الفصل 3
فور ماقطعات معاها جاها إتصال من عند فؤاد ..ا
لكن خلاتو. هبطات لتحت ..ماعندها لا لكانة لا لخاطر باش تهضر معاه ...حسات براسها بحال رويضة دسوكور ...فور مسالا شغالو عاد عيط ليها
...بانطوفة فرجليها كاتجرها فدرج وعينيها الملونين كايدورو فطابلويات لي معلقين فحيط درج ...حتى وصلات للأسفل وكيف توقعات لقاتهوم كايقادو العشاء
مينة: نعاونكوم فشي حاجة
حليمة:(كاتقطع لبطاطة) نديرو هاد لبطاطة تقلا وهاحنا ساليناا
مينة: ناري ياماما لقلي بليل
سعاد: ياختي نتي مكاتاكليهاش تحرمينا حنا منها ؟؟
منية: شكون قالك مكاناكلهاش ..غير هو بليل راها ماشي صحية
حليمة: واجي نتي قولي لدوك رباعة راها ماشي صحية
مينة: فكرتيني ..نمشي نشوف واش عندهوم شي تمارين
سعاد: عاد طليت عليهوم ..خليتهوم كايخدمو ..جن دياسين تاني نوضها مع الاستاذة
حليمة: هالي يولد على شرفو ... اش داني ياربي نزيد شي براهش
مينة: (وقفات) هانا مشيت نطل عليهوم
حليمة: قولي تهربي من شغال
مينة: ضلمتيني احلومتي ...
سعاد: سيري سيري راه عايقين بقوالب جدك
...خلاتهوم وطلعات لفوق ..جاتها على لكانة تاهي ماعندهاش مع شغال دار ...خصوصا طياب مكاتعرف منين تبداه...وحتى حليمة مكانتش تحكر عليها ...فصغرها ..كانت تقولها قابلي غير قرايتك ..هي لي تنفعك اما شغال دار مكايهربش ...ومنين سالات قرايتها ..زادت لخدمة فالبزار مخلية باها مهني من شغالو
... وعلى ذكر باها ...قررات دوز عندو هو لول طل عليه وتشوف. كيف بقا ...دقات فالبااب كنوع من إحترام ..حتا سمعات ردو عاد حلات ودخلات
...كيف توقعاتوو جلستو هي جلستوو..فوق بيرو وقرآن فيدو كايقرا وتسابيح فاليد الأخرى .. ورائحة المسك معطرة الغرفة !! حميد رجل بنهاية الستين لاكن المرض خلاه يبان فبداية الثمانين ..تصاب بداء السكري وضرب ليه الرجلين ..مكايقدرش يبقا مدة وهو واقف عليهوم ..وخصوصا بدون عكاز ..لاكن الصرامة باقا هي هي ...رجل عارف بينو بين لي خلقو ..مينة هي مومو دعينيه ..بنسبة ليه ولد راجل ماشي أنثى ..متكل عليها فشغال الخدمة ..عمرها طيحات بكلمتو ولا غطسات ليه راسو فتراب ...مرضية بمعنى الكلمة ...أمنية وحدة لي عندو هو يشوفها فدارها مع راجلها ووليداتها قبل ما ملك الموت يخطف روحو .. واجلو يخلص ويتحرم من كلمة با سيدي
مينة:( بابتسامة تمشات لعندو وهزات يدو لي فيها المسحبة وقبلاتها) با حبيبي
حميد: واخيرا شرفاتنا المرضية (جرها تاجلسها فوق البيرو مقابلة ليه) فين غبرتي عليا أمرضية باها
مينة: غير الخدمة احبيبي هي لي شغلاتني عليك
حميد: كولشي غادي مزيان بعدا
مينة : الحمد لله كولشي بيخير...راه كولشي كانقيدو فالروجيستر ..جمعة ان شاء الله نجيبو ليك
حميد:(طبطب على يديها بديه لي مكمشة بالتجاعيد وعروقها بارزين ) مايحتاجش المرضية ..راني والد وعارف اش ولدت
مينة: لهلا يحرما منك انور عينيناا
حميد: فين درااري
منية: مزال ماطليت عليهوم ..ولاكين سعاد قالت لي ياسين دابز مع الاستاذة ديالو
