3/4/
ظ اللهم صل وسلم على نبينا محمد
سبحان الله،الحمدلله،لاإله إلا الله،الله اكبر،لاحول ولاقوة الا بالله
.
.........****..........
بيت مسفر
ابو جواد بعصبية:انطق من هن اللي ناوي تذبحهن؟!
ام جواد وقفت:صل ع النبي وتعوذ من ابليس
ابو جواد ماطالعها عينه على جواد
جواد:محد يبه محد!!مين اللي اذبحه وابتلي عمري به!!
ابو جواد بحدة:لاتستغفلني ياجواد!!لاتاخذك أوهامك لبعيد وانت تشوفني على كيفك!!ولاتظن اني غافلن عنك وعن دانة!!
،،الكل التفت يطالع جواد ينتظر تفسير ورد منه،،
جواد:يبه انا ودانة
ابو جواد بصوت عالي وعصبية:اقطع لااسمع لك صوت!!انا ودانة!!هاذي تربيتي اجل!!ياحيف والله!!ليتني رازك عند عمك حتى تعرف ان الله حق!!
جواد:يبه انا ودانة نبي نتزوج على سنة الله ورسوله ماسوينا شي غلط!!
ابو جواد:ابد طال عمرك مامن غلط رايتك بيضا!!الغلط راكبني كلي!!
جواد زفر:محشوم يبه محشوم
ابو جواد:وين الحشيمة وانت تتضحك معها بوسط أسياب المستشفى وانت ماانت بمحرمٍ لها!!
جواد:يبه هي خطيبتي وانا خاطبها من أهلها مافيها شي اسولف واطلع معها!!
ابو جواد اتسعت عيونه وهو يسمع كلامه وكانت الصدمة واضحة على امه وخواته:ياسلاااام!!ودامك خاطب وخالص وشو له تعلمنا رح وتزوج ولاجاك بزر ارفع السماعة وعلمنا انك تزوجت وعيّلت!!
جواد:لاتزعل مني يبه،،التفت لامه،،ولا انتي يمه،،طالع ابوه،،لكن انا ادري بك يبه انت ماتطيق دانة واكيد ماتبيها نصيب لي وامي تبي تزوجني على ذوقها وانا ابي اتزوج عن حب ولقيتها وخطبتها قبل يسبقني احد وكنت ابي أكلمكم البارحة لكن اللي صار خرب كل خططي يبه
ام جواد وهي تناظره بتعصيبة وودها تنفجر
ابو جواد بسخرية:صدق!!تبي تعلمنا!!ليش!!انت خلاص قضيت!!امورك وخلصتها رح توكل!!
جواد:يبه انا ماراح ابدي حياتي وأنتم مو راضيين علي ماراح اتزوج دانة الا بوجودكم
ابو جواد:تبطي عظم والله ماجيته وهي مرة لك
جواد بقهر:يبه!!
ابو جواد:انا ادري هالهرج ذَا كله مو بكلامك ابد وبعد ادري انك تسوقها علي ياجواد لاخطبتها ولا شي هالبنت تبي تجبرني أوافق لكن معصي والله ماتاخذها وان خذيتها ياجواد ماني براضين عنك،،مشى بخطواته السريعة طالع الدرج متجه لغرفته،،
جواد بصوت عالي:يبه حرام عليك!!حرام تحرمني من الشي اللي ابيه حرام!!
ام جواد وقفت قباله وبقهر:يالثور ولاتكفيك بعد حتى حمار قليلة فيك
جواد توسعت عيونه:يمه!!
ام جواد بقهرها:عمرنا مارديناك عن شي تبيه ابد لا انا ولا ابوك!!ولو جيت وتكلمت رحنا وخطبناها لك حتى لو إنا عايفينها هذا اولها ساقتك وراها الله يكفينا شر تاليها،،مشت،،
سهام وهي تعض طرف شفتها وتطالعه بقهر:ماغلطت شذى يوم تقول عنك خايس
جواد بعصبية:سهااام!!
سهام:يالخايس انت استكثرت على امي وابوي يفرحون فيك!!
جواد بحدة:سهام اذلفي عني
سهام بقهرها:قسم حلال فيك اللي بيصير بك لو اقول لعيال عمي بسواتك اللي البارح،،مشت،،
شذى مشت وراها وهي تطالع جواد بنظرات كلها قهر من كلامه
جواد طلع الدرج متجه لغرفته بخطوات سريعة وهو يدف أخواته عن طريقه وأخذ مفاتيحه ومحفظته ثم خرج من غرفته وخرج من البيت كله
.........****..........
،،توتر جو الجلسة والكل التفت عليها يطالعها،،
عباير بلعت ريقها وهي تصرّف الغلطة بكلام من عندها:يقول يابحر جدة وياأهل الطايف عسى
الجد قاطعها وبعصبية وبضيق خاطر:مانبيه شين فيه بحر اقطعي طرياه
عباير بفزعة:أبشر وانا بنت متعب،،غنت بصوتها المتواضع وهي تسحب الطشت وتدق به وسط حماس وضحك حلايا اللي فزت من حضن جدها وبدت تتمايل بجسمها الصغير على انه رقص وأنغام عباير ملت الكل بهجة وسرور لخواطرهم،،
مـريـت بـيـتٍ لـلـمـحـبـيـن مـقـفـول..
وجـابـتـنـي الـقـدرة عـلـى حـد بـابـه..
ونـشـدت جـيـرانـه عـسـى الـبـيـت مـنـزول..
قـالـوا حـبـيـبـك راح لا وأسـفـابـه..
ولـه مـدةٍ بـالـسـوق مـاشـيـف لـه زول..
وبـابـه عـلـيـه مـن الـسـوافـي تـرابـه..
وهـلـت دمـوع الـعـيـن والـقـلـب مـشـغـول..
وعـنـد الـفـراق الـلـي حـصـل فـي غـيـابـه..
وأقـفـيـت والـلـي بـيـن الأضـلاع مـجـهـول..
حـبٍ درسـتـه غـيـب مـاهـو كـتـابـة..
عباير وهي تنزل الطشت بالأرض:وسلامتك ياابو نشمي
حلايا:من زديد يابعاير زديد
عباير ضحكت وهي تطالعها:خلصنا ياحلاوة ياحلوة الخد انتي،،طالعت جدها،،اقول جدي
الجد بادي اللي اخذته أغنية عباير لارض ذكرياته اللي لاعباير ولاإخوانها موجودين فيها بطيف ابتسامة مرتسم على ثغره وهو سرحان بذيك الذكريات صحى على صوتها والتفت يطالعها وبهمس:هممم
عباير:أعلمك من هو راعيها؟
الجد بادي ابتسم وهو عنده علم بصاحب القصيدة:من هو؟!
عباير:خالد عبدالرحمن
سعود اختفت ابتسامته ووناسته بعد ماسمع كلام عباير
بخوت جالسة قباله تساعده بالذبيحة عقدت حواجبها مستغربة منه وقف شغل واستغربت فوقها التفاتته لعباير وجدهم وعرفت ان عباير جابت بهم العيد
الجد بادي قطب جبينه:من هو ذَا؟
عباير باستخفاف لكلامها:خالد ياجدي الشاعر خالد عبدالرحمن ماغيره،،شهقت وهي تبتسم..ماتعرفه؟!!
الجد بادي سكت وهو يطالعها بشك
عباير بوناسة:الحمدلله بعد عَنَى عرفت شاعر ماتعرفه ياجدي!!
بخوت بنفسها:حسبي الله على عدوك ياعباير فضحتينا!!
الجد بادي:وش هو من لحية؟
عباير:يقولون يقولون والعلم عند الله من الدواسر
سعود زفر وهو ينزل السكينة وبنفسه:حسبي الله عليك ياعباير!!
الجد بادي طارت عيونه وانفجر عليهم بصراخ:من الدواسر!!
.........****..........
بيت عادل
،، عند غازي وعذاري،،
غازي واقف قدام التسريحة يقفل ازارير ثوبه
عذاري وقفت جنبه وهي فيها نوم
غازي ابتسم وهو يمد يده اليمين وسحب عطرها اللي تحبه من عالتسريحة ومد لها
عذاري كشرت بوجهها وهي تطالعه
غازي سحبها لقدامه وهو يرجع خطوة وحدة بس لورا مبتعد فيها عن التسريحة وصار وجهها ع مراية التسريحة وظهرها ملاصق صدره وهو يحاوطها من خصرها بيده اليسار ثم ابعد يده عنها بمسافة بسيطة ورش العطر عليها
عذاري تكتفت وهي تطالعه بالمراية وتميل فمها بزعل
غازي ابتسم وهو يضمها له اكثر ويحاوطها بيديه الثنتين ويطالعها بالمراية:للحين زعلانة؟
عذاري تطالعه ساكتة
غازي:قلت لك ابشري بالعوض وانا عند كلمتي
عذاري ماردت
غازي اختفت ابتسامته وهو يكتم نرفزته مايحب هالاسلوب ولا هو متعود يتعامل بلين زيادة معها ضغط عليها بخفة وهو مستقصد يوجعها
عذاري احتدت نظرتها:اااه!!
غازي:قلت لك أبشري بالعوض وش اللي مزعلك!!
عذاري:غازي عورتني!!
غازي:طيب ردي علي
عذاري بحدة:متى هالعوض ان شاء الله؟!!
غازي أرخى يديه وهو يرجع يبتسم:قريب ان شاء الله قريب وجدا بعد
عذاري طالعته وبنفسها:لارضى عمنا الشايب ها ياغازي
غازي تنهد وهو يتركها ثم مشى وجلس ع طرف السرير وهو يقلب بجواله
عذاري بتردد:غازي
غازي رفع عينه عليها يطالعها
عذاري:ابي اروح لاهلي
غازي قطب جبينه:البارح وعمتي عندك!!
عذاري:امس مع اللي صار راحوا بدري وانا اصلا كنت مشغولة ماشفتها زين
غازي تنهد:ان شاء الله بس شوي بالليل وبتباتين عندهم بعد
عذاري شقت وجهها الابتسامة:صدق؟!!
غازي ابتسم لابتسامتها:ايه صدق
عذاري باسته ع خده:مشكور مشكور ياغازي
غازي يطالعه بنص عين:اللي يشوفك يقول حارمك منهم!!
عذاري:ماتقصر ياغازي رايتك بيضا لكن مشتاقة اجلس مع امي بدون ازعاج احد
غازي وقف:باتي عندهم الليلة واشبعي منها مثل ماتبغين،،وهو يمشي بيخرج،،تبين شي؟
عذاري:سلامتك سلامتك ياغازي
غازي خرج وهو يزفر بتوتر وقلق
.........****..........
بيت عوض
ابو فارس:عتيقة عينتيه اليوم؟
ام طلق:لا ماعينته بس هالزعول رقد ومشى قبل تطلع الشمس
ابو فارس تنهد:الله يصلحه خليه لاتطرين له شي
ام طلق:لاتنفخ راْسه ياعوض الولد كبر راْسه من علومك خله يزعل وينرض ثم يرضى
ابو فارس تنهد:ياعتيقة حرام عليش لاتزيدينه الولد ضايقن خاطره وانتي تغبنينه فوق ضيقته
ام طلق زفرت:مشكلتك ياعوض رحوم زيادة انت هاوشه وأنهره الدنيا ماهي بجايتن على كيفه ومايبي!!
ابو فارس:وانتي لاتصيرين عليه انتي امه!!
ام طلق:وعشاني امه ماابي له القهر!!القهر يسوق للمقابر ياعوض!!
.........****..........
،،عند بادي واهله،،
عباير فزت وهربت عن جدها لسعود
الجد بادي وقف:وش عرفك بهم!!ها!!هالقصيدة لسليمان ابن حاذور يالكذوب ثم إنش تمورقينها(تكذب عليه)على كيفش معصية ياعباير معصية!!
