🌿......وأكثر ما يجذبني فيييك، هو وقوفك بجانبي، والدفاع عني، حتى وإن أخطأت ستدافع بشراسة عن خطئي...!! لأنك تعلم مدى عفويتي، وعبثي المستمر في الحياة دوُن تفكير، أو هدف في الوقوع في الأخطاء المستمرة، إنني فقط طفلة، طفلة في جسد ناضج، وعقل لم ينضج، طفلة وجدت فيك الحضن الدافئ و تذوقت منك طعم العائلة، العائلة التي فقدتها من زمان، وطفلة واقعة بشدة في حبك...! لا بل أصبحت مهووسة بك.....فأنا لحد الآن لا أدري كيف علقتني بك ,وكيف أحببتك ,ومتى حدث ذلك ,فقط أذكر أني , كنت أنتظرك🌸 في أحد الأحياء الشعبية لمدينة سلا، وبالضبط حي الإنبعاث واقفة بنت فمقتبل العمر قدام حانوت كتسنا فنوبتها، ****** : المعطي زوج خبزاات و زوج فرماجات كيف ديما.... المعطي : هاكي ****** : "خداتهم من عندو وبقااات واقفة كتسنا يمد ليها الصرف حتى نطقات" المعطي راه عطيتك 5 دراهم زعما "شافت فيه مصغرة عينيها" مناويش ترجع ليا الصرف ولا كفاش..... المعطي : "زفر بغيض ومد ليها درهم" ياربي السلامة حتى درهم متسمحي فيها تقولي غتديك لخاريج.... ****** : وباااااز ليك راه لعشية عاوتاني غترجع ليك مالكم على هاد الحسد كامل...يييييخ على شعب كيداير خرجااااااات من عندو طالعة ليها القردة....خاصة يلاه فايقة وباقي معندها خاطر...ديما مدابزين على درهم ديال الصرف....من طبعها قاصحة مكتسمحش فحقها واخا تكون على حافة الموت...ترجع حقها ولي بغا يوقع يوقع....دفعات الباب برجليها ودخلات غادا طالعة فدروج لقاتها حاطا براد ديال أتاي وطبسيلة صغيرة فيها شويا ديال زيت لعود...حطات داكشي لي جابت فوق الطبلة وتوجهات لحمام تغسل وجهها تفيق شويا....بلا متنطق بحتى كلمة غسلات وجهها وحكات سنانها عاد حلات باب ديال الحمام متوجهة لمراح تفطر.... ****** : دابزتي عاوتاني مع المعطي على قبل درهم يااااك ****** : أسيل....أربي لا ما قلبي عليا ، ختك حاليا طالعة ليها القردة كتقلب غا فمن تبرد..... أسيل : ومالي أنا أش قلت ليك....نتي لي عزيز عليك الصداع ديما مدابزا ليا مع ولاد الدرب....وبسيف ونتي لا قراية لا خدمة وكون غا بعدا قلنا كبرتي ونتي باقي كاع مكملتي حتى 17 لعام... ****** : "بقااات حتى سرطات الدغمة لي كانت ففمها عاد نطقات" نفس الكاسيطا ديما كتعاوديها....حتى وليت حافظاها لي سمعك يقول عندك الدكتوراه ونتي حتى الكاطريام ما كملتيه انا باقي حسن منك....ملييييت من هاد الهدرة...واش تصحاب ليك أنا راضية بهاد العيشة ديال الذل لا حياة زوينة....لا مستقبل زوين....كلشي مكفس ليا عيييييت والله حتى عييييت واش كتشوفوني ضاربة الدنيا بركلة ممسوقاش تصحاب ليكم صافي هاذي كاع مكاينا فهاد العالم، أسيل : "شافت فيها بأسى" أجي لعندي "قربااات منها وعنقاتها كتواسي فيها" سدن حبيبة ديالي أنا فاهماك لي داز علينا ماشي ساهل ولكن ما عندنا مندييرو راني باغيا ليك غير الخير إذن نصبرو حتى يدير لينا الله شي تاويل دلخير وزايدون أنا مقلت ليك والو لي يخليك تعصبي لهاد الدرجة سدن : قولي يدير ليا الله شي تاويل دلخير أنا....