الليلة الحمراء - الفصل 7 - بقلم مروة أغا - مكتملة | روايتك

➖➖➖➖➖➖➖➖➖ #الجزء_السابع (7): #اللـيـلة_الحمـراء بعدما غسلت نرجس طلعت ومشيت بين الغرف لوصلت لغرفة المكتب متل ما وصفها جمال فتحت الباب ودخلت بهدوء لحتى تنفذ مهمتها حطت جهاز التنصت بأول فازة شافتها بقرب المكتب وطلعت بسرعة بس فاجأها صوت مراد بقربها بقول: انت شو عم تعملي هون !!! لحسن حظها كانت مخلصة مهمتها ومسكرة الباب وقفت بقربو وهي بتلعب قطة صغيرة وبتحاول تخفف توترها نرجس: لا ولا شي بس هالقطة كتير لذيذة الريس عبود بربي قطط مراد بشك: لا المدام سعاد بتحب القطط تركتها نرجس ومشيت قدامو وهي بتتنفس براحة وهو بقي عم يراقبها بشك ورجعت للصالون شافت سعاد بتحط الشاي على الطاولات نرجس لتمحي الشك: القطة كتير حلوة مدام سعاد سعاد: شفتيها بتجنن أنا كتير بحب القطط التفتت لعند مراد شافتو لسا بيتطلع عليها وبيتفحصها وكأن ما صدقها كل السهرة كان الجو متوتر خصوصا مراد وهو بتابع عيون الريس عبود على نرجس وكأن بحس بشي غريب كل ماشافو بيتطلع عليها مانظرة اعجاب بالعكس هالنظرة فيها كمية كبيرة من الكره … ياترى شو سببها !! مافي غير سعاد كانت مامهتمة لشي رغم احساسها ببرود الجميع حواليها اما نرجس حست كمان بنظرات عبود كانت بتختلف كلياً عن نظرات الاعجاب قبل قلبها صار يرجف بين ضلوعها بخوف وهي بتفكر (معقول بلش يشك !) ( لا مستحيل شو بدو يعرفو ) بعد العشا ودعوهن وطلعو مع بعض ورجعو مراد ونرجس للبيت سألها مراد: الريس عبود ليش هيك فجأة انقلب عليكي رفعت كتافها بحيرة وهي بتقول: مابعرف بس هيك اريح لان انا ماكان بدي هالجازة مراد: غريب لكن ليش وافقتي ولا جمال غصبك التفتت لعندو وهي بتقول بحدة: أنت ما دخلك بحياتي لفت لجهة الشباك وهي بتفتحو لتلفح وجها نسمة باردة حلوة وخصوصاً انو الطريق كلو شجر والقمر منور المكان مراد: ليش هربتي لفت لعندو ورفعت حاجب ونزلت حاجب وماردت عليه … رفعت صوت الراديو ومدت ايدها من الشباك وهي بتحركها مع النسمات وبتدندن مع الغنية بضحكة حزن بريئة… (( إنرميييت ببحر الهوى موج… ناديييت تعب حالي… ومشيييت بيقسى الطريق يموج… قلبي اللي خان … لمحة زمان … منلوم الوقت … سنين بتلعب فينا منقول الحظ … يا دنية شوية علينا معقول الحب … كاس المر يسقينا يسقينا الويل ينسينا أسامينا أسرار بقلبي تنكتم لا بتنحكى وما بتنفهم معقول حتى بالحلم يبقى الأمل هربان بالبال هموم مشكّلة ألوان الظلم تلوّنت أيام تمرق وتحترق علينا الدهر تقلااااااان )) لما نطقت اخر جملة هرت دمعة من عيونها طارت مع نسمات الهوى وقلبها رجف وحست هالحياة شو صعبة وغدارة التفتت شافت مراد بسوق وهو كل شوي بيتطلع عليها وهو بشوف تغير ملامح وجهها مع الغنية مراد: شبك ليش هيك عم تطلعي عليي اتنهدت وهي بتقول: مافي شي وصلوا مراد ونرجس للبيت فتحلا الباب وهو بقلها اتفضلي نرجس: مزوء على غير العادة مراد: عم حاول العب الدور منيح رمت شالها على طاول السفرة الموجودة مقابيل باب البيت وحركت راسها يمين وشمال وهي بتحرك شعرها برياحة … شلحت كندرتها وهي بتمشي بطريقها للغرفة وبعدين سكرت الباب وراها وهي بتقفلوا ! هربت منو ودخلت لتعرف اذا جهاز التنصت اشتغل منيح كل هالمشهد صار وهو لساه واقف عند الباب حامل مفاتيحه بأيد وأيدو التاني بجيبتو وهو براقبها بذهول … أول مرة بشوف هيك شوفة أنثي حقيقية ببيتو من دون إرادة مشي للطاولة وحمل الشال وهو بشم ريحتو وبيتطلع على كندرتها المرمية بقرب باب غرفة النوم فجأة انتبه لحالو رما الشال من ايده وكأنه شي مُنكر !! مشي للصالون وهو بيستغفر ربو … اتمدد على