ماكنت اؤمن بالعيون وفعلها حتى دهتني في الهوى عيناك - الفصل 18 - بقلم riwaiax - مكتملة | روايتك

البارت الثامن عشر حس بدقات قلبها السريعه من كثر البكاء بس كشر وهو يتذكر كلامها يذكره بالحرف الواحد " اسيل باستفزاز : ليكون صدقت ان احبك واو ما كنت ادري اني ممثله بارعه " الشخص اذا انجرح من شخص غالي عليه حيل يبقى هالجرح فيه ويتذكر كلماته الي يحسها نار تحرقه عكس الشخص الجارح الي يقول الكلام وفي نفس الوقت ينساه بس هو يحس بنبرة الصدق بكلامها همس لها بهدوء وهو يحس نفسه ضايع : صعب اصدقك هدت وخفت مقاومتها جسمها ارتخى بتعب وراسها يدور ياسر انفجع قعد معها على الكنبه راح يجن اذا صار لها شي سندت راسها على وراء ياسر سب نفسه ان هو السبب بلي صار لها : اسيل وش فيك يا عمري اسيل بتعب : ابي مويه وقف وهو ياخذ علبة الماء الي على الطاوله ويعطيها شربت وسندت راسها على كتفه ياسر بهدوء : اخذك المستشفى اسيل : لا بس دوخه لان ما كلت شي اليوم ياسر بصدمه : وليش اسيل زمت شفايفها وماردت ياسر لف ومسك وجها بيدينه : غبيه انتي صحتك عندي اهم من كل شي و يا ويلك ان سويتي شي من وراي وقبل لا تسوين شي عطيني خبر طيب اسيل : طيب ياسر قرب منها وباس جبينها همس لها: انتبهي لنفسك اخذ مفتاحه طلع وتركها غارقه بأفكارها __ في بيت ابو احمد اسامه فتح غرفة فايز بضيق مجبور : يلا بابا باخذك لامك فايز طالع ابوه بدهشه : ليش اسامه : بتقعد عندها اليوم وبكرا فايز : ما ابي اسامه : فايز حبيبي يلا كلها يومين فايز طالعه مشى لايباده اخذه معاه تذكر اخر مره شاف امه بالمستشفى وكلام محمد ما يبي يروح ركب السياره و اثنينهم ساكتين وقف اسامه قدام بيت حسام وهو يتذكر كل شي صار معه ويا نوره في هالبيت غمض عيونه وهو يزفر انفاسه بعمق لف لفايز بهدوء : يلا بابا فايز هز راسه بالنفي وعيونه امتلت دموع : ما ابي بابا ما ابي اروح اسامه مسك يده وباسها : ليش يا روح بابا فايز بضيق : ماما ما تبيني اسامه بهدوء : لو ما تبيك ما كان طالبت فيك فايز طالعه بعدم فهم اسامه : يلا انزل فايز فتح الباب وهو ماسك ايباده بقوه اسامه مد يده له ومشوا لبيت سعود اخذ نفس وضغط الجرس ثواني وفتحت ميري اول ما شافت اسامه عرفته : نئم شنو يبي اسامه لوا فمه بطفش : نادي نوره ميري : ليش اسامه بنرفزه : بتنادينها او اروح ميري : طيب مين انت اسامه زفر بطفش : قولي فايز جاء ميري تركت الباب مفتوح ومشت بسرعه لداخل : مدام هذا واحد يقول فايز وقبل لا تكمل كلامها وقفت نوره وهي تلبس جلالها وتمشي بسرعه للخارج شافت فايز بس من شوقها الكبير له ما انتبهت ان ابوه معاه مشت بسرعه طالعت فايز ابتسمت : تعال حبيبي فايز طالعها مشى بخطوات بطيئه نزلت لمستواه وضمته بقوه باست خدوده وراسه : حبيبي طمني عنك انت بخير فايز هز راسه ايه رجعت نوره تضمه: ياروحي انت انتبهت لثوب رجال رفعت نظرها لفوق وانصدمت انه اسامه واقف وجات عينه بعينها وقفت بسرعه ومسكت فايز ودخلت البيت اما اسامه كان واقف ريحة عطرها اخترقت انفه و هيجت كل مشاعره وذكرياته الي حاول ينساها صوتها رجعه لاحلى ايام عمره نظرة عيونها كانت بارده وكأنها تخبره بانه لا يعني لها شيئا وانه اصبح ماضي فقط مشى لسيارته سند راسه على الدريكسون لينطق بهدوء: ما تغيرتي يا نوره بس جمالك زاد غمض عيونه وبضعف: آه بس ليتني وقفت بوجه الكل عشانك والله اني للحين احبك طالع بيت سعود تنهد تنهيده خرجت من اعماق قلبه حرك السياره وطلع من الحي _ سعود نزل وهو يلف السبحه على يده اتسعت ابتسامته وهو يشوف فايز قاعد معاهم قرب منه: هلا وغلا بالغالي ولد الغاليه فايز طالعه سعود قعد جنبه وباس راسه :كيف الحال فايز بهدوء: بخير سعود وقف: دوم يارب انا الحين طالع بس اجي راح اقعد معك نوره: وين سعود ابتسم: عندي شغل مع بندر سلام نوره طالعت وجدان وجواد هاديين ضمته فايز بقوه: قولي حبيبي كل شي صار معاك فايز طالعها ولف لمحمد الي يطالعهم وعبدالله الي