الفصل 3
*⤶صـ𓂆ـلِّ علـىٰ النبـي يـا ذووق🌟♡゙>>.*
*ࢪوايةة : جنـةة الدُنيـا💚🌎»»*
*((الفصــــ★ــل"3"))♡゙//*
السلام عليكم اخواتى واحبتى🌹 موعدنا مع قصتنا اليوميه #جنه_الدنيا
ويلا نصلى ع الرسول وندخل على قصتنا ع طوووول😍
#جيهان_سلامه
#محبه_الرحمن
اللهم تقواك وجنتك ورضاك🤲
(الحلقه الثالثه)
ابتسام قاعده بتتفرج على التليفزيون....و بتكلم امها فى التليفون
وقدمها طبق مليان فاكهه ...وطبق لب..وطبق فشار
وطبقين رز باللبن فاضين....ولتر عصير...ولتر حاجه ساقعه
ابتسام بنرفزه: طب يستنى عليا بس لما يجيلى
هخلى وقعته سوووووده😠
انا يسيبنى طول النهار قاعده لوحدى زى قرد قطع كده......وجعانه كمان😠
امها: ما إنتى اللى غلطانه.....كنتى جيتى وقعدتى معنا
ابتسام:اجى فين بس يامه
ده انتى انهارده طبخالى فته عدس بالخل والتوم
وبتنجان بالخل والتوم بردوا....عملتيها ازاى دى يا وليه
امها: عملت ايه يا بت🤔
ابتسام : تطبخى الاتنين مع بعض ..حرام عليكى يا شيخه
يا عينى على ابويا واخواتى زمانهم اتنفخوا من كتر التوم اللى كلوه ....ربنا يكون فى عونهم منك
امها: لاء يختى متخافيش عليهم.. دول لسه كمان هيكملوهم بكره 😃
ابتسام بتريقه: كماااان😏
ربنا معاهم بقا ...ده انا اقسم بالله اترحمت
من عشيتكوا يا شيخه
وسمعت باب الشقه بيتفتح .....بقولك ايه
ده شكل صلاح جه
انا هقفل معاكى دلوقتى واكلمك بعدين ..سلام
ابتسام: إنت جيت يا بيه.....ما لسه بدرى
ما كنت تبات هناك احسن😠
صلاح بغيظ: تصدقى عندك حق
انا فعلا كنت لازم ابات هناك عشان ارتاح منك
ع العموم احنا فيها. .....سلامو عليكو
ابتسام بغيظ: استنى هنا ...رايح فييييين
انت ما صدقت ولا اييييه😡
صلاح: ما انتى جنينتى امى معاكى يا شيخه😠
ابتسام:ااااه..... بمناسبه امك.....فين الاكل
صلاح بصيلها وضحك: تصدقى انك بنت حلال طول عمرك😃
ابتسام: عارفه ....وايه الحديد يعنى ...بس ليه يعني بتقول كده😏
صلاح :اصل نسيت الأكل......وفاتك شوية اكل إنما ايييييه ....عسل😄
ابتسام بغيظ: اييييييه...... نسيتوا😡
ولا تلاقى امك هى اللى استخسرت تبعته
ما انا عارفكوا عالم جلده 😠
صلاح بنرفزه :يا شيخه بطلى سوء النيه بتاعك ده بقااااا😠
دى كانت حطالنا اكل وبزياده كمان
ابتسام :بغيظ....طب اعمل أنا ايه دلوقتى يعنى
صلاح: تعملى ايه فى ايه🤨
ابتسام: انا وابنك اللى فى بطنى واقعين من الجوع........اتصرف بقا 🤨
صلاح بص للاكل اللى حواليها على السرير😳
هو انتى ليه يا ابتسام محسيسانى إنك حامل فى ديناصور........فى تنين
وفى الاخر هلاقى عيل مولود شبه البرص
ابتسام:بزعل....انتى بتبصيلى فى الاكل يا صلاح
اخس عليك 😥
صلاح قرب منها وطبطب عليها
يا ستى ولله ما قصدى كده ....متزعليش طيب
حقك عليا.... وأدى راسك أهى ....وباس راسها
ابتسام : اوعاا كده يا خويا....لاء طبعا زعلانه وجعانه 😠
صلاح: طب انا عندى فكره ...ايه رايك تقومى تحركى نفسك كده وتفتحى الديب فريزر
هتلاقى فيها من خيرات ربنا...... لحمه وفراخ وسمك وكبده وبقالهم كتير
قومى اعملى اى حاجه منهم قبل ما يبوظوا
دول بفلوس يا بنت الناس
وانا يا ستى هقوم معاكى واساعدك كمان
هااااا....قولتى ايه😊
