الفصل 2
جات طلبيتهوم وتغداو فهدوء مرا مرا فين كايتشاركو الكلام ..فإطار العمل فقط... طلبو كافي وزادو جلسو تالقات مينة لحال مشا الحال وطناش ولات الخمسة...ورشيد ايكون رون ليها البازار
...توادعات مع فؤاد وخلاتو كايخلص وهي مشات ركبات فطوموبيلتها وكسيرات للبزار ..مسافة طريق كانت وصلات ..دخلات للمحل لقاتو دافي علقات مونطوها ومشات كاتقرقب بداك البوط والارضية الخشبية مساعدها ..على إصدار الصوت
..الصوت لي خلا رشيد ينتابه لدخولها ..بعد مكان غارق فوسط داك روجيستر يحسب ويعاود لاتكون شي حاجة تزكلاتلوو
رشيد: ناس قالونا ساعتين
مينة:(هزات روجيستر من يدو) غير سمحيلي ماحسيتش براسي
رشيد: كنتي عند ناهد
مينة: (مركزة فروجيستر)لاا قضيت شي شغاال ... هادشي لي بعتي ليوم ؟؟
رشيد: اه , راه كولشي مقيد تما ومقاد ..بشحال بعت وبشحال شيطت ..
مينة: مزيان ..راك ولد الحرفة مانخافش عليك(هزات عينيها فيه) غير حيد منك الخفة وتاشلاهبيت
رشيد: كاضلميني اهاد البنت ..درويش انا
مينة: (مشات جلسات فوق كرسي) امم تاتصلي على هيدورة سبع
رشيد: (جلس جنبها) تت.. غير هيدورة لغنم براكة ..اجي حكاا فين واحد ناهد شحال هادي مدازت
مينة:راها حماتها هنا فدار..شحال مادويت معاها
رشيد:(عوج فمو) ييخخ جات تاني ديك العقروشة ..حراارت العيشة على صحيبتي
مينة: سلاك وصافي..كاتبقا حماتها وام راجلها عليها بالاحترام
رشيد: الاحترام كايكون متبادل ..ماشي واحد ماحاملنيش ونحتارمو
مينة: ماندخلوش حناا بيناتهوم ...هضرة وحدة مناا نصدقو كانفرقو شمل ..خليها هي لي ختارتو نهار لول ..من لول قلنا لها مايصلاحش ليها ..
رشيد: ماعرفت اش عجبها فيه..سكايري وحشايشي ..لا خدمة زينة...لاوجه زين
مينة: هداك هو قدرها(وقفات) سد لمحال انا غانمشي
رشيد: غدا معياش نجيو
مينة: تال ديك 10 ولا 9
رشيد: صافي مشات رجعاات خرجات تاني. .غادا لدارهوم ..طريق كولها وهي كاتفكر غير فعلاقتها مع فؤاد لي مزال مبانت طريقهوم ..واش ايكملو بزوج وتاليتها زواج ..ولا غايسمح فيها ..كيف كاتقول هي
..مينة تعرفات على فؤاد وهي بنت 19 سنة داكساعة كان عندها تاني عام فقرايتها فاليسطيا ..وقريب كانت تخرج منها ...وفعلا داكشي لي كان ..وبحكم داخلة عام بكري تخرجات على 19 سنة ..ونفسو العمر لي فتحات فيه قلبها ..
...فؤاد كان بالنسبة ليها هو الحب الأبدي بكلامو المعسول وبمعاملتو الطيبة ليها خلاها بسرعة تبغيه وقبلها ينبض ليه هو فقط
...بقات معاه لمدة حتى دارت 24 عام وطول هاد الوقت كانت تخدم مع باها فلبزار وترد البال لرزقو ..واخا وقتها كان عامر وجيبها ايضا كان عامر ..لاكن شأنها شأن جميع الفتيات والنسوة لي فعمرهاا ..تاهي كاتفكر فزواج بشخص لي دق قلبها ليه... وكاتفكر ايضا فبناء أسرة ..تكون عندها دارها بوحدها تعيش فيها مع وليداتهاا ..تنوض طيب ليهوم فصباح وتقرا معاهوم فالعشية .. تلعب معاهوم منين يكونو كايدوشو وتعاود معاهوم ....
