الفصل 13
*⤶صـ𓂆ـلِّ علـىٰ النبـي يـا ذووق🌟♡゙>>.*
*ࢪوايةة : جنـةة الدُنيـا💚🌎»»*
*((الفصــــ★ــل"13"))♡゙//*
يلااااا نصلى ع الرسول وندخل ع قصتنا ع طوووول🌹🌺
#جنه_الدنيا_جيهان_سلامه
#محبه_الرحمن
اللهم تقواك وجنتك ورضاك🤲
الحلقه (١٣)🌹
ابتسام: يعنى يا دكتوره محصلش حاجه للبيبى
فى بطنى... اصلى وقعت وقعه جامده اوى
الدكتوره: لاء الحمد لله ربنا ستر
بس مش معنى كده انك تتعبى نفسك
الاحسن ترتاحى ومتعمليش مجهود
ربنا سترها المرادى ومش ضامنه المره الجايه
ممكن يحصل ايه ..وعلى العموم أنا كتبتلك على
دوا مثبت احتياطى ..بس الراحه مهمه بردوا
وبالذات فى الشهور دى
ام ابتسام: ربنا يطمن قلبك يا دكنوره
ابتسام: طب معلش يا دكتوره ممكن تكتبيلى كده
على شويه فيتامينات... عشان حاسه انى
ضعيفه ونفسى مسدوده على طول ومش باكل كويس
وكمان البيبى عاوزاه يكبر كده وينزل ملظلظ😁
الدكتوره: ما انا كنت لسه كتبالك المره اللى فاتت... ..هما لحقوا خلصوا
ابتسام: لاء لسه ...بس لو فى انواع احسن واغلى مش مهم اكتبى
انا ميهمنيش الفلوس... المهم صحتى انا وابنى
إلا صحيح يا دكتوره ...هو نوع المولود بان ولا لسه
المره اللى فاتت قولتيلى مش باين
وكويس انى افتكرت دلوقتى انى اسألك
الدكتوره: لاء يا ستى بان خلاص....بنوته بإذن الله
😊
ابتسام بعصبيه: ايييه ....بت😡
ام إبتسام بزعل : يا عينى على بختك يا بنتى 😞
الدكتوره: ليه بس يا حاجه ....دى البنات نعمه
واظن إن ابتسام كانت اول مولوده ليكى
ام ابتسام: اه.. اول خلفه.... بس كنت بردوا زعلانه لما عرفت انها بت😠
ابتسام :بقا زعلتى انى كنت اول خلفتك
طب كنتى إوئدينى احسن زى الكفار 😠
ام ابتسام وهى بتضحك: يابت ما حبيتك بعد
كده ..هو فى حد يكره ضناه بردوا😀
ابتسام بزعل: طب يعنى يا دكتوره انتى متأكده
انها بت.... ولا شاكه لسه....ولا ايه
الدكتوره : لاء متأكده....بس شكلك انتى اللى زعلتى
ابتسام بزعل: لاء طبعا وهزعل ليه...كل اللى يجيبه ربنا كويس
على العموم شكرا يا دكتوره ...ومعادنا كمان
اسبوعين زى ما هو.... صح كده
الدكتوره: ايوه بإذن الله.....وحاولى ترتاحى على أد ما تقدرى ومتعمليش مجهود
ابتسام: حاضر....😞
ام إبتسام: شكرا يا دكتوره....سلامو عليكو
الدكتوره: عليكم السلام ورحمه الله
وخرجوا من العياده والاتنين زعلانين😞😞
ابتسام: وانا اللى قاعده اغيظهم واقولهم
الواد ..الواد ...تطلعلى فى الاخر بت 😠
ده حظ ايه ده بس ياربى
ام ابتسام: خلاص بقا هتعملى ايه يعنى
نصيبك كده
المهم انتى متزعليش نفسك
ابتسام: مزعلش نفسى ازى بس يامه...ده انا
هطق😡....مش عارفه اقول لصلاح وامه ايه بس
ام إبتسام: ولا تقولى اي حاجه.....وخليكى زى ما انتى ...وعرفيهم إن الدكتوره قالتلك واد ..ولما تولدى نقولهم الدكتوره غلطت....عادى يعنى بتحصل
ابتسام: تصدقى صح.......انا فعلا هقولهم كده
