزداد بقلبي أكثر وأكثر وأعود لكي أعلنه لكي عبـر سطوري "
" لأني أحبك "
" لأني أعشقك "
" ولأني لا أرى غير رسمك في عيوني "
" اذكريني وأحبيني "
" فأنا لا دنيا لي غير ديناك فاعشقيني "
" فراقك مووووووووووووت ياحبي وجنوني "
كلمات مبعثرة .. بصعوبة قدرت تقرا منها الي قرت لانها ممزقة واهي تلمها لبعض وتحاول تركب الاوراق وتقرا .. ولأن دموعها تمنعها من القرايه .. وكل مامسحتها وقرت عبارة سالت دموعها أكثر .. لين حست بالنار تسعر بصدرها .. وكان كثير وصعب عليها تقرا هالكلام وتتوصل لهالحقيقة بعد كل هالوقت .. وبعد مافات الأوان .. بعد ما ربطها الزمن بإنسان ماقدر يحرك بداخلها أي شعور .. وخسرها لانسان هو روحها وحياتها ودنيتها .. وخــلاص اتدمرت .. !
وغطت وجهها بصدمة وهي تهمس بصوت مذبوح : مو معقول !! لالا مستحيل الي قاعد يصير فيني مستحيل !!
تقطع قلب سمر على حالتها وبالقوة قامت من مكانها وقعدت جمبها بالارض وهي تقول من بين دموعها : أدري انها صدمة ياساره .. بس حتى لو كان هالشي مو وقته الا انه بيريح خاطرك تجاه مازن وانتي الي كنتي تحسبينه متعمد يتركك ويبعد عنك ومايبيك .. الحين بترتاحين يوم عرفتي حقيقة حب مازن لك..
ساره وهي تبكي : لا ياسمر لاااا ! ياليتني قعدت على عماي وماعرفت عنه شي .. كنت ماراح أحس بالذنب .. اما الحين بعد ماعرفت كل شي بظل طول عمري ندمانة وطول عمري بحس اني انا السبب !! (( وناهجت واهي تقول : أنا السبب بضياع كل شي ياسمر .. انا الي ماصدقت مازن وابتعدت عنه وتركته بعز حاجته لي وتعبه وتعاسته .. كان كل شي ممكن يتصلح لكن جروحي حطمتني وماقدرت استحملها ياسمر ... (( وخبطت الأرض بإيدها واهي تبكي وتقول : ماقدرت أستحملها .. ماقدرت .. ماقدرت ..
ضمتها سمر لصدرها واهي تبكي وتحس بالالم على حالة ساره وقالت : بس حياتي هوني على نفسك ماتدرين يمكن الي صار خيرة من ربي .. يمكن الله كاتب لك السعادة مع وليد مو مع مازن !!
ساره وهي تبكي : لا سمر انا مو مبسوطة مع وليد .. اكذب على نفسي واوهمها بهالشي لكني مو قادرة احبه ولاني قادرة انبسط معاه .. سمر انا ظلمت الكل معاي .. حرقت قلوب الكل بسببي خلاص مابي اعيش بهالدنيا خلااااااص !
سمر : بس ياساره بس والله قطعتي قلبي لا تقولين هالكلام .. !
ابعدت ساره نفسها عن سمر وطالعت الاوراق بالارض وهي تقول : لا انا انتهيت ياسمر .. انتهيت بعد هالشي خلاص ماظني اقدر اعيش وانا اشوف شلون مازن متعذب بسببي .. وليد متعذب ومحترق عشاني .. وانا مو قادرة اسعد نفسي ولا اسعد احد معاي .. قوليلي بالله مو الموت أريحلي من كل هذا !
سمر : لا غلطانة حياتي .. ساره اذا انتي مو قادرة تنسجمين مع وليد تقدرين تنسحبين من حياته .. توك انتي وهو مابعد صار بينكم لا زواج ولا شي ! مو تدمرين نفسك بهالطريقة وهالحالة !
ساره : أترك وليد ياسمر طيب وبعدين ؟؟؟ عاد مازن الي يبيني الحين ؟؟ مازن كرهني ياسمر .. على كثر ماحبني كرهني ! مازن لو يندق لحمه بلحمي والله لايفصل لحمه عني ولا يرجعلي !
سمر بألم : ماظنيت ياساره .. انتي ناسية الحب الجامح الي كان بينكم وناسية كيف كان يموت بهواك ؟؟
ساره : كان ياسمر كان .. انتي ماشفتي نظرة عيونه يوم تواجهنا قبل فترة !! طالعني بنظرة مقيته سمر .. وكلمني بنبرة عمري ماسمعتها منه .. نبرة تطلع من انسان حاقد ويكره الشخص الي قدامه !
سمر : لانه شافك مع وليد وماستحمل ياساره ... ولازال اهو عايش بعذاب وهلاك لكن صدقيني لو كان في فرصة ترجعون لبعض والله بيكون اسعد انسان .. مازن اخوي وانا اعرفه ..
ضاعت عيون ساره بالفراغ واهي تهمس : بس مستحيل ياسمر.. قلوب الناس مي لعبة عندي .. احب مازن واتركه .. واروح لوليد وأعلقه فيني وأتركه وأرجع لمازن .. ! وطالعت بسمر بنظرة الم وهي تقول : الله مايرضى ياسمر .. ومن وين بيكتب لي السعادة وانا معيشة غيري بعذاب !!
طالعتها سمر بحيرة وألم ! ليه كل هذا يادنيا .. ؟ بعد كل الحب والعشق الي ماصار ولا استوى مثله بهالدنيـا .. يضيع بلحظة غفلة وجرح وغيرة وألم .. ولما نصحى من جروحنا وآلامنا .. نلاقي الاحلام ضاعت وانتهت .. !! ياويل قلبي على صدمتك ياساره .. ويايل قلبي على جروحك يامازن !
***********
دخل وليد بيت أهل عمه واهو ثاير الاعصاب .. واول من صادف قباله كان فهد ..
وليد وهو يحاول يتحكم باعصابه : السلام عليكم ..
فهد : عليكم السلام !
وليد : وش السالفة يافهد !
فهد بتنهيدة : علمي علمك ياوليد .. هذه هي من يومين مسكرة على نفسها الباب .. لا ترد علينا ولا على اتصالاتنا .. وبلغتك عشان تجي تشوفها يمكن تتجاوب معاك !
وليد وهو يمشي للدرج : يومين يافهد وتوك تقولي عن حالتها ؟؟
فهد : وانت ليه تنتظرني اقولك ؟ دامك فاقد حسها ليه ماجيت تسأل عنها !
وليد : امور بيننا يافهد لكن ماتوقعت توصلها لهالحالة !
فهد : انت عارف ياوليد طبع ساره من قبل تاخذها .. أرجوك وليد راعها قد ماتقدر !
وليد وهو يطلع الدرج : والله يافهد ماسويتلها شي .. اهي الي مو راضية تحس فيني وتتقبلني بحياتها .. (( وكمل بتنهيدة : وين غرفتها ؟؟
فهد : باطلع معاك .. وطلع الدرج معاه لين غرفة ساره ودقوا عليها الباب .. وكالعادة لا استجابة !
وليد وهو يدق الباب بقوة أكثر : ســـــــــاره .. ســـــــــــاره فكي الباب انا وليد فكي الباب حياتي ..
ووقف واهو يرهف سمعه ياعسى يسمعها تمشي ولا ترد .. وخاب أمله وماسمع منها شي ودق مره ثانية وقال : ساره لو مافتحتي باكسر الباب !! سامعه ؟؟ باكسر الباب !!
وانتظر لحظات الا وسمع خطوات تقترب من الباب .. وثواني وانفتح الباب لتظهر من خلفه ساره بمنظر يقطع القلب والروح .. عيونها متوقدة كالجمر ووجهها شاحب ومنخطف لونه !
فهد ماتحمل منظرها وقال : شفيك ياساره .. ليه مسوية بعمرك كذا ؟؟
ساره ماردت وكانت عيونها معلقة بوليد .. نظرات كلها ألم وأسف وحزن ! ووليد اتقدم منها وهو يطالعها منظرها وقلبه يخفق بكل حبه وحنانه .. ومسكها من ذرعها بخفة وقال : شفيك ياساره ؟ شالي صاير ؟
تجمعت الدموع بعيون ساره وانتفض دقنها بمحاولة لكتم البكي .. وبلا شعور منها رمت راسها على صدر وليد وصارت تنتحب بصوتها ! ضمها وليد وهو مخترع من حالتها .. وفهد قرب منه وهمس عند راسه : حاول تهون عليها ياوليد وانا باترككم الحين .. (( وطلع من الغرفة وسكر الباب ..
وليد واهو ضام ساره : ساره شفيك حياتي .. ليه هذا كله .. ليه هالبكي وليه مسوية بنفسك كذا فهميني ؟ ومشاها لين قعدها على السرير وقعد جمبها وضمها بحنان وهو يقول : بس حياتي والله قطعتي قلبي بدموعك وانا مدري وش سببها !
ساره وهي تناهج : سامحني وليد ارجوك ..
وليد باستغراب : اسامحك على ايش حياتي انتي ماسويتي شي !
ساره : انا ظلمتك معاي وليد .. (( ورفعت راسها واهي تكمل : ارتبطت فيك عشان اهرب من الجحيم الي كنت عايشة فيه .. ظنيت اني ممكن أنسى بسرعه معاناتي وأعيش معاك انسانة ثانية بقلب ثاني .. لكني مو قادرة أسعدك وليد ومو قادر أتجاوب معاك بشي .. أنا بعذبك معاي لان هذه وظيفتي بهالدنيا .. أعذب الكل معاي وأتعبهم وأعيشهم بتعاسة ودمار !
