الحلقه الثانيه
*ࢪوايـــــــة: ســحـر الــســبــع عــقــد💜⚡⸙♡»))*
الكاتبة المجهول*
*#الجزء_الثاني💜⚡*
لقيت أحمد واقف في وشي وماسك نفس العروسة، واللي لاحظته عليها إنها كانت ملفوف حواليها حبل، والحبل ده معقود كذا عقدة. أما أحمد وشه كان متبهدل خالص، عليه آثار كدمات، والمخيف إنه بقى متخيط. لكن ده ممنعنيش إني أسمع صوت أنينه وصراخه المكتوم.
قربت إيدي من وشه، لكن في اللحظه دي عينيه اتقلبت للون الأسود، والخياطة اللي على بوقه بدأت تتفك لوحدها.
منظر بشع مكنتش قادرة أتحمله.. حاولت أصرخ، لكن في اللحظه دي لقيت إيد بتتحط على بوقي، ولما بصيت كان عز.
واتكلم وقال بصوت أجش:
_"ما صدقتى إني مت، عشان تتجوزي؟ بس اطمني، مع كل عقدة هتتفك هتخسري حاجة في حياتك، لحد آخر عقدة اللي هيكون معاها موتك."_
...
وفي اللحظه دي اتفتح باب الأوضة.. واختفوا. بصيت حواليا وأنا خايفة، واللي فتح الباب كان وليد، اللي قرب مني وهو بيسألني:
_"مالك؟ في إيه؟"_
مكنتش عارفة أقوله إيه.. هقوله بشوف طليقي اللي مات وابننا اللي لسه ميت مش بعيد؟ أطلع من هنا على مستشفى الأمراض العقلية؟ قررت إني أسكت لحد ما أشوف هيحصل إيه تاني.
..
رجعت البيت بعد ما قضيت فترة مش صغيرة في المستشفى. أول ما دخلت انهرت من العياط، كنت بعيط على حالي وعلى ابني اللي ملحقتش أفرح بيه.. رحت ناحية الأوضة بتاعته، أول ما دخلتها لقيت لعبوه على الأرض. نزلت على الأرض وأنا مش مصدقة إني مش هشوفه بيلعب بيهم تاني.
قرب مني وليد وطبطب عليا وهو بيحاول يحبس دموعه، واتكلم وقال:
_"راح للي أحسن مني ومنك، ادعيله بالرحمة يا مريم، هو دلوقتي في مكان أحسن."_
= مش هقدر أكمل حياتي من غيره.. كان كل حاجة ليا في الدنيا، وفجأة راح. راح وسابنا.
_"صلي على النبي بقى، ما تعمليش في نفسك كده."_
= عليه أفضل الصلاة والسلام.
...
➷الكاتبة المجهول ➶
مسكني من إيدي وقومني واخدني عشان أريح شوية. دخلت السرير وأنا مش شايفة قدامي، وطلب مني أنام لحد ما يجهزلي حاجة أكلها. لكني رديت عليه وقلتله:
_"أنا مش قادرة أكل دلوقتي، ما تتعبش نفسك وارتاح انت كمان."_
= ما ينفعش طبعًا، لازم تأكلي، والدكتور منبه عليكي. انتي عندك أنيميا حادة، والدكتور كاتبلك على العلاج ولازم تواظبي عليه مع الأكل.
أنا هسيبك ترتاحي شوية وهروح أجهز الأكل.
..
سابني وخرج، وأنا حطيت راسي على المخدة ورحت في النوم. فتحت عينيا على نفس الراجل، وكان ماسك الدمية وبيفك منها عقدة.
وافتكرت كلام عز لما قال:
_"كل ما هتتفك عقدة هتخسري حاجة في حياتك، ومع فك آخر عقدة هتكون نهايتك."_
وأول ما افتكرت الكلام ده، المشهد اتبدل تمامًا، ولقيت نفسي واقفة في بيت أنا عارفه كويس، ده دار مسنين وللأسف جدي متواجد فيه من فترة. ويمكن دي حاجة كانت مزعلاني من بابا جدًا، وما كنتش عارفة إزاي هو وافق يحط والده في دار مسنين. لكن كان دايما يقولي إن جدي عنده زهايمر، ووجوده بره بيعمل مصايب، وإن محدش هيقدر يرعاه. وكلام من نوعية "أنا مش فاضي، ومامتك مش فاضية"، وللأسف كلها مبررات فاضية.
المهم، ما كنتش عارفة إني جاية هنا ليه؟.. لكن لقيت نفسي واقفة قدام جدي محفوظ، لكن اللي كان واقف جنبه كان عز. كان لابس البالطو بتاع الدكتور، وبصلي وابتسم، وبعدها حط إيده في جيبه وطلع علاج واداه لجدي. وبعد ما جدي أخد العلاج، ما فيش 10 دقايق ولقيت جسمه بيتهز، وعينيه بتطلع لفوق، ولسانه بيدلدل من مكانه.. ومات.
صحيت من النوم مفزوعة وكنت بصرخ. لقيت وليد جاي على صوتي وبيسألني:
_"مالك في إيه؟"_
= العقدة التانية اتفكت، وجدي محفوظ مات.. العقدة التانية اتفكت، وجدي محفوظ مات.
_"عقدة إيه؟ وجدك محفوظ مين؟.. في إيه يا مريم؟ طمنيني."_
= اتصل ببابا بسرعة، اتصل اسأله على جدي محفوظ.
_"طيب فهميني الأول على الأقل، مين جدك محفوظ؟"_
= جدي محفوظ يبقى والد بابا، وللأسف بابا حطه في دار مسنين وقال إنه مريض زهايمر، وقال إنه ما ينفعش يعيش وسطنا عشان بيعمل مصايب.
_"إيه الكلام ده؟"_
= مش وقته، مش وقته يا وليد، ارجوك اتصل ببابا واسأله عن جدي.
_"حاضر يا مريم، حاضر. اهدي."_
...
قام وليد من مكانه ومسك التليفون واتصل ببابا كتير، بس ما كانش بيرد. فاتصل بماما، اللي أول ما ردت على وليد قالت:
_"معلش يا وليد يا ابني، حماك مش عارف يرد عليك، أصل أبوه توفى وهو دلوقتي بيخلص الإجراءات."_
= البقاء لله، ربنا يرحمه ويغفر له ويجعل مئواه الجنة.
...
أول ما سمعت وليد بيقول كده، عرفت إن اللي شوفته في الحلم كان حقيقي. وليد قفل المكالمة وبصلي وقال:
_"البقاء لله، جدك اتوفى."_
ما كنتش محتاجة أسمعها منه. أنا مش عارفة مين اللي بيعمل فيا كده، مين اللي قرر فجأة إنه يدمر حياتي؟ رغم إن أنا عمري ما أذيت حد.