الحلقه الثامن
*#ماما《08》*
*#بقلمي~الكاتبة ~المجهول 🌼*
★★★★★★★★★★★★★★★★★
وصل جلال و راضية البيت.. دقوا الباب فتح ليهم مصطفى.. سلموا عليهم جلال و محمد و مصطفى قعدو طرف..
جلال
:انا ي محمد عايز اعرف زوجتك ماما اتوفت كيف و الحصل في اليوم داك شنو لانو راضية رأسها متمحور حول اليوم داك بس..
محمد
:والله ي جلال انا و ماما قبلها بيوم كنا متشاكلين لانو انا قررت أتزوج... و قالت إنها ح تلم عفشها و تمشي البيت..
جلال
:و المشكلة كانت كبيرة... يعني في صريخ و أصوات عالية..
محمد
:لا ابدا بالعكس كان حوار بيني و بينها و بهدوء كمان..
جلال
:و نهاية الحوار دا شنو
محمد
:طلبت الطلاق
جلال
:و طلقتها
محمد
:اي..
جلال
:طيب امها ل راضية كان عندها اي أمراض نفسية و كدا..
محمد
:م اظن...كانت عادية يعني..
جلال
:راضية قالت انو امها بتقول تحضر لبن ب كاكاو و معاهو صبغة..
محمد
:صبغة؟؟
جلال
:اي صبغة و لكن سألتها صبغة شنو... قالت م بعرف..
محمد
:صحي كان متذكر يومها ماما اتحننت و اتجيهت.. و حصل خلاف بينها و بين امي
جلال
: بسبب شنو؟؟؟
محمد
: امي قالت ليها فرحانة عشان أطلقت...
جلال
:كانت شخصيتها ضعيفة
محمد
:منو؟؟
جلال
:ماما..
محمد
:ايوا ممكن تقول كدا هشة و م بتدافع عن نفسها..
جلال
:اها و لمن لقيتوها ميتة كانت شفايفها زرقة..
محمد
:ايوا زرقة بس انت عرفت كيف..
جلال
:الظاهر ي محمد انو امها ل راضية م ماتت موتة عادية..
محمد
:كيف يعني..
جلال
:ي انتحرت ي انكتلت...
محمد وقف على حيلو و قال
:دا كلام شنو ي جلال.. انت واعي بتقول شنو..
جلال
: م هو ي محمد.. مرتك لو ماتت موتة عادية بتك دي م بحصل فيها كدا...
محمد
:وانت الاستنتاج دا جبتو من شوية كلام..
جلال
:ماهو الكلام دا ممكن يوصلنا لحقيقة الحاصل.. انت قلت شفايفها زرقة اكيد اتسممت و ماتت..
محمد
:شن عرفك م عضاها دبيب ولا عقرب ولا حاجة..
جلال
:طيب ي محمد لنفترض ماتت كدا.. راضية الكلام دا بتجيبو من وين بس وريني... الليل كلو بتهلوس ماما و صبغة و لبن و كاكاو... اكيد ي كتلت نفسها ي كتلوها..
محمد
:جلال انت خرفت ولا شنو دا كلام زول واعي
جلال
:انا م خرفت بس انت اقعد مع نفسك و اربط الأحداث.. و الحقيقة تظهر ليك براها...
محمد
:يعني انت قاصد شنو في زول بينا كتل ماما ولا شنو..
جلال
:راضية قالت امك طول السنين الفاتت دي بتجي تقول ليها اعفي لي و ان شاء الله ماما تعفي لي..
محمد باستنكار
:يعني امي كاتلة... انت شن عرفك راضية م بتهضرب و بتجيب كلام من برا رأسها...
جلال وقف و قال
:انا بس وريتك.. رااااضية
جات راضية بسرعة قال ليها
:ارح عشان موعد الدوا..و مسك يدها و قال لمحمد
:سلام عليكم...
محمد
:انت كدا بتخون الثقة ي جلال..
حلال قال ليهو
:انا م بخونها... انا بحاول اوثقها زيادة بس انت م عايز تتفاهم..
و طلع خلاهو... محمد قعد في الكرسي و ختا راسو بين يدينو... مصطفى كان طول الحوار ساكت بس بعد جلال فات جا قعد و قال
:انت عارف ي ابوي حبوبة بتعمل لينا لبن ب الكاكاو لي يوم الليلة لسه بتعمله...
محمد رفع رأسه و قال
:حتى انت ي مصطفى...
مصطفى هزا راسه و قال
: اسأل حبوبة اصلا م كان في غيرها هي و ماما عايشين في بيت واحد...
محمد
:ابدا امي م بتعمل كدا..
مصطفى
:م قلت حبوبة عملتها... يمكن ماما سممت نفسها بنفسها.. عشان شخصيتها ضعيفة.. طيب عايز اسالك طول السنين دي ليه م حاولت تعالج راضية..