وليد : ساره شهالخرابيط انتي من قالب لك مخك ؟؟
ساره : هذه الحقيقة وليد .. انا ما أقدر أسعدك ولا أسعد احد غيرك .. انت تحبني بس انا مو قادرة احبك ومابي اعذبك معاي اكثر !
وليد : ياساره أنا راضي ومو لازم تحبيني يكفيني اني انا احبك واموت فيك .. وقدامك العمر كله لتحاولين تحبيني بأي فرصة تجيك .. بس انتي شالي صار وخلاك تفكرين بهالطريقة الي وصلتك لهالحالة !
ساره وهي وتبكي : إحساسي بالذنب وليد خلاص مو قادرة استحمل ..
وليد : لا تحسين بالذنب عشاني حياتي .. وصدقيني انا راضي وبظل صابر ومتحمل لين يحكم قلبك بكيفه ومزاجه متى تتقبليني وتحبيني .. بس لاتسوين بنفسك كذا تكفين !
غمضت ساره عيونها وهي رافعة راسها وتبكي بصمت .. مستحيل تفهمني وليد .. انا أبكي حالي وابكي حالك وابكي حال مازن .. انا بدوامة وصراع لو تدري عنه ياوليد بتنخبل .. ارتباطي فيك كان غلط بغلط وتوني أحس بهالغلط بعد ماخسرت روحي وحياتي .. ياربي ان كان حياتي انكتبت مع وليد فيالله انك تنقذني من هالعذاب و تشرح صدري لحياتي معاه لاني احس الدنيا بكبرها ضايقة فييييييييييييييني ..
اتأملها وليد واهي بهالحالة وقال : ساره كوني صريحة معاي أرجوك .. شالي تفكرين فيه بالضبط ؟؟؟
طالعت ساره فيه وشافت العذاب بعيونه .. وحست بعجز عن الكلام ! شتبين أقولك وليد .. أقولك اني كنت ظالمة مازن ؟؟ تبيني أقولك اني اكتشفت بعد كل هالوقت شكثر قسيت عليه ودمرته وضيعت من إيدي كتلة من الحب والوفا والتضحية .. وعرفت اخيرا ان كل شكوكي كانت أوهام !! وانه صان حبي بقلبه طوال السنوات ... واني بوقت ماحسيته أضعف من انه يتحدا أحد عشاني .. اكتشفت انه حارب كل القلوب عشان حبي ! أقولك ياوليد هالكلام عشان أقضي عليك مره وحده ؟؟؟ عشان ينزل علي سخط ربي وأعيش مدمرة طول عمري ! ياويلي منك وياولي من مازن وياويل حالي أنااااا .. !!
تأمل وليد عيونها وحس فيها الضياع واللوعة وقال : تكلمي ياساره .. قولي كل الي بخاطرك تكفين !!
ساره وهي تبعد خصل شعرها بضيق : وليد أنا تعبانة ومابي اتعبك معاي .. يكفي عذبت الكل لين دمرتهم والحين خلاص مابي أفكر بشي ولا أقرر شي .. انا حياتي معاك وانكتبت لك انت وشكـّـلها انت مثل ماودك !! حبني مثل ماتبي وعاملني مثل ماتبي وسو فيني الي تبي .. لاني تعبت ومابي افكر ولا بشي ياوليد .. ولا بشي !!
ضاعت عيون وليد بوجهها واحتار من كلامها !! شهالكلام الغريب ياساره ؟؟ انتي شالي صاير فيك وخلاك تفكرين بهالطريقة !! شالي خلاك تسلميني حياتك وأسوي فيك الي أبي وانتي ماعادك معترضة !! وحس بشبح مازن يداهم باله ونغزه قلبه يوم حس انه له علاقة بحالة ساره .. وطرا على باله فكرة انه ياخذها ويبعدها عن هالعالم والناس وقال وهو يراقب عيونها : يعني ياساره لو أنا قررت الحين شي يتعلق بحياتنا .. إنتي مو معترضة ؟؟؟
ساره بألم : مو معترضة ..
وليد بعين لامعة : أجل خلينا نتمم زواجنا بهالصيفية !!!!
يمكن خفق قلب ساره بكل عنف .. يمكن حست روحها تمزقت بداخلها بكل ألم ودمار .. لكن وليد ماشاف منها الا نظرة ضياع وهمسة من بين شفاتها تقول : .......... مثل ماودك !!
وشعت مشاعر الفرح من عيون وليد !
********
الكـل عرف بخبر زواجهم القريب .. البعض انصـدم !! والبعض فرح .. والبعض ظل آسف على حال مازن وساره .. وسمـر حست ان هالشي مو طبيعي ! ساره كانت مدمرة بسبب الظرف الي وصل !! وبعدها نسمع انها اتفقت مع وليد على الزواج ! انتي شلون فكرتي ياساره ؟؟؟ وماقدر تصبر وراحت لها البيت بوقت دومات الشباب .. ودخلت بيتهم وطلبت من الخدامة تناديها من غرفتها .. وظلت تنتظرها بالصالة لين نزلت لها وشافت سمر الحزن بعيونها واهي تسلم عليها وقعدت جمبها واهي تقول مصطنعة المرح : شهالخبـر الحلو ياساره !
ساره بابتسامة خفيفة : زين انك تقولين حلوو !
سمر : ياساره محد يقدر يعترض على قدر ربي .. وان كان حياتك انكتبت مع وليد فلازم نفرحلك ونعتربها خيرة من الله ..
ساره بتنهيدة : الحمدلله على كل حال !
سمر وهي تراقب عيونها : ساره شالي صار فيك حياتي ؟؟؟
ساره بصوت أقرب للهمس : ياسمر انا تعبت خـلااااص وماعاد فيني وجع راس ..
سمر : بس احسك مجبرة على هالزواج !! ترا مانتي مجبرة ولانتي مضطرة تسوين شي ماتبينه ..
ساره بعيون ضايعة : خلاص انا ماعاد يهمني شي ولا عاد يفرق معاي أي شي !
سمر : حاسة فيك حياتي وحاسة بالمعاناة الي عشتيها .. بس حطي ببالك ياساره ان مافي شي يتم غصب عليك .. لاتحسبيني اقولك هالكلام لتتراجعين وتفكرين بـ مازن .. لا والله .. مازن اخوي صح وطول عمري اتمنيتكم لبعض .. لكن ابيك تفكرين بنفسك انتي قبل اي أحد .. فكري بحياتك .. فكري بسعادتك .. احلامك .. لك حق تعيشين مثل ما انتي تبين مو مثل ماغيرك يبي
ساره بتنهيدة : كلامك نفسه كلام فهد أمس .. قعد معاي وقالي اني لو مو راضية بهالزواج راح يفركش كل شي غصب عن الي مايرضى .. لكني ياسمر انا ماعاد افكر لا بأحلامي ولا بحياتي .. أنا استخرت ووكلت أمري لله .. والي كاتبه ربي بيصير !
اتأملتها سمر بحنان وقالت : ياعمري .. الله يكتب لك السعادة وين ماكانت ..
ساره وهي تغصب نفسها على الابتسام : آمين ويسعدك و يسعد ........ مازن !! واتنهدت بكل ألم وقالت : وش اخباره ياسمر ..
سمر : مدري ياساره والله مايكلم الا امي ويقولها انه بخير ويسكر منها حتى مكانه مانعرفه ..
ساره بهمس : الله يعوضه بالي تقدر تسعده و تعرف قيمة حبه ..
سمر بخاطرها .. ومافي غيرك ياساره لو دار مازن الدنيا كلها ولفها .. وقالت بتنهيدة : الله يسمع منك !
دق جوال سمر .. وابتسمت لساره واهي تخرج الجوال من شنطتها وكان خالد المتصل
سمر بنعومة : هلا حبيبي
خالد: سموووووووووووووور الحقيني !
سمر بخوف : اسم الله عليك خالد شفيييييك ؟؟
خالد : طقت كبدي من هالدوام والله مليت منه خلاص مابي ادااااوم
سمر الي تعودت على هالموال من خالد : بس ياخالد والله خرعتني أحسب فيك شي ..
خالد : وانا فيني مليون شي .. تكفين اولدي انتي بسرعه خليني ارتاح من هالدوام وانفس معااااااك !
سمر : ههههههههههههههههههههههههه ههههه اوريك انت من الحين مخطط على هالاجازة !
خالد : ومنتظرها على جمر بعد مايصير المتزوجين يداومون مثل العزاب !!
سمر وهي تطالع ساره و تضحك : بس خالد هدي نفسك حبيبي ..
خالد بتنهيدة : وحشتيني حياتي ..
دارت سمر وجهها واهي تهمس : وانت اكثر
خالد باستهبال : آتيني بوثة ..
سمر : حبيبي ماودك تشوف شغلك ؟؟؟؟؟
خالد : أول تعطيني ...
سمر واهي منحرجة : أوكي أوكي بعدين ..
خالد : شعندك تصرفيين ؟؟
ضحكت ساره من شافت سمر منحرجة وحست ان بينها وبين خالد شي وقامت واهي تقول بضحك : خذي راحتك .. أنا رايحة المطبخ ..
ضحكت سمر وخالد سمع صوت ساره وقال : ساره عندك ؟؟؟؟
سمر : لا أنا الي عندها ..
