ماكنت اؤمن بالعيون وفعلها حتى دهتني في الهوى عيناك - 40 الاخير - بقلم riwaiax - مكتملة | روايتك

البارت الأربعون والأخير ___ نوره طلبت من سعود تقعد كم يوم في بيت اهلها نفسيتها متدمره بعد خبر دخول فايز بغيبوبه الي كان صعب عليها واشد قسوه على قلبها ـــــــ بعد مرور شهر طول هالشهر نوره تزور فايز يوميا الصبح تقرأ قرآن وتسولف معاه لين تتعب وترجع البيت ____ اسيل طلعت من غرفتها لابسه عبايتها وبتطلع توقعت تلقى امها بالصاله بس ما حصلتها عدلت شيلتها وغطت وجها وطلعت بس اول ما انفتح الباب جمدت بصدمه وهي تشوف الي واقف قدامها رجعت لوراء تستوعب ان الي تشوفه ياسر بس كان نحفان حيل ياسر دخل :السلام عليكم اسيل ببرود رغم شوقها :وعليكم السلام ياسر :كيف حالك اسيل :الحمدلله وانت وش فيك نحفان كذا ياسر ابتسم : لان مشتاق لناس قلبهم حجر ما يحسون اسيل نزلت غطاها عن وجها وهي تطالعه وسكتت ياسر بدون تردد سحبها وضمها حيل بعمق شوقه لها بعد ومسك وجها وبهمس: اشتقت لك اسيل امتلت عيونها دموع وهي اشتاقت له مسك يدها وطلع معاها ركبها لسيارته وحرك وهو مستانس ويحس روحه رجعت له ____ اسامه قاعد وهو مهموم قعدت جنبه خلود وبهدوء :كيف حال فايز اليوم اسامه بتعب :للحين على حاله ما تغير خلود مسكت يده :اصبر وان شاء الله بيقوم قريب اسامه طالعها :مو قادر اشوفه كذا اشتقت له ولضحكته و سوالفه اشتقت لها خلود تنهدت :ادعي له حبيبي اسامه طالعها وباس جبينها وقف : انا رايح لفجر وامها تبين شي خلود بهدوء : سلامتك اسامه ابتسم وراح للغرفه يبدل ويطلع ___ في بيت ابو تركي ام تركي وقفت وهي تهلي وترحب بأسيل الي ابتسمت بهدوء قربت منها وسلمت على راسها : اخبارك ياخاله عساك بخير ام تركي : بخير بشوفتك يمه امجد طالعها بدهشه اسيل ابتسمت له مشى لها وضمها :ماما خلاص رجعتي بتقعدين معنا على طول اسيل ابتسمت ومسحت على شعره :ايه حبيبي امجد طالعها بفرح اسيل :عن اذنك خالتي ومشت لغرفتها اول ما دخلت وصلتها ريحة عطره الي من حملت مو قادره تتقبلها مشت بسرعه لشباك وفتحته شافت اكياس فخمه على السرير مشت لها وابتسمت وهي تشوف ياسر جايب لها هدايا من سفره فتح الباب ودخل وابتسم : عجبوك اسيل: كثير اختفت ابتسامتها وضاق صدرها لما تذكرت فايز قعد جنبها و بهدوء : وش فيك اسيل : فايز ياسر : وش فيه اسيل بضيق : بغيبوبه وللحين ما صحى ياسر اندهش ضمها بهدوء يحتوي حزنها قبل فرحها : حبيبتي الله معه ما راح ينساه بعدها وطالعها بحب : خلينا الحين فيك انتي وبس ____ شيخه فرحت لما اتصلت لها اسيل وقالت لها انها رجعت لياسر طلعت من غرفتها وقعدت في الصاله قدامها دلة الشاي والقهوه الي على طول تتجدد مدت يدها لدلة الشاي وسكبت لها وشربت وهي تطالع البيت الكئيب المزعج بهدوءه بعد ما كان يضج باصوات عيالها واحفادها الحين فاضي مافي احد غيرها هي والشغالات تحس بوحده وضيق وفقدت حس فايز فقدت حس فايز واشتاقت له حيل وصالح نادرا يجيبه ابوه عندها وعيالها الي حاولت يكونون حولها في هالبيت تركوا البيت و كل واحد طلع لحاله وقفت بتروح لفايز المستشفى افضل ____ اسماء حاسه بألم فضيع مدت يدها لجوالها بتدق على اسامه يجي يوديها المستشفى لان تحس انها بتولد ومو قادره تتحمل فجر طالعت امها بخوف : ماما شفيك اسماء ببكاء وهي تتنفس بسرعه : آه ياربي وين ابوك بموت دخل اسامه سمع صوت بكاها مشى لها بسرعه : وش فيك اسماء بتعب مسكت يده : اسامه خذني المستشفى بسرعه اسامه راح للغرفه اخذ عبايتها ورجع لها لبستها بسرعه وطلع معاها هي وفجر قفل الشقه وبسرعه مشوا لسياره حرك واسماء تبكي بألم وفجر تبكي خوف على امها ____ في المستشفى شيخه عند فايز ماسكه يده وتقرأ قرآن قفلت المصحف ونزلته وقعدت تسولف معاه وتقول له كل مواقفه الي تضحك معاها خانتها دمعه نزلت مسحتها واختنق صوتها و ما قدرت تكمل طلعت مناديل من شنطتها ومسحت دموعها تنهدت بألم وهي تطالعه على نفس وضعه من شهر خذت شنطتها وقفت بتمشي بس جمدت وهي تشوف اصبعه تحرك غمضت عيونها حست انها تتخيل من كثر