الليلة الحمراء - الفصل 10 - بقلم مروة أغا - مكتملة | روايتك

‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ➖➖➖➖➖➖➖➖➖ #الجزء_العاشر (10): #اللـيـلة_الحمـراء_بقلم_مروةآغا باسل: نرجس بتكون بنت خالك محمود مراد: أنت شو بتقول !!! باسل: عرفت امبارح من جمال مراد: اصلا جمال شو عرفو باسل: نسيت انو بيعرف ابوها ولما سالني عنك طلعتو قرايبين لمعت بعيون مراد نظرة حقد وكراهية عن هالعيلة باسل: وامها بمأوة العجزة هون بتروح بتشوفها كل اسبوع مراد: كماااان !!! باسل: وكل شي كان لعبة من البداية دير بالك منها مرة خالو لمراد هي المرة الشريرة الوحيدة يلي اتعرف عليها قبل ما يوعى على الدنيا وبسببها كره كل جنس حوا … بيكرهها كره العمى دمرت حياة أهلو وهلق باعتي بنتا لتدمرلو حياتو.... ***** رجعت من شرودها على صوت جوالها حملتو وهي بتشوف رقم خاص فتحت وهي بتهمس: اهلين البرنس: كيفك اليوم عصرت عيونها وهي بتحاول تتماسك وتهمس: منيحة سمعت اخبار جديدة عن الرجال شو صار معو؟ البرنس: مافيه شي نرجس: خيفانة البرنس: لا تخافي غسان نظف كل شي منيح نرجس: هلق انت دائماً بتطمن ع الناس يلي بيشتغلو معك!؟ اتنهد البرنس وهو بقول: بس المهمين هلق بكيت وهي بتقلو: شكرا الك سكرت الخط وهي بتحط راسها على مكتبها وبتبكي خلص حياتها صارت بايد البرنس وبس … مستحيل تقدر تخلص منو بسهولة كملت شغلها وطلعت باتجاه مأوة العجزة لانها بحاجة لحضن يخفف عنها التعب ***** بعدما كملو حديثهن ترك باسل واتوجه لمأوة العجزة الموجود بالمنطقة نزل من السيارة وقف بعيد عند سور الحديقة وهو براقب كل شي جوا وشاف كتير عجايز قاعدين وبقربهن ولادهن بس ما شافها بقي يراقب عند السور لحتى يتأكد من صدق كلام باسل بس بعد ثواني شافها وما ماتعب كتير ليلاقيها لان ببساطة بهالكام يوم حفظها بصم كز على سنانو وهو بشوفها قاعدة مع عدوتو بس هالعدوة صارت ختيارة ولو شو ماصار هالانسانة رح تبقى عدوتو وهي هلق بعتت بنتنا لعندو !!! كز على اسنانو وهو بيهمس باسم بنت خالو يلي ما بروح من بالو (زينة) ثواني بس ودخلو لجوا المأوى وهو بقي واقف لحتى تطلع قعدت نرجس على الكنبة وقعدت المرة الحنونة بقربها وحطتلا راسها على صدرها وبلشت تلعب بشعراتها: وين كنتي كل هالوقت مالك بالعادة تطولي عليي نرجس: أنا اسفة بس انشغلت كتير كان في افتتاح شركة جديدة وكل الشغل فوق راسي بس هلق لما خلصت اجيت فوراً لعندك همستلها: لا تكوني عشقانة رفعتلا راسها وهي بتقلها: لا شو هالحكي قالتلها ببسمة: نرجس افتحيلي قلبك نرجس: انا ماني عم فكر بهالشغلات ابدا هلق همي شغلي يلي بشتغل عليه وانت بتعرفي مسحتلا على شعرها وهي بتقلها: ليش لا هاي رح تصيري ثلاثين ما من حقك تتزوجي وتجيبي ولاد دمعو عيونها وهي بتقلها: ومين بدو يتزوج وحدة متلي نبهتها وهي بتقول: لا تقولي هيك انت قمر مصور والف شب بيتمناكي ولاد الحلال كتار بغمزة كملتلها: قوليلي شو اسمو نرجس: عنجد مافي شي بس يصير اكيد رح احكيلك رجعت تلعبلا بشعراتها وهي بتتنهد رفعت نرجس راسها وهي بتسألها: شبك اليوم ما على بعضك في حكي بتمك بدك تحكيه كل الوقت ساكتة ما من عوايدك؟؟ هزت راسها وهي بتقلها: اي صار في شي جديد بدي قلك اياه قعدت نرجس بقربها وركزت نظرها فيها وهي بتسألها: خير والله خوفتيني _ اول الشي بدك تقوليلي شو مخباية عني وليش بكيتي اخر مرة لما كنتي عندي نرجس: مافي شي بس تعبت شوي من ضغط الشغل _ يعني مافي شي ما منيح نرجس: لا ابدا _لكن ليش اجا لعندي جمال فتحت عيونها مصدومة وهي بتقول: جمال اجا لعندك ليش؟؟ _ وانا استغربت بالاول ليش اجا بعد كل هالسنين بس اجا حذرني ونبهني نرجس: شو قلك قوليلي بلعت ريقها وهي بتطلع عليها بعيون مليانة دموع وهي بتهمس: انا خبيت عليكي شي مهم كتير نرجس بترقب: شو هو _ بتوعديني ماتزعلي مني نرجس: اكيد مابزعل منك وانت بتعرفي _ انا عرفت بهالموضوع من زمان بس ما قدرت احكيلك نرجس: والله قلبي صار بين اجريي احكي سحبتلها راسها وحطتو على صدرها وهي بتهمس جوا اذنها بعدة كلمات صدموها صدمة حياتها !!! بعدت عنها متكهربة وبلشت ترجف وهي بتقول: كيف هيك مافهمت ام زينة: هو ما كان اقبل احكيلك شي وقلي هالموضوع سر بس انا حسيت هالوقت صار لازم تعرفي بعدت وجهها عنها وهي بتقول: هاد شي ما بيتخبى ام زينة: اي صح بس هو دايما كان يقلي ما احكيلك انا اسفة يا بنتي سامحيني برقو عيونها بدموع وهي بتقول: ليش خبيتي عني هيك شي ضمتها لصدرها وهي بتقول: ماقدرت قلك خفت عليكي منو بس هلق يمكن انا ما مطولة قلت لازم خبرك ضمتا نرجس بقوة وهي بتقول بحزن: ليش هيك عم تقولي _ يابنتي فكري منيح قبل ما تعملي أي شي الحياة قاسية كتير طلعت نرجس من مأوة العجزة وهي عم تمشي بصعوبة … اجريها ماعم يقدرو يحملوها … يلي سمعتو من شوي صعب كتير تتقبلو لما وصلت لسيارتها شافت مراد واقف عندها سألتو باستغراب: مراد عم تلحقني … شو عم تعمل هون !! مراد: انت بدك تقوليلي شو عم تعملي هون يازينة فتحت عيونها مصدومة وهي بتطلع عليه من فوق لتحت بلعت ريقها وهي بتهمس: شو قلت انت منين عرفت !؟ ضحك وهو بقرب منها وبيهمس: كنتي بتكذبي عليي نرجس: شو عم تقول انت اكيد جنيت مراد: كيف بتكذبي عليي وانا امبارح متل الغبي حكيتلك كل شي صار معي بحياتي لك كيف بتكذبي علييييي نرجس: لك مراد ما عم افهم عليك مراد: ماعم تفهمي ما وهاي المرة يلي جوا شو عم تعملي عندها نرجس: قلتلك هاي المرة يلي ربتني بالميتم بعد موت بنتها مراد: حاج تكذبي هاي مرة خالي يلي سرقت ابي وانت بنتها نرجس: شووو نفسها !؟ بس انا قلتلك متل بنتها انا مابعرف ماضيها ابدا بس بعتبرها متل امي لان دارت بالها عليي مراد: كذب هالكلام كلو كذب لما ماعادت تتفاهم معو فتحت باب سيارتها وطلعت فيها ضرب مراد باب السيارة وهو بقول: وقفي لوين رايحة أنا عم احكي معك فتحت الشباك هي بتقول: وانا حكيتلك كل شي … حبك تفهم وتصدق اهلا وسهلا ما حبك انا تاركتك ورايحة لعند الريس عبود ليلاقيلك حل ركبت بسيارتها وطارت لعند جمال ماعرفانة شو تعمل كل المخطط رح يخربو مراد وخلاصا من جمال ومصايبو ما رح ينتهي وقفت عند باب بيت جمال كانت بدها تشوفو وتواجهو بس شافتو نازل من البيت مع مرتو