الحلقه الاولى
*#ماما《01》*
*#بقلمي~الكاتبة ~المجهول 🌼*
★★★★★★★★★★★★★★★★★
سلام سلام يا ام العريس
سلام جاييياك عروس تمام
جينا جينا يا ام العريس
جينا بموية رشينا يام العريس
سلام سلام يا ام العريس
سلام جايياك عروس تمام يا ام العريس
وصلنا البيت و الزغاريد و أصوات البوري كنت مفصولة عن العالم بفكر في الحصل دا نزولني و زفوني لي جوا بيتي و قعدو حبة.. بعدها ضيفوهم موية و عصير و حلاوة و طلعو...
جا داخل العريس... طبعا وشي مفتوح لا مغطى لا حاجة.. كان راجل عجوز أكبر من ابوي يمكن.. قمت وقفت و طلعت برا الاوضة جا لاحقني قال لي
=على وين...
عاينت ليهو بغضب و قلت
: جهنم جاي معاي.. زح من وشي..
مسك يدي وقال لي
:انتي حاليا مرتي..
قلت ليهو
:و انت م الراجل الأنا وافقت عليه انت و أبوي كذبتو على و حتدفعوا التمن غالي..
عاين لي بحدة وقال
:اصلا انا دافع و كتير شديد.. قايلة القروش الابوك بجيبها ليك دي من وين.. انا بدفع حقك من كنتي 12 سنة..
دفرتو وقلت ليهو
: ي راجل انا من يوم امي ماتت لبس جديد م لبست... تجي تقول لي صارف على...و القروش اديتها لمنو امشي شيلها منو.. انا ماشة..
قال لي بصوت عالي شوية
=كنت بدين ابوك بالملايين.. و لكن يقول م عندي بقول ليهو على راحتك لانو اصلا انا كنت خاتي عيني فيك.. و يوم شفتك كبرتي طابت حقي من ابوك... وطبعا م كان عندو خيار غير يديني ليك.. مع شوية تخطيط كدا.. الشغلة ظبطت..
عاين لي بضحكة و قال
=لو رجعني بيتكم بعد م ابوك باعك يبقى م عندك كرامة... خليك في العز هنا احسن.. و إلا ح اسجن ابوك..
عاينت ليهو وقالت
=انا لو فضلت هنا ي دوب يكون م عندي كرامة... عن اذنك ي استاذ.. ماشة ارجع حقي
طلعت من البيت و انا الغضب مالي وشي... وقفت اتوس و ركبت قلت ليهو
=وديني حي الشرقية سرعة..
عاين لي ب استغراب و قال بنبرة تحذير
:مهما كان الحصل بس م ينفع تشردي و توطي رأس ابوك في الطين..
رفعت ليهو عيوني و كلها شرار و قلت
=اشرد شنو انا عرست و انتهى... تمشي من سكات احسن ولا اشوف واحد تاني
هزا راسو و قال
:طيب الحساب..
قاطعتو و قلت ليهو
=انت امشي زي م انا بوصف ليك و ح تستلم المبلغ الانت عايزه..
اتحرك الاتوس على الحي و وصفت ليهو لمن وصل البيت... الرجال لسه قاعدين في كراسيهم و الحافلة الودتني ي دوب شكلها وصلت.. نزلت و أخوي من شافني وقف مهجوم قال لي
:راااضية انتي الجابك شنو..
قلت ليهو بغضب
=تغشوني انا ي ولد ابوي.. اصبرو لي.. حاسب بتاع الاتوس و كلامنا م انتهى..
كنت ماشة بغضب شديد دفرت الباب بقوة و دخلت النساوين جت وقفو عاينو لي بصدمة ٬٬٬ حتى ملابسهم م غيروها...مرت ابوي وقفت و قالت
=سجمي راااضية جابك شنو... م يكون الراجل رجعك سجمي ي يمة ي الفضيحة..
انفعلت و صرخت و قلت بصوت عالي
= هو لحقت تحصل دخل'ة عشان تحصل فضيحة.. انا الجاية افضحكم... وينو وروني وينو الاسمو ابوي يجي يشرح لي الحاصل..