ما هي مشتاقه له وودها يقوم دخلت الجوري وسلمت عليها : كيفك ياخاله شيخه : بخير يمه والله من كثر ما ودي ان يقوم تخيلت ان تحرك الجوري ابتسمت بألم قربت من فايز بتشوف كيف صار اليوم بس تفاجأت من شافت اصبعه تحرك طالعت شيخه بدهشه و بفرح : لا ياخاله ما تتخيلين انا شفته يعني صحى باست جبينه وبهمس : اصحى ياروح خالتك كلنا مشتاقين لك شيخه دمعت عيونها بفرح دخل الدكتور علي المسؤول عنه : السلام عليكم الجوري : وعليكم السلام دكتور علي ابشرك فايز صحى مشت وقفت جنب خالتها الدكتور علي ابتسم : الله يبشرك بالخير راح له ووهو يفحصه ويشوف حالته : ان شاء الله اليوم او بكرا بيصحى من الغيبوبه لان حالته احسن بكثير وبدا يستجيب الحمدلله شيخه :مشكور والله يعطيك العافيه طلعت جوالها واتصلت لاسامه تبشره بهالاخبار الحلوه بس تفاجأت لما قال لها ان اسماء جابت ولد وكان هاليوم يوم فرح لهم ____ سعود جاء بيطمن على فايز بس رجع من شافهم عنده طلع الدكتور علي و لحقه وسأله واستانس من كلام الدكتور وبسرعه حرك وراح للبيت وقف سيارته ونزل وهو يناديها : نوره ام فايز وينك نوره طلعت من المطبخ باستغراب : انا هنا خير ان شاء الله سعود : عندي خبر بيفرحك نوره ابتسمت : وشو سعود بابتسامه : فايز صحى نوره طالعته استوعبت الي قاله وشهقت مشت له : جد احلف ان فايز صحى سعود : والله توني جاي من عنده محمد : يعني فايز بخير و بيطلع من المستشفى سعود : ايه عبدالله :الحمدلله طالع اخوانه بفرح جواد ووجدان مو فاهمين الا ان فايز تعبان والحين صار بخير واستانسوا نوره سجدت سجود شكر لربها وقفت مسحت دموعها : سعود تكفى ابي اروح له سعود : بس الحين اكيد كلهم عنده نوره طالعته : ما يهمني احد سعود : طيب يالله _____ وصلت نوره المستشفى مشت خطوتين وقفت وقلبها يدق بسرعه سعود وقف وهو يطالعها باستغراب : شفيك نوره طالعته خايفه فايز يرفض وجودها تنهدت واشرت براسها بمعنى ولا شي مشت وسعود معاها وصلت للغرفه طالعتها ولفت لسعود سعود بهدوء : ادخلي نوره دخلت شافت شيخه قاعده جنبه وشذى وعبدالعزيز واحمد موجودين اول ما شافوها توجهوا للباب بيطلعون وهي بعدت عن طريقهم قربت لفايز باست جبينه وخده : الحمدلله على سلامتك حبيبي خطاك السوء يمه فايز طالعها بهدوء ومارد شذى وقفت :نوره اقعدي مكاني نوره قعدت :كيفك حبيبي فايز بتعب :بخير وش تبين جايه نوره اندهشت عضت شفتها بقوه شذى :فايز حبيبي وش هالكلام هاذي امك وجايه عشانك فايز ببرود وتعب: انا مالي ام غير امي شيخه انصدموا من كلامه نوره مسكت يده : حاقد علي لهالدرجه عشان عصبت عليك بس فايز: هاوشتيني وفشلتيني قدامهم هذا غير انك تركتيني في عز حاجتي لك نوره طالعته بهدوء وقفت: اهم شي انك بخير وما تشوف شر بس بقول لك شي انا ما تركتك بإرادتي الله اعلم من الي فر راس ابوك واخذك مني وحرمني منك بس حسبي الله ونعم الوكيل طالعت شيخه وطلعت تسندت على الجدار وهي تكتم شهقاتها وكلامه ذبحها وخاصه لما قال انا مالي أم خلاص شكله طلعها من حياته انتبهت على صوت وحده: اختي فيك شي نوره لفت لها وتعلقت عيونها بلي واقف وراها تكلمت بقهر :كره فايز لي انت السبب فيه الله لا يسامحك بكت وحطت يدها على بطنها وهي منهاره نفسيا اسامه صد بنظره عنها ودعوتها اثرت فيه يحس نفسه نذل واناني لان اخذ فايز منها نوره خذت نفس بقوه وهي تكتم ألمها خلود بتوتر مسكت يدها: يوجعك شي انادي لك الدكتور نوره: لا اصلا انتي من خلود بهدوء: زوجته نوره سحبت يدها منها: ما ابي منكم شي ما قدرت تتحمل الالم اكثر: آه يا الله اسامه طالعها لما سمعها تتألم خلود طالعت اسامه :روح ناد الدكتوره او الممرضات بسرعه لف بيمشي وشاف سعود جاي اول ما شافها مشى لها بسرعه: نوره شفيك نوره :آه سعود بطني خلود بارتباك :شكلها بتولد طالعها سعود بصدمه :بس هي توها بالسابع نوره ضغطت على يده بقوه لف وشاف ممرضه جايه معها كرسي متحرك وقفها وقعدت عليه وبسرعه مشوا ما انتبه ان اسامه الي جاب الممرضه من توتره خلود طالعت اسامه :من هاذي وش قصدها بكلامها