وولادو الثلاثة … كلن اصغر منها بنت وشبين ومرتو كانت مرتبة كتير مشيت سيارتهن وهي طلعت وراهن كانت بتسوق وهي بتبكي لحد ما وصلو لمطعم صغير نزلو ليتغدوا فيه وقفت على جنب وهي بتراقب هالعيلة السعيدة … جمال يلي محسوب عليها قريبها بحياتو ما فكر يعرفها عليهن رغم انن واضحين شقد عيلة مريحة ورح يحبوها … بس اكيد هو مارح يظهر هيك وحدة للعلن !! ***** رجع مراد ليشوف باسل بعدما واجه نرجس بالحقيقة باسل: خلص القصة واضحة بدها تقتلك مراد: بس انا مافيي اققتلها باسل: لكن دافع عن حالك قبل ما تقتلك هي تركو باسل وقعد بسارتو وهو براقب رفيقو مهموم وحزين ركا ظهرو على كرسي السيارة وهو بيهمس: اسف يارفيقي صح انا بحبك بس مافيي مصلحتي اهم بس بوعدك رح ضل احميك للنهاية ومارح تخسر شي ابدا سكت ورجع يهمس بحزن: الا حبك بعدما فكر مراد قرر ما يعمل شي من راسو فقط ومشي باتجاه فيلا الريس عبود فتحتلو الباب الخادمة واستقبلتو سعاد بفرحة سعاد: كيفك يا ابني شبك مهموم وزعلان مراد: تعالي يا خالتي مسحتلو على راسو متل الأم الحنونة نزل راسو وهو بحاول ما يبين كسرة قلبو مراد: انا سألتلك عن الرقم مارضيو يقولولي قال بدن محضر من الشرطة ليعطوني الاسم سعاد: خلص ما ضروري شكرا تعبتك معي هلق شاف عبود نازل من الدرج وهو لابس بجامة حرير وبايدو سيجار الريس عبود: مراد شو صاير؟ مراد: بدي احكي معك الريس عبود لمرتو: اعمليلنا اتنين قهوة … امشي معي على مكتبي مشيو لغرفة جانبية فيها مكتب للريس عبود قعد وهو بيسألو: شو صاير معك شفت شي على نرجس؟ مراد: أي نرجس جاي لتخرب حياتي متل ما خربتها امها من قبل الريس عبود: ماعم افهم !!؟؟ مراد: من زمان خالي مات ومرة خالي اجت بدها تلعب على أبي وقدرت تاخدو … اتجوزها وكتبلها نص املاكو وبعدين ماتت وامي اختي متل ما بتعرف ماتو بحريق وبقيت بس انا وبنت خالي زينة وهلق اجت لتخرب حياتي الريس عبود: يعني نرجس هي زينة !! مراد: اي للاسف الريس عبود: اصلا هالبنت مشكوك بأمرها مراد: بس انت يلي بليتني فيها الريس عبود: انا عملت هيك لتحط عينك عليها لانها جاي لتقتلني مراد: شو الريس عبود: أي صار لازم تعرف انا بيوم كتب كتابي عليها عرفت انو جمال بدو يزوجني اياها كرمال يقتلني وياخد مكاني بس زوجتك اياها مشان عيونك تكون عليها وتقدر تحميني مراد: يعني حطيتني بالنار بدالك الريس عبود: ياغبي قلتلك بدن يقتلوني ما يقتلوك مراد: بس هلق صارو بدن يقتلوني كمان الريس عبود: معناها يا قاتل يا مقتول مراد: شو بدنا نعمل الريس عبود: أول الشي بدك تقتل هاي يلي اسما نرجس وبعدين مننتقل لجمال ولنشوف ناجي اذا الو يد بالموضوع مراد: بس انا مافيي اققتل وأنت بتعرف هالشي الريس عبود: معناها اتحمل الخسائر وروحك رح تكون أول الشي … أنت ما بتشتغل عندي؟ ومهمتك هلق تقتل نرجس والا رح تقتلك هي بالأول او رح تموت معها وأوعك تخبر حدا عن هالموضوع فهمان مراد: يابيك نسيت مين انا الريس عبود: مانسيت بس لو على حساب حياتي والله بقتل الكل تركو مراد وطلع مصدوم لوصل لسيارتو ولما قعد بلش يضحك ضحكة هستيرية وهو بقول: كلكن كذابين والله كذابين لمعت بعيونو نظرة تحدي وهو بقول: انا بدي فرجيكن كلن والله لربيكن وصل باسل لعند مراد بسرعة بعدما حاكاه اتنهد بحزن لان بدو يعمل هالشي مع رفيقو بس مابقي ولا طريقة قرب باسل من مراد وهو بقول: شبك قلقتني شو صاير معك مراد بعصبية: طلعت هي صح بس لساها بتكذب عليي باسل بخبث: انا قلتلك هالحكي شو بدك تعمل هلق مراد: مابعرف والله ما بعرف بتصدق أني نزل راسو وهو بكمل: اني حبيتها باسل بعصبية: والله العظيم حسيت ياغبي كيف بتعمل بحالك وبتوقع هيك وقعة مشان هيك اجيت لحذرك منها هيي كتير بتعرف كيف تلعب مراد: متل أمها لعبت على بابا بعد موت خالي وماما ماتت بحسرتها بعدما اخدت مننا كل شي وهلق بنتا بدها تلعب عليي … بس انا ماعندي شي لا مال ولا املاك وهي شافت بعيونها كيف ساعدتها وكنت كتير منيح معها شو بدها مني طلع بسيارتو وهالمرة اتوجه لمأوة العجزة ***** #بقلم_مروةآغا بعد ساعة طلعو من المطعم ونرجس اتوجهت لبيتا وبقيت ناطرة جمال ليجي لان اتصلت فيه وهي على الطريق بعد ربع ساعة وصل جمال فتحتلو الباب وهي بتراقب حواليه دخلتو وسكرت الباب وهي بتقول بقلق: هاد مراد بدو يخرب كل شي جمال: ليش؟ نرجس: مابعرف مين زارع براسو اني انا بنت خالو ومرة خالو مديرة الميتم جمال: كيف !! وأنت ليش لتروحي لعند معلمتك تزوريها نرجس: أنت بتعرف انو افضالا فوق راسي كبيرة ومن واجبي روح وطل عليها جمال: وهالانسانة طلعت مرة خالو لمراد يلي بيكرهها شو هالصدفة؟ نرجس بشك: بس أنا ما قلتلك انو بيكرهها ؟؟ جمال بقلق: أه عنجد لا قلتي لكن انا منين بدي جيب هالحكي نرجس بتحدي: شو عم تلعب لعبة جديدة !؟ جمال: لا طبعاً بس بدي قلك انو مراد بيعرف انك بتقربية ومن الأول خطط مع معلمو لحتى يتزوجك هو وينتقم منك على أقل من مهلو نرجس: أنت شو بتقول ؟؟ جمال: متل ما عم قلك عبود وهو عملو هاللعبة لحتى يخلصو مننا كلنا رح يقتلوكي ويقتلوني ويقتلو ناجي ويصفى كل شي الهن ومراد ياخد مكاني اترجعت لورا وهي ميتة من الرعب معقول كل الناس حواليها كذابين كلن بدن يقتلو بعض … يالله هالحياة شو بشعة قعدت على الأرض وهي بتقول بقلة حيلة: وهلق شو بدي اعمل طالع مسدس وحطو بايدها وهو بقول: لازم تحمي حالك المواجهة اكيدة ولازم كلنا نكون قدهن ونقتلن رفعت ايديها وهي بتقول بعجز: بس انا ما بقدر اققتل حدا جمال بتصميم: لكن دافعي عن حالك طلع وتركها بحيرة كبيرة شو بدها تعمل ما بتعرف وبالاخر قررت ترجع لعند مراد لتحاول تقنعو يتراجع عن القتل وتطالع حالها من هالقصة متل الشعرة من العجين ***** قعدت بالبيت وهي ناطرة مراد يلي طول كتير ليرجع ركضت لطاولة السفرة لما سمعت صوت جوالها وكان رقم جمال نرجس: ألو جمال: مراد حاطط الشر بين عيونو وجاي ليحاسبك هيك قلي باسل ديري بالك منو صرخت برعب: شوووو عم تقول جمال: تركي كل شي وطلعي ع المكان السري لنغير الخطة ركضت أخدت أغراضها الخصوصية وفتحت الباب بدها تطلع بس شافت مراد عند الباب مراد بلؤم: لوين رايحة؟ بلعت ريقها وهي بتهمس: اه لا بدي روح جيب انو مابعرف دفشها وسكر الباب اترجعت وهي بتشد ايدها على مسدسها لتطالعو عند أول فرصة مراد: بتصدقي اني بكره جنس حوا كلووو … بس لما شفتك كيف ضعيفة تحت تحكم جمال قلت انت غير وبحاجة مساعدة … ولما عشت معك اتأكدت انك نظيفة بس طلعتي وحدة وسخة ومخباية بتيابك شهقت نرجس وهي بتقلو: لا انا ما وسخة انا شريفة ولهلق محافظة على حالي رغم كل ظروفي مراد: بس هالشي مابينكر انك ملعبة وقدرتي تلعبي علينا كلنا نرجس: بس انا ماني زينة شو قلك لتصدقني مين يلي زرع براسك هيك وخلاك تتقرب مني لتنتقم من مرة خالك ركا راسو على الباب وهو بقلها: ياريتك طلعتي زينة كانت الصدمة اخف نرجس: كيف عرفت !؟ مراد: انا رحت على مأوة العجزة وشفتا نرجس: كيييف شو حكتلك!؟ _____ #قبل_دقائق _____ (((نزل مراد من سيارتو وهو بيتوجه لباب الماوى سأل الممرضة: بقدر شوف المدام زهور الممرضة: مين حضرتك مامنقدر ندخل حدا مامنعرفو أو بدنا بخبر حدا من طرفها مراد: قوليلها مراد بدو يشوفك وهي أكيد رح توافق الممرضة: إذا هيك رح اسالها بعد ثواني رجعت وهي بتقلو: اتفضل معي مشي وراها لحتى طلعو ع الحديقة وشافها قاعدة على كرسي وقفت واستقبلتو وهي بتقول: مراد اهلين كيف عرفت اني هون بعيون بتقدح نار قلها: شو بدك لسا مني زهور: والله مابدي شي من لما لقيتلك شغل ماعاد عرفت عنك شي مراد بصدمة: لقيتيلي شغل!؟ زهور: فكرتك اجيت لعندي لانك عرفت مراد: عرفت بشو !؟ زهور: أنا من زمان لقيتلك شغل عن طريق جمال بعد ما ماتو اهلك وشفتك كيف دائما مع الزعران حبيت ساعدك حتى ما تضيع يمكن كفر عن ذنبي مراد: بكفي كذب زهور: والله ماعم اكذب اذا بدك اسأل جمال مراد: اكيد رح اسأله لان ما بصدقك انا هلق جاي اعرف ليش باعتي بنتك لعندي زهور: زينة !؟ مراد: أي ليش بعتيها بحزن قالتلو: بس زينة ماتت فتح عيونو مصدوم وهو بقلها: ماتت !؟ زهور: ماتت لما كانت صغيرة بمرض السرطان مابعرف يمكن الله عاقبني فيها لان المال كان حرام مراد: يعني نرجس ماعم تكذب سألتو بصدمة: أنت منين بتعرف نرجس مراد: أنا بكون زو…… سكت وهو بفكر شو يحكي اذا نرجس ماخبرتها ما لازم هو يخبرها كمل جملتو وهو بقول: انا ونرجس منشتغل سوا زهور: يعني سوا كتير قراب؟ مراد: وانت شو دخلك؟ زهور: يمكن انت بتكرهني بس انا بعرف شقد قلبك طيب لو مابتعنيلك نرجس ماكنت زعلت هالقد منها لما عرفت انها من طرفي مراد: لا بتعنيلي ولا شي كان بيناتنا شغل ورح ينتهي زهور: ماشي بس بدي منك تدير بالك عليها مراد: وليش نرجس بتهمك زهور: لما ماتت بنتي صفيت ع الحديدة وكان لازم اشتغل لعيش ولقيت مأوى العجزة كتير مناسب وبنام فيه وصرت اشتغل فيه وبعدين اجت نرجس وصارت متل بنتي سكتت وهي بتتذكر ماضيها بالميتم وماكملتلو مراد: ومن مين بدي دير بالي عليها انت مابتعرفي مين هي نرجس وشقد قوية زهور: بعرف انها قوية وقد حالها بس جمال كتير خبيث مراد: كتير بتعرفي عن حياة نرحس زهور: نرجس كتير عانت بحياتها لوصلت لهون وجمال دائما بيستغلها انا بعرف انو ساعدها بس هي مابتقدر الا تطيع اومرو بس دير بالك عليها لو سمحت نرجس ضايعة وماطالع بايدها شي)) رجع للواقع وهو بقلها بحزن: حكتلي كل شي بلشت تسعل وهي بتقلو: يعني مصدقني !؟ مراد: أنت كذابة كبيرة يابنت نرجس بعصبية: أنت أكبر كذاب شفتو بحياتي حاج تخدعني وتفرجيني انك انسان طيب وقلبك كبير مراد: بالله عم تحكي من كل عقلك !! … مين يلي دخل لحياة التاني وعملها وردية وعلى أساس انت الانسانة العصامية والمظلومة يلي عملتي نفسك بنفسك سعلت نرجس وهي بتقول: اح اح بس أنا ما كذبت عليك ! … أي انا عملت نفسي بنفسي صح بمساعدة جمال بس أنا لهلق بدفع تمن هالمساعدة حرك راسو وهو بقول: ماني عم صدق كيف هيك قدرتي تلعبي عليي نرجس: أنا عبد مأمور متلك بالظبط مراد: ماني عم صدقك بلشت تبكي وهي بتدافع عن حالها: انت الكذاب اهتميت فيي وفرجيتني قلبك الأبيض وعلقتني فيك وأنت همك بس تنتقم مني لان فكرتني زينة مراد: وأنت مفكرتيني ما بعرف ليش اجيتي ودخلتي لحياتي وحياة الريس عبود هو نطق اسم الريس عبود اتوترت وبلشت تخاف وتسعل سألها بقلق: نرجس وين بخاختك اتراجعت شوي شوي وهي بتراقبو بعيون مرعوبة وهو كمان كان براقبها بنفس النظرة وخلال ثانية بس ركضت ووقفت ورا باب غرفة النوم ومطالعة مسدسها نرجس: إذا بتقرب بدي موتك بأرضك وهو ما كان احسن منها اتخبى بالمطبخ ومسدسو كان موجه لجهتها لان باب المطبخ مقابيل باب غرفة النوم وبيناتهن باب البيت بس مراد: وحدة خاينة وغدارة اكلتي وشربتي ببيتي وهلق بدك تقتليني نرجس: أنا مستحيل اهدم كل شي بنيتو كرمال شي فاضي وحياة فاضية انابدي عيش حياتي ورح تنتهو كلكن مراد بتحدي: وأنا مستحيل انهي حياتي يلي تعبت لوصلتلا كرمال نزوة انتو البنات كلكن غدارين وخاينين بتعرفو كيف تلعبو على وتر الرجال لتخلوه يطيعكن نرجس: نحنا ولا أنتو الرجال همكن بس نزوتكن وشهوتكن صرخ مراد: قلتلك اغبياء انتو البنات اغبياء المواجهات ممكن تكون متل مرجوحة بترفعك لفوووق بس بسرعة بترجع بتنزلك للحضيض … لعبة ممتعة بتلعب فيك بمهارة وكل مواجهة الها فتيل نار وإشعاله موضوع لابد منو وهي هالمرة رح تشعل هالفتيل طلعت شوي شوي من الغرفة وهي بتقرب باتجاه المطبخ وبتقول بهمس: قلك ليش نحنا أغبياء لما سمع صوتها هدي وبلش يقرب طلع من المطبخ ووقف مواجهتها ومسدساتن موجه لبعض وعيونن بتلمع بتحدي وتصميم همستلو: قلك ليش الله بيخلقنا حلوين سألها بقلق: ليش نرجس: كرمال تحبونا رجفو ملامح وجها وهي بتكمل: وقلك ليش نحنا أغبياء ضيق عيونو وهو بينتظرها لتكمل كلامها غصت وهي بتحاول تطالع الحروف وبعدين همست بغصة أكبر: كرمال نحبكن هلق غرقو عيونها بالدموع … بحياتا ماكانت مفكرة تتعلق بشخص وتعترفلو بحبها بهيك وقت وهيك ظروف من دون ما يحس ركض لعندها وضما جوا حضنو وهي بلشت تبكي … حاوطلا وجهها بين أيديه ودقق بعيونها الغرقانة بالدموع من دون ما يحكو ولا حرف عيونن كانت تحكي قصص وحكايا عن قلوب هلق بتنبض … قلوب كانت ميتة من زمان ورجعت للحياة من جديد بس للاسف هالحياة رح تكون قصيرة من دون ما يحسو ولا يشعرو شفايفهن التقت مع بعض داخل معركة لأول مرة خاضوها برضا من الطرفين … عذريتن كانت واضحة اول حب وأول بوسة بعد عنها لما انقطع نفسو وهو