عباير من ورا سعود:طيب ياجدي ليش معصب لسليمان لاتزعل علينا لسليمان ابن حاذور هذاني عرفت لاتزعل
الجد بادي بغبنة:ومن قال اني معصب عشان القصيدة لاعادت!!،،طالع سعود بحدة،،من وراي ياسعود!!من وراي؟!!
سعود:ياجدي انا ما
الجد بادي بعصبية وهو يمشي له:معطيهن وانا محذرك!!تعصاني تكسر كلامي ياسعود!!
سعود:محشوم ياجدي محشوم
الجد بادي وقف قباله:كم مرة قايل لك هالبلاوي ماتدخل بيتي ياسعود!!كاني رضيت بهالبلوى اللي تومض(قصده التلفزيون)ذَا كله عشان حلايا وتالي عافته حلايا ماعاد تطالعه،،بقهر،،وعرفت الحين ليش عايفته!!
سعود:ياجدي انا مابغيت اكسر خواطرهن هن ماهن بمعششات عليه(يعني يأخذ وقتهم)شوي وبيتركنه
الجد بادي وهو يدفه من كتفه بطرف سبابته اليمنى:لاصارت الولية وليتك والبيت بيتك سو اللي تبغاه محدن برادك ياسعود لكن هالحين انا الوالي،،طالع بخوت بحدة،،هالمواخيذ(يقصد الجوالات)ماتطب بيتي وأول مانغدي يم البيت تسلمونهن وانتن ماتشوفن الدرب!!
بخوت سكتت وهي تنزل عينها بالأرض
عباير تطالعه بقهر وهي تتشكى بينها وبين نفسها
سعود:أبشر على امرك أبشر
الجد بادي بعصبية:اعجلوا علينا ماصار غدا بنقيّل وأنتم للحين!!
.........****..........
بيت عادل
المطبخ
امجاد ورهايف يجهزون الفطور
ام غازي تصب القهوة اللي جهزتها على ذوق عمها بالثلاجة ثم التفتت عالبنات اللي يجهزون وراها:سريع سريع خلصوا تعرفون أبوكم مايحتاج بروح اتطمن على بتال وراجعة لكم،،مشت،،
رهايف وهي تفتح الحافظة وتطالع الفتة اللي بداخلها:اخليها بالحافظة ولا أوزعها؟
امجاد وهي توزع باقي الفطور بالصحون:اتركيها بحافظتها بعدين تبرد ويقوم علينا ابوي
رهايف قفلت الحافظة ولفت متجهة لدولاب المطبخ تجهز أغراض القهوة معطية امجاد ظهرها:امجاد
امجاد قاطعتها بدون لاتطالعها:مايحتاج تقولين شي انا غلطانة بعد
رهايف ابتسمت:اصلا ماكنت بتكلم بذا الموضوع اساسا!!
امجاد:ايه صدقت!!
رهايف:باقي يوجعك مكان الضربة؟!
فيصل دخل:تصافيتوا؟،،ابتسم،،الح� �دلله عالسلامة!!
امجاد مدت له من الصحون:يالله يالله بسرعة عند ابوي لايحطك مكان الفطور وتصير الفطور
فيصل أخذ الصحون منها
رهايف التفتت وهي مبتسمة:والله تخيلتك صراحة!!يابتصير مفطح على مستوى ياولد!!
فيصل مد رجله يضربها بشويش
رهايف:وربي لاشكيك لبتّال وتمردغ على يدينه!!
غازي دخل وشال صينية القهوة:فصيل اترك خواتك لاأمردغك الحين
فيصل وهو يمشي:اصلا انا الضعيف بينكم يالوحوش!!
رهايف وهي تضحك:خف علينا يالحشائش يااضعف مخلوق بالسلسلة الغذائية!!
امجاد وهي تدفها:اتركيه عنك والله ينرحم بينكم
رهايف بتردد:امجاد
امجاد عقدت حواجبها وهي تطالعها:نعم!!
رهايف زفرت:خلاص خلاص
امجاد تطالعها بشك:قولي وش عندك؟
رهايف:شفتي بتال البارح؟
امجاد توسعت عيونها:سلامات!!كلنا سلمنا عليه!!
رهايف:قلت لك خلاص،،مشت قدامها،،تعالي بس نفطر
.........****..........
بعد الفطور اللي اعتبره الجد بادي غدا ولاهو فطور حركوا راجعين للديرة وأول مادخلوا الديرة الجد بادي اشر بيده لسعود بمعنى أوقف
سعود وقف بالسيارة على امر جده والتفت ورا يتطمن على بخوت بنظراته
عباير جالسة وبحضنها من اليمين حلايا وبوسط حضنها بخوت
بخوت دافنة وجهها وسط حضن عباير وهي ترجف وتحس قلبها بيخرج من مكانه من خوفها
عباير تسمي وتقرأ عليها كل ماحست برجفتها تزيد
سعود طالع لقدام وهو يزفر بهم من وضع بخوت
الجد بادي طلّع راْسه شوي من القزاز وهو يشوف ولد صغير من عيال الديرة ابتسم:تعال ياباسل تعال
باسل طالعه شوي متردد ثم مشى وتركه
الجد بادي استأنس اكثر ووضح على وجهه
سعود قطب جبينه من ردة فعل جده ثم ابتسم وهو يمر بباله فكرة مو مستبعدة عن جده
الجد بادي:ياولد ياسعود
سعود:سم ياجد
الجد بادي بابتسامته:عجّل علينا خل نلحق القايلة
سعود:ابشر ابشر ياابو نشمي
.........****..........
بــعـــد صـلاة الـمـغـرب
.........****..........
مر اليوم كله على بيت عادل بهدوء الكل مشغول باله مع بتال اللي نايم ولا صحى وهو اخذها فرصة يرتاح وينام نومة الهنا
..بيت الشعر..
،،الجد والجدة وعذبة وأم غازي وغازي وفيصل وأمجاد ورهايف بعبايتهم لان راشد كالعادة معهم وكلهم مجتمعين،،
الجد نشمي:وشلونه بتال ياوسمية؟
ام غازي بنقابها عشان راشد:ان شاء الله انه بخير ياعمي
الجدة منيرة:ماكنه أبطى؟
فيصل وهو يتقهوى:الا عجبته الراحة وماهو ناوي يقوم
غازي جالس جنبه ضربه ع قفاه:وش لك انت؟!!محد كلمك!!ليش اللقافة!!ياشينك
جسّار وهو يضرب صدره:ابشروا بواجبكم ابشروا بسلامة بتال ابشروا بالعشا وانا ولد ابوي
،،الكل انصدم منه،،
غازي باستغراب:وش الطاري؟!!
راشد بسرعة وهو يطالع جده:شاهد ياجدي شاهد تكفى اشهد عليه ياجد تكفى
رهايف:يمه حلفتك اشهدي تكفين قبل يجحد القعيطي(بخيل)تكفين يمه
عذبة:كلنا شهود ياعين امك لاتخافين يارهايف شهود على هالقعيطي
جسّار حط يده ع صدره:اااه جرحتوني مشاعيري تنزف بشدة
فيصل:ماتطيب ان شاء الله اهم شي العشا عليك وخلصنا
حصة دخلت وهي تنزل طرحتها:السلام عليكم
جسّار فز واقف وبابتسامة وهو يفتح يديه يستقبلها وبترحيب حار:ياهلا والله ياهلا عدد الحجر والشجر والجراااااد اذا انتشر بالسنة عيدين واليوم ثالث ياهلا بحصيص ياهلا
حصة كشرت بوجهها وهي تسلم عليه وبشك:الله يحييك
جسّار:ياهلا بحصة ياهلا بام رامي
حصة وهي متجهة لابوها وامها:الله يستر منك الله يستر منك بس،،سلمت عليهم ثم نزلت عبايتها وشنطتها بطرف المجلس ثم رجعت تجلس جنب عذبة،،
بتال دخل بوجهه اللي منفوخ من طول نومته وبابتسامة:السلام عليكم،،اتجه لجده وجدته سلم عليهم ثم امه ثم الباقين وجلس بين جده وامه وبعد السؤال عن الحال والكل تحمد له بالسلامة،،
جسّار:ومثل ماوعدتكم ابشروا بالعشا
راشد مو مصدق ان جسّار بيعشيهم وهاذي الحادثة تدخل ملف انجازاته قرصه بفخذه يتأكد
جسّار توجع:بلا!!وش فيك علي!!
رهايف:تكفى افلقه راشد خلنا نتأكد انه بوعيه مو يجحد اذا خلصنا الطلب
بتال ابتسم وهو يشوفهم
غازي احتدت نظرته وهو يطالعها
رهايف صدت بوجهها عنه
جسّار:مثل ماوعدتكم بأعشيكم الليلة وانا لها مايبقى بخاطركم شي كلن يقول وش بخاطره،،التفت لحصة قبل يتكلمون،،يدك عالفلوس ياحصيص!!
عذبة انفجرت تضحك:لاعز الله عيّنا خير الليلة!!
حصة طارت عيونها:وش هووو؟!!
جسّار وهو يمد يده وبتشديد عالكلمة:الـ.ـفـ.ـلـوووس
حصة بقهر:ياعساك بالفلس اي والله!!
الجد نشمي ضحك بخفة وسط ابتسامات الباقين
ام غازي:اهبي ياحصة حرام عليك تدعين عليه!!
حصة تطالعها:فلسني ولدك ذا ولا يملى عينه!!،،طالعت جسّار،،وبعدين خير خير وش علي منك انا!!ملزومة بحلوفك!!تحلف وانا ادفع عنك!!
رهايف:كنت دارية انك ماانت بوجه عزايم
راشد:وش تنتظرين منه!!باقي امل عندك!!القعيطي قعيطي!!
فيصل:مالي شغل انت قلت ابشر بالواجب وملزوم فيه لو انك مطفّر
جسّار وهو مطنش حصة ويطالعهم:مين اللي قال بيطير واجبكم!!الحق واصل واصل وواجبكم بيجيكم اطلبوا بس
حصة:انا ابي سوشي من***
جسّار طالعها:احسبيني معك وصاحب المناسبة معنا والباقين مفطح ويدك عالقرنقش
حصة:جسّاروه وبعدين معك!!الى متى مبلشني فيك؟!!والله لو انك واحد من عيالي ومضيعته!!!
جسّار:يحصلك انتي ولد مثلي!!انا مافي مني اثنين ابد!!،،غمز لها،،وبعدين نسينا ياحصيص نسينا!!،،ثم طالع الباقين،،المهم عمتي حصة بتدفع العشا الليلة كلن يطلب اللي نفسه فيه حلفت عليكم مايردكم شي
حصة بتنفجر منه:ليش ياالمتبّلي!!وانت مو توك تقول بتعشينا
جسّار:ايه ابي اعشيهم بس شفتك وهونت
60
.
~
حصة:اعوذ بالله منك وليش ان شاء الله؟!!الى متى وانت تهون تدفع كل ماشفتني؟!!
جسّار بنص عين:نسيتي ياحصيص نسيتي!!يوم انك عيدتي على غازي وبتّال واحد بعشرة والثاني خمسة وانا عطيتيني حلاوة البقرة الملونة اليابسة اللي تنشب بالأسنان نسيتي!!
حصة بقهر:لاعاد من عيد اي والله
عذبة:اعوذ بالله منك ياحصة
حصة زفرت:استغفر الله العظيم استغفر الله بس!!جسار يالظالم يالجاحد ذيك العيدية طلعتها مع خشمي ولانسيت!!
جسّار شهق:اههههيييي!!وشو لا والله ماشفتها للحين!!