اسامه تنهد بعمق: ام فايز ودخل الغرفه وخلود تفكر اسيل زارت اسماء وفي يدها بوكيه ورد وكاكاو دخلت ابتسمت وهي تشوف مها وامها سلمت عليهم وبهدوء :الحمدلله على السلامه ومبروك ما جاكم اسماء :الله يسلمك وعقبال ما تفرحين بولدك اسيل ابتسمت :آمين يارب مشت لسرير الطفل شالته وباست خده بحب :وش سميتوه اسماء :أيمن اسيل : ياعمري حبيب عمته يجنن اسمه طالعت مها : اخبارك مهوي مها :الحمدلله تمام وانتي اسيل : بخير كيف حالك يا خاله ام اسماء بدون نفس :يخير ولله الحمد اسيل طنشت نزلت ايمن بسريره مها :انتي باي شهر اسيل :الخامس سولفت مع مها شوي ومشت ____ سعود قاعد ينتظر بهدوء قدام باب العمليات رن جواله باسم عبدالله رد : هلا عبود .. لا بنتأخر روحوا عند جدك حسام لما ارجع بمركم .. طيب مع السلامه تذكر ان ما خبر اهلها اتصل لابوها وقال له قفل وهو يسند ظهره للكرسي بتعب طلعت الدكتوره بابتسامه وقدامها سرير الطفله: مبروك بنت سعود ابتسم : الله يبارك فيك كيف حال امها الدكتوره : الحمدلله تمام سعود : والبنت الدكتوره : بخير بس راح تبقى في الحضانه شهرين لانها جات في السابع سعود : الحمدلله اهم شي انهم بخير طالع البنت بابتسامه بس خاف عليها يشيلها وهي صغيره مرا اخذتها الممرضه الي طلعت وراء الدكتوره للحضانه ومشت وبعد ما اخذوا نوره للجناح دخل عندها بيتطمن عليها باس جبينها بس ما كانت حاسه فيه من تعبها وصلوا ابوها وامها وهو طلع رايح لعياله بعد ما قعد معاهم في بيت حسام سعد ____ في بيت ابو احمد شيخه مستانسه اليوم فايز بيخرج من المستشفى نزلت الدرج بس حست بصداع قوي داهمها فجأه مدت يدها بتمسك الدرابزين بس اسودت الدنيا بعيونها وطاحت على الدرج لما وصلت الارض صرخت الشغاله وهي تشوفها طايحه على الارض لا حول لها ولا قوة دخلت الجوري ومعاها صالح ركضت لها الشغاله : مدام ماما يطيح الجوري شهقت ومشت بسرعه لها وهي تشوفها طايحه وغايبه عن الوعي طلعت جوالها بيد ترجف واتصلت على الاسعاف صالح بخوف: ماما شفيها جده الجوري ضمته :مافيها شي حبيبي لا تخاف مسكت راسها بقوه يطلعون من مصيبه ويدخلون بثانيه استانسوا ان فايز صحى من الغيبوبه والحين خالتها طاحت وما تدري وش بيصير فيها نادتها اكثر من مره على امل انها ترد عليها بس لا حياة لمن تنادي دخل عبدالعزيز البيت بعد ما قالت له الجوري انها بتجي تشوف امه بس انصدم بمنظرهم دقيقه وصوت الاسعاف ملئ المكان عبدالعزيز بخوف :وش فيها امي الجوري بتوتر :قالت لي الخادمه انها طاحت عبدالعزيز شالها وطلع للاسعاف الي نزلوا بالسرير حطه فوقه وراح معاها ____ اسامه وقف سيارته قدام البيت طالع فايز نزل وساعده ينزل دخل البيت توقع امه بتكون باستقبالهم بس مالها حس الجوري تغطت بسرعه اسامه قعد فايز مقابلها :السلام عليكم الجوري بهدوء :وعليكم السلام اسامه :امي بغرفتها الجوري سكتت صالح :عمو جده كانت طايحه على الارض و بابا شالها وطلع مع الاسعاف اسامه وفايز طالعوه بصدمه لف اسامه وطلع وهو يتصل على عبدالعزيز فايز بتعب :وش فيها جدتي الجوري وقفت وقعدت جنبه :مافيها شي ان شاء الله بخير وقفت : راح اجيب لك اكل فايز : طيب _____ نوره طلعت من المستشفى لبيتها وهي تعبانه و خلاص استسلمت للواقع ان فايز ما راح يرجع لها وفوضت امرها لله قاعده على السرير سانده ظهرها بتعب دخلت عليها وجدان الي طايره من الفرحه ان صار عندها اخت :ماما بنروح لاختي رتيل نوره :ايه بنروح لها بعدين وجدان بحماس :ماما صغيره مرا نوره ابتسمت ابتسامه شاحبه وهي تشوف حماسها: ايه بس راح تكبر رتيل تكلمت عن كل شي راح تسويه مع اختها ونوره تسمعها بابتسامه دخل سعود :يا المزعجه خلاص صدعتي راس ماما وجدان لفت له :بابا انت تحبني انا اكثر او رتيل ابتسمت وقعد جنبهم :احبكم قد بعض وجدان وقفت وطلعت رايحه لجواد سعود : كيفك نوره : الحمدلله تمام وقف وطلع له بيجامه واخذ منشفته وراح اخذ شور خلص طلع وهو ينشف شعره انسدح على السرير بتعب من الدوام : انا بنام ساعه وقعديني عشان نروح لرتيل نوره : طيب _____ في المستشفى