كنبايتو وبقي عم يفكر شو يعمل بكلام سعاد عن الرسالة وشو رح يقلها … وكل شوي يتذكر شكل نرجس بفستانها لحتى اتذكرها قبل بشوي بالسيارة وهي بتدندن على غنية وحسها كانت زعلانة … ياترى ليش هالبنت هيك دائماً كئيبة مع انها عندا يلي الكل بتحلم فيه أي بنت !! ***** طلع الريس عبود لغرفتو ليرتاح وسعاد لحقتو فورا اتمدد على السرير وسعاد بتغطيه وهي بتسأله: هلق ليش يوم عرس مراد اتصلت فيي لاجي احضر كتب كتاب مراد متأخر ليش ماخبرتني بكير عبود: لان صار كل شي بسرعة نرجس بتشتغل عند ناجي وهو بشوفا دائما وطلب يتجوزا بعدما كانو متعرفين على بعض وانا وافقت وجاب الشيخ سعاد: بس مابعرف انا حسيتن مصدومين كانوا بيوم الحفلة حاول يخبي كذبو بدهائه كالعادة وهو بقول: يمكن لان صار كل شي بسرعة ماكانو مجهزين حالن مشيت لتطلع من الغرفة وبراسها الف سؤال … وهو شرد بعيونو وبفكر كيف قدر يطلع بخطة ليخلص من زواجو بهالسرعة ويحطا تحت عيون مراد يلي بيحميه من بعد الصورة يلي شافها والتسجيل الصوتي يلي سمعوا شقلبولو كيانو وغيرولو كل ثقتو بيلي حواليه ياتري مين بعتلوا هالرسالة !! اما سعاد اتجهت للمطبخ لتشرف على العاملات بترتيب المطبخ وعقلا أبداً ما معا عم تفكر بس بالرسالة يلي وصلتا قبل بيومين من رقم غريب بتخبرها انو جوزها بخونها وبدو يتجوز بعد افتتاح الشركة كانت بدها تجهز حالها لتروح وتكبس عليه وتكمشو بالجرم المشهود بس فاجأها انو اتصل فيها وخبرها انو عرس مراد بهالليلة اذا بتحب تحضرو !! طيب معقول شكل وجوه الكل كيف كانت مصدومة لما عبود خبر الشيخ انو مراد ونرجس هن العرسان !! ياترى هالرسالة صحيحة ولابس بدن يخربو علاقتها مع عبود ؟؟ ياترى يلي صار بكتب كتاب مراد حقيقة ولا كذبة وتمثيلية !! بس هي بالنهاية قررت انها تسكت وتسكر على الموضوع لأن بتعرف شغل جوزها واعدائو الكتار اكيد همهم تخريب حياتو وبقيت ناطرة مراد يحاول يجبلا اسم الشخص يلي بعت الرسالة من رقمو ***** @rwayate #تاني_يوم صحي مراد وبطريقه للحمام شاف باب الغرفة مفتوح … اتثاوب وحك شعرو ومشي للمطبخ مالقاها فيه فتح عيونو وصحصح وهو بركز منيح وبيهمس: وين راحت هاي هلق فتحت الباب وهي بتدندن مع الاغنية … واضح انها تعبانة وعرقانة شالت سماعاتها عن اذنها لما شافتو قدام عيونها مصدوم رفعتلوا مفاتيحه قدام عيونها وهي بتقلو: استخدمتهن قبل ما اطلع اعمل رياضة ماحبيت ازعجك اذا دقيت الباب رمت مفتاحة على الطاولة ومشيت باتجاه الغرفة صرخلها مراد: وقفي عندك !! رجعت وقفت ولفت لجهته وهي بتسأله: فيك شي!؟ مراد: شو هاللبس اللابستيه اتطلعت على حالها كانت لابسة بجامة رياضية زهر مفصلحة كل منطقة بجسمها بلا مبالاه قالت: بيجامة رياضية ضرب راسو وهو بقول: نحنا ما اتفقنا يكون لبسك محترم نرجس بعصبية: هاد يلي بعتو الريس وبعدين شقد معقد انا طول عمري هيك بلبس حاجتك تخلف فتح عيونو مصدوم قرب منها وهو بيمسك ايدها وبشد عليها وبقرب المحبس لوجهها: هاد شوووو احكي شوووو نرجس: خلص مراد والله انت صدقت حالك مراد: هاد محبس يا غبية يعني انا زوجك بدك تلتزمي بكل شي منتفق عليه لحتى اتركك نرجس: متخلف بعد عني مفكر حالك سي السيد رما ايدها ورفع اصبعتوا بوجهها وهو بقول: أوعك يانرجس اووووعك تعيديها تركها ومشي باتجاه المطبخ وهي دخلت لغرفة النوم وقفت قدام المراية عم تشوف منظرها فيه همست بقلبها (صح ديقة شوي بس هو كتير زودها وانا مستحيل اسمحلوا يتمادى اكتر معي) دخل للصالون وسكر الباب وراه وعرفت هي انو تركلها حريتها بالبيت اتحممت وبدلت تيابها وسبقتو للشغل وماحكت معو ابدا لما سمع خبطة الباب طلع ووقف