لحسن يكونوا زى الصعايده بيحبوا الصبيان
بقولك ايه...ما تيجى تعزمنى على كوبية عصير قصب ...ريقى ناشف
ام ابتسام: يختى متعزمينى انتى😠انتى كيسك مليان اد كده اهو
ابتسام بصيت لامها بغيظ: الله اكبر انتى هتحسدنى يامه ولا ايه
ام إبتسام بنرفزه: احسدك ده ايه يا بت😠
لمى لسانك ده شويه
ابتسام: طب خلاص متزعليش
تعالى اعزمك انا وامرى لله🤨
سلامو عليكو يا حاج .....تشربى ايه
ام ابتسام: اشرب مانجه...نفسى فيها اوى😁
ابتسام بصيت لامها ومردتيتش عليها🤨
بكام المانجه يا حاج
الحاج:ب خمسه جنيه الكوبيه الصغيره والوسط
ب ٧ والكوييه الكبيره ب ١٠
ابتسام بدون تفكير ...إدينى اتنين عصير قصب
ابو ٢ جنيه😒
ام ابتسام: 😡
*****************************
سهام: بنرفزه....يا بت اعدلى رجلك كده والبسى
الكوتشى عدل ..ضهرى وجعنى
وضربتها على راسها😠
ليلى: ليه بس كده يا سهام....براحه عليها
اوعى انتى وانا هلبسهولها.....وبطلى ضربك ده فيها كل شويه حرام عليكى.....تعالى يا حبيبة خالتو
الرجل الحلوة دى تلبس الكوتشى ازاااااى😁
ايوه كده.. شطوره يا بيبه...وباستها🥰
سهام: ده انتى اللى شطوره يا لولو والله
ده انا بيطلع عين امى ..وانا بلبسهولها
وبصيت لأمها.وضحكت... لامؤخذه يا ماما😀
ام ليلى: لمؤخذتك معاكى يختى ....بس خفى انتى على البت شويه ....مش كل شويه ضرب ضرب
حرام عليكى ..البت ضعيفه ومش قد ضربك فيها كل شويه
ليلى حضنت حبيبه : ايه ده يا بيبه.....هى اماه بتضربك كل شويه
حبيبه هزت رأسها وصعب عليها نفسها 🥺
اضبنى أء أءه إناا.......وشاورت على راسها وعيطت 😩
ليلى: معلش يا حبيبة خالتو متزعليش
انا هضربهالك......امشى يا سهام يا وحشه
اوعى تضربى بيبه تانى
سهام: حاضر😀.....ده انتى لما هتبقى ام يا لولو
هتبقى طيبه اوى على ولادك 😁
ليلى: اصل حرام...البنت لسه صغيره ....بلاش الضرب فيها كل شويه على كل حاجه كده
جربى كده واعملى عقلك بعقلها شويه هتلاقى نفسك استمتعتى بنتك وفهمتى هى عاوزة ايه
لكن مش كل شويه ضرب وزعيق
وأوعى كمان تكونى بتضربيها بالقلم على وشها
ام ليلى: دى على طول.......دى لسه مديها حتة قلم من شويه خليت البت نفسها اتقطع يا حبه عينى من العياط.........وليه
عشان وقعت كوبية اللبن على الارض
ليلى: ليه كده بس....اتقى الله حرام عليكى ..غيرك بيتمنى عيل وانتى مستهتره بنعمه ربنا إدهالك
تعرفى إنك كده وقعتى فى معصيه كبيره
سهام وهى بتعدل طرحتها....معصيه ايه بقا
ليلى : حبيبنا الرسول صلَّ الله عليه وسلم نهى عن الضرب على الوجه
عَنْ أَبِي هُرَيْرَةَ، قَالَ: قَالَ رَسُولُ اللَّهِ صَلَّى اللَّهُ
عَلَيْهِ وَسَلَّمَ: "إِذَا ضَرَبَ أَحَدُكُمْ فَلْيَجْتَنِبِ الْوَجْهَ،
وَلا يَقُلْ قَبَّحَ اللَّهُ وَجْهَكَ وَوَجْهَ مَنْ أَشْبَهَ وَجْهَكَ؛
فَإِنَّ اللَّهَ عَزَّ وَجَلَّ خَلَقَ آدَمَ عَلَى صُورَتِهِ".
