ياسمح المحيا جر الهجينه - 9/10/ - مكتملة | روايتك

ك قديم 24-07-20, 04:07 PM #31 لامارا مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام الصورة الرمزية لامارا ? العضوٌ??? » 216 ? التسِجيلٌ » Dec 2007 ? مشَارَ?اتْي » 87,661 ? نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute افتراضي ،،الـجـزء الـتـاسـع والـعـشـرون،، . صباح الخيرات والمسرات بارت لطيف مفاجئ😊❤ . لاإلـه إلا الـلـه وحـده لاشـريـك لـه . . ..........****.......... ام جـلاجـل . ..مجلس الشيخ مناور.. مفلح جالس قباله يطالعه بحدة مناور:علامك يامفلح أجليت(طردت)العرب مفلح:اللي باوجسه مايصلح ينوجس وسط الرجال يامناور مناور عقد حواجبه:وش علمك يامفلح وانت طامحن عنّا!! مفلح:بغيت صيفة يامناور مناور اتسعت عيونه وبحدة وهو يوقف:اعقب!! مفلح بحدة:ماهو اللي برأسك يامناور بغيت حق اليتيمة منها مناور قطب جبينه وهو للحين مااستوعب قصده ولاسمعه زين بعد كلامه الاول مفلح:ادنى بها يمي محد يأخذ حق بنيتي غيري يامناور مناور بحدة:وش تبي منها يامفلح؟ مفلح:اوجسته لك حق بنيتي يامناور مناور:انا بأخذه عنك يامفلح مفلح:ماياخذ حق بنيتي،،رفع كف يمينه المبسوطة قدامه،،غير يميني مناور بعصبية:وش هالعلم يامفلح مفلح:دميعات بنيتي تسواك انت وهي يامناور وتحمّد ربك مااوجسته قدام الرجال مير ارضى وادنى بها لاتكبر الهرجة يامناور مناور:حق بنتك تاخذه مرتك بين الحريم يامفلح وماله لزوم هالعلوم المايصة!! مفلح:وانا مهبول اطش بنيتي يمكم من جديد!! مناور:اجل تعقب والله ماتمد يدك على مرتي يامفلح!!هذا اللي باقي تضرب مرتي وانا موجود!! مفلح:هذا قولك؟!! مناور:وافعل مابدا لك يامفلح مفلح:سالفة فالح يامناور مناور تغير وجهه مفلح:وحمدان واهله اللي مالهم ذنب وسكت عنها من سنين يامناور وش غدا بها؟وين وعدك يامناور؟ مناور:ارعيتني يامفلح طاردت وراها من سنين!! مفلح ضحك:ايه ايه طاردت وراها!!مصير الحق يظهر والساكت يتكلم!! مناور قطب جبينه:تعقب يامفلح كود توجس اني مسوين حرام!! مفلح وقف:ايه انت ماعملت شين صحيح مير اللي يتغيبى(يتغابى)ويعمل نفسه ماارعى شي مثله مثل اللي عملها يامناور،،مشى،، . ..بيت الشلة.. .غرفة راشد. راشد صلى الفجر ورجع ينام بما انه باقي ساعتين عالدوام نايم ع جنبه اليمين عالسرير متغطي كله ماعدا راْسه انسحب لحافه وحس فيه رجع تغطى ثم انسحب مرة ثانية كشر بوجهه وهو يرجع يتغطى به مرة ثانية وانسحب للمرة الثالثة زفر وهو يتمدد على ظهره ومغمض عيونه:ورب البيت ياجسّار ان مارجعته ماتلوم الا نفسك،،فتح عيونه بفجعة وهو يحس بنفسه ينسحب بقوة من أطراف رجوله من سريره وصقع راْسه عالارض بقوة غمض عيونه من الم الصقعة وجلس وهو يحط يده على راْسه من ورا وصرخ وهو يفتح عيونه،،جسّار!!وربـ،،سكت وهو يشوف نفسه بالغرفة لحاله تعوذ من الشيطان وهو يكشر بوجهه بانزعاج من نور الشمس المتسلل من الشباك وضارب بوجهه وناظر الشباك وهو للحين يتعوذ استغرب وهو يطالع يده اللي باللون الأحمر رفعها لرأسه مكان الالم ولمسه وطالع يده شاف دم قليل قطب جبينه وهو يقنع نفسه انه واحد من الاثنين اللي معه واكيد مقلب منهم وقف وهو معصب وفتح الباب بقوة واتجه لغرفة بتال وفتح الباب بقوة كشّر بوجهه وهو يطالعهم،،اعوذ بالله من كآبة المنظر!! بتال تارك سريره فاضي نايم عالارض وطارد جسّار عن السرير بلعانته جسّار حاط راْسه على بطن بتال ونايم راشد دخل ومد رجله وشات جسّار بقوة على رجله:ووجع ماتعرف تمزح كسرت راسي جسّار جسّار توجع وهو نايم ماتحرك راشد عقد حواجبه وللحين شاك فيهم ميل فمه بتفكير مو مستوعب اللي صار معه تركهم واتجه لمطبخهم المتواضع وملى القدر الوحيدة اللي عندهم موية ورجع لهم وكبها عليهم بكل غبنته وهو يصرخ بعصبية:وش رايكم بهالمزحة ياسامجين!! ،،بتال وجسّار فزوا من نومهم بفجعة،، جسّار جلس وهو يمسح وجهه ثم تلفت حوله مفجوع بتال جلس وهو يطالعه بغبنة وبعصبية:وش فيك وش فيك على ذَا الصبح؟!! راشد يطالعهم باستغراب:نايمين صدق؟!! بتال عض شفته من القهر جسّار للحين ماصحصح:وش صاير؟!! راشد بصدمة:من جدكم؟!! بتال قطب جبينه يطالعه باستغراب راشد:معقولة حلم؟!!،،حط يده على راْسه مكان الجرح وضغط عليه توجع تقدم وانحنى شبه جالس عند بتال وهو يقرب راْسه منه،،تشوف شي؟ بتال دفه:ماني برايق لسماجتك احمد ربك ماذبحتك!! راشد طالعه:تكفى بتال شف،،قرب راْسه،، بتال طالع راس راشد مد يديه وهو يبعد شعر راشد يشوف الجرح:وش طايح عليه،،اتسعت عيونه،،لايكون هالخمبقة سووا لك شي!! راشد جلس وهو مو قادر يلقى جواب لسؤاله طالع بتال وبجدية:سألتك بالله ماجيتني وتملعنت معي؟ بتال:توك مصحيني وشلون أجيك!! راشد طالع جسّار بشك:وانت؟ جسّار اللي تمدد عالارض بعد ماشاف ان ماعندهم سالفة وهو للحين فيه نوم:وش فيني؟! بتال ضربه ع ظهره بقوة جسّار توجع:اااه بتال:رد عليه!! راشد:خياسك اللي دايم جسّار جلس وهو متنرفز:والله ماجيتك واللي خلقني ماجيتك!! راشد يطالعهم ساكت بتال تنهد:قل وش صاير معك؟تعرض لك احد؟ راشد ابتسم وهو يقنع نفسه:اقولكم حلم اكيد حلم جسّار يطالعه باستغراب بتال:وش هالحلم قل لاتقلقني بسكوتك . سعود يسوق سيارته المتواضعة وهو بقمة عصيبته مانام ليلته وهو ينتظر شمس الصباح يطلع طلعته بالليل كانت على قلة سنع طلع لمكان يكون فيه ارسال واتصل على الارقام الموجودة بالجوال رغم قلتها(قليلة)الا انها كلها مغلقة وهذا دليل ان اصحاب الارقام بالديرة وبتال موجود بالديرة متجهة مباشرة له وكل تفكيره وشلون يعرف اللي بينهم . ..بيت الشيخ.. مناور داخل للبيت بوجه متجهم وكله غيظ بخطواته السريعة مر من وسط الحوش وبناته جالسين البنات يطالعونه باستغراب وهو لا سلم ولانطق حرف مناور دخل لغرفة النوم ام غيث جالسة عالارض متربعة تمشط شعرها وقبالها مرايتها طالعته وهي توقف وبابتسامتها:ياحياك الله ياابو غيث مناور مسكها من شعرها وسحبها ام غيث صرخت:عوذا منك يامناور عوذاا!!! البنات جروا لامهم وهم يسمعون صراخها لكن وقفوا وهم يشوفون ابوهم مناور دفها برا الغرفة ام غيث طالعته بدموعها وبصراخ:علامك انت علامك!!طايلتن يدك ولا لقيت لك والي!!! مناور:تعقبين وتنكعمين واليش هذا هو قدامش!! ام غيث بعصبية:وش غادين بك حتى تعمل بي هاللون!!ماتخاف ربك انت!! مناور بعصبيته:والله انتي اللي ماتخافينه يالمقوية!!وش عاملتن بهالمسيكينة اللي لاتهش ولاتنش!!كل حيلتها عويناتها تنظر بالناس ها!!!علميني وش مذوقتها من مر عساش تذوقين المر وصنوفه ياصيفة!! ام غيث:لاتبلاني عسى ربي يذوقك ماتبليتني به!!ثم انا ماعملت شين ابد مناور:تعقبين اي والله تعقبين اكيد عاملتن شي وشين كبير بعد اجل وشو له مفلح جاي يمي ويتهددني بعد!! ام غيث التفتت وطالعت غيثة ونايفة غيثة ونايفة نزلوا عيونهم بالارض وهم سبب هالمشاكل كلها من البداية ام غيث طالعته:ماعملت شي!!