ابتسام بصيتله وايديها على خدها ورافعه حاجبها وساكته🤨
صلاح: طب اقولك ...ايه رايك فى شوية كبده
تشوحيهم بالزبده......انا نفسى اكولها من ايدك😁
او اقولك.... نعملها مع بعض اسكندرانى وجنبها شوية مخلل وسلطة طحينه 😁ايه رأيك
ابتسام: 😏
صلاح:طب بلاااااش ....ايه رايك فى شوية لحمه بتلو ونحمرها بالزبده بردوا.......او اقولك اااا
قاطعته ابتسام
اقولك انا بقاااا........ايه رايك فى فرخه مشويه
وجنبها شويه كفته وطرب
صلاح: الله عليكى يا بيسو لما تبدعى....هو ده الكلام ...... ويا ستى عمايل السلاطه عليا😄
بس هو احنا عندنا طرب🤔
ابتسام:لاء.....عند عم فرحات الكبابجى اللى على الناصيه 🤨
ومتنساش تزود العيش والسلاطات والطحينه
صلاح: عم فرحات الكبابكجى🤨
ابتسام: ااااه.....وبسرعه عشان انا وابنك جعانيين 😠
صلاح قام من جنبها وهو متنرفز.....هو انا ايه اللى خلانى اتهف فى دماغى واتجوز ......ما انا كنت بعقلى.......واخد مفاتيحه من على التسريحه
ولسه هيخرج
ابتسام: صلااااااااااااااح........متنساش تجيبلى
معاك حاجه ساقعه عشان اعرف أهضم الاكل
صلاح: الهى تتهضمى يا شيخه ...حسبى الله ونعم الوكيل 😠
وخرج ورزع الباب وراه
ابتسام: يييييي.........ده انا نسيت اقوله
هات معاك طبق بسبوسه او كنافه يعدلوا نفسى
اصلى نفسى مسدوده اليومين دول معرفش ليه كده 😏
*****************************
ناديه: اه والله يا خويا زى ما بقولك كده
حاجه توجع القلب
رجائى: لا حول ولا قوة الا بالله.....طب وجنه وافقت عليه خلاص
ناديه: لاء طبعا وفقت ايه بس ....دى هاله قالتلى إنها مش هتخليها توافق حتى لو هى صممت عليه
رجائى بنرفزه:لااااااااء.....بقولك ايه
الباشمهندس ياسر حدد معايا الميعاد خلاص
ولا هتطلعونى عيل معاه😠
ناديه: لاء يا خويا هو احنا نقدر بردوا
ده انت سيد الرجاله........هو امتى المعاد
رجائى: يوم التلات الساعه ٦
ناديه: خلاااص...هقول لهاله الصبح بإذن الله عشان تعمل حسابها
وفتحت علبه قدامها........يا اشرف....يا خااااالد
تعالوا يا عيال خالتكوا بعتالكوا جاتو العروسه
خد يا خويا دوق الجاتوه ده ....ده حلو اوى
العريس جابوا وهو جاى ....والشهاده لله داخلين بحته علبه جاتو....أد كدا ما شاء الله
وشكلها غالى اووووى
رجائى وهو بياكل......اممم
ده طعمه حلو اوى صحيح
لاء وشكله غالى فعلا ...... بقولك ايه
هاتى الحته اللى عليها القوطه الصغيره اللى فوق دى
خالد واشرف:😂😂
ناديه: بتضحك على ايه يا واد انت وهو
خالد: يا بابا أوطه ايه بس😂
اشرف: دى اسمها كريز🍒
رجائى بغيظ: إسكت ياض انت وهو...هو انتو عارفين حاجه
روحوا الاول إفلحوا في الاعداديه اللى بقالكوا
كام سنه مبلطين فيها دى...وتعالوا بعد كده علمونى......قال كريازى قال🤨
خالد واشرف😂😂
ناديه: يا خويا مالهم بس....الله اكبر عليهم
دول على فكره محسودين عشان تؤام
وولدين كمان ...ما شاء الله
رجائى: محسودين ايه بس يا وليه صلى على النبى
اقعدى انتى بس اعلفى فيهم كده لحد ما بقيت
حاسس انى مخلف بغلين مش عيلين😠
ناديه : الله اكبر.🖐️....ايه يا خويا ..متقولش على العيال كده.....ربنا يحميهم