...احاسيسها وامنيتها كانت ديما كاتشاركهوم مع فؤاد...فؤاد لي رافض فكرة الزواج فهاد السن ..واحلامو غير احلامها ..اههم حاجة عندو هي يضمن مستقبلو ويكمل طريقو فالهندسة ويحل شركة خاصة بيه ويجيب مهندسين يخدمهوم عندو
...اما زواج فهو اخر هموو ..هو فعلا كايبغي مينة ..وفعلا مكايشوفش راسو مع شي أنثى وحدا خراا من غيرها ..لاكن هي ليست من أولوياتوو...رتبة مينة كاتجي هي الثالثة... من بعد حبو لأمه ولعمله
...عكسها هي لي حطاه فالمرتبة الأولى من حياتهاا
...وصلات لفيلتهوم لي كانت متوسطة ماشي من نوع الكبير ...مكونة من زوج دطبقات ...طبقة الأولى فيها زوج صالونات مفتوحين على بعضهوم واحد تقليدي ولاخر فوطويات روميين ..والوسط كانت طبلة كبيرة فيها 12 مقعد...عاد كاينين دروج صغار كايهبطو للكوزينة لي كانت شادا لتحت كامل كبيرة وفيها صالون صغير مع طبلة وتلفازة وباب كاتدي لجردة نيشان ...جنب الكوزينة كانو دروج كايهبطو للكاراج عاد كاين حتى لاكاف لي حاطين فيه كاع داكشي لي زايد فدار ... وجهة مقابلة كانو زوج بيوت ددضياف وبيناتهوم بزوج كان حمام
...اما طبقة الثانية فكانو فيها فقط البيوت جهد خمسة دلبيوت ..بيت دباها ومها وواحد دشيماء ولاخر دياسين عاد كاين ديالها هي وحتى سعاد المتعلمة عندها بيت لفوق معاهوم ..وفواحد جيهة كانت خاوية قادوها وردوها بيت كايقارو فيه دراري
...اكيد مانساوش سطح لي فيه جليسة جلد ..و حتى جريدة صغيرة لي لتحت مزينة بالورود والمحابق والنخيلات الصغار
...حطات طوموبيل فلاكاف وطلعات فدروج وهي كاتلعب بخصلات شعرها الطويل ..توجهات نيشان للكوزينة ..كيف توقعات لقات مهاا فلكوزينة واقفة على شغال ...وفجنبها سعاد المتعلمة ..لي فور مالمحاتها مينة طارت عليها بتعناق والبوسان
مينة:(ضماها لعندها ومن نبرة صوتها باين عليها الفرح) تي إمتى جييتييي ..(بعداتها عليها وقابلت وجهها معاها) ياك قلتي باقا تجلسي سيمانة مع داركوم
مينة : بعدي علياا اديك الهيشة ..اه اه اه غير لي با يجي يشوفكوم
مينة : (عاودات ضماتها عندها) ياختي توحشتك المراكشية دياليي
سعاد: (تادفعها علييها)بعدي علياا لهييه ...هانااري باتقتلني وانا مادا يديي لحناا
حليمة: دبا تخنقي لبنت بعدي عليها
مينة : (حيداتها عليها) هااهي غير لي يتوحشك
حليمة: قوليلها مبروك راها تخطبات
مينة: (بدهشة) هاالعاار
سعاد: حق مونانة مالي بيت نبقا بايرة بحاالك
مينة: لهلاا يحييك تا باايرة
حليمة: طلعوو لفوق وهضروو ..اتقلبو ليا راسي تااني
...جراتها من يديها وماوقفو غير عند البيت ...دخلاو وسدات الباب من وراهاا
مينة:(شافت فيها بنص عين) كيفاش بلانك ..مشيتي لداركوم سيمانة رجعتي مخطوبة
سعاد: (جلسات فوق لفراش) اوا اش نقوليك زهر ولمن عطاه لله
مينة:(جلسات جنبها) دبا ولله تادوايا معاك بصاح
سعاد: عقلتي على داك الراجل الشارف لي كان بايتزوج بياا
مينة:(شهقات) ياكما هو
سعاد: الاا هياتا مالي هبلت ..ولد ختو الآلة مو شافتني ولصقت علياا لصقة
مينة: هانتي يالالة على زهر ..هادوك ناس قلتي لباس عليهوم
سعاد: من زهري ياختي هو ماشي فلبلاد واخ اصلهوم ماشي مغاربة
مينة: ومنين
سعاد: باه الآلة لبناني ومو مغربية من عندنا فلبلاد مينة: ونتي بعدا عاجبك ولا شفتي فلوسو
سعاد: هو صراح زييين ياختي الوقفة وتخنزيرة ..وصراحة ضريف وباينة كريم ماشي شي واحد لي شحيح (زقرام) وعندو 39عام
مينة : اوا نتي تعرفي تانتي راك كبرتي راك 34 هدا هو جهد
سعاد: هانتي هضرتي جهد تاحنا نديرو شي وليدات انا مرضت مانكدبش عليك ..
