ماكنت اؤمن بالعيون وفعلها حتى دهتني في الهوى عيناك - الفصل 10 - بقلم riwaiax - مكتملة | روايتك

البارت العاشر رجع لشذى وقعد جنبها وهو يسولف معها طلال مد لابوه الجوال احمد اخذه و مسك يد شذى وباسها : توصين على شي شذى بحب : سلامتك _ اسيل مسكت جوالها المغلق وهي تحطه على الشاحن انتظرت يفتح و رفعته ليدها شافت رساله من الرقم الي يزعجها من كم يوم تأففت وهي تفتحها توسعت عيونها بدهشه وهي تقرأ " هاذي بس البدايه " اسيل : خير اي بدايه وش قصدك انت الثاني ضحك ياسر : من الاول اسيل : اخلص من انت ووش تبي ياسر : عسى استفدتي من مشي امس اسيل بصدمه طالعت كلامه : أنت ياسر : ايه ياسر بشحمه ولحمه ودمه اسيل : الله ياخذك يا حيوان وعساك للمرض الي يهد حيلك قول آمين ياسر : لا لا ليش كل هالدعاوي ترى بتندمين وكل كلمة قلتيها واهنتيني فيها راح ادفعك ثمنها اسيل بخوف من كلامه : ياسر لو سمحت وخر عني اعتذار واعتذرت لك وش تبي بعد ياسر ببرود : تصدقين ما عرفتك وانتي تتكلمين بأدب اسيل : وجع ان شاء الله عند ياسر قاعد يقرأ دعاويها وسبها بهدوء وهو يبتسم ان قدر يستفزها ، طاح الجوال من يده بفجعه من الباب الي انفتح فجأه وبدفاشه سوسن بعصبيه : شفت نجلاء ياسر بنرفزه : في مخباتي دوريها وجع تعلمي تستأذنين قبل لا تدخلين نزل وهو يأخذ جواله سوسن بنظره شك : من تكلم ياسر وهو مقهور منها : انقلعي مالك دخل سوسن وهي تحرك حواجبها : وحده صح ياسر وهو يأخذ اقرب شي ليده ويرميها فيه بس قفلت الباب بسرعه مسك جواله وموده انقلب سوسن بصوت عالي : نجلاء وينك نجلاء طلعت من غرفة منال : خير ليش تصارخين سوسن : ابي سماعاتي ما حصلتهم خذتيهم نجلاء : ايه خذي وانقلعي يلا سوسن : وش فيكم كل ما اروح لاحد يقول انقلعي نجلاء : لانك غثيثه سوسن : مالت بس اروح اشوف سمور احسن _ جولي وهي تتحدث الى اسامه : سيدي اريد ان اعلم الفتى الفرنسيه ولكن لا استطيع فعل ذلك فأنا لا اجيد العربيه ابتسم اسامه : فكره جيده حسنا قومي بتعليمه الحروف و سأساعدك في تعليمه حتى يستطيع فهمك فلا اعلم ماهي الفتره الي سنقضيها هنا جولي بحماس : حسنا طلعت من مكتبه وراحت لغرفه فايز : كيف حالك ايها الجميل فايز بتأفف : دولي ما عرف وش تقولين جولي اخرجت قلما واوراقا من الدرج كتبت الحروف وبدت تعلم فايز و فايز يردد وراها _ قاعدين في الصاله جوري وسعد والام سعد وهو يأكل تفاحه : اقول جوجو جوري : خير سعد : متى تتزوجين عشان نفتك منك جوري طالعته وحطت رجل على رجل : قاعده على قلبك حبيبي نوال : خلها اول تعقل عشان لا تجنن فيه سعد ضحك على الجوري الي تطالع امها بدهشه :هههههه ايه والله الله يعينه جوري طالعته بقهر : قصدك يا حظه الي بياخذني امه داعيه له بليلة القدر سعد : الا داعيه عليه جوري طنشته وبدلع : انا ما راح اوافق الا على الي يخطبني من نفسه طالعتها امها وهي رافعه حاجب جوري : يمه شفيك تطالعيني كذا بالله تبين اخذ واحد واصفتني له امه او اخته وبعدين يشوفني وينصدم ضحك سعد بصوت عالي : زين انك عارفه انه بينصدم جوري بنرفزه : انت اسكت مو هذا قصدي طالعت امها مثلا خطبني عشان اعجبت امه او اخته وعقب يقول لي والله انا ما خذتك الا عشان امي او اختي ويجرح قلبي المسكين سعد : ياا حرااام نوال ابتسمت : ليش انتي وش