رجائى: انتى بتكبرى فى وشى يا وليه ...هو انا هحسدهم ولا ايه 🤨
ناديه: لاء يا خويا ولله ما اقصد
رجائى رمى قطعة الجاتوه فى العلبه واترفز وقام
طب اهوووو.....سديتوا نفسى ....مش واكل😠
ناديه: تعالى بس متزعلش....والله ما قصدى
خالد واشرف: 😂😂
ناديه: عجبكوا كداااااا منك ليه😠
رجائى غسل ايده.. ..ورجع بص على العلبه
بقولك ايه......ابقى شيليلى واحده الصبح افطر بيها قبل ما اروح الشغل
قبل ما البغلين دول يقوموا بالواجب ويخلصوا عليهم🤨
ناديه: حاضر....من عنيه يا خوياااا.....نوم العافيه
وبصيت لولادها بغيظ😡
ما تاكل عدل يا واد انت وهو متحيفوش كده
على رأى ابوكوا..... بغلين صحيح🤨
****************************
ام عزت: يا عينى عليه يا ختى ...ده انا قلبى اتقطع لما شوفتهم نازلين من عندكوا واخوه ماسك إيده ونازل بيه......حاجه بصراحه توجع القلب
هاله: اه ولله يا ام عزت ...الشاب زى الفل
واهله ناس طيبين اوى .....بس النصيب بقا
ام عزت: طب جنه رأيها ايه
هاله: لاء مش هتوافق طبعا
هى كانت كبرت ولا بارت عشان ارميها الرميه دى
ده حتى فى عريس تانى جاى اليومين دول تبع رجائى جوز اختى ....إنما ايه
باشمهندس اد الدنيا😁
ام عزت من جواها....عريس تانى😏
يا عينى على حظك يا ابنى ....بوز نحس طول عمرك
هاله: انا قولت قبل ما انام لازم ادوقك من الجاتوه اللى جابوه😁
عقبال عزت. يا حبيبتى..... تصبحى على خير
ام عزت: تسلمى يا حبيبتى وتفرحى بيها يارب
وانتى من اهله.......ودخلت ام عزت بطبق الجاتو وبصيت عليه
ينيلك يا عزت ...ولا بيهون عليك تدخل عليا بجاتوه حلو كده....الواد ده مش طالعلى ابدا
وقعدت على الكنبه تاكل و تتفرج على التليفزيون
وسمعت صوت الباب......انت جيت يا عزت
عزت: لاء يامه مجيتش....انا بعيتلك القرين
بتاعى يشوفك محتاجه حاجه اجيبهالك قبل
ما اطلع ولا لاء🤨
ام عزت: بسم الله الرحمن الرحيم....انت بتتكلم جد يا واد 😳
عزت: تصدقى وتأمنى بالله ....انا قربت اهج من البلد دى بسببك
ام عزت بخوف: بسم الله الرحمن الرحيم...بطل يا واد الكلام ده لحسن بخاف
عزت: بتخافى .....بتخافى ايه بس
ده لو قرينى شافك وقعد معاكى شويه مش بعيد هو اللى يترعب منك
ام عزت: 😂كتك ايه يا واد يا عزت طالع دمك شربات زى امك
المهم.....جبت ايه معاك وانت طالع
عزت: جبتلك كيس فول وكيس طعميه عشان الفطار الصبح
ام عزت عوجت بؤئها😏.....بلا وكسه عليك
فول وطعميه......طب يا خويا حطهم فى التلاجه لحسن يبوظوا .....وكملت اكل
عزت خرج من المطبخ ولسه هيدخل اوضته لمحها بتاكل ...قرب منها وبص للطبق
ايه ده ...انتى بتاكلى ايه
ام عزت بتريقه: باكل جاتوه العروسه ....تااااخد😂
عزت بغيظ.....يامه حرام عليكى بقاااا
هو انا مش ابنك ...ولا لقتينى فى الشارع😠
ام عزت: الله ....وهو انا كنت عملتلك ايه بس
عزت: نازله اكل فى جاتوه جنه اللى هموت عليها واتجوزها عادى كده ومش حاسه بابنك....والله حرام عليكى 😩
ام عزت: طب واللى يقولك على خبر حلو تجيبله ايبيييه😄
عزت: خبر حلو زى ايه.......هو العريس منفعش😳
ام عزت: قلبك حاسس يا منيل😄
عزت بفرحه: بجد منفعش .....قولى وربنا😄
ام عزت: وربنا 😂
عزت قعد جنبها وشد منها الطبق.