ثم اذا بنتهم ناقصن عقلها ومتروّعة وش ذنبي انا اتجازى بشين ماعملت يامناور!! مناور وهو يرفع سبابته اليمين بوجهها بتهديد:اوحيني زين ياصيفة وهذا العلم اللي يجمد على الشارب،،اشر على غرفة نومهم،،هالغريفة مالش مطب يمها ابد وتحمدي ربش ماطردتش برا بيتي لكن ماودي احزن يعيب عليش بعد هالعمر كله ثمن لابغيتي تعودين لهالغريفة،،اشر على غرفة جنبها مستخدمينها مثل المستودع،،تولمين هالغريفة من كل شي حتى المرة اوحيتي!! ام غيث تطالعه بقهر:تعقب والله ماتخيرت لك مرة حتى تحطها فوقي!! مناور:وغصبن عليش وإلا بيتي يتعذرش ياصيفة ام غيث اتسعت عيونها مناور مشى وتعداها هي وبناتها ثم وقف والتفت عليها وبابتسامة تخالطها شماتة:سبحان من سلطني عليش مثل ماتسلطتي على زاهية وعيالها!! ام غيث ضرب هالاسم بقلبها مثل الطعنة وهي تذكر افعالها بهالمسكينة قبل سنين وكان الدنيا دارت ورجعت لها حتى تاخذ حق زاهية منها رغم انها فارقت هالدنيا خلاص . ..بيت طلق.. شامة جالسة قبال غرفة نومهم تفطر طلق صحى متاخر طلع من الغرفة وهو يسرع وسط ربكته الواضحة شافها وتوسعت عيونه شامة ابتسمت:حي ذَا الصبح تعال افطر طلق مشى لها وبنرفزة:ليش مااوعيتني(صحيتيني)؟!! شامة باستغراب:ليش؟!! طلق انجلط:وشو اللي ليش!! شامة ببرود:ماني بملزومتن بك مثل ماانت مانت بملزومن مني!!هذا قولك!! طلق اخذ لحظة يستوعب ثم كشر بوجهه:الظاهر إنش اوحيتني بالعكس ذيك الليلة!! شامة وهي تفطر ولاتطالعه:لاصرت اوقت لك بالفطور والعدل والعشا وقت لك بالنومة والقومة بعد!! طلق بشر:واضح إنش ناوية على روحش ياشامة شامة:ومن متى الواحد ينوي شر لروحه!! طلق ميل فمه بسخرية من كلامها شامة:كود انك بغيتني اقومك علمني ثمن كل شي بحقه طلق ارتفعت حواجبه:بحقه بعد!! شامة وهي تطالعه بتحدي:ماعاد فيه شين ببلاش!!،،رمت اللقمة بفمها ورسمت على شفايفها ابتسامة تمضغ،، طلق شات إبريق الحليب برجله شامة ضمت رجولها لها وهي تصرخ بعد ماتطاير شوي من الحليب فوق من شوتته طلق طالعها بحدة:اذا رجعت نتفاهم،،اتجه للحمام ودخله وقفل الباب بكل قوته،، شامة فزت وداخلها يرجف من الخوف رغم قوتها الظاهرة له تجمعت دموعها بعيونها غصب عنها وهي تفكر بتهديده وقفت وجرت لغرفة النوم وقفلت الباب عليها بالمفتاح وتركت كل شي مثل ماهو من خوفها طلق خرج من الحمام وهو جاهز لدوامه طالع الاكل اللي بمكانه ثم التفت لغرفتهم وشافها مقفول بابها زفر وهو مايبي يتصرف هالتصرفات خصوصا انها بالاخير زوجته:استغفر الله العظيم،،خرج،، . ..مدرسة راشد.. راشد داخل يجر خطواته بحيرة وصداع من تفكيره تنهد بصوت حمدان وراه:يالله ان تحييه راشد رسم ابتسامة على وجهه رغم تعبه وهو يلتفت عليه:الله يسلمه ويبقيه حمدان:علامك عسى ماشر راشد:الشر مايجيك بس شوية تعب حمدان:عاد الشايب حالف يمين تتغدا معنا اليوم راشد بإحراج:يكثر خيركم لكن انت عارف بعد الدوام تعب وحالة يعني ماهي بخافية عليك حمدان رفع يديه وسط ابتسامته:انا مالي بد بالسالفة اغدا معي وعلمه علومك راشد مسك يده وهو يضغط عليه باحراج واضح:خلها مرة ثانية تكفى حمدان بابتسامته:اغدا معي وعلمه راشد تركه وهو يزفر:يعني ملزّم؟!! حمدان ضحك بخفة:مو انا اللي ملزّم شايبي معلمك(قايل لك)!! راشد تنهد:امري لله،،التفت يمينه وهو يشوف احد طلابه ابتسم،،ياسر هلا حبيبي وش تبي؟!! ياسر يطالعهم بصدمة أغمى عليه قدامهم راشد جرى له ورفعه وهو يسمي عليه:بِسْم الله عليك بِسْم الله . بتال جالس بغرفة الممرضين وساند راْسه عالطاولة وكل تفكيره بكلام جسّار وراشد وسؤال مناور له وصدمته ولانسى ردة فعل ابوه القوية واعتراضه مهما يكون ابوه مايمنعه عن شي فيه مصلحته لكن هالمرة اعترض وماهو باي اعتراض طرده من البيت زفر وهو مو قادر يوصل لسبب اتسعت عيونه لشي غافل عنه:معقولة!!!،،جلس وهو يطلع جواله من جيبه واتصل وبآخر رنة وصله الصوت اللي رسم على وجهه ابتسامة وهو يسمعه وبكل شوق وحنان وحب،،يالله ان تطول بعمرها ياحي هالصوت ياحيّه الجد منيرة:ايه يالكذوب ايه الحين تذكرني!! بتال بضحكة خفيفة:يشهد الله اني مانسيتك ودوم في بالي بس تعرفين الجدة منيرة قاطعته:مشاغل الحياة لاتطريها لاأنتف زردومك(تقطع بلعومه) بتال ضحك:اموت عالعنف انا الجدة منيرة بعصبية:استح ياولد!!عيب عليك!! بتال:يووه ياجدة والله اشتقت لتمحيطاتك بالمركوع(ضرباتها بالعكاز) الجدة منيرة ابتسمت:أبشر بعزك من عيوني لاجيت استقبلتك بمحطات(ضربات)يحبهن قلبك بتال بضحكة:يمه منك يالعجوز ماتفوتين فرصة الجدة منيرة:عجوز تكسر رأسك ايوا الله من هي العجوز ها!! بتال:خلاص خلاص لاتزعلين ياانسة عجوزة الجدة منيرة:عجوز تقص لسانك لاتخثرد(لاتخربط)على راسي بعلومن مااعرفها بتال:حيرتك آنسة؟!! الجدة منيرة قفلت بوجهه بتال ضحك وهو يتصل من جديد عليها وبابتسامة:وش فيك زعلتي ياعجوزتي!! الجدة منيرة:بتخرثد بشين مايزين لي بصكه برأسك بتال ضحك:فاهمة الموضوع غلط ترا يوم تقفلين بوجهي مايصك براسي ابد ياجدة!! الجدة منيرة قفلت بوجهه بتال مات ضحك رجع يتصل عليها الجدة منيرة ردت:وش تبي اشغلتني تراني ماني بفاضيتن لك!! بتال:واااضح ماانتي بفاضية وانتي تردين علي!! الجدة منيرة قفلت بوجهه بتال رجع يتصل عليها وقفلت المكالمة ولاردت ثم اتصل مرة ثانية وبآخر رنة الجدة منيرة بعصبية:انت ماتستحي على وجهك!!كم مرة صكيتك به!!وللحين تتصل ياوجه استح!! بتال:وين استحي وانا طالع عليك الجدة منيرة بصراخ:اعقب ياقليل الحيا بتال انفجر يضحك وبوسط ضحكه:الحمدلله ماني عندك الجدة منيرة بغبنة:واغبينتي اااه لو انك عندي اااه بس عذبة بصوت عالي:بتال وقرادة رفعت ضغط امي قفل اذا ماتبي تذبحها الجدة منيرة ضربتها بطرف المركوع عذبة توجعت:اااه الجدة منيرة بعصبيتها:تعقبين يذبحني واحدن مثله يخسي بتال بضحكته:تستاهلين يالملقوفة محد طلب فزعتك الجدة منيرة:صدقوا يوم قالوا عنك البقرة الضاحكة ماغير فاتحن فمك تضحك!! بتال:اعوذ بالله منك ومن عيونك لاتحسديني بس الجدة منيرة بسخرية:على وشو واشيب حالي!!طفران منتف مقلوع بديرتن قشرا وفوق ذَا كله طويل!!الله يعينك على نفسك!! بتال:تصدقين عاد حتى انا حزنت على نفسي بعد كلامك ياجدة انكسر خاطري والله الجدة منيرة:افا ماعاش من كسر خاطرك!! بتال بنذالته:تراه انتي يالعجوز الجدة منيرة:مير الله ان يطول بعمري بتال ضحك:يمه يالعجوز خايفة على عمرك الجدة منيرة:قطع لهالضروس اَي والله ايه خايفة وبأقعد على قلبك!! بتال:احلى من يقعد والله بس اخاف انكتم وأموت الجدة منيرة:ابركها ساعة بتال شهق:يمه منك الجدة منيرة:موت الظالم عبادة بتال:نوم نوم وبعدين وش سويت لك أنا؟!! الجدة منيرة تنهدت:قل وش اللي ماسويته؟ بتال:كل ذَا بقلبك علي!!اللي يسمعك يقول ذابح واحد من عيالك الجدة منيرة:اجل تقولي يالعجوز واضحك لك!! بتال ضحك الجدة منيرة:اقطع لابوك لأبو ضروسك بتال:حرام عليك تدعين على ضروسي وانتي مجربة الوضع بدون ضروس الجدة منيرة طقت من الغبنة:اااه وربي لو انك عندي ياابتيل لاأمصع(أقص)أذونك وأعلمك المرادد وش اخرته بتال:وش دخل أذوني أمصعي لساني!! الجدة منيرة صرخت:بتاااااال!! بتال:هيه عجوزتي بشويش لاتفطسين قبلي(تموتين) الجدة منيرة بغبنة:اهب ياوجهك تفاول علي!! بتال:الظلم ماحبه الله!!انا خايف عليك لاتموتين قبلي يعني ادعي لك بطولة العمر ياجدة الجدة منيرة بتكشيرة من لسانه الطويل:عاد انت اسمعني والله اذا صكيته هالمرة فهي الصكة اللي ماوراها بتال:عجيّز عمري الجدة منيرة قطبت جبينها بتال:عجيّز بتال الجدة منيرة بهدوء:تاج رأسك هالعجيز بتال:انا اشهد انها تاج راسي وأضيع بليّاها(بدونها) الجدة منيرة ابتسمت وهي تدري ان هالكلام بدا ينعاد تنهدت وهي تشوف الوقت حلّ ومالها حق تمنعه من الجواب:غصبن عنك تضيع بليّاي بتال بهدوء:أشابه امي ولا ابوي؟ الجدة منيرة:الوجه وجه فاهد والقلب قلب جميلة والطبوع طبوع عادل ورحوم رحمة جزيلة على امك وسمية بتال:أمي من تشبه؟ الجدة منيرة:أيهن؟ بتال:اللي مااعرفها الجدة منيرة:تشابه لسميرة توفيق الخالق الناطق جميلة بتال وهو يخفي المقصد الحقيقي من سؤاله:وابوي ليش يكره يسمع لسميرة؟ الجدة منيرة بابتسامة:لاغنت نزفت جروحه من جد وجديد بتال:ولا غنيت؟! الجدة منيرة:قلبه يفز لطواري هدمها وانت تحييها من جديد بتال:وليش القسى الزايد والمكابر؟ الجدة منيرة:من غلاتك بتال:لكن الغلا والمحبة ماهي بخلق جروح وطعون وضيق خاطر الجدة منيرة:جرب الحب والكلام الزين وفعولن تسر الخواطر وقابلته جروح وسكاكين أدمت القلب وقسّته بتال:بس ذاك الزمن وناسه غير وهالزمن وناسه غير الجدة منيرة:الناس لو كانوا غير لكن رسمة الوجيه وحدة!! بتال:وش ذنبي اتجازى بشي ماسويته!! الجدة منيرة:ماهو بكيفه غصب عنه ماتشوف الندم بعيونه؟!! بتال بحزن:وليش يكابر؟ الجدة منيرة:ماتهون عليه نفسه بعد ماارخصها كثير يابتال بتال زفر رغم ان الجواب ماعجبه:وش سر ام جلاجل؟ الجدة منيرة:مابها سر مثلها مثل اَي ديرة!! بتال:وليش الاعتراض عليها دام تقولين هالقول!! الجدة منيرة زفرت:مابها سر مير أنها فرقت خوين عن خويه(اصحاب)وضنا عن ابوه وزوجة عن زوجها وحبيب عن محبوبته،،اخذت نفس،،وحفيد عن جده وأخو عن اخوه بتال عقد حواجبه من هالكلام وتأكدت شكوكه بعد كلامها:اذا انتم اهل فاهد اهل جميلة بهالديرة!! الجدة منيرة:عاد زبدة الكلام عندك يابتال بتال سكت يفكر الجدة منيرة:انت بين اهلك وش لك بوجع الرأس ياعيني؟! بتال ميل فمه بابتسامة:الله يديمكم لي لكن الوجع نهايته بيصيب راسي ياجدة الجدة منيرة تنهدت:راسن يابس وقنق(عناد)مابعد وين تبعد عن عادل!! بتال ضحك:هاوشيه هو بعد ولا حيلتك علي بس!! الجدة منيرة:اذا أحرزت(قدرت)عليك أحرزت عليه مير أنكم قوايا(قويين)الله يعني عليكم ولايحطني بيديكم جسّار دخل عنده وهو يأشر له على برا بتال وهو يهز راْسه بايه لجسّار:عاد تامرين شي توصين شي؟ الجدة منيرة:سلامتك ياعيني سلامتك بتال:فمان الله،،قفل،،وش فيك؟ جسّار:سعود يبيك برا بتال باستغراب:انا؟!!يبيني انا مو انت!! جسّار رفع أكتافه:مدري عنه!! بتال تنهد وهو باله مشغول مع كلام جدته:يالله رايح له . . <اللهم صل وسلم على نبينا محمد> . . أميرالز and أزميرالد like this. لاحول ولاقوة الا بالله،،استغفر الله العظيم من كل ذنب عظيم . ..انتظار الطوارئ.. سعود جالس وعينه عالارض ويديه على ركبه يضغط عليهن بوسط جنون تفكيره اللي أخذه لعند بتال مباشرة رفع عينه وسط زفرة طلعت من داخله بعد شعور الضيقة اللي احتواه لفترة تثبتت نظرته عليه بتال بنهاية الممر يعاجل بخطواته لسعود اللي ببداية الممر ع كراسي الانتظار وسط ابتسامته الهادية سعود طالعه عقد حواجبه وهو يراجع نفسه اتسعت عيونه وهو يستوعب حجم الكارثة اللي جاي يسويها بنفسه استوعب الغلط اللي بيصير من ورا تسرعه وقف ولف وهو يتجه يساره تحديدا لبوابة المتسوصف حتى يخرج بتال قطب جبينه باستغراب وهو يشوفه يمشي مبتعد عنه اسرع بخطواته اكثر سعود خرج من البوابة متجه للمواقف بتال يجري بالممر ووصل للبوابة وقف ورفع صوته:سعود سعود شد قبضته وهو يسرع اكثر بيبعد عنه بتال ارتفعت حواجبه وهو يهمس لنفسه باستغراب:ياولد ماانتبه!!،،جرى يلحقه،، سعود يهرول بخطواته مبتعد وهو يلم نفسه وبنفسه:ياقواة عينك وياشينك ياسعود نفسن طيبة عامدتك(يلحقك)عمد ومادرت عن نيتك الشينة!! بتال لحقه وهو يحط يده على كتف سعود يوقفه وبوسط انفاسه:وش فيك ياابن الحلال الاحقك وناديتك ولاسمعتني؟!! سعود التفت يطالعه وبابتسامة وربكة:يالله ان تحييه بتال!! بتال يطالعه مستغرب:الله يسلمه مو انت تبيني!! سعود قطب جبينه:من اطراه؟!! بتال باستغراب:جسّار هو،،سكت وهو يظنه من حركات جسّار وباحراج،،السموحة وانا اخوك اكيد جسّار غلطان،،ضحك بخفة،،اشوفني أناديك ولاترد سعود:مااوحيتك ولا وشلون اوحيك ولا ألبيك!! بتال:بيض الله وجهك ماتقصر ماتقصر عموما حقك علينا اذا عطلناك عن اشغالك سعود:ياابن الحلال لاشغل ولاشي الا وش رأيكم نكشت الليلة؟ بتال:مااظن يمدينا عليها ورانا نازلة للأهل سعود:موفقين خير موفقين خير كود حيرتوا(بطلوا)وبكم شدة نغدي للكشتة علموني بتال:ان شاء الله ان شاء الله سعود:توصي شي تامر شي؟ بتال:سلامتك مشكور ماتقصر بس ابي اسالك عن شين وأبيه يظل بيني وبينك سعود قطب جبينه:امرني بتال:سمعت بوحدة اسمها جميلة بديرتكم؟ سعود انصدم من سؤاله وظل يطالعه بتال ضحك باحراج:ياولد لايروح بالك بعيد!! سعود وهو مكشر:اجل وش؟!! بتال:جدتي موصيتني اسأل عنها تقول خويتي أيام اول قبل تتزوج وانقطعوا عن بعض وسالفة طويلة مالك بالصداع سعود زفر براحة:اشوا يارجل بردت حيلي بتال ضحك بخفة:ماقصدت والله انت اللي استعجلت قبل اقولك سعود وهو يفكر:والله الجميلات ياكثرهن فيه ثنتين عجز(عجايز)وفيه بنات متوسطات وفيه صغيرات،،ابتسم،،وفيه جميلة خاصة بتال:ياولد مااقصد وحدة جميلة مزيونة اقصد اسمها جميلة جميلة فهمت علي؟ سعود طالعه وهو وده يضربه يحسبه يستعبط على راسه بس يستحي منه وبنرفزة:خابر خابر ترعيني ماافتهم لك!!ثمن انت عن من تنشد؟تقول جميلة وبس ياكثرهن بهالديرة هن والمزنة!! بتال بتفكير:كل اللي اعرفه اسمها جميلة سعود:انشد جدتك وتبخص منها زين ثم عود وأنشدني!! . ..