15 /16
القائمة
روايات
بحث عن
الرئيسية/الجزء
الجزء
الجزء الخامس عشر من رواية محظوظ ولكن
الجزء الخامس عشر من رواية محظوظ ولكن
صورة مهند أدهم مهند أدهميونيو 20, 20220553 12 دقائق
وفي الجزء الخامس عشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الخامس عشر من رواية محظوظ ولكن
ركب عمر وهوا حزين … يكر فرجليه كران … ووصل لحوشه اتنهد تنهيدة زعل وفتح باب الحوش وخش …وسكر الباب …
غمض عيونه ونزلت دمعة على خده
{ياربي واحدة مانعرفهاش انطب عليها هكي فجأة والله اخيه.. هوا بعﻻقة ويكون فيه توتر يبالك قطوس فشكارة حتى تعارف فترة خطوبة ماجتنيش النية نكلمها }
مسح عمر دمعته وقال : استغفر الله العلي العظيم الحمدلله على كل حال مدام ربي هكي رايد ﻻ اعتراض ..
شن زعما انخشلها .. ﻻﻻ خلي نخش نتوضى قبل بش نصلي ..
خش عمر … وفتح روشن الحمام ووقف يشم هواء وسرح…
قام راسه فرج … اشرله خش .
عمر ايفنص ﻻ ¤_¤
فرج يأشر براسه..تي خش بﻻ عار ~_~
ابوبدلة صفرا (فتحي ) : خيرك يافرج
فرج : ﻻ شي غير رقبتي تشكلت انسرح فيها
ويفنص ف عمر.. خششش
عمر وجه كشر وفنص ..مانيش ..
ويقيم راسه ابو بدلة صفرا فجاة ويشوف عمر واقف عالروشن ووجه مكشر وايفنص
وقف وتلفتوله خوتها ل فتحي وشافوا وين ما ايشوف ووقفوا كلهم وايفنصوا حالين عيونهم يحسابوها حاجة تانية.
خش عمر وسكر الروشن
فرج : خيركم اللطف
محمد : عﻻش عمر طالع من الروشن
فتحي : وامكشر …
فايز : هات المقرون ياعتماون
حاتم : شن فيه ياودي ؟
فرج :تي غير استهدوا بالله عمر طلع من الروشن غير يبي يبي اااا الحوش مافيشي اميا نسيت ناخدله شيش اميا
حاتم لقطها وكمل على كدبت فرج وقال: ايه ايه والدكتور موصيه ﻻزم يشرب اميا كل شوي وتاني بش معش يصيرله جفاف
فتحي : اه به
فايز : رد المقرون ياعتمان
محمد : قعمزوا وانتو حشيشتكم اديرو شوشرة
عمر : هالشكل بو بدلة صفرا تي حتى اللي بيشم هواء ماتخلوشي عيلة خنقة …
خلي نتوضى ..
وتوضى عمر وواسى روحه وطلع من الحمام ووقف شوية خدي نفس وخشلها
عمر : السﻻم عليكم
ليال بكل كسوف : وعليكم السﻻم
{ اخت الجيش }
قعمز عمر بعيد عليها وقالها : ان شاء الله حالك باهي
ليال : الحمد لله كيف حالك انت
عمر : باهي .. نوضي كان بتتوضي خلي نصلوا ركعتين نوضي
ليال : متوضية
عمر : به نوضي اماﻻ بدلي فيلوك اهو نستنى فيك برا 😑 …
ليال : ان شاء الله
وبعد شوي صلوا ركعتين…
وطفوا الضي ورقدوا … بدون تفاصيل…
لكن عمر مارقدش ناض وخدي مفاتيحه وطلع من حوشه..
ونزل ل فرج لقاه مكسد في الشارع …
عمر : رد بالك اتقولي شن صار نازل مخنوق ومش طايق شي
فرج : باهي اوكي … روق اعصابك خود امية شعير هاك
عمر : والله ماخاطري في العسل شنو روحوا المعسكر
فرج : روحوا ايه امهم فززتهم كلهم
عمر : باهي .
فرج : مشي امورك عميرو .. واستهدى بالله واركب لمرتك اول يوم تخليها بروحها تو اتقول مايبينيش
عمر : رقدت تقريبا ..
فرج: عليك عملة امبكري خوتها قريب جابوا المقرون
عمر : على خاطر طلعت نشم هواء عقولهم خامرة النهار المبارك
فرج : نوض نوض اركب
عمر : ان شاء الله خير … تصبح ع خير فرج
فرج : تﻻقي الخير احبيبي
ركب عمر لشقته وقعمز عالكنبة وحاط ايده ع خده
وليال في دار النوم اتخمم .. عﻻش عمر هكي … مش على بعضه واﻻ هوا هكي ديما !
ياربي زعما نسئله خيرك ؟؟ ﻻﻻ فكني بالك هوا هكي طبعه ..
سبحان الله معقولة اول ليلة هكي … مفروض اتكون عسل … شن هالحظ ياهمي انا … تره خلي نشوفه .
ناضت ليال وتبيت عليه من شق دار النوم ولقاته مقعمز عالكنبة ..
عريس ويقعمز هكي بروحه ومخليني في الدار اللطف حتى شيابين متع الستينات ماداروها !
{ياهانم يلي اتبيتي عليا خشي انخمدي خير …شايفك شايفك ف مرش الدوﻻب اللي قبالتي }
ليال … هيااا تشجعي وكلميه هياااا..
واست شعرها ليال وطلعتله ..