ناقصك ماشاء الله عليك قمر وشيلي هالافكار من راسك سعد : الا قرد جوري بنرفزه مسكت الخداديه وهي ترميها عليه : قوم انقلع مسكها سعد وهو يضحك : خلاص طالع مع السلامه فتح الباب وهو يشوف ثريا قدامه وعيالها سلم عليها وطلع _ في بيت سعود نوره قعدت سعود يصلي المغرب بدل ملابسه وطلع للمسجد نوره توضت وصلت و طلعت من جناحها نزلت استغربت ان الصاله فاضيه وين خالتها نادت : ساندي ساندي : يس مدام نوره : وين ماما امينه ساندي : ماما تعبان يروح غرفه نوره عقدت حواجبها باستغراب ومشت لغرفتها طقت الباب اكثر من مره بس ما حصلت رد ترددت تفتح الباب وتدخل خذت نفس وفتحت الباب بهدوء طلت براسها الغرفه ظلام شغلت اليتات وهي تشوفها نايمه على السرير مشت لها بتقومها تصلي المغرب لانها تعرف ما تفوتها صلاه وبصوت هادي : خالتي خالتي امينه ما حصلت رد نوره مسكت يدها : خالتي ما بتصلين المغرب هزتها وما حصلت رد هزتها اقوى شوي : خالتي وش فيك رد علي توسعت عيونها بخوف مسكت معصمها و ما لقت نبض طاحت يد امينه بصدمه مدت يدها الي ترجف لانفها مافي نفس نوره طاحت لورا بصدمه وهي تهز راسها بالنفي ودموعها نزلت بغزاره صرخت : خـااااله لاااا دخل سعود بخوف بعد ما رجع من المسجد وسمع صراخ نوره : وش فيك نوره وقفت بصعوبه راحت له وضمته وهي تبكي : خالتي تطلبك الحل سعود جمد مكانه وهو يطالع امه الي على السرير بلا حركه و يحس الدم وقف بعروقه و ان نفسه انقطع بعد نوره عنه و مشى بخطوات بطيئه وقف قدام سريرها ما قدرت رجوله تشيله وطاح على ركبه مد يده الي ترجف مسك يدها وبصوت هادي : يمه مد يده الثانيه لكتفها : يمــه باس يدها بعمق : يمه شفيك ردي علي حط راسه على صدرها وتوسعت عيونه بصدمه ان قلبها ما يدق مسكها من اكتافها وهزها : يمه صرخ صرخه ألم وفقدان بعد ما استوعب اخيرا ان والدته اول امرأه احبها واحن الامهات راحت مسك يدها وباسها بعمق ودموعه نزلت بضعف على فقدانها نوره وهي تحس صرخته ذبحتها لفت جهة الباب تشوف ساندي الي تبكي والعيال الي وافقين مو فاهمين شي وبرجفة صوتها : ساندي طلعيهم ساندي هزت راسها وهي منهاره على وفاة الانسانه الي اشتغلت معها سنين نوره وهي تبكي مشت له حطت يدها على كتفه : سعود سعود ما رفع راسه لها منهار بقوه ويبكي بألم نوره : الله يرحمها اختنق صوتها وما قدرت تكمل سعود بصوت مخنوق : ما شفتها الصبح ولما رديت من الدوام كنت تعبان وما مريتها ولا سمعت صوتها آه يمه كيف اعيش بدونك ولا اسمع حسك يالغاليه نوره طالعته وهو يتكلم تحس لسانها عجز عن الكلام الفقدان اصعب شي والاصعب اذا كان احد الوالدين _ ثالث ايام العزاء سعود وباين التعب والحزن على ملامحه حسام حط يده على كتفه بعد ما شاف ان المكان فضى من المعزيين بعد ما كان مزدحم فيهم طول الثلاث الايام تنهد : يا ولدي ما ارتحت اليوم ابد روح ريح والله يصبرك سعود طالعه وعيونه ذبلانه ووجهه شاحب ويحس راسه ثقيل ما قدر ينام من توفت امه وقف و هو يترنح بمشيه بتعب لحقه حسام مسكه وهو يدخله بيته نادى بصوت عالي : نوره نوره نوره طلعت من غرفة العيال الي نايمين و ومشت لابوها وباست راسه حسام : سعود تعبان حيل خذيه يرتاح نوره طالعت سعود الي لف لحسام : مشكور يا عمي وانا مافيني شي مشى لغرفته بخطوات بطيئه راح حسام و نوره