خالد : ياسلااااااام !! شهالتطورات الي بينكم!
سمر بصوت واطي : لاتطورات ولا شي بس جيتها اشوف شسالفتها هي ووليد وزواجهم الي طلع لنا فاجأة
خالد بضيق : اييه ووش قالت ؟؟؟؟
سمر : بعدين اقولك خالد مابيها تجي وتسمعني اتكلم عنها
خالد : بس قوليلي تحسينها موافقة ؟؟
سمر : اممممم ..
خالد : عجيبة هالبنت !!
سمر : الله يكتبلها الي فيه خير ..
خالد بتنهيدة : آآمين .. اجل خليك انتي عندها لين أطلع من الدوام ونتغدا سوى مع اخواني
سمر : أوووكي على راحتك حبيبي
خالد : أوكي يلا هاتيها قبل تجي ساره
سمر بضحك : ياربي خالد مو وقتك ..
خالد : بكيفك أجل مو مسكر !!
سمر : لا أمانة فكني منك انت عليك اوقات مدري شتبي !
خالد : كيفي والله وحلالي أكلمك متى مابغيت ..
سمر وهي تبي تخلص منه وعطته بوسه استخف منها وقال باستهبال : وحده ثانية سمر
سمر: شكلي عطيتك وجه بزيادة انا .. يلا بس لأعلم عليك فهد ؟؟
خالد : هههههههههههههههاااااااااي وش بتقولين له أمانة .. خالد يدق يبي مني بوسة ؟؟؟
سمر : ههههههههههههههههههههههههه ه اي أقوله الي أكثر منها بعد ..
خالد : ههههههههههههههههههههههههه اتخيل شكلك وانتي تعلمينه عني الللللللللللله ليته يطردني من الشركة وقتها
سمر : بس انت هذا الي هامك؟؟ تبي تخلص من الدوام وبس ؟؟
خالد : إي سمر كررررررررررريه هالدوام
سمر : ردينا ؟؟؟ خلاص خالد رووووح عيب والله تاركة البنت زهقانة بحالها مايصير !
خالد : وأنا سمر أهوون ؟؟
سمر : إنت حياتي كلها بس تكفى مو الحين ..
خالد : إي العبي على غيري ياعمري.. بس يالله بفكك هالمرة وشوفي بعدين مين بفكك مني !
سمر : بس انت مره مصدق نفسك تراني خالصة حدي رووووووح !
خالد : بعـــــــد .. ؟؟؟ إي زيدي معاي بالكلام عشان تشوفين شلون أجننك اذا رجعت
اتصاعد الدم لوجه سمر بحيا واهي تطالع ساره راجعة الصالة : خالد والله مابقيت فيني شي صاحي تكفى ارحمني والي يسلمك
خالد : ههههههههههههههههههههههههه ههههه يلا يلا .. أحبك يابطة ..
سمر بزعل : بس خالد ذبحتني بهالبطة
خالد وهو يضحك : والله صايرة كنك بطة بهالبطن ..
سمر : خـــــــــــــــالد انت مو معديها على خير خلاااااص رووووح
خالد : بااااااااااااااي ..
سمر : باي
وسكرت من خالد واهي تبتسم لساره الي قعدت واهي تقول : الله يديم المحبة بينكم
سمر بابتسامة : آمين .. بس والله مجنني هالخالد مدري متى يركد ويعقل .. كل يوم أموت موت وانا اصحيه ويلعني ويلعن ابو الدوام عشان يصحى ..
ساره : ههههههههههههههههههههههه ترا هذا خالد من ايام الدراسة أكره ماعليه يصحى الصبح عشان دراسة ودوام ..
سمر : ياويلي بكرا بجيب ولدي ويشوف ابوه قدوته بهالحالة .. وااااا فشلة !!
ساره : ههههههههههههههههههههههههه هههههههههههههههههه ياحلوك ياسمر والله ضحكتيني من زمان ماضحكت
سمر : هههههههههههههههههههه وانا صادقة .. تخيلي شلون حالي والله يمكن يطلع الي ببطني أعقل من أبوه ..
ساره : والله ياسمر لو يرج مخك رج .. اسم انه يحبك وحصل عليك ..
ضيقت سمر عيونها وهي تطالع بساره بألم وقالت : الله يسعد قلبك ياساره قولي آمين ..
ومر الوقت بسرعه لين جو الشباب من دواماتهم .. وسليمان كان ناوي يتغدا عند غـادة بس يوم درى ان خالد وسمر بيتغدون عندهم مر على غاده وأخذها معاه البيت .. وحسوا كلهم بالفرح يوم شافوا الابتسام بوجه ساره والي سببه وجود سمر عندها ..
وعلى الغدا .. ماحاول أحد منهم يجيب أي طاري للزواج وكانت سوالفهم عاديه ويحاولون يدخلون جو المرح بالحكي ..
خلصت غاده ويوم جت تقوم قال سليمان : على وين !
غاده : الحمدلله شبعت ؟؟
سليمان : بس أنا ماشبعت !
غاده : وأنا شعلي منك اذا شبعت قوووم !
سليمان : لا حبيبتي عيب الحرمة تقوم من على السفرة قبل زوجها .. اصبري لين اخلص ونقوم سوى
نقلت غاده عيونها بينهم وهي تضحك باستغراب وتقول : بابا ويييييييييين عايشين احنا .. (( وطالعت سمر واهي تقول بضحك : سمر انتي خالد يسوي معاك كذا ؟؟
سمر وهي تضحك : لللاء !
غاده وهي تطالع بساره : وانتي ياساره يسوي معاك وليد كذا ؟؟؟
ساره بابتسامة خفيفة : إي وأكثر من كذا ..
غاده بضحك : بعــــــــــــــد ؟؟
ساره وهي مبتسمة وتقول بصوت اقرب للهمس : مره كنا نشرب كفي ويوم خلصت كاسي هاوشني لييييه أخلصه قبله .. مو عادي إني أقوم !!
ضحكوا كلهم الا خالد الي مايطيق شي عن وليد ويعتبره السبب بدمار العلاقة بين وبين صديق عمره مازن .. اما سليمان فلأنه يدري عن سوالف وليد والتقارب بينهم فنسى كل شي وضحك من قلبه وهو يقول : الله يغربل شيطانك ياوليد ..
قامت سمر وإهي تمسك ظهرها وتقول : آآآآه يابطني
خالد : يارب ولادة !
سمر : بس خالد والله حرام عليك توني بالسابع !
خالد : وأولدي بالسابع تعرفين انا ودي اختصرلك المدة عشان ترتاحين بس ..
ضحكوا عليه وسمر قالت لفهد : تر مو حب فيني إلا عشان ناوي يرتبله اجازة من الدوام اذا ولدت !
فهد : مْعـَـصي حبيبي .. لا تحلم بهالاجازة .. (( معصي تعني امر مستحييييييييييل .. هذا عند أهل الوسطى بالسعودية )
خالد بحمق : شالي معصي يافهد .. زوجتي والدة وتعباااااانة ومو قادرة تتحرك وتبيني اداوم واتركها ؟؟
فهد : انا فاهمك وفاهم سوالفك ..
خالد : وانت شعليك من سوالفي .. عاملني مثل أي موظف طالب اجازة لظروف خاصة وبس
سمر : خالد وانت ليش تفاول علي اتعب وما اتحرك .. اي صح انا أبيك جمبي بس مو تكسحني عاد !
فهد : شفت حتى سمر أدرى بحالها وانها مو تعبانة ولا هي بحاجتك !
سمر بابتسامة عذبة : الا فهد والله أحتاج خالد أنا مايصير يداوم ويجيني مرهق وانا بروحي تعبانة ومو قادرة على لعوزته ..
ساره وهي تطلع من المطبخ : والله الي يسمع نجرتكم يقول سمر ولدت خلاص وجابت توأم بعد !
خالد : ياسلاااااااااااام لو توأم تتضاعفلي الإجازة دبل !
ضحكوا عليه وقاموا كلهم وقعدوا بالصالة ومن بين الحكي والسوالف اقترح عليهم فهد يطلعون كلهم سوى تمشية حلوة قبل زواج ساره ووليد ..
دام استقرت الاوضاع على الحال الي اهم فيه .. فماعاد يمديهم يغيرون شي من حياتهم ولازم يستسلمون لها .. حزنوا لين تقطعت قلبوهم .. وبكوا لين تورمت جفونهم .. وانتهوا إن .... ساره مع وليد .. وفهد بلا ندى .. ويالله منك العوض .. !
على شاطئ البحـر .. كان مازن واقف يترقب خيال مقبل من بعيد ! خفق قلبه واهو يحس بالشخص المقبل ناحيته .. وهو مضيق عيونه فيه ودقات قلبه تتسارع كل ما اتضح الخيال له أكثر .. وشاف وماتحمل الي شافه ! ساره بدموع مغرقه وجهها .. والألم صارخ بعيونها .. تمشي وتقترب من مازن لين وقفت قدامه وقالت بصوت مرتجف : مازن .. أنا آسفه !!
طالعها مازن بنظرة صارمة ! وقلبه يخفق بكل عذاب وجنون .. وساره عادت عليه وهي تبكي بكل ألم : آسفه يامازن .. أنا عرفت كل شي .. آسفه ! وكنها ماتحملت نظراته .. ولا تحملت جموده .. ودارت عنه لتبتعد .. واهو ظل واقف كالتمثال بلا حس ولا حراك .. يطالعها واهي تبتعد .. مايدري من وين تملك قلبه كل هالقساوة .. كيف قاوم يشوفها تبتعد ومايركض وراها .. مايحضنها .. مايمسح دموعها .. ظل يطالعها واهي تبتعد وتبعد لين اختفت من عيونه .. وانهار من بعدها ! وصار يبكي بصوته ويناهج .. ويردد اسمها بكل ألم : ساره .. ساره .. ساره .. ! وصحى من الحلم واهو يردد ..ساره !