حصة:اهب يالكذوب!!انت يالمقوي مايضيع لك حق!!طلعت هالعيدية من عيني اول شي سويته رميت الحلاوة بوجهي وقلت خليها لك ماابيها
جسّار:وانا الصادق تعطيني حلاوة وهم فلوس وانا عزيز نفس
بتال شرق بالقهوة وهو يطالعه
جسّار تنحنح وهو يطالعه بنص عين:وعزة نفسي ماتسمح لي اخذ من احد شي!!لو هو ريال مديتيه علي راضي به ماني بقايل شي!!لكن ماخفتي ربك فيني ولا بيوم العيد بعد!!كسرتي برائتي راحت براءة الأطفال اللي فيني صرت في ضياع من ذاك اليوم
حصة:اقول هيه انت العيدية اللي ذالني فيها ذي اخذتها ومو دبل واحد تدبيلات من ظهري مافيه عشا ولا غدا ولافطور ولا أي بلعة بالحياة وانا معك الا تدبسني فيها!!
جسّار:الحمدلله حسيتي!!شفتي وشلون كسر الخواطر شين!!
حصة وقفت وهي معصبة واتجهت لشنطتها واخذت محفظتها منها ومشت له وقفت قباله وطلعت ريال ورمته بوجهه:خذ عيديتك اللي نشبت لي فيها لاعادت!!ولاعاد اشوفك توطوط حولي!!
جسّار رافع راْسه لها يطالعها:ننععععممممم!!!!
حصة:هاذي عزة نفسك مو تقوله!!!لو هو ريال راضي به!!
جسّار:هذاك اول يوم اني بزر!!ولا وقف فيك الزمن بوقت ذيك العيدية!!ماالومك ذابحك الندم اللي سويتيه مو بسيط
حصة تخصرت:كم تبي وتفكني منك؟مية؟
جسّار توسعت عيونه:وش مية!!!
رهايف وراشد وفيصل مركزين بالنقاش لاقصى حد لان السالفة فيها عشا وبالذات رهايف لان اذا مو فيه هي بتطبخ
حصة:اجل كم؟!!!
جسّار:والله انتي تدرين نفسي عزيزة مااقدر احدد
حصة:ياالخراط وربي
جسّار وهو يشد ظهره بجلسته ويعدل ثوبه:بس ابي البطاقة الزرقا بس
حصة تطالعه:أهب ياوجهه!!حاط عينك على فليساتي!!
جسّار:مو تقولين تبينا نخلص موضوع العيدية!!
حصة:معصي!!والله ولاريال يالبخيل انا اعلمك!!
جسّار بتحدي:والله اخذها منك اخذها الله لايعوق بشر
ام غازي بتعصيبة:جسّار!!!
بتال:يكثر خيركم كلكم تكفيني المشاعر اللي وصلت منكم لمى تحمدتوا لي بالسلامة وواجب من وراكم يالاثنين بالذات ماابيه
حصة وهي تطالعه:ياروح عمتك انت وربي قليل اللي نسويه بحقك ياقطعة من قلوبنا
جسّار:ايه ايه اصلا انتي ماتشوفين غيره وانا حتى الريال كثير علي!!
حصة التفتت عليه وبسخرية:ياعزيز النفس ياعيني انت!!
جسّار:الحمدلله انك عارفة
الجد نشمي بابتسامة:هدوا هدوا وش ذَا!!
حصة بقهر:ماتسمعه يبه!!مغسول وجهه ذَا الولد
جسّار:كيفي والله وجهي وانا حر!!
غازي:جسّاروه!!
الجد نشمي بحدة:خلاااص!!الليلة العشا علي كلن يقول اللي بخاطره
جسّار:لا والله ياجدي ان ما
حصة قاطعته:انثبر انت!!،،طالعت ابوها،،كثر خيرك يبه ومعوض خير
الجد نشمي:وواجب بتال محد يقوم به غيري
بتال:يسلم رأسك جعلني فدا وكثر خيرك لكن والله مايكتب لي
الجد نشمي بزعل:استغفر الله!!
بتال بابتسامته:والله مايكتب لي شي عندكم كلكم هذاني بفضل وخير من الله طيب ولله الحمد
الجد نشمي زفر بعدم رضا
غازي ابتسم:خلاص ياجدي حلف وبتّال وتعرفه مايحتاج تزعّل نفسك
الجد نشمي:اجل دامك حلفت انا حالفت عليك بعد
الكل طالعه مستغرب
بتّال:إسلم ياجدي وأبشر
الجد نشمي ابتسم:سمعّني غزل عادل يابتّال
بتّال تغير وجهه وهو يلتفت بسرعة لامه يطالعها وسط الوجيه اللي تغيرت من كلام الجد نشمي
.
.
.
اكتشاف المزيد
العلم
علم
عالم
سلات هدايا
أميرالز and أزميرالد like this.
لامارا غير متواجد حالياً رد مع اقتباس
الـجـزء الـعــاشـــر،،
.
.........****..........
بيت الجد بادي
مجتمعين كلهم بالحوش عالقهوة بدون عباير
عباير طلعت من غرفتها وهي تجري ووقفت عندهم:بخوت قومي بسرعة قومي
بخوت رفعت راسها لها وباستغرابها:خير وش بش؟وش موحية؟!
عباير:مزون تقول الليلة عشا كبير يلم كل الديرة ببيت العلل
الجد بادي ابتسم
سعود لمح ابتسامة جده وميل فمه بشك
حلايا ابتسمت بوناسة وقفت وهي تنط:نلوح نلوح
بخوت بكره للموضوع:لا لا ماني بغادية يمهم انتي اغدي بروحش
عباير:والله ان تمشين ماهو برايش!!
بخوت:عباير فكيني والله ماني بناقصة هروج وبعدين جدي ماشاورتيه
عباير طالعت جدها:جدي نغدي يمهم؟
الجد بادي:روحوا وتونسوا وعودوا بدري لاتبطون
حلايا صرخت بوناسة:هييهههه
بخوت:روحي ياعباير الله يستر عليش
عباير ارتفعت حواجبها:وانتي؟!!
بخوت:انتي تونسي مع مزون وانا بأظلي بالبيت وحلايا معي وبأجهز العشا لجدي وسعود
عباير:وشو!!!!
حلايا كشرت بوجهها وفيها الصيحة
الجد بادي:بخوت ياعيني
بخوت التفتت لجدها:سم
الجد بادي:روحي مع اختش وانتي ادرى بفعولها
بخوت:بس ياجدي
الجد بادي:بخوت ياعيني اللي تنطق لش حرف اكليها كلها،،طالع عباير،،وهي ماهي مقصرتن معش بتاكلها عنش قبل تنطقين انتي
بخوت بصوت يرجف وهي تكبح عبرتها:ياجدي انا تعبت من هالعلوم اللي تغث احسن لي اقعد بالبيت ولااحد يغثني ولااغث احد بشوفته لي
عباير عضت طرف شفتها بغبنة وهي تسمع كلامها
الجد بادي مسك يدها وضغط عليها:انتي ماسويت شين حتى توزّين بالبيت!!هذا هو يمشي ويغدي محدن قاله عينك برأسك،،ابتسم،،ثم انتي يااطهر وأزين قليب تكدرين خاطرش وعمرش عشان حريّم ماهمها الا القيل والقال
بخوت ابتسم وسط لمعة عيونها وهي تطالع جدها:وحلايا؟!
سعود:معكن!!
بخوت:بس حلايا ياسعود ماينفع لها
سعود قاطعها وهو يطالعها عن طرف وهو يهز كاسة الشاهي اللي بيده:تبين تحسرين بها؟خليها تستأنس معكم
حلايا تطالع بخوت برجى لاترفض طلعة لهم مثل كل مرة
بخوت تطالعهم بتردد
عباير ابتسمت وهي تنحني وتمسك يد بخوت وتقومها:يالله يالله قومي مابقى شين عن الصلاة
حلايا ابتسمت ومسكت يد بخوت الثانية تقومها وهي مبسوطة
بخوت قامت بملل بعد محاولات عباير
عباير وحلايا جروا بخوت متجهين لغرفة عباير
سعود نطق اول ماشافهم دخلوا الغرفة وهو يطالع جده:أبشر ياجد
الجد بادي ابتسم:كفو ياولدي كفو
سعود بابتسامة:كفوك الطيب ياابو نشمي تربيتك انا
الجد بادي:اللي يتصدد عنّا وانا جدك
سعود بسرعة:نصدّ عنه
الجد بادي بابتسامة:ايه ايه صدقت لكن هالمرة ماحنا متصددين هالمرة بنسوي فعول عباير ياسعود
سعود قطب جبينه بعدم فهم
الجد بادي ضحك:ماخبرتك فديغ ذهن(يعني قريب من غبي مالقطها بسرعة)ياسعود
سعود:ياجد العلم واحد والمقاصد واجدة
الجد بادي مميل فمه بابتسامة:يتصددون الله لايردهم لكن بيت الله مايحق لهم يصدون فيه قم قم نصلي بالصف الأول لو حنا نزحمهم
.........****..........
بيت الشعر
بتال يطالع امه بوجهه اللي تغير وهو يحاول يسيطر عليه
ام غازي وقفت:امجاد رهايف الحقوني داخل،،مشت،،
امجاد ورهايف لحقوا امهم
الجد نشمي:جـرّ يابتال جـرّ واطربنا
فيصل وقف وطلع يلحق امه
عذبة:الله يهديك يبه بتال مريض
حصة:اَي والله يبه ماتمل من الشعر والهجينيات!!اترك بتال يتريح شوي
الجد نشمي:عاد انا مايطربني ويريح راسي غير بتال صوته عافية ثم انا ماسويت منكر حتى تزعلن!!
عذبة:محشوم ياابو عادل محشوم لكن المقصد بتال مريض
بتال يطالع امه لحد ماخرجت من البيت وهو يحمد ربه ان عماته يماطلون بجده:أبشر ياابو عادل أبشر بغزل عادل أبشر
الجد نشمي:سلمت سلمت ياحصيلة الغزل
بتال تنحنح وهو يسترجع ذكرى هالغزل بباله وغنى:
يـابـحـر لاتـعـانـد والـقـمـر فـيـك بـات..
هـون الـمـوج نـفـسـي زادت طـعـونـها..
يـابـحـر لاتـزيـد الـمـوج مـلا حـسـاب..
لاتـذكـر عـيـونـي بـنـظـرة عـيـونـهـا..
صـرت عـايـش وكـانـي فـوق مـتـن الـسـحـاب..
بـعـد مـالـفـوح فـاح الـحـب مـكـنـونـهـا..
وأنـا تـونـي شـبـاب ولـكـن الـراس شـاب..
صـاب قـبـلي الـهـوى لـيـلـى ومـجـنـونـها..
غـابـت عـيـونـهـا يـابـحـر والـبـدر غـاب..
هـون الـمـوج نـفـسـي زادت طـعـونـها..
يـابـحـر لاتـعـانـد والـقـمـر فـيـك ذاب..
هـون الـمـوج نـفـسـي زادت طـعـونـها..
.
.........****..........
بيت مسفر
سهام نازلة عالدرج وهي لابسة عبايتها وتقفل ساعتها
شذى طايرة وراها تنزل الدرج بسرعة:بعدي بعدي بعدي بسررررعة
سهام وهي تلصق بالجدار تترك لها طريق:خير خير يالمطفوقة وش عندك؟!!
شذى وقفت بنهاية الدرج وبابتسامة:رهايف تقول ان العشا كلن على كيفه يطلب
سهام:الحمدلله والشكر اللي يشوفك يقول مجوعينك!!
شذى:الحمدلله والشكر اَي والله بروح اجهز أغراض سهرتنا الليلة
سهام ابتسمت:سهرة
شذى وهي تطق رقبة بوناسة:سهرتنا الليلة خلوها صبّاحي
ام جواد وهي تنزل عالدرج بتأفف:عشان عمكم كل شوي نقصوا الصوت ولا اجلدكم!!