أما نتي من بعد سيمانة أتكوني فدار راجلك...."زيرات عليها بقوة ونطقاات بصوت مخنوق" معرفتش كفاش غادي نقدر نصبر على فراقك نتي راك ماشي غير ختي نتي فيك كلشي أسيل : حبيبة ديالي ...واش أنا كرهت نديك معايا وتسكني نتي كاع معايا..."نطقااات بخيبة أمل" ولكن راكي عارفة الوضع كيداير خاصة انسكنو مع مو بزز باش قبلاتني أنا عروسة ليها بقا غير نتي سدن : لا أختي الله ينجيني من ديك الشارفة ديال عكوزتك ما تشوفي الضحكة فوجهها ياربي السلامة تقول كتصرف على المغرب كامل.... 🍂 معنى إسم سدن 🍂 سدن هو الغطاء الذي يتم وضعه على الكعبة ويعني أيضا الحاجب أي حجب الشيء، لذا فإسم "سدن" يعني الستر❤ أسيل : نوضي يلاه نجمعو هادشي راه خاصني نخرج نتقدا شي حوايج لعرس قبل متدخل علينا الطاهرة كي لعجاجة سدن : صبحنا على الله ياختي كنقول ليك ديك السمية متجبديهاش قدامي، أجي بعدا واحد سؤال ديما محيرني معرفت شكون سماها الطاهرة....إسم على غير مسمى أختي...الشيطان أصاحبتي كيرفع ليها القبعة ويقول لولادو تعلمو منها.... أسيل : "ضحكات بأنوثة حتى بانو سنيناتها البيضين المستفين" ضحكتيني واخا ما فيا مايضحك...ونوضي خلاص قبل متجي لينا عاوتاني راكي عارفاها فهاد لوقيتة كفاش كتكون "قبل متكمل كلامها قاطعها صوت ديال إمرأة" الطاهرة : أدووك الزووجات على من كدويو عاود..."شافت فسدن" نتي كاين شي فطوور ولا كيف ديما جمعتي الطبلة سدن : "شافت فيها بلا مبالاة" لي بغا لفطور ينوض يوجدو...ياكما تصحاب ليك راسك خدامة عندك الطاهرة : تبارك الله طوال ليك اللسان أسيل : "كتغمز لسدن تسكت خاصة هي والطاهرة دايرين كي المش والفار مكيتفاهمووش وحدة قصاح من لخرى " صافي اسدن اجي معايا "شافت فالطاهرة" أتاي راه كاين فالبراد والخبز دابا نصيفط شي بعلوك من الدرب يجيبو ليك سدن : "شافت فختها وهي مصدومة" أشناهوا نصيفطو ليها دري يجيب ليها الخبز ومالها هي دايرا ليهم الحنا ومفخباريش أسيل: "قبل ما تبدا الطاهرة عاود كانت جرات سدن لكوزينة" واش نتي حماقيتي ولا كفاااااش.....كنقوووول ليك ديما بعدي من طريقها البلاصة لي تكون فيها هي خويها سدن : راك نتي لي حماقيتي....ديري فبالك أ أسيل بلي أنا ماشي بحالك مستحيل نسكت ليها....مالها شكون تكون بالسلامة نتي لي كتسكتي ليها راها دارتك جفااف تحت رجليها....قولي ليها توصلني أنا إلا ما لحتها من داك الشرجم راه منتسماش سدن بنت العربي أسيل : "ما بقااات عرفااات ماتقول هدرة ختها كلها صحيحة...هي شخصيتها ضعيفة ماشي بحال سدن جوابها على طرف لسانها...