هاتى بقا اكل معاكى عشان نفسى اتفتحت
ام عزت بصيتله بغيظ: بقا نفسك اتفتحت دلوقتى يا حيلة امك🤨
عزت وهو بياكل : اوى اوى يامه😁
ام عزت:طب كل يا حبيب امك كل....ولا اقولك كفايه عليك اوى كده .....اسدهالك بقا
جنه جايلها عريس تانى اليومين الجاين دول
عزت اتصدم ووقف اكل 😳عريس تااااانى
ام عزت: هات بقا الطبق يا فالح..... شكلها الحمد لله اتسدت😄
عزت قام وقف واتنرفز : طب.وربنا ما انا اقعدلك ف البيت😩
وهبات على القهوه للصبح واقعدى انتى بقا
براحتك مع طبق الجاتوه اللى واخداه فى حضنك ده اكتر من ابنك.......ولسه هيخرج
ام عزت: بضحك و بصوت عالى ...😂
طب إبقى سك الباب كويس يا واد وانت خارج لحسن الحراميه يدخلوا عليا بالليل يخطفونى
عزت بغيظ: قولى ياارب انتى بس ومتقطعيش
وخرج ورزع الباب وراه
ام عزت وهى بتاكل الجاتو ...
هو ماله الواد داااا......هو شكله زعل ولا ايه 😏
*******************************
جنه صحيت على تليفون ليلى
جنه: السلام عليكم
ليلى : وعليكم السلام ورحمة الله وبركاته
ايه يا بنتى كل ده نوم
جنه: ليه......هى الساعه كام دلوقتى
ليلى: الساعه ٨ونص
جنه اتفزعت وقامت اتعدلت بسرعه.... اييييييه
لا حول ولا قوة الا بالله 😔ده الفجر كده راح عليا
وبحزن.......ده انا من زمان بفضل الله محافظه عليه وبصليه فى وقته
اكيد فى حاجه غلط علشان كده مصلتوش انهارده😔
ليلى: انا بصراحه استغربت لما ملقيتش رنتك وسط رنات الاخوات اللى بيأكدوا عليا انهم صحيوا لقيام الليل و صلاه الفجر
فقولت تكونى ليس عليكى صلاه.....فمرضيتش ارن عليكى
جنه بزعل: ليه بس يا ليلى ....كنتى رنيتى بردوا
ليلى : قدر الله وما شاء فعل...اكيد ربنا عالم إنك تعبانه.....ابشرى يا حبيبتى بإذن الله اخدتى اجر النيه
ويلا قومى بقا عاوزين نلحق نصلى الجمعه فى رمسيس
ده الشيخ محمد حسان جاى هناك انهارده
وعاوزين نلحق مكان....انتى عارفه بيبقى زحمه ازاى
وعبير خلاص جهزت ومستنيه ارن عليها علشان تنزل
جنه : ماشى ..هقوم حالا وأغتسل غسل الجمعه
واصلى الصبح والضحى وأرن عليكى تنزلى ونتقابل على المحطه
ليلى: الله المستعان....السلام عليكم ورحمه الله وبركاته
جنه: وعليكم السلام ورحمة الله وبركاته حبيبتى
وقفلت مع ليلى وهى حزينه على ضياع صلاة قيام ليلة الجمعه وصلاه الفجر😔
وبصيت فى المرايه وكلمت نفسها
يا ترى اللى حصلى ده له دخل بالشيخ محمد والتردد اللى انا فيه من ناحيته
اتنهدت بحيره.......الله اعلم😔
صليت جنه الصبح والضحى وقامت تلبس وفضلت تحرك اللسان بالصلاه على خير الأنام
صل الله عليه وسلم ❤️
وحطت مصحفها فى شنطتها .......وخرجت
هاله: لابسه ورايحه فين على الصبح كده يا جنه ده لسه بدرى على صلاه الجمعه يا بنتى