شذى:يمه يعني ماعرفتي عمي هو عصبي حبتين لكن والله انه عسل
سهام ضحكت وهي تنزل ووقفت عندها:لايسمعك بس
ام جواد:وينه اخوكم؟
سهام وهي تلف طرحتها:بسلامته ماشفته
شذى وهي تلف طرحتها:سيم
ام جواد بضيقة:الله يهديه الله يهديه هذا اللي أقوله
سهام:اتركيه يمه مردّه يرجع لنا ويعرف ان الله حق
ام جواد:لا ياسهام مهما يكون هذا اخوك وخليك معه مهما يصير
شذى بغبنة:حتى وهو غلطان!!
ام جواد بتشديد وسط نظرة حادة:حتى لو هو غلطان ياشذى
.........****..........
واقفة بجلابيتها الرمادي الواسعة بموديلها الطويل وبأكمام طويلة قبال مرايتها الصغيرة اللي بالدولاب وهي تقفل حزام الذهب الثقيل اللي محاوطته على خصرها فوق جلابيتها تكسر من وسع الموديل ثم اخذت عقد الذهب الثقيل هو بعد وكان عبارة عن ثلاث دواير عريضة مصفوفة بشكل طولي ويلامس طرف نهاية العقد الحزام طالعت نفسها وهي تمسح عالجلابية ترتبها ثم رفعت يمينها وهي ترجع شعرها الطويل المجعد بطبيعته ورا أذنها وهي مميلة رقبتها ولبست الحلق اللي بيدها اليسار وكررت الحركة باختلاف الاتجاهات للحلق اليمين زفرت وهي تنحني وتاخذ غوايشها(بناجر او معاضد)وكم خاتم من صندوق ذهبها اللي عالارض واعتدلت بوقفتها وهي تلبسها
بخوت فتحت الباب وحلايا معها:عباير
عباير التفتت عليها وهي ماتطالعها تلبس بخواتمها:ها ولمتي(جهزتي)؟
حلايا بفستان سماوي مناسب عمرها وشعرها الطويل المسدول لآخر ظهرها شهقت وهي تشوفها وجرت لها:بعاير
عباير رجعت خطوة لورا:ياويلش تلمسيني ياحلّوي خليني اتولّم(اتجهّز)زين
حلايا كشرت بوجهها بزعل
بخوت ابتسمت وهي تعرف عادة عباير:ماشاء الله ماشاء الله اشوفش مدّهرة بعمرش(مو مقصرة بشي على نفسها)الليلة؟
عباير طالعت مرايتها وهي تحط روج باللون الموف القريب للأسود اللي مو مناسب ابدا للون بشرتها الحنطية وبصوت غريب لانها تحط هالروج:لازم ادّهر ياعيني لأن العيون اللي ابي أعميها واجد ياعساش سالمة
بخوت كشرت بوجهها وهي تشوف اللون:طلبتك عباير غيريه يهّول(يخوف)
عباير طالعتها وهي رافعة حواجبها:وانا ابي أهّول بهم جعلهم بعاقور يتهولهم(يبهذلهم)
بخوت ميلت فمها مو عاجبها
عباير طالعتها وهي تتخصر:لايكون بتغدين بهاللون(بهالشكل)؟
بخوت ببتنورة سودا وبلوزة سودا ولامة شعرها كله بدون اَي اكسسوار او حتى نقطة مكياج طالعت نفسها بشك من كلام عباير:علامي؟!!
عباير:لابسة هاللون وتقولين وش فيني!!تراش منتي باقل منهم ثم خافي ربش يابخوت لااله الا الله عليش مايحتاج اقول شي وانتي ابخص بروحش
بخوت بابتسامة سخرية من نفسها:الله يرحم الحال ياعباير بس
عباير توسعت عيونها وبقهر منها:وليش ان شاء الله!!جسمش وتبارك الرحمن شعرش وقطعة من حرير وان طالعوش فانهم يطالعون البدر بليلة اربع طعش،،وبتعصيبة وهي تحرك يدها اليمين بوجه بخوت،،وش بش انتي وش بش؟!!
بخوت ضحكت وهي تحبس دمعتها كل اللي قالته عباير صدق لكن هي كرهت نفسها ماعاد تشوف الا السواد والكآبة:الله يقطع سوالفش ياعبيّر
عباير:ماهي بسالفة يابخوت هذا الصدق روحي والبسي القطعة اللي وصيت مزون تجيبها لش يوم انهم غدو يمّ مكة
بخوت توسعت عيونها وتلونت خدودها من خجلها وهي تذكر الفستان:واعيباه ياعباير من جدش تقولينه!!
عباير قطبت جبينها:وليش اشريها وأعطيش اياها ان شاء الله عسى بس تبين ترزعينها(تخلينه)بالدولاب!!
بخوت وهي تمسك خدودها بكفوفها:بس ياعباير
عباير ماانتظرتها تكمل كلامها مسكتها من يدها وسحبتها ومشت لغرفة بخوت وحلايا وراهم ثم دفت بخوت لغرفتها وهي تفتح الباب :يالله البسيه ماني متحركة الا اذا شفتش لابسته،،سكرت الباب بدون ماتعطيها مجال ترد وناظرت حلايا اللي واقفة جنبها:وانتي والمة؟
حلايا هزت راسها بايه
عباير:روحي يم المداسات(الجزم)وولمّي لي الأسود الطويل(تقصد الكعب)ولبخوت اللي يبرق(يلمع)ولش،،سكتت وهي تطالعها شوي،،اللي خاطرش به
حلايا جرت بابتسامة لغرفة سعود وهناك دولاب جزمهم
عباير ابتسمت وهي تطالعها ثم دقت الباب:ها وش علمش؟لبستي؟
بخوت ماردت
عباير فتحت الباب
بخوت اللي كانت معطيتها ظهرها لابسة فستانها الأحمر بقصة دائرية من الظهر باكمام طويلة مخصر قصير فوق الركبة بشي بسيط وباقي موديله كلوش لنص الساق وشفاف مع الجوانب ع خصرها لفت لها بسرعة وهي تمسك جوانب الفستان اللي مخصر عليها وبوجه متغير من الحيا
عباير تنهدت وهي تتجه لها:وش بش فزيتي ماني بماكلتش!!،،وقفت عندها،،
بخوت وهي تطالع نفسها مو مرتاحة للفستان:عباير والله ان يمنعوني مااطى خرسانة حتى(تقصد ماتدخل حتى لحوش البيت)
عباير وهي تلفها تتمعن الفستان بنظرها وقفت بخوت اللي معطيتها ظهرها وقفلت باقي سحاب الفستان ثم سحبت الربطة اللي ماسكة شعر بخوت
بخوت شهقت وهي تمسك شعرها قبل ينسدل ولفت على عباير تطالعها بعيون متسعة:عباير!!
عباير مسكت يد بخوت تفكها عن شعرها
بخوت انسدل شعرها الناعم اللي يختلف عن اختها وغطى ظهرها وهو يوصل لفوق ركبتها بشي بسيط
عباير بابتسامة:خلي الزين يكمل وانا اختش
بخوت بقلق:وش هالعلوم اللي بأغدي بها يم العرب!!
عباير بعصبية:وش عليش منهم!!ضربوا لش حساب!!ماحسبوش منهم وش له تحسبينهم انتي!!،،ابتسمت وحركت حواجبها فوق وتحت بخباثة،،الا الفحي بشعرش وبكل لفحة عطيهم وحدة(تقصد تضربهم بشعرها)
بخوت ضحكت بخفة:ماتمنعينا من سلومش
عباير ابتسمت لضحكتها:دامش بتضحكين ماني بمانعة سلومي عنش
.........****..........
..عند ابو غازي وابو جواد..
،،ابو غازي وابو جواد بزيارة لواحد من معارفهم ببيته مريض ويتحمدون له بالسلامة وطبعا موجود غيرهم ضيوف لنفس الغرض،،
ابو غازي برسميته المعتادة مع الكل:خطاك السو ياابو ياسر اخر الأوجاع ونهاية الاحزان
ابو ياسر:الله يسلمك ويعافيك ياابو غازي،،ابتسم،،الا نقول لك مبروك مبروك الله يجعله فال خير وعقبال اخوانه
ابو غازي عقد حواجبه وأبو جواد ماكان بعيد عنه بالعكس مستغرب مثله:الله يبارك فيك وبحياتك
ابو ياسر:بس هاه ياابو غازي نبي الحق حق الفرحة
ابو غازي:أبشر بعزك حقك واصل بدون هالفرحة انت بس شد حيلك وعلى هالخشم
ابو ياسر:كثر الله خير وتسلم يمينك لكن حنا كل اللي نبيه وقاصدينه ماهو الحق على كثر الفرحة
ابو جواد توتر وهو يشوف مو قادرين يوصلون لشئ من كلامه
ابو غازي:أبشر أبشر ياابو ياسر
ابو ياسر:والله ماظنتي نلحق عليه الظاهر بيسري(يمشي)قبل حتى نلحق عليه ونبارك له
ابو غازي تغير وجهه لصدمة وهو يربط صاحب الاتصال بذيك الليلة اللي مارد عليه ويمكن هو هذا السبب اللي يبارك له عليه الرجّال احتدت ملامحه وامتلى وجهه غيظ شد قبضته وهو يحاول يسيطر على رجفة الغبنة اللي يحس بها ماجا بباله غير شخص واحد ممكن يسوي اَي شي من وراه بدون خوف منه
ابو جواد وقف وهو يشوف ابو غازي وابتسم وطالع ابو ياسر:عاد حنّا نستأذنكم
ابو ياسر:تو الناس يارجال!!عليكم الله تجلسون وتتعشون معنا
ابو غازي وقف وهو يكبح غيظه مارد عليه
ابو جواد:عساك خيرك دايم وافر ياابو ياسر لكن خلها مرة ثانية ثم تركنا الوالد ووعدناه نبكّر برجعتنا له
ابو غازي مانطق حرف وهو كل تفكيره بس متى يوصل البيت
ابو ياسر زفر:الله ييسر لكم الله ييسر بس وعد تتعشون عندي
ابو غازي ماعاد تحمل اكثر ومشى بخطوات سريعة
ابو جواد انصدم منه لكن تدارك الموقف:أبشر بسعدك وقدامك العافية السموحة منك ابو غازي شايل هم الوالد استأذنكم ياجماعة،،اسرع بخطواته يلحق ابو غازي،،
.........****..........
سبحانك ربي استغفرك وأتوب إليك..
اللهم صل وسلم على نبينا محمد..
.
.
.
أميرالز and أزميرالد like this.
لامارا غير متواجد حالياً رد مع اقتباس
قديم 24-07-20, 03:13 PM #13
لامارا
مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
الصورة الرمزية لامارا
? العضوٌ??? » 216
? التسِجيلٌ » Dec 2007
? مشَارَ?اتْي » 87,661
? نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي
،،الــجـزء الـحـادي عـشـر
،،
لااله الا الله عدد خلقه ورضا نفسه وزنة عرشه ومداد كلماته
.
بيت عادل
..المطبخ..
،،امجاد تجهز القهوة وأغراضها ورهايف تجهز كيكة بسيطة للبنات اللي جايين وأم غازي تعجن عجينة بكمية بسيطة تجهز عشا لعمها وعمتها وسط هدوء تام،،
بتّال دخل للمطبخ وبابتسامته:السلام عليكم
،،البنات طالعوه وكملوا شغل،،
ام غازي ماطالعته
بتّال كشر بوجهه وهو يشوف امه ماطالعته جلس بنص المطبخ وهو يتوجع ومغمض عين ويسرق نظرات لامه بعينه الثانية:ااااه صداع ذابحني مااشوف منه وبطني يمه ااااه يابطني بموت بمووووت
ام غازي تنهدت وهي تعجن:امجاد
امجاد التفت تطالع امها اللي معطيتها ظهرها:نعم يمه
ام غازي:أعطي أخوك حلتيتة(عشبة معروفة🌚❌)
بتال فز واقف وبعيون متسعة وصدمة:حلتيتة يمه!!