بيت حمدان.. ابو حمدان:حياك الله عاللي ماهو بقدرك وحقك ياولدي راشد جالس جنب ابو حمدان ع صحن الغدا المتواضع وهذا يملا عين راشد ويكفيه وكثير بعد وهو اللي مايحب المجاملات والهياط ابدا:يكثر خيركم ياعم وبيض الله وجهك ابو حمدان:حياك حياك حمدان جالس قبالهم يطالعهم بابتسامة ابو حمدان:ماارعينا لنا زولن(أحد)من مدة ياولدي ياعسى وجهك فاتحة خيرن علينا عقب هالديرة القشرا حمدان:يبه الله يهديك ماله بد تجيب هالطاري وعلى الغدا بعد راشد وهو يسمعهم ساكت وتفكيره مشغول بياسر اللي يوم صحى ظل يبكي ولا يطالعه لا هو ولا المعلمين ابد بالعكس يزيد اذا طالعهم وذكر سالفته الصباح وضاقت اخلاقه زيادة وزفر بصوت مسموع ،،طالعوه،، حمدان:هه يبه هه راشد طالعهم باستغراب حمدان:مااوجسته لك!! ابو حمدان:المعذرة المعذرة وانا عمك تغد تغد ياعلّه بالعافية عليك بالعافية راشد:الله يعافيك ويكثر خيرك جعلها دايمة . ..بيت بادي.. .غرفة عباير. عباير بوجه شاحب وحيل مهدود متمددة عالارض معلقة عيونها عالباب مافيها تتحرك من التعب اللي تحسه سعود فتح الباب عباير من لمحت زوله احتدت ملامحها وفزت جالسة وهي تضغط على نفسها سعود دخل وبيده صحن كبير فيه اكل:السلام عليكم عباير ماردت سعود نزل الصحن عندها وهو يجلس قبالها وبحدة:رد السلام واجب عباير زفرت بصوت وهي تصد بوجهها عنه:وعليكم السلام سعود ظل ساكت وهو يطالعها محتار كيف يبدا عباير صادة بوجهها سعود زفر:مافيه احد معصوم عن الخطا وإبليس له بد بوقت الغضب عباير طالعته وبحدة وهي تقاطعه:والخطا اللي عملته ياسعود عن الف خطا من غيرك سعود تنهد وهو يحس بالذنب:لفيت يمش ياخية خابرن خطاي واتعذر منش وباغي الود والمحبة لاتكبين ابليس يخلص شغلته بيني وبينك عباير خنقتها عبرتها وبلعتها وبغبنة:مير انت وكدت الهرج اللي قيل بفعلك ياسعود وكدته ياللي أوعدت بالموت بيننا وبينهم واخلفت الوعد!! سعود قام من مكانه وانحنى شبه راكع وهو يبوس على راسها ثم انحنى شبه جالس جنبها وهو يطالعها عباير صدت بوجهها سعود:اكذب عليش كان اوجست لش ماظنيت الشينة عباير التفتت له وهي ودها يكذب كلامها لكن صدمها بتأكيده سعود:مير الحميّة(الغيرة)غدت بي يمّ دربن شين وانا اخوش اعمت عويناتي ولاعاد أرعيت شي بهالعوينات ولا البصيرة(العقل)أرعت معها عباير بحدة وبغبنة:توجس انه بيومن الله به عليم بتغدي بك هالحميّة على شين ماودك به!!ووحزتها وش الدبرة ياسعود سعود جلس وهو ضايق خاطره من كلامها:هاللي توجسينه ماهو بغادين ياعباير عباير بعصبية:الا يغدي يغدي ونص!!هذا انت توجسها سعود قاطعها بنبرة عالية تخالطها حدة:علمتش ماهو بغادين هاللون واللي وعى مرة يتفطّن(ينتبه)لها مرتن ثانية عباير:ايه وانا احتري لام انها تغدي مرتن ثانية!!!(تنتظرها تتكرر) سعود وهو يزفر ويكتم غيظه لانه هو الغلطان:لااله الا الله ياعباير ياعيني انتي والله اني لافين يمش وقليبي متقطع على سواتي الشينة لاتزيديني شيانتن فوقها طالبش عباير عضت شفتها بقهر منه وهي تطالعه بحدة سعود مد يده للخبز وهو يغمسها بالزبادي ويمدها لفمها:حقش على هالراس العذر والسموحة طالبش الحِل(تحلله،تبيحه)من ظليمتش عباير ضربت يده تبعدها عن فمها وبعيون تلمع بدموعها:ماني بمحللتك من هالظليمة ياسعود سعود اتسعت عيونه عباير بعبرتها:ماني بمحللتك حتى ماتعاودها مرتن ثانية لاغدت بك ظنونك يم دروبك الشينة سعود بغبنة:هذا اخرته؟!! عباير:أوله ياسعود أوله سعود وقف وبغبنته منها:هالقنق اليابس مرده يلين يمي وين تغدين بليّا اخوش،،خرج،، عباير تمددت وهي تتغطى وهلت عبرتها المحبوسة غصب عنها وهي تكره تكسر سعود رغم انه كسرها اول .........****.......... العصر .........****.......... ..بيت الشلة.. .غرفة راشد. راشد هالمرة عالارض نايم او بالاصح اخذ قيلولة وفاتته الصلاة جسّار فتح الباب بقوة راشد فز من فتحته جالس وطالعه بغبنة:جساروووه!! جسّار شهق وهو يوسع عيونه ويغطي فمه وباستعباطه:سوري أزعجت ضيوفك!!،،يمرر نظره بالغرفة،،اسف اسف بس انا وولد عمتي كذا من الله رقيقين اسف اذا ازعجتكم حبايبي،،بابتسامة،،توصوا فيه لاتخلونه يرتاح تكفون راشد حذفه بالمخدة جسّار مسكها وبعباطته:كان خليتهم يطيروني بالسما ينتقمون عنك راشد وقف وجرى له جسّار جرى مبتعد عنه وهو يضحك ومتجه لغرفتهم دخل لغرفتهم ثم جلس جنب بتال بتال جالس وقدامه صحن الغدا:وش فيكم تأخرتوا يالله ميت جووع راشد وقف ع باب الغرفة وهو يطالعهم:غريبة طالعين متأخرين اليوم؟!! بتال سمى وبدا يتغدا جسّار:صاير حادث لطلاب اليوم وانضغطنا بس الحمدلله عدت على خير كلها شغلنا بسيطة راشد:وين؟ جسّار:مو طلابك لاتخاف مدرسة الثانوية راشد باستغراب:الثانوية بعيد!! جسّار:طيب يعني مايصير شي عشانهم بعيد!!ادخل بس ادخل وش فيك واقف؟،،ابتسم،،ولا بتتغدى معهم راشد مشى له بسرعة ووقف جنبه ورفع رجله جسّار تعلق بجنب بتال:اااه ااه أوجعتني أوجعتني يالظالم راشد نزل رجله:والله مافيه ظالم غيرك!!الله اكبر عليك مالمستك خاف ربك!! جسّار:والتعذيب النفسي اللي تسويه!!،،ابتسم،،ولا خلاص طالع لاصحابك تتفنن بالأمور النفسية!! بتال دفه بقوة عنه جسّار انصدم من دفته القوية فجأة وطاح جنب الصحن بتال وهو يطالعه بحدة:كم مرة اقولك لاتحتك فيني جعلك بالحكحكة وبعدين احمد ربك لو طحت بالصحن كان نظفته بوجهك،،طالع راشد وبنفس الحدة،،وانت انثبر تغدا صدعتم براسي مايكفيني الصداع اللي شفته!! جسّار اعتدل بجلسته وهو ساكت راشد جلس:ان شاء الله بتال يتغدا وهو ساكت راشد:بأصلي وارجع بتال بحدة:ابلع اول ثم صَل ماحنا منتظرينك،،التفت لجسار،،امجاد من خاطبها؟ جسّار انصدم:امجاد انخطبت!!! راشد بابتسامة:ياحركات ياحركات يعنني اخوان العريسات بتال بتكشيرته:انطم اسمهن عرايس،،طالع جسّار،،ورهايف بعد انخطبت؟!! جسّار:اللي اعرفه رهايف المخطوبة امجاد من قالك عنها؟ بتال:غلطان اكيد ابوي قاصد رهايف وانا راح بالي لأمجاد،،ابتسم،،اخر زمن هالخبلة تنخطب قبل العاقلة الله يسعدها بس من اللي خاطب؟ جسّار سكت ونزل عينه وهو ياكل راشد وقف:الحمدلله،،مشى،، بتال وهو يطالعهم:رشيد أوقف راشد وقف وهو معطيهم ظهره بتال:ابوي مزوج من؟ جسّار نزل راْسه وهو يعبي فمه باللقمات بتال سحب جسّار من سكرابه من ورا جسّار انخنق من سحبته وكح وهو يأشر على فمه بمعنى مليان بتال:راشد حتى جنونك اللي معك مايفكونك مني انطق من اللي مزوجه ابوي؟ راشد وهو معطيه ظهره:جواد بتال زم سكراب جسّار بقوة وعيونه بتخرج من مكانها وبغيظه:وشو؟!! ........****....... ..المطعم.. ،،جواد ودانة خرجوا من الدوام مع بعض عالمطعم بعد مااستأذن جواد امها،، جواد وهو يحط لها بصحنها:سمي ياقلبي سمي دانة:شكرا ياحبي الله لايحرمني جواد بعد دقايق صمت منه وسوالف من دانة عن الشغل وامها وتعبها نطق:حبيبتي دانة:امر ياحبي جواد:وش رايك تروحين معي تسلمين على امي دانة:حبيبي وش هالكلام مايصير اروح معك لاهلك وحنا مابعد تزوجنا!! جواد:طيب تعالي مع امك زوري اهلي حاولي تحسنين العلاقة من بدري دانة زفرت:اصلا انا كنت ناوية اروح اليوم اسلم عليها بدون لاتقول جواد ابتسم:يسلم عمرك ولايحرمني دانة:ولو انهم بدوا بالغلط معي جواد قطب جبينه دانة عينها بالاكل:بس مايمنع لعيونك تهون كل اغلاطهم جواد ارتفع حاجبه من كلامها رِن جواله استغرب وهو يرد:هلا شذى دانة كشرت بوجهها للحظة وأخفت هالتكشيرة جواد باستغراب:وش تبين فيها؟!!