الليلة الحمراء - الفصل 12 - بقلم مروة أغا - مكتملة | روايتك

‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ➖➖➖➖➖➖➖➖➖ #الجزء_الثاني_عشر (12) : #اللـيـلة_الحمـراء_بقلم_مروةآغا التفتو الكل لمكان الصوت وصرخو جمال وعبود برعب لما شافو شكل البرنس الحقيقي: نرجس هاي أنت !؟ شهق جمال برعب: أنت ك.ك.كيف لسا عايشة !؟ وقفت نرجس الكبيرة أم نرجس الصغيرة بتحدي وهي بتقول: لكن مفكر حالك قتلتني مشي عبود وبعد عن رجاله وهو بقرب منها وبيهمس بصوت مبحوح: نرجس أنت البرنس ضمت ايديها لصدرها وهي بتقول: أي أنا هي البرنس يلي دوختكن كل هالسنين كتار بفكرو انو لعبة كرسي الإعتراف بتخلي الانسان يعترف بكل اغلاطة… وهاي هي الخدعة… لأن لما منعرف انو الأضواء مسلطة علينا ولازم نعترف لا محال رح نعترف اكيد بالحقيقة بس رح نجملها اكيد لتطلع مزينة أما الحقيقة الأساسة بداخلنا بتظهر عند #نقطة_الصفر هاي النقطة يلي ما بيحسب حسابها حدا بتجي فجأة بلا مقدمات او انذارات … بيخضعلها معترف بكل الحقايق من دون تجميل !! قال جمال بصدمة: ب.بس.بس أنا قتلتك بأيديي التفتت لعند غسان وهي بتقول: بس غسان ساعدني بعد مارميتني بالمي عملت حالي غرقت واجا غسان وساعدني لطلعت واتوجهت لبيت البرنس جمال: كيف هيك بس انت ماكنتي بتعرفي تسبحي ام نرجس: مين قلك اني مابعرف اسبح شي يوم سألتني جمال: أنت كنتي بتستنجدي فيي لساعدك ضحكت وهي بتقول: هاد كان جزء من الخطة ارتكت نرجس على مراد بعدما حست ركبها انشلو ولسانها ارتبط من الشوفة يلي شافتها انسانة بالخمسينات بتشبهها كتير نفس لون الشعر والعيون ولون البشرة بلعت ريقها وهي بتهمس بصوت يادوب مسموع: أنت مين؟ شدلا على ايديها وقربها من خصرها لجهته وهو بقلها: نرجس شو صرلك لا توقعي اتطلعت ام نرجس ببنتها بحنية وحاولت ما تضعف بس نظرة نرجس كانت قوية وقادحة متل الشرار صرخت البرنس(أم نرجس): مراد ليش نرجس لسا ماسافرت !؟ مراد: ماقدرت سفرها عنيدة كتير لحقتني لهون بعدت عنو وهي بتقلو بصدمة : أنت كنت بتعرف انها ام……… سكتت ماكملت جملتها بس هو قلها: لا والله ماكنت بعرف بس يلي بعرفو انو طلبت احميكي وسفرك لتقعدي بمكان بعيد عن كل شي حسيت هيك رح أمن عليكي مشيت متل السكرانين وهي بتقرب منها: أنت عايشة مسكتلا امها ايديها الاثنين وهي بتقلها: أي ياروحي يا ماما أنا عايشة دفشتلها ايديها بقرف وهي بتقلها: أوعك تقوليلي ماما أوعك فهماااانة قربت أمها منها وفتحت عيونها مصدومة وهي بتقول: أنا اجيت وكشفت حالي كرمالك جمال: ماني عم صدق كيف هيك صار كيييييف !؟ أم نرجس: هاد يلي طلبوه يصير تمثيل لموتي نرجس بصراخ: ميييين !! ولييييش ؟؟ أم نرجس: يلي حطوني مكان البرنس القديم بعيون حمر غرقانة بالدموع واجهتها وهي بتضحك: ههههههه لعبة … هههههه كل حياتي لعبة بعتيني مشان اسم وشغل هههههههاااااي مسكها مراد وهو بقلها بقلق: نرجس طولي بالك شو صرلك دفشتو وهي بتقول: شوف امي وابي طلعو حواليي وانا مابعرف ههههه عم يلعبو عليي لعبة الغميضة ههههه ضحكت لحتى نزلو دموعها وبلشت تشهق وتبكي … ترجس بهاللحظة نسيت العناد والكبرياء وبينت نرجس الصغيرة الخايفة والمحتاجة همسلا مراد: خلينا نعرف القصة بكيت من كل قلبها وهي بتقلو: لك تركت بنتها بين ايدين الرجال وماسألت عني كل هالسنين كرمال اسم البرنس باعتراض قالت أم نرجس: لاااا أنا ماكنت بعرف وينك نرجس: كذب كلو كذب البرنس مستحيل مايعرف كل شي أم نرجس: لا ماكذب البرنس بيعمل حالو أنو بيعرف بس هو بالحقيقة مابيعرف شي … أنا بحياتي ماشفتك حوالين جمال رغم اني براقبو دائماً بس ما شفتك معو ابداً لثانية فكرت نرجس … صحيح جمال بحياتو مااظهر للعلن علاقتو فيها كل شي كان حكي بالسر انو كفلها بالميتم وحتى كل لقائاتهن كانت ببيتا بس او بمكتب الشركة بس زواجها الفاشل من عبود أظهرها للعلن انها بتقربو صرخت نرجس: حاج كذب ماكنتي بتعرفي اني على اسمو أم نرجس: لا ماكنت بعرف لو