لحقت سعود قربت منه بتساعده سعود : اقدر امشي لحالي نوره تنهدت وهي تمشي معاه دخل الجناح وبعدها الغرفه طلع له ملابس بدل وقعد على السرير بتعب بس مو قادر ينام وطيف امه يمر قدامه نوره قعدت جنبه : سعود لازم تنام سعود طالعها بهدوء ولف نظره نوره اشرت على فخذها : نام سعود تنهد بألم و انسدح وخلا راسه بحضنها نوره صارت تمسح على شعره وهي متضايقه على حاله بقوه حست براسه ثقل على رجلها تنهدت براحه ان نام اخيرا خافت تتحرك ويقوم وهو يالله نام سندت ظهرها للمخده وراها ومسكت جوالها تلتهي فيه _ في باريس اسماء بطفش وهي تطالع اسامه : مليت من الغربه ابي ارجع عند اهلي وناسي هنا حتى كلامهم ما افهمه اسامه طالعها ورجع يكمل شغله على اللاب ببرود اسماء وقفت وطلعت وهي تقفل الباب بقوه اسامه بصوت عالي : شوي شوي على الباب اسماء مشت بقهر لصاله شافت جولي منشغله مع فايز : جولي جولي طالعتها : نعم اسماء : اريد كوبا من القهوه الان جولي : حسنا ولكن الان انا منشغله مع فائز هل بإمكانك الانتظار قليلا اسماء بعصبيه : ما تفهمين اقول لك ابيها الحين خليه هالفايز عساه بحريقه طالعها فايز بقهر انها تصارخ على جولي اما جولي باستغراب من عصبيتها مع انها مو فاهمه شي اسماء : تحركي وش فيك تطالعيني كذا فايز : هي ما تتكلم مثلنا اسماء زفرت بطفش : اريدها الان افهمتي جولي هزت راسها بالايجاب ومشت وفايز يطالع اسماء بهدوء اسماء : خير وش فيك فايز وقف وهو ياخذ الاوراق والقلم وراح لابوه دخل الغرفه عنده اسامه ابتسم : هلا والله فايز : بابا اسماء ما خلت جوري تقعد معي وعصبت عليها اسامه قفل لابتوبه ولف لفايز بهدوء : ليش فايز : ما اعرف وش تبي منها اسامه اشر له يجلس جنبه فايز مشى وقعد جنبه اسامه اخذ منه الاوراق وابتسم : شكله جولي متحمسه نزل الاوراق والقلم على الطاوله وبدأ يسولف معاه ويضحك على سوالفه _ سعود فتح عيونه على صوت جوال نوره يرن قعد لف لنوره ما حصلها لف على صوت فتح الحمام يكرم القارئ وهو يشوف نوره تطلع مبلله وجها ويدينها شكلها توضت لف وهو يشوف الساعه : يلا تأخر على صلاة الفجر نوره : ازعجك جوالي اسفه ما حطيته صامت سعود بهدوء : لا زين عشان اصلي الفجر انتي بعد شكله راحت عليك نومه نوره وهي تمشي بخطوات بطيئه : ما نمت الا بوقت متأخر فرشت سجادتها وخذت جلالها ولبسته و كبرت تكبيره الاحرام وبدت تصلي وهو وقف وراح يتوضأ خلصت ولفت لسعود وهي يصلي قعدت على السرير وهي تطالع سعود الي قاعد يدعي سرحت بهمومها ما حست الا بسعود قاعد جنبها حط يده على اكتافها : ليش نمتي متأخر نوره : ما جاني نوم حط راسه على كتفها وتذكر انه نام امس على فخذها : تعبتك معي نوره : سعود ما ابي اسمع هالكلام وبعدين تعبك راحه سعود تنهد بعمق : وش تسوى الدنيا بدون امي نوره بضيق : الله يجمعك فيها بالجنه سعود بعد راسه عنها و بهدوء : آمين نوره مسكت كف يده : لله ما اعطى و ما اخذ ادعي لها هي محتاجه لدعائك و تصدق لها اقرأ قرآن بس حزنك ما راح يفيدها ابد الله يصبرك حبيبي لفت تطالعه والتقت عيونها بعيونه العميقه و الحزينه قرب وباس جبينها بعمق وقف وهو يطلع من الجناح رايح لعياله الي اهملهم بيشوفهم _ في باريس اسامه دخل غرفته معصب بعد ما شاف فايز يبكي تحت ومعاه جولي تحاول تهديه اسماء سلمت من