ام غازي مكملة شغلها ولا التفتت له حتى:تقول بطنك يوجعك!!
بتال وقف ومشى لها ثم وقف جنبها وبزعل:تكرهيني يمه صح؟!!
ام غازي ساكتة وواضح على وجهها الضيق
بتال:محد يعطي احد حلتيتة الا يكرهه!!
ام غازي زفرت:ايه أكرهك ومااطيقك ارتحت
بتّال وهو يشدد عالكلمة:يمممممه!!!!
ام غازي:بتّالوه رح عني شف لك صرفة
بتال ناشب لامه:طيب يمه والله بطني يوجعني يعني بتتركيني اتوجع!!
ام غازي بعصبية وبدون لاتطالعه:بتّال واللي يرحم والديك اذلف عني خلني اشوف شغلي
بتّال مكشر بوجهه:يمه اقولك بطني يوجعني تقولين اشوف شغلي
ام غازي:ورب البيت يابتّال ماذلفت عني تزعل
بتّال تكتف وبغثاثته:طيب اعطيني الحلتيتة بطني يوجعني
ام غازي لفت عليه وهي ترفع يدها اللي فيها عجين بوجهه تهدده:واللي رفع سبع وبسط سبع يابتال
بتال مسك يدها وحطها ع خده الأيمن بعدم اهتمام للي تقوله
ام غازي توسعت عيونها وسحبت يدها من على دقنه وبصدمة:ولد!!!
بتال لزق بوجهه وشعر دقنه عجين من يد امه ولازال مثبت يدها على دقنه:ياام غازي كان أزعلتك غزل عادل فاللي رفع سبع وبسط سبع ترا بتّال يفديك والله ياام غازي إنك غزل بتّال وروح بتّال ودنية بتّال ياعيون بتّال انتي
امجاد ورهايف يتحاشون يلفون عليهم يطالعونهم وسط وجيههم المليانة ابتسامات وهم عارفين بتّال اللي مايرضى على امه كيف زعلها
ام غازي خالطت ملامحها الرضى اللي تحاول تخفيه من كلام بتال وتسحب يدها:اتركني يابتال
بتّال رفع يدها وهو ينزّل راْسه لها وحط يدها على راْسه:ترا هالراس وراعيه فدا
ام غازي وهي تسحب يدها بقوة منه:بِسْم الله عليك الله يحفظك انت وإخوانك لي
بتال بتكشيرة زعل وهو يرفع نبرة صوته شوي:يممممممه!!
ام غازي انفجعت:بِسْم الله وش فيك؟!!
بتال:ذَا الحين كل ذَا الغزل اللي عشانك وعشان هالعيون الله لايحرمني وتقولين وإخوانك!!ادعي لي لحالي وهم لحالهم
ام غازي بعصبية منه وهي تضربه ع كتفه:ياجعل عدوينك بالمرض!!
بتّال من قلبه:ااااممممييين اخيرا دعوة لي لحالي مابغيتي!!
ام غازي ابتسمت ولفت للمغسلة تغسل يدها بعد حركة بتال ورجعت للعجين وهي تنزله بالصينية:رح عند جدك لايطب ابوك ومايشوفك معهم وتعرف وش يصير
رهايف تكلم امجاد:انتبهي للكيكة رايحة شويات وراجعة،،مشت بخطوات سريعة خارجة،،
بتّال انتبه لها وهي خارجة سلم على راس امه:تبين شي ياام غازي؟
ام غازي بابتسامة:سلامتك بس رح رح قبل يجي ابوك
بتّال خرج من المطبخ يبي يلحق رهايف شافها وهي متجهة للدرج:رهايف
رهايف اسرعت بخطواتها بدون لاتلتفت له وترد عليه
بتال عقد حواجبه وكذّب نفسه وأقنع نفسه ماسمعته رفع صوته:رهايف
رهايف جرت عالدرج بسرعة
بتّال جرى وراها
رهايف جرت بكل سرعة متجهة لغرفتها قبل يلحقها
بتال لحقها بحكم انه اسرع منها بكثير ومسكها من بلوزتها من ورا وسحبها له وهو يلقط انفاسه:وجع رهيفة ايوا والله وجع اتعبتيني
رهايف منزلة راسها ولا طالعته
بتال:وش سارقة عشان تهجّين؟
رهايف ماردت
بتال:ثم يالحسود ياللي ماعندك رحمة من امس ماجيتيني ماتقولين اخوي تعبان ارفق به اتطمن عليه ام قليب اسود صدق!!
رهايف منزلة راسها ونزلت دموعها وهي تحبس شهقاتها
بتال عقد حواجبه وهو يشوفها ماترد وميل راْسه يطالعها انصدم وهو يشوفها تبكي توسعت عيونه وبفجعة:وش فيك؟!!
رهايف بدموعها:كيف تبيني اجيك وانا اللي تسببت فيك هاه؟!
بتال يطالعها وهو يرمش مصدوم
رهايف وهي تشاهق:ادري اني غثيثة وملسونة وسرّاقة وأم قليب اسود وكل شي شين لكن ماتوقعت بيوم اذبح اخوي
بتال ابتسم:يعني هالدموع عشاني!!
رهايف صدت بوجهها وهي تمسح دموعها
بتال بعباطة:لحظة لحظة لاتوقفين صياح خليني أنادي العيال،،لف بيمشي،،
رهايف لفت عليه تطالعه وصرخت:بتّال ووجعوه ماصدقت!!
بتال التفت عليها بابتسامته ومسك يدها وسحبها لحضنه:تعالي تعالي يالصيحة
رهايف زادت دموعها
بتال:أووه ماشاء الله تعديتي سُرتّي الحمدلله زاد طولك سانتي
رهايف دفته عنها وهي تمسح دموعها وبزعل:ماتضحك
بتال وهو يضحك:وش ذنبي اذا انتي قصيرة
رهايف:محد شفط جينات الطول بالبيت غيرك يالعملاق ماعندك إيثار وجع
بتال ضحك:رضيتي الحين!طاح اللي برأسك خلاص
رهايف سكتت وماطالعته
بتال:رهايف اللي صار مكتوب وانتي مالك شغل،،بنذالة يبي يستفيد شوي،،
هو صح انك متسببة جزئيا يعني لو رتبتي الصحون بذمة وضمير ولو ماقرصتيني،،شهق وهو يوسع عيونه ويحط يديه على فمه،،يالمجرمة مخططة من البداية تذبحيني!!
رهايف وقفت بكا وبحلطمة ونرفزة:عاد انطم انت انطم لاتسوي لي فيها كونان اصلا لو ماتخاصمنا انا وأمجاد بعد سواة الخايس جوادوه فيها ماكان صار اللي صار
بتال عقد حواجبه بشك:ووش مسوي ان شاء الله هالبثر
رهايف سكتت
بتال زاد شكه وبحدة:رهايف لاتحديني على شي ماابي أسويه وانتي تعرفيني
رهايف بلعت ريقها وهي تعرف ان بتال مايفرق عن ابوها اذا عصب:ماسوا شي
بتال مسكها من يدها وضغطها بقوة وهو يشوف ترددها وبحدة وهو يطالعها:انطقي يارهايف ولا ورب البيت ان محد يفكك مني الليلة
رهايف غمضت عيونها مو من الالم على كثر ماكان من الخوف وهي تعرف بتال وطبعه الشين:انا وجواد تلاسنا
بتال بملامح واضح يكتم فيها غيظه وأنفاسه الحارة تضرب بوجه رهايف:وبعدين؟
رهايف طالعته وهي تقوي نفسها:بس
بتال من بين اسنانه وهو يهددها:اكذبي عليهم يابنت عادل مو انا!!
رهايف:هذا اللي صار بس
بتال مسكها وسحبها وراه ودخلها لغرفته هو وجسّار وقفل الباب عليها ونزل بخطوات سريعة ودخل المطبخ وطالع امجاد
امجاد اللي التفتت اول ماحست بأحد جاي
بتال بحدة:امجاد تعالي
امجاد استغربت من حدته:وش فيه
بتال مشى لها ومسكها من يدها وسحبها وراه
امجاد وهي تمشي معه:بِسْم الله وش فيك
بتال طلع الدرج بسرعة وفتح الغرفة ودفها عند رهايف وقفل الباب وراه وهو يدخل
امجاد طالعت رهايف اللي مرعوبة من بتال ثم رجعت تطالع بتال:وش صاير؟
بتال:العلم عندك ياامجاد انطقي
امجاد شدت ع قبضتها تخفي رجفتها وهي فاهمة خوف رهايف زين:جايني معصب علي وانا ماادري وش السالفة!!
بتال ابتسم بقهر من استعباطها:جواد ياامجاد جواد
امجاد تغير وجهها للحظة وهي تدري بتصير كارثة اذا درا بتال وهو المتهور بينهم:زي ماقالت لك رهايف
بتال عض طرف شفته وهو يقطب جبينه بتفكير ثم اعتلت الصدمة وجهه:لاتقولينه؟!!
امجاد لقطت تفكيره وبعصبية:استغفر الله العظيم حرام عليك لاتتهم الرجال ظلم!!
رهايف بكت
ام غازي برا الغرفة تدق الباب:وش فيكم؟بتال افتح لي يمه افتح،،دقت بقوة وهي تسمع صراخ بتال داخل،،
بتال انفجر بصراخ وغبنة:اذا صدق تكلمي قولي الصدق ماابي امد يدي عليك ياامجاد ارحميني!!
امجاد بحدة:قلت لك مافيه شي،،ماخلصت كلمتها الا وبتّال طبع كف قوي بيده اليمين على خدها اليسار،،
بتال بصراخ:لاتكذبين علي وانتي تحطين عينك بعيني ياامجاد!!
امجاد وعيونها غرقانة دموع وبعناد:ماكذبت يابتال
رهايف انفجرت بدموعها وهي تخاف يغلط بتال اكثر وبعدها ماتتصلح بينهم الأمور وتكلمت بسرعة وهي تبيه يبعد عن امجاد:جواد طردنا من بيت عمي وسكتّه يابتال وكان يبي يضربني ووقفت امجاد بوجهه وشاتها واغمى عليها هذا اللي صار والله بس ماصار شي غيره
بتال توسعت عيونه وهو يسمع كلامها امتلى وجهه غيظ وغبنة واكتساه السواد من الغبنة اللي ملت صدره ونطق ببحة صوته اللي تقطعت من غيظه:وشو؟!!
امجاد صرخت وسط دموعها اللي نزلت:رهاااايف!!
رهايف وهي تحاول تهديه بوسط دموع تنزل من خوفها عليه من اللي بيسويه اكثر من خوفها من اللي بيسويه فيها:والله ماسوا غيرها شي وانا انا متاكدة ماكان يقصدها يابتال تعرفني تعرف ان لساني طويل وازودها شوي وهو ماتحـ
بتال ضربها كف ع وجهها يسكتها
امجاد عضت شفتها السفلية وهي تكتم شهقتها المصدومة من ضربته لرهايف
رهايف حست بوجهها تقطع من ضربته زمت شفايفها وهي تكتم بكيتها من الالم
بتال مسك ثوبه بيده اليمين من عند صدره ويزمّه وهو يحس بوجع مالي صدره من القهر ورفع راْسه لفوق ونطق وهو يأخذ نفس ويزفره:ااااااه يابتّال ااااه!!
امجاد انرعبت وهي تشوفه هالمرة اكيد جواد بيموت بين يدينه مسكت يده اليسار وهي ترفعها وتضغط عليها وبخوف:بتال ماصار شي والله ماصار شي
بتال نزل راْسه بسرعة وسحب يده منها بقوة وهو يطالعها بملامح محتدة تشابه حدة ابوه لاعصب ومن بين اسنانه:اسكتي انطمي لااسمع لك صوت
امجاد سكتت وهي تحس برجفة اجتاحتها من نظرته
بتال بغبنته وهو يطالعهم:يمد يده ويتعدى حدوده وأنتم مستمرين تدافعون عنه!!