ابتسامته على وجهه نوره بحنان ومسحت على شعره:يلا حبيبي قول لي فايز طالعها وصار يقول لها كل شي وهي تقاطعه وتسأله وهو يجاوب بايه او مادري محمد: ماما ابي كاكاو نوره طالعته وبهدوء: خلص محمد بقهر: ابي حق فايز عبدالله: حمود حقك خلص مايصير تأخذ حق فايز محمد بعناد: انا ابي كاكاو نوره بابتسامه: خلاص طيب راح اعطيك طالعت فايز الي يطالعها بزعل ابتسمت وهي تلعب بشعره همست :لا تزعل شريت لك اشياء كثيره راح تعجبك فايز ابتسم: جد نوره: ايه ياروح ماما وقفت وهي تشيل وجدان: حبيبي عطني رضاعة وجدان وقف محمد بيعطيها بس سبقه فايز لان كان الاقرب واخذ الي غطاها وردي لان واضح انها لبنت محمد طالع عبدالله بقهر عبدالله وقف :حمود تعال محمد وقف ولحقه _ عبدالعزيز دخل الصاله: اخبار الغاليه شيخه طالعته بجديه: ما قلت لك ما ابي اشوفك عبدالعزيز بابتسامه: وتقدرين يمه يمر يوم وما تشوفين عزوز ابتسمت شيخه: ايه لما تشيل العقربه من راسك عبدالعزيز قعد جنبها ومسك يدها وباسها: يمه طيب ليش شيخه بحده:قلت لك البنت دكتوره تروح دوامها بليل وشغلها اختلاط ويجوها مرضى رجال يعني انت ما راح تشك فيها عبدالعزيز بضيق: يمه خلاص محد صار يفكر كذا انا راضي ان زوجتي تكون دكتوره وواثق فيها ثقه عمياء شيخه بنرفزه: بعدين البنت لسانها طويل ضحك عبدالعزيز: كيف عرفتي شيخه: اعرفها اخت العله نوير عبدالعزيز بابتسامه: بس يمه تجنن وانا اموت فيها شيخه وهي تحس ضغطها ارتفع من تمسك عبدالعزيز فيها : انا او هي يا عز عبدالعزيز وقف رغم انه مقهور بس كان يتكلم بهدوء ما رفع صوتها عليها ابد : تدرين ان محد يوصل غلاتك يالغاليه بس اذا ما كانت جوري زوجتي فأنا ما راح اتزوج ابد شيخه مسكت راسها بألم عبدالعزيز يتنفس بسرعه لف لامه بيستأذنها ويطلع بس انصدم وهو يشوفها ما تتحرك قرب منها مسك يدها : يمه يمه وش فيك يمه صرخ على احدى الشغالات تجيب له عباية امه اسيل نزلت من لما شافت ياسر امس دخلت غرفتها وما طلعت انصدمت وهي تشوف عبدالعزيز يصارخ وامه ما ترد مشت بسرعه : عز شفيها امي عبدالعزيز بتوتر : اغمى عليها فجأه شال العبايه من الشغاله وهو يحطها عليها ويشيلها ويركض فيها اسيل مشت وراه بسرعه : عز طمني عليها عبدالعزيز : طيب شافت شيماء جايه لها ابتسمت بتوتر وهي تدعي ان امها تكون بخير : هلا بشيوم شيماء : شفيها جدتي اسيل هزت اكتافها : ما ادري والله ننتظر عمك يطمنا عليها دخلت شيماء وقعدوا في الصاله سوالف مع ان اسيل متوتره وخايفه على امها بس ما تبي تخوف شيماء وياها _ في بيت سعود في غرفة عبدالله ومحمد تحديدا عبدالله : انت شفيك على فايز محمد قاعد على سريره يطالعه : ما احبه دايما ماما تحبه اكثر عبدالله وهو يطالعه : طيب هي امه لازم تحبه اكثر محمد بغيره : لا هي ماما لنا عبدالله بقهر قعد جنبه : ترى ماما بتزعل منك اذا زعل فايز وبابا راح يزعل بعد مثل ذيك المره لما عصب عليك محمد طالع عبدالله ودموعه نزلت : ليش هو يجي عندنا ما ابيه عبدالله تنرفز : حمود خلاص عند نوره بعد ما ناموا التوأم مشت مع فايز لغرفته تلعب وتسولف وياه مو مصدقه وجوده معها فايز تذكر شي طالعها : ماما عمتو شذى تبي رقمك نوره اختفت ابتسامتها هي تعتبر شذى اختها الثالثه بس ما تبي اي شي يوصلها لعايلتهم يكفيها فايز وبس فايز : ماما عطيني رقمك نوره : طيب وقفت وهي تفتح درج التسريحه وتطلع دفتر وقلم وتعطيه رقمها : طيب عطها رقمي وخله عندك عشان اكلمك طيب فايز ابتسم : طيب نوره قعدت على السرير : تعال فايز راح انسدح جنبها باسته وهي تلعب بشعره بحب وغطته فايز : ماما قولي قصه ضحكت نوره : من عيوني _ عبدالعزيز تنهد براحه لما صحت امه بالسياره وقف قدام المستشفى طلب كرسي متحرك لها ونزلها شيخه بتعب : عز يمه ابي دكتوره لا توديني لدكتور عبدالعزيز : يمه اهم شي اطمن عليك شيخه : لا شوف لي دكتوره عبدالعزيز تنهد وهو يسأل عن دكتوره رد عليه رجل الريسبشن : ايه الدكتوره جوري موجوده وقبل