عند باب الصالون وهو بنفخ بعصبية: متل الولاد الصغار منين اجتني هالبلوة ياربي وصلت نرجس لمكتبها وجهزت كل الشغل يلي اتراكم عليها وهي بعز شغلها دق الباب وليد نرجس بتوتر: اهلين وليد وليد بملامح جامدة: بس جبتلك أوراق الشحنة الاخيرة لتنزليهن على الكمبيوتر قربت منو وهي بتاخد المصنف وقالتلو: شكراً الك تعبتك معي وليد: عن إذنك دمعو عيونها غصب عنها وهي بتشوف برودو معها همستلوا بحنية: وليد وقف من دون ما يلتفت وهو بحاول ما يخليها تشوف ضعفه نرجس: لا تعاملني هيك لو سمحت أنت من الناس القريبة الي من دون ما يرد تركها ومشي وهي رجفو ملامح وجهها بقسى شو ممكن تكون متوقعة تلاقيه فرحان بزواجها !! اتنهدت بقسى ورجعت كملت شغلها بروتينية لحتى خلص دوامها … نزلت من الشركة بعدما قفلت المكتب واتوجهت لمطعمها المفضل أخدت وجبة أكل واتوجهت هالمرة لبيتها اكلت واتحممت وسشورت شعرا ولبست بجامتها وقعدت على كرسيها الاحمر اليومي واستمتعت بهدوئها وراحتها يلي اشتاقتلها … ولا كأن في ورجال بدور عليها من مكان لمكان رن الجرس البيت بقوة وطالعها من خلوتها مع روايتها نفخت بملل وهي بتفكر بيلي بدق الباب أكيد جمال بدو يحكي معها بنفس الموضوع بس بتتفاجأ بمراد واقف قدام الباب وكأنه بركان رح ينفجر نرجس: مراد شو جابك !! بكل عصبية رد: انا شو جابني ياخانوم !؟ … ولا انت يلي اختفيتي وانا الي ساعتين بدور عليكي وبتصل فيكي ليش ماعم ترديييي نرجس: من كل عقلك بدك تصدق اني مرتك عنجد مسكا من ايدها ودفشا ودخل لجوا البيت وسكر الباب بطرف اجرو وهو بحاول ما يصرخ: شو هالحكي !!!! … من يومين انكتب كتاب مين ؟؟ أنا وانت … وصرتي أنت ع أسم مين ؟ … على أسمي أنا … يعني شوووو ؟ … انت تعتبري قدام الكل انك مرتي … ولبين ما تخلص هالتمثيلية أنت مجبورة تسمعي كلامي وللنهاية بتنامي بالبيت وعالشغل ومنروح ومنرجع سوا فهمااااانة كل هالكلام كان صريخ وهو ماسكلا ايدها بعصبية وبهزها قدامو وهي مضيقة عيونها من هديرو العالي بوجهها بعدما سكت حاولت نرجس تسحب ايدها منو وهي بتقلو: عم توجعني فورا سحب ايدو عنها وبعد وهو بياخد نفس وبهدي حالو وهي بلشت تفرك ايدها من الوجع وتقول: انت اكيد نسيت حالك كيف هيك بتسمح لنفسك تمد ايدك عليي مراد بعصبية: والله لسا ما شفتي شي نرجس: لاااا لهوون وبس انا مستحيييل اتحملك اكتر من هيك مراد: اقعدي عاقلة ما بصير شي انا تحت عم استناكي بدلي تيابك وخدي اغراضك يلي لازمتك والحقيني نرجس بتحدي: مابدي مراد بغيظ: طيييب ماشي بتحدي فتح الباب وطلع وهو بيحكي مكالمة وهي بجكارة فيه رجعت مسكت روايتها بس من دون ما تفتحها ابدا خلال ثواني كان جاييها اتصال من عبود فتحت المكالمة بسرعة وهي بتهمس: اهلين يا ريس الريس عبود: معك ساعة وحدة بس وبتكوني ببيت مراد وبتسمعي كلامو يا اما بتعتبري حالك مفصولة من الشغل من عند ناجي وانت بتعرفي انو ناجي هو انا سكر الخط من دون ما يسمع كلامها انكسر قلبها من كلامو وحست حالها شقد رخيصة الكل بمشيها على كيفوا بانكسار مشيت لغرفتها وهي بترتب شنتاية فيها اغراضها الضرورية وحطت الكتاب فوق الشي لتتوجه لبيت هداك المراد يلي مشتهية الأرض تنشق وتبلعو ويختفي من حياتها نهائياً بس كل شي الا انها تخسر شغلها يلي بنتو بايديها الكل صار عندو ثقة بشغلها … ثقة تعبت لحتى وصلتلا ومستوى كبير … اكيد هي بيوم من الايام رح تترك الشغل عند هدول الناس وقريبا بس الأصح انو ما هلق خلال نص ساعة كانت بترن جرس بيتو فتحلها الباب ودخلت بعصبية من دون ما تلتفت لعندو حطت شنتتها بغرفة نومو ومتل البرق نزلت على سيارتها طالعت كيس كبير فيه شراشف