رهايف صرخت بوجهه:وانا وش علي منه؟!!انا علي فيك انت واخواني
بتال بصراخ:وانتي وش عليك منّا!!اللي يغلط بحقك تقولين!!اتركي الرجال يخلصون امورهم مع الرجال ومالك شغل باللي يصير وهالخوف خليه لك مااحنا بمالين عينك!!
امجاد بحدة:اذا بيصير لكم شي من ورا هالسالفة ايه بدافع عنه وماانتم بمالين عيني
بتال انجن من كلامها وهي تستنقص رجولته وأنعمت عينه عن خوفها عليهم رفع يده بيضربها ويبرد قلبه
رهايف وقفت بينهم واخذت الضربة عن امجاد وسال الدم من انفها وهي تطالعه وبحدة وهي تحبس دموعها:دايم تقول عديم المروة اللي يمد يده على مرة(حرمة،أنثى)
بتال شحب وجهه من كلامها
رهايف:وانت ماانت بأقل منه مديت يدك على مرة والمصيبة خواتك!!
بتال انتفض جسمه من كلامها طالع الارض وبنبرة هادية وهو كله ندم عاللي سواه بخواته:وهالاخت ماحسبت حساب لإخوانها!!
رهايف تطالعه ساكتة وأمجاد وراها
بتال رفع عينه يطالعهم وهو كله غبنة:انتي وأختك نزلتوا قدرنا بالأرض يوم ماتكلمتوا بوقتها وارخصتونا له وهو يبتسم بوجيهنا ورا سواته الشينة
امجاد تقدمت وهي تبعد رهايف:بتال الشاهد الله انّا مانبي
بتال رفع يده بوجهها يسكتها:اووووووص،،طالعهم وهو يتفحصهم بعيونه رهايف وحالتها اللي تقطع قلبه امجاد وكيف تترجاه وأثر يده مطبوع ع وجهها اكل قلبه الندم وهو يشوف اللي سواه فيهم عض شفته بغبنة من نفسه وشلون يمد يده بسبب واحد مايستاهل وفوقها هالواحد غلطان بحقهم ولادروا وحضر العزيمة بكل وقاحة وبدون ندم تكلم بوجهه اللي امتلى شر بعد لحظة هدوءه،،الشاهد الله ياامجاد ان مابي خير ولا ذرة رجولة اذا تركت واحد يضحك بوجهي وهو ماد يده على خواتي حي،،عطاهم ظهره وفتح الباب،،
ام غازي انفجعت وهي تشوف وجهه الاسود:وش فيك بتال؟
بتال مر من جنبها بدون لايرد وخرج يجري متجه لبيت عمه
امجاد جلست عالارض بصدمة
رهايف جرت وراه بخوف من اللي بيصير وهي تترجاه:تكفى يابتال اتركه الله يخليك اتركه
ام غازي مشت وراهم بسرعة وهي ماتدري وش اللي صاير بينهم لكن عرفت مزون جلست عندهم:خير خير خير علامكم؟
عباير بزعل:مابنا شي
مزون طالعت بخوت وبتكشيرة:علامش عليها؟!
بخوت:انتي اللي وين غديتي عنها؟!!المفروض إنش معي تمنعينها عن خبالها
عباير التفتت بسرعة تطالعها وبنرفزة:وش خباله هاه؟!!اجل اسكتن لهن!!يخسن وانا بنت ابوي!!
بخوت بعصبية:اجل طيري بهن واذبحيهن!!
مزون قاطعتهم:وينها حلايا؟
بخوت طالعت عباير:راحت معش وقت غديتي للملعبة
عباير:مادريت بها
بخوت تغير وجهها من فجعتها
عباير فزت واقفة:ماعليش مع البزران تلهي(تلعب)
.........****..........
..بيت خالد..
عذاري حاضنة امها وسادحة رقبتها ع كتف امها بوجه واضح عليه الضيقة
ام صايل تمسح ع راس عذاري بهدوء وسط تفكيرها وصمتها وهذا حالها المعتاد
ابو صايل:وش صاير معك عذرية قليبي
عذاري طالعت ابوها وبزعلها:وش فيني يبه يعني!!
ابو صايل ابتسم:يابنيتي هذا زوجك وهذا طبعه للحين ماعرفتيه
عذاري:الى متى يبه الى متى
ابو صايل:يابنتي من صبر ظفر
عذاري:صبرت يبه
ابو صايل:وهو بعد!!
عذاري بنرفزة وهي تترك امها وتطالعه:يبه من ولدك هو ولّا أنا؟!!
ابو صايل ضحك وبنص عين:ياعيّارة اعرف حركاتك انا
عذاري ضمت امها وعينها لابوها وبزعل منه:انا اهم شي عندي امي امي وبس
ابو صايل تنهد:الله يهدي اموركم يابنيتي وانتي سايسيه(يعني هدّيه)والأمور بنزين ان شاء الله
عذاري صدت بوجهها وهي مو عاجبها كلام ابوها
.........****..........
نايفة وغيثة يطالعونها وهم جالسين قبالها ومابينهم مسافة وشبه حاشرينها
حلايا تطالعهم ساكتة بوجه احمر ودموع تحبسها
نايفة طالعت غيثة وباستغراب:علامها منصهر كبدها(تبكي عالصامت،محروقة من خوفها)وحنا ماعملنا بها شي!!
غيثة:ماعليش منها لاتغرش دميعاتها هاذي مثلهن مصيبة تمشي على وجه الارض وباطنها
نايفة طالعت حلايا:تعرفين من انا؟
حلايا وهي تحبس دموعها:خايفة المهّولة(تخوف)
غيثة ضحكت
نايفة كشرت بوجهها ودقت غيثة بطرف كوعها:ووجع
غيثة بابتسامة:وانا؟
حلايا نزلت دموعها:قحطة(جفاف)
نايفة ضحكت:صدقتي والله انها قحطة
غيثة كشرت وهي تطالع حلايا:مالومش تربية الجنية بعاير جعلها بالبعير اللي يعقطها
عباير دفت باب الغرفة بوسط انفاسها السريعة:اللي يعقطش قبلي ويبرك فوقش(يجلس عليها)ياقحطة ياللي مابوجهش خير
حلايا وقفت وجرت لعباير وهي تبكي بصوت عالي وبوسط بكاها:بعاير تزهمس(تزهمش>تناديك)بعاير
عباير اخذتها لحضنها وهي تضمها بخوف عليها:ياعيون عباير وين غديتي عني؟
غيثة وقفت وبصوت عالي وهي تطالعها:هيه هيه علامش!!داخلتن بشرش تجرينه وراش!!
عباير طالعتها وبحدة:ماهو بوراي شري الا قدامي للي مثلش وشرواش
نايفة وقفت وبفزعة لأختها:هيه هيه انتي ياالجاهلة ياللي ماتعرفين السنع والأصول احشمي روحش واعرفي من تخرجين معه
عباير وهي تنزل حلايا وترجعها وراها:خفي علي ياللي مقطوع سرش(سرها)بفرنسا يامختمة الثقافات ووزيرة الأمم المتحدة وربي ان ماحشمتي عمرش انتي واختش انس لاصير اسم على مسمى واخليشن عبرة للي مااعتبر!!
نايفة ماتقدر تبدا الضرب وهي تدري امها تذبحها وبتحدي لعباير حتى تبدا وبابتسامة:ورينا اعبرش(العبرة اللي تقول عليها)اللي تقولين عنها
غيثة بابتسامة:اَي والله تكفين طلبتش اعجلي علينا بالعبرة
بخوت المفجوعة دخلت بوجهها الباكي وهي تدور على حلايا واخذتها من حضن عباير لحضنها وهي تقطع المناقشة الحادة بين عباير ونايفة وغيثة
نايفة تطالعها باستغراب:الحمدلله محد بيعمل بها شي
بخوت التفت عليها بوجهها الباكي بغضب وعطتها كف من كل قلبها
نايفة انصدمت
غيثة توسعت عيونها
عباير تطالعها مصدومة ماتوقعت بخوت تسوي كذا
بخوت بحدة:تاركتكم على ماتبون الا اهلي ماهو بكيفكم تفجعوني بهم ابد،،مشت،،
عباير طالعتهم وهي تمر من عندهم مميلة فمها بابتسامة عريضة
.
.
.
.
أميرالز likes this.
لامارا غير متواجد حالياً رد مع اقتباس
قديم 24-07-20, 03:15 PM #15
لامارا
مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
الصورة الرمزية لامارا
? العضوٌ??? » 216
? التسِجيلٌ » Dec 2007
? مشَارَ?اتْي » 87,661
? نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي
،،الـجـزء الـثـالـث عـشـر،،
اللهم صل وسلم على نبينا محمد
.
.........****..........
..بيت الشعر..
،،الجد نشمي جالس متوسط المجلس عن يمينه بمسافة بسيطة ابو غازي وعن يساره بنفس المسافة بتال وهم جالسين متقابلين وورا ابو غازي بمسافة جالسين عياله وورا بتال بمسافة مسفر وراشد وجواد جالس بطرف المجلس بعيد عنهم،،
الجد نشمي زفر بعصبية وهو يطالع عادل دخل يده بجيبه وخرج محفظته ورماها على عادل
ابو غازي جالس متربع ضربت المحفظة بركبته وطاحت قدامه طالعها والتفت لابوه بحدة
الجد نشمي بحدة:خذ اللي تبيه ياعادل من الريال للمليون وامنعني من علومك الشينة
ابو غازي بحدة:يبه انا ماابي
الجد نشمي قاطعه وبنفس العصبية:كانك بايعه بأرخص الأثمان ياعادل انا شاريه،،اشر على عيونه،،بعويناتي
بتال طالع جده بوجه مصدوم للحظة بلع ريقه وهو تمر به عبرة يبلعها وخالطته مشاعر فرح حب حنان انتماء وفدا لهالانسان اللي دافع عنه قدام الكل بعد ماانهان قدام الكل
ابو غازي بغبنة:يبه انت ماتدري وش مسوي ولّا انت كسرت راْسه بعد مو تطرده بس
الجد نشمي:لو وش مسوي مايحق لك تطرده ياعادل
ابو غازي عض شفته ثم زفر من غبنته بصوت مسموع:انت لو تدري ماتسكت له يبه
الجد نشمي رفع سبابته بتهديد لعادل:سامحناك بسواتك من سنين لكن تعيدها مرتن ثانية هذا العلم اللي مانقبل به ياعادل
ابو غازي تكلم من غبنته:ام جلاجل يبه(اسم استعارة للديرة🌚)
الجد نشمي تغير وجهه
بتال طالع ابوه وجده باستغراب
ابو غازي بغبنة:ماحلت بعينه الا ام جلاجل يبه!!
الجد نشمي طالع بتال وهو يطرد الأفكار الشينة من باله:علامها ام جلاجل ياولد؟
بتال بجدية:تعينت فيها ياجدي
ابو غازي سحب المحفظة وضربها بوجه بتال وبحدة:ام جلاجل يالخايس ام جلاجل جعلك بزلزال يشيلك
بتال طالعه وهو يلعب بداخله كلام يالله يمسكه
الجد نشمي غمض عيونه للحظة وزفر ثم طالع ابو غازي:رزقته ونصيبه ياعادل
ابو غازي اتسعت عيونه:وشو؟!!
الجد نشمي اخذ نفس وهو يحاول يكون منصف لبتّال:لك مدّة وانت ناشب لهم بكل روحة وجية ماتخليهم يتهنون حتى باللقمة الا وانت تقولهم وين الوظيفة ويوم انها جته ترده!!عجيب امرك ياعادل عجيب!!
