الفصل 2
مشات رجاء وأسماء تنشفات بواحد لفوطة وخرجات بانو ليها الحويج وهي تبدا تقلب فيهم..داكشي جاها فشكل جاها وااعر بحال داكشي ديال الأفلام لكانت كتفرج فيهم مع رشيدة وهرهور تفكراتهم وهي تهبط شفايفها ولبكية شدتها ولكن هي متفائلة بلي ليوم غتمشي لعندهم مخاصهاش ضعاف..
هزات لحويج ولبساتهم كانو عبارة عن قبية گري واصلة لفخاد و ميني شورط دجين جاوها بووم وبقات كدور تشوف راسها في لمراية من لقدام ولور وهي فرحانة.. لوات عليها إيزار صلات الصبح لاحتو وخرجات و هي مشرعة فمها حتى لخر و بغات دير فيها الأنثوية بدات تتمشى بخطوات ثقال وتابتين وهازا راسها لسما حتى لمسخوطة كتجي في فاز تتهرسو..ديك ساعة عاد هبطت راسها وعينيها خارجين غوتات...
_أسماء: وااهيا بوعبييد الشرقي..
صوت لفاز كان عالي لدرجة رجاء جات تجري وهي ووحدة خرى..
_رجاء:نتي لاباس..
_أسماء:شوفي هانتي راه كرامتي هن(دارت صبعها عند نيفها) راه (بغات تگول نخلصو عاد تفكرات فلوس ليعندها معرت فين مشاو)هالعار لما سمحي ليا واللهتا هي ليطاحت دابا أنا دزت من حداها واقلة لبرد..
_رجاء:هه لبرد واخا واخا أزيدي..ماشي مشكيل..
_أسماء(رتاحت ومع فيها تخراج لعينين شوي): ومعرت بنادم يسحبني طيحتها راه طاحت بوحدها أنا رامنبغي حد يشوف فيا شوفة ناقصة وگااع إلى بغيتو نخلصها راه..
_رجاء(بانت ليها غتبقى غا داوية وتخرج فعينيها وهي تقاطعها جرتها من إيدها): صافي صافي أزيدي هالعار تاحد مگال لك شي حاجة...
هه واخا هكاك أسماء بقات تتخرج فعينيها..هاد خيتي بزاف😂طريق كاملة وهي داوية.. وصلو لكوزينة طلعات فوق البوطاجي ودلات رجليها.. رجاء عطاتها لبلاطو غير شافت لماكلة وهي تسقل وطاحت فداكشي عمية..
نخليوها تاكل ونمشيو عند أوس لي كمل لحصة ديالو وبدا كيجمع فوراقو حتى كدخل عليه واحد
_لأستاذة: أهلا..لاباس..
المهم سلام وداكشي وأصلا حتى هي مزعوطة فيه..
_أوس:سمحي ليا خاصني نمشي دابا بسلامة..
_الأستاذة:اه شوف راه سي زاهيري بغاك..
_أوس:اه صافي.. (وعطاها بضهرو ومشى لمكتب لمدير دخل):سلام سي زاهيري..
_المدير(وقف):مكاين لا سلام لا والو أش هاد الفوضى درتي ليا هنا أسي العمراني..
_أوس: علاش أسي زاهيري أش وقع..
_المدير(كيغوت معصب):كيفاش أش وقع.. نتا كتجي وقت گالها لك راسك وطافي تيليفونك..راه مخدمة ما والو هادي أسيدي..راه بنادم خاسر فلوسو هنا
_أوس(قرب عندو وبلطافة من لفوق غير الله يستر):تهدن أسي زاهيري..صافي صافي سمح ليا أسيدي آخر مرة تعاود
_المدير(رجع گلس وباقي مخنزر):آخر مرة نسمح بهاد الفوضى هنا ولا الله يعاونك...
_أوس:يكون غاخاطرك سمح ليا...
_المدير:يله تفضل دابا تقدر تمشي...
_أوس(شاف فيه بابتسامة شريرة):الله يعاونك..
خرج من لبيرو لخطوة الأولة هز التيل عيط لواحد الشخص مخسر واااالو گال حاجة وحدة:" حميد الزاهيري"..وقطع الإتصال بنضرة تاقبة وشريرة من الأكيد أن المدير مغيكملش نهارو واخا راجل كبير....
أوس تاجه لوطو ديالو ومشى الخدمة الحقيقية ديالو..