وأغطية وبلشت تعزلو الغرفة نص تعزيلة وهي بتشتغل بشراسة كان براقبها وهي بهالمنظر وموجة الغضب مجتاحة كل كيانها … كانت متل اللبوة هيك شببها وهو براقبها من زاوية بصالونو كيف طالعة فايتة على الغرفة رتبت السرير ورتبت شنتايتها على جنب فوق كرسي من كراسي السفرة واغراض التخت كلن رمتن بأرض الصالون قدام عيونو وقفت قدامو بكل عصبية لتواجهو وهي رافعة اصبعتها: ليك انا وافقت ارجع واققعد معك لبين ما تخلص هالتمثيلية بس اوووعك تتخطى الحدود فهمان … ما منحكي ولا منتقابل ولا حتى بتلمسلي ايدي فهمان … انا بغرفة النوم وانت هون بتطالع كل شي بدك اغراض من غرفتك من قبل بليلة واوعك تزعجني #بقلم_مروةآغا كانت لسا بتحكي وهي معصبة عيونها بيغلوو غلي وفيهن لمعة جذبتو اما شعرا حكاية تانية كان بيتحرك مع لوحة وجهها المحمر من العصبية وبهز يمين ويسار متل الشلالات ورا ظهرها نرجس بنفس العصبية: وياريت لا تفرجيني وجهك كتير رمش بعيونو ليرجع لوعيو وهو بقلها: تمام ماعندي أي مشكلة يكون في حدود بيناتنا اصلا هالقصة كلا لوقت قصير وبعدين كل واحد بطريق نرجس: ماشي هاد يلي بدي أياه … بس كل شي اتوقعتو منك الا انك تكون فسفوووووس ختمت جملتها ببسمة ماكرة خلتو يعصب وهلق صار دورو هو يلي يعصب عليها فتح عيونو العسلية الكبار وهو بقلها: هاد الشي من ضمن شغلي وانا مستحيل اسمح حدا يخرب شغلي اتكتفت وهي بتحاول تغيظو: اااااه شغلك الباديغارد اي والله شي بشرف هلق جاوبها بلؤم: احسن ماكون رخيص وبيع حالي لأول شاري رجفو ملامح وجهها من الصدمة وهلق فقدت أعصابها رفعت ايدها بدها تضربو كف بس قبل ما توصل ايدها كان ماسكها قرب وجهو من وجها وتقابلت الوجوه وهني بينفخو بعصبية والدخان كان رح يطلع من ادنيهن همسلها بتحدي: هاي تاني مرة الثالثة بكسرها جاوبته بنفس التحدي: انت جرب وشوف كيف رح ارميك بالسجن رما ايدها بقوة وطلع برا البيت بعد ثواني استوعبت كلامه كانت بدها تبكي … بس لاااا هي بدها تكون قوية بكفي بكي ركضت باتجاه الشباك لتشوفو داخل على النادي الموجود مقابيل البيت لقت حالا فجأة بدها تلحقوا وتفرغ كل الكلام يلي جواتها كيف هيك ما سمحلا تحكي وتدافع عن حالا كيييف فورا مشيت ونزلت باتجاه النادي ودخلت لجوا من دون حتى ما تحكي مع الريسبشن ويمكن حتى ما شافت الشب يلي بيشتغل _ يا انسة وقفي لوين داخلة هلق وقت الرجال النساء الصبح ماعنا مختلط بس هي كانت بتمشي متل الإعصار وقفت لما شافتو لابس كفوف بايديه وبفرغ كل عصبيتو بكيس الرمل المخصص للملاكمة بس هلق هالكيس كان مخصص لتفريغ الغضب اتكتفت وهي بتراقبو وبقربا الشب عم يحكيها بس ما انتبهتلو الا لحتى هزها الفتتت من دون ما تحس وهي بتقلو: مين انت شو بدك؟ _ أنت مين وكيف طاحشة هالطحشة هاي نرجس: امممم انااااا اجاه الجواب من بعيد عم يقول: هاي المدام اتركها _ ليش أنت اتجوزت؟؟؟؟؟ مراد بتوتر: روح من وجهي هلق _ بس ممنوع الشباب مع البنات روحو لنادي تاني فيه مختلط انا هون بشتغل لا تقطعوا برزقي مراد بعصبية: خلص رايحين سبقنا اصلا مافي حدا هون هز راسو وطلع لبرا ومراد قرب لعندا وهو بقول بعصبية: كيف بتحطيني بهالموقف ليش لتدخلي لمكان مخصص بس للرجال التفتت حواليها وهي بتقول: بس انا ماشايفي في هون رجال هلق فوق راسو صارت عصافير الدنيا كلها عم تدور لما سمع اخر كلمة قالتها اتلبكت نرجس وهي بتكمل: غيرك … قصدي مافي رجال غيرك وانت مانك غريب يعني مراد: رجعي على البيت هلق بكمل تدريب وبلحقك نرجس: ماني راجعة لتعتذر مراد: ليش من ايمات انا بعتذر وبعدين أنت يلي غلطتي بالاول انت لازم تعتذري نرجس: لك انت يلي سبيتني