ابو غازي وهو يحط يديه على ركبتيه ويضغط عليهن من قهره وبحدة:يبه لي مدة وانا اقول عمكم أولى بكم من الغريب لكن يعيّي(يرفض)،،طالع بتال بحدة،،ودام هالخسيس سوا اللي براسه اكيد الثور الثاني بيتبعه
بتال:تعيين وبعد عنى وصل والحين تردني ابي اعرف السبب وشو له كل هالزعل!!ليش ليش!!
ابو غازي بعيون متسعة بتخرج من مكانها وهو وده يذبحه بصراخ:للحين يسأل ويرادد!!
الجد نشمي زفر:علمني ياعادل وش اللي مزعلك؟الوظيفة ولّا ام جلاجل؟
ابو غازي طالع ابوه:ام جلاجل مااشقتني(ماهمتني)يبه الغبينة تعبي كله راح!!
بتال بعصبية:ماراح تعبك يبه حلمك وحققناه لك غصب عنا مثل مابغيت ولااحد منا قدر ينطق ويقول وش يبي كل اللي يصير بحياتنا مسيّر على امرك وبكيفك محد قال شي لكن انت مايملى عينك شي ابد ابد لو اقطع نفسي قطعة قطعة دامه مايرضيك مابيرضيك يبه
ابو غازي جلس على ركبتيه وهو يمسك بتال من ثوبه ويشد عليه بغبنة:انكعم ياعديم الحيا وقليل التربية
الجد نشمي:بـــس انتم الاثنين بس اتركه ياعادل اتركه
ابو غازي دفه بقوة
بتال تمدد عالارض من دفة ابوه ورجع يجلس وهو يناظر ابوه بتحدي وعناد
الجد نشمي طالع عادل:الولد ورزقه هناك مالك حق ترده عن رزقته
ابو غازي بحدة:معصي يمشي على هواه
الجد نشمي طالعه بنظرة حادة وهو ساكت
بتال طالع جده ينتظر رده وهو يبلع كلامه اللي وده ينطق به لابوه
ابو غازي:اذا سوا هالثور اللي براسه لاهو ولدي ولا اعرفه
الجد نشمي زفر ثم ناظره وهو يضغط على ركبته بيده مايبي يغلط على ولده قدام عياله وبحدته:عاد اسمع ياعادل كلمة ومااثنيها بتال بيداوم بالمنطقة اللي انحط بها
بتال ابتسم بفرحة وهو يسمع كلام جده وطالع ابوه بوسط ابتسامته
ابو غازي وهو يشوف ابتسامة بتال صرخ:يبه!!
الجد نشمي كمل بدون اهتمام لعصبية ابو غازي:وهو ولدك غصب عنك ثم اذا مارضيت الحين مردك ترضى بعدين لاانطحن اللي برأسك
ابو غازي بقهر:يبه!!
الجد نشمي:اوص ياعادل لااسمع كلمة علّمتك!!
ابو غازي بغبنته:بيتي مايطبّه!!
الجد نشمي:بيتي موجود
ابو غازي وهو يطالع ابوه:ماتشوفه عيني
الجد نشمي:غمّض عيونك واذا واجهته(قابلته)بطريق صدّ عنه
ابو غازي وقف:ايه يبه قوّ شوكته وكبّر راْسه لحد مايطيح
الجد نشمي قاطعه:ماكبرت راْسه ياعادل هو كبير وعقله معه يعرف يصرّف عمره
ابو غازي طالع بتال
بتال اللي متشقق من الوناسة زم شفايفه وهو يحاول يسيطر على فرحته ويخفي ابتسامته المفضوحة رغم محاولاته
ابو غازي طالعه بحقد اكثر وهو يشوف وناسته:مبسوط هاه!!
الجد نشمي شهق وبحدة:عادل!!!
ابو غازي ماطالع ابوه وعينه على بتال
بتال كشر بوجهه للحظة وهو يطالع ابوه ثم طالعه بنظرات كلها تحدي وهو ساكت
ابو غازي مد يده وهو يأشر على ابوه بسبابته اليمين بدون لايطالعه وبتهديد:لاتآخذك الحمّية(لها معاني كثيرة وهينا معناها انه له سند وظهر)ويغرك جدك يابتال طال الزمن او قصر مردّك لابوك
بتال كشر بوجهه
الجد نشمي توسعت عيونه وهو يسمعه:اعقب ياعادل تفاول علي!!
ابو غازي مشى بخطوات سريعة خارج من المجلس تاركهم وراه
فيصل وقف بيلحق ابوه ويخرج
الجد نشمي وقفه:اجلس يافيصل
فيصل جلس بدون لايرد
الجد نشمي طالع جواد اللي بنهاية المجلس:جواد
،،،الكل التفت يطالعه،،،
جواد قشعر جسمه من سمع جده واعتدل بجلسته بعد ماكان متكي:نعم
الجد نشمي قطب جبينه وبحدة:اقرب
.
بيت عادل
ابو غازي داخل معصب
البنات ينتظرون اخوانهم عند الباب
ابو غازي بتهديد وسط صراخه وهو يطالعهم:اللي تروح له او تساعده بشي وربي ان تشوف مني شي عمرها ماشافته،،طلع الدرج بخطوات سريعة من غبنته دخل لغرفة النوم وقفل الباب بكل قوته،،
ام غازي بوجهه تطالعه بتكشيرة
ابو غازي:خير!!
ام غازي ماردت عليه واتجهت لسريرها وتمددت وهي تعطي مكانه ظهرها
ابو غازي وهو يشوف زعلها نطق بعصبية:بالطقاق اللي يطقك انتي وعيالك!!،،رمى نفسه عالسرير بمكانه وهو يتغطى وصدره يغلي من الغبنة،،
.........****..........
يوم جديد
.........****..........
الـديــرة
بيت بادي
،،صباح مليان بريحة دخان الحطب اللي يحترق..ممزوج بريحة القهوة اللي تتطاير من الدلة اللي تغلي فوق الحطب..صوت تشويش الراديو اللي بيد الجد بادي مغطي المكان..ويخالطه صوت العصافير اللي تطير حولهم،،
،،الجد بادي وسعود وبخوت جالسين حول النار،،
الجد بادي مشغول بالراديو وكل انتباهه عليه
سعود يجهز الرطب(نوع من التمر)وهو متلثم بشماغه عن الدخان اللي بوجهه
بخوت جالسة بهدوء تتأمل هالصباح اللي كله خير وباذن الله يدوم هالخير والراحة
بادي طالع بخوت:بخوت ياوليدي
بخوت طالعته:سم ياعيني
بادي:اختش صلت؟
بخوت:خبري بها لابسة شرشف صلاتها عالسجادة
بادي:ثوعي(اجري)لها الظاهر السجادة غدت لها مرقد(مكان للنوم)
بخوت وهي بتقوم:أبشر ياجد
بادي حط يده ع ركبتها يجلسها
عباير تمشي بخطوات سريعة لجهتهم بابتسامة:ياصباح الخير والنويّر والطير اللي يوصوص(يغرد)بالخير،،وقفت عندهم عند النار وصار جدها قبالها،،
سعود فك لثمته وهو يبتسم:حيالله عباير حيالله نسيم الهبايب الزينة اللي تهب صبح بالخير وتهب بالمسى بأحلى من الخير
عباير:يسلمه ويبقيه ويسقيه من حوض نبيه
سعود:ويسلم عمرش وزولش(هيئتها او طولها)وإخطاش(خطواتها)ويبقي� � لعويناتن ترجيش وتشفّق(تشتاق)لشوفش
عباير وهي ترفع يديها:يالله عجّل بهالشوق اللي احتريه ابطى علي وانا احتريه(تقصد تتزوج)
سعود ضحك بخفة
عباير ابتسمت
بادي توسعت عيونه وسحب مركوعه وهو يحذفه عليها
عباير نطت وهي تضحك
بادي بعصبية:اعقبي مابش حيا!!سويدة وجه!!
عباير بضحكتها:ياجد ماني بسويدة وجه بس هالشوق ابطى بالحيل
بادي عصب وهو يرمي الراديو:بنت!!اشهد بالله مابش طب!!وربي لو اسمعش تعيدين هالسلوم اني لادفنش بوسط هالبيت وماوراش لا رجل ولا ولد يدعي لش!!
عباير بتكشيرة وهي تجلس:لااله الا الله صباح ياجدي صباح خلنا نتقهوى ونصبّح زين
سعود طالعها بابتسامة وهو يغمز لها:بيجي شوقش ولا جا بأزهمه(اناديه)ياشوق عباير حياك اقلط المشتاقة تحتريك(تنتظرك)من مبطي(زمان)
عباير وهي تخفي خجلها ورا تكشيرتها:امحق شوق كانه من عيال هالديرة والله ان يدفني جدي وانا راضية ولا اخذ واحدن منهم جعلهم بعاقور يمحيهم
بادي:استغفري ربش
عباير طالعته بتكشيرتها
بادي:فيه عوال(عيال)مالهم ذنب باللي صابنا
،،تغيرت الوجيه،،
بادي:ثم حنا ماحنا مقصرين بهم نصلي بهم شرق كان نوو(ناوين)يعملون بنا شي
سعود ضحك وهو يرفع الدلة من عن النار وهو يأخذ فناجيل بيده ويلف لجده يصب له قهوة:ماظنتي به احدن منهم ينوي شي عقب البارحة
بخوت عقدت حواجبه باستغراب
عباير ابتسمت وهي تشوف وجه جدها المروق وسعود المبسوط وبإحساس كله فخر:صب لي قهوة ياولد متعب يالعزوة الثمينة
بخوت قشعر جسمها وماارتاحت وهي تشوف اللي يصير
سعود:ابشري،،وهو يحط طرف اصبعه على انفه،،على هالخشم،،صب لها قهوة،،
بادي:ولد ياسعود
سعود التفت له:سم
بادي:عينت(حصلت)الرجل اللي واعدك البارح
سعود:لا ياجد لكنه اتصل وقال اليوم ان شاء الله يجي
بادي وهو يتقهوى:خير خير
بخوت:بتغدي يم مكة ياجد ولا هونت(بطّل او كنسل الموضوع)؟
بادي طالعها وهو ينزل فنجاله:اعوذ بالله لا مامن تهوين باْذن الله طالعن مكة مثل دايم
عباير:لاتنسى اللي موصيتك به
بخوت:ادع لنا ياجدي
بادي وهو يسمع كلامهم ويطالعهم:سبحان من خلق وفرق!!
سعود ضحك:سبحااانه
.
بيت عوض
طلق بثوب نوم وشماغ لافه على راْسه متجه للباب بيخرج
ام طلق من وراه:طلق
طلق التفت لامه ساكت
ام طلق بحدة:اترك القنق(عناد)اللي برأسك وقطيعتك لي وانت ببيتي ماله سنع
طلق زفر:سمي يمه تبين شي؟
ام طلق:ايه الليلة عوّد(ارجع)بدري
طلق عقد حواجبه:ليش؟
ام طلق:الليلة بنخطب شامة لك
طلق توسعت عيونه
ام طلق:أوحيتني؟
طلق:لا يمه مااوحيت ولاني معوّد للبيت الليلة،،لف بيخرج،،
ام طلق:لاتعوّد لكن سواتك بتجي بوجه عمك بسن الرجال ياطلق
طلق لف لامه بصدمة
ام طلق عطته ظهرها وهي تدخل لغرفتها وقفلت الباب بقوة
.........****..........