نخليوه ونرجعو عند أسماء ليكملت ماكلتها وجرت رجاء لبيتها دخلات وسدات لباب
_رجاء:واااهيا ناري مالك أش عندك😕
_أسماء(شداتها من كتافها وبجدية هاد لمرة): دابا جا لوقت باش نمشي ونتي غتعاونيني...
_رجاء(هازا حواجبها بزوج):واش نتي باغا سي أوس يدفني حية...
_أسماء:مغيعرفش والله..عفاك عاونيني واش باغاني نموت هنا حية خليني نموت فالزنقة حسن...
_رجاء(بدات كدور فعينيها..لمسخوطة حنينة): وبقاي معايا أصحبتي عفاك..تاقلت لقيت لتفهمني...
_أسماء:شوفي أساطة..وبرب حتى نبقى نجي عندك واللهما نساك نجي انا وهرهور..غير عاونيني دابا دغيا قبل ميجي داك شرشبيل...
_رجاء(تنهدت😩):أمري لله..تسنايني..
( مشات واحد جوج دقايق رجعات ليها بلبسة ديال لخدامات ومداتها ليها)..هاكي لبسي هادو غيضنو أنك غير خدامة...
_أسماء: وااااو أساطة كتفكري واااو دابا نتي غتكوني بحال دوك لعُلاما ياك(مع هي مكلخة عند بالها الكوكب كامل بحالها😂)
_رجاء(ضحكات وضورت راسها):دابا وقت هادشي لبسي دغيا😄..اه راه لواليد كان عالم...
_أسماء(محنية كطلع في صاية..هزات راسها دغيا):هويلي حلفي..بنت الحرام حَوْلْكْ امم...
_رجاء:أودي انا معامن..گالت لك بغات تهرب.. تلقينا تلقينا...
أسماء لبسات حويج لخدامات وجمعات شعرها عنقات رجاء وطلبات منها سماحة على صداع لي دارت ليها وحتى رجاء بدورها طلبات منها سماحة وهي كتمسح دموعها باش متشوفهمش أسماء غير يومين حسات بحالا كتعرفها سنين كل وحدة دارت بلاصتها فقلب لخرى
خرجات حادرة راسها باش ميشوفها حد..قلبها كيضرب ف90 فاتت لباب لول مهدر معاها حد تمات غادة فجردة بخطوات سريعة باقي ليها باب واحد قدامو 4 ليكارد ووراه 4 بحكم أوس شدد الحراسة يلاك بغات تخرج حتى شدها واحد من دوك ليكارد أسماء تنفسات صعداء ولكن مبغاتش تبين هي خايفة..
_لكارد: فين غادة نتي..
_أسماء:أنا..غير مسخرة لرجاء..
_ لگارد:أنا نتسخر..
_أسماء(توثرت):لا لا شي حاجة ديال لبنات..
_لگارد:أمم واخا سيري..
أسماء بابتسامة خفيفة رتاحت نوعا ما وأخيرااا الفرج جا..خرجات خطوات خفاف وسراع حسات بالحرية بحالا خارجة من عكاشة حتى بووم💢 كتجي فحيط أحم ماشي حيط ولكن فحالو😉...
أسماء هزات راسها لفووق هه بحكم ان السيد طووويل وسرطات ريقها وتنهدت غير لگارد ولكن ماشي أي واحد هادا نفسو لدخل عندها أول مرة جابوها..(عمي) ههه
_لگارد:فين غادة نتي..
_أسماء:هاا أنا غير مسخرة...
_لگارد(نبرة قاصحة): مسخرة..واش كضحكي علينا..
جرها من إيدها ودخلها لدار وعاود خرج وهي تتفركل وتغوت...
_أسماء:وطلقني..طلقنييي أجيتيني قد عمي ماولهتاا سروالك نحيدو ياوتا طلقني وطلقنيييي خلينا نطيحو دراع ولا خايف هههه😂
هو راه تصرفيقة منو تنسيها على جنسها راه غي خايف من أوس باش الأوامر هاكا تتگول..جارها بلا ميهدر وصلها دخلها لدار وسد لباب وهي باقا مسكتاتش..كتغوت..ولا كنتي رااااجل رجع يالله ينعل طبون طبابين مك أه تالهربة ممخليناش نهربو فخاطرنا..جات عندها رجاء كتجري..
_رجاء:بفف صافي شدوك ياك شتي گلتها لك...