ليال : عموري
{زموري}
عمر : نعم
ليال : عادي انقمز معاك واﻻ تبي تكون بروحك ؟؟
{به مدامك تفهمي ﻻش طالعتيلي كان نبي رفقة راني خشيتلك }
عمر : عادي قعمزي
ليال بضحكة ولعبة قتله : اممم فاتتك الحفلة عﻻش ماجيتش ؟؟
{ريتها واﻻه تبيني حتى انخش لصالة… يعطوك حق … نوضي صوت ينهضك باهي اللي ماهربتش ف التدريجة لوﻻ المعسكر اللي جايبتيه معاك راني هربت . رايحين زي المدرعات ستة ف ستة }
ليال : وين اسرحت ؟؟
عمر : اه كانت عندي دوخة ماقدرتش انخش
ليال : سﻻمتك عموري ماتشوف شر
{يرزيك فيه عمورك اهواه }
حط عمر ايده على جبهته واتكى ع ايده ورد عليها : الله يسلمك .. بعدين وقف وقالها: الوقت تأخر نعسان اونه كان جعتي المطبخ ع ايدك اليسار كان كسدتي اون تلفزيون تصبحي ع خير
ليال بكل زعل : تﻻقي الخير
اتكمكم ف اليرغان حس روحه مخنووووق والدنيا صاغرة بيه
خشت ليال ورقدت بحداه …
ساعة 8 صباحا …
ليال : عمورة عمورة
نط عمر مخلوع قريب طاح من على السرير
عمر : تي حد اينوض هكي صوابعك مناخيص في كتفي اتقول كشافيتي نجمة يحفر …
ليال : اه اسفة نومك رزين من بكري انوض فيك بهداوة مافقتش
{تي اما هداوة كان هداوتك هكي يرزيني فيك والله }
عمر : اصﻻ عﻻش تنوضي فيا ساعة كم توا
ليال : التمانية
عمر : التمانية التمانية يا حظي انا ! عﻻش بنمشي العمل واﻻ شنو واﻻ عمل داخلي بنوض انشف ونغسل الحوايج حبيبي ارب بص وبص بص !
ليال : هههه سامحني سامحني احنا انوضوا بكري فحوشنا فانوضتك
حوش الجيش … قصدي حاجات حوشكم انسيها تعلمي زي ماندير انا ديري واﻻ نقولك نوضي بروحك ماتنوضينيش …
تكمكم في اليرغان عمر ورجع بيرقد
ليال : به صباح الخير ياودي
عمر : اصباح النور
ليال …والله برغم انه ايكشخ اﻻ ان جوه حلو هههه تو انا صوابعي كاشفيتي نجمة الله يسامحك وخﻻص
ساعة 11 صباحا…
خ وداد : نازك ياااا نازك
نازك : نعم نعم
خ وداد : هاك الفطور ارفعيه ل عمر
نازك : معقولة بنطقطق عليهم من صباح الله خير هكي
خ وداد :وشن بيطرالك بري فيسع
نازك : اح باهي هاتي هي … ماقعدت غير للمواقف المحرجة
خدت الصفرة نازك وركبت ل عمر
طق طق طق
ليال : هيا جاية هي …
لبست بدلة الصﻻة ليال وفتحت لنازك.
نازك :صباح الخير اننننه ااننننه الف مبروك
ليال : انننه اننننه الله يبارك فيك خشي خشي
نازك : ﻻﻻ عاد شن انخش هههه بنفطر امي تستنى فيا
سمع عمر صوت نازك طلعله جري..
ليال : باهي اماﻻ صحتين عليكم
عمر : نازك نزوكتي خشي خشي
نازك : صباح الخيرات عميرو
عمر : اصباح الورد ياوردة … خشي خشي
نازك : ﻻﻻ شن انخش بننزل نفطر امي
عمر : والله ماصايرة باه انقولك اماﻻ انزلي بصفرة اهو ﻻحقك انا وليال نفطروا معاكم
نازك عﻻمات الدهول على وجها
وقتله : عمر !
عمر : ايه ايه مافيش خير من الفطور مع العيلة واللمة الحلوة
نازك : به على راحتك … اهو نازلة
عمر : ﻻحقينك هي …
وسكر عمر الباب …
وليال مسموطة خيره مايبيش يفطر معاي بروحنا وعﻻش ايقول لاخته صباح الورد ياوردة وانا قالي اصباح النور 😑
عمر : هيا البسي جﻻبيتك
ليال :جﻻبية !قبل بنلبس قفطان
عمر : ﻻﻻ جﻻبية مرات حاتم خوي ينزل شن بيشوفك بقفطان !
ليال : باهي ان شاء الله
خ وداد : والله عارفاته هالعمر مش انه يبي يفطر معانا يسحن في البنت بلعاني .. به به غير ينزل بس حسابه معاي
نازك : خلي الولد فحاله دار اللي تبيه واتجوز خﻻص هادي حياته الخاصة ووقت اتجي تشكيلك البنت اتصرفي
خ وداد : هكي اتقولي
نازك : ايه ايه خير مايزيد يعاند
خ وداد : اممممم باهي خﻻص مش حنكلمه
ليال … عﻻش هكي يتصرف معاي اول يوم بيفطرني لوطا… قريب انحط فبالي انه مايبينيش … زعما انقول ل امي … لكن ﻻﻻ امي مريضة ومش ناقصة ..
عمر : نزلت انا لحقي اونه
ليال : استنى استنى انحط شاربتي
{قلبي قللللبييي … السكر بيرقى ياناس … كلمة شاربة بابور عليها حتى امي معش اتقول فيها ! }
عمر : سقدينا عاد واقفة قدام مراية شن اديري .. هاااه هذا شنووو
ليال شبحت لروحها وقالت : شنو شنو
عمر : الطرطاري الطرطااااري اللي فوق عيونك
ليال : اه هدا ظل مخملي المسة اﻻخيرة
{لمسة جداك }
عمر : خشي فيسع امسحيه.. بالك تحسابي ماشيين حفلة
ليال : اح ان شاء الله
{مازال والله.. بتنزل لحوش العيلة امكيجة ريتوها او… هدا مامزال حق }
ليال … هدا شخص جاف جااااف اللطف خيره خوتي ايدلعوا ف نساوينهم وغير شن تبي قعدت غير انا …
عمر : نزلت انا
طرباااق سكر عمر الحوش ونزل ..