لا يكمل كلامه حرك كرسي امه ومشى فز قلبه من سمع الاسم قعد على الكرسي قدام مكتبها دقايق وطلع المريض الي كان عندها ونادت على شيخه ابتسم ودخل مع امه جوري طالعت عبدالعزيز حست بتوتر ورجفه بقلبها وجسمها وجوده يبعثرها عبدالعزيز : سلام عليكم جوري :وعليكم السلام عرفت ان المريضه امه خذت نفس مع انها ما تطيقها بس هي الحين مريضه عندها وبمهنيه: عسى ماشر خالتي وش فيك شيخه قالت لها وش صار جوري خذت جهاز فحص الضغط حطته على كتفها وقفلته وضعطت طالعتها وتكلمت بهدوء :ضعطك عالي يا خاله شيخه بقهر :كله من وراء هالولد جوري ابتسمت غصب وهي تكتب بالحاسوب قدامها لف عبدالعزيز لجوري : طيب دكتوره يعني هي بخير مافي شي نخاف منه جوري لفت له : بنسوي لها الفحوصات اللازمه عشان نطمن اكثر وقفت جوري وهي تمسك الكرسي وقف عبدالعزيز : لا انا باخذها جوري ابتسمت : طيب بعد نص ساعه جوري تشوف الفحوصات : الحمدلله كل شي تمام بس الضغط ارتفع عليك لا تتعبين نفسك وراح اكتب ادويه اتمنى تنتظمين عليها عشان صحتك شيخه بتعب وهي منتبهه لنظراتهم طاح نظرها على البطاقه الطبيه انصدمت وهي تقرا الاسم لفت وجها : طيب عبدالعزيز : الله يعطيك العافيه جوري : الله يعافيك مسك كرسي امه بيطلع بس وقف وهو يسمعها تناديه لف لها : آمري جوري بصوت منخفض : ما يامر عليك ظالم بس بغيت اقول لك مبروك نجاح المشروع عبدالعزيز اتسعت ابتسامته وهو يطالع بعيونها : الله يبارك فيك شيخه تطالعهم وبهدوء : عز يلا عبدالعزيز انتبه لامه فتح الباب وطلع وابتسامته ما فارقته يالله كل يوم يحس بحبها يزيد طلع جواله واتصل لاسيل يطمنها _ سمر ماسكه جوالها وتفكر تتصل باسيل او لا واخيرا خذت نفس واتصلت اسيل الي قفلت من عز نزلته على الطاوله شيماء وهي تأكل حب شمسي وترمي القشر على الارض اسيل ضربتها على راسها : وليش جايبين الصحن عشان ترمينه على الارض شيماء وهي تحك راسها : نسيت شسوي مندمجه مع الفيلم اسيل رن جوالها شالته بابتسامه طالعت الاسم تستوعب ان سمر متصله ردت : هلا والله اغلى من يتصل سمر بهدوء : هلا فيك كيف حالك اسيل : بخير دام سمعت صوتك انتي اخبارك سمر : تمام الحمدلله عم الصمت دقيقه سمر خذت نفس وزفرته تكلمت : ترا للحين شايله عليك ومتضايقه منك اسيل بهدوء :آسفه سمر سكتت :وش صاير معاك رسلتي لي امس رساله انك محتاجتني اسيل عيونها مليانه دموع سمر صديقة عُمر ومجرد ما قرت رسالتها اتصلت عليها وماتركتها حتى وهي زعلانه منها :بس اشتقت لك ولسوالفنا سمر ابتسمت وبهدوء :وانا بعد اسيل لفت وجها عن شيماء عشان ما تلاحظ دموعها :اقدر اشوفك اليوم سمر : ما ادري والله بشوف وارد عليك اسيل مسحت دموعها :طيب حبيبتي سمر :مع السلامه اسيل :بحفظ الله قفلت وهي تشوف شيماء خلصت الحَب: وجع شيوم كان خليتي لي شيماء طالعتها بابتسامه : من كلمتي اسيل طارت عيونها : وش دخلك شيماء بنفس ابتسامتها : بس اسأل اسيل تطالعها : سمر بعد من غيرها شيماء ضحكت : طيب وين فايز اسيل طالعتها بدهشه : صح وين فايز ما شفته شيماء : يوه عمتي انا اسألك اسيل : ما ادري يمكن طلع مع اسامه لما يجي بنسأله بعدين انتي وش جابك عندنا شيماء طالعتها : ماما راحت عند جدو وانا ما ابي اروح هناك قلت لهم اجي عندك ما تبيني الحين اتصل لبابا يجيني ضحكت اسيل : لا والله جيتي بوقتك طفشانه وما عندي احد شيماء ابتسمت بس وقفت هي تشوف عبدالعزيز يسند جدتها داخلين قربت وهي تسلم عليها اسيل لحقتها : عسى ماشر عبدالعزيز : ماشر بس الضغط ارتفع عندها ولا كل شي تمام اسيل زفرت براحه : الحمدلله وصلها لغرفتها سدحها على السرير وباس راسها: تأمريني بشي شيخه هزت راسها بلا لف وطلع لشيماء واسيل بيقعد معهم _ سعود رجع البيت مشى لغرفة عياله ابتسم لهم : كيف الحلوين عبدالله بابتسامه : بخير سعود قعد على السرير جنب محمد : تعيشيتوا عبدالله : لا سعود ابتسم :طيب يلا ننزل نتعشى ويا بعض مسك يد محمد :يلا يا بطل عبدالله ابتسم ووقف سعود