الحلقه الخامس
*#ماما《05》*
*#بقلمي~الكاتبة ~المجهول 🌼*
★★★★★★★★★★★★★★★★★
بعد م نورين خلص مكالمة... ركب عربيتو و طلع (نورين زوج زينة.. تلاتيني اخدراني متوسط الطول... زينة بت خدورية قصيرة عشرينية)...
مشي جاب الأدوية و أداها للمرضة المتابعة مع زينة و قعد هو كمان برا في واحد من الكراسي.. جلال كان قاعد يتصفح عن مرض الصرع.. لمن قاطعو قعاد نورين جنبو.. جلال رفع عيونو و ابتسم لي نورين.
نورين ابتسم و قال
:نورين حازم... و مدا يدو
جلال مسك يدو و قال
:جلال محمد..
نورين قال ليهو
:ربنا يشفي مريضتكم..
جلال بهزة راس
:امين وياكم يا رب..
نورين
:أختك..
جلال رجع عيونو للأرض و قال
:لا زوجتي وانت..
نورين
:برضو زوجتي..
جلال
:ربنا يشفيها
نورين
:امين يارب
جلال
:كيف جاتها الحالة...يعني من متين وهي مريضة..
نورين رجع بضهرو على الكرسي و قال.
:من سنة... ولدنا حمودي اتحرق في المطبخ بسبب الغاز.. و جاتها صدمة عصبية أثرت في المخ.. مزاجات متقلبة حاجات زي دي... بدينا من وقتها علاج و كنا ماشين في تحسن بس فجاءة م عارف في شنو التوتر عندها زاد و العصبية و الزعل و حالتها رجعت ورا و اتدهورت و الليلة جيت لقيتها بحالها دا و جبتها المستشفى..
جلال
:لا حول ولا قوة الا بالله.. طيب ولدكم أسى عايش..
نورين اتنفس وقال
:الحمدلله عايش بس داخل غيبوبة و اتشوه شديد و راقد في المستشفى حاليا...
جلال
:ربنا يكتب ليكم الشفاء يا رب...
نورين
:امين.. وانت زوجتك مالة
جلال
:والله للان م بنعرف... غير انو لقيناها مضروبة في رأسها لمن كان عندها ١٠ سنين و امها واقعة قدامها ميتة.. و من وقتها و هي رأسها م تمام... و الليلة بدت عندها التشنجات دي...
نورين
:حالتها طولت.. ربنا يشفيها..
جلال
:أنين يا رب
جات الممرضة و قالت
: اتفضلوا.. عشان الدكتور طلب اعمل ليكم تنوير بخصوص مرض الصرع..
مشوا مع الممرضة دخلو غرفة كبيرة فيها شاشة كبيرة.. و عدد من المقاعد... قعدو و بدت الممرضة شرح
:الصرع
هو مرض عصبي.. ينشأ عن اختلال في كهربة المخ.. و دا يسبب زيادة و نشاط في كهربة الدماغ.. ود بينتج عنة تأثر في وعي الإنسان و حركته و الإحساس الجسدي لفترة قصيرة.
عندو اسباب رئيسية زي نقص الأكسجين في الدماغ .
إصابات الرأس.. أورام المخ . التهابات في المخ .... أمراض و راثية و غيرو... يعني المرض م نفسي بس العصبية بتلعب دور فيهو.. المهم لمن الزول تجيهو حالة التشنجات دي م لازم نكتف حركتو في محاولة انو نوقف الحركة لا نجيب مخدة نختها تحت راسو... نزح منو اي حاجة قوية عشان م ياذي نفسو و نحن زاتنا نزح منو عشان ممكن بغير قصد ياذينا.. عندو علاج.. وصفو ليكم الدكتور بحسب اختلاف الحالة.. و شكرا..
_______
بعد يومين..
في البيت
راضية
:جلال انت عمرك كم..
كان جلال قاعد في التلفزيون زي الساعة ٧ المسا لمن راضيه سألتو السؤال دا
جلال
:ليه السؤال دا..
راضية
:ممم ماهو لو زول سألني راجلك عمرو كم مفروض اعمل شنو..
جلال
:ودا منو أن شاء الله الح يسأل سؤال زي دا..