سهام: قعدت على الكنبه وربعت رجلها.....لااااء
ترجمى كده وفهمينى وحده وحده الله يباركلك
ليلى: الرسول صل الله عليه وسلم
نهانا عن الضرب على الوجه لان ربنا خلق سيدنا
ادم على صورته عز وجل...فمينفعش تمدى ايدك
علي وشها نهائى .......ده غير كمان علميا
الضرب على الوش بيسبب مشاكل صحية كتير
وعملوا دراسه وبينت ان الضرب على الرأس والوش بيسبب بعض الأمراض العصبية زى: شلل الرعاش والزهايمر
نسأل الله العافيه.....هاااا.....كفايه كده ولا اقول كمان
سهام شدت بنتها وأخدتها فى حضنها
يا حبيبتى يا بنتى...لاء يختى خلاص توبه مش هضربها تانى ابداااااا
هشد شعرها بس 😀
ليلى وامها..😀😀
ليلى: يا سهام يا حبيبتى حافظى على النعمه اللى غيرك بيتمناها علشان ربنا يباركلك فيها😊
اسماء خارجه من الاوضه وهى بتتاوب
هى الساعه كام دلوقتى.....🥱
ايه ده.... انتى ماشيه يا سمسم ولا ايه
سهام: اه ماشيه كفايه اوى كده
وكمان لسه هعدى على السوق اشترى شوية طلبات ...بس ايه النوم ده كله
اسماء: امك السبب...الفته بتاعتها بالخل والتوم خليتنى اتبنجت ومحستش بنفسى بعدها
ام ليلى: وانا اعملك ايه.....ما انتى اللى كلتى نص الصنيه كلها لوحدك😀
اسماء: ما انتى اللى عاملها حلوة يا حماتى تسلم ايدك 😁.......هو الواد فين
ليلى: نام يا حبيبى من بدرى وحطيته على سريرى جوه
اسماء: الله يخليكى يا طنط ...بلاش تأكليها
لعصام لما يجى ..لينام وميخرجنيش زى ما وعدنى.. ابوس ايدك
ام ليلى: لاء يختى ..الا حبيب قلبى ده لازم يدوق منها..😏
اسماء: كده تبقى باظت الخروجه على ايدك
ماشى يا طنط ...الف شكر😠
اما اقوم اصلى العشا لحسن اكسل عنها
هو محدش صحانى ليه اصليها
ليلى: يا بنتى لا حرج عليكى لانك كنتى نايمه
اسماء دخلت اتوضيت........وخارجه وهى بتفرك فى ايديها
هى ايدى مالها كده زى ما يكون مدهونه سمن
ليلى: انتى كنتى حاطه كريم او مرهم على ايدك
أسماء: اه ...كنت حاطه كريم على ايدى ووشى قبل ما انام
ليلى: لاء يا حبيبتى ..لازم قبل الوضوء تغسيلى
ايدك ووشك بالصابون كويس من الكريم
لان ده طبقه عازله لمية الوضوء ...