بعرف ماتركتك معو وهلق لما عرفت بوجوك طلعت واجيت لانهي كل شي وسافر لعندك هزت راسها بقسى وهي بتقول: كذب كل هاد كذب الريس عبود: نرجس ماني عم صدق انك عايشة أم نرجس بكبرياء: لا صدق الريس عبود: أنا لما شفت نرجس بيوم حفلة اليخت ماصدقت شقد بتشبهك وقتها قلت بدي اياها لو شو ما صار … يا اللله كيف هيك الحياة طول شبابي كنت احلم فيكي بس طلعتي عم تلعبي علينا كلنا ام نرجس بصراخ: لانكن كلكن كنتو عم تلعبو عليي لتوصلولي كان بدكن جسمي وجمالي بالاخص انت ياعبود سمعت كلمة امك وتركتني نزل راسو عبود وهو بقول بحزن: ماكان طالع بايدي شي بس جمال قال: بس انا كنت معك أم نرجس: كذاب كنت عم تشتغل هيك طلبو منك تتقرب مني لحتى تعلمني كيف صير قوية وكون سلعة لتمشي تجارة السلاح قرب جمال منها وهو بقول: ليش هيك عملتي فينا أم نرجس بحقد: اتعلمت بهالحياة انو في ظالم وفي مظلوم … ونحنا لازم نختار نوعنا فاخترت كون ظالمة مامظلومة وهذا يلي عملتو بعد يلي شفتو من معاملة بالميتم من أكبر واحد لحتى توصل للطباخ كلن أخبث من بعض … ولما طلعت فكرت الحياة برا أحسن وللأسف طلعت أسوأ … كل شي سواااد وكلو بدو ياكل بعضووو … أي تعبت لصرت البرنس تاجرت بكل شي وصار معي مصاري … وكل هالشي لاني بخاف … أي أنا بخاف أرجع صير مظلومة بيوم من الأيام والناس كلها وحوووش عم تاكلني … بخاف من أي حدا يعاملني بقسوة أو صير نكرة بحياة حدا وهالمرة انا أخترت طريقي نرجس بكره: بحياتي ماشفت اخبث منك أم نرجس: أنت الوحيدة يلي لازم تحسي فيي لانك عشتي يلي عشتو نرجس: أي صح انا عشت يلي عشتيه بس مستحيل صير متلك فهمانة !؟ جمال: كيف هيك صار لهلق ما عم أفهم شي أم نرجس: الخطة كانت انو استلم مكان البرنس يلي مات … تجار الأسلحة يلي فوق طلبو برنس جديد عنا بالمنطقة ورشحوني لهالمهمة وكان لازم يزوّرو موتي بس ماكنت بفكّرة بهالطريقة … هددوني ببنتي وفهمت انو يلي بيشتغل هيك شغل مالازم يكون عندو نقطة ضعط وانا كان عندي بنتي وهاد أكبر غلط … وانا اخترت اتركها عند أبوها لانو وحدو بيحميها وبعدين فجأة عرفت انو ابوها تركها … بقيت راقب جمال شهور وماكنت شوفو معها طلع حاططها بمكان سري حتى اهلو ماكانو بيعرفو عنها شي أبدا كل يلي عرفوه أني اختفيت كلياً من الوجود … والكل فكرني اخدت بنتي وهربت نرجس بحقد: طيب وأهلك ماسألو عنك أم نرجس: جمال اتزوجني من ميتم وهالشي خلا اهلو يتبرو منو بس أنا كنت بحب عبود وعبود اهلو مارضيو فيي بس لما جمال ساعدني وافقت عليه وصبرت معو بس عرف فجأة اني قبل كنت بعلاقة مع عبود وهالشي خلاه يفقد عقلو ولما عرفو الكبار القصة قررو كمل بهالتمثيلية لحتى يوصل جمال لقتلي وهني يساعدوني ويأمنو على حياتي وحياتك جمال بصدمة: يعني أنت ماخنتيني معو نزلت راسها أم نرجس وهي بتقول: كل شي كان لعبة من البداية علموني كيف صير قوية وجبلن يلي بدن اياه تحت اسم زوجة جمال جمال: بس أنا حبيتك وحميتك بروحي أم نرجس: كذب أنت خفت منن وماقدرت تحميني بس حميتني من اهلك وكلام الناس وعملتني زوجتك كرمال الشغل بس من الكبار ما حميتني ضحكت نرجس وهي بتقول: مشان هيك ساواني متلك أم نرجس بحزن: لا أنت مانك متلي انت لساتك بيضة نقية متل الشاش ومارح اسمح حدا يوسخك نرجس: بعد شووو ضربت على قلبها وهي بتقول: ماهاد صار أسود بسببكن أم نرجس: لا مشان الله لا أنا هون لاحميكي نرجس بصدمة: ماني عم صدقك انت همك السلاح والمصاري قربت أمها منها وقفت قدامها وهي بتقلها: لا صدقي أنا كنت أدا بس طول هالوقت لهاد وهاد بالبداية عبود وبعدين جمال وبعدين يلي اكبر منن صرت لعبة بس لحافظ عليكي نرجس بحقد: أنا بكرهك أم نرجس بصدمة: بس أنا طلعت لاحميكي سألتو نرجس لجمال: ليش سميتني على اسمها جمال: لانك بتشبهيها نسخة عنها سميتك وعطيتك كنيتي بعدما عملتلك تحليل نسل هيك لحتى ابقى اكرهك لانك بنتها للخاينة ولا يوم يحن قلبي عليكي … وقررت اتركك بالميتم نرجس بقسى: كنت كل يوم ادعي لاقي