عمر : السﻻم عليكم صباح الخير
خ وداد : صباح النور كيف حالك ياعريس
شافلهاعمر عالجنب >_> وقالها : ماشي الحال
خ وداد :اماﻻ وين ليال
عمر : تمسح في الروغاطا اللي مدايرتها ف وجها
خ وداد : ولواه خليتها تنزل امكيجة
عنر : يمى زوجتيني بمزاجك وانا مانبيش وماقلنا شي لكن عاد بتزيدي تقوليلي دير هكي وماديرش هكي هلبا
خ وداد : باهي دير اللي يريحك
ليال : السﻻم عليكم … كيف حالك اﻻي اننننه كيف امورك اننننه
وقعمزت جنب عمر …
وبدوا بيفطروا
بيمد ايده عمر عالجبنة جت فجاة ايده فوق ايد ليال … وحسها ناعمة زي ملمس البيبي للحظات سرح بعدين ايتاقض لروحه جبد الجبنة
خ وداد تأشر بجواجبها ل ليال ديرله نص
ليال : نقششرلك دحية مطبوخة
عمر : ماناكلش فيه
ليال : به انصبلك شاهي
عمر :مانشربش فيه…
وطول ماهو مقعمز ماتلفتلهاش بكل كله يهدرز مع نازك على اخبار رياضية سياسية كل شي وليال قعدت ساكتة
نازك : هي صحتين خلي انقيم الصفرة
عمر : نوضي ساعديها ليال
ليال :هي
نازك :ﻻ والله ماصارت قعمزي قعمزي ليال خلي البنت عروسة ياعمر
عمر : ماقلت شي نبيها تعاونك قبل بس … هيا راكب انا ماتوصو بشي
خ وداد : سﻻمتك …
ليال : هي بالسﻻمة اﻻي
خ وداد : بالسﻻمة بنيتي
عمر : خليك هدرزي معاهم
خ وداد : بري بنيتي اركبي لحوشك ارتاحي تو كان نبيك تو اناديك
ركب عمر وركبت وراه ليال
ولع التكييف عالسخون زلبس كانتيرا وقعمز يتفرج مسرحية العيال كبرت
بدلت ليال ولبست روب حلووو
وجت قعمزت جنب عمر … وقعدت تتأمل ف عضﻻته …
عمر : التلفزيون القدام
ليال : شن نبي فيه وانت معاي
{له له له فكينا من التعسيل}
دار روحه عمر ماسمعهاش ويتفرج ويضحك ع المسرحية
ليال حست بروحها رزيينة
طق طق طق
خ وداد : نازك اطلعي حلي الحوش الضي هارب
نازك : هيا هي …
حطت وشاح وطلعت فتحت الباب ..
ولقت فتحي في وجها
نازك : تفضل ياخوي
فتحي : السﻻم عليكم
نازك : وعليكم السﻻم
فتحي : ماقنينتك
نازك : شنووو !
فتحي : قلت جاي بناخد الفيلو من ليال بش نرجعه
نازك : انت منو
فتحي : فتحي خوها … بالله عليك بنسئلك سؤال بيني وبينك سر
نازك : تفضل
فتحي : بيني وبينك ااه مش نلقاها شرقي غربي
نازك : اتفضل
فتحي : خدودك حمر طبيعي واﻻ صناعي
نازك : تفضل اركب ل اختك الدور التاني الباب عاليسار
فتحي : سامحيني انحس فيك حرجتي
نازك : الدور التاني الباب اليسار …سﻻم
خشت نازك وسكرت الحوش
فتحي ايتمتم … والله قنينة البنت …
ركب فتحي لدور التاني وشرين عالحوش
فتح عمر الحوش
{ابو بدلة صفرا شن تبي }
فتحي : ااسﻻم عليكم
عمر : وعليككم السﻻم
فتحي : كيف الحال
عمر : بخير شن اخبارك تفضل خش
فتحي : ﻻﻻ غير خاطم من اهنا كلموني العويلة قالولي جيب الفيلو
عمر : اه تمام … به خش مابين وتاته ليال
فتحي : ﻻﻻ والله نستناك اهنا
{ماﻻ فكا بالك تحسابني بنزيد انصر عليك انطمر استنى }
خش عمر وينادي : ليال ليال
ليال : نعم نعم
عمر : لفي الفيلو فيسع خوك قدام الباب
ليال : به هي
لفاته ليال وطلعت سلمت ع خوها ومدتله الفيلو وخشت
فات اسبوع ونص وعمر قاعد يعامل في ليال بجفاف و ولى حتى للعنل من تالت يوم من زواجه ..
ايروح الصبح ايخش يرقد يتغدى عند امه يطلع لصالة الحديد يدوش في حمام الصالة ويبدل ويطلع مع صحابه
خالد :نوض روح اتقول مش متزوج بكل
عمر : رد بالك تتزوج ياخالد الزواج نكد راه
فرج :ماتعدلش عليه ياخالد هدا مايحسش
عمر : قلت من قبل نبي واحدة انحبها نشاركها لقطات ولحظات الرومنسية
فرج : ياخوفي اتكون ظالمها
عمر : ﻻﻻ ﻻ ظالمها وﻻ واحدة
فرج : باهي ان شاء الله
روح عمر مع المغرب للحوش
خدي دوش ولقاها متكية عالسرير بروب تايقر دميل وجذاب …
ليال … شن هالجفاف اللي عايشة فيه خيره مشاعره مايتحركوش على قد ماندير معقولة حتى التايقر مايأثرش فيه … خلي نجرب طرق تانية ..
فتحت عيونها ليال وقالت : عموري …
عمر : نعم
ليال : روحت ياغالي ؟؟
{ ﻻ قاعد برا غير باعت غولتي تاخد دوش واتبدل}
عمر : ايه روحت مالياش هلبا
7
وقفت ليال بتقرب منه وقالت : خلي نطلعوا انشموا هواء زي كل اثنين
عمر : شن قلنا ع موضوع الطلوع ..
ليال : اممممبه خﻻص ماتعصبش
….انحس ف دوخة
عمر : بري خودي حاجة حلوة من المطبخ
مشت خطوتين ودارت روحها ساخت
8ناض يجري عمر ل ليال
عمر : ليال … ليال … فيقي خيرك ..ياحليلي كما يطلع فيك السكر حتى انتي …
قامها عمر في غمره وحطها عالسرير … حط راسه على قلبها بيسمع النبض .. 9
خ نوضي ليال خير بﻻك توا كنتي باهية … زعما نرفعها عيادة
خلي انلبسها حوايجها …
وكيف فتح الدوﻻب وبيلبسها فاقت ليال في احضان عمر ..
وليال تحسابه حاضنها زادت خشت فحضنه … عمر للحظات معش فهم شي … قعد بين نارين نار عقله وبين الشعور اللي حس بيه
ايديه قعدوا في الهواء ﻻ عرف ايكمل يغمرها ويزيد يضمها ليه وﻻ عرف ايدفها بعيد …
قامت راسها ليال وعطاته قبلة على خده …
عمر : شن عندك منين جاتك الدوخة ؟؟
زداته قبلة تانية على خده التاني ..
عمر : قبل بنرفعك للعيادة ..