حميد: تاني واش هاد الولد مكايتهدش
مينة: هادو هوما ولاد ليسي ماعندك مادير
حميد: خانتني صحتي ابنتي
مينة:(عينيها دمعو ) متقولش هكاا اباا ..مزال تشوفهوم دايرين عقلهووم
حميد: سيري ابنتي طلي عليهوم لله يرضي عليك
مينة:( وقفات وباست راسو) واخا اباا
...دارت ومشات خارجة مخلياه ماسح دمعة من عينو لي زهقات ليه بدون شعور ...قبل مايتنهد ويرجع يفتح كلام لله يقراه تمشات شوية حتى لنهاية الممر تما كان واحد البيت فين كايتجمعو باش يقراو فيه ... غرفة متوسطة الحجم ..فيها فوطويات ..وتلفازة كبيرة معلقة فالحائط ..وزوج بيرويات مجهزين ..بالحواسب وآلة صغيرة لطباعة ..اي حاجة لي تقدر تساعدهوم على دراستهم كانت تماا
...حلات لباب بالحس...وتمشات بشوية باش تحصلهوم اش كايديرو على غفلة ...ياسين لقاتو داير كاسك فودنيه وصوت الموسيقى مسموع منو ..وفاتح فايس بوك كايتكونيكطا ..واغلبيهتوم بنات كبار عليه فالعمر ...اما شيماء فكانت جابدا يوتوب وطالقة استاد كايشرح الدرس
...بغفلة من ياسين جرات ليه الكاسك من ودنيه...تاقفز
ياسين: اححح أمينة كنتي اتوقفيلي قلبي
مينة: هادي هي لقراية ...تبارك الله عليك
ياسين: الاا ..حق لله حتى تاساليت قرايتي عاد جيت جلست
شيماء: (شعالة العوافي) لا عنداك اختي مينة ..من صباح وهو غير جالس ..ماقرا حتى شي حرف .. ومنين جات سعاد كذب عليها
ياسين:(بغا ينوض لها) سكتي نتي اديك البرهوشة
مينة:(جلساتو بيدها) جلس للرض وهدا على ختك
ياسين: ماشفتيهاش شنو كادير ؟؟
مينة: ماتبدلش الموضوع ..ودير سبة بشيماء!! علاش دابزتي مع الاستاذة ديالك
ياسين: والوو غير سوء تفاهم بسيط
شيماء: لااا كايكذب عليك اختي
ياسين: (بغا يمشي لها) سديي فمك اديك البرهوشة ..
مينة:( جراتو تاجلساتو تاني وهاد المرة رفعات صوتها) وااش انبقا كانلعب معاك انا هناا ولا شنوو ؟؟ (شافت فشيماء) دوي نتي اش واقع
شيماء: حصلاتوو جابد تيليفون فالقسم...ومنين دوات معاه وبغات تحيدو ليه ..ناض بدا كايضارب معاها ... وعلى حساب ماسمعت سخفات ديك الاستاذة حيت كانت حاملة
مينة: (وركات على كتف ياسين) اييييه... هادشي كولوو طاريي ...ونتاا ماالك معاها استاذتك عليك بالاحترام ..اش قربك ليها وهي حاملة
ياسين: ومنين حاملة...تجلس فدارها هاهي جابت سبتهاا علياا ...وزايدون راها كانت بغات تحيد ليا تيليفون (حنا راسو وهو معصب) والمدير اصلا حيدولي
مينة: اييه ..زيدني اسيدي... وقالك جيب ولي امرك ...كون مفرشاتك شيماء واقيلة كاع مانسيقو لخبار... وزايدون مالهوم ماعيطوو ليا ..ياك نمرتي عندهوم ؟؟
ياسين:(بدا يدور فعينيه) مانعرفت ايكونو نسااو واقييلة
مينة: نساااو ؟؟! واخ غدا ونشوفو هاد نسااو (حنات وحيدات لبريز دالويفي وجراتو معاها ) دبا راك معاقب مكاينش وييفي ..جبد دروسك راجعهووم
شيماء: (شافتو جالس على اعصابو غير غاتخرج مينة اينوض ليها ) ساني سايني اختي هنا جايا معاك...