_أسماء:داك ولد البغل شدني ينعل ديلمو ملقيتوش راجل مبغاش يطيح معايا دراع..
_رجاء(فيها ضحكة وحابساها) صافي راه غير خايف منك..
_أسماء:واش كنت تنگول لك من صباح راه غي خايف..
_رجاء:صافي صافي سيري لبيتك الله يحفضك دابا يجي سي أوس..
أسماء مشات لبيتها بدلات حويجها ليكانت لابسة وبقات تمشي وتجي..
نخليوها ونمشيو لبلاصة خرى 12:30 يلك فايق سيهم زياد بسبب إتصال من أوس..
_زياد(صوت غالب عليه نعاس):هممم آلو...
_أوس:نوض الله ينعل طبون مك هدا وقت نعاس... _زياد(بصوت خافت): صبحاتو لله مصبحين على صوتك صباح هدا...
_أوس(بنبرة حادة):عاود أش گلتي مسمعتكش..
. _زياد(يلك فاق):هاه..أنا..گلت لك صباح نور الله ياودي صباح غيدوز عندي زوين...
_أوس:ومعرت..عندك 30 دقيقة تكون عندي في المقر...
_زياد:أَوْ أصاحبي على 30..(طيط..طيط..قطع عليه الإتصال😂)..مال ديلمك بحالا خدام عندو..
رجع تكا يلك حط راسو وهو ينوض قافز وناري ناري راني خدام عندو گالك 30 دقيقة ناض دخل لدوش رجع لاوي عليه فوطة لاحها وبدا كيلبس سروالو بسرعة وهي تنوض ديك الخانزة
_الخانزة: صباحو حياتي..
_زياد (خنزر فيها): شتك تيقتي كرك(ركلها حتى طاحت)نوضي قودي عليا (بضحكة إستهزاء)حياتي😒
خرج وديمارا بسرعة فائقة حتى وصل لتما ومرة مرة كيطل على ساعة الحمد لله وصل مع الوقت أما كون راه نهارو نهار..بقاو خدامين حتى لوقت متأخر من ليل من بعد واحد الإجتماع فيه عدة شخصيات ليعندهم مكانة مهمة فلبلاد من أهمهم أوس ومترأس طبلة راجل تكون عندو ديك 62 عام ولكن شاد فراسو لحية بيضة بشرة بيضة مع شعر كحل مخلط بشيب وكان مقابل معاه فالرأس لاخر گالس أوس..الحديث كامل كان كيدور على طاهر بن حسين ..المهم من بعد وكلشي يوضاح...
خرج أوس مع 9:30 دليل ركب فسيارتو وكسيرا لديريكت لدار أأ لڤيلا زعما.. مديوش عليا😂..كانت أسماء گالسة فبيتها نهار كامل كالت تما وطالع ليها دم ماشي على عادتها حتى رجاء خلاتها براحتها مبغاتش تزيد عليها لفيها يكفيها..كانت گالسة خاشية راسها وسط رجليها وكتفكر فشي حل..وصل أوس ودخل لدار مع 10:00..الحمد لله داك لگارد لِحصل أسماء مكانش باش دايرين ديكيب ليل ونهار دخل تما غادي في تجاه لبيتو طالع جوج درجات ونزل هه تنادم معاه لحال مغيجيهش نعاس إلا مطلش عليها وباسها ولفها مسكين😂ولكن هاد المرة مغتصدقش ليه طرى مالم يكن في الحسبان..أسماء باقا فايقة غير تحل لباب هزات راسها..معرف أش يدير أول حاجة تصدم مكانش عند بالو غتكون فايقة تاني حاجة شوفتها معصبة بدوك لعينين كملو لبقية وتاااالت حاجة هي كيف شافتو ناضت ساعرة صافي عيات منهادشي لكيوقع ليها...
_أسماء(واقفة معصبة):جيتي على سلامتك نيت كنت كنتسنا سيادتكم تجي..(هزات سبابة)شوف نتا أش بيني وبينك..خليني نمشي بحالي وعباااد الله بغيت نمشي بحااالي(بلغوات) خراك ياك خديتيه وعطيني شبر تيساع(هزات لقبية) ها حجر لعافية لما طلقني نمشي بحالي..بغيت نمشي تخنقت واش كتفهم(مقدراتش تحبس دموعها)..اهيء اهيء..صافي عيت منهادشي ..عيت منك..انا مكنخافش من بنادم كنخاف من ليخالقو..اهيء..الله يرحم باك خليني نمشي بحالي..أصلا راك ساليتي مني معندك لاش تشدني هنا..اهيء اهيء.. صافي عيت(بصوت خافت)
_أوس(بقا غي كيشوف فيها كتبكي مداهاش فهدرتها مزيان أما كون خلا دار بوها..تنهد):واخا باغا تمشي بحالك
_أسماء(بلهفة):اه..اه..صافي بغيت نمشي
_أوس:واخا غدا سيري فحالك..