طالع محمد الساكت باستغراب شاله : وش فيك محمد : ماما وين سعود ابتسم : يمكن نايمه او مع اخوانك للحين ما شفتها نزله على الكنبه و مسح على شعر عبدالله نادى ميري تجهز لهم العشاء : راح ابدل واجيكم راح فوق دخل جناحه ومشى للغرفه بيشوف التوأم شاف وجدان تطالع وساكته ابتسم راح طلع له بيجامه ورجع باس جواد وشال وجدان : يازينها الحلوه مشى لغرفة فايز فتحها بهدوء شاف نوره نايمه مع فايز ما حب يزعجها ويصحيها بس بكت وجدان و صحت نوره بخوف سعود : يالمزعجه زين كذا صحيتي ماما نوره طالعت فايز غطته وقامت ومشت لسعود وطلعت معاه : متى جيت والله راحت علي نومه بدون ما حس سعود بابتسامه : توني وصلت يا قلبي تبين عشاء نوره وهي تتثاوب : شوي وجايه نزل سعود ومعاه وجدان الي تصيح حاول فيها تسكت بس مو راضيه نوره جات لهم وفي يدها رضاعة وجدان شالتها وعطتها بعد ما شبعت وسكت قعدت معاهم على طاولة الاكل يتعشون _ اسامه دخل غرفته ارتمى على سريره بهم وهو مو قادر يطلعها من راسه اسماء قعدت جنبه : حبيبي تعبان اسامه : لا قعد وهو يطالعها : ترا ما نسيت السفر الاسبوع الجاي ان شاء الله بنسافر بس اخلص كم شغله بالشركه اسماء ابتسمت بفرح : يا عمري ربي لا يحرمني منك ابتسم اسامه وقف راح بياخذ شور اسماء طلعت له ملابس ومسكت جوالها تنشغل فيه _ €€€€ في بيت بو تركي سمر : يمه بطلع مع اسيل منال وهي تكش عليها بيدها : ياشين من طريتي الام طالعتها بنظره سمر : يمه اتقابل وياها في مطعم او مول اذا ما تبيني اروح بيتهم سوسن : انتي صاير لعقلك شي نسيتي اسيلوه شسوت سمر ببرود : راح تبقى صديقتي نجلاء : الله ياخذ الصديقات الي كذا سمر بعصبيه : نجلاء لا تدعين عليها دخل ياسر وهو يسلم على امه الام تنهدت : طيب بس مو تتأخرين بالرجعه سمر وقفت وباست راس امها : ان شاء الله ما راح اتأخر ياسر : وين رايحه الام : بتطلع مع زوجتك ياسر رفع نظره لسمر تكلم بهدوء : انا بوصلكم سمر وقفت : طيب بروح اجهز ومشت وهي تتصل لاسيل منال بقهر تكلم سوسن نست وجود ياسر : غببه شقالت تبقى صديقتي مالت عليها وعلى صديقتها المغروره الكريهه سوسن ماردت وهي تشوف ملامح ياسر عضت شفتها وبنفسها : والله محد غبيه غيرك منال : لا ولها وجه تتصل بعد الي سوته قطع كلامها صوت ياسر الحاد : منال كلمة زايده اقص لسانك ام تركي طالعتها بضيق ولفت لياسر: تركي اتصل عليك ياسر بهدوء : ايه يمه الحمدلله وصل اطمنك ام تركي بعتاب : وليش ما اتصل علي ياسر مسك يد امه : بيتصل فيك ثواني الا رن جوال الام : سوسن عطيني اياه سوسن فزت وهي تاخذ جوال امها : يمه الرقم دولي ياسر ابتسم : اكيد تركي ردت الام بسرعه وبلهفه : هلا يمه ، وينك من الصبح انتظر اتصالك ، اها طيب اهم شي انك بخير يا روحي وتمت تسولف وياه نزلت سمر : يلا وقف ياسر وطلعت معاه __ في بيت ابو احمد كلهم قاعدين في الصاله ماعدا شيخه احمد جاء يطمن على امه بعد ما قالت له شيماء انها تعبت عبدالعزيز : شلون صارت الوالده صالح : بخير مافيها شي والحين بتنزل ردوا : الحمدلله اسامه وهو يطالع اسيل : انتي وين رايحه اسيل : بطلع مع صديقتي احمد وقف وهو يشوف امه قرب منها وهو يحب راسها ويدها : ما تشوفين شر يالغاليه شيخه : الشر ما يجيك طالعت الموجودين ووقف نظرها على عبدالعزيز اسامه : يمه ارتاحي تعب عليك تتمين واقفه عبدالعزيز تضايق دام امه تعبت بسببه راح يأجل موضوع الخطبه صحة امة عنده اهم شيخه قعدت تمت طول الليل تفكر خذت نفس عميق طالعت عبدالعزيز و لفت لصالح : انا موافقه عبدالعزيز يتزوج بنت حسام الـ.. طالعوها بصدمه عبدالعزيز يحاول يستوعب كلام امه ابتسم ووقف وهو يحب راسها ويدها : جد يمه شيخه لفت وجها عنه : ايه روح اخطبها في النهايه ما راح تسوي الا الي براسك عبدالعزيز يحس بفرحه كبيره حب يدها اكثر من مره : ربي لا يحرمنا منك يا جنتي اسامه صدمته كبيره شلون عبدالعزيز ياخذ اخت طليقته اخت ام فايز وشلون امه وافقت مو قادر يستوعب اسماء