نفس الحلم المؤلم يتكرر بكل ليلة .. ساره تجيه وتبكي وتعتذر ! قام واهو يحس بالضيق يفتك بصدره ! شصاير فيك ياساره !! شالي عرفتيه وجايه تعتذريلي منه !! انا هربت من حياتك ومن دنيتك لهالمكان ليه تلاحقيني بأحلامي !! فكيني منك وارحميني ياساره خلاص والله ماعاد فيني عرق ينبض الا وسكنتي فيه عذابك وآلامك !! اتركيني بحالي ساره .. مو مريحتني لا بحياتي ولا بمنامي روووحي عني تكفين ! وليه جايه تعتذرين ؟؟ وش بيفيدك عذرك واحنا انتهينا !! .. انتهينا .. آآآآآآآآآآآآه ياقلبي .. طلعت آهة حارقة من صدره سالت معها دموعه واهو يقوم بصعوبة .. أهمل صحته وأهمل أدويته لين اشتدت عليه الآلام بكل مكان بجسمه وبالأخص كتفه الي لازال بحالة سيئة .. وأخذ العكاز ومشى بتعب وهو يمسح دموعه بذراعه .. وطلع من البيت ومشى لناحية البحر .. وعيونه ضايعة بالأمواج الي يشوف فيها الغدر والخيانة والقساوة .. ماكان يحس الا بهالمشاعر .. يمكن لو كان بوضع غير عن وضعه كان شاف في البحر الاخلاص والوفاء والأمان .. لكن من وين يحس بهالمشاعر ولا تطري على باله .. واهو يشوف الهلاك بعيونه وكيف حياته صارت جحيم من بعـد .. ساره .. ! عض شفته بكل ألم وهو يتوصل بأفكاره لهالشي .. ايام وليالي قضاها بهالبيت المطل على البحـر .. وبكل مره يوصل بأفكاره ومشاعره الى ان ساره ضاعت منه .. يحس روحه بتضيع منه .. يحس بالنار تكوي قلبه وكيانه .. وقعد على صخرة كبيـرة واهو يسترجع شكلها بالحلم .. جاية بكل ألم ودموع وتعتذر ! بعد إيش ياساره ؟؟ بعد مادمرتي كل الي بيننا .. أحلامنا .. ذكرياتنا .. سنين حبنا وعشقنا .. وطلع من جيبه ورقة وقلم واتنهد واهو يشخط عليها .. خربشات مالها معنى ..
وبالآخر كتب :
تقوى الهجر.. وش لي بقى عندك.. تدور لي عذر ..
لا تعتذر !
تقوى الهجر .. مانجبره من عافنا ماينجبر ..
لا تعتذر !
زاح الصبر .. لا لاتعنالي وتمر ..وتبغى الصبر !!
وين الصبر ؟؟
جرحي عميق والقلب في دمه غريق ..وتبغى الصبر ؟؟
ويلاااااه من وين الصبر !!
مهما تقول لاااا تعتذر !
مهما تقول .. من الأغاني والجمل ..
مايحتمل .. قلبي فدية جبر الألم .. يمشي معك درب الندم.. مااااااا يحتمل !
يكفي عليه منك احتمل كذب وغدر !! حبك سراب ضيعت وقتي اتبعه .. !!
وسط الضباب صوتك ينادي اسمعه .. صرت اتبعه .. !!
واليوم في صحراء الضمى .. ترمي فؤادي وتحرقه .. وترجع تقول :أبعتذر .. !!
ليه العذر ..؟؟
دام الهوى ماله على قولك عذر !! والجرح ياجرحي يداويه الصبر ..
ليه العذر ؟؟
الله كريم الله الله
الله عليم الله الله
هوعالمٍ بالحال ولااااااا يمكن يضيم..
عزاه لك ياقلب ياأحلى نديم .. عزتي للحب لو يصبح يتيم !!
حبك يتيم .. وكلك ندم !!
وين الندم بين السطور ؟؟ عمر العدم ماله ظهور !!
ترا هذا غرور !! هذا غرور..
تمشي بطريق وأنا بطريق اللي يوديني لبعيييد .. عنك يا أول رفيق !! البعد يعفيني المزيد ..
وين الوفا والتضحية ؟؟؟ وينك رفيق ... !
وبتجمع أوراق السنين ..
لا تنسى تجمع جروحي .. ودمعي ... وآهاتي معك
وقلبي بعد ماقتلته يارفيقي .. معاد يقدر يمنعك ..!!
كل الأمر عاد بيديك ياخلي ياهاجر .............. ما عندك عذر !!
مانتهى من كتابتها الا والدموع مغرقة وجهه .. واتخيل ساره واهي ماسكة الورقة وتقراها !! وش بيصير فيها !! أكيد بتنهار وبتنزف جروحها وتتدمر .. لا مابي .. انا ابكي وأتعذب بس إهي لاء .. يكفي عليها الي جاها ويكفي عليها الي سوته بنفسها .. وخلوني انا بهمي بعيد عنها .. وأخذ الورقة ولفها وحطها داخل قارورة فاضية مرمية على شاطئ البحر .. واتقدم للبحــر ومسك القارورة ورماها بكل قووووة لتسقط بقااااااع البحر ! مكان ماهمومه وأحزانه وآهاته ماعاد لها مكان .. إلا قاع البحـر ! ..
ومشى بالعكازات على جمب الشاطئ .. لين وصل لقارب صغير ملك للبيت .. ياما ركب هالقارب مع ساره واهي صغيرة .. كل موقف وكل مكان له ذكريات مؤلمة معها .. ومشى للقارب ودخل فيه واتأمله وشافه مهمل ولاهي متجدده صيانته !! .. وقعد على كرسي القيادة .. وحاول يستعيد خبرته بتشغيل القوارب .. كان القارب لازال يحمل بداخله بانزين يساعد على تشغيل القارب .. لكنه قديم .. وحالت عليه السنوات واهو ماتحرك ! و مازن ثارت الرغبة عنده ليشغل هالقارب ..و ينطلق بعدها فيه وسط البحـر !
ثلاث سيارات وصلت لبيت البحر هذا الوقت .. !! سيارة فهد ومعاه سليمان وغاده .. وسيارة خالد وسمر وسياره .. وليد وساره !!
وقفت السيارات خلف بعض ونزل فهد من السيارة ومشى لسيارة خالد .. وخالد فتحله الشباك وانحنى فهد وقال واهو يرفع نظارته الشمسية عن عيونه : انتوا الحين متأكدين ان هالبيت يصلح ندخله !
سمر من داخل : إي يافهد والله سائلة نهى قالت عـــــادي كل شي مضبط فيه ..
فهد : طيب سألت أبوها ؟ والله فشلة نجي لبيتهم بدون لا إذن ولا شي !
خالد : يافهد تدري احنا مابيننا كلافة .. بعدين انا كسرت جوال طلال ابي أسأله مايرد وخليت سمر تسأل نهى وقالت لها عادي وبالعكس ابوها بيفرح لو درى !
فهد : والمفتاح !!
سمر : دورته نهى مالقته ببيت أهلها قالت أكيد عند واحد من العمال الي هنا وبنلاقي كل شي مفتوح !
فهد بتنهيدة : والله انكم قلق انتوا !
خالد : ياحبك يافهد لتعقيد الامور .. خلنا ندخل بس وان لقينا الابواب مقفلة رحنا لاي مكان ثاني !
اتعدل فهد بوقفته وقال : يلا دخلنا ..
رجع فهد للسيارة ومشى فيها لداخل البوابة ومشوا وراه لييين وصل منطقة البيت ! ووقفوا السيارات ونزلوا .. وخالد مشى مسرع متوجه ناحية الباب واول مامسك الباب انفتح .. التفت عليهم واهو يقول بصوت عالي : مفتوووح الباب !
فهد : زين أجل ..
وكان الجو حار هالوقت والشمس قوية ففضلوا يدخلون البيت لين تخف الشمس شوي وبعدها يطلعون .. لكن ساره تجاوزتهم ومشت بخطوات هادئة باتجاه البحر .. وانتبهولها واهي تمشي وسمر الي اتكلمت وقالت : ساره وين ماشية بالحـــر ؟ خلي تخف الشمس ونطلع !!
ساره ماردت وظلت ماشية تحس كنه جاذبية عجيبة تجذبها ناحية البحر .. وفهد اتأملها وقال : اتركوها على راحتها !
وظل وليد يطالع فيها لحظات اتمنى يلحقها ويمشي معها .. لكن حب يتركها على راحتها مثل ما قال فهد .. ومشوا كلهم لداخل البيت !!
