يزداد عشقي لكيانك ويزداد طمعي فيك فرفقا لاجلي - الفصل 25 - بقلم همس الغلا - مكتملة | روايتك

البارت السابع والعشرون خذني لك اجعلني بعيدة عن الناس يتيمة الهوى لا اهوى سواك ولا احن لسواك ولا احكي عن سواك خذني لك وانا ممتلئة بك كن بقربي في كل خطواتي فأنا بقربك اطمئن فإني احبك لليوم للغد للعمر الذي لا يعد احبك حتى تاه مني الوصف في معاجم العشق يبحث عن كلمات عشق لم تكتب بعد فأنا كالمجنونة اهوى وجودك بـ جانبي و كأنني لم اعرف شيئا بالحياة سوى اني احبك فـ بعض مني يشتاقك وبعض مني يحتاجك وكل كلي يحبك بقلمي . . . غير رايو في الاخير واخد مفاتيحو وطلع من البيت قرر يروح لها ويتكلم معاها لاخر مرة اذا ما رضيت ترجع مارح يضغط عليها بعد كدا وطول الطريق وهوا يفكر ايش يقولها و ايش حيكون ردها و اول ما وصل استقبلوه اولادو نواف : بابا شادي شال نور ومسك نواف : عيون بابا نواف : وين كنت بابا ليش ما جيت تاخدنا ؟! شادي : كنت مشغول شوي رفاء : شادي !! شادي : كيفك ياعمة ؟! رفاء : كويسة وانت ؟! شادي : تمام رفاء : ايش عندك ؟! شادي : اقدر اكلم جنى رفاء : صعبة يا شادي بعد الي سويتو فيها ؟! شادي : بس هالمرة يا عمة رفاء : طيب اول واخر مرة شادي : الي تبيه راحت رفاء تنادي جى وهوا اتنهد بضيق يعرف جنى عنيدة و مستيل تغير راييها لو ايش ما سار ويدري انو رح يتعب معاا كثير بس يستال كل الي يسير معاه هوا الي جابو لنفسو ........................... رجعوا عالبيت وهما يضحكوا ومرة مبسوطين بالنسبة لو من زمان ما انبسط كدا وكمان من زمان ماشافا مبسوطة وتضح زي كدا وهيا كانت مبسوطة لمجرد انها معاه وجودو سعادة بالنسبة لها ودايما تحس بالامان لما تكون معاه ما تدري كيف بعدت عنو وكانت ناوية تطلع من حياتو راشد : حبيبي يلا جهزي نفسك مريم باستغراب : اجهز نفسي !! وين بروح ؟! وبعدين دوبنا راجعين راشد : ادري يا قلبي بس ابويا كلمني وهوا عازمنا اليوم مريم : اها راشد : يب يلا الحين جهزي نفسك مريم : طيب بس ممكن تساعدني ما اعرف ايش البس راشد : من عيوني مريم : تسلم لي عيونك راشد ابتسم : الله يسلمك والحين يلا روحي تروشي وانا باختار لك ايش تلبسي مريم : طيب وراحت تروش وهوا فتح الدولاب وسار يدور لها عل لبس مناسب هع .............................. لما ابوهم قال لهم عن العزيمة اتضايقت شوي لانها مو حابة تروح مو حابة تكون في نفس المكان الي يكون فيه راكان مو حابة تصادفو لانها قررت نساه خلاص وتنسى كل شي يذكرها فيه جودي : ليال ايش بك ليال : ولا شي جودي : ليلو تفكري فيه صح ليال : لا جودي : متاكدة ليال : ايوة جودي حزنت على حال اختها الي ما تعرف ايش نهاية هالحب ولا تعرف ايش حسير ........................... كانوا مرة مشغولين وحايسين كانو يبو كل شي مرتب و في مكانو من فرحتهم برجعة مريم وراشد مع بعض بس شجن للحين ضد هالشي وهادا الي زعلهم شوي لانو مهما صار بتبقى امهم دينا : ماما لسى للحين مو راضية عن الي سار دانة : ايوة ديانا : الله يستر اخاف تسوي شي لهم ريان : مارح يسير شي باذن الله تفائلو بالخير اما راكان ما كان معاهم ابدا كل تفكيرو في ليال ومايدري متى ابوه يخطبها لو وخايف ترفضو لو تقدم لها دانة : راكان راكان : هلا دانة : ايش بك مو على بعضك راكان : ولا شي دانة ابتسمت : لا تخاف اليوم لك الي تبغاه راكان : ايش قصدك ؟! دانة : اليوم بابا بيكلم ابوها راكان : احلفي دانة : والله راكان حضنها : مو مصدق الكل : ههههههههههههه دانيا : صدق صدق وراح يكشخ وهوا مبسوط واخيرا رح يسير الي يبغاه وكمان سار يدعي ان ليال توافق علي وما يدري انها تحبو زي ما هوا يحبها ......................... يأس خلاص منها مرة ما قدر يغير لها رايها صحيح هوا غلط بحقها بس هوا ندمان مرة وكما معترف بغلطو جنى