راضية بزهج
:انت الا ترد السؤال بسؤال... م تجاوب و بس
جلال مسح وشو و قال
:49 ارتحتي..
راضية بلوية خشم
:انت اكبر مني ب تلاتين سنة.. انننن.. طيب اكيد متزوج صح صح صح..
جلال قال ليها
:متزوج و مطلق...
راضية
:يييع جايبني زوجة تانية..
جلال برفعة حاجب
:عندك مانع..
راضية
:لا ابدا طيب عندك عيال
جلال
:اي عندي..
راضية
:كم
جلال
:أربعة..
راضية
:منو و منو و منو و اعمارهم كم..
جلال
:خالد 14..منيب12..و سعد7.. و اخيرا محمد3..
راضية
:م عندك ولا بتتتت.. طيب طلقت مرتك لي شنو..
جلال
:وانتي بتسألي لي شنو.. انا قايم داخل
راضية م ردت و لوت خشمها و قعدت في الأرض و ربعت رجولها و سرحت شوية... جلال دخل طلع أوراق تبع حسابات لانو تاجر في السوق... و قعد يشتغل و الزمن راااح و هو مشغول.... عاين للساعة لقاها ١١ و راضية م دخلت جوا طلع لقاها قاعدة في الأرض و مدياهو ضهرها و في دم ملطخ في الحيطة..
______
نورين
:زيونة..
زِينة بابتسامة
:عيونها..
نورين
:تسلم لي عيونك كيف حاسة أسى..
زينة
:أحسن بس جسمي متكسر و راسي ح ينفجر..
نورين و هو بضمها من كتفها
:كلو بهون نحن نمشي على الدوا و بكرا ترجعي كانو م حصل حاجة..
زينة بدموع
:صعب انسى كل م اتذكر منظر حمودي و هو محروق.. بحس روحي بتتسحب مني....و بلوم نفسي.. لأني خليت الغاز شغال..
طبطب عليها و قال
:الحمدلله قولي كل شي مقدر و مكتوب... و بعدين حمودي محتاجنا انتي لازم تقاومي عشانو عشان يرجع لينا أن شاء الله... انتي بس حاولي اتخطي الصدمة.. شوفي أسى بسببها بقت تجيك التشنجات دي و جسمك يوجعك زيادة.. حاولي انسى تمام..
هزت رأسها وقالت
:تمام
ابتسم و قال
:بكرا عندنا مقابلة... عشان نطمن العلاج ماشي كيف..
_____
جلال جرا على راضية بخوف و كان قايل هي عملت حاجة في نفسها بس اتصدم لمن لقاها ماسكة حديدة و في كديسة صغيرة.. كتلتها.. ضربتها و شرشرت دمها و كان وشها ملطخ و منظرها بشع...
جلال بصدمة
: راااضية انتي عاملة شنو..
راضية ضحكت و قالت
:ماما قالت اكتلها..
جلال و هو بيسحب راضية يدها و بقول
:ماما بتاع الساعة كم انت جنيتي..
راضية لزتو و رفعت الحديدة من الأرض و هي بتضحك بطريقة م طبيعية و قالت
:انت و بابا لعبتو على و ح انتقم منكم...
جلال خطف الحديدة م يدها و رماها بعيد و جرا راضية الحمام و قال
:لا لا لا انتي حالتك بقت ماشة أسوأ... بكرا نمشي الدكتور و نشوف في شنو لانو تصرفاتك اتغيرت شديد...
راضية بقت تصرخ و تقول
:فكني.. فكني.. انا م عايزاكم... انا عايزة ماما.. فكنني.. ماما شوفي بيعملوا شنو....
و جات واقعة و جاتها حالة الرجفة... جلال جاب مخدة ختاها تحت رأسها و بقى مستني... لاحظ انو الرجفة أتجاوز الخمسة دقايق ودا وترو جدا... و بقى خايف.. و مستني تأتي يوم بفارغ الصبر...
*•••••••••••••••••••••••••••••••••••••••••••••••••••••••••••*
*☆يتبــــــــــــــــــــــــــــــــــــــــــــع☆☆*
*♡الكاتبة المجهول ♡*