مشت ساره وعيونها ضايعة بالأمواج والهوا الساخن يلعب بخصل شعرها والشمس الحارقة حمرت خدودها أكثر ! وظلت تمشي واهي تحس بالضياع لين وصلت للشاطئ .. وقعدت على نفس الصخرة الي كان مازن قاعد عليها .. منظر الأمواج مألوف .. اهو نفسه الي أحسه بداخل كياني .. مشاعر متلاطمة ومسببة لي دوامة عنيفة .. مدري هل بانجو منها ولا باغرق فيها ! .. وأبعدت خصل شعرها عن وجهها وحست بالضيق من الهوا الساخن .. وقامت من مكانها ومشت بغير هدى .. وانتبهت للقارب .. وخفق قلبها بكل قوة .. ذكريات مؤلمة تطايرت قدامها .. نفس القارب .. على نفس الشاطئ .. وبنفس المكان .. !! ياويل قلبي من هالذكريات !! ومشت بخطوات ميته لين وصلت للقارب .. كان جزء منه داخل البحر والجزء الثاني مرتفع على الساحل !! وحست بإيدها السلم لحظات .. ورفعت رجلها لتصعد عليه و ..
في أحد هنا ؟؟؟ "
نفاضة قوية هزت كيان ساره من راسها لأخمص قدميها !! وتسارعت دقات قلبها بكل عنف من سمعت الصوت !! مو لأنها ماتوقعت احد موجود بالقارب .. الا لأن الصوت كان .. صوت مازن !! وتسمرت مكانها ورجلها مرتفعة على اول السلم وضاغطة بإيدها بكل قوة على حافة السلم !! وعيونها متوسعة من الصدمة ولاقدرت تتحرك ولا تنطق ولا بشي !! .. وشوي وسمعت خطوات تقترب تتبعها اصوات دق العكازات على أرضية القارب .. وثواني وظهر مازن قدامها !!
شمس قوية حارقة تخلي الوجوه عابسة .. وهواء شديد ساخن مخلي العيون تتسكر وترجع تنفتح لتستوعب الي قدامها .. كأن الهواء تحول لعاصفة مدمره قاتله عصفت بقلوب الاثنين واهم يطالعون بعض بكل صدمة ! اثنينهم متيبسين بمكانهم ويطالعون بعض بلا شعور .. وبلا حس وبلا حراك !! شلون تلعب الدنيا هاللعبة وتجسد الماضي المؤلم كصورة حية صعقت كيانهم ونزفت قلوبهم !! .. كم مر من الوقت عليهم واهم يطالعون بعض بلا استيعاب وبلا تصديق .. كنه عام .. ولا اعوااااام .. من المشاعر العاصفة الي كانت على أوج قوتها بداخلهم .. وساره كانت من الصدمة لدرجة ان ايدينها وفكها صاروا يرتجفون .. كل شي تيبس فيها .. حتى دمعها جف .. ودمها نشف .. وصوتها انخنق .. ونظراتها ذبحت مازن واهو يشوف فيها الضياع والعذاب والصدمة !! ..
وأخيرا قدر مازن يفوق من هالغيبوبة المؤقتة الي تملكتهم واتقدم خطوة وحده وقال بصوت مبحوح من التعب: شلون عرفتي مكاني ؟؟
ساره كانت لازالت بالغيبوبة مافاقت .. مازن .. قدامي .. وانا برجولي مشيت وجيت لعنده .. هذا مو مازن الي أعرفه .. لا شكله .. لا نظراته .. لا كلامه .. !
مازن بصوت خالي من أي مشاعر : ............. إنتي شجايبك هنا ؟؟؟
ساره ماردت .. ولا قدرت ترد .. كان الموقف أصعب من انها تتحكم فيه ولا انها تفكر وترد .. ماتوقعت انها ممكن تشوفه بهالمكان .. والي ذبحها أكثر نظراته ونبرته بالكلام معها .. وظلت تطالع فيه بنظرات كلها ضياع وألم .. ومازن لوهلة كان بيضعف قدام نظراتها .. لكنه مسك نفسه واهو يعيد عليها : ساره انتي شتبين مني بالضبط ؟ ليه ملاحقتني لهالمكان ..؟؟
ظلت ساره تطالع فيه بنفس النظرات وكنها فقدت كل حواسها من الصدمة وماعرفت وش تقول وبعد لحظات همست أخيرا : أنا مالحقتك .. أدري انك تكرهني ولاتبي تشوف خيالي .. بس انا مادريت انك هنا مازن !
من قال ان مازن كـره ساره !! مازن اتمنى من بعد كلامها هذا يتقدملها بسرعه ويضمها ويهدي قلبه المعذب بفراقها طوال هالسنة ! حلم حياته الي ضاع منه .. نبض قلبه الي يعيش فيه .. روحه المتيمه بهوى هالانسانة الي واقفة قدامه على بعد متر واحد بس .. لكن قوة ظهرت بمازن هالوقت خلته يتناسى كل المشاعر الي كانت بينهم .. ويتجاهل الحب الي ساكن بكل ذرة بكيانه .. ويسترجع المعاناة وبس المعاناة الي عايشها .. والخيانة الي حسها منها وقال : وهذا انتي دريتي .. ! ممكن تطلعين من هالمكان ؟؟
تسارعت الدقات بقلب ساره .. وحست الدنيا غمت عليها .. شالي قاعد يصير ؟؟ شالي صار فينا يامازن ؟؟ بعد الحب .. وبعد العشرة .. نلتقي مثل الأغراب !! وياليت أغراب .. الا أعداااااء .. ولا ماتحملت .. تجمعت الدموع بعيونها بلاشعور منها .. ونزلت رجلها وابتعدت خطوة وحده واهي تقول : طيب .. أنا بروح .. بس ممكن سؤال واحد بس ؟؟
مازن وقلبه متقطع بداخله منها وقال بهدووء : ..... اسألي وخلصيني !!
نست ساره كل شي .. نست نفسها .. نست وليد .. نست ارتباطها فيه .. وماعاد تشوف الا مازن .. وقالت وهي تكابد دموعها : .. شلون صحتك الحين ؟؟ إن شاء الله أحسن !!
مازن بنفس الهدوء : ...... هي مو أحسن .. وان شاء الله ماتكون أسوأ .. !
ساره : انتبه على نفسك مازن .. انا مادري انت شلون قاعد بهالمكان وانت تعبان وتحتاج متابعة بالمستشفى ورعاية !
مازن وهو مضيق عيونه فيها : ..... خسرت الي يهتم ويحس فيني .. وشلي لزمة أهتم بنفسي الحين ؟؟
ساره بصوت متقطع من الألم : ... مازن .. نفسك لها حق عليك .. .. وكملت بهمس : أنا آسفة مازن !
وهذا هو الحلم الي شافه .. يتحقق بكل وضوح قدامه .. ساره تعتذر على شاطئ البحـر .. عجيب يادنيا عجيب !! طالعها مازن بنظرة تحمل كل العذاب الي بداخله .. وش يفيد العذر والأسف !! بعد مادمرتي كل الي بيننا .. لكنه مارد .. وظل يطالع فيها بنظرة حرقتها .. وأبعدت ساره عينها من عينه واهي تقول بصوت باكي : أدري اني السبب بكل معاناة تعيشها .. لكن مازن ارجوك سامحني .. انا مستحيل اتهنى بحياتي وانا حاسة اني ظالمتك !!
طالعها مازن بنفس النظرة .. وحس روحه بتطلع منه .. وساره ماتحملت صمته ولا نظراته .. وقالت بألم : مازن لا تطالعني بهالنظرة .. تكفى قول شي .. أي شي !!
مازن واهو يراقب الدموع بعيونها : ....... ان كان الي بيننا انتهى .. بسببك .. بسببي .. ولا لأي سبب ثاني .. هذا مايمنع اني أتمنى لك السعادة .. خلي الدموع والآلام لي أنا ياساره .. وانتي ارجوك عيشي حياتك واتهني !
مسحت ساره دموعها بسرعه واهي تقول : مازن حاول تنساني .. انا مقدر اتهنى وانت تتعذب .. !!
بهالبساطة أنساك ياساره .. ؟؟ انتي ناسية دنيا العشق والوله الي كانت بيننا ؟؟ وقال يبي يوهم نفسه ويوهمها : .. بيجي يوم وأنسى .. انتي فكري بحياتك وبسعادتك وماعليك مني ..
ساره بنظرة حيرة : اوكي انت لمتى بتظل بعيد بهالمكان ؟؟
مازن : قلتي بتسألين سؤال واحد بس !!
ساره وهي تبعد خصل شعرها عن وجهها بضيق : لو علي انا فبخاطري بركان من الأسئلة .. لكن باتركك على راحتك ..
انبته مازن لوضعها فاجأه وقال : إنتي ليه ماشية بهالشمس ؟؟ تدرين هالشي مو زين على قلبك !!
ساره بألم : ..... خسرت الي يهتم ويحس فيني !
مازن بسخرية : ليه وينه وليد عنك ؟؟
وكأن هالكلمة صحت ساره للوضع الي إهي فيه !! وانتبهت لنفسها وان وليد داخل البيت ينتظرها .. والتفتت لتشوف باب البيت من بعيد واهي تقول بخوف : ياويلي !! وليد هنا .. وبيشوفك و .. !
مازن باستغراب : شسالفة ياساره !! انتي شلون جاية هنا ومع مين .. ؟؟؟
ساره وهي تراقب الباب : انا واخواني و وليد .. ومعنا سمر وغاده .. جينا هنا لنغير جو قبل مايتم زواجي أنا و .. ! وسكتت فاجأة !!
راقب مازن عيونها وقلبه يخفق بكل عنف !! وهز هالخبر كيانه وأشعل النار بصدره .. وقال بصوت مذبوح : حددتوا موعد زواجكم ؟؟
ماتحملت ساره أكثر وسالت دموعها وصارت تبكي بكل ألم .. ارحمني يامازن خـلاااااص .. انا بطيح الحين قدامك والله بموووت من حالتي وحالك .. ياربي شالي صار بيننا ؟؟؟ ياربي شالي جابني أنا هنا وخلاني أشوفك بهالحالة .. مازن حبيبي انا أبيك انت .. انت .. انت .. !!