بنفس صدمته بيتزوج جوري وتسكن وياهم في البيت ويمكن طاري نوره يكون كل يوم يالله هي غصب متحمله ولدها هالمره تجي اختها وقفت وتركت المكان وقف اسامه وهو يطالع امه بنظره ما فهمتها هي عتاب او قهر او ضيق لفت بنظرها عنه وهو مشى لغرفته صالح بابتسامه وهو يشوف فرحة عبدالعزيز : خلاص ان شاء الله اكلم حسام ونروح له بعد بكرا عبدالعزيز وقف ولف لابوه بابتسامه وقعد جنبه اسيل تطالع امها بدهشه شلون اقتنعت ووافقت على جوري شيماء : عمتي جوالك له ساعه يرن اسيل لفت لها : وش قلتي شيماء اشرت على جوالها اسيل شهقت وهي تشوف مكالمات سمر وقفت وهي تستأذن منهم وتطلع __ نوره قاعده على السرير قدامها التوأم وفايز حنبها يطالعهم وهو مستانس دخل محمد : ماما بقعد معك نوره اشرت له على السرير : تعال هنا محمد مشى وقعد جنبها نوره : وين عبدالله محمد : قاعد في الغرفه نوره وهي ترفع جواد وتفسخ ملابسه وتلبسه ملابس ناعمه ودافيه فايز بابتسامه : ماما عطيني اياه نوره ابتسمت وهي تحطه بحضنه وماسكته صاح جواد محمد وهو يطالع فايز : ليش يبكي شسويت له فايز يناظر امه : ماما ما سويت له شي هو صاح بروحه نوره ابتسمت وهي تمسح على شعره : عارفه يا روح ماما شالت وجدان وهي تبدل ملابسها بعد ما خلصت باستها بخدها و عيونها : فديت بنتي الحلوه دخل سعود تكتف وهو يتسند على الباب : اشوف الغرفه صارت حضانه ضحكت نوره : واحلى حضانه مشى سعود وقعد على الكنبه : كيفك يا فايز فايز : تمام سعود : جيت امس بسولف وياك لقيتك نايم فايز طالعه وما رد سعود بابتسامه ياشر على الكنبه : تعال هنا فايز وقف وراح له قعد جنبه وهو يجاوب على اسئلته محمد كان يطالع فايز بنظرات حاده نوره طالعته تنهدت وهي تنزل وجدان حطت يدها على كتف محمد : حبيبي شفيك محمد انتبه و ضمها : ماما انا احبك كثير نوره ابتسمت وباست راسه : وانا احبك اكثر ياقلبي سعود لف نظره لهم : فايز محمد يلا روحوا لعبدالله وقفوا وطلعوا سعود وقف وشال جواد وحطه بسريره وغطاه ونفس الشي وجدان قعد جنب نوره نوره سحبت ربطة شعرها وطاح على اكتافها وظهرها ابتسمت : شفيك سعود وهو يناظر عيونها الفاتنه : ما اسمح لك تقولين حبيبي الا لي نوره ضحكت : سعود انا اشوف غيرة محمد من فايز ولا غيرتك سعود حط يدها على خصرها وقربها له وحط دقنه على كتفها : وفي احد عنده هالقمر وما يغار نوره ابتسمت سعود وهو يستنشق رائحة شعرها بعد شوي وحط يده تحت دقنها ولف وجها له وهو يشوف الفرح بعيونها ابتسم : عسى الفرح ما يفارق عيونك نوره ابتسمت ومسكت يده : دامكم معي راح اكون دوم فرحانه __ في المول اسيل تسولف لسمر اختفت ابتسامتها وهي تشوف ياسر جاي لهم بعد ما وقف السياره سمر استغربت ولفت وراها ابتسمت : هو اصر يوصلنا ياسر وصل لطاوله سحب الكرسي وقعد طالعهم : ليش ما طلبتوا سمر بخبث : اسيل حلفت ما تشرب شي الا وانت موجود ومن يدينك اسيل شهقت بدهشه ياسر كتم ضحكته وهو يسمع شهقتها اما سمر ضحكت عليها ياسر لف لسمر وضحكتها العاليه : سمر ووجع سمر وهي تحط يدها على فمها عشان توقف ضحكها ياسر :طيب شتبون اطلب لكم سمر : اي شي على ذوقك ياسر وقف : طيب اسيل زفرت انفاسها و عطتها نظره : كذا يا حماره تحرجيني قدامه بس هين انا اوريك سمر وهي تطالع وجها الاحمر : كملي سالفتك الي كنت تقولينها قبل يجي ياسر اسيل تذكرت وبدت تقولها لها رجع ياسر وهي يحط الطلبات سمر وقفت اسيل رفعت نظرها لها : وين؟ سمر ابتسمت : ابي اشتري كم غرض وراجعه ومشت قبل تتكلم اسيل ياسر بابتسامه وهي يطالع ملامح وجها : كيف حالك اسيل : بخير ياسر بهدوء وغيره : ليش ما تتغطين اسيل ضغطت على كف يدها تهدي رجفتها : كذا ما تعودت ياسر ببرود : من بكرا ما تطلعين من البيت الا وانتي متغطيه اسيل بهدوء : طيب ياسر استغرب انها وافقت بسهوله عم الصمت لدقايق وهو ماشال نظره من عليها يتأملها وهي تشرب و تسوي كل حركه : شرايك نسوي العرس بعد شهرين اسيل غصت وصارت تكح بقوه ياسر بخوف : بسم الله عليك اسيل طالعته وهي تاخذ انفاسها : بغيت تذبحني ياسر ببرود : شهرين يناسبك اسيل بقهر : لا ياسر : طيب ٤ شهور اسيل بتعترض ياسر قاطعها : خلاص ٤ شهور وبس اسيل وقفت وهي تاخذ شنطتها ياسر وقف : لحظه مشى لها وصار جنبها : يلا دخلو المصعد وفجأه تعطل وتوقف فيهم اسيل بخوف : شفيه توقف ياسر : مدري اسيل مشت بخوف مسكت يده : ياسر تصرف انا خايفه ياسر حس برجفتها من يدها حط يده على اكتافها : لا تخافين انا معك ضغط على زر الطوارئ جاه الرد وطلب المساعده منهم اسيل دفنت وجها بصدره ياسر ضمها : حبيبتي شوي بس ويشتغل ياسر تعب وقعد : اووف وينهم اسيل قعدت وهي ضامه رجولها طالعت ياسر بدموعها وهي ما تشوفه بوضوح بسبب الظلام وبهمس :ياسر يأسر :عيونه اسيل مسكت يده وغمضت عيونها :انا اسفه ادري انك مجروح مني بس انت بعد خذت حقك مني ياسر رفع يدها وباسها :خلاص انسي الي صار اسيل سندت راسها لوراء وكأن خوفها راح : تذكر اول مره شفتك فيها ياسر ابتسم: وانا اقدر انسى شي يخصك اسيل زادت دقات قلبها بشكل كبير فجأه اشتغل ليت المصعد وتحرك ياسر وقف ومد يده لها يوقفها طالعها وهو يدري اول ما ينفتح المصعد بيلقى ناس كثير مجتمعه قدامه مد يده وهو ياخذ جزء من شيلتها ويغطي وجها انفتح المصعد تكلم رجل الامن الي قدامه : انتوا بخير ياسر : ايه الحمدلله شكرا لكم انحنى وهو يأخذ شنطة اسيل ويمسك يدها : لو سمحتوا بنطلع بعدوا رجال الامن و الشباب ومر من جنبهم طلع جواله وهو يتصل لسمر بيشوف وينها __ اسامه ماسك راسه بينفجر من كثر ماهو مقهور مو قادر يتحمل وقف قدام التسريحه وهو يتنفس بقوه مسك زجاجة عطره ورماه على الجدار بقوه اسماء صرخت بخوف وهي تبعد عنه مسك العطر الثاني ورماه بنفس القوه اسماء طالعته تضايقت عليه : حبيبي تكفى اهدا اسامه مسك الفازه ورماها لدرجة طارت شظيه وخدشت خده اسماء انفجعت مشت له و مسكت يده وبترجي : لا تسوي بنفسك كذا اسامه صرخ بعصبيه : ليش تسوي كذا معي دايما انفذ كل طلباتها ولا عمري عصيتها بس هي توقف بوجهي واذا احمد او عزيز طلبوها ما تقدر ترفض توافق طيب انا مو ولدها حالي من حالهم اسماء تجمعت دموعها ولا اول مره تشوفه بهالحاله اسامه ووجهه احمر ويرجف : خسرت المره الوحيده الي حبيتها عشانها رفضت شرطها عشانها تزوجت بعد عشانها بس هي ولا همها ما عمرها قالت لي كلمة طيبه اسماء ضمته بقوه مع ان كلامه ضايقها بس هي خايفه عليه : حبيبي الله يخليك اهدا خلاص هذا نصيبك اسامه ضمها ودفن وجهه بكتفها وهو يتنفس بسرعه سمع صوت ابوه بعد اسماء عنه : بروح اخذ شور وانتي فتحي الباب صالح يدق الباب : اسامه اسامه اسماء راحت تفتح شافت صالح وشيخه اما عبدالعزيز بعيد شوي صالح بخوف : فيكم شي ليش اسامه يصرخ واصوات التكسير اسماء ارتبكت : هاه لا بس اسامه كان تعبان شوي شيخه بخوف : بسم على ولدي وش فيه اسماء بقهر : سألي نفسك صالح طالع اسماء بعدم رضا لجوابها : طيب هو وينه اسماء : يأخذ شور صالح تنهد : اهم شي ان بخير اسماء : الحمدلله راحوا وهي مشت للمطبخ خذت المكنسه و راحت لفوق وبدت تنظف الغرفه من القزاز بعد ما خلصت مشت وطلعت لها روب نوم ناعم وفردت شعرها الي تحت اكتافها رشت عطرها وقعدت على السرير طلع اسامه بروب الاستحمام وهو ينشف شعره ابتسمت اسماء مشى للكبت بيطلع له ملابس ويطلع اسماء وقفت ومسكت يده هزت راسها بلا : ما راح اسمح لك تطلع وانت بهالحاله اسامه طالعها وبهدوء : ما اقدر اقعد احس اني مخنوق اسماء :اذا بتطلع رجلي على رجلك اسامه بتعب : طيب اسماء بدلت بسرعه بنطلون اسود وبلوزه بأكمام طويله خذت عبايتها وشيلتها ولبستهم وففت قدام التسريحه وهي تلبس نقابها و خذت جوالها اسامه خلص مسك جواله وبوكه ومفاتيحه وطلع اسماء تنهدت طلعت وقفلت الغرفه بالمفتاح ولحقته وصل لسيارته شغلها طالع اسماء : وش راح تستفيدين بس بدور بالشوارع اسماء ابتسمت بهدوء : اهم شي عندي ما اخليك لحالك مدت يدها لخده : زين كذا تجرح نفسك