وهنتني مراد بحدة: بكفي رجعي ع البيت بعدين منحكي بعدما ختم جملتو اتوجه لعند كيس الرمل ورجع يضربو بكل طاقتو انغاظت من طريقتو ليبرز عضلاتو قدامها مشيت وجابت كفين ووقف قدامو وهي بتضرب الكفين ببعض مراد: شبك جنيتي يعني نرجس: منتبارا ويلي بيخسر بيعتذر للتاني مراد: لااااااا أنت أكيد جنيتي روحي أنضبي بالبيت فورا ضربتو بوكس على خدو وهي بتقول: واحد صفر … أنا مافلتانة لانضب اذا بقيت هيك رح تخسر وتعتذر غصب عنك رجعت تضربو بوكس بس هالمرة عرف كيف يبعد وجهو عنو بحركة سريعة وهو بيهمس بعصبية: بكفي لعب نرجس: هاد ما لعب هاي مباراة مشيت على طرف الحلبة وهي بتعمل تمارين الاحماء نطت عدة نطات وحركت ايديها واجريها لتبرز لياقتها وطقطقت رقبتها وهو براقبها بتمعن جهزت ايديها وهي بتقول: جاهز هالمرة أغرتو هالبنت بدو يعرف شو بتعرف كمان معقول تقدر تجاريه بالملاكمة !!! مراد: انا رياضي من سنين يعني ممكن اكسرلك عضامك اذا اتحديتيني نرجس: فرجيني شو عندك بعدين احكوم مراد بتهديد: انت قد التحدي؟ نرجس وهي بتضرب كفوفها ببعض وبتغمزو: شكلين مابحكي مراد: واذا خسرتي رح تزعلي وتبكي متل كل البنات نرجس: يلي لسا ما بتعرفو عن نرجس انو مامتعودة تخسر وأنا ياما مخسرة رجال كبااار مراد بتحدي: يمكن صار من زمان بس ما انا نرجس: مغرور رفع كتافو وهو بقلها بثقة: واثق من قدراتي جهز وضعيتو ووقف مقابيلا وجوههن مقابل بعض اللبوة والأسد عيونن متوجهة لبعض بتحدي وتصميم عدو للثلاثة مع بعض بشكل عكسي (ثلاثة - اثنين- واحد) وبلشو يضربو بعض بوكسات ويحاولو يصدو الضربة حاول يباغتها بضربة على بطنها بس بسرعة هي بعدت عنها رفع حواجبو وهو بقول: والله تاريكي خبرة @rwayate رفعت حاجب ونزلت حاجب وهي بتنط يمين وشمال وبتهمس: لكن بعجبك عشر دقايق وهني بصدو ضربات بعض وهو أكيد ما حاول يكون شرس او يقوي الضربة لان خاف يكسرلا شي ضلع او يكسرلا رقبتها على الخالص … كان بجاريها بنفس قوتها تقريبا بس هي كانت شقية عم تقدر تهرب من الضربات بسرعة متل القطة الصغيرة @rwayate بس فاجأها بضربة اجت على بطنها من وجعها وقعت على الأرض حطت ايدها على بطنها بتتوجع وهو وقف بيعلن الانتصار وكان بيضحك عليها بس هي لساها واقعة على الأرض وبتتألم قرب لعندا وهو بيسالها بقلق: فيكي شي غمضت عيونها وبسرعة البرق ضربتو عدة لكمات على صدرو وباجرها على بطنو خلتو يوقع على الارض وبحركة بهلوانة قدرت تحط تقل جسمها عليه وتغلبو بحركة خاطفة سريعة … بقيت عم تطلع عليه نظرة ثقة وانتصار همست بخبث وهي فوقو: ماعاش مين يغلبني مراد ببسمة: خبيثة هاد اسمو غش حطت ايديها على خواصرها وهي بتهمس: هزيمة هاي ولا ما هزيمة ياكابتن مراد: لا طبعا ما هزيمة هاي جزاتي لان خفت عليكي بقيت فوقو عم تتمعن ملامح وجهة وهي بتفكر بجملتو(خفت عليكي) ياللللله أول مرة حدا بقلها هالجملة غيرت الموضوع وغمزتو وهي بتقول: الي عندك اعتذار مراد: بس انت خدعتيني قربت وجهها من وجهو وهي بتهمس: كل شي مباح بالحب والحرب ياكابتن لفحوا نفسها الدافي واتحركت غريزته الرجولية بلع ريقو وهو بقول: انا الحق عليي خفت لا اكسرلك ايد او اجر لما حاولت تبعد عنو رجع باغتها وثبتها بالأرض وهو بقول: مستحيل اعتذر نرجس: هاد صار اسمو غش مراد: البادي أظلم نرجس وهي بتدفشوا: بعد عني كيف هيك بتتخطى حدودك مراد بهمس بيشبه همسها الناعم لوجهها: أنا بحب البنات الشرسين … بكونو متل القطط البرية … بكونو مثيرين وماحدا بيقدر يقاومهم نرجس: شو قصدك !؟ نفخ مراد وهو بقول: انو ليش الله بيخلق البنات الحلوين أغبياء شردت شوي وهي بتفكر بجملتو لتلاقيلو الجواب المناسب بس فاجأهن صوت من بعيد _ لك شو عم تعملوووو ؟؟ بتلبك بعدو عن بعض ووقفو اتنيناتن وكأنن عاملين عملة قرب مراد من الشب يلي بيشتغل بالنادي هو يعتبر رفيقو متعود عليه كل يوم تقريبا لازم يجي يلعب شوي ليقوي عضلاتو ويحافظ على لياقتو كرمال شغلو مراد: مافي شي بس عنا شرط مشان نشوف مين بيقدر يغلب الثاني _ بس ما هون روحو اتشارطو ببيتكن مراد بتلبك: أي والله معك حق شلح كفوفو ومشي وهو بشد نرجس من كتفا ليطلعو برا النادي كلو وهو بقلها: عجبك اكلنا بهدلة كانت نرجس بتضحك على شكلو وهو هيك خجلان ومتلبك تركا لما وصلو للشاع طلع ع البيت من دون ما يلتفت دخل لغرفة النوم اخد تيابو ودخل للحمام ليغسل العرق يلي عليه … وقف تحت الدوش وهو بفكر فيها وكل الصور قدام عيونو عم تصورو شكلها الشهي ونرجس برا بس اكتفت بانها تبدل تيابها لان اتصل فيها جمال وكان بدو اياها ضروري غسلت بمغسلة المطبخ ورتبت شعرا وعدلت مكياجها كان طلع من الحمام وهو لابس تيابو شافت على الطاولة في مسدس مسكتو بايدها وهي بتتفحصو مراد: اتركيه من ايدك نرجس: مالي خبر عندك مسدس مراد: هاد للشغل نرجس: ومرخص؟ مراد: شو رأيك ؟ … أكيد مرخص حطتو من ايدها والتفتت لما سمعتو بقول: مالي خبر انك بتعرفي تلاكمي نرجس: بعرف كتير شغلات لا تفكرني متل البنات قطة مغمضة مراد: غريبة انت يابنت نرجس: ماغريب إلا الشيطان هلق عافيتك من الاعتذار بس مارح خليك ترتاح لارجع فهمان مراد: لوين رايحة نرجس: رجعت تدخل بحياتي حل عني اخدت جزدانها وطلعت برا البيت وخبطت الباب وراها اما هو نشف شعرو بسرعة ولبس طاقية وجاكيت ولحقا متل ما عبود أمرو. مشي وراها بالسيارة لحتى شافا نازلة قدام الشركة الجديدة وعرف انها اكيد دخلت لعند جمال. ارتاح ورجع شغل سيارتو ومشي باتجاه البحر مكانو السري فوق حجار على الكورنيش وقعد بيراقب البحر رغم الظلام بس كان واضح صوتو بسبب الهدوء هزو رفيقو وهو بيهمس: شو ياصاحبي شو بتعمل هون التفت وهو بيبتسم وبيهمس: من زمان ما التيقنا يا صاحبي قعد باسل بقربو وهو بقلو: مشاغلي كتيرة ضحك باستهزاء وهو بقلو: واضح ما صرت مدير باسل: ليش عم تتمسخر شو من ولا شي صرت … انا تعبت لصرت هيك فوق ما تباركلي مراد: باركتلك قبل الكل باسل: قلتلك كمل دراستك ورح تصير أنت شريكي بدل جمال بس ماوافقت بقيت مع رفقاتك الزعران رجال البرنس مراد: بتعرفني ما تبع دراسة وبعدين رفقاتي هدول يلي ساعدوني لما ماكان في حدا بقربي باسل: بكفي مشان الله لكن تبع شقى وتعتير من طول عمرنا من شغلة لشغلة ما ضل شي ما اشتغلناه بس خلص هلق صار وقت الراحة … بتتذكر لما كنا ننام من كتر التعب بمغسل السيارات ولا توزيع اكل ديلفري ولا شطف الدراج بس انا خلص تعبت بدي ارتاح مراد: أي ارتاح وأنا هيك مرتاح بيكفيني يلي عندي … بيت وسيارة وشغل عند ناس منيحة باسل: أنت بتعرف مين عبود وشو بيشتغل مراد: مابهم بس هو منيح معي باسل: ايمات بدك تترك البنت مراد: لحتى يقول الريس باسل: ياريت بأقرب فرصة التفت ليراقبو بحيرة وهو بيسألو: ليش؟ وقف باسل وهو بيهمس: لانها ملعّبة مشي وبعد عنو بس مراد لحقو وهو بيسألو: شو عرفك باسل: واضح هالشي من شكلا وطريقة كلاما اتنهد براحة وهو بقول: أي اصلاً انا مافي شي بيني وبينها باسل: وبعّد عن رفقاتك الزعران مراد: رفقاتي مانن زعران باسل: بيشتغلوا مع البرنس شو بدن يكونو !! مراد: أصلاً من زمان تركتن لما صرت اشتغل معك وبعدين رجعنا التقينا قبل ما نشتغل عند البرنس والريس باسل: ايه بعرف انا بعدتك عنن وهلق بدي ارجع احميك من الكل مراد: شوفي خوفتني @rwayate قرب وحط ايدو على ظهرو وهو