وكن مازن سمعها وحس فيها !! كنه حسها معذبة بهالارتباط وماتبيه وقال : ساره انتي ليه تبكين ؟؟ عسى منتي مجبرة على هالزواج !!؟؟
ماردت ساره الا وزاد نحيبها أكثر وأكثر .. وخلاص مازن ماستحمل .. وخطى خطوة لقدام وبعدها وقف بحذر واهو يراقب الباب .. وبعدين ياساره !! والله ذبحتي قلبي وطيرتي مخي ! اشوفك مدمرة قدامي ولا اقدر اسويلك ولا شي !! ياويلي من عذابك الي مو راضي يخلص بيوووووم ..
وانفتح الباب !! وخفق قلب مازن بكل قوة واهو يراقب الشخصين الي طالعين من وراه .. كان القارب بمكان الي يقدر يشوف الباب بس الي عند الباب مايقدر يشوفه !! و انتبهت ساره ورفعت راسها بخوف وشافت الشخصين من بعيد طالعين بس ماقدرت تميزهم مع انعكاس الشمس عليهم .. ومسحت دموعها بسرعه وإهي تقول : يمكن ماشوفك مره ثانيه مازن .. بس آسفة والله آسفه !
ومشت مبتعدة عنه وعيون مازن تلاحقها وين مامشت وابتعدت للشخصين الي يمشون متوجهين للبحر وشافتهم أخيرا .. كانوا خالد وسمر .. !! ومشت لهم وهي تمسح دموعها بسرعه وسمر قالت لها من بعيد : شلون متحملة هالحـر إنتي ؟؟
ماردت ساره ومشت لين اقتربت منهم وقالت بتعب : أقولكم شي وماتصدقووووون !!
خالد باهتمام : شفيه ياساره ؟؟؟
ساره وهي تلتفت للقارب : مازن .. بالقارب هناك !!
وانصدموا !! .. وش هالصدف العجيبة الي تجمع بين أحباب فرقتهم الدنيا وفرقتهم الظروف وأبعدتهم الأحزان !! سمر سالت دموعها من عرفت ان اخوها ونظر عينها متواجد معها بنفس المكان .. ومشت مسرعه للقارب وهي مو مصدقه .. وخالد من وراها يمشي مسرع واهو مو مستوعب انه بيشوف مازن بالقارب بعد كل هالوقت من الفراق !! ووصلوا القارب وشافوا مازن ساند ظهره على السور وعيونه محمرا ومبين انه كان يبكي !! وسمر من شافته صرخت واهي تقول : ماااااااااااااااازن أخوووووووووووووي حبيبي !!
ابتسم مازن ابتسامه خفيفة واهو يقترب منها واهي مانتظرت وطلعت السلم بسرعه الا قال مازن : شوي شوي سمووور أنا مو طاير .. !
سمر : مو مصدقة انك هنا حبيبي وحشتني !
مازن وهو يبتسم لها : هاتي إيديك أعاونك لا تطيحين علينا انتي ويا هالبطن !
سمر : ومن وين تعاوني بعد عمري وانت الي فيك كافيك ..
اقترب خالد منهم ومسك إيد سمر ليعاونها وعيونه معلقة بعيون مازن وتبادلوا نظرات كلها لوووم وعتااااب ووله وشوووق !!
دخلوا القارب وسمر رمت نفسها على صدر أخوها وبكت واهي تقول : وحشتني مازن حرام الي تسويه فيك وفينا والله حرااااام !
مازن واهو يضمها : بس حياتي سمر لا تبكين والله بتموتوني انتوا اليوم !
رفعت سمر راسها وطالعت فيه واهي تقول : شلونك مازن ان شاء الله بخير ؟؟
مازن وهو يرغم نفسه على الابتسام : الحمدلله حياتي على كل حال ..
وابتعدت سمر واهي تطالع بخالد .. وخالد كان لازال يطالع بمازن وإهو متولـّه عليه .. وقلبه محترق عشانه ! قطع قلبه منظره الهزيل وشحوب وجهه وتوقد عيونه والعذاب وكل العذاب الظاهر فيها .. ومازن طالعه لحظات واهو يحس بالشوق لصديق عمره وحياته الي فرقتهم هالظروف .. ! واتقدّم خالد بخطوات مترددة لمازن .. ومازن اتعدل بوقفته ليسلم عليه .. واقترب خالد منه واهو يقول : شلونك ياخوي !
مازن مارد !! وظلت عيونه معلقة فيه !! وفاجأة رمى العكاز ومد إيده لخالد .. وخالد ابتسم له من خاطر وقرب منه وتعانقوا بكل شوق ومحبة !
ومازن قال: اشتقت لك ياللوووووح !
سالت دموع خالد بلا شعور واهو يقول : والله ما اصدقك يالخسيس بعد كل هالقطاعة !
مازن بضحك : شسوي ماعاد صرت اتحملك انت ووجهك !
خالد : عاد من زين وجهك انت الشيفة ..
مازن : يلا بس عاد مولانك بتصير أبو تتطاول علينا !
خالد : الله يستر على ولدي من هالخال الحمار الي مدري شلوووون صابر عني
مازن بتنهيدة : والله طقت كبدي ياخالد وقلبي ورووووحي وكل شي فيني طق !
خالد : كافي عليك يامازن هالحالة والله مقطع قلوبنا كلنا !
التفت مازن لوين ماساره ابتعدت عنه واختفت وقال : وهو بإيدي ياخالد ؟؟
خالد برجاء : مدري شقولك ياخووووي بس عاد تكفى لا تقاطعني انا والله مالي ذنب والله .. ها شوفني حلفت !!
ضحك مازن وسمر عليه .. وخالد قال : بروح أبشر اخواااني ..
مازن : ياربي انتوا شجايبكم هنا وين تبوني أهرب عنكم !
خالد وهو ينقز من سلم القارب : عاد جيناك ولقيناك وماعاد في فكة مننا لو تطييييييير
وركض مبتعد عنهم ومازن يلاحقه بعيونه وبعدها التفت لسمر وقال : سمر باسألك سؤال وتجاوبيني بكل صراحة !
سمر بابتسامة : آمر اخوي !
مازن : ساره .. مبسوطة مع وليد ؟؟
انصدمت سمر من هالسؤال وخفق قلبها .. ! وتوها الي استوعبت ان ساره كانت مع مازن قبل مايشوفونه اهم .. ياربي شصار بينهم ؟؟؟ وش قالت ساره ووش قالها اهو !
سمر : مازن ليه تبي تعرف ! خلاص اتركهم بحالهم لا تكدر على عمرك ..
مازن : قوليلي ياسمر .. تعرفيني مستحيل أخلي أحد يسبب الحزن لساره حتى لو كان زوجها وليد !!
سمر : يعني وش بتسوي ؟؟؟
مازن : مو مخلي زواجهم يتم ! بحاول اعرف وأتأكد ان كانها مرتاحة ولا مو مرتاحة معاه .. ووالله.. إن كانت مو مرتاحة لأفركش هالزواج غصب عن الي مايرضى !
سمر بحنان : مازن حبيبي أنا أدري انك للحين تحب ساره وتبيها .. بس لاتزعل يامازن خلاص هي صارت لوليد وانت مو من حقك تدخل بينهم !
مازن بحمق : وتبيني اشوفها متضايقة ومدمرة وأسكت ! لا ياعمري مستحيل .. أدري فيها ساره ماتوصل لاخوانها شي وان كانت متضايقة ماتبين لهم .. وهالشي الي أبيك تقوليله هو ياسمر .. شلون علاقتها مع وليد ؟؟؟
استرجعت سمر الأحداث الماضية .. ساره والدفتر الي وصل من عطوف .. وانها ماتت .. ومن بعد ماشافت ساره الأوراق انهارت واعترفت انها مو مبسوطة مع وليد وماتبيه .. وبعدها اتقرر زواج ساره بوليد بلحظة ضعف من ساره قدام كل المفاجآت الي طاحت عليها !! وحست سمر بالضيق والحيرة .. شلون أقول لمازن كل هالكلام وأقلب عليه المواجع .. ! كيف بيتدخل ويمنع هالارتباط وبأي حق .. وبتردد قالت : مازن أنا .. مدري شقولك لكن .. اسمع حبيبي .. الفترة الي ابتعدت فيها انت صارت فيها اشياء محد اتوقعها ! ومحد منا اتوقع انها تنتهي بقرار زواج سار ووليد .. انا بقولك كل شي بس مو الحين يامازن .. انت لازم ترجع معانا اليوم خلاص والله تعبت قلبك وقلوبنا .. وان شاء الله اذا رجعنا بقولك عن كل شي !
مازن : خلي سالفة رجعتي على جمب الحين وجاوبيني على سؤالي ياسمر !
التفتت سمر ومازن فاجأة للضجة الي من وراهم يوم شافت خالد متوجه لهم ومعاه سليمان وفهد يصارخون عليه من بعيد .. ! وماقدر يمنع نفسه من الابتسامة واهو يشوفهم ويحسهم قطعة من قلبه الي ماعرف ولاحب اخوان غيرهم ولاقدر يعيش بسعادة واهو مبتعد عنهم ! .. وأول ماوصلوا القارب نطوا داخله بسرعه وسلموا عليه بكل شوووق ومحبة .. ولووم وعتاب على هالقطاعة ! ..