مشى طلع لبيتو وخلاها مصدومة من كلامو ليدخل ليها مع العضام بورشها..مشات تكات فبلاصتها لا لا زعما گلت غتبدا تفكر فهادشي وغتفرح وغتبدا تشوف سقف وتفكر كلامو وتبتاسم ولكن هادشي كامل موقعش غير حطات راسها على لوسادة المسخوطة غابت😂..أما هو فطلع لبيتو وصورتها فبالو لبستها..وقفتها..عينيها كيبكيو..وغواتها..كون زاد شوي..كون راها حاملة دابا..واخا گال ليها سيري ولكن هو مرتاح عارفها غترجع باش هو مخطط لكلشي...
صبح صباح وأصبح الملك لله..صباح لغيبدل نضرة أسماء للقدر ديالها..صباح لغيخلي أوس يزيد الخطوة القدام فعلاقة لهو أصلا مفاهم فيها تالعبة شي حاجة كتسيرو معارفهاش..ديك الحاجة كتسمى القدرة الإلهية..سبحانه فهو القدير المقتدر..القادر على كلشي وكيف كيگولو سبحان ليصبحها فشان ويمسيها فشان..
أوس كان أول واحد يفيق لبس سورفيط فلكحل مع سبادري بيضة لباسو سبور 💯 ودار كاسك بلوتوت وخرج لسبور من نهار جات أسماء مخرج جرى في داك الوقت فاقت رجاء ولقات الخدامات موجودات كيتسناوها..بداو فتوجاد الفطور وفهاد الأثناء وصل أوس طلع دوش وفطر فطورو المعتاد وخرج في بورش كحلة الوجهة كانت لافاك هه هاد الأخيرة كان فيها حداد على السيد المدير ليمات مشى يعزي مسكين مصواب
فاقت أسماء هاد المرة بكري شوي وناضت توضات صلات الصبح وشكرات الله على كلشي نعم ونقم في الأخير كلشي كيبقى قدرو هو "عسى أن تكرهوا شيء وهو خير لكم"😊داكشي علاش لِكان مهموم فاش توصل لهاد الجزء عرف بلي داك الهم ماهو إلا اختبار كيفما كان..عرف بلي هو قدر..صفحة من كتابك وغدا غطوى..غي آمن بالله وقدره وخليها فيد الله..خرجات من بيتها وهي فوق السلك فرحانة طوب ومشات لكوزينة وغوتات هربووووو الخدامات بلا ميتلفتو على نيتهم تلقو لفي إيدهم ياكاس يابراد وبداو درك درك درك كيجربو عند بالهم قنبولة ولا شي حاجة وهي قدامهم كتغوت...
_أسماء:جريو جريو جريو..هربو هربو هربو.. وميمتي وميمتي ميمتي..
خرجتهم لجردة وهوما أتابعينها تامن مي حبيبة الطباخة هازا قشابتها ومدردكة وليگارد أكيشوفو مفاهمين والو حتى وصلاتهم عند الباب لخرجاني وهي توقف ودارت عندهم وبدات كدور في الورك ديالها حركات دائرية بحالا كتلوز فيها(حركة رياضية) الخدامات كلهم وقفو كينهجو وكيشوفو فيها مفاهمين والو وهي تبدا تصفق يالله يالله رياضة رياضة الشحمة كدير القلب😂😂الخدامات بداو كيخنزرو فيها وكيعيرو وهي باقا كتلوزها وليگارد حالين فامهم مفاهمين والو..
_ مي حبيبة:الله يبنتي أش باغا عندي بغيت لك الما فركابي ومشات😂..
وهي تبدا تنقز الفوق وتصفق يالله ديرو هك ديرو هك..طلعات ليهم الدم مشاو وخلاوها..جات عندها رجاء وضربتها لراسها
_رجاء:كتفرفري ياختي واللهما كتحشمي هه حشومة علك من ميمة حبيبة خليتها تجري...