مينة: اش مرضك
سعاد: مرضاتني كلمة البايرة ..يطلعوني بلبايرة ويهبطوني بلبايرة
مينة: اودي كون تشوفي انا اش كايقولو عليا عائلة ماما
سعاد: نتي امينا راك فلعشرينات ماشي بحالي انا لي قربت ندير 35 ومجتمعنا مكايرحمش للأسف ...دبا الوحدة خاصها تقبل بأي واحد واخة يكون حاشية غير باش ماتسماش بايرة ..بفف الجهل هدا
مينة : خلينا من هاد موضوع لي عمرو يسالي وقوليلي داك الشارف اش قال
سعاد: با يدير لعصى فرويضة ولا يني سيد باغيني مالقا مايدير
مينة :لله يكمل عليك بالخير
سعاد: امين اختي (شدات فيدها) العقبة لعندك نفرحو بيك نتي وسي فؤاد بشي عراسية دالكبرانية
مينة :(تنهدات وسحبات يديها) منين ياختي وهو معكس لياا سنين وانا معاه مهاماه غير خدمتوو وورث مو
سعاد: حصلتيه كايخونك ؟
مينة : لاا عمري شفت عليه شي حاجة
سعاد: اوا راه الخيانة هي الموصيبة ..ماعندك ماديري ياك داير سبة بشركة اوا صبري وشوفي
مينة : خفت غير نصبر ونصدق مخورة تخورية دلغدايد
سعاد: ياختي ماعرفت مانقوليك. بيتي تصبري هانتي صابرة بيتي تكركبيه كركبي والديه
مينة: راه عشرة عمر اش غانكركب...وزايدون انا كانبغيه
سعاد: اححح كاتفكريني فواحد بنت جيرانا مسكينة
مينة: مالهاا ؟؟
سعاد: كانت كاتحب واحد جدارمي وبقات صابرة عليه خمس سنين عاد ممكن يتزوجو ...كانت تنوض وطيح عليه...وتقول منو نخلاق ..حبهوم كان بحال قيس وليلى ..كولشيي فلبلاد كايشهد بيه ..فاطمة لعلي وعلي لفاطمة
مينة: واش طرا من بعد..تزوجو ياك
سعاد: حماقت مسيكينة
مينة:(خنزرات فيها) كاطنزي عليا دبا ولا كيفاش
سعاد:حق لله تاحماقت داويا معاك من نيتي ...سيري طلي عليها دروك ولا راجل لي يدوز من حداها ضربو بلحجر
مينة: ناااري مسكيينة واش سمح فيها؟؟
سعاد: اوا شنو بان ليك ..بعدا ضحك عليها تادا اش با..وضربها ليها بنكرة...ومشا تزوج ببنت واحد دوار حداناا
مينة : لااا لااا ياختي فؤاد انا كايبغيني وشحال من مرة بينهالي
سعاد: اممم كايبغيك بمشموم دلورد ودب فيه قلب
مينة: كاطيحيلي المعنويات اصاحبتي
سعاد: قلت ليك صح ..راه مكاين لا بضااض لا نم.... نوضي جري على راسك ..لاتولي تانتي لي يدوز من جنبك تزفي عليه باحجر بقاو جالسين كايتعاودو ... بحكم سعاد عندهوم فدار منين كانت فعمرها 19 عام ..حلات مينة عينيها عليهاا ..وكبرات معاها ..كانت ديما كاتعتابرها هي ختها وصاحبتهاا...عمرها شافت فيها شوفة دخدامة عندهوم ...فينما كاتخرج كاتخرجهاا معاها..لحوايج كاتشيرهوم بضوبل ...لكادويات وروايح عندها على جهد
...وحتى سعاد لقات راحتها معاهوم ومعتابراهوم عائلتها الثانية لي وهبها ليها الله ..وعمرها حسات بنقص وهي معاهوم ..خصوصا منين تالقراية قراوهالها ..حتى شدات باك ليبر وقرات تاهي حتى خدات ديبلومها فإدارة الاعمال
... هبطات سعاد لتحت تعاون حليمة فالعشاء ..وبقات مينة بوحدها ..بدلات حوايجها وصلاة صلاتها عاد تخشات فلفراش طالقة لكليمة ..شادا تيليفونها فيدها ومترددة واش تعيط لفؤاد ولا لاا ..وبعد صراع داخلي وحوار بين قلبها وعقلها ..زعمات وصونات عليه ..وصدمة كايقطع عليها !! فالأخير سيفط ليها مساج
💬: منونتي مامساليش دباا تالغدا ونصوني ليك ..بونوي ❤
...قراتها وطلعات ليه الفي ..وقفات وهي مغددة كاتمشي وتجي
مينة : يالااه سرك نيت المدلولة نتي لي معيطة لييه ..هاهو خسر عليك مسااج ..وبقاي نتي تاكلي فريتك
...بقات بوحدها كاتغدد كاع ضفارها كلاتهوم بالفقصة ..تجاهلو ليهاا كايخليها تحس براسها نكرة ...ماكلف راسو حتى يسولها كيف وصلات ..ولا يصوني غير بالكدوب
...عرفاتو غايكون دبا غير فالقهوى مع صحابو..لهاد الدرجة هي والو عندو ..ماقدرش حتى يجاوبها قدام صحابو ..شنو زعماا ماراضيش بيها ؟؟!..ولا خايف من شي حاجة؟؟ .. ولا فعلا كيف كاتقول ناهد هي والو عندو..وآخر همه ..ودايرها رويدة دسوكور !!!