امي وابي بس هلق انا ندمانة على كل دعوة دعيتها كرمال التقي فيكن … لك ياريتني متت ولا اعرف يلي عرفتو هلق أم نرجس: والله لو عرفت فيكي ماكنت تركتك حاولت لاقيكي بس ماقدرت لوقت ما اجا غسان وحكالي ع الشامة يلي بايدك وقتها قررت شوفك لأتأكد نرجس: يعني لما عطيتيني المهمة مراد بصدمة: مهمة شو التفتت وهي بتبرر: ماقدرت خبرك اتنهد وبلع ريقو وزم شفايفو وماحكا ولا حرف لان أصلاً الموقف مامتحمل أم نرجس: أنا لما عطيتك المهمة كنت بدي تشتغلي عندي لتساعديني لاني عرفت شقدك قوية بس تاني يوم قبل المهمة خبرني غسان على الشامة وقلتلو يلحقك ويوقف المهمة أنا اصلاً قبل بيوم ماشفت شكلك منيح من الظلام والا كنت عرفتك فوراً انك بنتي نرجس لغسان: وأنت منين بتعرف بالشامة مراد: أنا يلي قلتلو لأن من زمان لما غسا وفريد كانو مع ابوكي وأمك أنا لحقتن وشفتك مع فريد بالسيارة وجمال اجا متنكر بنظارات ودقن وطاقية ماعرفتو ابداً بس كنت بتذكرك ولما شفت الشامة قلت لازم خبر غسان وفريد نرجس: ماني عم افهم شي والله ماعم افهم قرب مراد ومسكها من ايديها وهو بقول: من زمان لما تركت اهلي كنت اشتغل مع غسان وفريد شغل براني ويطلعلي مصاري ومرة لحقتن بالسرقة وشفتك بالسيارة مع فريد لما جمال قتل أمك نرجس: يعني جمال استأجر رجال ليساعدوه غسان: اي استأجرنا لنساعدو بخطف أمك بس قبل ما ننفذ المهمة اجو رجال لعندب وعطوني مصاري كتير وطلبو مني احمي الام من الموت وأنا نفذت المهمة جمال بحقد: يا كلاااب كنتو عم تلعبو عليي أم نرجس: لا كنت بدي استناك لتقتلني سقف الريس عبود وهو بقول: حلووو كتييير تمثيلية حلوة هلق كلكن طلعتو بتعرفو بعض وانا مالي خبر أم نرجس: أنت أول واحد بدك تخرس لولاك ماكنت وصلت لهون انا جاي هلق لحط النقاط على الحروف الريس عبود باستفسار: هلق الشحنة وين!؟ أم نرجس: استلمتا وسلمتا جمال: شووو وقبضتي حقا كمان أم نرجس: بدي ابعد عن الكل وبلش حياة جديدة مع بنتي وهاد الشي بكلف كتير جمال: له يارخيصة رجعتي عملتيها أم نرجس: خراااس نرجس: خلللص اسكتو واتركوني بحالي وأنا مابدي إياكي أم نرجس: كيف !؟ … بس انا مستحيل اتركك بعد مالقيتك نرجس: أنا ماعاد بدي حدا منكن بدي عيش لحالي وارتاح لابدي جمال ولا بدي اياكي ياااا نننرجس جمال: يعني هلق بفهم انو نحنا طلعنا بلا مصاري!؟ اتطلعت نرجس بقسى على جمال يلي هو ابوها وشافتو شقد رخيص ولاحق المصاري أم نرجس بتحدي: أي لانكن من البداية مجرد أداة لتنفيذ مخططاتي وهلق نفذت الانتقام منكم جمال بحقد: لا والله ماحزرتي تاخدي كل شي بعد ماتعبت لوصلت حمل مسدسو ووجهه على أم نرجس ورجال البرنس كلن وجهو سلاحاتن عليه جمال: يلا يا حية الكوبرا صار وقت توقفي بخّ سمّك علينا كلنا ولازم نحط كلمة النهاية للبرنس ضحكت بقسى وهي بتقول: حية الكوبرا يلي عبيتوها سم وحقد رح تسممكم بعدما حطمتوها بايديكم ورح ابقى البرنس المتربع على عرشكم يا كلااااب ضحكت نرجس بدموع وهي بتقول: حلو كتير أمي وأبي بدن يقتلو بعض الريس عبود: هههههه والله انكن حثالة … الحقوني مشي هو ورجالة وكان بدو يطلع برا المستودع صرختلو أم نرجس: وقف عندك بدي صفي حسابي معكم الريس عبود: شو قصدك أم نرجس: مراد خود نرجس وطلعو لبرا مراد لنرجس: خلينا نطلع ونروح نرجس: لوين بدي روح كمان هلق بدك ترميني متل كل مرة مراد بصدق: أنا همي أحميكي نرجس: لا تهتم فيي أصلاً أنا ميتة من زمان كانو لسا الرجال متأهبين وموجهين سلاحاتن على بعض صرخ جمال: عطيني حصتي من الشغل بتركك بحال سبيلك أم نرجس: ماتحلم انا تعبت لوصلت لهون ومستحيل اترك هالشحنة الكبيرة تروح الكن الريس عبود: بدي احكي مع تجار السلاح وخبرهن كيف خنتينا أم نرجس: خرسو كلكن مابدي اسمع صوووت حداااا انا البرنس ما حدا بيطلعلو معي اتطلعت نرجس على امها وشافت التكبر والغرور مسيطر عليها تفت عليها وهي بتهمس: رخييصة ضرب جمال رصاصة بالهوا وهو بقول: التانية رح تكون بنص قلبك … إذا