صلاتها فسخت جلالها ورفعت السجاده ولفت وبابتسامه : هلا حبيبي قاطعها كف قوي على خدها اسامه مسكها من اكتافها وهزها بقوه : وش قايله لفايز قبل يومين جاي متضايق يقول ما خلت جولي تقعد معي اليوم وش مسويه اسماء بصدمه : ما ما قلت له شي اسامه بحده : اســماء اسماء بربكه : أ أ انا قلت له يبتعد عن جولي هاذي وانه ما راح نتم هنا على طول وبيقترق عنها اسامه دفها بقوه عنه ما توازنت وطاحت : وانتي شدخلك هو مرتاح لجولي ليش تضايقينه وبعدين لو انتي صايره له ام ما تعلق فيها اسماء بألم من طيحتها : شدراني ان تعلق فيها وبيتأثر كذا اسامه : بس نرجع مالك قعده عندي اسماء وقفت بدهشه : وش قصدك ؟ اسامه : اتوقع كلامي واضح اسماء مسكت يده : اسامه ما كنت ادري ان بيتضايق صدقني بس قلت له كذا عشان لا يتعلق فيها كثير و احنا ما بنتم على طول هنا اسامه سحب يده : الافضل ما توريني وجهك اليوم اسماء ببكاء : اسامه خلاص والله ما اتدخل فيه ولا اقوله شي اسامه طلع وهي تبكي بقهر وتسب في نفسها لو انها تمت متجاهله فايز احسن و خايفه من تهديد اسامه _ في الصاله قاعدين عبدالله : بابا وين راحت امي امينه محمد : ايه وين سعود طالعهم تنهد وما رد نوره : راحت فوق عند ربنا عبدالله : يعني ما راح نشوفها نوره بهدوء : بالجنه ان شاء الله عبدالله بضيق : ماما راحت وخلتنا والحين امي امينه راحت نوره ضمته : افا انا وين رحت ولا ما تبيني عبدالله : لا احنا نبيك ونحبك ماما لا تخلينا نوره بألم : مستحيل اخليكم عقدت حواجبها وهي تشوف ساندي جايه ومعاها شنطة سفر سعود طالعها بدهشه : ساندي وين رايحه ساندي بهدوء : انا يبي يسافر خلاص انا مافي يقعد هنا سعود بهدوء : بس انا ما أمن على بيتي وعيالي الا معاك ساندي بضيق : انا ما يقعد وماما امينه في روح تنهد سعود : خلاص براحتك بس انتظري احجز لك واعطيك جوازك يلا رجعي شنطتك الحين لما اخلص .. ساندي : اوكي شكرا ورجعت نوره شافت محمد يلعب بالايباد وراح تفكيرها لفايز : سعود سعود بهدوء : هلا نوره شكثر تكره هدوءه بس مقدره وضعه ان الي ماتت امه مو اي احد : طلبتك سعود طالعها : اذا على الخدامه راح اجيب غيرها بس يبي له وقت واذا تبين فلوس تروحين المول او تطلعين مع خواتك ما عندي مانع نوره طالعته بألم وضيق ان للحين ما فهمها متى يعرف انه هالاشياء اخر همها متى يعرف انها تختلف عن عبير خذت نفس بعمق : همي اكبر من كل هذا كل الي ابيه اذا ما عليك امر تروح لشركه الـ.. تسأل اذا اسامه رجع من سفره او لا والله ان قلبي تعب من شوقي لفايز سعود وهو يسمع كلامها ويشوف نظرتها له الي وجعته استحقر تفكيره : ان شاء الله الحين بروح اسأل وقف وهو يروح يبدل طلع وهو كاشخ بثوب وشماغ ابتسمت نوره سعود : تأمرين على شي نوره هزت راسها بالنفي عبدالله : انا ابي عصير وشيبس وحلاو محمد : وانا ابي كاكاو وايسكريم وشيبس سعود ابتسم : من عيوني _ اسيل بدت تتعود على رسايل ياسر و استفزازه مسكت جوالها وهي تقرأ رسالته " اسيل " شافها تقرا وما ترد ابتسم " اكتشفت اليوم شي " اسيل " خف علينا يا مكتشف الذره اكيد شي بايخ مثلك " ياسر ضحك " واثق الخطوه ماتستفزه لفحة جنح الذبابه لا تكابر بنفسك وأنت كلك على بعض شعره ومقطوعه من وتـر ربابه " قبضت اسيل على جوالها بقوه" اخلص وش تبي وخلنا