ليال : اه ﻻﻻ دوخة بسيطة مشت ع حالها
عمر : باهي تمام …
طلع عمر للمطبخ لبست عالسريع لبسة حلوة ودارت روج احمر و طلعتله ع وسط الحوش
عمر : على وين العزم ﻻبسة وطارحة ؟؟
ليال : ﻻ لبسة نجرب فيها بس
عمر : ماتحلميش تطلعي هكي
ليال : عارفة لبستها اهنا ف الحوش بس
عمر : اه باهي طالع انا توا
انصدمت ليال وقتله : ﻻﻻ
عمر تلفتلها مع تفنيصة وقالها : شن هوا اللي ﻻ
ليال : قصدي موتيتلك حاجة نبي نوريهالك
عمر : شنو
ليال : غمض عيونك …
عمر : عﻻش
ليال : غير غمض
عمر : هاه غمضت
شداته من ايده ورفعاته لدار الضيوف وخششاته وسكرت الباب وفتحت الضي .. وقتله : فتح عيونك
لقي عمر تورتة وعصير هافانا و بيتزا و شوي مشقشقات
حضناته من الخلف وقتله :كل عام وانت بألف الف خير عقبال 100 شمعة عموري
للحظة عمر قعد سارح
{ماعمراش حد ادكرني ف عيد ميﻻدي …حتى الشفشات اللي حبيتهم مايتفكروش فيا… ياخدو ف هداية ف عياد ميﻻدهم مني وانا حتى كل عام وانت بخير مايقولوليش فيها … }
عمر : وانتي بألف خير
خداته ليال من ايده وقتله قعمز
قعمز عمر … شلعت الشموع ليال وطفت الضي وقتله : تمنى امنية قبل ماتنفخ الشمعة … هيا تمنى
{نتمنى انولي محظوظ وسعيد }
عمر : هفففف
ليال : هييييييي
قسمتله التورتة وعطاته طرفه وقعمزت جنبه
عمر :انا فيا السكر واﻻ نسيتي
ليال : ﻻﻻ غير جربها بس
عمر : خيرها سامطة ناقصة سكر
ليال : انا درتها هكي … عشانك بش تقدر تاكلها
عمر بجديات انتي دايرتيها
ليال : اي والله بجد
{محﻻها التورتة والله نحسابها من برا ياناري وجعتني مدايرتلي عيد ميﻻد وحاسبتني وانا ديما نخلي فيها بروحها ونعامل فيها معاملة حرشة }
ليال : استنى شوي …
مشت ليال جري لدار النوم جابت كيسة هداية ورجعت .. قتله : تفضل هي هديتك ياغﻻي السمح
مد ايده وخداي منها الهدية وقالها : صحيتي
{قول كلمة حلووة ياولد قول … بس والله الكﻻم الحلو ماقادر يطلع }
غمض عيونه عصرهم وفتحهم وقالها ياعﻻتي …
ليال : الله محﻻها غﻻتي .. يﻻ افتحها ^^
فتحها عمر ولقاه جاكيت وبلوزة وساعة
عمر : ربي يحفظك …انتي طلعتي ؟؟
ليال : ﻻﻻ كيف نطلع من وراك .. بعتت خوي جابلك
عمر : ماتقوليش ابو بدلة صفرا
ليال : اما بدلة صفرا اه ههههههههه ايه هوا
عمر : بالله بنسئلك سؤال
ليال : تفضل
عمر : بالله شن قصته نحب نفهم هههه عرس ياناس وبدلة صفرا
ليال :ههههههههه
عمر : ههههه بجديات قصدي حد يلبس اصفر
ليال : احشيشته اﻻلوان هادي قبل بيلبس ليمي برتقالي
عمر : نوضي بالكي
ليال : ههههه والله بجد
عمر : يعنجد ليمي..سميلي خوتك تره مانعرفش منهم اﻻ محمد وفايز
ليال : محمد فايز عتمان فتحي رشيد اصيل احمد خزام مقدام محارب
و زوز متوفيين الله يرحمهم مجدي و رياض
{هاااه هاااه شنوووو 12 اطناش الولد }
عمر : ماشااااء الله ربي ايبارك
ليال : الله يبارك فيك
عمر : صار انتي رقم 13
ليال : اي …
خدت طرف فراولة من على التورتة وقتله : افتح فمك عموري
عمر : ااااا
ليال : ااامممم صحتييين …
خدت كريمة بطرف صبعها وحطتها ع راس خشمه
عمر فنص فيها
خافت ليال : وخدت كينكس ومسحتله خشمه
عمر : ههههه خفتي ؟؟
ليال : هههه والله خوفتني ماشفتش عيونك كيف ايفنصوا
وقف عمر وقالها : المهم تسلمي على الحفلة اللي درتيهالي …
ليال : الله يسلمك .. خليك عمر خاطري نهدرز معاك … انت ديما مش عاطيني وجه … ومخليني بروحي .. لين مرات انقول هل انت طبعك هكي واﻻ انك ماتبينيش واﻻ متزوجني غصب
عمر ادكر الشريط اﻻغبر متع قبل عرسه و حط ايده على دقنه
وقالها : ايه ..
**يتبع
لقراءة الجزء التالي : الجزء السادس عشر من رواية محظوظ ولكن
لقراءة الجزء السابق : الجزء الرابع عشر من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
فيسبوك X بينتيريست Reddit
صورة مهند أدهم
مهند أدهم
مقالات ذات صلة
صورة جميلة لغلاف الجزء التاسع عشر من رواية المنبوذة
الجزء التاسع عشر من رواية المنبوذة
يونيو 9, 2022
صورة جميلة لغلاف الجزء العاشر من رواية عشقها لعنة
الجزء العاشر من رواية عشقها لعنة
يونيو 5, 2022
صورة جميلة لغلاف الجزء الأول من رواية همس العيون للكاتبة لوزة ليبية
الجزء الأول من رواية همس العيون للكاتبة لوزة ليبية
أبريل 1, 2022
صورة جميلة لغلاف الجزء الحادي عشر من رواية عشقها لعنة
الجزء الحادي عشر من رواية عشقها لعنة
يونيو 5, 2022
اترك تعليقاً
لن يتم نشر عنوان بريدك الإلكتروني. الحقول الإلزامية مشار إليها بـ *
التعليق *
الاسم *
البريد الإلكتروني *
الموقع الإلكتروني
احفظ اسمي، بريدي الإلكتروني، والموقع الإلكتروني في هذا المتصفح لاستخدامها المرة المقبلة في تعليقي.