_أسماء:وتي الغلظ خايب للصحة توما مالكم ألاجر ألاجر ههه..(جراتها رجاء لداخل)
_رجاء:زيدي تفطري زيدي..شتك فرحانة أش وقع
_أسماء:ليوم غنمشي فحالي...
_رجاء:فين الحبس!😕
_أسماء(ضارت عندها مخنزرة):لا المقبرة نزورك _رجاء:أضحكت معاك أمالك...
_أسماء:مالك كيحوي لبعالك بحالك ياااالله(هي تعض فشنوفتها لتحتانية وكترمش بزربة بحال لبراهش صغار)😂
_رجاء:خخ أيما أنا معامن😂
_أسماء:مع ليكواك ياااالله 1_0...
_رجاء:ههه صافي دابا بصح فين غتمشي...
_أسماء:في ترمتك(بدات كضرب إيد على إيد وكتكركر) أاااهههههه ياااالله...
_رجاء(تمات غادة):حتى أنا حمقة ليدايرة فك راسي..
_أسماء(شدتها من إيدها):صافي أنا غنگولك والله...
_رجاء:واخا يالله كنسمع..
_أسماء:غنمشي بحالي والله وأخييييرااا.. _رجاء:واش من نيتك المرة ليفاتت فلتي كتضني غتفلتي منها ديما غير باقي معرفش داك ليكتگولي عليه المفيگعص داكشي أما كون راه أنا لغنزور قبرك ليوم..
_أسماء:أشناهوا أشناوا أشناوا..وحررربش يقرب ليا لما نعاود خويا فطهارتو واللهتا بيضاتو نصلقهم وندير عليهم الملحة ونعطيهم لك...
_رجاء(هازا حواجبها مصدومة):😟
_أسماء:هاكيلييي..ونزيدك ألحب كون مكانش خايف ميگولش ليا غترجعي بحالك ليوم(كتهز حواجبها بزوج وتهبطهم بسرعة)
_رجاء:أشنووو..بصح هادشي ليگلتي..
_أسماء:واش بان لك أبب واللهتشا تشنهدر معاك.. _رجاء:كيفاش حتى خلاك تمشي هدشي ميمكنش(بدات كتفكر فاش كان كيبوسها) _أسماء:أييه وعلاش أبب ميمكنش...
_رجاء:لا لا والو..غير جاتني غريبة...
_أسماء:أودي بنادم كاموني كنبان ليه ضريفة بغا ياكلني..
_رجاء:ااااه أختي ضريفة فوت القياس..
داز نهار هاكاك وأسماء قرت أنها تعاون رجاء باش هي فرحانة وتقضي الوقت لبقى معاها هنا بقاو كيجمعو فدار وهوما ناشطين وتالقين المزيكا على لخر وأسماء تالقة حلقها وتيشطحو سالاو وخرجو لجردة گلسو فواحد زعلولة كبيرة بجوجهم رجاء گالسة وأسماء متكية ليها على رجلها وليحة رجليها فوق لحاشية ديال زعلولة ورجاء كتلعب ليها فشعرها..
داز الوقت هاكاك في الماكلة واللعب وجات العشية دغية وصلات 6:30 وقررات أسماء أنها تمشي واخا طلبتها رجاء تبقى ولكن خاصها تقوى وترجع وواعدتها أنها غترجع عندها ديما بحكم انها هي التالية ولفتها تفارقو والدموع فعينيهم خرجات أسماء من القصر ليكان بنسبة ليها غير متحان ودازت منو وقبل متمشي بدلات داك ميني شورط بي سروال بحكم انها عارفة الناس ديال درب سلطان كيفاش غيشوفو فيها الى مشات بداك ميني شورط..خرجات من داك الباب الحديدي الضخم وحتى گارد مهدر معاها خرجات وللحضة تلفتات فيه شافت فيه مبتاسمة...
_أسماء( تبسمات مع بالها):صفحة وطويتها الحمد لله..