جنه: ماهو يا ماما مش هنصلى فى المسجد اللى هنا.....هنصلى فى رمسيس
هاله: رمسيييييس.....وليه كده
جنه: اصل الشيخ محمد حسان جاى هناك انهارده
وبيبقى زحمه جدا....فلازم نروح بدرى
علشان نلحق مكان
هاله: طب يا حبيبتى خلى بالك من نفسك ومتتأخريش
جنه: حاضر يا ماما..... السلام عليكم ورحمه الله وبركاته.....ولسه هتفتح الباب
هاله: مقولتليش صحيح....... فكرتى فى الموضوع
بتاع امبارح واخدتى قرار ولا لسه
جنه بزعل: الله يباركلك يا ماما اقفلى دلوقتى
ع الموضوع ده لحسن حاسه انى مخنوقه اوى
بسبب صلاه الفجر اللى ضاعت عليا انهارده وشكلها كده بسببه
هاله استغربت.....بسببه ازاى يعنى🤔
جنه:بعدين هفهمك علشان مستعجله دلوقتى
زمان ليلى وعبير مستنينى على المحطه
السلام عليكم ورحمة الله وبركاته
هاله: وعليكم السلام ورحمة الله.....ربنا يكتبلك الخير يارب يا بنتى
نزلت جنه تجرى على السلم... وكان عزت طالع
عزت بفرحه: جنه😁.....صباح الخير يا جنه
على فين كده ع الصبح
جنه حاطه وشها فى الأرض....صباح النور
رايحه المسجد.......عن إذنك.....ولسه هتنزل
عزت: طب تحبى اجى اوصلك ...انا فاضى😁
جنه: لاء شكرا ...اصحابى معايا هنروح سوا
بس انت مادام فاضى....ممكن تروح المسجد من دلوقتى وتقعد تستنى صلاة الجمعه
عزت ارتبك...اااه طبعا....ما انا على طول بعمل كده على فكره
انا كنت طالع دلوقتى عشان اخد المصليه وانزل الجامع 😁
جنه: طب كويس ... عن اذنك بقا
عزت بفرحه: على فكره انا فرحت اوى انك رفضتى العريس😁
جنه: ومين قالك إنى رافضته....انا لسه بفكر🤨
ولو سمحت يا عزت لاخر مره بقولك
متوقفنيش الوقفه دى تانى على السلم وتكلمنى
انا مش بحب اقف واكلم رجاله.....انت كده بتحرجنى
لانك متربى معايا من زمان وبقدرك زى صلاح
اخويا ومش بحب احرجك....فلو سمحت متعملش كده تانى......ماشى😠 السلام عليكم بقااا
عزت اتغاظ منه طريقتها 😡كداااا.....ماشى يا جنه
طب مش رايح اصلى الجمعه فى الجامع وهصليها فى البيت 🤨
ووقف قدام باب شقته وحط ودنه بيسمع
يارب امى تكون نامت عشان مش ناقص كلامها اللى بيفور الدم داااا😠
وفتح الباب براحه......ولسه هيدخل
سمع صوت امه.....انت جييييت يا عزت
ابن حلاااااااال
إدخل بقا إقلى الطعميه عشان عاوزه أفطر
عزت: لاء انا جيت يامه من بدرى ونمت خلاص اهو
ده انا حتى بكلمك وانا فى سابع نومه
خخخخخ.😴😴😴....وجرى على اوضته
وطلع على السرير واتغطى
******************************
عبير: ما شاء الله ...كانت حته خطبه يا بنات تحفه😊
ليلى : اللهم بارك.....فعلا كانت جميله جدا ومفيده
شوفتوا قرأ سورة( ق) ازاى
تبارك الله على الخشوع وهو بيقرأها