© حقوق النشر 2026، جميع الحقوق محفوظة | من موقع قصص واقعية
فيسبوك
فيسبوك
X
واتساب
تيلقرام
زر الذهاب إلى الأعلى
القائمة
روايات
بحث عن
الرئيسية/الجزء
الجزء
الجزء السادس عشر من رواية محظوظ ولكن
الجزء السادس عشر من رواية محظوظ ولكن
صورة مهند أدهم مهند أدهميونيو 20, 20220589 12 دقائق
وفي الجزء السادس عشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء السادس عشر من رواية محظوظ ولكن
وقف عمر وقالها : المهم تسلمي على الحفلة اللي درتيهالي …
ليال : الله يسلمك ..خليك عمر خاطري نهدرز معاك … انت ديما مش عاطيني وجه … ومخليني بروحي .. لين مرات انقول هل انت طبعك هكي واﻻ انك ماتبينيش واﻻ متزوجني غصب
عمر ادكر الشريط اﻻغبر متع قبل عرسه و حط ايده على دقنه
وقالها : ايه ..
شهقت ليال وحطت ايدها ع فمها وقتله : شنو ايه ! متزوجني غصب
عمررررر انت متزوجني غصب ؟كنت حاسة انا كنت حاسة من تصرفاتك عمرررر .
وبدت تبكي وتشهق وحاطة وجها بين يديها
حط عمر ايده ع فمه ويشوفلها بنظرة استعجاب..
{بش كنا عموري توا … عمررررر اطلع ياحق ربي تنطق فيه زي خوتها عمرررر .. طررر على دماغك باهي }
عمر : غير اصبري للوش …شوفي روحك كم احتمال حاطة … عدي معاي هاه …
1.مش عاطيني وجه !
2.مخليني بروحي !
3.طبعك هكي ؟؟
4.متزوجني غصب ؟؟
يعني خطرلك اتحطي اجابتي اﻻ ل اﻻحتمال اﻻخير ؟ به عﻻش ماقلتيش ان طبعي هكي مثﻻ
ليال : كيف يعني انت قلت ايه
عمر : ايه وكيف بنكمل كﻻمي انتي بديتي متزوجني غصب ومش عارف شن هوا
مسحت دموعها ليال وابتسمت ..
{ياحظي ايه متزوجك غصب نوضي نطي ولوحي روحك من البلكوني}
ليال مسحت دموعها زي البيبي وابتسمت وقتله : على سيرة الزواج الغصب
واحد مرته اتوفت وبعد فترة اتزوج
المهم مرته مدلعاته رسمي رسمي ومغنجاته وتطرحله المهم كانوا مقعمزين يدلعوا ف بعض فجاة الراجل ناض وقف ويبوس ف تاكو الضي مرته قتله خيرك سممله شنو فيه .. قالها مرتي اﻻولى سكها الضي بتاكوا هدا واتوفت كان مش منه راه مش مع بعض توا .. الحمدلله ياربي (قصة واقعية حدث ف ليبيا سنة 2008)
عمر : محظوظ ولد الشفشة
ليال : شنوووو
عمر : قصدي بما انه غصب اكيدة محظوظ ﻻش يقعد طول عمره متنكد معاها
ليال : امممم
عمر : هي بنطلع تو
ليال : خليك شوي تانية
عمر : معش وقت بنمشي نشوف الشباب بعدين ماشي العمل ..
ليال : باه حاول اتروح بكري
عمر : بكري وهوا عملي يبدا متاخر تناقض واﻻه ؟؟ تعشي وخشي ارقدي ﻻ تتصلي بيا تقوليلي روح وﻻ حتى حاجة ونلقاك اون عالفايبر نقالك نديرهولك دشيشة
ليال : حاضر ابن عمي
{يا والله غمة اتغمك }
ليال : ربي يحفظك
عمر : سلمك
ليال : استنى استنى
عمر : نعم
ركبت ليال فوق الكنبة وعطاته بوسه ع خده … عمر للحظات استانس بالبوسة وسرح في عالم وردي بعدين استاقض لروحه وقال : هئ احم العممممللللل
ليال : ههههه باهي باهي ربي يحفظك
عمر : سﻻم سﻻم
طلع عمر وركب سيارته وفتح اف ام .. ياصاحبي ويش فيك قاعد لحالك .. ليش انت متغير ومهموم بالك ؟؟
من اﻻغنية هادي اذكر اياد …
ﻻ ﻻزم انطب عليه الولد هدا تصرفاته مش عاجبتني بكل .. فيه ان ف موضوعه …زعما هوا وين ف عمله واﻻ فحوشه … اممم
خلي نمشيله ف عمله قبل كان مالقيتاش في العمل انطب عليه في الحوش..
نازك ..خيره معش جي فتحي لاخته … كل مايطقطق الباب انقول بالك هوا …ﻻﻻ عﻻش نفكر فيه يجي لأخته والا ينفلق …
ليال : السﻻم عليكم
نازك : وعليكم السﻻم .. خشي خشي
ليال : كيف حالك نازك
نازك : اهو الحمد لله
ليال : كيف حال اﻻي
نازك : باهية متكية
ليال : خوي قال بيجي يعطيني حاجات باعتتهم امي ومعش جي من بكري يقولي اهو قريب نوصل
نازك : اها اما واحد فيهم ؟؟
ليال : فتحي
نازك .. ♥_♥
فرج : وينك ياعمر
عمر : اه شوية كيف طقيت ف المكان اللي نبي نص ساعة واﻻ ساعة ونجيك هي ..
فرج : تمام
نزل عمر من سيارته وسكرها
ومشي خش لمقر العمل
عمر ل ايمن : السﻻم عليكم
ايمن : وعليكم السﻻم ..
عمر :بالله الظابط اياد قاعد ؟
ايمن : ايه الدور الثاني… ثاني حجرة عاليمين
عمر : شكرا ..
{مانحبهمش مقرات الشرطة يجيبوا ف الكأبة ..}
صﻻح : اوووو عمر
عمر : اهلين ياغالي كيف الحال
صﻻح : الحمدلله … شن مداير ياعريس
عمر : هههه اهو ماشية ..مأنسكم اليوم
صﻻح : مرحبتين بيك … خلي نمشي عالسريع عندي مشوار وتو نجي بش نهدرز معاك مش اتروح
عمر : ﻻﻻ تلقاني ان شاء الله
صﻻح : تمام سﻻم
نازك : اها باهي … حق مواليد كم فتحي
ليال : 80
نازك : اه اماﻻ مش هوا
ليال : كيف
نازك : شفت شخص طالع من جامعة هداك النهار تشبهت فيه قلت شوره طالب
ليال : ههههه ايه استاذ ف الجامعة
نازك … ♥_♥… حقا عندك اغاني وحاجات هكي
ليال : ايه عندي … استني نخش عالملفات … ايوه هاك قالبي ع راحتك خودي اللي يعجبك مخلط مصري ع ليبي
نازك : باه تمام … وراس للوش ديرلي حاجة ناكلها جعانة وباخلة انوض
ليال : عندي فوق بيتزا بنزل منها ونسيت … دقايق نجيبهالك وانجي
نازك : به اوكي ..
