الحلقه العاشر
*#ماما《10》*
*#بقلمي~الكاتبة ~المجهول 🌼*
★★★★★★★★★★★★★★★★★
نورين كان واقف قدام الباب و عيونه مدمعة.. و هو شايف زينة كيف بتبوس حمودي و ضامة في حضنها و دموعها نازلة... سنة كاملة و حمودي م معروف ح يعيش ولا يموت.. بين علاجات و أجهزة و اخيرا كحل عيونه بشوفة ولدو بين يدينه.. جا الدكتور و طلع هو و نورين برا...
الدكتور
:حالة حمودي كويسة جدا... يمكن يلاقي صعوبة في المشي نظرا لانو م مشى من فترة طويلة بس برضه ح يتحسن بإذن الله...
نورين
:بإذن الله... متشكر جدا ي دكتور
الدكتور
:ولو دا الواجب بس حابب انبهك لانو تودي ولدك لطبيب مختص في علاج الحروق ال في وشه عشان الحاجة دي ممكن تأثر معاه...
نورين
:كيف يعني؟؟؟
الدكتور
:نفسيا يعني ممكن الأطفال يسخرو من شكل وشه و ينفرو منو و الحاجة دي بتأثر جدا على نفسيته عشان كدا لازم تعالجه..
نورين
:طيب في امل الجروح تتعالج..
الدكتور
:دي حاجة بحددها الدكتور المختص... عندي رقمه لو حابب..
نورين
:اكيد طبعا...
_____
:جلال..!!!
=هممم
:أولادك قاعدين وين أسى..
=في بيت اختي...
:م قلت لي عندك اخوات..
=انتي م سألتي..
:طيب عندك كم اخت..
=امي و ابوي متوفين.. عندي اختين.. أريج و عبير..
: الله يرحمهم.. اخواتك متزوجات..
=. آمين يارب.... اي الحمد لله..
:طيب أولادك قاعدين مع ياتو وحدة فيهم..
=مع أريج..
:طيب و زوجها م معترض..
=ا بدا بحب الأطفال.. و اصلا هم قعادهم مؤقت..
:يعني ح يجو يعيشو معانا..
=اي بس م اسي
:مالي حاساك مهموم.. و ليه م أسى..
جلال اتنهد و قال
=عشان انتي لسه علاجك م انتهى... بعد تخلصي علاج بجيبهم..
راضية
: اممم بس نحن ماشين كويس في العلاج..
جلال وهو بيحاول يجيب ليها الكلام ب فوق
=طيب شوفي انتي لمن كنتي صغيرة مش اتضربتي و دا سبب مرضك..
راضية
:ايي
جلال
=طيب الضربة دي عملت ليك ورم صغير في الرأس ولازم عمليه عشان يتشال..
راضية
:طيب م نعملها و خلاص..
جلال
:م اول لازم نقابل دكتور مختص و نعرف نعمل شنو حتن نعمل العملية...
راضية و هي بتعاين ليه
:العملية خطيرة ولا شنو..
جلال بسرعة و نفي
:لا ابدا حاجة بسيطة بس برضه محتاجة استعدادات..
راضية
:ليه حاسة انك داسي مني حاجة..
جلال
:ابدا..
راضية
:طيب العملية ح تكون متين..
جلال
:لسه م قابلنا الدكتور عشان يحدد لينا..
راضية
:تمام..
جلال
:راضية انتي م متذكرة اي حاجة من اليوم الاتوفت فيهو امك..
راضية
: م بعرف.. كانت هي و حبوبه بتشاكله.. و بعدين حبوبة جابت لينا لبن.. و امي ضربت رأسها في الحيطة و الدم نزل... راضية مسكت رأسها بوجع خفيف... جلال عاين ليها و قال
: مالك..؟؟؟
راضية
:ماف حاجة بس كل م احاول اتذكر راسي بيوجعوني..
جلال
:خلاص خلاص م توجعي راسك..
هزت راضية رأسها و قالت
:البيت لسه بعيد.؟
جلال
:لا قربنا...
__________
_السلام عليكم
=و عليكم السلام ورحمة... اقدر اساعدك..
_بسأل من وحدة اسمها تهاني كانت حنانه و قالوا لي ساكنة في الحلة دي..
=تهاني امي..
محمد بفرحة
:بجد.. طيب ممكن اتكلم معاها إذا موجودة..
الشاب
:طبعا بس اقول ليها منو..
محمد
:قول ليها محمد زوجها ل ماما.. و هي ح تعرف..
الشاب
:دقايق طيب..
دخل الولد جوا حاب كرسي.. قعد محمد منتظر.. شوية جات تهاني... بعد السلام و السؤال عن الحال و كدا.. تهاني قالت
:خير ي محمد في حاجة..