وخالد قال : تكفووون فكونا من هالسوالف والله مليت من هالحزن الي ماعاد لنا طاري غير طاريه ..
سليمان : طبعا انت شعليك .. مرتك ومعاك وولدك وجاي بالطريق .. وش لك ووش للأحزان !
خالد : اذكر الله يالحسووود لا يجينا شي من عيوووونك لابارك الله فيها من كشافات !
كلهم : ههههههههههههههههههههههههه ههههههههههههههههههههه وسمر قالت : مازن كنت تمشي بهالقارب ؟؟
مازن : لا والله هذه اول مره ادخله الا وبسم الله نطيتوا علي !
خالد وهو يفتح الأدراج المعلقة بالقارب : أوكي وين الاغراض الي فيه ؟؟
مازن : هنااااااك آخر القارب !
فهد بحذر : ليه انت شعندك تدور عليها !
خالد : وش عندي بعد أبي أشغل القارب ونمشي فيه !
سليمان : ليه ناوي على عمرك انت ؟؟ لا عمرك شغلت قارب وجاي الحين تبي تشغل قارب له فترة ماشتغل!
خالد : وش يبيله عاااااااد أسهل ماسهل ربي اهو تشغيل القوارب
فهد : مانت صاحي ياخالد .. امشوا بس نروح داخل عن الحر
خالد : تراني اتكلم جد ! شفيكم انتم خراعين !
فهد : القارب قديم ياخالد انت شفيك ماتفهم !
خالد يلتفت لمازن : مازن ينفع يشتغل ولا لاء ؟
مازن : وانا شدراني .. بس قبل تجون شيكت لقيت فيه بانزين وبس مدري عاد يمشي ولا لاء !
خالد بحماس : بروووح أجرب .. !
سمر بخرعة : خالد تكفى لا تجرب ولا شي خلنا بساعة رحمااااااان !
اتجاهلهم خالد ومشى لمقعد القيادة وقعد واهو يقول : تعال ياماااااااازن قووووولي شلوووووون !
مازن : الحين انت الي بتسوق وتبيني أعلمك ..! عز الله رحنا فيها
خالد : ياخي علمني بس شلون يشتغل والباقي اعرفه
سمر وهي تمشي لخالد : خالد حبيبي بلا استهبال والله مو ناقصين احنا يجينا بلا !
خالد : شفيك سمووور أي استبهال نبي نمشي بالقارب !
سمر : بس مادري خايفة يكون قديم ومايصلح
خالد : واذا كان قديم مو مشتغل من الاساس ..
وقرب مازن من خالد واهو بخاطره راغب بتحريك القارب مثل خالد .. وحاسوا بالتشغيل ورفعوا المحرك وشوي الا سمعوا صوت يصدر من القارب .. يعني التسخين وان القارب بدا يشتغل ! وخالد باستهبال : نجحنـااااااااااااااا !!
ضحك مازن عليه وابتعد عنه ومشى ليرجع لفهد وسليمان الا انتبه لوليد يطلع من البيت ومعاه غاده وساره !! وسعرت النار بصدره واهو يطالعهم .. وغاده ابتعدت عنهم ومشت متوجهه ناحية القارب .. ووليد ماسك إيد ساره ومشى معها للناحية الثانية من البحر ! وحس ان قلبه بينخلع من بين ضلوعه ! ياويلي مو مصدق انك رحتي عني ياساره خلاااااص ! وصرتي ملك لرجال ثاني وقدام عيوني اشوفك معاه ! شالي صار بيننا .. شسوت فينا الدنيا ؟ شلون احنا بحبنا بجنوننا بشوقنا بأحلامنا .. ننتهي بهالطريقة ! واتنهد بكل ألم وابعد عينه واهو يحس انه لو استمر يطالعهم بيطير مخه بلا شك ولا يغمى عليه ولا يصير فيه أي شي ! وثواني ووصلت غاده وسلمت عليه واتحمست معاهم لفكرة المشي بالقارب .. مع ان سمر خوفتها لكنها ماهتمت بالعكس اهي تحب المغامرات .. وجاء وقت تحريك القارب للبحر وبقى ان وليد وساره يرافقونهم .. وكانت هذه هي المصيبة !! ..
مازن بضيق : أنا باقعد داخل .. وخلوهم أهم معاكم برا ..
سمر بخوف : وانا بروح معاك .. ومشت اهي وأخوها ودخلوا داخل الغرفة الاضافية بالقارب .. وخالد يبي يخرعها وقال بصوت عالي : ترا ياسمر أول مايغرق بالقارب اهو الجزء التحتي وياوييييييلك عاد !
سمر بخرعة : خاااااااالد حرام عليك انت ناوي على اليوووووم !
ضحك عليها وفهد نزل لوليد وساره وحاول يقنعهم يجون معاهم القارب وساره إهي الي رفضت !! كان صعب عليها تنجمع مع مازن بنفس المكـان حتى لو ماكانت بتشوفه .. !! اهي من لقائها معاه حست بنيران الشوق والألم تشعل بقلبها .. وخلاص ماعاد تبي تشوفه مره ثانية ! .. ورجع فهد للقارب ووليد اقترح على ساره يرجعون داخل عن الحر والشمس لكنها اعترضت وبغت تقعد قدام البحر .. وأهو قعد معاها شوي وماتحمل الحر .. يمكن الحر الخارجي ويمكن الحرارة الي يحسها بقلبه وكيانه .. من بعد ماعرف ان مازن متواجد معاهم بنفس المكان .. وشاف الألم بعيون ساره .. وضيقها وعدم رغبتها بالكـلام ! وحس بالنار تسعر بصدره .. وماهدا الا يوم طرا على باله قرب موعد زواجهم .. ! وانه بياخذها ويطير فيها لوين مايخفي عن عيونها اي ذكرى وأي طاري لمازن .. ماعاد صار يتحمل لا وجوده بحياتها ولا بقلبها ولا ببالها !! وهذي هي الحين مو طايقه تقعد ولا تتكلم معاه من شافت مازن .. انحمق وليد وقام عنها ورجع داخل بعد ما اتطمن انه مازن مو عندها .. وانه بيبتعد بالقارب زي مااهو أبعده من حياتها !!
وانطلق القارب ! وش ماكان الجو السايد عليهم بالقارب الا ان الكل وبلا استثناء كان يعصر قلبه الخوف من تحريك القارب بعد كل هالسنوات !! وساره خفق قلبها بكل قوة وإهي تشوف الكل يبتعد بالقارب قدام عيونها .. كل شخص موجود بهالقارب يسكن جزء من قلبها .. ويعني شي كبير بحياتها ..
فهد .. الي عمرها ماحسته أخو .. ! دومها تحسه الأبو الي عوضها عن كل الحنان الي فقدته بفقد أهلها ! وسليمان .. الأخو الطيب الي عمره مارفض لها طلب .. ولا عمره قسى عليها .. ودومه يغمرها بكل الحنان والحب .. وخالد .. الأخو الضحوك المرح .. الي دومه مخرع الكل عليه وشاغل بالهم ومع هذا ظل شعلة البيت الي بغيابه تنطفي كل ضحكة وبسمة وفرحة .. واتذكرت الأيام الي غاب عنهم وأشغلهم واتولهوا عليه .. وحست بتعلقها فيه وباخوانها يزيد بقلبها أكثر .. وسمر رفيقة طفولتها وعمرها .. الأخت الي ماجباتها أمها .. والصديقة الحنونة الي دومها تبدي ساره على نفسها .. وغاده .. هالانسانة الي من بعد كل العداوة الي كانت من بينهم .. تمت من أحب الناس على قلبها الحين .. وتتمنى مايجي اي يوم ويفرقهم لانها جزء مايتجزّأ من قلبها .. ومــــــازن !! تجمعت الدموع بعيونها من طرا على بالها .. واسترجعت منظره ونظراته وكلامه معها .. وحست بالألم يعصر قلبها ونزفت جروحها وغرقت قلبها ! .. مازن الحب الي ترعرع بقلبها من طفولتها لهاللحظة .. أهو الغرام والشووووق الي سهرها ليالي وأبكاها أيام .. أهو الجنون الي استفحل بكيانها وصارت ماتحس الا بجنون حبه وسحر غرامه .. اهو الحلم الي انتهى بلحظة غضب الدنيا .. بلحظة تلاعب الأقدار .. وانتهت معاه كل بسمة وكل أمان وكل راحة عاشتهم بكل سعااااادة معه أهو ماغيره .. وسالت دموعها بكل ألم واهي تراقب القارب يبتعد .. وتحس بشي يشدها لانها تقوم وتلحقهم ! ماتدري ليه حست بالضياع والوحدة من ابتعدوا!
وظلت تراقبهم ودموعها تسيل .. وكأن احاسيسها الي حستها عنهم كان لها سبب .. ! كأن شعور الضياع والفقد كان له معنى .. ! فاجأة .. حست كن الارض تتزلزل من تحتها !! قامت بكل قوة ومشت مسرعه للشاطئ ! منظر قاعد يصير قدامها ماصدقته عيونها ولا استوعبه مخها .. دخان أسود كثيف يطلع من القارب !! .. لا لا .. اهو يطلع من النــــار الي بقلبي !! وصرت أشوفه قدام عيوني .. مستحيل هالدخان من القارب لاء .. !! لكن الحقيقة كانت ان هالدخان منبعث من القارب !! الي كان بغضون دقائق بينحرق !! وكان لازم على كل المتواجدين فيه يقفزون منه والا بيشتعل فيهم !! وشافت ساره الدخان يتصاعد أكثر وأكثر !! وصرخت بصوتها واهي تمسك قلبها بكل فزعه !! لكن القارب مانتظر أحد منهم يقفز .. اتولع الجزء الأمامي منه وانحرق !! ومع الي صار اتأرجح القارب بين هالأمواج العنيفة !! وانقلب بوسط البحــر!! وتطايرت ببالها صور اخوانها .. فهد .. سليمان .. خالد .. لاااااااااااااااااااااااا اااااااااااااااااااااء ..