معارفاش مسكينة أن ديك الصفحة غتبقى مفتوحة حياتها كاملة..ضربها نسيم قوي وسبحان الخالق من جو مشمس لجو مغَمم هادا هو الموغريب جَوُو بحالو الجو كيتنبأ بالشتا خرجات و هي فرحانة غترجع لهرهور ودارها زعما طاروها و لرشيدة وناس الدرب كاملين كانت كتمشى وهي تتحنقز بحالا عندها 3 سنين وكتسول ناس على طريق باش معارفاش فين هي..كانت دار أوس فخرجة كازا بقات كتمشى ومعياتش وكتغني طريق كاملة مكانتش عارفة بلي شي أعين وراها مراقبينها وبغاو ياكلوها خصوصا ملي كتسول شي ولد ولا حتى رجل كبير..
بعد مدة وصلات وتبسمات وهي عاضة على شفايفها أول حاجة دارت هي أنها مشات كتقلب على هرهور وطاروها المفاجأة بغيت نگول الصاعقة..مكاين لا طارو لا هرهور في بلايصهم الشيء ليخلاها مصدومة مدة ولكيدوز من قدامها كيطلعها وكيهبطها..بان ليها عمي دريس قدام حانوتو وهي تمشي تجري عندو
_أسماء: عمي دريس عمي دريس فين فين هو الطارو و هرهور فينهو..
غير شافها عمي دريس طلعها وهبطها خنزر ودور وجهو دخل لمحالو..الشيء ليزاد كمل عليها..ديك البسمة تحولات لدموع مجموعين لقلب مخنوق لصدمة كبيرة رجعات كتجري لدار رشيدة هي لغتفهمها كلشي هي الوحيدة لمغتخليهاش باعتبارها بحال ختها وكثر..من المستحيل تخلي يديها من المستحيل تسد الباب فوجهها..دقات عليها الباب ودموع فعينيها رشيدة حلات عليها الباب غير شافتها أسماء وهي ترمى عليها
_أسماء:رشيييدة..
للأسف وقع مالم يكن في الحسبان
_رشيدة(دفعتها وصرفقتها وهي مخنزرة):لاش جيتي...
_أسماء(دورات وجهها بزربة وعينيها مفتوحين من أثر الصدمة و دموع بداو كينزلو على خدها بحال شتا..بثثاقل):خختتي...
_رشيدة(هزات سبابة ودموع فعينيها):آخر مرة تگولي ليا ختي أنا معنديش خواتاتي قحبات...
_أسماء(بحالا عاودت صرفقتها ولكن هاد المرة كثر):رشيدة..أناأنا ختك(دارت إيدها على صدرها)أنا أسماء..أسماء ختك...
_رشيدة:أسماء ختي ماتت من نهار ختارت داك طريق..طريق العاهرات(شدتها من كتف قبيتها وداتها وجابتها)..واش كتسحبي راسك هاكا غطلعي لفوق لا لا نتي راك غير مزدتي هبطتي عاد فهمت علاش الله خلاك يتيمة باش متحشميش بواليدك الله دار فيهم خير...
_أسماء(شدات ليها إيديها بجوج):أش كتگولي لا لا(كتحرك راسها بلا ودموعها نازلين)..لا اهيء.. اهيء متگوليش هكاك..انا مدرت والو..اهيء انا أسماء..ختك حبيبتك..انا هي ديك بنت الطارو لكضحك فاش كتشوفك..اهيء..اهيء انا انا هي نفس البنت لكتشد فيدك بحال بنتك الصغيرة اهيء..اهيء متگوليش هكاك..عفاك متخلينيش.. عفاك لا متخلينيش(كتشهق بلبكا)..اهيء..اهيء اهيء..اهيء..لا..لا😰😥
_رشيدة(بقات فيها أسماء هي بحال ختها الصغيرة ولكن بعد داكشي ليگالو ليها لبوليس وتصاور مقدرتش تبقى معاها..نترات إيديها منها):آخر مرة دقي بابي...
سدات الباب فوجهها دخلات وبقات كتبكي بقات فيها أسماء ولكن معندها مدير التهمة تابتة بتصاور..أسماء كدق عليها الباب وتغوت بلبكا..
_أسماء:رشييييدة حلي حلي انا ختك..اهيء..اهيء حلي..حلييي..حليي..اهيء انا ختك..مدرت والو..مدرت والو..اهيء(طاحت الأرض على ركابيها بلبكا مقدراتش تحمل كثر) مدرت واالو..اهيء..اهيء مدرت والو..والله...
لكيدوز كيبقى يشوف فيها ولكن حتى واحد من مبقى بغا يشوف فيها... بعد مدة جات مي باركة لكتبيع لبطبوط مفخبارها والو هزاتها من كتافها...