واتوضى بعد كده
سهام: طب لو حاطه زيت فى شعرى وعاوزة
اغتسل لاى امر مثلا ..اعمل كده بردوا
ليلى: طبعا ...لان الغسل مهم جدا
لازم تغسلى الاول شعرك بالصابون او بالشامبو
وتشيلى الماده الدهنيه الاول اللى فيه
ولو بردوا فى كريم فى ايدك او رجلك لازم
يتغسلوا كويس جدا وبعدين اعملى خطوات الغسل بتاعك عادى
اسماء: أدينى غسلت ايدى ووشى كويس اهو واتوضيت تانى .......اما أدخل اصلى بقا
سهام: منك نستفيد يا ست لولو..😁
ام ليلى كانت قاعده سرحانه وبتفكر تقول لليلى ازاى على رفضها للشيخ محمد 🤔
اه صحيح ....كنت عاوزه اقولك على حاجه كده يا ليلى
ليلى حسيت ان الحاجه دى تخص الشيخ محمد وقلبها دق بفرحه .....نعم يا امى😊
سهام واسماء بصوا لبعض بزعل وفهموا هتقولها ايه😒😒
ام ليلى: من غير زعل يا بنتى ....ملكيش نصيب
فى جوازة الشيخ محمد .. معلش متزعليش نفسك
ليلى اتصدمت من اللى سمعته من امها
والضحكه اللى كانت على وشها اختفت مره واحده....ومعرفتش تتكلم 🥺
سهام: معلش يا حبيبتى...ربنا يرزقك بالاحسن منه
ليلى بحزن من جواها: مفيش احسن من الشيخ محمد 😔
اسماء: يختى متزعليش نفسى ....ده هو اللى خسرك
ليلى بحزن: الحمدلله....قدر الله وماشاء الله 😞
بس انتو عرفتوا ازاى
ام ليلى :ابدااا....اتصل بأخوكى وقاله كل شئ قسمه ونصيب
قال رضينا بالهم .....والهم مرضيش بينا😏
ليلى بتحاول تمسك دموعها: استغفرى الله يا امى
الشيخ محمد ما شاء الله عليه فعلا يستاهل احسن منى بكتير... ربنا يرزقه بالزوجه الصالحه 🥺
ومسكت دموعها قدامهم بالعافيه....وقامت تجرى على اوضتها بسرعه
واول ما دخلت لبست اسدلها وسجدت لله
وفضلت تعيط وهى منهاره.... وتدعى ربها بدعاء سيدنا يعقوب
إنما اشكو بثى وحزنى الى الله😭
إنما اشكو بثى وحزنى الى الله😭
وفضلت تردده كتير وهى منهاره😭
.
.
اسماء : الله يسامحك يا طنط ....ليه بس كسرتى بخاطرها كده😠
كان باين عليها اوى انها عاوزاه وفرحانه به
سهام: لاء بقولكوا ايه.....انا اختى صعبت عليا اوى
انا هدخل اقولها واللى يحصل يحصل بقاااا
ام ليلى بزعيق: اسمعوا بقا انتو الجووووز 😡
حسك عينك منك ليها تقولولها حاجه
وكلمتى هى اللى هتمشى على الكل
وزمان عصام اتصل بيه وقاله😠
يعنى الموضوع ده اتقفل على كده خلاص
واللى مش عاجبها كلامى. الباب اهو يفوت جمل 😡
الباب اتفتح.......ودخل عصام
ايه فى ايه ....بتزعقى ليه كده بس يا حاجه
وبص لاسماء...عملتى ايه يا أسماء لامى زعلها منك اوى كده
اسماء بغيظ: هو مفيش غير اسماء...على طول ظلمنى إنت كده😠
ام ليلى: محدش عمل حاجه يا بنى......المهم
قولى ...اتصلت بالعريس وقفلت معاه الموضوع
زى ما فهمتك
عصام فهم سبب زعيقها😒 الصراحه اااا..... لاء
ام ليلى: نعم يا خويا....لاااااء .....وليه بقى ان شاء الله....انت عاوز تكسر كلمتى انت كمان ولا ايه 🤨
عصام: يا ستى ولا اكسرها ولا حاجه
بس منه لله الحرامى اللى سرق الموبيل بتاعى😠
اسماء ضربت بإيدها على صدرها😳
اتسرق يا ناصح...اتارى بتصل بيك طول النار مقفول.......فالح طول عمرك😏