...قاطع افكرهاا صوت دتيليفون ..مشات ليه بلهفة عند فكرها راه هو لي كايصوني ...لاكن خاب ضنها منين لقات صاحبتها ناهد هي المتصلة
📞📞📞
مينة : نهودة
ناهد: (بهمس) اهلاا حبي... كيراك صفا علييك
مينة: صفاا صفاا ..حمد لله (بتساؤل) مالك كادوي بشوية؟؟
ناهد: غيير سكتي ماشي العجوزة راها بقا عندي فداار ..شيبااتني يااختي ..يخ من زوااج ومايجي منوو
مينة: مزال ماناوياش تمشي راه شهر وهي لاصقة فيك
ناهد: علاش ماشي دارت راسها طاحت ومقادراش تمشى على رجليهاا ..لاوياها بواحد الفاصمة قدها قدااش... وبعييني ياختي شفتها كاتمشى عليها صحة سلام .
مينة: ومالها ياختي على حالها ؟؟!
ناهد: سمم ياختي سمم ..دبا صحيبتك هي لي كادوش لها وهي لي كاتلبسها وتوكلها وتشربهاا ...عاد زيدي عليهاا طياب وشغال دار وبوركابي تااهو ..(دموع تجمعو فعينيها) اناا عيييت عيييت يااختي وتهديييت ..بديبلوومي اعبااد لله وجالسة مقابلة لعجوزة ..وزيدي عليها قالك لوسة تاهي جاية
مينة:(بحسرة) لله لله ياختي وتكبو عليك
ناهد: اراك الحرب دباا لي غاتنووض ..وولادها جنوون ياختي جنووون ..واش كايبغيو يجلسوو ..دار كولهاا كايقلبوها على راسيي
مينة: زهرك ياختي ..ولايني درتيها راسك ..عينياا فيك بعدي من داك الجنس راه مايصلاحش ليك
ناهد:(ببكاء) وااش اناا عرفت هادشي ايطرا اهئ اهئ ..اناا شفت لحب والغرام قبل زواج ..قلت هكا اتكون حياتتي ساعة لاا لااااا اهئ اهئ اهئ (انهارات بالبكاء)
مينة:(جلسات فوق لفراش كاتنهد) براكة من البكاا اصاحبتي اتقتلي غير راسك ..دبا يفرج ربي ماتخافيش. .نتي غير صبري
ناهد:(كامسح دموعها بيدها) ربع سنين وانا على هاد الحال ... اشمن فرج باقي
مينة; ستغفري لله ..وماتقنطيش من رحمة ربي ..مزال يفاجيها عليك
ناهد:(تنهدات من القلب) ان شاء الله ..موهيم اختي غدا اندوز لعندك باش نمشي ندك شوكة
مينة: علاش كملات ثلاثة شهور
ناهد: كملاات اختي خاصني غدا نمشي ندكهاا
مينة ; مزال مباغا تولدي
ناهد: فين انولد اختي ..نجيب هاد دراري يتعقدو لي يشوفو مهوم كايضربها باهوم
مينة: لله يهدي ماخلق هادشي لي انقوليك
ناهد: يالاه احبيبتي خاصني نقطع لا تم جاية. ...بسلامة عليك.