ناض ليال وركبت وانتهزت الفرصة نازك وخشت على اﻻسماء خدت رقم فتحي ..
واذ بها الباب طقطق …
واست روحها ومشت فتحت الباب
عمر : السﻻااااموووو عالكووووم
اياد : اوووووو مش معقولة عمر عندنا
عمر :شن اﻻخبار ياطيب
اياد : والله ماشية يابو صاحب
عمر : شن مداير ههههه
اياد :ماشية …شنو تأقلمت مع المرا واﻻ مازال
عمر : اهو ندفوا دفان و تمشي اﻻمور
اياد : باهي باهي ربي ايهنيك ياطيب
“وقعدوا ايهدرزوا ويتناقشوا كل مرة موضوع ..
فتحي : السﻻم عليكم
نازك : وعليكم السﻻم …
وجها ولى احمر تبي تضحك على اللون البودري اللي ﻻبسه ..
فتحي : ﻻش شادتيها اضحكي اضحكي
نازك : هههههه ﻻﻻ خﻻص ههههههههههه سامحني بالله عليك
فتحي : عالبودري تضحكي
نازك : ماتوقعتش شاب يلبس بودري الحق
فتحي : واهو توا توفعتي ياام الخدود
نازك :معش تقولي ام اخدود
فتحي : به حاضر .. ليال موجودة
نازك : لحظة ناديهالك
فتحي : قولها فتحي
نازك : عارفة ايه …
فتحي : معناها قاعد فبالك
نازك فرحانة وجاحدة وبنظرة عالجنب قتله : ﻻ علاش بتقعد فبالي ليال كانت تدوي توا قالت فتحي جاي.. استنى لحظة ناديلك ليال
نازك : ليااال ليااااال
ليال : هيا نازلة هي …
عمر : شنو اياد توا نبي نفهم شن القصة خيرك معادش زي قبل
اياد :والله شن بنقولك … خلي نجيبلك قهوة ونهدرزوا
“طلع اياد برا المكتب وكالعادة سرح
اياد ل صﻻح : ماتقوليش قاصدين يخطفوا نورس
صﻻح : حسيت هكي وان شاء الله ﻻ … ﻻن سيارة عالية بتخنب سيارة هوندا مستحيل
اياد : يانهاري اﻻحرف
صﻻح عبر ﻻسلكي : ايمن … مواصفات السيارة اللي خنبت عالية واللون ماعنديش بيه علم
ايمن : تمام …
صﻻح : اتصل بخوك عمار خلي يطلع ايدور
وقعدوا ايدوروا الليل كله وﻻ اثر لسيارة و اياد ولى وجهه اصفر وتعب ويبكي
صﻻح : وحد الله يا اياد… اﻻ مانلقوها بإذن الله تعالى
ايمن عبر ﻻسلكي : صﻻح لقينا سيارة اياد ملوحة في الفرناج وفاضية مافيها حد
اياد : يانهار اغبر وووه عليا ووووه مرتي
صﻻح : ايمن فتشها بالك تلقى حاجة
ايمن : علم
اياد : برا برا ل الفرناج امشي اكيدة مابعدوش هلبا
صﻻح : ان شاء الله هي
ايمن : صﻻح لقينا ورقة ملوحة تحت الكرسي القدامي مكتوب فيها اياد خ الدغم ..
اياد : شنو اياد خ الدغم … شن القصد .. ايمن ابعتلي عالواتس اب صورة الورقة نبي نشوف الخط
ايمن : تمام
صﻻح : خلي واحد بحدا السيارة يا ايمن وانت امشي دور
ايمن : علم
اياد : شنو اياد خ الدغم شن معناها ياصﻻح راسي بيتفجر
ايمن عبر ﻻسلكي : بعتلك الصورة اياد …شنو نتصل بفكاك الشيفرة
اياد :تمام كلمه كلمه
صﻻح : فكر معاي … خ دغم شن معناها
اياد : رسمي خط نورس هدا بس الدغم ماعمرهاش قالتها نورس … دغم زعما اسم شخص ؟؟
صﻻح : صح مرات ..