عبير: اه والله يا ليلى ...ده انا عينى ورمت من العياط
جنه قاعده بتسمعهم ومستغربه نفسها
الله....اومال اشمعنى انا محسيتش بكل ده ليه
ده انا حتى سرحت انهارده فى الخطبه غصب عنى ومعرفتش اركز فيها خالص
والصلاه بردوا كده.....لاء...انا فيا حاجه مش مظبوطه انهارده 😔
ومش عارفه مالى من امبارح... انا مخنوقه اوى يا بنات .....مخنوقه اوى😞
ليلى قعدت جنب جنه وطبطبت عليها
يا حبيبتى انتى محيره نفسك ليه بس
صلى صلاة الإستخاره وسبيها على الله
عبير: فعلا...سيبى الأمور لربنا ...وأكيد ربنا هيختارلك الأحسن
قاطعتهم ست كبيره فى المسجد
الست: سلامو عليكو يا عرايس😁
الكل: عليكم السلام ورحمه الله وبركاته
الست: إلا قولولى يا حلوين ...انتو متجوزين بقا ولا لسه بنات😁
بصوا لبعض وضحكوا😄😄😄
عبير بهزار : لا لسه يا امى عازبات😄
عندك عرسان ولا ايه
الست قعدت جنبهم.... عريس زى الفل ما شاء الله يبقى ابن اختى
وعاوز عروسه زيكوا كده حاطه نقاب وتكون بتاعة ربنا
وقالى يا خالتى انتى على طول بتروحى المسجد
فياريت تشوفيلى عروسه بنت حلال من هناك
عبير: طب هو مواصفاته ايه ...واختنا ليلى
اهى ما شاء الله عليها اخت على خير جداااا
ومحفظة قران كمان
الست بصيت لجنه وافتكرتها ليلى وابتسمت😁
بسم الله ما شاء الله......طب بصى يا ستى
ماجد ابن اختى الله اكبر عليه مدرس اعدادى
وعنده بالتقريب كده ٢٧..٢٨ فى الحدود دى يعنى
وشقته موجوده وبيجهز فيها
وما شاء الله عليه بيصلى الوقت بوقته
واخلاقه عاليه اوى اوى الحمد لله وحافظ قران كتيييير
وعاوز واحده بتاعة ربنا...و اهم حاجه تكون من عيله كويسه وناس طيبين
عبير: طب ده حلو اوى ما شاء الله......ايه يا لولو......ايه رايك 😊
ليلى: 😌
الست:بإحراج........ايه ده ....هو انتى ليلى
وسكتت ووشها اتغير😒
ليلى فهمت واتحرجت من نظراتها.... وبإبتسامه مصطنعه
على فكره انا عارفه رد حضرتك... ومن غير احراج.....انا عارفه إنى منفعش علشان سمره ومش حلوه🙂
وطبعا ابن اخت حضرتك عاوز واحده بيضه وجميله زى البنات القمرات دول😊
الست بإحراج........ولله يا بنتى اصله ااااا
ليلى: يا امى من غير احراج ....انا فاهمه
هو كمان مش مناسب ليا
انا اكبر منه فى السن........ربنا يرزقه بالزوجه الصالحه.......عن اذنكم هصلى سنة الظهر
جنه وعبير بصوا لبعض و زعلوا علشان ليلى
😞😞
الست: طب والحلوة اسمها ايه😁
جنه: انا اسمى جنه....بس بردوا للاسف مينفعش
لان فى عريس زارنا امبارح ولسه هصلى الاستخاره
بصى حضرتك ....الانسب له بجد هى البت دى اللى عاوزه تجوزنا وتهرب هى😄
فيها كل المواصفات اللى هو طالبها
عبير بنظرة توعد لجنه وبتشاور بإيديها على دقنها
مااااااشى 😒