نشوف اكتشافك" ياسر يبي يقهرها" اكتشفت ان ما تستاهلين اضيع وقتي معك" اسيل بقهر" اقول احمد ربك وحب يدك وراء وقدام ان اسيل الـ.. تعطيك وجه وهالشي اعتبره انجاز و الا انت ما سويت شي بحياتك يستاهل الفخر راسب ثلاث مرات وعاطل عن العمل ومدمن تدخين هه بالله قولي وقتك الثمين وين يضيع " ياسر توسعت عيونه بصدمه وهو يقرأ كلامها وتحولت ملامحه للجمود بعد ما كان مبتسم ورايق هاذي شلون تعرف كل هذا عنه _ طلع سعود من شركة والد اسامه وهو متضايق بعد ما عرف ان اسامه للحين مارجع يالله يدري ان نوره ما تبي غير تشوفه هو حاس فيها عنده ولدين وما يلومها على الي تسويه تحسب من قلب عليه فتح سيارته ومشى لها دخل وهو يشوفها قاعده مع العيال تسولف وياهم و تضحك اختفت ابتسامتها من شافته فزت واقفه: سعود بشر قول انه رجع سعود هز راسه بالنفي: لا ما رجع نوره نزلت راسها بضيق و دموعها نزلت بهدوء قاتل عبدالله ركض لابوه و نوره لفت وجها عشان ما يشوفون دموعها: بابا جبت لي الي قلت لك سعود مد الاكياس الي بيده: لك ولاخوك عبدالله خذهم بفرح وركض لمحمد مشى لنوره لف وجها له ومسح دموعها: مرده بيرجع وباجيب لك فايز نوره بألم : متى تعبت سعود: خلي املك بالله كبير راح اجيبه لك نوره لفت وهي تمشي رايحه للجناح سعود طالعها تنهد ومشى هو يقعد على الكنبه ويوجه انظاره لعبدالله و محمد _ مرت الايام والشهور مر سنه وسبع شهور واسامه في باريس واخيرا جاء وقت عودة اسامه لبلاده اسماء بتطير من الوناسه اما فايز كان متضايق بعد ما تعود على جولي وصار يتكلم معها بعض الكلمات الي تعلمها منها ومن ابوه و قضى وقت جميل معها حتى هي تعودت عليه ودعته وهي تبكي سمع اسامه صوت الكابتن وهو يعلن عن هبوط الطائره لف لفايز الي جنب الدريشه نايم ومو حاس بشي وطالع اسماء: ربطي حزامك اسماء مدت يدها للحزام وربطته و بعد دقائق هبطت الطائره اسامه: فايز بابا يلا وصلنا صحى فايز وهو يفرك عيونه و يتثاوب انتظر اسامه الركاب وهم ينزلون بعد ما خفوا مشى وهو يمسك يد فايز واسماء طلعت وراه خلص الاجراءات و اخذ شناطه حطهم بالعربه و يدفهم ابتسم وهو يشوف عبدالعزيز الي واقف يستقبلهم قرب عبدالعزيز و سلم عليه ويتحمد لهم على السلامه وباس فايز بخده: يا ولد كبرت ماشاء الله فايز: كيفك عمو و ابوي صالح وامي كيفهم وعمو احمد وعمتى اسيل وطلال و شيماء ومـ عبدالعزيز: كلهم بخير وينتظرونك بشوق فايز بحماس: يلا نروح لهم ومشوا لسياره _ عند نوره قاعده على الكنبه وهي تشوف محمد وعبدالله يسولفون حطت يدها على بطنها وهي بالشهر الخامس من حملها هالحمل الي فرحت فيه حيل هي وسعود دخل سعود قعد على كنبه فرديه طالع عبدالله الي بدأ صوته يرتفع على اخوه : عبدالله خلاص عبدالله : بابا مو راضي يفهم سعود : معليه بابا هو اصغر منك نوره : عبود روح جيب كتبك هالاسبوع بتبدأ امتحانات يالله عشان اذاكر لك عبدالله وقف بسرعه : طيب سعود وهو يطالع نوره كاشخه بفستان حمل لنص الساق وبطنها بارز شوي و شعرها فاردته بطوله و راسمه عيونها بطريقه جذابه و حاطه ماسكرا وبلاشر وردي و روج لحمي ابتسم وقال لها : محلوه نوره ابتسمت : صدق مو صايره دبه ضحك سعود : الا هذا وتوك بالخامس الله يعين لا صرتي بالتاسع نوره : سعووود سعود : عيونه نوره توترت مدت يدها