،،سكت ثم تنهد وهو يمد الجوال لدانة،،شذى تبي تكلمك دانة اخذت الجوال منه وسط استغرابها:اهلًا رهايف بوناسة:ياااااهلااااااا والله!! دانة عضت شفتها وهي تكتم غيظها:نعم اش تبين مني؟! جواد يطالعها باستغراب من نبرتها مع اخته رهايف:الله يسامحك بس وانا قلت نصير صديقات واخليه يعدل بيننا واخرتها تخونيني تطلعين معه من وراي!! دانة بنرفزة:وانتي اش لك اطلع معه او لااا!!! رهايف:بِسْم الله عليك وش فيك عصبتي!!خلاص اطلعي معه سامحتلك بس ها كل طلعه ارسلي لي نقطة بالواتس حتى اعرف ورقمي يوصله لك جواد من عمتي شفتي بس كيف انا مااتعبك بالله وين تلقين ضرة لطيفة مثلي!! دانة بحدة:والله اللعانة تقصدين اللطافة بعيدة عنك مثل المشرق والمغرب رهايف ضحكت:الله يسامحك وش فيك حاقدة علي انا وش مسوية لك ترا قلت لك خليه لك يعني متنازلة عنه ماابيه دانة بغبنة:والله انك كذابة رهايف شهقت:يمه لاتحلفين كذب ترا تروحين النار،،ضحكت،، دانة عضت شفتها وزفرت:انتي وش نهايتك؟اش تبين مني بالضبط؟؟ رهايف:انا ماابي شي منك اعوذ بالله الله لايجعلني بحاجتك لاانتي ولا اللي قدامك دانة بصراخ:ليش متصلة اجل ها؟ جواد سحب الجوال من دانة وحطه عالطاولة وفتح السبيكر دانة تطالعه بقهر رهايف:بشويش بشويش لاتموتين ويموت وراك!!،،تنهدت،،اساسا مو متصلة من زين صوتك ولا نفسك الحلوة القتّالة!! جواد زفر بخفة بسخرية من كلامها دانة بغبنة:من زينك عاد!! رهايف بحدة:اقلها ياقليلة الأدب تتصلين على عمتي وتطيبين خاطرها ياللي لسانك مثل وجهك مالت عليك!! جواد قطب جبينه وطالع دانة دانة:وانت ايش لك بيننا!!انا وعمتي بكيفنا!! رهايف:جعلك ماتكيفين طول عمرك صدق ماتستحين على وجهك احترميها ترا قبل ماتكون ام زوجك هي اكبر منك دانة:يالله بس يالله مابقي الا انتي تعلميني الأدب يالله!! رهايف:ايه اعلمك اذا كنتي وحدة مو متربية اربيك انا جواد سحب الجوال من عالطاولة وحطه على اذنه وهو يكلمها:الا والله انتي اللي مو متربية ماتستحين على وجهك تتدخلين بخصوصيات الناس رهايف ضحكت:منهم الناس!!انت زوجي قريب ان شاء الله وعمتي اخذ حقها غصب عنكم وتراها عمتي قبل تكون زوجي ياوجه العنز،،قفلت بوجهه،، دانة بزعل:شفت الوقاحة كيف!!بالله مين اللي له الحق يزعل الحين جواد؟!! جواد طالعها بشك:دانة وش قايلة لامي؟!! . ،،رهايف وشذى يمشون متجهين لبيت مسفر من ورا البيوت بعد ماقالوا للسواق يوقف برا البيت،، شذى بحلطمة:الله لايوفق ابليسك ياشيخة الحين وش يفكني منه رهايف:ماعليك منه خليه يصحى هالثور على نفسه ويشوف اللي يصير شذى:هو اصلا بيذلف برا مو ساكنين معنا ليش تدورين المشاكل ليش رهايف:خليها تحترم نفسها ام لسان طويل اجل تدق عمتي بالكلام واسكت!!لو تموت مو بكيفها محد يدق عمتي غيري شذى:هيه!! رهايف غمزت لها:انا وعمتي نمون هاذي هي تناديني ام بطين وعادي ماازعل!! شذى:الله يعين اللي يطيح بلسانك،،وقفت ع مدخل الباب الخلفي،، رهايف:انا بروح للبيت اذا شفتي ابوي تميرضي(تمثل المرض)مو تورطيني معه!!وقولي لعمتي ام بطين تقولك مشكورة عالغدا ام جواد فتحت الباب:هذا انا تشكريني ياللي ماوراك غير الخساير رهايف ابتسمت وسلمت على راس عمتها:شكرا يادفيّعة انتي ام جواد تغيرت نظرتها لرهايف بعد ملكة جواد ميلت فمها وهي تحاول تتأقلم على طباعها:العفو بس الكلام الماصخ ماله سنع شذى تطالع امها مصدومة رهايف:عمة وش رايك تجين تتقهوين المغرب عندنا ام جواد:تحسنين علاقاتك معي من الحين؟!! رهايف:ومن متى علاقاتنا يبي لها تحسين حسن واحد يكفي ام جواد تطالعها وبتكشيرة:أعطيتك وجه الظاهر رهايف:صدقتي والله وانا ماانعطي وجه ام جواد زفرت:ادخلوا بس رهايف:انا رايحة للبيت نستناكم عالقهوة ام جواد:طيب طيب خلاص رهايف:شذى شذى بطفش وهي تدخل لبيتهم:ان شاء الله ان شاء الله خلاص اصلا اذا شفت عمي بيغمى علي ارتحتي رهايف ابتسمت:سلام،،مشت،، . ..المطعم.. دانة تطالعه:ماقلت شي!! جواد وهي يهدي نفسه مايبي ظنه ياخذه لبعيد وممكن رهايف تتبلى عليها:دانة امي ماتزعل على اَي شي والسلام يمكن قلتي شي بدون قصد دانة بقهر:يعني اكذب عليك!! جواد:محشومة ماقصدت لكن دانة قاطعته وهي توقف:عموما انا رايحة لها اسلم عليها وأخذ بخاطرها ولو اني ماادري وش السالفة اللي كلكم تتكلمون عنها وترا كل هذا عشانك ويارب يبين بعينك وشكرا عالغدا اللي بموت من لذاذته،،مشت،، .........****......... الليل .........****.......... ..السيارة.. جسّار نايم ورا راشد جالس بمكان الراكب بتال يسوق بسرعة وهو بيموت من غبنته راشد تعب منه وهو كل شوي يقوله يهدي السرعة التفت له:وقف بتال بدون لايطالعه:ليش؟!اذا فيك شي او جوعان تحمل للبيت مافيه توقيفه الا عنده راشد بحدة:اقولك وقف بتال بعناد:ماني موقف راشد صرخ:وقف بتال وقف على جنب الطريق وهو يشغل الفليشر(إشارة التنبيه)والتفت عليه وهو يمسك نفسه لايمد يده عليه وبعصبية:قصر صوتك لاترفعه علي!! راشد:الحين وانت طاير بهالسيارة البيت ماهو بطاير وخالي ماهو بحاسب لرايك حساب وشو له قفلة أخلاقك وتنفيستك ذي؟!! بتال بغبنة:ماوافق الا على جواد!!جواد ياراشد جواد!! راشد:ولد عمها اولى بها من الغريب بتال ضحك:وشو؟!!ولد عمها!!!انت مستوعب تتكلم عن مين؟تراه جواد جواد ماغيره!! راشد:ادري انه جواد وانت ماتدري وش بيصير بكرة بتال بقهر منه:تدري عاد دام ولد عمها اولى من الغريب على قولتك شد حيلك ونافسه يالله راشد قطب جبينه والتفت له يطالعه:بتال بلا استعباط بتال:وليش تستعبط انت علي وانت عارف وضعه!! راشد:طيب هد نفسك وان شاء الله مو بصاير الا كل خير بتال بتعصيبته:والخير وينه ورهايف بينقفل عليها باب مع هالعلة!! راشد تنهد منه هو وعناده وفتح الباب:انزل بس انا بأسوق،،نزل وقفل الباب ومااعطى بتال مجال يعطي رأيه،، بتال زفر وهو يفتح الباب وينزل ،،تقابلوا قدام عند صدام السيارة ونور السيارة هو الشي الوحيد اللي منور المكان المظلم حولهم ومروا من جنب بعض،، راشد وهو مار من جنبه:عنادك ذَا هده شوي بتال وقف والتفت عليه:ماني بعنادي بس انتم ماتسمعون لاحد!! راشد وقف هو بعد والتفت عليه ونص جسمه بالنور ونصه الثاني بالظلام:وانت ماشـ،،طاح من طوله عالارض فجأة وانسحب عالارض ع ظهره،، بتال رغم صدمته ارتمى عالارض بسرعة ومسك كف يد راشد وهذا الشي الوحيد اللي قدر يلحقه ويمسكه وبصرخته وسط صدمته:راااشددد!! ،،وانسحب بتال مع راشد لعمق الظلام بوسط هالطريق الشبه مهجورر،، . . <اللهم صل وسلم على نبينا محمد> . . أميرالز and أزميرالد like this. لامارا غير متواجد حالياً رد مع اقتباس قديم 24-07-20, 04:15 PM #33 لامارا مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام الصورة الرمزية لامارا ? العضوٌ??? » 216 ? التسِجيلٌ » Dec 2007 ? مشَارَ?