الدكتور: الطيحه كانت قويه وبسببها تأذى العمود الفقري عندها بشكل كبير او بصراحه ما راح تقدر تمشي عبدالعزيز طالعه بصدمه :يعني صارت معاقه الدكتور بأسف : ايه الله يعينكم ومشى عبدالعزيز قعد على الكرسي من قوة الصدمه واسامه يطالع مكان الدكتور وهو يتردد عليه الكلام مو مستوعب امه القويه تصير معاقه وما تقدر تمشي غمض عيونه بتعب طالع عبدالعزيز وبهمس : لا حول ولا قوة الا بالله الله يعين امي اذا درت بالخبر عبدالعزيز وقف طالعه بضيق : اكيد عرفت بدخل اشوفها اسامه تنهد ودخل وبتعب شاف امه نظرها للاعلى بهدوء وراسها عليه شاش عبدالعزيز قرب منها وحب راسها : سلامتك يالغاليه ما تشوفين شر وقعد قرب منها اسامه وحب راسها : اجر وعافيه طهور ان شاء الله يمه شيخه طالعتهم وبهدوء : وين احمد عبدالعزيز : الحين بيجي شيخه ضايقه فيها الدنيا من عرفت بلي صار لها : ابي اطلع عبدالعزيز طالع اسامه بهدوء اسامه : يمه ليش مستعجله للحين تعبانه شيخه بانفعال : ابي اطلع انا اتحمل مسؤولية خروجي من المستشفى وبعدين الحمدلله على كل حال اسامه وقف : طيب يمه اهدي وراح اروح لدكتور واقول له يكتب لك خروج شيخه بلعت ريقها كيف تتحمل انها ما تمشي مره ثانيه صعب عليها الخبر حيل عبدالعزيز مسك يدها وباسها وهو يشوف عيونها حمراء والدموع متجمعه فيها :يمه راح اسوي كل شي عشان ترجعين تمشين شيخه تمردت دمعتها الي كانت حابستها عبدالعزيز مسحها بيده :يمه تكفين لا الا دموعك لاتنزل يالغاليه صدت بنظرها عنه ودخل احمد قرب وسلم على راسها وهو خايف عليها ____ اسيل طاح الجوال من يدها بعد الي سمعته من اسامه انهارت على الارض وهي تبكي ياسر فز وهو يشوف انهيارها مشى لها: اسيل وش صاير من كلمك اسيل ببكاء: امي يا ياسر امي ياسر بخوف: شفيها اسيل :امي ما راح تقدر تمشي بعد اليوم آه يمه ياسر ضمها وهي تبكي بقوه رفعت نظرها له :بروح لها بتطمن عليها ياسر :طيب يالله لبسي عبايتك ومشينا اسيل لبست وطلعت معاه وهي تبكي ياسر نادى امجد الي كان برا يجي معه اسيل :ودني البيت ياسر : طيب ____ في بيت ابو احمد فايز قعد قدامها :يمه انتي بخير وش فيك كيف طحتي شيخه مدت يدها لراسه تنهدت :حبيبي اهم شي انت بخير اسيل مسحت دموعها :يمه شصار لك شيخه بضيق :نسيت اخذ دواي وتعبت وكنت واقفه على الدرج شذى : الحمدلله على سلامتك يا خاله شيخه : الله يسلمك شيماء : طيب جده ليش انتي قاعده على الكرسي ما تقدرين تقومين شيخه طالعتها بألم صعب تتقبل هالحقيقه بسرعه وبضيق : ايه ما اقدر اسيل صدت عنها وهي تمسح دموعها فايز بضيق : ليش يمه ما تقدرين اسامه : خلاص بابا تعال اقعد عندي فايز وقف وقعد جنب ابوه الجوري غيرت السالفه : خالتي ما شفت ايمن للحين هو حلو نفس اخوه ابتسم فايز : حلو مرا شيخه بابتسامه : الله يحفظه _____ مر اسبوعين نوره ما شافت فايز طول هالاسبوعين وكل يوم تروح لرتيل المستشفى شيخه جاب لها احمد ممرضه تكون معاها على طول خلود مرتاحه بحياتها مع اسامه اما اسماء انشغلت بعيالها وتقبلت وضعها شذى حياتها طبيعيه ومستانسه مع احمد وعيالها ____ في بيت عبدالعزيز الجوري وهي تطالع عبدالعزيز سرحان حتى ما انتبه لها وصالح النايم جنبه وبهدوء : عبدالعزيز ما حصلت رد رفع صوتها : عزوز انتبه لها : هلا حبيبتي الجوري : بشنو مشغول بالك عبدالعزيز تنهد :افكر بأمي مريضه ولحالها في البيت كلمت اسامه واحمد بس مو مهتمين طالعها وبهدوء :ببيع البيت ونروح نسكن معها الجوري طالعته الضيق باين عليه حتى لو حاول ما يبين تنهدت: طيب دام هالشي يريحك ابي اروح بيت اهلي اليوم توديني عبدالعزيز :طيب الجوري :و ابي اقعد الليله عندهم عبدالعزيز بهدوء :لا الجوري بضيق :عزوز تكفى بس اليوم عبدالعزيز ابتسم :خلاص طيب بس اليوم ____ نوره قاعده بهدوء شافت وجدان وجواد قعدوا جنبها ابتسمت :يا هلا بالحلوين وجدان ابتسمت :ماما ليش فايز ما يجي عندنا ولا يتصل فينا اختفت ابتسامتها وتضايقت :ما وده يجي براحته تقومون معي نروح لبيت جدو وقفوا :ايه يالله نوره :طيب انتظروني هنا البس