عصام: بقولك ايه يا اسماااااء....لمى لسانك ده انا مش ناقصك 😠
ام ليلى: واتسرق منك ازاى ده😲
عصام: زبون ابن حرام دخل عليا بعد ما كلمتك
وبعد ما مشى لقيت التليفون اختفى...وفضلت ارن عليه من تليفون زبون...بيدينى مقفول
وطول النهار متنكد بسبب😠
ام ليلى:ولا تتنكد ولا حاجه ...فداك يا حبيبى
اسماء: فداه ايه بس ...ده لسه جايبه بخمس
تلاف جنيه من ٦ شهور ...وقسط كمان
ام ليلى بنرفزه: مافى داهيه يختى ....المهم إن ابنى كويس ....وبطلى بقى كلامك اللى يسم البدن ده
فداك الف تليفون يا حبيبي
عصام بص لمراته 😒شايفه الكلام اللى يهون على الواحد.......اتعلمى😠
ام ليلى بنرفزه: يعنى العريس بقا على كده معرفش اننا رفضناه😠
عصام: مش بقولك اتسرق بعد ما كلمتك .....اكيد ده ذنب الراجل......ما قولتلك بلااااااش
ام ليلى: انا خلاص قولت لاختك والموضوع انتهى
وكده بردوا كويس ...عشان لو اتصل بيك هيلاقى التليفون مقفول وهيفهم من نفسه إنه اترفض
ربنا مبيعملش حاجه وحشه ابدا
سهام مش عاجبها كلام امها😠
اما اقوم اشوف البت اللى جوه دى ..زمان عنيها
اتفحمت من العياط يا حبة عينى
اسماء : خدينى معاكى اطمن عليها انا كمان
وبصوت واطى
الله يسامح اللى كان السبب😒
ام ليلى: بتقولى حاجه يا اسمااااء🤨
اسماء: بدعيلك من قلبى تحجى يا حماتشى😡
ام ليلى: امين يختى😏
عصام: لاء ادخلى الأول حضريلى الأكل لحسن ميت من الجوع
ام ليلى : لاء يا حبيبى سيبها تدخل هى لاختك
وهقوم أعملك أنا الفته من إيدى 😁
وطبطت على كتفه
روق بقى كده ومتزعلش نفسك... فداك الف تليفون يا عين امك 😁.....وبصوت واطى
ولا يهمك يا واد ...هبقى أديك تجيب غيره
عصام بفرحه: بجد 😁 ومسك ايديها باسها
ربنا يخليكى ليا يا قمر إنت يا جميل😁
طب بالمره وانتى راضيه عنى كده ...ما بلاش
موضوع فركشة الجوازه دى ...انا حاسس إنها
السبب فى سرقة التليفون منى
ام ليلى وشها اتغير😡طب إيه رأيك بقااااا
مفيش فلوس....ولا فى فته كمان
وارتاح بقاااا....هه😡
******************************
ام محمد: ايه يا بنى طمنى.....اتصلوا
الشيخ محمد بزعل: لاء يا امى محدش اتصل
وتليفون اخوها مقفول طول اليوم
يعنى الموضوع اتفهم خلاص.....😞
العم: يا ابنى ما يمكن مفيش شبكه عنده
مرات العم: انا بردوا بقول كده........يا ابنى دى
البت واهلها كانوا طايرين من الفرحه بينا واحنا
هناك
وبالذات البت كان باين عليها اوى الفرحه
اصلك مشوفتهاش ........وحسيت انها غلطت بالكلام 😳وامه بصيتلها
يقطعنى يا بنى.....والله ما اقصد 😞
الشيخ محمد بإبتسامه: ولا يهمك يا مرات عمى
انا عارف قصدك كويس😊
بس انا مش عاوز اعشم نفسى بحاجه
فبقول قدر الله وما شاء فعل والحمد لله على كل حال😞
ام محمد قلبها وجعها على ابنها اللى كان جاى فرحان من المنصوره وهيرجع مكسور الخاطر
وغصب عنها عيطت 😥
مرات عمه شاورتلها تبطل عياط علشان ميحسش
بحاجة
الشيخ محمد حس بحزن امه وقام سند على
الكرسى وقعد جنبها وأخدها فى حضنه
مالك بس يا ست الكل