...طارت شدات فيديها خلات ياسين كايتحلف عليها وهي غدا وكاتقليلو سم بعينيها وطلع فحواجبها ...داز داك نهار مثل جميع الايام ..تعشاو وكل سد عليه فبيتو منتظرين النوم يزورهوم ...نظارات طبية فعيونها ... كتاب فيديها كاتقرا وكاتمعن فالحروف وتقرا مابين السطور ..ولي مافهماتوش ترجع تقراه من جديد وتركز معاه حتى تفهم... عيات وعينيها دروها ..هزات تيليفونها لكن خاب أملها منين مالقات لارسالة ولا مكالمة من فؤاد ...منحى هاد العلاقة مفاهماهش...وعندها تخوف واش فعلا اتكمل معاه حياتها ..ولا كل واحد ايشد طريقو ..مع العلم ان حبهوم كبير وسنين وهوما مع بعضهوم
...جمعات شعرها طويل ضفيرة باش غدا يصبح مبوكلي ... وباش مايعدبهاش بالنوم
**********
...صباح جدييد فاقت وهي مساخياش كيف العادة لكن خاصها تمشي تشوف خوها واش دار تاني من زبلة فالمؤسسة
...مجموعين على طبلة دالفطور وياسين كايبان مزنك ومغدد فنفس الوقت على شيماء هي سبابو فهاد الفرشة كون سكتات كون حل الموشكل وتاحد مساق لخبار ومينة ماتمشيش للمؤسسة
ياسين: دبا لاش بغيتي تمشي خليك راه كولشي مزيان
مينة: فطر وسكت ..مزيان نمشي نشوفك اش كادير فداك المدرسة
ياسين: واش انا باقي صغير تمشي معايا ختي لكبيرة تسول عليا
مينة: هنيناا دباا قلت انمشي هي انمشي وسدينا الموضوع
ياسين: حرام عليك امينة بغيتي تصغري بيا قدام صحابي
سعاد: هاي هاي على لبرهوش تحل ليك دركوم وليتي ماراضيش بختك
ياسين: سعااااد مادويتش معاك
مينة: سكتووناا هضرة وحدة قلتها غادة هي غادة..ونيت نشوفو بلان هاد نمرة لي عاطين وتاحد مامصوني
...سكت ماقدرش يزيد يهضر عرف راسو صافي تفرش وهادي لخرة ليه معاها .... بقو كاياكل وكايجر فمو باش يتعطل ورجليها كايترعدو بالاعصاب مرة مرة كايهز عينو فشيماء ويتحلف عليها
مينة: (وقفات ) يالاه نوضو جمعو الوقفة قدامي
ياسين: بلااتي راني مزال مافطرت
مينة: نوض براكة ماتقل فيانا صحاب ليك معايقاش بيك
...ناض وهو ساخط هز كارطابلو وهبط للكراج ..عاد لحقات عليه ..حلات ليهوم لباب ركب ياسين القدام وشيماء اللور
...كسيرات وتوجهات نيشان للمؤسسة لي كانو مجموعين فيها كل من خوتها ..مؤسسة أمريكية تحلات جديدة بمدينة مكناس جامعة مابين الإبتدائية ، الإعدادية والثانوية... والمتفوقين فالدراسة كاتكون عندهوم منحة يدخلو ليها بدون مايحتاجو يخلصو...وايضا لي قراو فهاد المؤسسة وكانو من الأوائل كاتسيفطهوم لأمريكا باش يكملو مشوارهوم الدراسي
...بلاصات الطوموبيل فالباركينغ تابع للمؤسسة وهبطات ...عاد توجهو مباشرة للداخل ...تصميمها كان امريكي دازو على الطابق الاول لي كان خاص بالمستوى الابتدائي ودعات مينة شيماء وتوجهو لطابق الرابع لي خاص بمكاتب الأساتذة والمدير والمؤطرين الترباوين ...دقات فمكتب المدير تاعطاها الاذن عاد دخلات وياسين تابعها من الوراء عارف ان هادي هي نهايتو
...كان المدير فوسط المكتب غير شاف مينة وقف كإحترام مد يدو ليها وهي بادلاتو السلام
المدير: وأخيرا شرفتيني آنسة مينة
منية:(جلسات فوق الكرسي) مافراسيش باعث من ورايا
المدير: هادي شهر وحنا كانحاولو نتواصلو معاك...