بتال خارج من بيت جده بجينز وتيشيرت اسود مرجع نظارته فوق راْسه وشنطة ظهر فيها كم لَبْس من راشد والشنطة بكبرها من راشد بعد مامنعه ابوه يدخل البيت وهالشي يعني ان كل شي بالبيت له ينساه وقف والتفت يطالع بيتهم بضيقة طالع مفتاح السيارة اللي بيده وهالسيارة مشتركة لشباب البيت وبعد الطرد ماله شراكة فيها ضاق صدره اكثر وهو يفكر وشلون بيروح لدوامه اللي بيبدأ بكرة ولايعرف شي عنه اخذ نفس واتجه لبيتهم وحط المفتاح تحت الدعاسة بالمكان اللي متعودين عليه هو واخوانه ولف يمشي بخطوات سريعة مبتعد عن بيتهم وهو يطالع الارض ويراجع نفسه يكنسل الموضوع بكبره ويرجع للبيت ويتعذر من ابوه نزل نظارته على عيونه وزاد بسرعة خطواته وهو يتناسى هالفكرة الغبية بعينه بعد كل اللي سواه عشان هالوظيفك ماحس الا بيد تمسكه والتفت بسرعة يطالع اللي مسكه
غازي:وين وين بتروح وانت ماسلمت؟!!
بتال طالعه بصدمة من وجوده ابتسم وهو يشوفهم:قلت نايم عند الباب بخيزرانته محد منكم يقدر يطّلع،،رفع نظارته وهو يطالعهم،،عسى ماصرتوا ضحايا بعد!!
جسّار واقف جنب غازي وشنطته بظهره:هو هددنا وتحلّف لكن ماعليه،،غمز له،،لأجل عين تكرم مدينة
بتال ضحك:والله ياهالعين بتبكيك دم
جسّار توتر:عادي مايهم
بتال ميل فمه بضحكة ثم طالع فيصل:وانت يالخواف
فيصل واقف جنب جسار بزعل:الى متى هالغلط احترموا هالشنب!!
بتال قرب منه وهو يحني راْسه ويضيق عيونه ويطالع فيصل:وينه الشنب يبي لي مجهر اشوف هالشعيرات اللي مستانس فيها
فيصل بزعل:بتالوه!!
جسّار عطاه ضربه ع قفى رقبته
فيصل تألم وتكلم من بين اسنانه:ارحموني!!
بتال ضربه ع قفى رقبته وهو يغني:ياقليبي ماراح ترتاح..لا اليوم ولا بعد اليوم،،غنى بموال،،لااااا اليوووووم ولاااا بعد اليوووووم
فيصل رفع يديه يدعي ومن قلبه:الله
بتال بحدة:انتبه!!
فيصل غيّر الدعوة:الله يطول بعمرها
بتال ابتسم وهو يقرص خده:ايه خلك لطيف ظريف لذيذ طعّوم
غازي تقدم خطوته ومسك يد بتال اللي ماسك فيها فيصل وسحبه لعنده وحط بيد بتال غرض
بتال عقد حواجبه ثم فتح يديه يشوف وش اللي حطه غازي توسعت عيونه وهو يشوف مفتاح سيارة غازي ورجع يمسك يد غازي وهو يحلف:والله وبالله
غازي سحب يده ورجعّها ورا ظهره وهو يرجع خطوة لورا ويقاطعه:والله لو تحلف من هينا لبكرة ماركبت هالسيارة وانا ادري بحاجتك لها وانا اخوك
بتال مسك يده ويحاول يرجع له مفتاحه:استغفر الله يارجل!!لاتحلف بس!!
غازي:حلفت وانتهى والله لأشلّحها(يفككها ويبيعها)قطعة قطعة وارمي فلوسها ولااحد منها ريال اذا تركتها
فيصل بابتسامة:انا اخذها عنكم لاتحلفون على بعض
جسّار ضربه ع قفاه:مو وقتك يالسخيف!!
بتال حط المفتاح بيد غازي وضغط عليه وهو ماسك يد غازي ماتركها وبجدية:ياولد لو ادري ان عندك سيارة غيرها والله لأخذها ماني بمقصّر على عمري وانا محتاج
غازي:بتال كان بقلبك ذرة محبة لي وخاطر عندك ماتردني
بتال:غازي يشهد الله
غازي قاطعه وهو يضغط على يده:تكفى وانا اخوك لاتردني
بتال زفر وهو يشوف اصرار غازي ورضى بالواقع:الشكوى لله لكن اول ماامسك الراتب وعد ماترجع هالسيارة لكن مكانها سيارة جديدة لك واللي بخاطرك انت تختارها على كيفك
غازي:يصير خير الحين خذ ذي وبعدين نتفاهم
جسّار لصق بغازي وهو يحط يده ع كتف غازي حتى يكون بنفس مستواه ويشوفه بتال:وأنا؟!!
بتال كشّر وهو يطالعه:وش فيك؟
جسّار:مالي شي؟
بتال اخذ نفس وهو يكتم سبّة بخاطره ماوده يغلط وهو بيمشي
جسّار ابتسم
بتال انتبه للشنطة عقد حواجبه:سلامات!!على وين؟
جسّار ترك غازي وحاوط بتال من وسطه وهو يرفعه وينزله:ابي امشي معك رفقاء الدم رفقاء الحياة
بتال دفه وبتكشيرة:تخسي!!فرقاك عـيـد
جسّار حط يده ع قلبه وغمض عيونه:ااااه
بتال قاطعه:جعل مشاعيرك ماتطيب فكني أبي أتنفس لاحقني بكل مكان!!شوية دم ياأخي!!استح على وجهك!!
جسّار كشّر بوجهه نزل الشنطة ورماها ع بتال
بتال مسكها وطالعه
جسّار بزعل:يالقاسي يامتوحش لَبْس الدوام ولو انه منتهي بس تصرف عمرك مالت عليك ماانت بوجه فزعة!!
بتال ابتسم:اسف يامشاعير جُسْجُس
جسّار توسعت عيونه وبخوف منه:يمه بِسْم الله وش فيك؟!!
بتال طنشه وطالع فيصل ينتظر
فيصل:لك كامل الود والاحترام وصادق الدعوات
بتال ابتسم وعينه عاللي خارجين من بيتهم متجهين بخطوات سريعة لمكانهم اللي واقفين فيه:عادي اصلا ماانتظرت شي من وراك
فيصل كشّر وهو يتكتف
بتال تحرك واتجه لهم ووقف قدام امه وسلم على راسها ويدها:ياعين بتال وروحه
ام غازي وهي تضمه:ياروحي عليك رايح خلاص
بتال وهو يضمها:استودعتك الله،،تركها وهو يمسك يدها ويسلم عليها،،
ام غازي ماسكة يده ونزلت اسورتها الذهب وحطتها بيده
بتال انفجع وهو يسحب يده ويرجع خطوة لورا:اعوذ بالله والله مااخذت منك شي انا اعطيك مااخذ منك!!
ام غازي تقدمت خطوة ومسكته وحطت الإسورة بيده وهي تحلف:عليك وجه الله وبالله يابتال
بتال بزعل واضح على وجهه:لاتحلفين يمه والله مااخذها
أم غازي مسكت يده وحطتها بالقوة وهي تحلف عليه:والله ان تاخذها لولا ان المنحوس مااخذ بطايقنا حقت الصراف اني لأعطيك البطاقة كلها لكن الشكوى لله من هالمرجوج
بتال باس على يد امه وبترجي:تكفين يمه اعفيني منها
ام غازي:لا والله مامن عفو والله ان تاخذها ولا تروح وانا ماني براضية عنك
بتال زفر وهو ماسك يد امه وماتركها وبطابعها بترجي:يمه!!
ام غازي سحبت يدها وبحدة:لاتحاول
بتال طالع الذهب بيده بكسرة خاطر يكفيه هالشعور الحلو مو لازم الكلايف بعينه رفع عينه والتقت عيونه بأمجاد
امجاد بيدها صحن اكل تقدمت بتردد
بتال سحبها من يدها وباس راسها:السموحة وانا اخوك اخطيت عليك ولا اخذت حقك
امجاد رفعت نفسها وهي تنزل راْسه لها وتبوسه وبرجفة صوتها:سامحني يابتال ماقصدت شي من اللي سويته كله خوف عليكم
بتال ضمها له وبابتسامة:انتبهي لنفسك ولاتسكتين عن حقك ياامجاد،،تركها وهو يعتدل ثم ابتسم وهو يطالع رهايف،،جت جت جت ام لسان ياكافي
رهايف بيدها سماعات جوالها رمتها عليه وهي تتكتف:ووجعوه يالقروي
بتال مسك السماعات قبل تطيح
رهايف:هاذي لك عشان تسمع حبيبة قلبك اللي غاثنا فيها ولاتزعج الخليقة ثم يدعون علي
بتال:وانتي وش عليك
رهايف:اختك!!ومليون بالمية دامهم يدعون يدعون عالكل!!
بتال كشّر بوجهه:أقص لسانه
رهايف زفرت:اترك الخبال عنك
بتال توسعت عيونه:وشو؟!!
رهايف تخبت ورا امها:لاتدور مشاكل هناك خلك بنفسك فاهم
بتال:ناوية على عمرك انتي!!
غازي:يالله بتال عجّل لا يروح عليك النهار وراك طريق
بتال سلم عليهم وطالع امه واخوانه وهو يسمع توصياتهم المتفاوتة مابين(انتبه على نفسك،،لاتاكل شي غريب،،اقفل الباب زين،،لاتتعرف على جثث نفسك،،اقفل السيارة زين،،انتبه لاغراضك ومكان نومك،،انتبه للطريق،،زفر وهو يحط يده ع كتف امه ويضمها:ان شاء الله ان شاء الله،،مرر نظره على اخوانه،،عاد تصدقون يقولون في المنطقة اللي تعينت فيها بقر وبل(ابل)وغنم وحمير ودجاج عاد هينا ارتحت انا
،،الكل استغرب وهو يطالعه،،
بتال:قلت بخاطري الحمدلله وين ماالتفت بأشوف أشباهكم،،ضحك وهو يتخبى ورا امه ويشوف الغبنة بعيونهم،،بوجه امي انا بوجه امي
ام غازي وقفت قدّامه وهي تطردهم:بوجهي محد يلمسه ثم هو ماكذب
بتال انفجر يضحك
غازي بزعل:يمه!!!
ام غازي:اللي يلمسه لايكلمني اسبوع ولا يدور علي لااشوفه
رهايف:يمه هالتبن
ام غازي ضربتها ع يدها بقوة:يالوسخة!!
بتال مد لسانه لها وهو يرفع وينزل حواجبه من ورا امه
رهايف وهي تمسح مكان الضربة وبقهر:يمه هاللي وراك غلط علينا كلنا لكن احنا ممنوع نغلط عليه!!مايصير!!!
ابو غازي وقف عالباب وبصوت عالي كله عصبية:ماشاء الله!!ماشاء الله!!!
،،،الكل التفت يطالعه،،،
ابو غازي بحدة وصراخ:وش قايل انا؟!!ولا مالي كلمة بهالبيت!!
بتال سلم على راس امه وهمس لها:استودعتكم الله،،عطاهم ظهره ومشى مبتعد،،
،،اخوانه يطالعونه بقهر ماسلموا عليه،،
ابو غازي بصراخ على عياله:وووجع علامكم واقفين تطالعونه!!تبوني اسوي فيكم مثله!!ادخلوا لأبارك الله فيه ولافيكم!!
بتال وقف ثم التفت لهم وطالع ابوه وبابتسامة وبصوت عالي:استودعتك الله ياابو غازي اشوفك ان شاء الله بصحة وعافية عسى ربي يديمها عليك،،لف وكمل طريقه،،
ابو غازي بغبنة:اذلف الله لايردك من ولد اذلف!!
بتال اسرع بخطواته مبتعد وهو يشد ع قبضته
.
.
.
استغفر الله العظيم من كل ذنب عظيم وأتوب اليه💜💜
.
.
.
.
أميرالز likes this.
لامارا غير متواجد حالياً رد مع اقتباس