اياد : رااااسي بيتفجرررررر
وائل عبر ﻻسلكي : يا اياد شن صار توا سمعت من ايمن
اياد : مش عارف يا وائل سيارتي لقيناها فاضية و فيها ورقة
وائل : شن فيها
اياد : اياد خ الدغم
وائل : الدغم هدا مجرم يا اياد …
اياد :صلي عالنبي
وائل : اللهم صلي وسلم وبارك ع سيدنا محمد … ايه والله بجد الدغم هدا بو اﻻولاد اللي قتلت واحد منهم امبكري ف الصبح وقت نفدت العملية في الصبح… وتاني ف العناية
اياد يصيح : حسبي الله ونعم الوكيل … تعرف مكانه هالحمار هدا
وائل : تو نلقطلك معلومات ونكلمك
ايمن : الدغم شخص يا اياد و حرف خ يعني خطف … اياد خطفني الدغم
اياد : نووووورررررس
صﻻح : هدي بالك يا اياد …
وبعد يوم ونص من البحث الطويل
و اياد قريب يهبل
جاه اتصال … من رقم ارضي
الشخص : حضرة الظابط
اياد : نعم منو
الشخص : نورس واحدة رقيقة و ناعمة زي البيبي مش عارف كيف واخدة واحد زيك
اياد : /#@$$#&/ منو انت ووينها نورس
الشخص : ﻻﻻﻻ ماتغلطش ياحلو
اياد يصيح بكل ما اوتي من قوة : وينها وعﻻش خاطفها
الشخص : نبي نحرقلك كبدك …
وسكر عليه الخط
اياد : ابنهبببببل ابننننهبلللل يمااااا
خ مريم : صبرك بالله ياولدي شنو فيه
عمار : خيرك اياد خيرك
اياد : اتصل بيا واحد ايقولي ف كﻻم بايخ
عمار : هات الرقم انطلعه من منظومة
اياد : ارضي يا عمار … تو بنطلع ندور
وطلع اياد ايدور ايصول ويجول ف الشوارع ومعاه صﻻح وايمن كا واحد منهم ايدور ف تركينة
وشي ماحصلوهاش رجعوا كلهم للمقر ومش محصلين شي …
ضياء : يمى كنت قدام الحوش نغسل ف سيارة وفجأة نسمع ف صوت وكانه واحدة اتصيح
امه : والله ماعارفة ياولدي من امبارح نسمع فيه الصوت هدا
ضياء : بالك حالة وفاة
امه : ﻻﻻ كان هدا راني عرفت من جارتنا
ضياء : به خلي نطلع نشوف
امه : فكنا ياولدي مالنا ومال هالجراير
ضياء : نشوف بس مانيش خاش ف الموضوع
طلع ضياء وتبع الصوت لين وصل لمكان ايخوف … وقف ع رشادة يبي يشوف وراء السور لكن ماقدرش ﻻن السور عالي شوي
وفكر انه يتصل ب كتيبة بعدين شال الفكرة من باله وروح لحوش وكمل يغسل ف سيارته
اياد : الصبر ياربي الصبر … وينك يانورس وين … وين ديارك يانور العين .. ياريته انا اللي خطفوني وﻻ انتي … نتمنى الحاجة اللي بتجي فيك اتجي فيا بدل منك …
نورس نور العين وفي القلب مطرحها …نموت فداها … اخ ياربي شن ندير بدل ما نخمم ف الدغم نشعرلها ف شعر الصبر ياربي الصبر …
وائل : اياد اياد .. وصلنا ل خو الدغم راجل كبير وشيخ
اياد : بجديات بجديات وائل
وائل : والله بجد راجل شيخ وطيب عكس خوه مرة واحد
اياد : تي غير قول شن قالط
وائل : قالي مايقعدش ف مكان محدد وعطاني تﻻتة مكانات في تﻻتة مناطق
اياد : تمام وزعوا روحكم صﻻح ياخد معاه مجموعة وانا نطلع ومعاي مجموعة وانت تطلع ومعاك مجموعة … ايمن تعال معاي
ايمن : تمام ..
صﻻح : اما منطقة بتاخد
غمض عيونه اياد يبي يختار بقلبه من منطلق قلبي دليلي …
اياد : منطقة كدا … فيسع خلي نمشوا ..
وطلع ا مجموعات مجموعات
وصل اياد للمنطقة اللي ختارها ولقي شارع فاضي ومافيشي هلبا حياش.. شاف شاب يغسل ف سيارته قرب منه
اياد : السﻻم عليكم
ضياء : وعليكم السﻻم
ااياد : بالله خونا ماشفتش اي حاجة غريبة ف الشارع هدا
ضياء : ﻻ والله شوفان ماشفتش …
بدت عﻻمات الحزن على اياد …
اياد : باهي مشكور .
ضياء حار معش عرف ايقول وﻻ مايقولش خاف ايخش في حاجات مش ليه واﻻ يدبس ف موضوع … بعدين رر انه يقول
ضياء : يا خونا
اياد تلفت اياد بكل فرح وسرور
وقال : انعم
ضياء : بامانة نسمع في صوت واحدة اتصيح
اياد : وين وين
ضياء : وقالولي ان من امس يسمعوا فيه الصوت
اياد : وين قولي ؟؟
ضياء : كمل طووول بعدين خود يسارك تلقى وسعاية وحوش حوله سور
اياد : مشكور ربي يحفظك ..
صﻻح عبر ﻻسلكي : المكان فاضي مافيه حد وانت اياد شن صار فيك
اياد : تقريبا نورس اهنا تعال انت و اللي معاك
صﻻح : تمام
خدي جماعته اياد واقتحموا الحوش وهاك من رصاص وهاك من قتلى وجرحى ..وفي نفس اللحظة اللي صيحت فيها نورس… اياد وقال :نووووووررررررس وجاته رصاصة في فخده …. بس مع هدا كمل طريقه هوا وايمن
الدغم : اوووو شوفوا من جي ينقذ عصفورته
اياد : خليها ياجيفا
الدغم : كان ف مكانك مانغلطش .. الغلطة بورطة
اياد : ارمي سﻻحك
الدغم : تي انت مصاوب ف رجلك .. تبي نزيدك ف رجلك التانية زي مرتك
اياد : ياحقير وضربتها حتى برصاص
الدغم : اوووف مش غير هكي بس
اياد : راك تتحشم على شيبتك شيباني فعمر ستينات
الدغم : قتلتي ولدي و ولدي الثاني ف العناية
اياد : وﻻدك اجرام ف اجرام طالعين لبوهم كان ربيتهم باهي وشديتهم وقريتهم راه توا واحد دكتور وتاني مهندس مش زبورطيا حبوب وحشيش
شد الدغم نورس من شفاشيفها ووجها كله احمر وازرق وقالها : ريتي راجلك انا مصوب السﻻح عليك وهوا مش هامه مازال ايسب ف وﻻدي قدامي
ايمن : ارمي سﻻحك يادغم
اياد : خليها وديني كان شديتك ماني راحمك
الدغم : ع فكرة شعرها ناعم هلبا ومن اول ماوصلتني كان ريحته اتهبل
اياد : $@#$@$**#@#
الدغم : بنخليك تبكي وتتجداني بش نسكت لكن مش حنسكت … نورس نونو الحلوة … سميتها نونو انا ..
اياد مغتاض هلبا من كﻻم الدغم ..
ومش عارف كيف ايدير..
وفي لحظة وصل صﻻح من وراء الدغم … وبخفة تامة قنص على راسه وطلق عليه الرصاص
نورس تبكي بشهقة … وساخت
اياد : نورس نورس نوضي خﻻص انا جيت ..
سعده صﻻح بش نقلها لسيارة وساق بيهم للمستشفى بش يعالج اياد نورس
اياد : خششوه عالعمليات وكدلك نورس
بعد شوي فاق اياد … وقال ؛ نورس
وقف ومشي ايعكز رغم اﻻلم
صﻻح : وين وين
اياد : بنطمن ع نورس وينها
صﻻح : الدكتور قال كويسة
اياد :قول الحق
صﻻح : الحق عندها رضوض وكسور في ضلوعها … وكسر في فكها السفلي… ورصاصة فرجلها وجسمها كله كدمات زرق … هكي قالي الدكتور
قعد اياد يخبط ع باب الحجرة ويصيح زي المهبول …
ايمن : عفوا ياضابط القهوة معبية في الصفرة ..