والله يا امى انا راضى بقدر ربنا ...وبحمده كمان
إحنا منعرفش الخير فين....وهما من حقهم
يرفضوا ..ايه اللى يخليهم يربطوا بنتهم
بواحد كفيف زيي وتفضل تجره وراها في كل حته
انا خلاص كده... اكتفيت بحضنك انتى يا حاجه
ربنا يبارك فى عمرك....وباس راسها
الشيخ محمد كان وشه مبتسم وراضى وهو بيتكلم 😊
ولكن قلبه لا يعلم بحاله الا الله😞
مرات عمه.. وعمه وامه ومحمود
غصب عنهم عيطوا كلهم على كلامه
😥😥😥😥
الشيخ محمد: اذكروا الله يا جماعه
هو فى ايه بس لكل ده ..الحمد لله فى السراء والضراء
ابسط بقا يا محمود ...هنمشى بإذن الله الصبح
مبسوط يا عم😊
محمود حضن الشيخ محمد وفضل يعيط😭
الشيخ محمد طبطب عليه
وأول ما حضنه .....غصب عنه عيط هو كمان 😥
عمه: ما توحدوا الله يا جماعه كده
احنا لسه معرفناش الرد ....مش عاوزين نظلم الناس
مرات عمه: عندك حق ولله يا ابو سمير
دول ناس كويسين اوى ..انا مستغربه الصراحه
ومش داخل دماغى الكلام ده
محمود : طب ممكن اطلب منك طلب يا شيخ
واقسمت عليك بالله ما ترفضه
الشيخ محمد بيمسح دموعه: قول يا محمود وطلبك موافق عليه من قبل ما اسمعه .. ما دام اقسمت عليا بالله 😥
محمود : احنا نقوم الصبح قبل منسافر ونروحلهم البيت
ويمكن زى ما عمى بيقول فى مشكله فى تليفونه...او مفيش شبكه
الشيخ محمد: طب وليه نحرج نفسنا يا محمود
ما الرد واضح خلاص😔
محمود: مفيش رد اصلا علشان يوضح يا شيخ
لان كلام امى ومرات عمى عن الاخت واهلها
بيقول انهم موافقين.....ومتنساش انى اقسمت عليك بالله وحضرتك وفقت
مرات عمه: جدع يا واد يا حوده والله...هو ده الكلام .....ولو عاوزينى أجى معاكوا ...أجى
ام محمد:لاء يا حبيبتى ...متتعبيش نفسك
هما ياخدوا تاكس وينزلهم قدام البيت على طول
وانا وانتى نقعد هنا نستناهم لما يجوا
وربنا يكتب اللى فيه الخير ...محدش عارف النصيب فين
العم: خلاص اجى انا معاكوا
الشيخ محمد: لاء يا عمى متتعبش نفسك
انا لولا بس محمود اقسم عليا بالله... انا مكونتش وفقت
محمود: ما انا علشان كده أقسمت عليك الاول
الشيخ محمد : ماشى يا حوده ...هعديهالك المردى😊
ام محمد بصيت لإبنها بحزن😞
ربنا يسعدك يا ابنى وينورلك طريقك دايما ويحبب فيك خلقه 😥
الكل : ااامين يارب🤲🏼
*********************************
جنه خارجه من اوضتها ...شافت ام عزت قاعده عندهم فى الصاله....... ازيك يا طنط
ام عزت: اهلا يا جنه يا حبيبتى ....ايه يا بت الحلاوة دى 😁
يا بت ما اخدك لعزت ونخلص بقا من القصه دى
بلا عرسان بلا هم😁
هاله: ده عزت طول عمره زى اخوها يا ام عزت
جنه: اهى ماما قالت لحضرتك ..زى اخويا
يعنى مننفعش لبعض ..ربنا يرزقه بواحده احسن
منى يا طنط🤨
انا داخله انام يا ماما ....عاوزة منى حاجه
هاله بضيق: لاء يا حبيبتى ...انا شويه وهنام انا كمان
لحسن سهرت اوى انهارده ومش قادره اقعد من التعب
ام عزت: يختى يقطعنى ..قعدت معاكى والكلام
خدنا وسهرتك ....اما اقوم اخش بقا زمان عزت
جاى...شكرا يا حبيبتى على الفته الحلوه دى
تسلم ايدك....بس اللحمه قطعيها بعد كده كبيره