و
مـــــــــــــازن !! مـــــــــــــازن تعبان !! مـــــــازن مايقدر يسبح !! مازن بيغرق !!
" لااااااااااء .. ماااااااااااااااااازن .. صرخت ساره بكل قوتها واهي تمشي بكل سرعتها بالبحر .. وتشوف القارب قدامها يغرق وماتدري شالي صار فيهـــــــم .. اخواني .. سمر .. غاده .. ومااااااازن .. حبيبي مازن وووووووووووووينك ؟؟؟؟ وظلت تمشي مسرعه وتتعنقل بالصخور وترجع تقوم بسرعه وتمشي لين انتهت الارض من تحتها ووصلت للغريق .. ! وكنها سمعت صووت يناديها .. ويصرخ باسمها .. بس ماحست بأحد وإهي وتسبح بكل قوة وسرعه وترفع نفسها كل شوي لتشوووفهم .. وينعصر قلبها بكل خووف وخرعه واهي ماتشوف أحد منهم !! ياربي وينكم ؟؟ يالتني رحت معاكم !! يالتني غرقت وياكم ! ووووينكم لا تروحون عني وتتركووني لحاااالي لااااااااااا .. وسبحت بكل قوة وراسها يدور بكل مكان وعيونها تحاول تلقط مازن .. واخيرا انتبهت لخيال اشخاص من بعيد يسبحون !! ودورت بينهم عن مازن ! ماميزت أحد منهم لكن مستحيل يكون مازن بينهم لانه مايقدر يسبح ! ياويلي لايكون غرق .. لاااااااااااااا .. لااااااااااااااااا مازن وينك حبيبي لا تغرق .. !! وصارت تسبح واهي تدوره بعيونها .. !! وتوقف بمكانها لحظات وقلبها يخفق بكل عنف وخرعة وألم !! وفاجأة انتبهت لشخص يعارك الأمواج العنيفة .. !! وتبتلعه الأمواج داخلها فترة وبالقوة يحاول ويجاهد ليطلع منها .. آلام شديدة تضرب برجوله وكتفه وتعجزه عن الحركة ! وصعب عليه يتحدى الأمواج بإيد وحده !! وخلاص ماقدر .. خارت قواه واهو يغرق وسط الأمواج !! وساره شافته واهو يغرق وماتت من الخرعه عليه !! وسبحت بكل سرعه لتوصله واهي تنادي عليه .. لين وصلت عنده وكانت الأمواج قويه وتدفعها .. وغاصت داخل البحر لتقدر توصله أسرع وغصب عن الأمواج !! ووصلت عنده وشافته غاطس .. لاااااااااااا حبيبي مو مخليتك تغرق .. !! ومسكته من خصره بكل قوتها ورفعته وصرخت : مااااازن خذ نفس !! اسحب هوا حبيبي .. !! (( بلع مازن من المويه قد مابلع .. ! وحاول ياخذ نفس بكل صعوبة وساره مسكت ذراعه وحطته فوق رقبتها ولمته بإيد وحاولت تسبح فيه بإيدها الثانية وهي تقول : مازن حبيبي اتمالك نفسك أرجووك ! (( وسبحت فيه بسرعه لأقرب شاطئ صادفها !! ماعاد تدري وين المكان الي فيه بيتهم بس تبي شاطئ قريب منهم وخلاص .. وسبحت واهي تحس انها إهي المنتهية !! قلبها الي ماتحمل الخرعة !! ولا تحمل كل هالجهد من السباحة .. ولا تحمل يبقى بدون هواء فترة طويلة واهي تغطس وترفع مازن لياخذ نفس !! وانفلت مازن منها بين الامواج وصرخت : لاااااااااااااااااااااااا ااااااء .. حبيبي لا تغرق !! (( وغاصت بآخر جهد بقى منها ورفعته بكل قوتها واهي غاطسه .. وصارت تدفه واهي غايصة تحت المويه تسبح وايدينها رافعة مازن على فوق بكل قوووه تملكتها بهالوقت .. وحست انها مو قادرة تتحمل حبس الهواء عن رئتها أكثر .. وبتغرق وبتغرقه معها !! فمسكت مازن بإيدها الثانيه ورفعت نفسها لتاخذ هوا عميق وطالعت مازن وحسته منتهي ! وقالت بفزعة : مازن حبيبي اتمالك .. اتمالك ارجووووك .. قربنا من الشاطئ خذ نفس حبيبي خذ نفس .. ! (( ولا ماتحملت شكله ومنظره وكنه يحتظر قدامها !! وسحبت هواء عميق بكل ماقدرت رئتها تتحمله وغااااصت داخل البحر !! ورفعت مازن لسطح البحر وصارت تدفع الأمواج برجولها بكل قوة وتدف مازن للأعلى قد ماتقدر .. وحست انها منتهية .. لا هواء .. لا نفس .. لا نبض !! كل شي بدا يختنق عندها .. لكن مازن بيمووت !!
" أنا أفديك بروحي" ! قالت هالكلمة كم مره ! وماظنت انه بيجي يوم تنفذها .. تفديه بروحها .. بهواها .. بأنفاسها !! وظلت رافعته وتسبح فيه لين حست بالارض من تحتها .. وضوى الأمل بآخر نبض بقلبها ووقفت ومسك مازن وصارت تسحبه واهي تقول بأنفاس متقطعة : وصلنا حبيبي وصلنا .. مازن لا تموووت حبيبي لا تمووت .. (( وسحبته لين وصلت لأول الشاطئ وقلبته على بطنه وصارت تضغط على ظهره بكل قوتها .. وطلعت كمية هائلة من الموية من فمه واذنه ورجعت قلبته على ظهره واهي تبكي من قلبها وتقول : ماااااازن حبيبي لا تمووووت .. مااااااازن رد علي ارجووووووك ماااااازن افتح عيووونك حبيبي شووووووفني رد علي !
وصارت تضغط على صدره بكل قوة .. وكم مره ضغط اهو على صدرها بتعبها !! وصارت تدلك قلبه وكم من المرات الي دلك أهو قلبها !! وماتجاوب معها وانجنت !! لا مستحيل تموت حبيبي لااااااء .. وبآخر أنفاس بقت عندها تحسسها اهي بالحياة .. وآخر نبضات بقت بقلبها ممكن تقيها من الموت .. قربت من فمه ونفخت هواها وأنفاسها !! وابعدت راسها واهي تنادي عليه : حبيبيي اتنفس قوووم ارجوووك حبيبي ..(( ورجعت تنفخ مره ثانية وترفع راسها وتحس الدنيا تظلم من حواليها وآلام الدنيا تنغز بقلبها وجسدها .. !!
وفتح مازن عيونه !! واهي ماصدقت وشالت راسه وحطته على رجولها وضمته على صدرها بكل قوة ّ لعل ضمتها تصحيه .. لعها توعيه وترده للدنيا .. وقالت واهي تبكي : ماااازن إنت مو ميت صح ؟؟؟ انت تسمعني تحس فيني موووو ؟؟؟
ورجع مازن فتح عينه بوهن وطالعها .. كانت هي منتهية خلاص !! شفايفها مزرقة وعيونها متوقدة كالجمر من ملح البحر كثر ماغاصت تحته !! وعيونها تدووور من مكانها لكنها ترجع تسحب نفس بكل قوة لتظل صاحية .. لتظل تنعش مازن بآخر مابقى فيها من نفس وحيل وحياة !!
همسة من شفاة مازن طلعت وقال : سـ ـاره .. تعـ بـتـي قلـ بـ ك !!
ساره وهي تبكي وتضمه بكل قوة : مازن انت تحس انك حي .. صاحي انت مووو ؟؟
مسك مازن ايدها وضغط عليها بقوة ليطمنها .. !
ساره بأنفاس منتهية : حبيبي اتنفس .. حاول تاخذ نفس !
أخذ مازن نفس بصعوبة وسكر عيونه بقوة من شدة الآلام الي تصرخ بكتفه وحوضه وذراعه ويحس عضامه تفككت !! وفاجأة صار يكح بكل قووووة .. واخترعت ساره وقعدته ووقفت إهي وخبطت على ظهره فتره واهو يكح .. وكل شوي تجي قدامه لتشوف وجهه شلون صار .. وشافت مووويااات تطلع من فمه انتهت بخيط من الدم !! واخترعت ساره من قلبها !! وماعاد اتحمل قلبها أكثر .. ولا جسدها النحيل .. ولا روحها المتمزقة .. ولا أي احساس بقى فيها !! واهتزت صورة مازن قدامها وماعاد صارت تقدر تشوفه بوضوح ! وتراخت ايدينها الممسكة فيه .. واهي تحس بأنفاسها .. انتهت !! ونبضات قلبها .. تودعها !! وأظلمت الدنيا من قدامها وطاحت على رجول مازن .. بلا وعي .. ولاحس ولا حراك !!
--------------------------------------------------------------------------------
#100