عبايتي واجيكم وجدان وجواد :اوكي ____ في بيت حسام الكل مجتمعين سوالف وازعاج الجوري طالعت نوره :شخبار الحلوه رتيل نوره بهدوء :بخير الجوري :الله يحفظها الجوري شافتها ماردت عليها تنهدت وطالعت ثريا الي تناديها وبدت سوالفها معها اما نوره سرحت بتفكيرها بعيد وهي تشوف العيال تنهدت بألم نوال :نوره نوره : هلا يمه نوال بحنان : وش فيك يمه نوره طالعت امها ما قالت لاحد عن الي صار معاها هي وفايز في المستشفى بس تحس نفسها مخنوقه :مافيني شي وقفت ومشت لاول غرفة قدامها قعدت على الكنبه ونزلت دموعها وهي تذكر كلامه لها دخلت نوال وراها قعدت جنبها رفعت وجها ومسحت دموعها وهي متضايقه عليها نوره طالعت امها بغصه :يمه تتوقعين فايز بيرجع لي و يعيش معي ولا خلاص مثل ما قال لي ماعنده ام نوال ضمتها : خلك واثقه بربك وراح يجيك وبيندم على كلامه نوره بعدت و مسحت دموعها بسرعه وهي تشوف صالح جاي يبي جدته ____ ياسر : حبيبتي يالله بسرعه اسيل طلعت : خلاص خلصت ياسر : والله اني متلهف لجيته هالبزر اسيل ابتسمت : طيب واذا كانت بنت ياسر بحب : راح احبها كثر حبي لامها اسيل بابتسامه : وانا احبك اكثر ياسر ناظرها بحب وبراحه وهي معاه وحامل بولده اسيل : يلا شفيك ياسر مشى وهي طلعت وراه شافت خواته كلهم في الصاله سلمت على خالتها وضمت سمر بشوق لها ونجلاء وسوسن طالعت منال بهدوء الي ما حطت عينها بعين اسيل ياسر : عن اذنك يمه بنروح المستشفى الام : الله وياكم لفت اسيل ومشوا ____ الجوري قاعده على السرير بعد ما نومت صالح تأملته بهدوء باست جبينه لفت لجوالها مسكته وقفت عند اسم فايز وهي تفكر بكلام اختها الي سمعته لما كانت رايحه لها اتصلت عليه وصلها الرد : هلا خالتو الجوري بهدوء : فايز ابي اشوفك بكرا فايز : طيب راح اجيك البيت الجوري ابتسمت : اوكي حبيبي اشوفك مع السلامه نزلته وهي تفكر طلعها من تفكيرها جوالها الي رن ابتسمت وردت على عبدالعزيز وبدت تسولف معاه ___ في بيت ابو سعود دخل سعود وشاف نوره سرحانه تضايق من سرحانها الدائم هالايام قعد جنبها وبهدوء : نواره نوره التفت : هلا بو عبدالله سعود تفأجى نادرا تناديه بوعبدالله : وش فيك سرحانك كثير نوره تنهدت : شايله هم رتيل انتظر متى بتطلع من الحضانه و هم فايز الي ما ادري عنه سعود : ايه نسيت اقول لك كلمت الدكتور وقال لي رتيل بتطلع بهالاسبوعين نوره ابتسمت : جد سعود : ايه نوره : الحمدلله سعود طالعها بتأمل : كأنك سمنانه حيل نوره وقفت :ترا توني والده اكيد بيختلف جسمي سعود كتم ضحكته : بس مو كثير شوي وبعدين انا مستغرب الصراحه ام اربعه وما يبين عليك نوره بقهر : سعووود قول ماشاء الله سعود ضحك : ماشاء الله نوره ابتسمت وقفت وهي تصب له قهوه عطته الفنجان سعود ابتسم لان طلعت من جوها شوي ____ الجوري طالعت الشغاله تفتح الباب وقفت لما شافت فايز داخل سلمت عليه وبابتسامه : كيفك يا حلو فايز : بخير وانتي الجوري : الحمدلله الشغاله جابت كوبين عصير وراحت الجوري بهدوء : كيف خالتي اليوم فايز : الحمدلله بس على نفس وضعها ولما تطلعها الممرضه الصاله تقعد شوي بس وترجع حتى صرت اروح لها الغرفه عشان اقعد معها الجوري تنهدت : صعب عليها تتقبل وضعها وانت لا تتضايق اذا ما طلعت لك لان صعب الي صار فايز سكت وهو يشرب العصير الجوري : متى اخر مره كلمت امك فايز : خالتي ما ابي اسمع شي عن امي الجوري : لا بتسمع الي بقوله لك اتوقع انت مو صغير عمرك ١٤ وتفهم امك تعبت فيك وتعبت ببعدك وترا رضا الله من رضا الوالدين وانت مزعل امك فايز طالعها بدهشه : انا ما زعلتها واذا جد هي زعلانه مني ما يهمني الجوري : نسيت كلامك لها بالمستشفى فايز عض شفته وقف وبهدوء : انا وراي امتحان ما ذاكرته عن اذنك خالتي الجوري طالعته بقهر : امتحانك اهم من امك فايز ببرود : ايه الجوري تنرفزت : روح الله معك فايز : مع السلامه ومشى الجوري بضيق : الله يهديك ____ في بيت احمد احمد : شذى يلا بنروح لامي شذى : العيال عندهم اختبارات بدرسهم احمد : ما راح نطول ساعه وراجعين شذى وقفت : طيب