اتْي » 87,661 ? نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute افتراضي ،،الـجـزء الـواحـد والـثـلاثـون،، استغفر الله العظيم من كل ذنب عظيم . .........****.......... ..بيت عادل.. .مجلس الحريم. ،،من المغرب وام جواد وبناتها عند ام غازي وعذبة وحصة وبنتها ريما بعد موجودين وبعد صلاة العشا بشوي،، ،،حصة وعذبة مستغربين من ام جواد اللي تسولف وتضحك وعادة تعاملها معهم اقرب للرسمية،، ام جواد وهي بتوقف:عاد نستأذنكم وكثر خيركم ياام غازي ام غازي مسكتها وجلستها:على وين؟؟والله ماتمشين حاسبينكم بالعشا ام جواد:يكثر خيرك بس مستعجلة والله وراي ضيفة واكيد انها على وصول ام غازي:ضيوفك ضيوفنا ياام جواد حياها الله ببيتي ام جواد بربكة وهي توقف غصب عن ام غازي:مرة ثانية خليها مرة ثانية ام غازي وقفت وهي تتنهد:يعني ملزمة ماحولك عشا معنا؟ ام جواد:يكثر خيركم ربي ويجود عليكم ياام غازي ام غازي ابتسمت وهي متضايقة:وش هالكلام ياعواطف مابيننا حياك متى مابغيتي دقي الباب البيت بيتك وانا اختك ام جواد:يسلم قلبك ماتقصرين ام غازي: ام جواد:يكثر خيركم ربي ويجود عليكم ياام غازي ام غازي ابتسمت وهي متضايقة:وش هالكلام ياعواطف مابيننا حياك متى مابغيتي دقي الباب البيت بيتك وانا اختك ام جواد:يسلم قلبك ماتقصرين ام غازي:وترا عشاكم الليلة معنا تراني حاسبتكم ام جواد:ماله داعي والله الكلافة والتعب ام غازي:ومين اللي قالك انهم بيطبخون!! امجاد تغير وجهها رهايف ضحكت:يمه الدق عيني عينك!! ام غازي:وانا الصادقة وصيت غازي وعشاكم عندكم شوي ام جواد:يكثر خيرك يارب مشكورة وعساه دايم عاد انا استأذنكم ام غازي:القهوة والحلا هذا هو لاتخلين البنات يسوون شي ولاتاخذين من برا ماله داعي السرف رهايف قامت وهي تنحني للطاولة وتاخذ الحلا وتمد ثلاجات القهوة والشاهي لسهام وشذى:مشينا ياعمة اذا بتنتظرين امي تخلص مي خالصة اليوم ام جواد ابتسمت ام غازي ضربتها ع كتفها:استحي يابنت امك!! رهايف بابتسامة:ياعيني عالحب لمى يقلب الموضوع لصالحه ام غازي تدفها:امشي بس امشي ياام لسان طويل مثل اخوانك ماتوفرين ،،خرجت ام جواد ومعها سهام وشذى ورهايف وبطريقتهم للبيت اللي يبعد كم خطوة عن بيت عادل،، رهايف تمشي ورا ام جواد وسهام:وش هالضيفة اللي تجي متاخر وبدوامات بعد؟!! سهام:سلامة مخك أي دوام وبكرة ويكند!! رهايف استوعبت:كله من الاوف اللي باخر الاسبوع يلخبطني شذى تمشي جنبها:الا انتي مشغول بالك بشي ثاني رهايف:اوص بس اوص ابوي لايدري اني تغديت معك برا ولحالنا والله يذبحني ام جواد:كان قلتي له أنكم طالعين تتغدون وانا امك عندنا خبر وسامحين لكم وش له الكذب!! رهايف شهقت وتقدمت جنب عمتها:من جدك ياعمة!!اشتري الكفن قبل أقوله!!عشان يخلص وأموره جاهزة سهام وشذى مصدومين من امهم اللي تاخذ وتعطي مع رهايف ام جواد ضحكت:الله يقطع شرك!! رهايف:شكلك ماتعرفينه زين ياعمة ام جواد:ومين مايعرف عادل!!لكن تراه ماهو بكذا انتم اللي ماتعرفونه!! رهايف بوسع عيونها:كيف مااعرفه وهو ابوي!!انتي اللي ماتعرفينه والله ماذقتي منه شي ام جواد دخلت للبيت:ماينلام هالقسى ماجاه من فراغ!! رهايف دخلت وراها باستغراب:كيف يعني؟! ام جواد وهي حست انها جابت العيد:يالله يالله سهام بخري المجلس بسرعة الضيفة على وصول سهام:إن شاء الله يمه،،نزلت الثلاجات ومشت،، رهايف نزلت صينية الحلا:عاد عن اذنكم ام جواد:وين رايحة؟! رهايف ارتفعت حواجبها باستغراب:همم؟؟ ام جواد:انا باتجهز وانتي ساعدي بنت عمك الي هبة ريح بِسْم الله عليها رهايف بضحكة وسخرية من نفسها:لاتسمعك امي بتموت من هبة الريح اللي قدامك ام جواد:ساعديها وبس،،مشت،، رهايف التفتت لشذى:عمتي ذابحة عمرها من هالضيفة؟!! شذى:ومين يعني بالله؟!! رهايف قطبت جبينها ثم ابتسمت:قولي والله!!دانة!!! شذى هزت راسها وهي تجهز الاغراض رهايف:بروح اكشخ وراجعة لك شذى مسكتها:هيه هيه وين رايحة!!مانبي مشاكل تكفين!! رهايف دفت يد شذى:وش مشاكله بروح اعزم عمتي حصة لاااازم تشوف حبيبة هالجواد!! شذى مسكتها وبترجي:تكفين رهايف فكينا من الصداع عمتي زعلانة منه من الأساس مانبي مشاكل تكفين رهايف دفتها:اقولك اذا جت دقي لي ولّا والله لاقاطعك ولاتصيرين أخت زوجي شذى بتكشيرتها:اجل وش بصير يعني!! رهايف:بنت عمي بس،،مشت وهي تسرع بخطواتها خارجة،، . ..السيارة.. غازي يسوق متجه للبيت ابو غازي التفت وراه وهو يشوف العشا ورا:مين ضيوفكم؟ غازي:امي تقول متجمعين عندهم الليلة ابو غازي هز راْسه:عساها دايمة،،فتح الدرج قدامه يفتش وحصّل فلاش صغير وطالعها باستغراب،، غازي عرف الفلاش وهي لبتّال:خلها يبه اكيد لدروس فيصل او رهايف ابو غازي طالعه بتكذيب وهو يدري ان هالاثنين من جنبها ودخلّ الفلاش بمكانه بالمسجل غازي كشر بوجهه للحظة وهو يهيئ نفسه للتهزيئة اللي بتجيه >>واشتغل بالسيارة صوت سميرة: تـنـقّـل يـاغـزالـي يـاابـو الـعـيـون الـسـود.. وغـيـرك مـايـحـلـى لـي يـاابـو الـعـيـون الـسـود.. غازي قفل الصوت من الدريكسون على طول وبربكة:يوه خربطت بينه هو وفلاش فيصل ورهايف ابو غازي التفت له بتقطيبة جبينه:وش فيك قفلته؟!! غازي باستغراب:هاه؟!! ابو غازي بعصبية:هواه اَي والله شغله!! غازي:ان شاء الله ان شاء الله،،فتح الصوت،، >>رجع صوت سميرة يغطي هدوء السيارة: تـنـقّـل عـلـى دقـة دقـة يـاأسـمـر يـاتـمـري الـمـنـقّـى.. بـهـالـلـطـافـة والـرقـة والـورد عـلـى الـخـدود.. تـنـقّـل يـاغـزالـي يـاابـو الـعـيـون الـسـود.. وغـيـرك مـايـحـلـى لـي يـاابـو الـعـيـون الـسـود.. ابو غازي رجعه هالصوت لذكرى نسيها او بالأصح تناساه وكمل حياته بدون لايرجع لها ورجعت له بهاللحظة ورسمت طيف ابتسامة على وجهه وهو يذكر > > عادل(25سنة)بثوب وشماغه الأحمر اللي رابطه على راْسه واقف تحت العشّة اللي مبنية بوادي صغير بين جبلين ومافيه سكّان واقف وهو يفرك يديه ببعض من زود حماسه وتوتره بنفس الوقت ابتسم وهو يسمع صوت صدا خلخالها السريع وعرف انها تجري متجهة له وعطاها ظهره جميلة(18سنة)بثوب كحلي مورد متلثمة ورامية فوق هاللثمة طرحة طويلة تغطيها لتحت ركبتها بصندل مفتوح من جميع الجهات(الصنادل القديمة) واضحة معه رجولها المحنية وأطراف خلخالها النازل ع رجولها مكحلة عيونها من تحت العين بالكحلة السودا الثقيلة باربع بناجر بيدها اليمين المحنية(حنا)بعد وقفت تحت العشّة بطرفها تحديدا وبوسط انفاسها السريعة:عسى ماابطيت عنك؟ عادل بالطرف المقابل لها وهو معطيها ظهره للحين زم شفايفه يهدي ابتسامته العريضة لاتكبر وتفضح شوقه لها اكثر من داعب صوت خلخالها اذنه قبل صوتها وحتى صوت انفاسها وبنفس وسط بداية كلامه وضح لها:لا ماابطيتي عني جميلة ابتسمت بخجل وهي ترفع يدها لطرف طرحتها البارز على راسها وتسحبها تنزلها تغطي بها عيونها:ارعيت يم البركة الحصاة(حجرة لونها غريب علامة لهم حتى يقابلها اذا يبيها) عادل بحماس وفرح وهو يرفع وينزل نفسه بمكانه:وافقم جميلة شدت ع طرحتها اللي تسحبها اكثر وأكثر وابتسمت بفرح مثل فرحته وأكثر ثم اختفت ابتسامتها:ووسمية؟ عادل:فاهد اوجسه كل شين زين مابه خلاف جميلة غرقت عيونها دموع:يابحر عادل التفت لها:ياعيون البحر جميلة:هو علم ولا حلم؟ عادل تقدم خطوة ثم وقف وهو يصد عنها يكبح رغبته انه يضمها له:علم علم وربش جميلة بدون شعور منها تقدمت له ووقفت جنبه ومدت يدها له ومسكت يده المتعرقة وهي ترفعها لخدها تلامس يده بخدها من فوق طرحتها وبهمس:عادل عادل التفت لها وهو ضيّع كل شي بعد ماسمعها تناديه وعيونه التقت بعيونها:ياعيون عادل وقليبه سمي يالعين الكحيلة جميلة زفرت براحة وهي تاكدت ان اللي يصير حقيقة ماهو حلم تركت يده وهي ترجع خطوة واسعة لورا وبابتسامة:هانت يالبحر هانت،،لفت عنه وجرت مبتعدة وسط المكان اللي اهتز بصدا صوت خلخالها،، >> ابو غازي صحى على صوت غازي غازي وقف بالسيارة بموقفها بالبايكة وطفى السيارة والتفت لابوه:يبه ابو غازي التفت له غازي قطب جبينه باستغراب:يبه فيك شي ابو غازي زفر وبهدوء:مابي شي مير انه طرا لي طاري،،سكت وهو ينتبه لنفسه وبنرفزة،،مافيني شي انزل ولاتصدع براسي بكثر قرقرتك!!،،نزل وقف الباب بقوة،، غازي باستغراب من تعصيبته اللي طلعت فجأة:وانا وش قلت!! . ..بيت مسفر.. ام جواد جالسة وهي تجامل جواد قبل دانة بابتسامة مصطنعة على وجهها دانة جالسة قبال ام جواد بكرسي مفرد وعالكرسي المفرد اللي جنبها جواد فتحت شنطتها وخرجت كيس صغير ثم وقفت وهي تتجه لها وانحنت وسلمت على راس ام جواد ام جواد مصدومة منها دانة مدت الكيس لها:تفضلي عمتي هذا شي بسيط ام جواد تطالعها باستغراب:وش المناسبة دانة رجعت لمكانها وبابتسامة:بدون مناسبة مجرد عربون محبة جواد ضحك بربكة:يمه هدية عادي وين المشكلة ام جواد ميلت فمها وهي مو مرتاحة:كثر خيرك ماتقصرين!! جواد:وين البنات ام جواد:اكيد انهم حصة قاطعت كلامها بدخولها:السلام عليكم جواد التفت يطالعها باستغراب من وجودها لكن وقف وتقدم لها وسلم عليها:وعليكم السلام والرحمة حياك الله حصة:كيفك يالقاطع ماتقول عندي عمة اسأل عنها جواد بابتسامة:والله انك عالبال ياعمة حصة:ايه واضح عالبال وانت الملكة ماعزمتني عليها؟،،دفته وهي تطالع وراها،،وينها اللي تخبيها عنّا؟ دانة وقفت بربكة حصة تقدمت لها وسلمت عليها وهي تتفحصها:ماشاء الله ماشاء الله الله يهنيكم،،جلست جنب ام جواد،، جواد جلس حصة:وين البنات مايقهوون؟!! ام جواد بتوقف حصة جلستها:اجلسي بس،،بنبرة عالية،،بنت يارهايف جواد انقلب وجهه دانة اتسعت عيونها ام جواد التفتت لها بصدمة حصة وهي تطالعهم وتكتم ضحكتها وبتصنع:يالله من فضلك هالبنت اخذه عقلي وقلبي من زينها وزين أخلاقها ياحظك ياجواد ليت رامي بس لو بعمرها،،ضحكت ثم طالعت دانة،،الله يقطع سوالفي بس السموحة منك يابنتي ماقصدت شذى،،رفعت صوتها وبحدة،،شذى!!ووجع دانة وجواد فزوا شذى دخلت وبوسط انفاسها:امري ياعمة حصة:دخلت رهايف معي وضيعتي عقلك!!تعالي قهوي الضيوف مو امك تقوم شذى طالعت جواد:وحضرته ليش مايقوم؟!! حصة:خلاص ماعاد هو بلنا ولا هو بحولنا!!بس قهويني انا وأمك يالله شذى تقهوي امها وعمتها دانة عضت شفتها من داخل فمها بغبنة وهي تكتم غيظها جواد بزعل:عمة!!تراها بنتكم!! حصة ضحكت:الله يقطع سوالفي سامحيني يابنتي ترا والله ارمي الكلام بدون قصد وقلبي ابيض دانة ابتسمت تجاملها وهي تغلي من داخلها حصة زفرت وهي تتقهوى وعينها بفنجالها:يالله بمجلسن مابه نفسن ثقيلة!! شذى كتمت ضحكتها ام جواد تنحنت وهي تقاوم الضحكة وتحافظ على تعابير وجهها دانة وقفت:عن اذنكم،،مشت،، جواد وقف ومشى وراها يلحقها حصة وقفت بسرعة ولحقته ومسكته:استنى وين رايح جواد وهو يكتم غيظه:عيب ياعمة والله عيب حصة:عيب يأخذ عقلك يالافدغ يبي لك عادل يلسعك بالخيزران حتى تصحى على نفسك خلها تذوق ماذوقته امك يالنايم!! جواد قطب جبينه ام جواد اتسعت عيونها:وش دراك!! جواد التفت لامه بصدمة:صدق يمه؟!! حصة بتعصيبة:ياقليل الحيا تكذبني!! جواد تركهم ولحق دانة حصة بقهر:ياغبنتي نربي ونتعب ونهايتها تاخذه وحدة وتلعب بعقله وتقلبه علينا ..........****.......... ..بيت بادي.. ،،سعود جالس عالعشا وقباله بخوت اللي جنبها حلايا تعشيها،، سعود رفع عينه من الاكل وطالع بخوت:وينها؟ بخوت طالعته:بالغرفة سعود:ذاقت لون؟(أكلت شي) بخوت:عجزت عنها معيّة ماطلعت من الغرفة الا للحمام تتوضأ وتعوّد للغرفة سعود زفر ثم وقف واتجه لغرفتها فتح الباب كشر بوجهه اول ماستقبله براد الغرفة اللي مثل الثلج من برودتها وفوقها ظلام مد يده لمفتاح النور وفتحه طالعها وهو يهمس:لااله الا الله عباير نايمة ع فراشها الارض سعود:عباير عباير ماردت عليه سعود:بنت ياعباير عباير ماردت سعود دخل للغرفة ووصل عند فراشها وانحنى شبه جالس وصار عند راسها وبهدوء:عباير عباير وهي مغمضة:ماابي شي كبّني لحالي سعود تنهد:قومي كلي شي ماهو بنافعك الزعل ثمن الشي لازاد عن حده انقلب ضده عباير رفعت راسها تطالعه وطرف فكها متكية به عالمخدة وبحدتها:ماهو بزايد ابد!!ولا نسيت سواة يدينك!! سعود وهو يكتم غيظه وقف:تريحي ثمن قومي واكلي لك لقمة،،خرج من عندها ورجع للعشا عند بخوت مد يده وأخذ لقمة ونزلها ماله نفس وابعد عن العشا،،الحمدلله ياكثر خيرش يابخوت بخوت:بالعافية،،طالعته وهي تعاتبه،،لاتظنها بتطاوعك وتراعي خاطرك مباشرة ياسعود سعود بضيقة:خابر يابخوت بخوت:وش ناوين عليه(كيف يراضيها) سعود:سواة الله خير!!تعود هي بتعود مير يبي لها صبر . راشد متمدد عالارض ع ظهره بوسط هالصحرا الخالية يطالع السما ولاهو قادر يتحرك او حتى يحرك راسه يعرف هو وين من صدمته باللي صار بتال ماسك يد راشد ماتركها ومتمدد هو بعد عالارض يطالع السما مو مصدق اللي صار بهاللحظة السريعة بلع ريقه وبصوت مبحوح:راشد؟ راشد مارد ماسمع اصلا من هول الموقف بعينه بتال جلس لكن ماسك راشد للحين والتفت له يطالعه وبخوف عليه:راشد؟؟ راشد التفت له يطالعه وهو متمدد بتال تنهد براحة انه طيب لكن قلبه ماهدا وقف وهو يسحب يد راشد يوقفه:قوم راشد للحين بصدمته مو قادر يصدق اللي صار معه بتال وقف راشد غصب واعتدل بوقفته بعد ماوقف راشد واتسعت عيونه من بُعد السيارة اللي يادوب يشوف نورها من البعد كانت لحظة مجرد لحظة كيف صاروا بهالمكان البعيد بهاللحظة همس بصدمة:وشلون!! راشد سحب يده من بتال ومشى قدامه بهدوء وبدون لايلتفت له او ينطق حرف . ..