بيهمس: دير بالك على حالك مراد: هلق بدك تصير وصي عليي لانك أكبر مني باسل: انت من طرفي وكنت بعرف اهلك منيح مابقدر اتركك هيك للزعران مراد: بدك تخاف عليي شوف عضلاتي ضربو على راسو وهو بقلو: لك ياغبي فكر بعقلك مابعضلاتك مشيو سوا وهني بكملوا حديثهن وكل واحد طلع بسيارتو ورجعو لبيوتن ***** بمكان بعيد عن البلد كانو عبود وناجي داخلين لمكتب البرنس الخاص ببيته السري قرب منهن غسان وهو بشيل قطع القماش عن وجههن غسان: اسفين بس متطريين ناخذ حذرنا ناجي: تمام اتعودنا قعدو قدام المكتب وورا المكتب كان صوت البرنس طالع من جهاز اسود صغير بس بغير صوتو الحقيقي كان حاطط برنامج ليغيرلو صوتو حتى ماحدا يعرفو البرنس: أهلاً بالرجال الريس عبود: اهلين فيك برنس أخر شحنة صارت بمكانها وهلق في شحنة جديدة وهالمرة أكبر من كل مرة البرنس: وانا هاد يلي بجهزلو من زمان لازم نضرب ضربة كبيرة الضربات الصغيرة ماعادت تفيد الناس الكبيرة ماعاد تسكت عن يلي كان بصير قبل ناجي: لاتاكل هم ونحنا عنا رجال متل الحديد البرنس بتحذير: بس بدي تديرو بالكن سمعت انك يا ريس بلشت تخبص اتنهد الريس وهو بقول: كيف عرفت البرنس: أنا مابيخفى عليي شي الريس عبود: غلطت وصلحت غلطي البرنس: في شي يعني حتى بطلت تتزوجها !؟ الريس عبود: لا بس اجت المدام وماعرفت كيف اتصرف ماقدر يحكيلو الحقيقة لان بيعرف انو كلن همهم المال والجاه ويمكن يلي قتل ممدوح هو البرنس لهيك لازم يحافظ على حياته وبيبقى ساكت البرنس: بس بدي تديرو بالكن لنخلص من اجراءات هالشحنة برا عم يجهزوها مابدنا نفشل قدامهم وفي رزقة محرزة من وراها الريس عبود: حاضر متل مابتريد البرنس: هلق بيجي غسان وبيعطيكن تفاصيل الشحنة بقيو قاعدين مع غسان لساعة وهني بيتفقوا … هيك بيشتغلوا من سنين مع شخص اسموا البرنس اجا غسان لعندن وعرض عليهن يشتغلوا سوا بالاستيراد وشوي شوي الاستيراد صار سلاح … وكل هالسنين ماكانو بيعرفو شكل البرنس الحقيقي أو حتى صوتو وبراس كل يلي بيسمعوا عنوا بدور (ياترى مين البرنس !!!!) نادا البرنس لغسان التفت غسان لجهة البرنس وهو بقلو: اوامرك؟ البرنس: جبلي رقم البنت ***** لما وصلت نرجس لمكتب جمال دخلت معصبة وهي بتقلو: شو بدك جمال: بدك تهدي شوي نرجس: رح اعمل يلي بدك اياه بس بدي اخلللص انا داقت خلاقي جمال: لازم تحاولي تعلقي عبود فيكي من جديد لتوصلي لفرشتو وبالسر وتقتليه نرجس: كيف وانا متزوجة هاد المعقد لك بحاسبني ع الخطوة … وبعدين الريس كتير عم يعاملني بسطيحة ما متل قبل تشوفو كيف عاملني اخر مرة والله خوفني سألها بشك: شو قصد شاكك فيكي؟ نرجس برعب: والله لو شاكك فيي ماكان خلاني عايشة جمال بترقب: انا رح شوف الوضع وانت حاولي اتقربي منو فهمانة هالموضوع بدي ينتهي عن قريب طلعت نرجس من مكتب جمال وهي معصبة وكرهاني حالا والحياة يلي عايشتها حاولت تكتم غضبها وحزنها لوصلت للسيارة شغلت سيارتها وهي بتصرخ: يالله كيف بدي اعمل هيييييك هاد جمال مجرم كبير ايمات بدي اخلص منو تعبت انا تعبت ضربت السيارة قدامها وهي بتصرخ باعلى صوتها: تعبببببببت وصلت لشط البحر نزلت قعدت وهي بتشرب كاسة شاي لتدفي حالها فجأة اجتها مكالمة رفعت الجوال وهي بتشوف (رقم خاص) بلعت ريقها وهي بتفكر اذا بتفتح الخط او لا بس قررت تفتح لتعرف مين فتحت الخط وهي بتهمس: الو اجاها صوت رجولي بقول: أنا من طرف البرنس وين أنت جاي أخدك تشوفيه اتوترت وهي بتقول بقلق: بس كيف بدي روح لعند حدا مابعرفو غسان: قلتلك من طرف البرنس ولا تعملي حالك مابتعرفيه نرجس: بس أنا ما……… قطعلها جملتها وهو بقول: قوليلي وين لاجي احكي معك عطتو