حبيبي دقايق بس احمد قعد ونادى مراد ولده الصغير قعده جنبه : كيفك اليوم مراد ابتسم : تمام احمد باس راسه شيماء : بابا اشوفك تحب مراد اكثر منا احمد : ايه عندك مانع شيماء : بس بابا ما يصير كذا احمد : اقول يالملقوفه روحي نادي طلال وملاك انتظركم بالسياره ____ الجوري دخلت وهي مبتسمه : السلام عليكم ردوا الكل عليها السلام خلود : عسى دوم هالوناسه الجوري سلمت على شيخه وعليهم : آمين يارب اخباركم شذى : تمام خلود : الحمدلله تمام وانتي الجوري : الحمدلله خالتي ما بتجي اسيل اليوم شيخه : لا خلود : ودي اجي هنا بس اسامه رفض قال خلك في حالك احسن لك شذى : وهو صادق احسن لك تخيلي تجين وتلقين اسماء هنا ما راح تقدرين لها انا احمد كان مُصر نرجع بس رفضت وكنت خايفه يسويها اعرفه عنيد بس تراجع باخر لحظه الجوري :احسن مو ناقصين زحمه لان برجع انا وعبدالعزيز شذى ببرود :غبيه شيخه طالعت الجوري لاول مره تسألها: كيف حال ام فايز انصعقت الجوري طالعت شذى الي مندهشه ولفت لخالتها: بخير ومرتاحه مع زوجها خلود طالعتها ودها تفهم قصة ام فايز الي كل ما تسأل اسامه عنها يتهرب من الاجابه شيخه بهدوء :الله يوفقها ويسعدها خيره لها خلود شدت على يدها ماضي يا خلود وكل شخص له ماضي الجوري طالعتها فتره:خالتي ممكن اكلمك شوي شيخه :اكيد يمه الجوري وقفت وهي تدف كرسيها :عن اذنكم دخلت وياها غرفة الجلوس الجوري قعدت على كرسي قدامها بتعب وثقل من حملها مسكت يدها وبرجاء: ممكن طلب تكفين خالتي لا ترديني شيخه :آمري الحوري :ابيك تكلمين فايز هو يسمع كلامك وما يرفض لك طلب قولي له عن امه وانها تحبه وانهارت ببعده تكفين نوره بحاله ما يعلم فيها الا الله شيخه طالعتها فتره لفت نظرها عنه :طيب بس اشوفه راح اقول له الجوري وقفت بفرح وباست راسها :الله يسعدك ولا يحرمنا منك ____ اسيل رجعت البيت مع ياسر تفاجأت لما شافت منال منتظرتها بالصاله منال بتوتر :ممكن اتكلم معك ياسر راح غرفته اسيل:تفضلي اسمعك منال طالعتها بهدوء :انتي للحين زعلانه مني اسيل :لا انا نسيت ويا ليت ماتذكريني فيه منال :جد اسيل :ايه انا عشان ياسر انسى كل شي مدت يدها لها :من اليوم راح نبدأ صفحه جديده منال صافحتها :وربي مافي بطيبتك بس ياسر للحين ما يكلمني ومتجاهلني تماما انا اعرف ياسر قاسي وبارد وعصبي بس من عرفك تغير حيل ممـ.. قاطعها ياسر الي نزل لهم وقف: افا كل هالصفات فيني منال فزت من سمعت صوته وماردت ياسر قرب منها رفع وجها له :وبعد شنو منال تجمعت الدموع بعيونها :قولي الي تبينه لي انا اسيل مشت وتركتهم منال نزلت دموعها :ياسر والله مو مرتاحه وانت زعلان مني اذبحني ارحم من تعاملني كذا انا ادري ان صعب ترضى و انا مو زعلانه منك لان استاهل ياسر ضمها وهي بكت بقوه :خلاص اهدي وانا خلاص نسيت لان اهم شي عندي تتعلمين من خطأك منال ابتسمت عنه ومسحت دموعها بيده شاف جوالها يرن ردت بهدوء :هلا طيب ثواني بس واطلع لك ياسر :بتطلعين كذا روحي غسلي وجهك وانا بروح اسلم عليه منال :طيب شيل شدن وياك ياسر ابتسم وهو يشوف شدن نايمه على الكنبه شالها وطلع له ____ اليوم الثاني فايز طالع جدته بصدمه وهو يسمع كلامها غرقت عيونه بالدموع :ليش يمه توك تقولين وانا طول عمري افكر ان امي تركتني وما تبيني بس طلع ان بابا اخذني منها اختنق صوته وهو يتذكر كلام امه بالمستشفى " انا ما تركتك بإرادتي الله اعلم من الي فر راس ابوك واخذك مني وحرمني منك " وقف وهو توه يفهم وش كانت تقصد بكلامها : يمه ليش ما خليتوني معاها احسن لنا بس الحين ماما زعلانه مني لاني ضايقتها وتعبت وهي جايه عشاني بكى كيف اشوفها وش اقول لها شيخه مسحت دموعها وهي تشوفه بهالحاله حركت كرسيها له مسحت على راسه : امك طيبه واذا هي زعلانه منك بترضى صدقني فايز بعد يدها عنه ومسح دموعه بقهر : بروح لها ايه ماما طيبه وتحبني شيخه : فايز تعال طيب من بيوديك لها فايز : بروح مع السواق شيخه تنهدت بضيق واتصلت على اسامه فايز مشى وهو مقهور تلفت يدور السواق مشى له بسرعه وهو يشوفه يتكلم بالجوال : كومار