محمد
:لانو... سكت و عاين لي مصطفى..
مصطفى قال ليهو
:لانو حبوبة منعتك صح.. لانو هي عارفة انو راضيه عارفة الحقيقة.. بس طول م هي مجنونة ماف زول ح يعرف الحقيقة.. و أي كلمة تقولها ح يقولو مجنونة وكلامها م صح
محمد
:دا كلام شنو ي مصطفى
مصطفى
:تتذكر لمن قبل كم شهر قررنا نعالج راضية اول زول وقف في طريقك منو..
محمد
:....... (لا رد)
مصطفى
:حبوبة طبعا.. و متذكر قالت شنو وقت ناقشتها..
محمد
:....... (لا رد)
مصطفى
: قالت مافي امل خليها مجنونة احسن..
محمد
:يمكن قالت كدا عشان راضية طولت مريضة..
مصطفى
:طيب هي كانت عارفة انو في امل لمن راضية كانت صغيرة و كان ممكن العلاج يكون أسهل من ما هي كبيرة... بس ليه اعترضت..
محمد
:عشان كلام الناس و...
مصطفى بمقاطعة
:كانت طفلة ي ابوي كلام ناس شنو... كان عالجتوها و بقت كويسة و الناس لمت خشمها... م عيب ابدا الزول يمشي لطبيب.. م هدا أسى مشينا... منو من الناس ديل اتكلم... ماف زول... جلال عنده وجهة نظر ي ابوي
و قام خلى ابوهو في حيرة..
______
بعد اسبوع...
جلال
:راضية..
كانت بتعمل في سلطة رفعت عيونها و قالت
:نعم...
جلال
:كيف حاسة..
راضية
:عادي يعني في شنو..
جلال
:لا الليلة عندنا مقابلة و حابب بعدها اجيب الاولاد يتعرفه عليكي..
راضية بفرحة
:بجد... انا متحمسة شديد...
جلال بابتسامة
:يعني م ح تتضايقي...
راضية و هي لامة حواجبها
:اتضايق لي شنو... اصلا انا متحمسة اتعرف على أولادك... ي ربي ح يحبوني..
جلال
:و ليه م يحبوك..
راضية
:عشان انا مرت ابوهم و الشريرة في القصة..
ضحك جلال و قال
:لا الشريرة في القصة امهم م مرت ابوهم...
راضية
:لي امهم عملت شنو..
جلال بتهرب
:خليك منها... أسى البسي و ارح عشان الموعد..
راضية بابتسامة قالت
:تتوقع انو اتحسن في يوم..
جلال
:انت اصلا بديتي تتحسني..
راضية
:بجد..
جلال
:والله... يلا سرعة عشان تتأكدي بنفسك...
ابتسمت و دخلت جوا
_____
د.منذر
رزاز بدموع
:والله كنت محتاجة عشان كدا عملت كدا...
المفتش
:و عشان انتي محتاجة لعبتي بحياة ناس..
رزاز بدموع
:اسفة..
د. منذر
:من متين... من متين و انتوا بتعمله كدا...
رزاز
:شهر
المفتش
:م تكذبي.. احسن ليك
رزاز بدموع
:سبعة شهور..
د. منذر ختا يدو في رأسه و قال
:عشان كدا المرضى م كان في اي تحسن في حالتهم.. لا إله إلا الله محمد رسول الله ﷺ.. و انا الكنت فاكر حالتهم صعبة..
رزاز بكت زيادة... المفتش قال ليها بمغزى
:طيب الاتنين شريكاتك في الخيانة صح..
رزاز هزت رأسها و قالت
:اي الاتنين...
د. منذر بانفعال
:و بعد م ماسكنها بالجرم المشهود لسه بتكذب.... مرام م معاكم انتي و شيراز مشتركين...
رزاز بكت زيادة و م ردت... المفتش
:طبعا انتي عارفة العقوبة شنو... رخصتك ح تنسحب منك و م ح تشتغلي في مجال من المجالات الطبية... و عندك كم شهر تقضيهم في السجن....لانك لعبتي بحياة الناس
بكت رزاز و قالت
:والله والله تاني م بعيدها والله محتاجة عشان كدا...
د. منذر
:و عشان محتاجة تكتلي انسان أحمدي ربنا انو ماف زول مات من وراكم...
اكتفت رزاز بالبكا بس... للأسف ناس كتيرة بتغلط غلط زي دا عشان الحاجة أفضل تشحت و لا تاكل حرام... و فعلا تم القبض على رزاز و شريكتها و الموضوع اتلملم قبل يعمل مشكلة للمستشفى...
*•••••••••••••••••••••••••••••••••••••••••••••••••••••••••••*
*☆يتبــــــــــــــــــــــــــــــــــــــــــــع☆☆*
*♡الكاتبة المجهول ♡*