الست: طب ما كنتى قولتى من الاول بدل الإحراج ده يا بنتى
قوليلى بقا ...اسمك ايه وعندك كام سنه...ومعاكى شهادة ايه
معلش يا بنتى هو اللى طلب منى كده
عبير: ولا يهم حضرتك ...اسمى عبير
وسنى ٢٤ سنه ومعايا ليسانس اداب ولسه مشتغلتش
الست: ما شاء الله.......طب بصى
خدى الورقه والقلم دول واكتبى كل اللى قولتى عليه ده... لحسن انا بنسى😁
واكتبى كمان رقم تليفون امك او ابوكى
او حتى اخوكى
علشان لو عاوز يزوركوا يتصل بيهم الاول ويحدد معاد
عبير بكسوف...حاضر😌
وكتبت الورقه ورقم تليفون والدها
الست : بإذن الله انهارده او بكره بالكتير اوى استنوا منا تليفون
سلامو عليكوا بقا.....لحسن واقف مستنينى تحت من بدرى واتأخرت عليه اوى
البنات: وعليكم السلام ورحمة الله وبركاته
😊😊
جنه وعبير بصوا على ليلى وهى بتصلى وعلامات الحزن ظاهره على وشها😔
جنه: على فكره يا عبير إنتى غلطانه....ما إنتى عارفه ان ليلى معديه ال ٣٠ سنه ...انتى كده احرجتيها
عبير بزعل وعنيها كلها دموع...ولله العظيم🥺
ماكان قصدى أحرجها كده........بالعكس
انا نفسى تفرح وتتجوز زى كل البنات
ونفرح بيها احنا كمان...انا بحب ليلى اوى يا جنه ولله🥺
جنه: طب خلاص إهدى... وتعالى نقوم نشوفها ونحاول نلطف الجو معها شويه
وقاموا راحو قعدوا جنبها
جنه: ايه يا لولو.....هنقعد هنا للعصر ولا ايه
عبير: مش قادره تتكلم ومكسوفه منها😔
جنه: ولله يا ليلى عبير اااا
قاطعتها ليلى: عارفه يا جنه إن عبير متقصودش حاجه
وبصت لعبير لاقتها بتعيط..😥
ليلى شدتها وخدتها فى حضنها...وبضحكه😊
ايه يا حبيبتى .... بتعيطى ليه بس
عبير بدموع: اصلى حطيتك فى موقف وحش ومكنتش اقصد والله العظيم 😥
ليلى : لاء خالص ....ولا وحش ولا حاجه متعيطيش بقا علشان خاطرى
المهم قولولى ..... اختارت مين فيكو😊
جنه بتمسح دموعها وهى بتضحك
دبستهالك هى فى الجوازه🥲
ليلى : من حفر حفرة لاخيه😄
عبير: طب بإذن الله يا جنه تدبسى قريب مع
الشيخ محمد وافرح فيكى انتى كمان.. اشمعنى انا اللى هدبس لوحدى😄
ليلى بإبتسامة رضا 😊ربنا يكتبلكم السعاده يارب يا بنات
والله نفسى بجد افرح بيكم انتو الاتنين🥰
وحضنوا بعض التلاته........حضن الاخوه والمحبه فى الله ....ودموعهم نزلت وهما فى حضن بعض
فما اجمل الحب ف الله❤والصحبه الصالحه
اللهم اجعلنا منهم🤲🏼
******************************* ونكمل بكره بإذن الله...ومستنيه رايكم ف حلقه انهارده ..وتعليقاتكم على احداثها والشخصيات اللى فيها😁...محدش يكسل يكتب🤨
واشهد الله انى مش مسامحه اى حد ياخد القصه وينسبها لنفسه 😔
واذكروا الله☝🏼 وصلوا على حبيبه🌹
*قرأتـي الباࢪت يا جميلةة👀؟!*
*متنسيـش تحطـي ࢪياڪت لطيف يشبهڪ🥰🥰..*