الحلقه الثالثة
[: *_ࢪ໑ايـة القناع الابيض♥️🌝_*
*تابع قنـاةة*
♡الكاتبة♡المجهول *
#الجزء_الثالث
وده راجل عنده عقدة من الارتباط، كل ضحاياه متجوزين، ما عدا الجريمة التانية، كانوا اتنين مرتبطين بس، ودي اللي هي جريمة القتل الأولى.. وده له تفسير منطقي.. إنه في البداية كان شغال بشكل عشوائي.. مجرد ما إيده عرفت تضرب الزناد، بقى بيفكر اكتر ويخطط اكتر.. ولو اتساب بالمنظر ده، ما حدش عارف المرة اللي بعدها هيقدر يعمل إيه..
لما حاولت أجيب ترابط مثلًا بين ضحايا جرايم يوم الفلانتين، لقيتهم على المستوى الشخصي ما تجمعهمش أي حاجة ببعض، نهائي.. أفراحهم ما كانتش في نفس القاعة.. التصوير.. محلات تأجير الفساتين.. محلات البدل الرجالي.. ما فيش أي ترابط، اه، اصل انا كنت ميال اكتر لحتت الملابس وتصميمها.. القناع الأبيض من أول مرة وهو زي أخر مرة.. ما فيهوش غلطة.. اللي بيصممه إيده تتلف في حرير، مستحيل يكون حد اللي بيفصلهوله.. وده سره الكبير ومش هيبوح بيه لحد، بس لا، انا كنت متأكد إن اللي عمله ليلة الفلانتين ده وراه حاجة وربطة معينة.. ولو وصلت لها هبقى وصلت لخيوط كتير، ووسط ما فريق البحث شغال، جالنا خبر مهم حيانا من جديد، (سمر).. الضحية في الجريمة التالتة بتاعت الموتوسيكل، فاقت من الغيبوبة.. ومش كده وبس، احنا وشوفنا إمتى نقدر نتكلم معاها ونسمع منها.. وروحت وانا كلي أمل إن البداية تكون عندها.
عدى عليا ناس كتيرة اتعرضوا لكل محاولات التدمير في حياتهم، بس بمجرد ما شوفت (سمر) عرفت إن البني أدمة اللي قدامي دي، محتاجة معجزة علشان ترجع للحياة، وما أقصدش من الناحية الصحية الجسدية، اقصد النفسية.. عروسة جديدة فقدت جوزها في حادثة بشعة قدام عينيها.. محاولة قتلها، لحظة رعب واحدة بتمر على إنسان.. قادرة تموته حتى ولو فضلت فيه الروح، وعينيها.. عينيها كانت بتقول كل ده.. المهم، قعدت قدامها وبدأت الكلام معاها:
- ألف حمد لله على سلامتك.
- الله يسلمك.
قالتها بصوت مشروخ وضعيف، كان كمان عندها مشكلة في الأحبال الصوتية بسبب الطلقة..
- سؤال واحد هبدأ بيه وبعده هتتحدد حاجات كتيرة.. تقدري توصفي أي حاجة من القاتل؟
ودت وشها بعيد عني وهي بتقفل عينيها والدموع بتسيل منها، الشريط بيتعرض قدامها من أول وجديد.. وانا مستني ردها اللي قادر يقلب كل الموازين أو يخليني واقف عند نقطة الصفر.. بعد كده بدأت تحرك شفايفها من غير ما تتكلم.. غصب عني قومت وقفت من مكاني بالراحة.. وجاوبتني بإجابة غريبة:
- شوفته.. شوفته قبل الحادثة..
- ممكن توضحي لي يعني إيه شوفتيه قبل الحادثة؟؟.. تقصدي انك تعرفيه من قبل كده؟
هزت راسها بلأ.. ورجعت بصت لي وقالت:
- شوفته قبل الحادثة في محطة بنزين ع الطريق.