لعت فيه وشافتو يلعب مع الاولاد حزنت عليه وحن قلبها وهيا تشوف عيالها متعلقين بابوهم مهما صار ما تقدر تحرم الاولاد من ابوهم جنى : شادي شادي : هلا جنى : اعطيني فترة افكر فيها شادي : ماشي خدي الوقت الي حتاجيه .. ولف يكلم عيالو .. يلا بابا انا حروح الحين ماشي اسمعو كلام الماما ولا تعبوها نور ونواف : حاضر بابا خرج وهوا متفائل شوي دام قالت لو بفكر احتمال كبير تغير رايها وترجع لو ............................. وصل الكل على بيت ابو راشد وبعدين حلا وشهد وعهد اقترحوا انهم يطلعو ويروح البحر والكل وافق وركبوا في سياراتهم واتحركوا للبحر فرشوا الفرشات وجلسوا كلهم سوا وكان كلهم يطالعوا فيهم باستغراب لانو عددهم كبير ميار : اهنيك على هالفكرة الجميلة و الجو مرة جميل ويشجع سراء : ايوة مرة يشجع علاء : من زمان ما طلعنا كلنا مع بعض كدا ريان : ايوة من يوم الاستراحة حسام : ياخي بس خلاص سيب البنت في حالها تراها اختنا كمان واحنا كمان نبغاها زياد : انا ادري لاصق فيها بس ياخي اثقل راشد : وانتو وش عليكم واحد وزوجتو عماد : ياخي نبغى نقعد شوي مع اختنا مو كدا مريم : ما عليك فيهم طنش حسام : شوف بايعتنا هالبنت عزام : ههههههههههههههههه تستاهلوا لانكم من اول وانتو تستفزو راشد تحملو ريان : مو بس راشد ترى كل المتزوجين مسوين نفس الشي ما لاحظتو عماد : يب يب يحسسوك انهم اول مرة يشوفو زوجاتهم زياد : من جد ياخي علي قام هوا وميرا يتمشوا وكان ماسك ايدها عادل بصراخ : يا عيني ياعيني ما اقدر انا . ورجع يكلم الشباب .. ودا اول واحد قام مريم : راشد راشد : لبيه يا عيونه مريم : عادي اروح مع البنات راشد : وين رايحين مريم : حنروح نشتري ايسكريم وبنتمشى شوي وبعدين حنرجع راشد : اوك حبيبي بس لا تتاخري مريم : ماشي وقامت معاهم بس سيارة الايسكريك كانت في الجهة الثانية من الشارع فقطعوا الشارع عشان يشتروا وهما راجعين اتوسخ كم عباية مريم و وقفت تمسحها وهيا تمسح العباية كان في سيارة مسرعة جاية و مريم ما انتبهت لها بس راشد انتبه راشد : مريم انتبهي حسام : مريم ابعدي مريم اتوترت وما عرفت ايش تسوي وجات السيارة مسرعة و طاااااااااااااااااااااااا خ طااااااااااااااااار عزام في الهواء وطاااح على الارض عزام قدر يلحق مريم ويوخرها بس ما قدر يبعد مريم بصدمة : عزام كلهم جو جري : عزام راشد : اتصلو بالاسعاف بسرعة مريم : عزام عزام .. و اغمى عليها .. حسام : مريم وجات سيار الاسعاف ونقلو مريم وعزام على المستشفى دخلوا عزام غرفة العمليات ومريم عند الدكتورة تفحصها خرجت الدكتورة من عند مريم راشد : دكتورة طمنينا كيفها مريم الدكتورة : مع الاسف المريضة جاها انهيار عصبي انصدموا يعني مريم وعزام كمان وبعد ساعتين خرج الدكتور من غرفة العمليات وكلهم اتجهو للدكتور الدكتور : احنا سوينا كل الي علينا بس سعيد : بس ايش الدكتور : المريض دخل في غيبوبة كلهم انصدموا ملاك : لا هوا يكذب ابني ما في شي ابني حيقوم حسام : امي ادعيلو ملاك : اخوك ما فيه شي اخوك الحن حيقوم سعيد اتنهد بضيق وما عرف ايش يسوي راشد نفس الشي خصوصا انو ما صار في عزام كدا الا لانو انقذ مريم ولا كان راحت فيها وكان شايل همها لو عرفت ايش حيسير فيها وسيم : حسام شيل امك وابوك و وديهم البيت يرتاحوا وبكرة يجو يشوفوه احسن عماد : زياد روح معاهم وانا بجلس عندو راشد : لا كلكم روحو وانا بقعد هنا سعيد : ما يسير يا ابني انت خلي عند مريم وعماد يقعد عند اخوه راشد : لا يا عم انا كدا كدا بجلس هنا وكمان هادا اقل شي اسويه لو بعد الي سواه سعيد : لا يا ولدي عزام ما سوى الا واجبو لا تنسى ان مريم اختو وراحوا كلهم وبقي راشد نهاية البارت توقعاتكم ادري ان البارت قصير بس دا الي قدرت اكتبو وان شاء الله اعوضكم الاسبوع الجاي همـــ الغلا ــس