الفصل السادس: الطعم خرج من الجحر
الفصل السادس: الطُعم خرج من الجحر
ليان فتحت الرسالة المشفّرة مرة تانية.
"تم رصد محاولة اختراق من مصدر مجهول على قاعدة بيانات قديمة تخص عملية (G-47)."
G-47؟
الاسم دا محفور في ذاكرتها زي الجرح… هو نفس الكود اللي كان مطبوع على الملف اللي شافته وهي في دار الرعاية… نفس العملية اللي قالوا إن أمها اختفت فيها.
بدأت أناملها تتحرك تلقائيًا. جهازها الخاص متوصّل بشبكة جانبية، ماحدش في الأكاديمية يعرف إنها شغالة عليها.
في ثواني، دخلت قاعدة بيانات مهجورة، كانت محمية بثلاث جدران نارية.
لكن بالنسبة لليان؟ ده كان زي لعبة شطرنج سهلة.
ما إن اخترقت الملف، حتى ظهر اسم مألوف قديم جدًا:
"الرائد/ جمال الصفواني – ضابط مسؤول عن العملية الميدانية (G-47)."
اتجمدت أنفاسها.
الصفواني؟! الاسم ما كانش غريب…
فتحت سجل العائلة… الرائد جمال… والد رائد الصفواني.
القائد اللي بيراقبها كل يوم، وعيونه بترصدها كأنها شفافة.
اتكأت ليان على الحائط، تحاول توازن عقلها اللي بدأ يشتغل بسرعة مرعبة.
"أنا داخلة جوه عش الدبابير من غير ما أعرف… وهو؟ ممكن يكون ابن اللي دفن الحقيقة."
لكنها كانت أذكى من إنها تستنتج بناءً على تشابه أسماء.
فتحت ملفات إضافية، واستخرجت تسجيلًا صوتيًا مشفّر بتاريخ قديم.
[صوت رجل]: "الهدف الأنثوي رفض التعاون… ابنتها كانت حاضرة. تم محو كل الأدلة، والتعامل مع الوضع."
الابنة… هي.
كان فيه شهود، وكان فيه حذف متعمّد… مش فقد، ولا اختطاف… دي كانت خيانة على مستوى دولة.
لكن الأغرب؟
في آخر الملف، ظهر توقيع رقمي لمن أرسل التقرير النهائي… شخص يستخدم اسمًا مستعارًا:
"النسر الأسود."
رفعت حاجبها.
"نسر؟ مصادفة؟ ولا فيه أكتر من واحد بيراقبني من السماء؟"
---
في اليوم التالي، الأكاديمية.
رائد واقف في مكتبه، يراجع تقارير عن أداء الطلاب. ملف ليان قدامه، أداء مثالي، اختراقات مبهرة، لكن في حاجة مش مريحة.
دخلت ليان بهدوء وقالت:
"كنت عايزة أطلب إذن مؤقت بالخروج ساعتين."
نظر لها بشك.
"ليه؟"
قالت بنبرة ثابتة:
"حاجة شخصية… وممكن تهمك لو قررت تصدقني."
صمت لحظة، ثم قال:
"موافقة. بس لو هتلعبي نار… متلوميش غير نفسك."
---
ليان خرجت من الباب، والمهمة الحقيقية بدأت.
---