بحاول يلتهم بعيونو ملامحها وتفاصيلها وهي بتحاول تكتم دموعها وما تبكي نرجس بهمس حزين: ماقلتلك ماتبوس وحدة مابتحبها حاوط وجهها بايديه الكبار وهو بقلها: بس انا هلق عم اعمل شي حقيقي غمرت وجهها جوا حضنو وهي بتبكي مراد: هششش هلق ما وقت البكي وقت التفكير شو بدنا نعمل نرجس: بالأول بدنا نصدق بعض لازم نحكي كلشي بصدق هلق مراد لمح من شباك المطبخ شخص واقف على سطح وبحاول يراقب البيت بناظور ضما لصدرو وسحبها ووقفو ورا باب البيت وهو بيهمس: وصلولنا بدن يقتلونا نرجس: مين؟ مراد: أكيد عبود وجمال واحد منن بدو يخلص علينا بلعت ريقعها وهي بتقول: جمال ما يقدر يقتلني وهوي قلي اققتلك مراد: وعبود قلي اققتلك يمكن هلق صارو بدن يخلصو مننا اتنيناتنا لاننا صرنا كرت محروق نرجس: شو بدنا نعمل مراد: بدنا نحاول نبقى على قيد الحياة مسكها من خصرا وهو بضمها بقوة ليروي عطشو رجع بدها عنو وهو بيهمس: لازم نبعد عن بعض لنقدر نعيش نرجس: بس كيف؟ قرب من اذنها وهمسلها كام كلمة بعدين تركها وهو بودعها وركض وطلع من شباك المطبخ باتجاه الحديقة الخلفية ليلهي الشب واختفى عن الأنظار قدام عيونها أما هي ركضت بسرعة لغرفتو ولخزانتو أخدت صورة من صوره واتوجهت للمكان يلي لازم تكون فيه ***** _____بعد يومين____ ضرب جمال على الطاولة وهو بقول: الهن يومين مختفيين يومين وين بدن يكونو باسل: لك أنا رحت لجميع الأماكن يلي بتخص مراد وما لقيتو أكيد هني مع بعض جمال: بدن يلعبو علينا هالكلاب موتن هلق صار على أيديي رغم اني حالف يمين ما اققتل حدا مابدي وسخ ايديي بالدم بس هلق انا بفرجيهن باسل بصدمة: بدك تقتل مراد؟؟ جمال: لكن شو برأيك اتركو يعيش بسلام … لا والله وهديك الحقيرة انا بفرجيها هلق لمعت براس باسل ذكرياتو وأيامو مع مراد واتخيلو كيف جثة هامدة قدامو ماعم يقدر يساعدو هو فكرو رح يكون أداه لقتل نرجس وعبود بس توصل لموتو !! لا هو ما بيتحمل لازم يعمل شي يساعد رفيقو لازم وبنفس اللحظة كان جمال قاعد عند الشباك عم يفكر بشي تاني كليا بعيد عن هالكلام وبعدين همس: انا لازم اعمل شي يخلي نرجس تبين وتطلع سأل باسل: شو هو ؟ ضحك بخبث وهو بقول: بس ارجع بحكيلك ***** بمكانو الخاص كان عبود مختفي عن الأنظار من خوفو ورعبو من انو حدا يوصلو رغم انو اخد كل الاحتياطات بس خلص حس انو الموت صار قريب منو … خفى كل أهلو عن الأنظار وأملاكو كلا صارت ببنوك أوروبا وهلق هو بحاول يهرب لبرا البلد كمان بس بدو يتأكد من مراد انو مات من بعدما حط رجال يراقبهن بقرب بيت مراد ليخلص عليهن اتنيناتن لأن خلص ماعاد الو ثقة فيه من بعد ما خبرو يلي براقب بيتو انو هني صارو مع بعض رغم انو بيشتغل عندو من سنين بس كلشي والا حياتو والخيانة خط أحمر هلق رن جوالو اتطلع عليه بصدمة رد عليه بعجل وهو بيهمس: مراد مراد بصوت مبحوح: قتلتها الريس عبود: شو !! عنجد؟؟ مراد: خليتها توافق تروح معي وقتلتها الريس عبود: وحش هاد الرجال يلي انا ربيتو مراد: كانت صعبة كتير لأنها ملعبة بس لا تاكل هم انا بعجبك الريس عبود: والله هلق جمال ليتمنى يموت وما يشوفني عايش وخصوصا اذا شافك معي وهو مالو خبر اني بعرف كل شي مراد: جمال مابيعرف لان نرجس لما عرفت مالحقت تخبرو الريس عبود: خلص بكرا كون عندي بالشركة لنواجه جمال ونخلص عليهم اما ناجي هالحقير اخد كل أملاكو وهرب برا البلد خاف على حالو مراد: حقو يخاف بالنهاية الموت صار حوليه الريس عبود: عم استناك بكرا حاكيني مراد: امرك سكر الخط وهو بيتنهد وبحط ايدو على قلبو ما اتوقع أبدا المواصيل توصل لهون … مشط شعرو بايديه وهو بيهمس: هيك صرت بالنهاية يا مراد قاتل مأجور !! تاني يوم متل ما اتفقو الساعة 4 تقريبا قبل ما ينتهي الدوام بشوي اتوجهو عبود ومراد للشركة الجديدة مع جميع الرجال المدرعة لحماية عبود الكل انتشرو على باب الشركة أول ماطل من السيارة ضمو وهو بقول: بطلي أنت … بطلي … طول عمرك بتحميني وأكيد هلق رح نطلع منها متل الشعرة من العجين وبوعدك تستلم أنت شغل مهم عندي مشي وراه وهو داخل لجوا الشركة وفارض سيطرتو وعن طريق الكمرات شاف جمال عبود داخل لعندو طلع من مكتبو واتوجه لمكتب باسل ليخبرو جمال: عبود هون ومعو مراد همس جمال بقلق: قولك شو بدهن جمال: مابعرف بس على أساس نرجس اخر الشي كانت بدها تقتل عبود أنا خايف يكون عبود عرف شي باسل: مابعتقد نرجس ذكية أنت هيك بتقول جمال : كنت هيك قول … بس هلق شايفها أكبر غبية بعدما بلشت تشغل قلبها قبل عقلها وخصوصا انو جهاز التنصت من اسبوع ماعاد اشتغل وماعاد سمعت ولا شي من كلام عبود باسل: المهم جهز حالك لا يكون في شي ما منيح جمال: ما تاكل هم وصل عبود لمكتب جمال وباسل وقف عند الباب وهو بقول: طلعو يارجال التف لعند الموظفين وقلن: وانتو على بيتكن … خلال دقايق الشركة بدها تكون فاضية فهمانين متل عش النحل صارت الشركة بصوت الوز والحركة وبعد عشر دقايق كانت فاضية والحارس بسكر الباب جمال وباسل واقفين مقابل بعض ميتين رعبة جمال: خير ان شاء الله شو صاير !! باسل بحاول يعرف من مراد ويعرف شو صاير بس مراد بعد وجهو عنو فتح عبود جوالو على التسجيل الصوتي والكل سمعوه هلق جمال وباسل كانو رح يموتو بأرضهن جمال: كذب هالكلام اكيد مطبقين صوتنا باسل: اكيد كذب هالكلام عبود: لا ماكذب ونرجس اعترفت قبل ما تموت صرخ جمال: نرجس ماتت !! عبود: لكن بدك خلي كلبتك تقتلني جمال: شوووو قتلتها واجهة مراد بعيون بتقدح شرار ركض جمال لعندو وهو بيضربو بايديه: قتلتا لك كيف هيك بتقتلا كيييف كان مراد عم يرج تحت ضربات جمال وهو واقف ماعم يتحرك مراد: بكفي هلق صارت غالية عليك ما انت كنت مشغلها هيك شغل ودائماً راميها بالنار ضرب راسو وهو بقول: بس انتو مابتعرفو شي مابتعرفو عبود: بس شوو يا جمال بدك تاخد مكاني ما هيك اتفقتوا تقضو عليي أنت وباسل وتاخدو مكاني مع البرنس رفع راسو باسل لجهة مراد وشافو كيف بيتطلع عليه نظرة استحقار هزلو راسو باسل (بلا) وعيونو غرقو بالدموع جمال: وينها هلق مراد: مابعرف مرمية بالبرية ضرب جمال على راسو وهو بيتذكر نرجس ونزلت من عينو أول دمعة على خدو وعرف انو خلص نهايتو هلق أكيدة……… *يـــــــــ͢ـོ͓ـــتبــــــــــــــོـ͓ـــ͢ــ؏* ➖➖➖➖➖➖➖➖➖