كومار طالعه وهو يشوف وجهه ودموعه : شنو فيه فايز : تعال وصلني لبيت عمي سعود كومار : اوكي قفل من المكالمه وراح يشغل السياره _____ اسامه قفل من امه غمض عيونه بضيق اتصل على فايز مايرد وقف بيطلع بس سمع صوت اسماء تناديه : اسامه ايمن فيه شي اسامه طالع ايمن الي بحضنها : وش فيه اسماء بخوف ودقات قلبها قويه : ما ينتبه للاصوات اخاف يكون عنده مشكله في السمع اسامه شاله وطالعها : متأكده اسماء بتوتر : ايه تكفى خل ناخذه المستشفى نتطمن عليه اسامه وقف : طيب بسرعه البسي عبايتك وتعالي راحت اسماء وطلعت بعد ماجهزت هي و فجر طلع ومشوا للمستشفى ____ اسيل واقفه قدام التسريحه تمشط شعرها و هي مستانسه لان انحلت كل مشاكلها مع خوات ياسر انطق الباب وقفت وهي تفتحه شافت امجد ابتسمت : هلا حبيبي امجد : ماما انتي فاضيه اسيل : ايه حبيبي ادخل امجد :ابيك تدرسيني اسيل خذت الكتاب من يده : طيب يا حلو قعدت على السرير وهو قدامها وبدت تدرسه دخل ياسر سلم عليهم واخذ منشفته و ملابسه وراح اخذ شور طلع وحصل اسيل لحاله قعد على الكنبه بتعب اسيل خذت المنشفه وهي تنشف شعره : وش فيك ياسر مد يده لها مسكت يده وقفت قدامه : تعبان ياسر برمشه عين سحبها وقعدها في حضنه وضمها : يروح التعب كله من اشوفك ام نايف اسيل باستغراب : نايف ياسر باس خدها : ايه راح اسمي ولدي نايف اسيل ابتسمت : حلوو وقفت بتروح ياسر مسكها وشالها : وين اسيل : ياسر بنزل تحت ياسر قعدها على السرير : بنام وبعدين روحي اي مكان تبينه اسيل تربعت : طيب نام ياسر انسدح وحط راسه بحضنها وهي تمسح على راسه بهدوء وحب ____ فايز وصل للبيت طق الباب اكثر من مره فتحت له ميري طالعته : هلا فايز : ماما هنا ميري : لا فايز طالعها : طيب وين راحت ميري هزت اكتافها : ما يعرف فايز دخل وقعد في الصاله ينتظرها بتوتر رفع نظره اول ما سمع الباب انفتح وقف وهو يشوف وجدان وجواد يدخلون جمدوا وهم يشوفونه عبدالله ابتسم وراح وضمه : هلا فايز اشتقنا لك والله محمد سلم عليه بقوه :حيل وربي اشتقنا فايز ابتسم :من وين جايين عبدالله :انا و حمود كنا عند امي رحنا نسلم عليها ونشوفها فابز :طيب وين ماما محمد :الحين بتدخل دخلت نوره وهي مبتسمه وراها سعود قفل الباب وتفأجوا بوجود فايز سعود راح وسلم عليه :هلا فايز متى جيت ليكون تأخرنا عليك فايز بهدوء :قبل شوي جيت نوره طالعته بهدوء ومشت فايز وقف قدامها نوره :وش تبي مو انت ما عندك ام ليش جاي فايز طالعها بدهشه ما تعود تكلمه بهالاسلوب نزل نظره وبغصه: آسف نوره جمدت وبنفس هدوئها: على وشو فايز نزلت دموعه: على كلامي لك نوره بدون تردد ضمته وباست راسه: انا بعد اسفه فايز بكى وصوته ارتفع ونوره نزلت دموعها بقهر شدت عليه وهي مو مصدقه للحين ان فايز معاها بارادته سعود ابتسم واخيرا خلاص ما راح يشوفها حزينه وتبكي على فايز عبدالله صد ومحمد مسح دموعه سعود طالع عياله : تعالو و مشى معاهم نوره بعدت عنه وهي تمسح دموعه وباست جبنيه وخدوده : يا عمري انت فايز بصوت مبحوح : جدتي شيخه قالت لي كل شي نوره انصدمت ما توقعت شيخه تقول بس ابتسمت من قلب الله يسامحها رجعت فايز لها خلتها تنسى كل شي صار معها وتشيل كل الي في قلبها عليهم نوره مسكت يده ومشت معاه قعدت على الكنبه وقعدته جنبها :الله يسعدها مثل ما اسعدتني بجيتك لي فايز : انا بقعد عندك خلاص ما ابي بيت جدي عمي سعود عادي عنده نوره : ايه يا روح امك عادي فايز سند راسه على كتفها : صح ماما وين اختي الصغيره نوره : في المستشفى فايز بحماس : ابي اشوفها نوره : ابشر بنروح لها وتشوفها فايز باس خدها وهي ضمته على جنب تحس الارض ما وسعتها من فرحها ____ اسامه قاعد ومتوتر نادوا على اسم ايمن مشى ودخل عن الدكتور ومعاه فجر واسماء الدكتور وهو يطالع التحاليل تنهد بأسف : الطفل عنده مشكله في السمع وهي مأثره عليه في السمع اسامه بصدمه :يعني ما راح يسمع حتى لما يكبر الدكتور : ايه مع الاسف ما راح يسمع اسماء نزلت دموعها واسامه غمض عيونه بضيق : طيب مانقدر نعالجه الحين الدكتور : في