مينة :كانضن نمرتي راها عندكوم !!
المدير:إناا نمرة الالة؟؟نمرة ديالك لي عطيتينا نهار اللول ماخداماش ...
مينة:(شافت فياسين لي حادر راسو) لاا !! هو بصاح انا بدلت نمرة لشي اسباب وعطيتها لياسين باش يجيبهالكوم
المدير: فعلا جابها لكن كانعياو نتاصلو ووالو
مينة: (تزنكات) تقدر تكون ماشي ديالي
المدير: تماما كيف توقعت هادشي علاش سيفط بريات لدار ديالكوم وماوصلني تاشي رد
مينة:(حسات بصهدة والعرق كايتصب من ضهرها بالحشمة) حنا مؤخرا بدلنا الدار
المدير:وطبعا ياسين مقالينا والو وراه عارف علاش...نبشرك خاك مخلاا حتى شي زبلة مدارها وخصصت ليه قائمة
...ياسين غير حاني راسو
مينة: احم خرج اياسين خلينا مع المدير ديالك
ياسين : (وقف وشافيها باين عليه الحزن) ختي اناا...
مينة: (رفعات يديها مقاطعاه) خرج تسناني برا خرج وهو حاني راسو ..ماعندوش الوجه لي يشوف فيها ...عارف وراقو ايتكشفو دبا وكولشي ايبان... واجا ماخرجو من هاد الورطة تاني وسبابو فم ختو ..لي مكرهش يشدها يغززولها تغزاز فهاد اللحظة
...تسناتو تاخرج عاد دارت شافت فالمدير ..كاترتب الكلمات لي تقدر تقول فبحال هاد المواقف
مينة: اول حاجة انا ماعرفتش بضبط شنو المشكل او المشاكل لي داير ياسين هنا فالمؤسسة ...بصدفة سمعت الهضرة من عند شيماء ...وقلت نجي نشوف علاش متاصلتوش بياا
المدير: من حسن الحظ جيتي ...وبنسبة لنمرة لي معطيا ليناا كانعياو نتاصلو ولكن والو حتى جواب مكاويصلناا
مينة: ممكن نشوف هاد نمرة
...حرك ليها راسو وحنا على البيسي لي قبالتو ...بقا كايخربق فيه حتى لقا نمرة ..كتبها فورقة صغيرة ومدها ليها
المدير: تفضلي هادي هي نمرة لي عندنا
مينة:(شداتها من عندو وقراتها فلبلاصة وجهها تحقن باللون الاحمر بالحشمة والفقصة) احم ..هادي نمرة دياسين ماشي دياالي
المدير:(رجع لور وبدا يقرقب بالستيلو) تمااما كيف توقعت
مينة: داكساعة كنتو تسولو شيماء هي تعطيكوم نمرتي
المدير: نعتارف هدا إهمال منا وتقنا فمراهق
مينة: صراحة ماعرفتش اش غانقوليك حشمت ولله
المدير: ماعندي مانخبي عليك ياسين الى بقا بحال هكا غادي نطردو من المؤسسة
مينة: ممكن تقولي شنو دار بضبط
المدير: الهضرة كثييرة ..(مد ليها ورقة طويلة) فهاد الورقة ملاحظة ديال الأساتذة على تلميذ ياسين... وكاع داكشي لي داير وعلاماتوو وكلشي مقيد (مد ليها ورقة أخرى) وهناا الحراس العامون مقيدين كاع شجارات لي كان هو سبب فيهوم
...حنات على هاديك الورقة كاتقرا وتعادو ... وكل سطر كادوز عليه كاتزيد تصدمت اكثر واكثر ...ياسين مامخلي حتى شي زبلة مديرها ...وعاد علاماتو لي هابطين بزاااف زادت تصمدات منين لقاتو متسبب بحريق داخل الحمامات... لي كون مالطف الله كانو العواقب وخيمة ...حشمات ماعرفات ماتقولو ..