شويه... بحبحى ايدك يا هاله شويه ومتبقيش بخيله يا بت😏
هاله وجنه بصوا لبعض وضحكوا😄😃
ام عزت بصيتلهم واستغربت...بيضحكوا على
ايه دول يختى😏 ....يلا تصبحوا على خير
هاله: وانتى من اهله يا حبيبتى ..وقفلت الباب
يا لهوى عليها ...ده انا دماغى صدعت من كتر الرغى بتاعها😠
جنه: استغفرى بقا يا ماما ...انتى كده وقعتى فى نميمه
هاله: استغفر الله العظيم....غصب عنى والله
يا بنتى
فيييين من ساعة ما أصحابك كانوا هنا
وفضلت قاعده وهاااتك يا رغى
وعزمت عليها على الاكل...قولت يمكن تتكسف وتقوم وتفتكر اننا هناكل
ومفيش فايده بردوا.... قالتلى هاتى انا جعانه
ومكسله اقوم اسخن الاكل اللى عندى جوه
اعصابى تعبت منها خلاااص😠
جنه : بردوا مينفعش كل الكلام ده ...استغفرى تانى بقا
صحيح بمناسبة الأكل... تعالى هنا الاول
وقوليلى بقا ايه الحكايه .....جبتى فلوس
منين للفته واللحمه دول
تليفون جنه رن برقم غريب
هاله : مين
جنه : معرفش.....ده رقم غريب
هاله: طب ردى ..ولو حد بيعاكس اديهولى ابهدله
جنه: السلام عليكم
ياسر: وعليكم السلام....ازيك يا جنتى وحشتينى😁
جنه عرفت صوته واتصدمت ووشها اتغير
وبزعيق... هو انا مش قولت لحضرتك متتصلش تانى على تليفونى....وكمان فى وقت زى ده
اتقى الله بقا يا أخى😡
هاله استغربت : مين اللى بيكلم.....هاتى التليفون
جنه: اتفضلى اتصرفى معاه بقااااا😤
ودخلت اوضتها وهى مخنوقه منه.. ورزعت الباب
ام جنه: بزعيق......انت مين يا جدع إنت 😡
ياسربإحراج: انا الباشمهندش ياسر يا طنط
انا اسف ولله على الازعاج
هاله إتفاجئت واتحرجت منه.....اهلا اهلا يا
باشمهندس ...احنا اللى اسفين والله
ياسر: لاء انا اللى اسف ...بس بصراحه الموضوع
طول اوى وكنت عاوز اعرف الرد
هاله فرحت إنه لسه متمسك بجنه وعاوزاها
فين طول ده بقا😃ده انت كنت لسه عندنا من يومين...
ياسر: ماهو بردوا يومين كتير 😀
وانا بصراحه اتعلقت بالانسه جنه ...ولو لفيت الدنيا مش هلاقى فى ادبها ولا اخلاقها ولا دينها ..فلو سمحتى كلميها واعرفيلى الرد منها
وياريت لو لسه مش مقتنعه بيا......إقنعيها حضرتك
والله انا مش وحش اوى كده
هاله: لاء طبعا......ده إنت احسن الناس كلها
حاضر من عنيه ...وبإذن الله خير
واخوها هيبقى يتصل بيك ويبلغك
او رجائى جوز اختى...بس معلش يا باشمهندس
بلاش تتصل بيها تانى... علشان انت شايف بنفسك بتعمل ايه
ياسر: حاضر... اوعدك مش هتصل تانى
وعلى العموم بلغيها اسفى
و اسف مره تانيه على الازعاج ...سلامو عليكم
هاله: وعليكم السلام......وقفلت معاه وكلمت نفسها
يارب يهديكى يا بنتى ...وتوافقى على الجدع بقا🤲🏼
*******************************
صباح يوم جديد 🌤️
سواق التاكسى: هو ده العنوان يا شيخ....والبيت اهو اللى تحته فرن الفينو
الشيخ محمد : ايوه تمام كده....جزاك الله خيرا
حاسب يا محمود اخونا فى الله وشوفه عاوز كام
السواق: العداد عامل ٣٥ جنيه بما يرضي الله
وخلى يا شيخ والله😁
الشيخ محمد: تكرم يا حبيبى فى الله😊
ووطى على محمود ووشوشه....