_مي باركة:نوضي أبنتي من الأرض...
هزاتها نوضاتها وشافتها ومعرفتهاش باش مولفاها غير بزبل.. أسماء ناضت وهي مخدرة وصلتها لراس درب ومشات لبلاصتها فين كتبيع وأسماء كملات طريقها بخطوات ثقال وهي بحالا غايبة عن الوعي غير كتشوف القدام ودموعها على خدها وإيديها فاشلين بقات غادة مسافة شحال من واحد كتجي فيه وغير غادة فينما داوها رجليها وصلات لواحد زنقة خاوية و گلسات عنقات رجليها وكملات بكاها كانت 10:00 دليل كتنخصص بلبكا
_أسماء:علاش أربي..علاش..علاش..أش درت أنا..أش دنبي انا تزاديت وسط طارو وواخا هكاك..تنگول قضاء الله وقدره..اهيء اهيء اهيء..مدخلتش..مدخ لت ش المدرسة كنت ديما كنشوف دراري صغار هازين شكايرهم ونا كنبقى فطارو..اهيء وو ا خا هكاك عوتاني قضاء الله وقدر قدره..اهيء..اهيء..علاش أسيدي ربي..علاش هاكا..علاااااش..فالشتا كيبان ليا ناس مغطين ولابسي..ين مزيان اهيء..اهيء باش ميمرضوش..وانا كنت تنبقا ليل كامل معنقة رجليا باش..باش اهيء..منبردش..وكنت تنشوف لمروات كيغوتو على ولادهم باش يدخلو من زنقا فشتى باش ميمرضوش ولا مرضو كيبقاو سهرانين عليهم..وانا كنت الى مرضت حتى حد مكيعرف كنبقا نبكي..نبكي بوحدي بحال..بحال دابا..اهيء..اهيء وواخا هكاك كنت تنگول قضاء الله وقدره..تنگول ربي كيشوف فيا وغيبدل كلشي..ولكن أش وقع اهيء..اش وقع..اش وقع اهيء اهيء..والو..والو مرة خرى بقيت بوحدي..مرة خرى كلشي مشى وخلاني..كلشي..كل لشي مشاو..سدو فوجهي الباب علاش أسيدي ربي علاش..اهيء اهيء
فجأء حتى كتحس بقطرات مطر كتلامسها هزات راسها لسما كتشوف خيوط شتا كيطحو سبحان الخالق كما لو أن الغيوم حتى هي كتبكي معاها..خشات راسها وسط رجليها وبقات كتبكي وتشهق على حالها كرهات كلمة قضاء وقدر..من ديما كانت كتحبس البكية وكتبدلها بضحكة نسبة إلى أن گاع داكشي لكيوقع ماهو إلا قضاء وقدر ولكن صافي عيات تهرسات صبرها تقادا حتى الصبر بزاف كيضبر..اه بصح أنها كضحك ولكن غير حيكاش كتآمن بقضاء الله وقدره هاد الكلمة كانت كتخليها قوية..دابا ملي هاد لكلمة مشات من حياتها صافي حياتها تلاشات هي تگردات..الضربة لمتقتلكش تقويك.. هاد الضربة كانت قوية بزاف..صعيب أن الواحد يكون كابر بوحدو راه لكلمة كتبان عادية ولكن التجربة قاصحة مغيحس بيها غي لي مو ولا باه مغطي بتراب😔😔صعيب تعيش ونتا كتشوف أم كتقيس على ولدها حويج العيد..صعيب تعيش ونتا كتشوف أب هاز على كتافو ولدو..راه بصح صعيبة..صعيبة بزااف😞😥أصعب حاجة هي نتا كتألم وحتا حد مكيشوفك..أصعب حاجة هي فاش كتسنا كلمة مالك ولكن عمرك تسمعها.. أصعب حاجة هي ملي تكون محتاج ليعنقك وتلقى راسك بووحدك..ديك ساعة غتحس بمكانة ناس ضايرين بك وعايشين روتين عاادي ونتا محاملش راسك..ملي غتجي هاديك لكتسما الموت داك الروتين الممل غيمشي وغتمنى لو للحضة يرجع😞..
عنقات أسماء رجليها وهي كتبكي على قدرها المر..قدر لِخلاها تعيش طفولة ماشي بحال كل دراري صغار بينما تلعب كانت كطلب الناس باش تاكل..خلاها تعيش مراهقة ماشي كيف عادتها بينما تلبس وضور تخشات فعالم سماتو قدري الطارو كتسنى لقمة عيش من عند ناس..دابا بقات وحيدة تماما😥😥..