مينة: غادي نحرص على هادشي مايعادوش يتكرر
المدير: كانتمنى
مينة: انا مكانبررش اخطاء خويا لكن حتى نتوما عندكوم دخل فهادشي لوكان شوية دزيار مكانش هادشي يوقع
المدير:دبا حنى لي غالطين هادشي لي بغيتي تقولي
مينة: ماقلتش هكا لكن ماتنكرش بيلي كان إهمال من طرفكوم ...الى ماعندكومش العنوان ولا حتى رقم الهاتف كان ممكن تقولوها لشيماء ...ولا مثلا تخليوه عندكوم فالمؤسسة ماتخليوهش يجي واكيد حنا غانلاحضوه مكاينش وكنا نجيو نشوفو اش كاين ...ماشي مالقيتوش العنوان ونمرة صافي .....
...ساعة ونصف وهوما الداخل كايتناقشو على وضعو وخصوصا مور مجاو بعض الاساتذة لي مشيبهوم ياسين.... شغل كثر عليه وبعد مشاورات تقرر يتوقف من الدراسة لمدة أسبوعين ... عاد داسكاعة يقدر ريجع يكمل دراستوو
...عطاتهوم نمرتها وعنوانهوم وقررات ديير ليهوم النقل المدرسي افضل من الام لي توصلهوم ولي بسهولة كايقدر يلعب عليها ياسين ...ومايخليهاش توصل لباب المؤسسة ..باش ماتعرفش زبايلو لي يقيل يدير
... خدات تليفون ياسين لي كان عند المدير وخرجات ورمقاتو بنضرة خيبة امل وكملات طريقها ...هو غير شافها عرفت ان كل شيء راه فراسها الآن .. حنا راسو وتبعهاا حيت كان عارف انه توقف من على الدراسة ..ركبو فطوموبيل وكسيرات متوجهة لدار... طريق كولها وهي ساكتة مباغاش تهضر معاه
...حتى قربو يوصلو لدار عاد تشجع وهضر
ياسين: ختي واش اتبقاي ساكتة
...مجاوباتوش كتفات تسكت وزادت كسيرات ماوقفات غير حدا كراج الفيلة... خرجات واحد طيليكوموند صغيرة بركات تاتحل الكراج أوتوماتيك
...طلعو لدار لقاوهوم يالاه كايجمعو فالطبلة ...هوما غير شافو ياسين من وراها تصدمو وعرفو المشكل كبير وكبر ملي كايتصورو
حليمة: ياك لباس مالكوم رجعتو مينة:(شافت فياسين لي حادر راسو) ياسين كلفوه بواحد العرض وعطاوه زوج سيمانات باش يقادو
حليمة:(جلسات فوق لكرسي وحطات يديها على صدرها) اوووف تخلعت صحابلي شي موصيبة واقعة
مينة: لاا مكاين والوو
حليمة: وقرايتو اش غايدير فيها ؟؟
مينة: ايتبعها عن بعد ..ودبا اصلا ماشي وقيتة الإمتحانات
سعاد: (عرفاتها كاتكذب) اوا لباس منين مواقعة شي كارثة
مينة : احم لا ! (شافت فياسين) طلع نتا لبيتك
...شافيها ياسين وابتسامة على وجهو حيت مافرشاتوش وداكساعة نهارو كحل ...غمض ليها عينو وحلهوم كنوع من الشكر وطلع لبيتو نيشان يكمل نعاسو ...عارفها اتخرج لهوما ينعس قبل ماتجي تحرمها عليه
...مينة تبسمات ليهوم وهربات من نظرات سعاد ليها ...فالبلاصة طارت من حداهوم ركبات فطوموبيل وعاودات خرجات ...تابعدات على دار عاد دارت سينيال وقفات جنب طريق ...هازا تيليفونها وكاتصوني لرشيد ... دقائق وخبراتو باش يحل المحال ويرد البال للخدمة علاما تسالي هي شغالها ... سيفطات ميساج لناهد علماتها باش توجد راسها