بيت طلق.. شامة قفلت على نفسها الغرفة بعد ماجهزت لطلق العشا وحطته قدامه طلق يتعشى لوحده تنهد وهو يلوم نفسه على تعصيبته عليها الصباح وقف واتجه للغرفة ودق الباب عليها:شامة شامة داخل الغرفة فزت بخوف ولاردت طلق:ادني يمي تعشي معي شامة استغربت من طلبه والتزمت الصمت طلق:ارعيني بأحتريش ماني مكمل العشا الا وانتي يمي،،رجع للعشا وجلس ينتظرها،، شامة تشاور نفسها اذا تخرج له او لا اخذت نفس وهي تفتح الباب وتخرج من الغرفة وتجلس قباله طلق ابتسم وقطع الخبزة لها وحطها قدامها وصب لها كاسة الشاهي وقرب لها الزبدة بنفس الوقت:حياش على خير يمينش شامة مستغربة منه لكن هالشي أسعدها وريح بالها طلق:لأجل تغدينا بنا الدنيا وحنا بروس بعضنا لزوم كلن منا يسوي اللي عليه شامة قطب جبينها طلق:لاشديتها يمّش اركدي ثمن لاشديتيها يمي ارفق بش شامة اخذت نفس:هينة ذي مقدورن عليها مير انه انت ملزومن تأكل معي وبعد تتقهوى معي ماهو بيّم مجلس الشيخ طلق ابتسم:مقدورن عليه شامة:وأرعك نسيت انا للحين ماقلّطنا شيّابنا طلق:تخيري مايعجبش وتم شامة بحماس:يغدون يمّنا للعشا بكرة طلق:تم شامة بابتسامة:يكثر خيرك طلق بابتسامته:ويعينش ربي انتي اللي بتولمينه شامة بحماسها ونست كل اللي صار:هينة هينة مامن تعب . ..السيارة.. ،،كملوا الطريق مرت نص ساعة بعد اللي صار وهم ساكتين ولااحد منهم كلم الثاني باللي صار معهم،، بتال يسوق وهو يفكر كيف ووشلون ويتفادى يحط بباله شي معين راشد بمكان الراكب بصدمة:مو حلم!! بتال ضغط عالدريكسون راشد:هالمرة انت معي!!مو حلم صح؟ جسّار تكى بينهم بقوة وهو يتثاوب:وشو اللي مو حلم ،،بتال وراشد فزوا،، بتال وقف بالسيارة من صدمته من جسّار وبصراخ:ووجعوه جسّار ووجعوه!! جسّار وهو يمدد جسمه:وش سويت!! راشد يفكر ساكت بتال حرك بالسيارة وبتوتر:اللي صار ياراشد مو حلم ابد وهالديرة وطريقها لاعاد ترجع له مرة ثانية نهائيا!! راشد زفر بصوت:امي يابتال جسّار يطالعهم مو فاهم بتال اتسعت عيونه:مهبول انا اقولها!! راشد تنهد:اذا مارجعت ينحل الموضوع؟! بتال سكت وهو اول مرة ينحط بهالموقف ولاعنده جواب راشد:يمكن صدفة بتال قطب جبينه باستغراب منه:صدفة ومرتين!! راشد انفجر يضحك بهستيريا جسّار قطب جبينه باستغراب يطالعه بتال وقف بالسيارة وهو يسمي:بِسْم الله عليك بِسْم الله عليك اعوذ بالله من الشيطان الرجيم،،ثم التفت لجسّار وصرخ،،موية ياجسار موية!! جسّار ارتبك من صرخة بتال وانحنى وهو يدور وسط الاكياس اللي عنده موية وخرج علبة وفتحها ومدها لراشد:راشد راشد بوسط ضحكه مو مصدق:أنا!!انا!!مو احد غيري!!انا!! بتال سحب الموية من يد جسّار ومدها لراشد وبحدة:راشد!! راشد ضرب يد بتال بقوة بتال طاحت من يده العلبة وتطاير شوي من الموية بالسيارة وبعصبية:انهبلت!! راشد بصراخ:وشلون ماانهبل بعد اللي صار وشلون!! جسّار ملتزم الصمت وهو مو فاهم وش اللي صاير راشد:أوقف حياتي كلها عشان اللي صار!!صاحي انت!! بتال:ماقلت لك وقف حياتك!!اترك هالديرة واضح البلا منها!!وخلك عالرقية وانتهينا!! جسّار اتسعت عيونه وهو بدا يفهم:بِسْم الله الرحمن الرحيم راشد ضحك:لااااا!!!!بدايتها بيوم الحادث يابتال بتال عقد حواجبه:وش تقصد!! جسّار بلع ريقه:تقصد اللي قالك اقرأ؟!! راشد هز راْسه بايه بتال بلعثمة:مو شرط راشد وجسّار طالعوه بتال اخذ نفس وهو يبرر:المكان اللي وقفنا به مو زين وفوقها تهاوشنا والبيت اللي سكناه مهجور من زمان راشد:والحلم اللي بعد الحادث؟ بتال:هذا انت قلته حلم!!كلنا نحلم بخرابيط!! راشد سكت وهو مو مقتنع نهائيا جسّار:وش صار معكم؟ بتال وهو يحرك السيارة:مو صاير شي هلوسنا حنا الاثنين اكيد الغدا فيه شي!! راشد ميل فمه بسخرية من كلام بتال وسند راْسه عالمقعدة وهو يغمض عيونه ...........****......... ..بيت مسفر.. دانة مسرعة بخطواتها بتخرج من هالبيت بعد الإهانة اللي لقتها رهايف وقفت قبال دانة بلبس عادي جدا بنطلون اسود وبلوزة رمادي ومرطب ع شفايفها وبابتسامة:وش فيك معصبة!!،،شهقت،،يوووه الظاهر قابلتي عمتي حصة!!،،ضحكت،،باقي عمتي عذبة وبعدها بتعرفين زين على عمتي عواطف لايغرك انها ساكتة ترا بس عشان خاطر جواد،،اختفت ابتسامتها وبحدة،،وربي لو كنت موجودة وسمعتك وانت تدقينها بالكلام وتطردينها بذا الاسلوب كان دفنتك بأرضك ياللي ماتستحين!! دانة ضحكت:واطردك معها بعد!! رهايف بابتسامة:عادي اطرديني ماعندي اي مشكلة دانة كشرت بوجهها رهايف بحدة:لكن امي وعماتي خط احمر!!كلمة وحدة عليهم واقص لسانك دانة رفعت يدها بتضربها جواد بحدة:داااانة دانة التفتت له جواد اسرع بخطواته لهم ووقف عندهم:طردتي امي يادانة؟!! رهايف مشت مبتعدة عنهم دانة بنرفزة:ماطردت احد هي اللي حست نفسها ثقيلة!! جواد ضربها كف ع وجهها دانة انصدمت منه وغرقت عيونها دموع جواد:اللي امي ثقيلة عليه هي بعد ثقيلة علي دانة انتي ام جواد وقفته باخر لحظة:جواد ،،جواد ودانة التفتوا لها،، جواد التفت لدانة وبهمس من بين اسنانه:اذلفي عن وجهي احسن لك دانة مشت خارجة بخطوات سريعة وسط دموعها ام جواد بحدة:ماربيتك تضرب بنات الناس ياجواد!! جواد سلم على راسها:واللي تقولك كلمة ماتسوى شي بعيني لو هي مالكة قلبي كله!!،،مشى متجه لغرفته بخطوات سريعة،، . ،،وصلوا الشباب واخيرا للبيت بعد سواقة خمس ساعات مع سرعة بتال والوقت كان عالساعة3 الفجر تقريبا،، بتال وقف بالسيارة بالمواقف الخاصة بهم داخل الحوش ونزل وهو قلبه بيخرج من مكانه من سرعة نبضاته وقوتها طالع بيتهم وهو يشوف الأنوار مفتوحة معناته للحين صاحين اخذ نفس واليوم اول يوم يرجع فيه بعد اللي صار بينه وبين ابوه وقف بين بيت جده وبيتهم طالع جسّار جسار مسرع بخطواته للبيت وسط ابتسامة بتال ابتسم وهو يشوف ابتسامة جسّار ويحسده على دخلته للبيت بدون اي قلق:جسّار جسّار وقف والتفت له بتال:ناد لي امي والبنات اسلم عليهم قبل اروح لبيت جدي جسّار حس على نفسه وانتبه كيف نسى وضع بتال:ابشر هالحين،،كمل طريقه للبيت،، بتال التفت لراشد راشد يجر خطواته متجه للبيت بتفكيره المشغول بوضعه واللي يصير معه بتال:راشد راشد يطّلع الدرج اللي قبال البيت وهو يرفع يده ويأشر بمعنى لا:مايحتاج لاتشيل هم مافيني شي اترك لك الباب؟ بتال:ايه ردّ الباب اسلم على امي وجاي راشد دخل للبيت بتال واقف برا قبال باب بيتهم ينتظر امه والبنات ابتسم وهو يشوف الباب ينفتح واختفت ابتسامته وانصدم وهو يشوفه رمش يتأكد انه قدّامه ابو غازي وقف قباله وهو يزفر بصوت مسموع ويرجع يديه ورا ظهره وهو يطالعه بملامح جامدة:ايه انا انا ماغيري يابتال!! . . <اللهم صل وسلم على نبينا محمد> . . أزميرالد likes this.