بارتباك وهي ترجع شعرها للجهه الثانيه : تسلم لي عيونك الي ما ابيها تشوف غيري سعود قعد جنبها ولف وجها له و هو يطالع بعيونها مد يده لخدها وبهمس : و في احد عنده هالقمر و يطالع النجوم نوره ابتسمت و لفت وجها لعبدالله الي جاء ومعاه كتبه واقلامه _ في بيت احمد شذى في حضنها ملاك الي مو راضيه تسكت وقدامها شيماء في يدها كتاب الرياضيات تبي امها تفهمها و طلال الي بيده كتاب العربي يبيها تسمع له وقفت بطفش : ملاك شفيك دخل احمد وهو يسمع صياح ملاك قرب منهم: شفيها شذى: حبيبي ما ادري عنها احمد خذها: اليوم بنروح بيت اهلي بس تخلصون احهزوا وطلع شذى لفت لهم ابتسمت: طلال عطني كتابك بسمع لك طلال خلص اخذ كتابه وطلع وبدت تفهم شيماء حل المساله وعطتها تحل مسأله ثانيه عشان تتأكد من فهمها خلصت وطلعت تدور احمد وملاك دخلت الغرفه و شافت ملاك نايمه على السرير مشت وهي تغطيها ولفت وصدمت بأحمد وكانت بتطيح احمد حط يده على فمها ويد على خصرها يثبتها ما تطيح: اووش يالله نامت تبين تقومينها شذى ضربته على صدره بقهر: خوفتني احمد وهو يرجع غرتها لوراء اذنها: انتي جبانه شسوي لك شذى: طيب ابعد باروح اجهز لا نتأخر على خالتي احمد: واذا قلت لا شذى : احمد وخر احمد ابتسم : لا شذى طالعت جهة الباب وتوسعت عيونها بدهشه احمد استغرب لف بيشوف وش تشوف بس شذى بسرعه دفته شوي و طلعت ضحك احمد: هين اوريك شذى دخلت غرفة عيالها بابتسامه طلعت لهم ملابس رجعت الغرفه شافت احمد قدام المرايه يلبس ساعته ورش عطره: يلا حبيبتي بسرعه اجهزي شذى: ان شاء الله دقايق بس _ عند اسيل مستمره مع ياسر ولا گأن الي تسويه حرام بس ياسر يملي وقت فراغها و بدت تتعود عليه وعلى سوالفه وطبعا هي تعرف عنه اشياء كثير من سمر الي قدرت تسحب منها الكلام اسيل وهي تلعب بشعرها : يعني خلاص قدرت تقطع التدخين ياسر : ايه الحمدلله صار لي ٤ شهور ما مسكت زقاره اسيل ابتسمت : حلوو ياسر بحب : هذا بفضل الله ثم بفضلك الا تدرين للحين ما عرفت انت شلون تعرفين كل هالاشياء عني اسيل ضحكت : انا اسيل مايصعب علي شي ياسر : واحلى اسيل بالكون اسيل سكتت ياسر : بس انا ابي اعرف اسيل : سمر على نياتها تسولف بكل شي ياسر : سمر اجل اسيل : ايه من غيرها ياسر ابتسم : انتي وش سويتي فيني اسيل : اخذت عقلك ياسر بهمس : وقلبي بعد اسيل سكتت بخجل ياسر ابتسم تعلق فيها كثير بهالفتره الي كلمها فيها : اخليك الحين حبيبتي مع السلامه _ في الصاله شيخه ضمت احفادها بفرح : يا هلا والله وغلا وطالعت شذى : زين تكرمتي وجيتي توقعت خلاص نسيتينا شذى بهدوء : افا يا خالتي وانا اقدر انساكم بس انشغلت هالفتره وما قدرت اجي حقك علي اسماء حاطه رجل على رجل وهي تطالعها ببرود شيخه : اها طيب بس لا تعيدينها شذى : ان شاء الله لفت لاسماء : الحمدلله على السلامه اسماء ببرود : الله يسلمك شذى : ان شاء الله انبسطتوا اسماء بابتسامه مصطنعه : حيل اكثر من ما تتصورين شذى : اهاا الله يوفقكم الا مافي شي بالطريق اسماء جمدت ملامحها وهي تتذكر حملها الاول الي ما تم : لا يا قلبي لسه بدري ام احمد : الله يكتب لك الحمل عاجل غير اجل يارب اسماء تنهدت : آمين شذى تطالعها وهي تشوف كيف تغيرت تعابير وجها من ذكرت الحمل ردت بهدوء : آمين _ عند نوره الي سهرانه ما قدرت تنام