محمود طلع ٥٠ جنيه ......اتفضل حضرتك
السواق : طب مفيش فكه معاك
الشيخ محمد:وفكه ليه ... هى دى الإجره بإذن الله..... ربنا يباركلك
السواق بفرحه.... ويباركلك يا شيخ والله 😁
الشيخ محمد : طب هو ينفع حضرتك تستنانا شويه......هنشوف حاجه بسرعه ونازلين على طول
واذا طولنا هبعت محمود يقولك تتوكل على الله
سواق التاكسى: ولو هقعد لنص الليل يا شيخ
هستناك بردوا......ده كفايه سماحة وشك وطيبة قلبك والله😁
الشيخ محمد: ربنا يعزك 😊...السلام عليكم ورحمة الله وبركاته
السواق: وعليكم السلام يا شيخ ومتقلقش انا قاعد مستنيكوا
محمود مسك اخوه ...وطلعوا الدور التالت
الشيخ محمد:خبط يا محمود على الشقه اللى على السلم
محمود رن الجرس ...وفتحت ام ليلى
واتفاجئت بالشيخ محمد قدامها😳وبإحراج.....اهلا يا شيخ محمد ..اتفضل يا ابنى
الشيخ محمد: السلام عليكم ورحمه الله وبركاته
يا امى ..هو اخونا عصام موجود
ام ليلى: لاء يا بنى عصام فى بيته
طب اتفضل ادخل....
الشيخ محمد: جزاكى الله خيرا يا امى.....بس معلش مش هينفع ادخل ....وانا من امبارح بتصل بعصام تليفونه مقفول
ام ليلى: اااه يا خويا.....منه لله الحرامى بقا اللى سرق تليفونه
محمود فرح ....وضغط على إيد الشيخ محمد وبصوت واطى.....مش قولتلك😁
الشيخ محمد اتجدد له الامل تانى وابتسم 😊
طب هو ممكن اسأل حضرتك على رد الأخت ليلى
علشان اذا مفيش نصيب نسافر انهارده بإذن الله
ام ليلى اتحرجت ومش عارفه تقوله ايه😒
وفركت ايديها بإرتباك....اصل ليلى مش هنا
راحت الجامع عشان بتحفظ قران للستات هناك
وهتيجى بعد العصر😔
الشيخ محمد فهم من طريقة كلامها وإرتباكها
إنه اترفض زى ما اتوقع 😞
محمود بحزن ...طب شكرا لحضرتك
يالا يا شيخ 😞
الشيخ محمد بسماحة وجه : طب أستئذن حضرتك......تأمورينى بحاجه يا امى
ام ليلى بزعل: سلامتك يا بنى😞
الشيخ محمد: السلام عليكم ورحمه الله وبركاته
ام ليلى: وعليكم السلام...وصعب عليها وقلبها وجعها علشانه
بس بنتها عندها اهم من اى حد ....وقررت هى
اللى تقوله علشان تقفل الموضوع ده نهائى ويسافر بلده
ونادت عليه وهو نازل السلم
ام ليلى بحده: شيخ محمد😠
الشيخ محمد وقف و لف... وابتسملها ابتسامة رضا 🙂......أمرك يا امى
ام ليلى😡
******************************
ونكمل بكره بإذن الله ومستنه رأيكم في حلقة انهارده واتمنى تكون نالت إعجابكم ❤️
حقا انى كاتبه شريره....مش كده ولا ايه 😁
وقبل نهاية الكلام
اذكروا الله الرحمن ☝🏼وصلوا على حبيبه🌹
*قرأتـي الباࢪت يا جميلةة👀؟!*
*متنسيـش تحطـي ࢪياڪت لطيف يشبهڪ🥰🥰..*