العنوان وقلبها بدق وأول ماسكرت اتصلت بجمال نرجس: جمال دقلي البرنس بدو يشوفني بفرحة قال: عنجد معناها قطعنا شوط كبير نرجس: انا خايفة شو بدو مني جمال: روحي وشوفي نرجس: يمكن يقتلني جمال: مستحيل أنا متاكد انو بدو منك شي نرجس: مابدي روح جمال: خرسسسي بعد ما اجت الفرصة على اجريها بدك ترفسيها واخيرا بدك تدخلي على وكرو نرجس: بس انااا جمال: مابدك تاخدي حريتك نرجس: أكيد جمال: معناها بسرعة وصليني لكرسي البرنس قبل ماترجع تحكي شي سكر الخط بقيت قاعدة عم ترجف لحتى اجا غسان كان خافي شوي من ملامحو وحاطط نظارات على عيونو غسان: أتفضلي معي نرجس: شو بدكن مني غسان: شغل مشيت برعب وطلعت معو بالسيارة قرب قماشة سودة وقلها: بدي اربطلك عيونك برعب قالت: ليش !؟ غسان: هاي اصول الشغل ربطلها القماشة ومشي بالسيارة وبعدين نزلها ومسكها من ايدها سحبتها نرجس وهي بتقلو: انت شو عم تعمل ليش لتلمسني غسان: بدي وصلك لعند البرنس نرجس: شيل هاي عن عيوني شد على ايدها بقوة وسحبها وهو بيهمس: ناقصني دلع نسوان سمعت صوت باب انفتح وبعدها قرب شال القماشة عن عيونها وهو بقول: اقعدي رمشت عدة رمشات لتوضح الرؤية شافت مكتب وكراسي وكمرة عم تصورها واضائة الغرفة كانت بلون احمر خافت بوجع الراس قعدت وهي ميتة رعبة اجاها صوت مختلف بيهمس: اهلين معك البرنس شخصي بلعت ريقها وهي بتقول بتوتر: اهلين ياباشا كان طالع صوتو الغريب متل مابتسمع عنو من قبل من مكرفون على المكتب البرنس: هالمرة الشغل رح يكون معي شخصي من دون مراسيل رجفو ملامح وجهها و هي بتفكر بمصيرها النهائي رح تكون شغلا مهمات قتل !! همست بقلة حيلة: إلي الشرف يابيك البرنس: سمعت عن شغلك خصوصاً طريقة قتلك لممدوح فتحت عيونها مصدومة: يعني أنت يلي طلبت نقتلو ما ج…… البرنس: جمال بياخد اوامرو من شخص عن طريقي بس طبعاً هالشي سر مابدي تخبريه أحسن ماتخسري حياتك قلبها بلش يدق بقوة من رعبتها يعني شغلتها ما جمال وبس لا الشغلة اكبر من هيك الكل عم يستغلها لمصلحتو !! البرنس: هالمرة الشغل نفس طريقة ممدوح في شخص ماعم يمشي معنا بدو فركة ادن همست بقلة حيلة: بس بس انا ما بقتل البرنس: بس يلي بعرفو انك متدربة على السلاح نرجس بتحدي: أي بس مابقتل البرنس: طيب انا رح تكون خطتي غير بدي تدخلي لمكتب شخص تخليه يدوب فيكي وبعدين تاخدي من خزنتو شي مهم نرجس بنفس التحدي: وانا كمان مابعمل علاقات البرنس: كيييف لكن شو بتشتغلي نرجس: بس بجهزهن للقتل نفخ وهو بقول: هاد شغلك نفذيه بدي تروحي لبيتو هو شب مانو متزوج … يمكن يكون فيه ويمكن لا اذا كان فيه حاولي تلهيه لتوصلي لخزنتو وتجيبي الاوراق المهمة واذا ماكان موجود لازم تدخلي وبعتقد بتعرفي كيف تفتحي القفل @rwayate نرجس: بعرف بس هالمرة الشغلة صعبة عليي كيف رح يوافق يدخلني البرنس: بدك تفكري هاي خطتك نرجس: انا خايفة هالمرة البرنس بصوت عالي: بدك تسمعي الكلمة والاااا رح تشوفي شي ماشفتيه قبل … ولا تخافي رح يكون برصيدك مبلغ كبير بنهاية الشغل اتنهدت وهي بتفكر بالمبلغ شقد رح يفيدها لما تترك جمال … وهي مهمة لا فيها قتل ولا حتى شي تاني مجرد عدة اوراق ويمكن تقدر تجيبهن بسهولة نرجس: وايمات التنفيذ؟ البرنس: غسان بيحكي معك وبخبرك نرجس: طيب ومراد ؟ قال غسان: انا بلهيه بس يطلع بكرا برا البيت طلعي أنت كمان نرجس: ليش أنت بتعرفو البرنس: هون الكل بيشتغل تحت أمري حتى عبود وناجي فهمانة التفت لمكان الصوت وهي بتقول: أنت مين بالظبط همس بصوت بيشبه الفحيح: انا البرنس اتنهد وهي بتفكر بمصلحتها بتردد جاوبته: موافقة *يـــــــــ͢ـོ͓ـــتبــــــــــــــོـ͓ـــ͢ــ؏* ➖➖➖➖➖➖➖➖➖