الحلقه 5
*📚🖤🪐*
*❴📖❵↵* عذاب القبر😈
*❴🔢❵☟الـــبـــــــــــ5️⃣ ❵ــــــــــــارت☟*
➖➖➖➖➖➖➖➖➖
*
*زائر (الكاتبة المجهول) 📖:
الجزء الخامس
قطع كلامي صوت مامتها اللي قالت لي وهي بتبكي: "هايدي ماتت يا بنتي،..هايدي ماتت"
الكلمة نزلت عليا زي الصاعقة كنت مصدومة وخايفه في نفس الوقت:"اهدي اهدي يا طنط انا جيالك حالا"
قفلت معاها وروحت عند الدولاب, بس وانا بطلع هدوم لقيت الفلوس كلها محروقه رغم ان الشنطة سليمة تماما، فضلت مبرقة في ذهول، ازاي ده حصل؟! لكن ما اخدتش وقت كبير في التفكير، غيرت هدومي ونزلت من البيت بسرعة، خدت تاكسي وروحت علي الفيلا بتاعة هايدي، واول ما وصلت لقيت الشرطة ووالدتها ووالدها منهارين البكاء، قولت لوالدتها وانا ركبي بتخبط في بعضها:
-هو ايه اللي حصل يا طنط؟
=امبارح بليل كنت قاعدة في الليفنج روم بتفرج علي التلفزيون وفجأة, سمعت صوت هبده قوية جايه من أوضة هايدي، قومت جري انا وابوها مخضوضين، واول ما فتحنا أوضتها اخدنا الصدمة اللي هتفضل كاسرة ضهرنا لحد ما نموت.. لقينا هايدي متعلقة من رقبتها في السقف, والكرسي واقع علي الأرض، انا مش عارفة ليه تعمل في نفسها وفينا كده، ليه تنتحر وتخسر دنيتها واخرتها.
كنت بسمع الكلام ده وانا عارفه انها ما انتحرتش.. هايدي مكنش عندها مشاكل نفسية، كانت علي طول مبسوطة وحياتها مرفهه، لكن انا واثقة ان اللي حصلها ده بسبب قوة خفية هي اللي وصلتها انها تعمل كده في نفسها بدون اراده منها بسبب اللي عملناه امبارح، يبقي كده الدور عليا انا, يا تري هيحصل فيا ايه؟
طبعا القضية اتسجلت انها انتحار، فضلت مع اهل هايدي لحد ما اتغسلت وبعدين صلينا عليها ودفناها, وكان العزا تاني يوم، روحت البيت وانا جوايا مشاعر كتير متلخبطه، حاسه بخوف وحزن وغضب.. اول ما دخلت الشقة لقيت امي قاعدة مستنياني، وبتقولي: ربنا يرحمها ويغفر لها ويصبر اهلها.
بصيت لأمي بحزن ممزوج بخوف, بصراحة مكنش علي هايدي, كان علي نفسي واللي ممكن يحصلي، دخلت أوضتي من غير ما نطق بحرف، قعدت علي السرير وانا بتلفت حواليا وخايفه, ومن كتر التفكير النوم غلبني ونمت..
صحيت من النوم وانا حاسة بعطش شديد، قومت وروحت علي المطبخ شربت ورجعت علي أوضتي تاني عشان اكمل نوم، فردت جسمي علي السرير, بس قبل ما اغمض عيني وانام، مسكت الموبايل من جنبي عشان اشوف الساعة كام، ايه ده معقول.. الساعة اتنين الفجر؟! المشكلة مش في كده، المشكلة ان في نور طالع من الشباك!.. اتخضيت وجريت بسرعة فتحت الشباك، ماكنتش شايفه حاجة خالص لأني لقيت الشباك عبارة عن شاشة بيضة! ماكنتش فاهمه ايه اللي بيحصل، جريت ودخلت أوضة أمي وفضلت اصحي فيها بس هي مش بتصحي، رغم ان نومها خفيف، دي لو نملة عدت من جنبها بتصحي.. لكن فجأة لقيتها صحيت مخضوضة وهي حطه ايدها علي قلبها وبتتنفس بصعوبة وكأنها شافت كابوس, وبتقول:
-يا ساتر يا رب، اللهم اجعله خير.
فضلت اكلمها لكنها مش سمعاني، دي حتي مش حاسة بوجودي، جيت المسها اتفاجئت ان ايدي شبه اخترقتها، ايه الرعب ده؟ امي قامت وخرجت من الأوضة ودخلت أوضتي وانا وراها، بس.. بس، ايه ده، في حد نايم علي سريري؟ ده مش حد ده انا!!! لقيت أمي بدأت تصحيني، لكني كنت بصه للسقف ومبرقة، مش بتحرك ولا حتي بنطق، معقول اكون مت؟ لا لا مستحيل, اكيد ده كابوس وهصحي منه.. أمي بدأت تعيط وجريت علي التليفون كلمت خالي: "الحقني يا ياسر الحقني بسرعة، ايمان عماله اصحيها لا بتتحرك ولا بتتنفس، هات دكتور وتعالي بسرعة انا مش قادرة اتلم علي اعصابي.
في اللحظة دي انا ما خوفتش بس من الموت، انا كنت خايفة من لقاء ربنا، ازاي هقابله وانا كنت بعصيه، ده غير اني ميته كاف$رة، ماهو اللي مش بيصلي كا$فر، ده حتي امي ياما كنت بأذييها وبجرحها ودايما كانت بتبكي بسببي، ازاي هقابل ربنا وانا كلي ذنوب..
بعد نص ساعة تقريبا, خالي جه ومعاه الدكتور، ولما كشف عليا كانت الصدمة لما قالهم: البقاء لله ربنا يصبركم.
اول ما قال الجملة دي فضلت انده علي امي وخالي بهيستريا، واقولهم انا هنا، انا واقفة قصادكم، انا ماموتش. لكنهم مش سامعني ولا شايفني، انا بقيت مجرد سراب.. عمي خرج من الأوضة وانا واقفة قصاد امي اللي كانت حضنه جثتي وبتبكي بحرقة، وانا بصه لها بحزن والدموع مغرقة وشي، والخوف مسيطر عليا، يارتني يا امي ارجع للحياة من تاني وانا هعوضك عن كل اللي عملته فيكي، وهصلح كل حاجة غلط عملتها.. وبعد ساعة تقريبا لقيت عمي داخل ومعاه المُغسلة واتنين تانين عشان يساعدوها، خالي شالني من علي السرير وحطني علي الغسل، وبعدين خرج من الأوضة وقفل الباب وراه، بقيت واقفه شايفه نفسي وانا بتغسل، عقلي مش قادر يستوعب اني خلاص مت، بقيت انده عليهم بعلو صوتي والمسهم لكن بلا فائدة..
خلص الغسل واتكفنت وحطوني جوه الخشبة، وجوم رجالة وشالوني مع خالي, وسط بكاء امي وصراخ بعض الحاضرين من قرايبي اللي جوم اول ما عرفوا خبر موتي..
*******الكاتبة. المجهول ❤***