اسامه مارد شغل المسجل وحطه على سورة الملك بصوت ماهر المعيقلي وحرك السياره __ نوره خلصت من صلاة العشاء وقفت وهي تفسخ جلالها لفت على عبدالله الي دخل عليها :ماما نوره :عيونها عبدالله بخوف :حمود زلق بالمويه وطاح نوره طلعت قبله تركض نزلت بخطوات سريعه شافت فايز واقف يطالعه ومحمد يصيح بألم نوره وهي تقعد قدامه :بسم الله عليك حبيبي وين يعورك محمد :ماما يدي تعورني نوره باست راسه وبعصبيه :من سكب المويه عبدالله حك راسه بتوتر :ماما كنا نلعب بالمسدسات نوره طالعته بنظره رن جرس البيت عبدالله بسرعه وفتح الباب جوري ومعاها سعد :مساء النور والسرور ابوك موجود سعد :وين حبيب خاله عبدالله بضيق :مساء الخير لا محد وفايز داخل حياكم جوري دخلت وهي تنادي :نوير وقفت وهي تشوف نوره قاعده على الارض ومعها محمد فايز ابتسم بهدوء ومشى لسعد وهو يضمه جوري نزلت الاكياس الي بيدها ومشت لها: نوره شصاير نوره طالعتها بابتسامه :هلا جوري محمد طاح و خايفه تكون يده انكسرت مو عارفه شسوي نوره نزلت على ركبها ومسكت يده و هي تفحصها وتركز على مكان الالم مع صراخ محمد ابتسمت :لا الحمدلله مو كسر نوره زفرت براحه وشالته على الكنبه جوري لفت لفايز الي مستانس يسولف مع سعد :فايز طيب وانا ما تبي تسلم علي فايز لف لها وهي نزلت وضمته وباست خده بقوه :يازينه احلى ولد بالعالم نوره اشرت لعبدالله الي باين الضيق على وجهه يقعد جنبها ضمته ومسحت على شعره: خلاص حبيبي حمود بخير عبدالله طالعها :مو زعلانه منا نوره ابتسمت :لا نادت ميري تنظف المويه وتاخذ الاكياس الي جابتها جوري :وش جايبه لنا جوري ابتسمت وهي قاعده جنب فايز :كل الي يحبه قلبك نوره بابتسامه :تسلمين لي يا عمري جوري وهي تفسخ شيلتها :بو عبدالله متى راح بيجي نوره :بيتأخر اليوم جوري :احسن سعد :وين بزرانك وربي مشتاق لهم نوره وقفت :الحين بجيبهم ميري طلعت من المطبخ وهي تقدم لهم العصير دقايق ونزلت نوره وهي شايله التوأم سعد اخذ جواد وجوري وجدان قضوا سهرتكم بين سوالف واكل وحش __ في الصباح جوري في مكتبها تشتغل على الحاسوب تعبانه ما نامت الا ساعتين مسكت كوب الكوفي وهي تشرب الي بقى ورمته لزباله وقفت وفي يدها اوراق المريض تقراها طلعت وهي تمشي صدمت بشخص وطاحوا اوراقها ردت بدون ما تناظره : آسفه عبدالعزيز ابتسم ونزل ياخذ اوراقها : كيفك اليوم جوري خذتهم منه :بخير عبدالعزيز وهو يمشي معها :وانا بعد بخير جوري : وش تبي عبدالعزيز : وانتي كل ما اشوفك بتقولين لي هالكلمه جوري تنهدت بتعب : عبدالعزيز مشغوله مو فاضيه ابد اليوم عبدالعزيز ابتسم : طيب بس سؤال جوري : تفضل عبدالعزيز :اذا جيت اخطبك بتوافقين جوري ارتجف قلبها وقفت فجأه وهي ترمش اكثر من مره تستوعب كلامه طالعته وجات عينها بعينه نزلت نظرها بسرعه وبارتباك : أ أ خذت نفس عميق تهدي نفسها وردت بهدوء : وليش ارفض ومشت بسرعه من قدامه عبدالعزيز يستوعب كلامها ابتسم بحب وهو يتذكر ارتباكها وتوترها وعد لأحارب الكل لعيونك وتصيرين لي وحلالي انا بس __ فتح عيونه بعد ما انزعج من اشعة الشمس الي احرقته بحرارتها مد يديه وحرك رقبته بتعب من نومة السياره تثاوب وتعدل مد يده وهو ياخذ نظارته الشمسيه لف للي نايمه جنبه هز كتفها :اسماء اسماء تحركت وهي تطالعه : شصار وين احنا شغل السياره وبهدوء :جوعانه اسماء وهي تتثاوب بتعب عدلت قعدتها : بموت من الجوع حرك السياره وقف عند سوبر ماركت شرا علبتين ماء وقف عند كوفي اشترى له ٢ كوفي و كم قطعه كروسان وحرك لبيت سعود اسماء باستغراب : وين رايح اسامه : باروح اخذ فايز اسماء طالعته : اسامه خلنا نرجع البيت نريح وبعدين روح جيبه اسامه طالعها ولف مغير طريقه لبيتهم وقف ورمى مفتاح السياره لسواق ودخل ما مر الصاله بس وقف لما سمع صوت امه دخل الصاله ماشاف غيرها مشى لها سلم على راسها : تأمريني على شي شيخه وهي تطالع اسماء ببرود : وين نمت امس اسامه وراسه مصدع وجسمه منهد من نومة السياره : في