محمد
:والله ي م عارف ابدا من وين بس تتذكري اليوم الحننتي ام راضية الله يرحمها..
تهاني
:ي حليلا الله يرحمه.. أي بتذكرو كانو أمس...
محمد
:طيب عايزك تحكي لي الحصل اليوم داك لو سمحتي..
تهاني
:ليه حصل شنو..
محمد
:يا ريت تحكي لي.. و بفهمك الحاصل...
تهاني
:...............
محمد وقف مصدوم
:انتي متأكدة...
تهاني
:اي لي في حاجة....
محمد
:انا لازم امشي...
تهاني
:لحظة ي استاذ محمد...
بس للأسف محمد مشي بسرعة و حتى م أتلفت وراه...
____
جلال
:خالد... خلودي... منيبوووو... ي سعد.. وين انتو...
جا ولد اصفراني سمين شكلو دا سعد.. كان باين انو بياكل وشو كان كلو اكل... جا قال
:باااببببااااا...
جلال ضحك و قال
:سعد أبو كرش..
سعد وقف و صر وشه و قال
:انت زاتك ابو كرش...
جلال ضحك بكل صوته و قال
:تعرف نحن محتاجين ننزل رياضة..
سعد
: حاضر... بس وين الشكلاتة... ودي منو..
جلال
:دي راضية..
راضية
:امكم..
سعد
:بابا دي ماما جديدة...
راضية
:اي ماما جديدة..
سعد جرا من قدامهم و هو بصرخ
:عمتو عمتو عمتتتتتو... بابا جاب ماما جديدة... عمتتتتووووو..
جا ولد طويل اخدراني زي جلال شكله دا خالد كان نحيف ملامحه جادة شديد جا سلم على ابوه بالحضن.. و بعدها عاين لي و قال
:راضية..
هزيت راسي ببسمة.. جا سلم على سلام حلو.. م كنت ابدا متوقعة ردت الفعل دي.. و أثناء م بسلم علي و بتكلم معاه... جات مرا تشبه جلال نسخة بس.. ماسك يدها سعد و ولد صغير شكله محمد... هو كمان اخدراني زي جلال... جات سلمت على و دخلنا جوا.. و عرفت انو دي أريج... سلموا علي كلهم كانو يعرفوني ليهم سنين... اتكلم جلال و قال
:طيب وينو منيب...
أريج
:زعلان عشان الامتحان جا صعب و هو م اشتغل ف قعد يذاكر عشان الامتحان الجاي...
جلال ابتسم و قال
:طيب نادي عشان يشوف راضية..
جا منيب و هو كمان اخدراني شكلهم كلهم بشبه ابوهم الا سعد بشبه امه اللي م حصل جلال كلمني عنها ابدا... ولا حتى هم جابو لي سيرة..
____
محمد جا داخل و دفر الباب و بقى يصرخ... يمة.. يمة وين انتي.. دخل اوضتها لقاها فاضية.. دخل المطبخ لقاه فاضي..
محمد فتش البيت كله م لقاها... جا مصطفى داخل من برا و قال
:في شنو...؟؟؟
محمد
:الليلة مشيت لتهاني الحننت ماما يوم اتوفت...
مصطفى
:ايوا و الحصل شنو...
محمد وهو ما قادر يقعد في محله و ماشي و جاي قال
:تخيل قالت لي شنو
... نرجع ورا حبة...
تهاني
:بعد طلعت من ماما.. لاقتني حبوبة قالت لي.
_انتي ي تهاني الصبغة دي بتكتل صحي...
و قلت ليها اي بتكتل قالت لي عندي فيران عايزة اكتلهم
و عايزة من الصبغة قلت احسن من سم الفيران و مفعوله سريع.. قلت ليها م بعرف اذا بكتل فأر ولا لا بس... قاطعتني و شالت مني كيس...وقالت.. م مشكلة انا بجربه و بديك النتيجة..
.... نرجع...
مصطفى
:يعني شنو...
محمد
:يعني يمة كذبت على.. و ماما م طلبت من تهاني ايي صبغة زي م حكت لي...
مصطفى
:طيب حبوبة وينها
محمد
:م لقيتها فتشت البيت كله... محمد سكت فجاءة و قال..
:الحمامات م شفتها.. جرى على الحمامات و فعلا الباب مقفول دقا الباب بس ماف رد... ماف صوت... دفر الباب انفتح و انصدم من الشافه....
*•••••••••••••••••••••••••••••••••••••••••••••••••••••••••••*
*☆يتبــــــــــــــــــــــــــــــــــــــــــــع☆☆*
*♡الكاتبة المجهول ♡*