المرة الماضية ما اتأكدت من موتك فيني هلق ادفنك بمكانك اتراجعوا الكل واتخبو وكانو بحاولو يهربو سحب مراد نرجس وقعدو ورا حاوية كبيرة وقعد معهن باسل وهو بحط ايدو على جرحو مراد: باسل فيك شي باسل: لا بس موجوع #بقلم_مروةآغا واتفرقو عبود ورجاله وجمال ورجاله والبرنس ورجاله كل واحد اتخبى بمكان وبلشو يقوسو على بعض ونرجس كانت قاعدة بالارض وهي حاطة ايديها على اذنيها وبتبكي بحرقة وهي بتسعل بقوة وبتحاول ترتب تنفسها ومراد كان بقربها محاوطها وخيفان عليها سألها: وين بخاخك رفعتت ايدها لتأشرلو على شنتتها طالعلها بخاخها من وبخلها حتى ترتاح وركالها راسها على كتفو أما باقي الرجال كانو بحاولو يقتلو بعض والجثث عم ترتمي بالأرض جثة ورا جثة وأم نرحس بقيت محتمية برجالها وهي بتراقب نرجس من بعيد وفجأة جمال لمح أم نرجس عم تحاول تشوف بنتها وين … بكل حقد استغل الفرصة وصوب عليها ليقوسها وصابها بايدها اليسار عند الكف صرخت ام نرجس بألم وصرخت نرجس برعب والكل كانو مصدومين من الصوت بس جمال كان بيضحك لانو صابها صرخ من بعيد: الثالثة اكيد رح تكون بقلبك بس أم نرجس كانت معصبة كتير من تصرف جمال وقفت وهي بتقول: ياقاتل يامقتول لكن بايدها السليمة حملت السلاح من أيد غسان وطلعت من مخبأها وضربت لجهة جمال عدة رصاصات وهو مالحق يتحرك من مكانو سمعو كلن صرخة جمال وقفت نرجس وطلعت من مكانها لتشوف جمال واقع بالأرض وتحتو صار بركة دم صرخت أم نرجس بالكل: وقفووووو رصااااااص وبالفعل الكل وقف بعدما امر الريس عبود رجاله وبأجرين بترجف مشيت أم نرجس لوصلت لعند جمال … وقفت قدامو وهي بتطلع عليه وفوراً دمعو عيونها … هزتو باجرها شافتو ميت … وفواً اتذكرت ايامها القديمة معو هو صح ساعدها بالميتم بس بالمقابل باعها للبرنس القديم نزلت راسها بقسى وبلشت ترجف وهي بتمسك كفها وبتحاول تحبس الدم وهي بتغمض عيونها بألم بنفس الوقت قربت نرجس ومشين بين الجثث وبرك الدم وهي بتشوف جمال كيف مرمي على الأرض وتحتو بركة دم وامها فوق راسو بتبكي صرخت نرجس برعب: قتلتيه !! التفتت لعندها وهي بتقلها: للمرة الثانية كان بدو يقتلني من دون مايتردد … ويا قاتل يا مقتول بدون تصديق قالت: لاااا مستحييييل جمال ماااات قربت لمستو وهي بتقول: قووووم جماااال قووووم وقفت وضربتها على صدرها وهي بتقول: ليش قتلتيه !!!! بنفس الوقت سمعو صوت سيارات الشرطة صرخ الريس عبود: شو جاب الشرطة جاوبو باسل: بعد شلال الرصاص يلي صار أكيد بدن يجو مسحت دموعها أم نرجس برعب وقربت منها ومسكتلها ايدها وهي بتقول: امشي نروح ونطلع من هالمكان انا جهزت كل شي للسفر دفشتلها ايدها وهي بتطلع على جمال بحزن: كيف هيك قتلتيه قربت منها مصدومة وهي بتقلها: زعلانة عليه بعد كل شي عملو فيكي بقرف قالتلا: رغم كل شي عملو فيي على القليلة دار بالو عليي ماخلاني لا ابرد ولا جوع صح ماكنت رح اعتبرو أبي بس ماكنت بدي شوفو هيك ميت !! قرب مراد منها وهو بقول: نرجس خلينا نطلع الشرطة برا بنفس الوقت كان الريس عبود بحاول يهرب هو ورجاله قرب غسان وهو بقول: لازم نطلع ليكي جرحك عم ينزف والشرطة رح تلقطنا وخصوصاً بعد موت جمال مارح يتركوكي أم نرجس: مستحيل اطلع بلا نرجس التفتت لعندا وهي بتقلها: تعالي نروح ماجاوبتها وكانت بتبكي وهي بتشوف جمال ومراد كان بقربها بهديها اتدخلت الشرطة والشرطي صرخ من برا: المكان محاصر كلكن ارفعوا ايديكن وطلعو وفوراً اقتحمت الشرطة المكان وأول مين التقط البرنس(أم نرجس) ورجاله لأن كانو الأقرب للباب وانتشرو عناصر الأمن وقبضو على كل الموجودين بقيت نرجس متمسكة بمراد وماتركتو وهي بتقلو: ما تتركني مراد: رح ابقي معك نحنا مادخلنا بشي بس الشرطي سحبها وهي عيونها بين مراد وجمال مشيت وهي بتطلع حواليها لتشوف جثث مرمية وبرك دم معبية المكان لتجي عينها على جمال لتشوفو كيف هيك بلا حول ولا قوة مرمي بالأرض بإهمال … هالمرة كانت ليلتها #ليلة_حمراء بامتيااااز !! يالطيف