...تنهدات وهي كاتشوف تارسالة مجاتها من فؤاد عاد رمات تيليفون فوق الكوسان ..ومشات تاني لسكن ناهد
...وقفات بعيد شوية على الحي ..لأنه كايتعتابر من اخطر الأحياء فمدينة مكناس ...سيدي بابا ومن لا يعرفه ...مافيها لي تكريسا للاهوماا توقف بعيد ... من خوفها طلعات سراجم ..وسدات البييان عليها
...مرا مرا كاتقفز منين كايدوز حداها شي واحد ..كاتبقا غير مستغربة من طريقة لباسهوم ..لي تقدر توصفو فكلمة وحدة #مشرمل
... حلات عينيها منين شافت واحد واقف على طوموبيل وكايدق عليها فشرجم ...تخلعات وماعرفات مادير ..بنت كابرا غير فرفاهية ووقتها مدوزاه فالبزار مع الكور وناس لكلاص ..والقهاوي فحمرية غير دناس لي لباس عليهوم ...اش غادير دبا مع مشرمل واقف عليها فسيدي بابا؟؟ ...قرات مع شي وحدين فليسطيا بحال هكاا لكن ديما كانت كاتفاداهوم وتبعد منهوم عمرها تواجهات مع شي واحد
...حلاات شويــــــــة شرجم غير باش دوز الهضرة وبدات كاتسناه يهضر وهو بداك لباس لي كايخلع
...وجهو فيه سيكاطريس ضاربا من جنب الفم لجنب الحاجب ... سنانو رايبين ولي بقا صحيح مسوس ..فمو وجهو زرق .. شعرو محسنو كاامل وكايبان ليك كولو مبرقع ... شابع تفلاق فصغرو ...اما لباسو كايقول ياليلي ياعين ...اكيد سورفيط دلاكوسط وصندلة نايك كحلة مع تقاشر بيضين لي رجعو قهوين بالوسخ والرملة
...بقات غير كاتشوفيه وتاهو حاضيها ..شوفاتها مخفاوش عليه عرفها خايفة وتاهو قلعها من بنات الفلوس
***: اش كايدير هاد زين كامل فالدرب
مينة:(بدات كاتمتم) اا..اناا.. انااا غيير كانسااين واحد صاحبتيي ...اه كانساين صاحبتي
***:(كايهضر ويشالي بيديه) صاحبتشك ..وشكون هاد صااحبتشك
مينة:(تلفات) ناااهد ..سميتها نااهد
***:(هز راسو لفوق كايفكر) نااهد ..تشيي شكوون هاد نااهد ؟؟
مينة: ناهد مرت زكرياء
***:(عاد عرفها) ااااااه مرت زييييكووووو
مينة:(باستغراب) زيكوو !!!
...يالاه ايجاوبها كانت واقفات عليه ناهد بجلابة يدخلو معاها خمسة منها ..كلها كاشفة وشال فوق راسها
ناهد: خويا محمد ياك لباس
محمد: لاا والو باس اختي
ناهد: احم هادي صاحبتي ..(بدات تفرك يديها بتوتر) عفاك اخويا ماتقول والو لزكرياء بلاما تقولو تلاقيت بشي صاحبتي
محمد: تهنيتشي الخوادرية (ضرب على صدر) هااا هانتشي الى حتاجيتي شي حاجة هنا موجوود
ناهد: ربي يخليك اخويا ..سلم على الواليدة
محمد: يوصل سلامك اختشي
...تبسمات فوجهو وطارت ركبات حداها
ناهد:(بدعقة) كسيري امينة كسييريي دغيااااا