هالعمر لا ويمكن يتم كذا طول عمره وقف اسامه وهو ضايقه فيه الدنيا مسك يد فجر وطلعو من المستشفى ركبوا السياره واسماء تبكي ان ولدها راح يعاني لما يكبر بعد مرور شهر عبدالعزيز والجوري انتقلو لبيت اهله وشيخه طايره من الفرح وكملت فرحتها لما جاتها حفيده وسموها هديل شيخه وهي في حضنها هديل عبدالعزيز حب راسه امه وشال هديل منها وباس خدها : يا زينها حبيبة بابا بالله يمه ما تشبهني ابتسمت شيخه : ايه ماخذه من ملامحك كثير بس صالح يشبه امه الجوري جات من غرفتها وسلمت عليها : اخبارك يا خاله عسى ما تعبتك هديل شيخه : لا هالحلوه ما تعب احد الجوري : الحمدلله شيخه تنهدت بضيق : فايز من راح لامه ما شفناه ما كملت كلامها الا وفايز دخل سلم على جدته وعبدالعزيز والجوري وصالح شيخه بابتسامه : وينك يمه ما جيتنا من شهر اشتقت لك فايز : انشغلت مع امي وتوني اليوم مخلص امتحانات وجيتكم شيخه : الله يحفظك ويوفقك يمه سولف معاهم شوي رن جواله شاف المتصل امه وقف وباس هديل بجبينها : يالله انا بروح شيخه : بدري فايز : مره ثانيه بجي واقعد لين تملين الحين بروح شيخه : بحفظ الله فتح الباب بيطلع بس شاف ابوه وفجر قدامه فجر بفرح : فايز ضمته وهي مستانسه بشوفته : وينك من زمان ما شفناك فايز : كنت عند امي كيف حالك فجر : بخير وانت فايز : تمام فجر : الحين انت بتروح فايز : ايه بس اشوفك مره ثانيه فجر : يعني راح تجي تزورنا فايز : ايه فجر ابتسمت : طيب اسامه طالعه بهدوء طول هالشهر ما كلمه ولا رد على مكالماته ولا شافه : كيفك يا بابا فايز : بخير الحمدلله اسامه حط يده على كتفه : للحين متضايق مني فايز ابتسم : لا اسامه : اذا جد ليش ما ترد علي فايز بهدوء : فتره ومرت اسامه : يعني مو زعلان فايز : ايه مو زعلان اسامه ابتسم : الله يحفظك ولا تقطعنا طيب فايز :طيب مع السلامه اسامه : فمان الله طلع فايز وهو مبسوط كان متضايق منهم طول هالشهر بس الحين مرتاح اسامه راح سلم على امه وعبدالعزيز شيخه : كيفك حالك وحال زوجاتك و ايمن اسامه تنهد : الحمدلله بس ايمن الله يشفيه يمه ان شاء الله ما بقصر بعلاجه بس الحين بهالعمر صعب لانه صغير شيخه : آلله يشفيه يارب ويعافيه اسامه وعبدالعزيز : آمين في بيت سعود نوره قاعده مع العيال ضحك وسوالف فرحتها ما تنوصف وهي تشوف عيالها حولها دعت ربها تكمل فرحتها بوجود رتيل بنتها فتح الباب سعود ودخل وهو شايل رتيل بخوف وحرص : السلام عليكم شهقت نوره وهي تشوفه شايل رتيل حمدت ربها ان استجاب لدعوتها بهالسرعه : ليش ما قلت لي انها بتطلع اليوم سعود : حبيت افاجئك نوره شالتها وباستها بخفه : يا روح ماما واخيرا نورتي بيتك نوره قعدت وسعود قعد جنبها وجدان بفرح : ماما خليها تنام معي بالغرفه ضحكت نوره : بس تكبر بخليها تنام معك الحين لا محمد : ماما اذا هي دلوعه نفس ذي من الحين اقول لك ما راح احبها وجدان طالعته بقهر : احسن لا تحبها عبدالله ابتسم : خلاص بتاخذ الدلع منها رتيل جواد ضحك وهو يشوف وجه وجدان سعود مسك وجدان وقعدها بحضنه : بس لاحد يزعلها حبيبة ابوها وجدان ابتسمت وهي تطالعهم فايز : ماما عطيني اياها نوره طالعته بابتسامه : لا حبيبي مرا صغيره ما بتقدر تشيلها فايز ابتسم وقعد جنب اخوانه و وجدان راحت تسولف معاهم نوره وعيونها تلمع بحب وفرح غمضت عيونها وهي تشكر الله من كل قلبها ان جمعها بعيالها كلهم وخصوصا فايز بعد ما عانت وصبرت كثير عشان يرجع لها واليوم بس تحس فايز مرتاح ومستانس معاهم عكس الايام الي مرت طالعت رتيل وباست جبينها : فديت الحلوه سعود تأملتها بحب حط يده على اكتافها رحع شعرها لوراء وباس رقبتها وبهمس : اشوف البوسات والكلام الحلو لها وانا لي الله نوره ضحكت ولفت وباست خده وبهمس : انت احلى شي صار لي بحياتي سعود ابتسم : كل يوم احبك من جديد نوره : وانا احبك بكل شي فيني،احبك بكل مافي هالعالم من صبر وحنان احبك لاني لقيت فيك الغنى عن العالم سعود توسعت ابتسامته وضمها له عشقه لها ماله حدود تمت ولله الحمد ٨/ ١ / ٢٠١٩ شكرا لكم ولدعمكم لي احبكم ❤ النهاية