رجعت قعدت مكاني وعيني عليها، ولأول مرة.. أحس إني بطلع خطوة لقدام.. انا سمعت من (سمر) على قد ما قدرت تحكي، وخليتها تكمل كتابة لما طلبِت ده.. اما كلامها، فبدأ بإنهم وقت ما كانوا راجعين من عند أهلها في زيارة عائلية عادية.. وقفوا في الطريق في أول بنزينة قابلتهم، وده علشان (كمال) جوزها الله يرحمه يزود الموتوسيكل بنزين، وهناك لفت نظرها شاب عنده حوالي 30 سنة واقف وساند بضهره على عربية سودة واقفة بره البنزينة، بس ف جنب شوية وفضل بيبص عليهم لفترة، هي ما حبتش تقول لجوزها علشان ما تحصلش مشكلة وخناقة.. وخصوصًا إنه ما ظهرش من الشخص وقتها أي حاجة غير إنه بيبص ناحيتهم مش اكتر، ولما سألتها عن ليه بتقول إن الشاب ده هو الشخص اللي ضرب عليهم النار، قالت إن وقت الحادثة لقت شخص بقناع أبيض، راكب نفس العربية اللي شافت الشاب كان ساند عليها، وضرب عليها الطلقة وهم ماشيين جنب بعض.. ولما نزل وراح ناحيتها علشان يتأكد إنها ماتت، ولا هي مثلت إنها ماتت.. شافت في رجليه كوتشي أحمر في اسود من ماركة رياضية مميزة، وكان ده نفس الكوتشي اللي لابسه الشخص اللي شافته عند البنزينة.
وبالنسبة لمواصفاته، فقالت إنها ما اتحققتش من شكله بصورة دقيقة أوي بسبب الإضاءة في المكان والمسافة، ده غير إنها ما طولتش النظر ناحيته أوي، ما قدرتش تحدد إلا حاجات عامة.. يعني طوله حوالي 180 سنتي، وجسمه رفيع.. ودي حاجات متطابقة مع الوصف اللي قاله الزوج والزوجة في الحادثة الأولى، وكمان قالت (سمر) إنه كان لابس چاكت اسود وبنطلون چينز اسود.. قمحي البشرة.. ما فيش شنب، ما فيش دقن.. أما بالنسبة لماركة العربية، فهي ما عرفتش تحددها لأنها ما شافتهاش كويس، ده غير إن خبرتها بالعربيات ضعيفة، ونمرة العربية ما قدرتش تشوفها أو تركز معاها..
ومن الأوصاف دي كلها قدرنا عن طريق الرسام الجنائي نطلع بشكل للقاتل.. ولما عرضناه على (سمر) بعد كده.. ما جاوبتش.. هزت راسها بالتأكيد وهي بتقول:
- تقريبًا.
وعيطِت وانهارت.
وزعنا صوره على كل الكماين وفي كل النقط الممكنة، وسعنا الدايرة والصورة اتنشرت في كل الوسائل، بس كان عندي تحفظ في حاجة واحدة.. الحاجة دي زادت بعد ما بدأ يجيلنا بلاغات من أشخاص بتقول على سين من الناس إنه القاتل ذو القناع الأبيض، او زي ما بقت الصحافة والميديا تسميه، وفي أسبوع واحدة بس جالنا 18 بلاغ من محافظات مختلفة.. وفعلًا كلهم كانوا قريبين في الملامح، بس فيه اختلافات في المواصفات الجسمانية.. الملامح اللي أخدناها من (سمر) قادرة انها يخرج منها أكتر من حد، ما فيش حاجة مميزة.. أما بالنسبة لتحفظي فكان لسبب مهم، هل الثواني اللي شافت فيها (سمر) الشخص اللي عند البنزينة ده، قدرت فعلًا توصفه بشكل صحيح لما طلبت منها، ولا الموضوع كانت فيه لَبس عندها؟؟!!
بس وسط الوضع اللي كنا فيه، كان لازم أمشي ورا المتاح.. وبقى أي حد ييجي عليه بلاغ اشتباه، يا نتحرى عنه ونستدعيه.. يا نتحري عنه ونلاقي منهم ناس فعلًا كانوا في أماكن معلومة في أوقات تنفيذ معظم الجرايم.. الخلاصة وعلشان ما أدوخكوش.. كل البلاغات اللي جت بمعرفة القاتل، طلعت كلها مش حقيقية.. وفات شهرين على جرايم يوم الفلانتين وما حصلش أي حادثة ولا استقلبنا بلاغات عن وجود حوادث مشابهة.. لكن ف يوم وانا في مكتبي، لقيت فرد الأمن او العسكري، بيخبط عليا، وبعد ما أذنت له بالدخول، فتح الباب وقال لي:
- حسن باشا.. في راجل بره عاوز يقابل معاليك ضروري.
لسه برفع راسي وهسأله عن أي تفاصيل، كان هو كمل كلامه وقال لي:
- بخصوص قضية سفاح القناع الابيض.
يتبع...
(الكاتبة. المجهول)