السياره شيخه بدهشه : بالسياره اسامه ببرود : ايه شيخه وهي تطالع تعابير وجهه : وش فيك من امس متغير اسامه اخذ نفس : سلامتك سالفه قديمه شابه نار بقلبي شيخه طالعته ومسكت يده وشدت عليها : يمه لا تشيل بخاطرك والله انك اغلى من عيوني اسامه تنهد ومارد شيخه طالعته بضيق : قوم يمه ارتاح وبعدين بتكلم معك اسامه وقف : عن اذنك وقبل لا يروح وقفته : اسامه ليش ما جبت فايز اسامه لف وطالعها وبهدوء : بالليل بجيبه شيخه لوت فمها بعدم رضى : طيب __ اسيل منسدحه على سريرها نظرها للاعلى ابتسمت بهيام وهي تتذكر الي صار لها في المصعد رفعت نظرها للكوميدينه شافت علبه مربعه راقيه زادت ابتسامتها وهي تتذكر لما عطاها اياها قبل لا تنزل من السياره قعدت وهي تاخذها فتحتها وشافت اسواره ناعمه طلعتها ولبستها وعيونها تلمع بحب له مسكت جوالها ووقفت وطلعت شافت اسماء جايه بعبايتها و شيلتها على اكتافها ابتسمت وهي تغني بفرح اسماء رفعت حاجب : وش هالفرحه فرحينا معك اسيل طالعتها وبهمس :شي خاص يا حلوه كملت طريقها لتحت شافت اسامه الي مشى من جنبها بهدوء رايح لاسماء قعدت سلمت على امها :كيف حالك يا احلى ام شيخه باستغراب :بخير وش عندك اسيل ضحكت :ولا شي بس رايقه شيخه ابتسمت وهي من فتره ما شافت اسيل ابتسمت ولا ضحكت: عسى دوم رايقه ومستانسه اسامه رفع نظره لها بعد ما طلعت وهي تنشف شعرها ماشافت منه غير التعب بس مع هذا هي دايما واقفه معه ابتسم بهدوء وقف و قرب منها باس جبينها وبهمس : شكرا وكمل طريقه بياخذ شور اسماء جمدت وهي تحس دقات قلبها وصلت مليون فزت وهي تسمع صوت الباب تقفل لفت وراها وابتسمت بعمق _ نوره تطالعه بهدوء خذت العطر و هي تعطره سعود بابتسامه : قومي جهزي مو طالع بدونك نوره تنهدت : مالي خلق اروح سعود : يلا العيال ينتظرون نوره زفرت بعمق : طيب مشت للكبت وهي تطلع لها ملابس سعود : انتظرك تحت نزل شاف العيال كل واحد قاعد ومعاه ايباده وميري قاعده عند التوأم تسكتهم مشى لعبدالله خذ الايباد عبدالله بزعل : بابا ليش محمد وفايز وحطهم على الطاوله : يلا بنمشي محمد بحماس : بنشتري اغراض المدرسه سعود : ايه شال وجدان وجواد وحطتهم بعربيتهم لف بيشوف نوره ابتسم بهدوء يدري ان مالها خلق لشي ومتضايقه لان فايز بيروح لبيت ابوه اليوم تنهد ولف لها وابتسم مشت له وطلعوا _ سعد بيطلع لصديقه بيروح يلعبون كره وقف لما نادته جوري لف لها : هاه شتبين جوري مدت لها فلوس :جيب لي كافي و شيبيات من البقاله لا تجيب نوع واحد ابي انواع سعد ناظرها وتكتف :لا والله وش تعطيني جوري طالعته : اقول انقلع جيب الي طلبته وتعال سعد ببرود : باروح العب كره بس اخلص بجيب لك وطلع بسرعه لصديقه __ وقف سيارته وطلع وهو يطق الجرس ثواني وفتحت له ميري طالعته :فايز يروح مع بابا سعود مافي احد اسامه بنزفزه : وين راحوا ميري : ما يعرف تأفف لف على صوت سعد : خير شتبي اسامه : ابي ولدي دق عليه وقوله يجيبه سعد وهو يطلع تلفونه : من تقصد اسامه : نسيبك من غيره سعد يتحلطم: انا مدري شلون نوره كانت متحملتك اسامه بهدوء : وش قلت سعد وجواله يرن شاف سيارة سعود : هذا هو جاء لف لصديقه الي يناديه : طيب جايك وراح فايز الي كان مستانس ركض لابوه اسامه ابتسم وشاله : اخبارك حبيبي فايز بفرح : بخير اسامه رفع نظره لنوره وهو يطالعها سعود نزل العربه وحط وجدان فيها ولف لنوره الي معها جواد : روحي داخل نوره بهمس وهي تعدل ولدها : بس اضمه طيب احبه قبل لا يروح سعود ونظرات اسامه لها اشعلت براكين داخله وبفحيح : نوره روحي داخل بسرعه نوره طالعته ومشت بسرعه تعثرت بعبايتها وشهقت بقوه وضمت جواد بس اسامه الي كان اقرب لها مسكها تنفست بسرعه وخوف سحبت يدها منه بقوه ومشت تحت انظار سعود الي كانت بحده السيف لو ان النظرات تقتل كانت قتلته اخذ نفس سكر سيارته ومشى طالع اسامه ببرود : شكرا بس الافضل تشيلها من بالك للابد اسامه ابتسم باستفزاز ومشى مع فايز لسياره لا اله الا الله