ابوي كان قاعد مع حبوبتي جوا جو هو و هي طالعين قلت ليهو بصوت عالي
=انت غشيتني صح وينو.. وينو العريس الجبتو لي هااا..
قاطعني وقال
=م غشيتك.. بس داك شرد.. و ماف زول قبل بيك غير دا..
ضحكت و رفعت ليهو حاجب وصفقت وقلت
=اي وااااضح انو شرد.. الراجل حكي لي اي حاجة... انت بعتني بالرخيص... وانا بقول ابوي شغل الدكان دا مخليهو مرطب كدا كيفن ..
جا ضربني كف وقال لي
=قليله الأدب..
رفعت وشي و قلت ليهو
=اي قليلة ادب. ما هو انت م كنت فاضي تربيني..
رفع يدو و صرخ في وشي وقال
=راااااضييية.. اقسم بالله م تلمي لسانك دا اقطعوا ليكي..
قلت ليهو
=هدا قدامك اقطعو بس م قبل م احكي الحقيقة و قسيمتي تجيني راجعة..
قال بصوت عالي
=راااااضييية..
قلت بصوت اعلى
=م اسمي م ااسسسمي... اسمعوا ي جماعة.. ابوي المحترم سبعة سنين بيشيل من راجل أكبر منو قروش و طبعا الراجل قال ليهو فجاءة كدا عايز قروشو... طبعا ابوي بتاع الدكان من وين يجيب قروش سبعة سنين..م هو حق الاكل الا نشحده شحده.. بس الراجل اقترح عليه اقتراح حلو شدييييد انو يديه وحدة من بناتو.. و طبعا عشان الست المحترمة مرت ابوي قادرة و ناهرة بناتها م يعرسو واحد لامواخذة يعني خطوة و القبر... ف اتذكر انو عندو بت مرمية هنا مع حبوبتها و قرر يزوجها ليهو... بس طبعا هي م ح توافق وهو م ح يقدر يجبرها عشان كدا غلط... عشان كدا مشي جاب عريس و القمر واحد.. وجاهة و ترطيبة و اييي حاجة تتمناها اي بت.... طبعا م صدقت و وافقت و عرسو لي الراجل العجوز دا على أساس انو دا العريس بس اجي اتفاجاء انو الاتقدم لي واحد و العرستو واحد تاني لا و الف لا ي ابوي.. م راضية التكذب عليها..
ابوي كان م باقي ليهو الا يكتلني.. لكن بي وين وانا السداد لي ديونو.. جدعت القرمصيص في الأرض و قلت ليهم
=زفتى ورقتي اتفضل جيبها لي..و شوف وحدة من بناتك زوجتك المصون تقبل تسد ديونك..
دخلت جوا قعدت في السرير ابكي.. لانو ابوي كذب على كذبة ولا في الخيال زاتو...
امي اتوفت وانا عندي 10 سنين.. و قبلها كان عندو زوجة عندو منها ولد اسمو مصطفى حاليا عمرو 23 سنة .. و بعدها بكم شهر بس من وفاة امي ابوي أتزوج سعاد.. متزوجة من قبل عندها بتين من زوجها الأول منال و مهاد أكبر مني...ولدت ليهو ولدين تاني... و من يومها عايشة مع حبوبتي انا و مصطفى و هو مع سعاد نادر اصلا م يجينا... بس م كنت خاتة في حسابي انو غدار و ح يغدر بي بالطريقة دي...
عارفة انو غلط اتكلم معاهو و أعلى صوتي... بس.... بس انا محروقة قلبي قايدة فوقو نار... م ح تبرد ابدا ابدا...
قطع تفكيري ابوي و هو داخل الغرفة بغضب و باين م ناوي على خير بس م ح اسكت و لو جابت شكلة بتشاكل...
*•••••••••••••••••••••••••••••••••••••••••••••••••••••••••••*
*☆يتبــــــــــــــــــــــــــــــــــــــــــــع☆☆*
*♡الكاتبة المجهول ♡*