كيف قوة الإنسان وجبروتو بتنتهي برصاصة !! فرقوهن عن بعض وركبوهن بسيارات مخصصة وحدة للرجال ووحدة للنسوان وحاولو يلفو جرح ام نرجس حتى يوقف نزف قعدت نرجس بقرب أمها بالسيارة لفت وجهها عنها وماواجهتها أم نرجس بحزن: كنت عم دافع عن حالي نرجس: مابدي اسمع صوتك أم نرجس: ماما أنا جهزت كل شي لنكون سوا نرجس: قلتلك مابدي اسمع صوتك فهمانة وأصلاً أنا مابشرفني تكوني أمي بسيارة الرجال كانو الكل قاعدين مواجه بعض الريس عبود: أنت كيف بتعمل هيك اتنهد مراد وهو بقول: شو كان بدك اعمل وبعدين انا سمعت كلام البرنس رئيسك الريس عبود: أخس عليك باسل لمراد: شفت كيف قوستو اوووو كيف مافرق معها غسان: بكفي تخبيص مراد لغسان: وينو فريد!؟ غسان: مع الشاحنات سكت وهو بفكر بنرجس وحالتها خلال دقايق كانو وصلو لقسم الشرطة ووقفوهن كلن بقرب بعض عبود وقسم من رجاله لأن الباقي هرب اما رجال جمال هربو بعدما شافوه ميت وأم نرجس ورجالها ومراد ونرجس وباسل … كانو الكل واقفين بقرب بعض قدام الظابط الريس عبود: يلي صار مادخلني فيه الظابط: هلق رح نحيلكن للتحقيق ومنسمع كل شي منكن الريس عبود: أنا مستحيل اسمح بهيك شي بدي احكي مع المحامي الظابط: احكي مافي مشكلة بس نحنا شفنا شحنة سلاح طلعت من المكان يلي كنتو فيه اتطلع عبود لعند أم نرجس وهو بقول بلؤم: على أساس السلاح صار بعيد ماردت عليه التفتت ورفعت راسها وهي بتقول: متل ماخبرتكن في شحنة سلاح كانو موجودين عبود وجمال ليستلموها ويبعتوها انصدمو الكل من كلام أم نرجس وهي بالأول حكت غير كلام كلياً مارفلا جفن أبداً وعيون الكل كانو عليها سأل الظابط: والجثث يلي شفاها مين قتلها الكل بقي ساكت بس نرجس كانت بدها تحكي التفتت لعندها أمها وسكتتها وهي بتقول: انا قتلت جمال أي لان كان بدو يقتلني اما باقي الجثث انا مادخلني فيها كانو رجال عبود وجمال دمعو عيونها وهي بتكمل: لقيت حالي عم دافع عن حالي الظابط: سلاحك مرخص؟ أم نرجس: أي مرخص أصلاً أنا بشيلو معي حماية الظابط: وأنت شو كنتي بتعملي هونيك أم نرجس: أجيت أخد بنتي لان لحقت ابوها الريس عبود بلؤم: كذب اجت تأمن على شحنة السلاح وتقتل زوجها القديم وتروح أم نرجس: لأ هالكلام ماصحيح الريس عبود: حاااااجتك كذذب صرخ الضابط فيهن: بكفي ولا حرف ضغط الجرس وهو بقول لرجاله: خدوهن وحطوهن بالحجز قبل ما تطلع صرخت أم نرجس: ماحدا دخلو بنتي ما دخلها ولا زوجها ولا حتى الرجال بس عبود ويلي انقتل جمال هني المسؤولين عن كل شي الريس عبود: كذاااابة الظابط: خدوهن لنبلش تحقيق معهن هاد هو عالم الكبار عايشين بحرب بين بعضن … حرب السلطة والنفوذ والقوة والمال عالم مليان بالأسرار والمخالفات والجرايم وماخفي كان أعظم … يلي بيدخلة ما بيقدر يطلع منو بسهولة عالم مليان كره وحقد … عيونن مليانة خبث وذكاء وصرامة واصرار لتحقيق الذات المسلوبة والمهانة على مر الأيام وانتهى اليوم المشؤوم على الجميع بليلة حمراء صبغت كل الموجودين بدمويتها وختمتهن بختم الكره والحقد لبعض … ماكانو متوقعين يجي عليهن هيك يوم وهيك ليلة تكون كلها حقيقة مرة مصبوغة بلون الدم……!! ***** انفتح باب الزنزانة وطل منو الظابط وعلى كرسي التحقيق كانت قاعدة أم نرجس مضمدة ايدها بعدما عالجولا اياها وطالعو الرصاصة قعد مقابيلها وهو بقول: رح بلش فيكي بما إنك بتعرفي كل شي هزتلو راسها برضا وهو قال: يلا بلشي من الاول منين بتعرفيهن وشو أخدك لمكان تهريب السلاح اتنحنحت وهي بتقول: بنتي بتشتغل بشركة ناجي بيك شريك عبود وهو مسافر لهيك استلم شغلو جمال باستلام البضاعة المستوردة وهيك عبود وجمال كانو رح يستلمو … بنتي بتشتغل عندن وكمان زوجها بيشتغل عند الريس عبود لهيك كنت خيفانة علين ورحت لشوفهن وعرفت انو في تهريب سلاح بهاليوم وخبرت الشرطة عنهن بس كمان كنت بدي احمي بنتي وطالعها من هالشغل يلي أبوها حطها فيه الظابط: يعني الموضوع كلو بخص عبود وجمال يلي انقتل هزتلو راسها وقلبها من جوا ميت خوف الظابط: لكن بنتك وجوزها شو بيعملوا هونيك أم نرجس: زوج بنتي أنا بعتو يساعدني لنخبر الشرطة وبنتي لحقتو ع أساس لتشوف أبوها وصار يلي صار الظابط: بدي تفاصيل احكيلي شو صار !؟ أتنهدت وهي بتقول: يلي صار انو زوجي القديم حاول يقتلني لما شافني الظابط: ليش !؟ أم نرجس: لأن كشفتو شو بيشتغل قدام بنتو رفعت كتافها بقلة حيلة وهي بتقول: والله ماكان بدي أعمل هيك فجأة حملت السلاح لاحمي حالي الظابط: لما اتصلتي بالشرطة خبرتيهن انو في تهريب سلاح ع المينا بس يلي عرفناه انو سيارة السلاح طلعت من غير مكان ماكنتو متواجدين أم نرجس: ماهني كملو شغلن وطلعو لهالمكان فيكن تسألو الحارس عن كل شي هزلا راسو وهو بقول لرجاله: خدوها وجيبو الثاني وقفت وهي بتمشي مع الرجال لغرفة سجن النسوان وبراسها عم يدور المخطط يلي كانت بتشتغل عليه من قبل انو تسلم عبود وجمال مع السلاح وهي تسافر لعند بنتها بس يلي صار قلب كل شي بعد قتل جمال مستحيل تقدر تسافر لما دخلت للغرفة كانت نرجس قاعدة بزاوية الغرفة مكومة وشاردة بمكان بعيد … قربت منها أمها عدة خطوات وهي بتقلها: نرجس حبيبتي مستحيل خليكي هون هلق بتطلعي ما عليكي شي أنا رح ساعدك بلؤم جاوبتها: مابدي منك تساعديني أصلاً أنا بريئة من كل شي وياريت اققدر كون بريئة من هيك عيلة رجفو شفايها وهي بتختم جملتها وبعدت وجها وهي بتقول: ومراد شو رح يصير فيه أم نرجس: مراد مادخلو ماكان بوقت التسليم رفعت عيونها وهي بتقول: بكفي كذب كلنا منعرف مين كان وقت التسليم قربت منها وهي بتقول بصوت يادوب مسموع: أنا عملت هاللعبة لاحميكي ولا بدك تبقي لعبة بأيد عبود وجمال !! بعيون بتبرق جاوبتها: ما أنا بسببك صرت لعبة بين إيديهن أم نرجس: بشو إحلفلك انو ماكنت بعرف فيكي ولا أنك مع جمال والله ماكنت بعرف نرجس: كيف ماكنتي بتعرفي كييييف !؟ أم نرجس: خبريني بسسس يوووم واحد اتقابلتي فيه مع جمال نرجس: صح ما اتقابلنا الا ببيتي بس أنا مسجلة على اسمو أم نرجس: بالسر هاد الشي ماكان حدا بيعرف فيه اتنهدت وهي بتقلها: منين بتعرفي عبود قعدت بقربها وهي بتقول: عبود كانت امو مديرة الميتم وأنا صغيرة كتير كانت تجيبو معها وشوي شوي اتعلقنا ببعض ووعدني يساعدني ويحميني … ولما طلعت من الميتم بعدما كملت دراستي رحت لعند عبود ع البيت واتوقعت شوف مديرتي يلي بتحبني بس اتفاجأت انها قلعتني من باب البيت قدام عيون عبود يلي بقي ساكت … طلعت وشفت جمال يلي بيشتغل عند أهل عبود وكان بيعرف بقصتنا وسمع كيف أهلو قلعوني وساعدني لكملت دراستي وبعدين طلبني للزواج وانا وافقت جكارة بعبود وكمان اهلو رفضوني وقلعوني بس هو بقي معي واتزوجني نرجس: هاي طلع معك منيح واتزوجك أم نرجس: زعلانة عليه انو مات بعدت وجهها عنها وهي بتقول: صح بعمرو ماكان الي أب بس ع القليلة كان معي وساعدني بكل شي أم نرجس: لك أنت مجنونة لك هاد كان مشغلك بمهمات قتل وان كان يستغلني لشغلو شهقت وبلشت تبكي وهي بتتذكر تاريخها مع جمال … صحيح مافي شي بشرف بس هي ليش زعلانة خصوصاً بعد موت زهور يلي بتعتبرها أمها ! نرجس: انا عم ابكي على حظي وحياتي قربت أمها وحضنتها وهي بتقلها: أنت بس اتعودتي عليه دائما حواليكي دفشتلا ايديها وهي بتقلها: أوعك تلمسيني مفكرة حالك رح تربحيني … لا والله أنا مستحيل كون بنت وحدة متلك وفوق كل هيك قاتلة أم نرجس: هاي كنتي زعلانة ع القاتل نرجس بصراخ: ماكنت زعلانة على عليكن انا زعلانة على مديرتي بالميتم أصلاً انتو حرام يكون عندكن ولااااد بعدت عنها أمها وبلشو ينزلو دموعها وهي بتقول: شو بدك يطلع من وحدة مالها حدا ربيت بميتم طلعت لقت حالها عايشة بكذبة لما اتزوجت جمال عرفت انو بيشتغل شغل مانظامي مع ناس كبار … وشوي شوي صارو هالرجال يجو على بيتنا وانا اققعد معهن بالبيت نرجس بصدمة: كيف يعني !! أم نرجس: لما يجو الرجال كنت اطبخ وظبط حالي واققعد معهن على طاولة الاكل عضت على شفايفها وهي بتهمس: وشو كمان؟ أم ترجس: لا يروح فكرك لبعيد مالهالدرجة بس كنت سايرهن من زمان كانو يشتغلو بتهريب شغلات خفيفة وجمال كان ييشتغل بكل شي نرجس: لكن كيف هيك صار يشتغل عند عبود أم نرجس: هو من طول عمرو بيشتغل عند عبود وهالرجال يلي بيعرفها من عبود وبس … بعدين عرفت أنو عم يشتغل ليوصل لشي أكبر وطموحو وصلت لهالمكان نرجس: وعبود ماكان بيعرف انك متزوجة جمال ام نرجس: بعدما اتزوجت ماحاولت انو يعرف عني شي بصراحة لقيت الشغل مربح وبلشت اتعلم كيف جيب زباين وصرنا نشتغل بالأثار نرجس: كماااان أم نرجس: علمني كل أصول الشغل وصرت أحسن منو ويلي كانو يستلمو الشغل حطو عينن عليي وحكولي انو بدن اياني لشي اكبر بخططولو وهو تهريب السلاح وانو أنا كون المسوؤلة عن كل شي … وانا وافقت بس بشرط ماحدا يعرف عني شي كنت بدي اترك واهرب وبعدين عرفت بحملك وخبرتهن وقالولي بعد الولادة منكمل شغل ولما ولدتك طلبو يزورو موتو والا بيأذوكي … وبيومها شفت عبود بالصدفة حكينا عن الماضي والحاضر وشافني جمال فكرني معو وانا بقيت ساكتة لكمل المخطط ولقيت هيك أفضل حل أخدك مني وقتلني وراح … عملت حالي بغرق وانا بالاصل بعرف اسبح بس هو مابيعرف لان بحياتنا مارحنا ع البحر سوا كنت اتعلم من دروس الميتم … وساعدني غسان وطالعني من المي لان من الاول كنت متفقة معو على مبلغ كبير نرجس: ماخفتي يقوسك ولا يخنقك شو عرفك انو رح يغرقك أم نرجس: اول الشي جمال ماعندو سلاح ولا بيعرف يشتغل فيه يابدو يخنقني يا يضربني لموت واتفاجأت انو اختار الطريقة الأسهل وهي اني موت غرقانة وطلعت منها بسهولة نرجس بحزن: وأنا تركتيني أم نرجس: كل عمري كنت بدور عليكي والله ومالقيتك نرجس: أنا تعبت كتييير والله أم نرجس بحنية: وأنا رح ضل معك لساعدك نرجس بعصبية: مستحيييل خليكي بقربي صارت تبكي وهي بتقول: بدي مراد بقيت امها تطلع عليها بحسرة وهي بتشوفها كيف شرد فكرها بمراد قربت منها وهي بتقول: يلي سمعتيه اليوم مالازم تحكيه لحدا انا ماني البرنس فهمانة والا رح يعدموني … أنا بس اجيت لساعدك السلاح لعبود وجمال فهمانة والا رح تكوني سبب بموتي ورح تطالعي مراد كذاب وهيك رح ننسجن كلنا مع مراد نرجس: شو دخل مراد !؟ أم نرجس: لان مراد رح يحكي يلي قلتلو عنو وانت لازم تحكي نفس كلامو حتى تطلعو أنتو براءة وأنا رح يكون جرمي بس دفاع عن النفس وعبود ياخد كل حكم التهريب شردت بفكرها بمراد مع انها كانت مستحيل تساعد هاي المرة يلي اخدي شكلها واسمها بس مراد لا مستحيل تخسرو !! التفتت وهي بتقول بعيون بتبرق: رح ساعدك بس بتوعديني تحمي مراد وتطالعيلي اياه هزتلا راسها وهي بتقول: بوعدك طالعو متل الشعرة من العجين ابتسمت وهي بتشوف نظرة الحب بعيون بنتها يلي مانها مصدقة بعد كل سنين الحرمان انها حقيقة وقاعدة قدام عيونها ***** بغرفة التحقيق كان قاعد عبود مقابيل الظابط وهو بقلو: والله متل ماعم قلك نرجس كذابة هي يلي استلمت السلاح واجت تقتل جوزها الظابط: أنا جايبك لهون لتحكيلي شو صار مالتحكيلي عنها بس يلا احكيلي شو كنتو بتعملوا هونيك عبود بتوتر: أه أنا انو كنت موجود كرمال شغل بلل شفايفو وهو بقول: انو عندي شغل لبضاعة سيارات بدها توصل قريباً بس يلي عندي تسجيل لصوتك بتحكي عن تهريب السلاح مع رجال تاني ضيق عيونو وهو بقلو: هاي نرجس كذااابة هي البرنس ضيق عيونو وهو بقول: مين البرنس!؟ الريس عبود: البرنس هو صاحب كللل شي موجود هون الظابط: فيني ماصدقها بس مافيني كذب صوتك المسجل وأنت بتقرر شو تعمل بشحنة السلاح ولوين لازم توصل حس بسطل مي باردة انكب فوق راسو وهو بيسمع مكالمتو مع البرنس عبود بلؤم: هاد البرنس بتعرف مين هي نرجس اي نرجس الظابط: للاسف مامنقدر نحدد الصوت لان متل ما واضح مغيرين الصوت عبود: وأنا عم قلك هاي نرجس الظابط: هالشي نحنا منحددو وهلق بدك تخبرنا مين بساعد صرخ عبود: مراااد ايدي اليمين هو بساعدني بتحميل السلاح وتوصيلو التفت لعند رجاله وهو بقول: خدوه وجيبولي مراد خلال