لمبرگيني كحلة كانت مراقبها..ضمير لأول مرة فاق من بعد وقت طويل... نظرة شفقة بقا فيه الحال على داكشي ليدار.. ولكن كان باغي غير يحميها مكانش باغيها تمشي من بين إيديه هي مدارت والو خصوصا دابا مستحيل أنه يسمح بشي حد يأديها مهما كان ثمن... واخا يعرف يقتل دنيا كاملة ويبقى غير هو وياها..مقدرش يبقى يشوف فيها هكاك..
أسماء بقات مدة كتبكي تحت قطرات المطر الساخنة..حتى فجأة دوك قطرات المطر مبقاتش كتحس بيهم ولكن باقا كتسمعهم هزات راسها وعينيها حمرين بالدموع حتى كتلقى شخص واقف شاد فوق راسها مظلة...
كان هو "شرشبيل" مبقاش بغا يشوفها كتعدب.. مبغاهاش تمرض تحت الشتا..مبغاش يبقى يشوفها بوحدها كتبكي..حيكاش هي كتبكي تم وهو كيتعدب لهيه..شي حاجة فيه كضرو..هداك قلبو لنبض ليها..قلبو لي فاق من بعد مدة طويلة..قلبو لِكيتعدب فاش كيشوفها كتألم..هداك الحب دخل حياتو وطرى داكشي لگالت ليه مو الله يرحمها..
أسماء غير شافتو ناضت وضربات ليه المضلة من إيدو حتى طاحت هو ضور راسو فجهة طيحة المظلة.. كانت معصبة خاصها فين تفرغ عصابها كانت حاقدة على كلشي على قدرها لي لَقاها بيه وبالأخص حاقدة عليه هو..
_أسماء:(كتغوت)لاش جيتي ااه لااااااش جيتي(ضرباتو لصدرو بقوة بيديها بجوج ليكانو على شكل قبضة)اهيء اهيء باغي تشوفني كنبكي..كنتعدب اهيء اهيء.. هادشي لِباغي(كضربو لصدرو)..ياك هادشي ليباغي (كتعاود ضربو هو غير كيتململ فاش كضربو كيشوف فيا بلا رد فعل عارفها مخنوقة)..تهنى راك وصلتي ليه..اهيء..اهيء..صافي هانا كنبكي مكنضحكش..ااه صافي تهنيتي واش تهنيتي (ضرباتو)ربحتي نن تتا ربحتي..اهيء اهيء😞 صافي واش فرحان دابا فرحاااان😭..هاد هادشي كامل بسبابك..(غوتات وعاودت ضرباتو)..بسبااااااابك نتاا..بسبا بسبابك نتا اهيء اهيء..(هبطات راسها لأرض وشناينفها ودموعها محبسوش كثر من الشتا لمطفاتش نارها)..بسبابك..بسبابك..دابا كلشي خلاني حتى من الطارو مشى..وهرهور حتى هو خلاني بوحدي..اهيء..اهيء عرفتي أشنو فهاد الوقيتة كنا غنكونو خارجين للشتا باش ندوشو انا وياه ومن بعد ندخلو نبدل ونعسو..كنت كنبقى نسمع صوت شتا كضرب فطارو بحال الموسيقى وكنبقى نغني باش منخافش..اهيء اهيء..نتا مغتعرفش علاش داوية أنا حيكاش حيكاش نتا فديك الوقيتة كتكون ناعس ففراشك ومغطي ولابس حويج البرد..اهيء..اهيء..ورشيدة ختي حتا هي مشات صافي الدرب كامل جرى عليا😔..مرة خرى بقيت بوحدي فهاد الدنيا بلا عائلة(هزات راسها عندو كانو عينيه مغرغرين شفق عليها بزاف عمرو تخايل أنه غيصادف شي إنسان عايش هاكا..دورات راسها بلا)أنا مدرت والو والله(شداتو من كتافو وعينيها معميين بالدموع)..عفاك گول ليهم أنا مدرت والو عفاك اهيء اهيء اهيء..عفاك..وهي تعاود ضربو لصدرو..ولكن نتا السباب نتاااا..نتا لخطفتيني انا مدرت والو نتااا...
كضرب فيه ضربات متت