قرابين جهنم - فصل 4 والاخير - مكتملة | روايتك

لقيت جابر ظهر من العدم بس المرة دي كان معاه شوال وطالع منه صوت أنين سألته اي ده؟ قلى _ ده القربان يا إسماعيل.. إطلع على المقبرة دلوقتي _ دلوقتي بس الوقت متأخر شوية _ إطلع دلوقتي على المقبرة يا إسماعيل _ حاضر ... أتحركت وأنا ايدى بتترعش.. ووصلت قدام المقبرة اول ما نزلت لقيت السلم ظاهر.. ولقيت جابر بيقولى انزل بالشوال تحت أخدت الشوال ونزلت بيه تحت في المقبرة.. جابر اتكلم وقال افتح الشوال فتحته.. كان جواه بنت صغيره زي القمر.. أتكلم جابر وقال _ يلا.. يلا يا إسماعيل خلص _ أخلص أي؟ _اقتلها يا إسماعيل _ لا لا.. أنت بتقول أي؟ _ أقتلها يا إسماعيل بقولك.. وإلا.. _ خلاص خلاص.. مسكت سكينة كانت جمب الشوال ودبحتها ... كنت بعيط وانا بعمل كده ومكنتش قادر بس كان غصب عنى.. خرجنا من المقبرة وانا منهار وخايف وركبت التاكس.. لقيت جمبي شنطة مليانة فلوس عرفت ان دي المكافأة رجعت البيت وانا مش مصدق أني عملت كده.. بس الموضوع منتهاش أنا كنت كل يوم بشوف جابر ومعاه شوال جديد وكل يوم يتكرر نفس السناريو الفلوس مبقاش ليها نهاية.. قلبى مات بقيت بنفذ اللي بيطلب منى زي الانسان الالى واخد الفلوس ظبطت نفسي جبت بيت كبير ودخلت عيالى احدث مدارس وبقيت غنى جداً لكن الكوابيس مبقتش سيبانى.. كنت بشوفهم وهما بيحاولوا يقتلونى في احلامى مكنتش قادر استحمل ده..معرفش كان احساس بالشبع ولا عدم القدرة على التحمل بس لقتنى بجيب سجادة الصلاة وبصلى وبسجد لربنا وبقوله سامحنى انا مش هعمل كده تاني ... أنا خلاص قررت أتوب يمكن أفوق من الكوابيس اللي انا فيها دي.. بس هو قلى أن الطريق ملهوش رجوع ومش كده وبس ده هددني بموت مراتى وعيالى دخلت نمت فى اليوم وأنا مش عارف أفكر... صحيت على حاجة لزجة في ايدى.. اتعدلت عشان انط من مكاني من الفزع ايدي وهدومي كانوا غرقانين دم.. وقدامي على الكرسي اكتر منظر مرعب شوفته في حياتي.. مراتي علي الكرسي مدبوحة وعلي الارض عيالى مدبوحين بنفس الطريقه... وقعت على الأرض من الصدمة ورجليا سابت أنا حاسس أنى أتشليت وفى الوقت سمعت صوت بيقولى جربت فراقهم يا إسماعيل.. أنا قولتلك بلاش تتحداني .. المرة دي مش كابوس.. المرة دي بجد مراتى وعيالى ماتوا بسبب طمعى وغبائى فضلت على وضع الشلل ده لحد ما الباب أتفتح ولقيت الشرطة داخلة عليا.. معرفش مين بلغهم؟ مفيش منطق للى حصل من أول الحكاية أتقبض عليا بس انا مدفعتش عن نفسي يا جماعة.. مدفعتش عن نفسي انا اعترفت بكل الجرايم اللي عملتها واعترفت بقتل مراتى وعيالى رغم اني مقتلتهمش اتحكم عليا بالاعدام.. ومن اول جلسة لانى معترف بس هما مستنوش التنفيذ... انا بمجرد ما دخلت الحبس الانفرادي شوفتهم ... السلام عليكم أنا المأمور سيد علي مأمور السجن أنا لقيت القصة دي على ورق جمب جثة إسماعيل اللي كانت مفصولة الرأس الله اعلم اللي مكتوب ده حصل ولا لأ؟ بس الغريب أن مفيش حد هيقدر يدبح نفسه بالشكل ده... اظن انه اتقتل بس مش معنى كده انى مصدقه.. أنتوا اي رأيكم هو اتقتل بفعل فاعل.. ولا الكلام اللي كتبه ممكن يكون حصل؟ ... تمت ...