عشر دقايق كان مراد قاعد مقابيلو وقف الضابط ومشي قدامو وهو بقلو: أي يا مراد اتفضل احكيلي شو شغلك عند عبود اتنهد مراد وهو بقول بتوتر: أنا بشتغل معو أنو بساعدو وبحميه إذا في شي الظابط: بس يلي قالو انك أنت بتتصرف بشحنة السلاح مراد بصدمة: لااا هالحكي كذب كان يقلي حمّل بضاعة وكانت كلها عبارة عن صناديق خشب ما اعرف شوفيها كان يقول فيها قطع غيار سيارات وانا كنت شك انو في شي غلط لان كنت حملها باخر الليل ويجي شوفير ياخدها لمكان بعيد الظابط: أنت اكيد ماكنت بتعرف بالسلاح بلل شفايفو وهو بقول بكذب: أكيد ماكنت بعرف والا ماكنت بحياتي ساعدتو بهالشي الظابط: وأنت وزوجتك شو كنتو بتعملو هلق بمكان الشغل مراد: الصراحة أم زوجتي اتصلت فيي بعدما اتطمن على زوجتي وطالعها برا البلد لانها خايفة عليها من أبوها الظابط: وليش لتخاف!؟ مراد: يلي فهمتو انو في بيناتن كره قديم وكان في تصفية حسابات وزوجتي سمعت الحديث ولحقتني الظابط: كيف صار القتل مراد: صارو يحكو بالماضي عن ايام الميتم وللزواج والطلاق وكتير شغلات وبعدين فجأة جمال حمل سلاحو وكان بدو يقتلها لان كان مفكر انها خانتو وهي حمت حالا منو وهاد يلي صار قدام عيوني سكت وهو بفكر انو كذباتو اليوم كترانة وان شاء الله مايتوقف بسببهن الظابط: تمام خدوه وجيبولي نرجس البنت بعد دقايق دخلت نرجس وهي بتمسح دموعها الظابط: لا تخافي مارح نأذيكي بس بدنا ناخد أقوالك وانت ماعليكي شي فوراً بتطلعي بفرح قالتلو: عنجد ماعليي شي والله أنا ماعملت شي هز راسو بقسى وهو بشوف ملامح هالبنت شو تعبانة وكأنها أكبر من عمرها قلها بحنية: اقعدي ارتاحي واحكيلي كل شي صار معك نرجس بتعب: يلي عرفتو انو امي قتلت أبي بسبب الماضي ومواضيع تهريب سلاح أنا عنجد مصدومة الضابط: معك حق هلق بدي تحكيلنا شو صار بالظبط لان على كلامك رح نقرر مين المسؤول شردت بفكرها بمراد لازم تساعدو وبنفس الوقت مابدها تساعد هديك يلي اسمها أمها ! بس مع هيك هي رح تنحبس بجرم القتل رح تحكي يلي لازم تحكيه لتحمي مراد وبس @rwayate بعد ساعة كانت برا باب السجن ودخلت لتشوف مراد بلهفة ركضت وقربت منو من ورا قضبان الحديد مدت ايديها بدها تلمس ايديه بس سحبهن عنها انصدمت وهي بتقلو: مراد شبك مراد بحدة: أنت شو عم تعملي هون نرجس: اجيت شوفك مراد: نرجس انت طلعتي بلا شي يلا روحي وسافري وشوفي حياتك نرجس: أنا حكيت يلي قالتلي عليه مام…… سكتت وماكملت كلمتها بس قالتلو: عملت هيك لساعدك مراد: أنا مستحيل اطلع من هون بتعرفي عبود مارح يتركني يمكن تختخ بالحبوس وموت هون @rwayate نرجس: بس هي وعدتني تساعدك وتطالعك مراد بصراخ: لك لييش ماعم تفهمي انا مستحيييل عيش خلص انا رح موت هون بكيت وهي بتقلو: لااا مشان الله لا انا مابقدر عيش بدونك شدلا على ايدها وهو بقلها: مشان هيك بدي اياكي تروحي لتعيشي لحالك فهمانة لازم تضلي قوية متل مابعرفك اتركي الكل وبلشي حياة جديدة نرجس بحنية: بس أنا حياتي معك مراد: خطأ لااااا هاد الحكي خطأ أنا مارح اطلع سالم من هون عبود مارح يتركني روحي شوفي حياتك نرجس: بس أنااااا مراد: أنت بنت البرنس اتراجعت وهي بتقلو: عم تعايرني!؟ مراد: ماني عم عايرك بس البنت لمين بدها تطلع رجفو شفايفها وهي بتبعد عنو رفعت راسها وهي بتقلو: معك حق بس انا مستحيل اطلع متل أمي … بكرا رح يجي لعندك المحامي لحتى نتطلق مراد: ياريت بأقرب فرصة @rwayate معقول الحياة مانا ظالمة … بس نحنا يلي منظلم نفسنا بالحياة … لما منفكر انو كل شي اتوقف وبلحظة خسرنا كل شي أو يمكن لأ … معقول هاي كذبات نحنا صنعناها بايدنا لنبقى بقوة لنواجه مصاعب الحياة !! ونحن غالباً منعرف إننا منكذب على حالنا …!! لأن إذا رجعنا وقعنا رح ننزل لأسفل السافلين ووقتها ما عاد عنا القوة ولا حتى الحاجة لنرجع نوقف من جديد !! لأن ببساطة منكون خسرنا كل شي وماعاد النا حاجة للرجوع للحياة *يـــــــــ͢ـོ͓ـــتبــــــــــــــོـ͓ـــ͢ــ؏* ➖➖➖➖➖➖➖➖➖