وهي تفكر لفت على جوال سعود الي يهتز للمره الخامسه طالعته فتره ودها تعرف من الي يتصل عليه في هالوقت ترددت تمد يدها وتأخذ جواله ما عمرها مسكته وشافت وش فيه او من يتصل لانها واثقه فيه وما تحب هالتصرف بس فضولها خلاها تاخذه فصل و ما شافت من تنهدت وكانت بترجعه بس رجع رن طالعت الاسم وتوسعت عيونها بصدمه كان مكتوب " ام عبدالله " رجعت الجوال مكانه معقوله سعود متواصل معاها بس ليش اذا عياله عنده ليش تتصل فيه وبهالوقت ارتجفت شفايفها ونزلت دموعها خايفه تدخل عبير وتخرب حياتها وهي بدت تحب سعود وما تتحمل ان الي صار لها مع اسماء يرجع يصير مع عبير حست بألم خفيف ببطنها وغثيان خذت نفس عميق وهي تحاول تهدي نفسها بأن عبير انسانه متزوجه وما راح يصير شي من الي تفكر فيه مسكت الجوال الي رد يرن للمره التاسعه وطلعت من الغرفه بهدوء ومن الجناح فتحت الخط وبعصبيه :الو خير انتي ما تستحين على وجهك مره متزوجه تدقين على طليقك بهالوقت المتأخر عبير بصدمه: نوره نوره: اي نوره اسمعيني زين سعود طلعيه من بالك فاهمه لان نجوم السماء اقرب لك منه وقفلت الجوال وهي ترجف من العصبيه حست بغثيانها زاد نزلت الجوال على الكنبه وركضت للحمام يكرم القارئ طلعت وهي تمسح وجها بمنشفه صغيره بتعب واضح مسكت جوال سعود وهي تحذف مكالمتها مع عبير وترجع الغرفه نزلت جواله وانسدحت تحاول تنام في غرفة اسامه فزت اسماء بخوف من الطق على الباب المتواصل شافت الساعه ٧ الصبح لفت لاسامه الي بسابع نومه مدت يدها وهي تهزه : اسامه اسامه قوم شوف من يطق الباب اسامه فتح عين بملل بس فجأه استوعب وقف وهو يروح يفتح الباب شيخه بعصبيه : ساعه لما تفتحون اسامه وهو مد يدينه ويتثاوب قرب منها وحب راسها : نايمين يالغاليه امري شيخه بخوف : ابوك تعبان حيل وعز محد والسواق اخذ العيال المدرسه تعال ناخذه المستشفى بسرعه اسامه : طيب طيب راح بسرعه للحمام وهو يغسل وجهه واسنانه وطلع لبس ثوبه واخذ بوكه وجواله طلع شاف فايز قدامه فايز : بابا بروح معاكم اسامه : بنروح المستشفى شوي وراجع فايز : ما ابي اقعد لحالي بابا ابي اروح وياكم اسامه مسك فايز وهو يبدل ملابسه وياخذه معاهم كان يسوق بسرعه وهو خايف حيل على ابوه وصلوا المستشفى وراحو لطوارئ اسامه قاعد وجنبه فايز وامه ينتظرون الدكتور يطمنهم ما كانوا منتبهين ان في عيون تطالعهم بدهشه وفرح بنفس الوقت _ كان سعود يتكلم بالجوال بعيد عن نوره وهي تطالعه ما شالت نظرها عنه وتهز رجلها بقهر مع هذا هي واثقه فيه سعود يخاف الله مستحيل يسويها بس الشيطان شاطر عبدالله : ماما فيك شي نوره ابتسمت وهي تمسح على شعره : لا يا حبيب ماما مافيني شي محمد : طيب ليس ساكته عبدالله : ايه ليش ما تسولفين نوره غمضت عيونها وخذت نفس تحس اعصابها تالفه واذا كثروا اسئله راح تنفجر فيهم وهذا الي ما تبيه يصير محمد : ماما شفتي ايبادي عبدالله وهو يشوفها مغمضه : ماما انتي تعبانه نوره اشرت على طاوله قريبه من سعود : شوفه هناك على الطاوله لا مو تعبانه و يالله روحوا لعبوا فوق محمد وعبدالله وقفوا وهي رجعت نظرها لسعود الي قفل جواله ومشى لها قعد جنبها نوره : من كان يكلمك سعود بهدوء : صديقي نوره وقفت بضيق وهي تحس بدوار سعود مسكها : فيك شي نوره سحبت يدها منه : لا بس ابي اروح لاهلي