اياد : $##@ والله مانتبهتلها بكل
معليشي ايمن نضف المكان و وصيلي اتنين كابتشينو
ايمن :تمام ..
رجع اياد ل عمر
اياد : بالله سامحني عطلت عليك
عمر : اقريب رقدت انا
اياد : نسيت روحي بنصب قهوة مرمدت الدنيا وجيت … وعارفك بتقولي خيرك مدهوب الشيرة
عمر : بالزبط
اياد : والله شن بقولك فرد ن افراد العيلة كان مخطوف وانا ماكنتش ع بعضي
عمر : منو انخطف وخيرك ماقلتش
اياد : مرتي
عمر : ﻻ حول وﻻ قوة اﻻ بالله
اياد : خطفها شخص قتلت ولده في اثناء انئدي في واجبي بينتقم ع اساس.
عمر : حسبي الله ونعم الوكيل
اياد : الحصيلو هدا اللي صار … والمرا عندها حالة نفسية توا
عمر : معليشي شوية نرد ع اﻻتصال هدا فرج من بكري يتصل قريب 14 اﻻتصال … شوية شوية وراجعلك …
اياد : اوكي تمام
قعد يخمم اياد في نورس ..
ليال : صحيت يافتحي
فتحي : اسمعي
ليال : نعم
فتحي : شن اسمها ام الخدود الحمر
ليال : وين سمله
فتحي : هادي اللي فتحت الباب
ليال : ﻻﻻﻻﻻ العب بعييييد يافتحي خوها واعر ومش ناقصة مشاكل
فتحي : اممممم باهي اسم بس
ليال : نازك
فتحي : اسم حلو
ليال : اكسر الشر يافتحي فكني منه فتحي : باهي هي سﻻم
ليال : سﻻم
عمر : اياد سامحني والله غير الظابط طلبني قالل صﻻح قوله توا يرتزع اهنا زي المسمار …
اياد : تفضل تفضل عادي
عمر : تو انجي غدوة تاني ونكملوا موضوعنا
اياد : ان شاء الله ياطيب
عمر : وقول ل صلوحة معليشي غدوة العكسة ان شاء الله
اياد : ان شااااء الله يابرو
طلع وركب سيارته و
فتح الفايبر ولقي ليال on
{غير انروح بس ياشفشة تو انوريك تبي غير تكسري كﻻمي به به غير اصبري بس}
وبالغلط بعتلها قلب كبير ..
{ قلب مرة واحدة … هادي يبعثولها قاذف ار بي جي … بس والله ماحﻻ عفويتها … مدكرتني في عيد ميﻻدي ومحليا الجو … هئ احم تو انوريها غير نوصل الحوش… كيف تفتح الفايبر وتكسر كﻻمي }
(بشوية علينا ياعمر معش فهمناك مشاعر متخبطة.. مرة بتوريها ومرة ماحﻻ عفويتها )
عمر : ها يافرج
فرج : تي هيا فيسع تعال يابلي… الظتبط قالب عليك الدنيا
عمر : تي باهي ماتاخرتش كيف اذن العشي … ساعة 8 راهوو
فرج : 8 افعينك ساعة 10 يافالح
عمر : اووووف اهو جاي … به ماعرفتش شن يبي
فرج : ﻻﻻ ماقالش من بكري يسئل عليك ..
عمر : باهي تو نجي … سﻻم
زعما نكلمه ؟؟ باهي حتى لو كلمته شن بنقوله … انا نازك .. ﻻﻻ انا نازك اخت عمر … ﻻﻻﻻ مبردني تو يقول خفيفة … احسن شي نحفظ رقمه ونكلمه عالفايبر على اني واحدة غالطة … لكن ﻻﻻ وكان عمر عرف ايغبرها ع راسي خصوصا انه مش طايقها العيلة … احسن شي نزيد نفكر وندرس الموضوع من كل النواحي خير ماتتطين ع دماغي
فتحي … فيه حاجة جدبتني ليها بس مش عارف شن هيا …محﻻ ضحكتها وخدودها… بس اشمعنى هادي بالذات فيه بنات غيرها في الجامعة ﻻﻻ فوت الموضوع يافتحي ليال قالت عمر طبعه واعر غير ايرد غيضه في البنت ..
عمر : صﻻااااح بست
صﻻح : طيب فيك اللي جيت
عمر : شنو فيه وينه الظابط
صﻻح : اونه ف حجرته
عمر : به خلي نخشله
صﻻح : خيرك مش لابس لبسة العمل
عمر : نسيتها ف سيارة ف الساكو
صﻻح : برا البس فيسع قبل مايشوفك يديرلك مرداح
عمر : باهي هي
وعلى طلعة الضابط كبس عمر مع صﻻح.. فقاله : طيب فيك ياباشا ..
يتبع………..
لقراءة الجزء التالي : الجزء السابع عشر من رواية محظوظ ولكن
لقراءة الجزء السابق : الجزء الخامس عشر من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
فيسبوك X بينتيريست Reddit
صورة مهند أدهم
مهند أدهم
مقالات ذات صلة
صورة جميلة لغلاف الجزء السادس من رواية حبي
الجزء السادس من رواية حبي
يونيو 16, 2022
صورة جميلة لغلاف الجزء الخامس من رواية أنت عدوي
الجزء الخامس من رواية أنت عدوي
مايو 19, 2022
صورة جميلة لغلاف الجزء الثالث من رواية عادت لكي تنتقم للكاتبة أميرة رمضان
الجزء الثالث من رواية عادت لكي تنتقم
أبريل 24, 2022
قصـة الجن العاشق الجزء السادس!
أبريل 27, 2022
اترك تعليقاً
لن يتم نشر عنوان بريدك الإلكتروني. الحقول الإلزامية مشار إليها بـ *
التعليق *
الاسم *
البريد الإلكتروني *
الموقع الإلكتروني
احفظ اسمي، بريدي الإلكتروني، والموقع الإلكتروني في هذا المتصفح لاستخدامها المرة المقبلة في تعليقي.
© حقوق النشر 2026، جميع الحقوق محفوظة | من موقع قصص واقعية
فيسبوك
فيسبوك
X
واتساب
تيلقرام
زر الذهاب إلى الأعلى