طيب سعود : طيب طالعها لما اختفت من قدامه سعود راح لغرفة عياله ابتسم بحب : تبون نطلع محمد وعبدالله : ايه بابا سعود ابتسم : طيب _ في بيت حسام دخلت نوره وهي تسلم عليهم وقعدت جنب ثريا بتعب حسام : كيفك يا بنتي عساك طيبه نوره : الحمدلله بخير نوال : دوم يا رب ثريا : وين العيال نوره : خذهم سعود وياه الجوري : اقول نوير وش فيه وجهك قالب اصفر نوره : مافيه شي بس عيونك الي تشوفه اصفر ثريا بهمس : في شي مضايقك نوره هزت راسها بالنفي تلفتت : الا وينه سعد نوال : طلع حسام : انا بعد عندي شغل يلا مع السلامه الجوري طالعت نوره ووجها الشاحب وقفت وراحت المطبخ وهي تجيب لنوره عصير برتقال : يمدحونه للحامل نوره ابتسمت لها وخذته _ في المستشفى قاعدين عند صالح بعد ما طمنهم الدكتور عليه شيخه بعتب : طحت علينا اليوم بسبب عنادك لا تاخذ الادويه بوقتها ولا تهتم بأكلك وصحتك اسامه طالع امه : يمه مو وقته الحمدلله على سلامتك يالغالي اجر و عافيه صالح بتعب : الله يسلمك فايز : بابا جوعان اسامه طالعه : عن اذنكم مسك يد فايز وراح يشتري له _ في بيت حسام سلمت جوري من صلاتها ولفت وهي تشوف نوره بتطلع وقفت بسرعه : نوره لحظه ابي اقول لك شي مهم نوره لفت : خير ان شاء الله الجوري قعدت على السرير : تعالي اجلسي اول نوره مشت لها وقعدت جنبها : وش الموضوع شغلتي بالي تكلمي بسرعه الجوري : بتنامين عندنا نوره : لا سعود بيمرني بعدين الجوري : طيب ما راح تصدقين من شفت اليوم في المستشفى نوره بلا مبالاه : لا بصدق يا دكتوره قولي من الجوري : فايز نوره : وانا شدخـ.... سكت بصدمه وهي تستوعب الاسم الي يتردد في بالها فايز الجوري هزتها وهي تشوفها جمدت بصدمه : نوره نوير هزتها اقوى : نوره نوره غمضت عيونها ولفت لها وفتحتها ودموعها تجمعت : الجوري مو وقت مزحك لا تلعبين باعصابي يكفيني الي فيني الجوري طالعتها بضيق : والله العظيم اليوم بعد ما خلصت دوامي في المستشفى شفت اسامه في قسم الطوارئ ومعاه فايز نوره بخوف وقلبها يدق بسرعه ودموعها نزلت : ليش في المستشفى تعبان فيه تكفين جوري قولي انك شفتيه بخير مافيه شي الجوري مسكت يدها : هو بخير مافيه شي والله بس اتوقع ابو اسامه هو المريض نوره بلهفه وشوق لفايز : يعني رجع من السفر ابي اشوفه عطيني عبايتي بروح له جوري بصدمه: وين بتروحين له نوره : بروح لبيتهم ابي اشوف ولدي جوري : نوره لا تجننيني ما راح تروحين لهم بتشوفين امه والغثيثه اخته وزوجته الحيه بيغثونك و ماراح تشوفينه نوره بصراخ وتعب : انتي ما تحسين فيني قلبي محروق على ولدي ابي اشوفه الجوري ضمتها ونزلت دموعها عليها : والله حاسه فيك و راح تشوفينه يا قلبي _ عند سعود وصل له مسج زفر بضيق وهو يشوفه من عبير طالع عياله وهما يلعبون بالألعاب " سعود ابي عيالي " سعود " هه آسف ما اقدر اخليهم عند ام مهمله مثلك واخسرهم " عبير " سعود قلت لك عندي صور لزوجتك بس شكلك مو مصدق عشان كذا متجاهل مكالماتي بس الحين برسلهم لك " سعود " العبي غيرها ولا عاد تتصلين " توسعت عيونه بصدمه وهو يشوف الصور الي رسلتهم كانت لنوره والصور واضحه غمض عيونها وهو يسب فيها هالخبيثه بعد ما كتبت له " اذا مصمم على رفضك راح انشر صورها على مواقع التواصل الاجتماعي " استغفر الله العظيم سبحان الله وبحمده