ولكن شنو بإمكانها دير مكان عندها تا شي حل من غير تلبي ليها أوامرها على قبل ختها تحملاااات بزاااف ديال الصعاب وبزاااف ديال الهدرة لي كانت بحال السم غير باش تكبرها" صافي عرفنااااك قاصحة ومكتحمليش لي ينزل من قيمتك "شافت فيها بترجي" لكن عفااااك اسدن خلي هاد السيمانة دوز على خير بهاكا غنبقا ديما مشوشة عليك سدن : وصافي كنواعدك نحاول نتجنبها هاد السيمانة لكن تعطيني بالتساع هي .. ومتخافيش عليا ختك راه تجيبها من فم السبع حد ما يقد عليها أسيل : إوا هاكا نبغيك يلاه سيري لبسي عليك شي حاجة غنخرجو أنا وياك نتقداو داكشي لي خاصني راكي عارفة لا ما تقديتوش أنا مكاين لي يتقداه ليا سدن : صافي واخا أصلا غنلوح غير شي كاب خفيف راكي عارفة معنديش مع داك الزواق أسيل : "شافت فيها أسيل بمعنى واش من نيتك" نوضي تكعدي لبسي شي حاجة مقادة بحالك بحال الناس كالاك تلبسي ليا شرويطة ديال الدار نوضي ممنوع الرفض واقفة فلحي كتسنا فختها تنزل لابسة سروال جينز معاه بودي فلبيض دارت عليه تجاكيط دلكوير من لفوق، شعرها الأشقر الطويل خلاتو مطلوق ومادايرا تا شي حاجة لوجهها أصلا بشرتها بيضة بحال الثلج يعني متحتاجش تلطخ لوجهها حنيكاتها مطبزين شفايف ورديين منفوخين شويا وأكثر حاجة كتميزها على ختها وباقي البنات هي عينيها لي كانو فلون الأخضر ما هو فاتح ما هو غامق مايل شويا للزرق، عينيها تغير منهم السماء والبحر ليهم راكع كيفتنو لواحد الدرجة كبيرة مكاينش لي شافها ومعجباتوش والخالة لي كاينا جنب فمها كتلفت الإنتباه ، إضافة إلى مفاتنها منحوتين بطريقة زوينة عندها الهضاب والتضاريس فأماكنهم الحد القد متعطيهاش عمر 17 عام، عنيدة لأقصى درجة ولسانها مبري منها داكشي لي معطاهاش ربي فطول زادو ليها فلسان، راسها قاصح كثر من لحجر....شافت حتى عيااات هي نيت تبدا تعيط عليها سدن : و أسييل طلقينا أصاحبتي نص ساعة ونا كنتسناك، راك غادا غير للسوق مغاداش ضوري أسيل : "طلات عليها من الشرجم كتقاد فشعرها" وسكتي الله ينعل حسك شوهينا نتي وتهناي...هاني نازلة دابا نزلات أسيل لابسة سروال كحل وتيشورت نص كم لايحة على كتافها تجاكيط تا هي دلكوير ، شعرها جمعاتو وخلات زوج زغيبات نازلين فلقدام شافت فسدن ونطقات أسيل : مال مك كتغوطي واش حنا دائما لا بغينا نمشيو لشي بلاصة خاص الناس كلهم يعرفو سدن : ومالي أنا أش درت ليك راك نتي لي تعطلتي وزايدون عارفاني مكنحملش نتسنا فشي حد أسيل : باااااز ليك بغيت نعرف غير شكون غيقدر يصبر لفشوشك وهبالك سدن : عطاهم الله أحبيبة كيتسناااو غير كلمة مني أسيل : زيدي تحركي الله يهديك وصافي بقااااو ماشيين حتى خرجو من الحي ديالهم غاديين غير برجليهم بحكم السوق قرييب ربع ساعة ديال الطريق وها هما وصلو...حتى وقفات عليهم واحد طوموبيل خرج منها شاب يكون فعمر الثلاثين تقريبا ملامحو حرشين، عينيه لي كانو فلبني الفاتح وبشرتو لي كانت سمرة شعرو فلون الأسود رطب ، لابس سروال جينز وتيشورت نص كم فلبيض...حيد نظاظر على عينيه وشاف فيها مبتاسم ****** : "باسها فخدها" حبيبة فين غادا فهاد الوقت أسيل : "بآبتسامة" والو أحبببي غير خاصيني شي حوايج على قبل العرس وخرجنا نجيبهم أنا وسدن، ونتا فين غادي حيث هاد الوقيتة كتكون خدام؟؟ ****** : "شاف فسدن ومد ليها يديه" سدن لاباس عليك سدن : بيخير أخويا جواد ونتا اش كتعاود جواد : الحمد الله على كل حال "موجه هدرتو لأسيل" ليوما مكانتش الخدمة بزااف فلمكازة وقلت نجي نشوفك ولحسن حظي تلاقيت بيك هنا "شاف فسدن" منها نيت نمشيو لسوق بزوجنا سدن : "شافت فيهم بزوج" بلا دوك الألغااز قولو غا بغيتو نخليكم بوحدكم وتهناو جواد : ههههههه لا والله حتى كتفهمي هاكا باش كتعجبيني أسيل : سمحيليا بزااف أحبيبتي غير عذبتك معايا تال هنا صافي غير رجعي لدار جواد دابا معايا غنمشيو بزووج وغيجيبني ملي نرجع جواد : اه وبلا متسنايها لغدا حيث غنتغذاو أنا وياها راس فراس سدن : "شافت فختها كتحلف عليها بعينيها بتاسمات بزز ونطقاات" لا ماشي مشكل غير سيرو قضيو شغالكم وتغذاو على خاطركم أنا غنرجع لدار نيت مافيا مايخرج معاك يادلي أسيل : "شافت فسدن عرفاات بلي خسراتها معاها حيث أعدى حاجة عندها (عند سدن) هي تخوي بيها ولا تخليها فنص الطريق وخاصة أنها خرجات معاها بزز" صافي أحبيبتي مشات أسيل ركبات مع جواد فطوموبيل، فحين سدن رجعات فحالها وهي معصبة كدوي غير بوحدها، وصلات لدارهم جبدات سوارت حلات الباب لقاتها كالسة مسرحة رجليها كتصبغ فيهم وكطرطق فلمسكة بحال شي شيخة...دازت عليها بلا ما دوي معاها توجهات لبيتها بدلات عليها وتلاحت تكمل نعاسها، ضرباتها الفيقة مع 2 ناضت غسلات وجهها وتوجهات لكوزينة سلقات غير البيض وتغذات بيه جمعات الماعن خشاتهم فلافابو وتوجهات لبيتهم عاود يلاه دارت يديها على بواني ديال الباب تحلو حتى سمعاتها كتهدر معاها سدن : "عاقدة حواجبها" معايا؟؟؟ الطاهرة : لا مع غانا...وشكون من غيرنا كاين فهاد الدار سدن : طلقيني أش بغيتي الطاهرة : سمعت بلي العرس سيمانة جاية ولا كذبت سدن : أه ومن بعد "بسخرية" زعما كيهمك الأمر الطاهرة : حياتكم هاديك ديرو لي عجبكم غير هو أنا راه ميمكنش ليا ندير ليكم خاطركم بلا مقابل سدن : شنو كتقصدي الطاهرة : كنقصد بلي بما أنكم غاديرو العرس هنا وطلبتوني نبقا فدار، خاصكم تخلصو ليا نهاري سدن : كفااااااااااش الطاهرة : كيفما كتسمعي المهم عندي أنا نهاري ميمشيش غير هكاك سدن : "سكتات شحال عاد شافت فيها وبسخرية نطقات" دخلت عليك بالله واش نتي أم؟؟؟؟؟ الطاهرة : "بعدم فهم" كفاش سدن : نتي أم نتي؟؟؟ واش هاكا كيكونو الأمهات هاكا كيتعاملو مع بناتهم علاش وليتي هاكا علاااااش كتعاملينا بهاد الطريقة شنو ذنبنا حنايا إلا زوجوك لبابا بزز منك شنو ذنبنا نخلصو ثمن أخطائكم فلماضي؟؟؟ بسبابك أنا وليت هاكا، بسبابك أنا دابا كالسة فدار، بسبابك خرجت من المدرسة لي كنت كنحماق باش نمشي ليها، واش عرفتي علاااش، حيث كلشي عارفك شنو ساوية كلشي عارفك بلي كتفسدي، وقتما ندوووز من حدا شي رباعة مكيخليو باش ينعتوني كرهوني فراسي كرهوني فشي حاجة سميتها القراية حتى من دريااات لي كان عند بالي صحاباتي وغيوقفو معايا لقيتهم من مورايا كيدويو فيا "كتحاول تحبس دموعها" قالو عليا بنت عاهرة، قالو عليا بلي حتى أنا غنطلع كنشبه ليك، قالو عليا بلي من نهار مات بابا خرجت للطريق وأنا مادرت بيديا ولا رجليا، شنو ذنبي باش يوقع ليا هادشي كاااامل، شنو درت ليكم باش تعقدوني وأنا باقي ماوصلت حتى 18 عام، شنو ذنبي باش متكونش عندي تانا أم لي تعنقني وتنصحني وتقول ليا نتي أبنتي فمرحلة المراهقة خاصكي تفاداي هادي وديري هادي، شنو ذنبي باش نكبر بزز مني، عمرك جيتي عندي قلتي ليا مالكي أبنتي حتى قبل مايموت بابا واش عمرك عيطي عليا بكلمة بنتي واش عمرك تعاملتي معايا بحالك بحال كاع الأمهات، من صغري عمرك حنيتي فيا، ختي هي لي رباتني وكبراتني ختي هي لي سهراات الليالي وتحملات الغوات ديالي ملي كنت صغيرة، ختي لي خرجات تخدم فديور الناس وهي فعمرها 15 عام، ختي هي ماما حيث الأم ماشي هي لي كتولد وإنما هي لي كتربي........ونتي حاشا واش تكوني أم، اه الأمومة شي حاجة بزاااف عليك حيث ماشي هي تولديني صافي، الأمومة هي تكوني بحال صاحبتي نهار نبغي ندير شي حاجة تكوني نتي أول وحدة نلجأ ليها ونعاود ليها، الأمومة هي نهار يعجبني شي واحد نجي عندك نتي لولة ونقولها ليك بلا ما ما نخاف منك ونتي تنصحيني وتقولي ليا شنو غندير، الأمومة هي تحسي بيا بلا مندوي تقربي مني وتكبريني على أساس أنا صاحبتك و عمرني نخاف منك، الأمومة هي توقفي معايا فلمواقف لي أنا فأمس الحاجة ليك، الأمومة هي ملي نكون صغيرة تلعبي معايا وتعلميني كفاش نتمشى، وففترة المراهقة تنصحيني وتقولي ليا بلي المراهقة أصعب مرحلة فحياة البنت وأنا غنكون معاك حتى تجاوزيها أبنتي، وففترة العشرينيات تقولي ليا عتامدي على راسك خرجي وسافري وآكتاشفي حوايج جداد لكن بحدود، الأمومة هي نهار يجي شي حد يطلبني للزواج تكوني نتي معايا وتكوني مولات الري والشوار وتشدي بيدي وتعطيني ليه وتقولي ليه بلي هادي بنتي نور عيني نبغيك تحافظ ليا عليها ماشي نتي نهار جا جواد باش يطلب أسيل خويتي الدار وعطيتينا بالظهر وخليتي الجيران هما لي يتكلفو بخطبة بنتك....إنا نوع دالأمهات نتي؟؟ عند بالك غادا فطريق صحيح، عند بالك حنا ولا بابا لي كتعاقبي، لا راك غالطة بزااف،بابا راه مات وشبع موتة 11 سنة هادي وهو تحت الأرض وختي أسيل مبقا لها والو وتزوج وتبدا حياة جديدة وأنا أصلا كاع ممسوقا ليك ولا لغيرك شي نهار غيعفيني الله من هاد الجحيم ، ونتي كتعاقبي غير راسك راك غادا لواد برجليك والحاجة الوحيدة لي نقدر نقوليك هي *إن الله يمهل ولا يهمل* وكوني متأكدة طول ما أنا على قيد الحياة عمرني نسمح ليك، مغاديش نسمح ليك لا على طفولتي لي غصبتيها ولا على قرايتي لي كنتي السبب حتى خرجت منها......خرجات قبل ما تسمع جوابها معرفاتش فين تمشي، الحاجة الوحيدة لي عارفة فهاد اللحظة هي تبعد من كلشي بغااات ترتاح عيااات صابرة عيااات متبين راسها قوية وبلي حتى حاجة متقدر تهزمها ولكن كتجي واحد اللحظة لي كلشي كيتجمع عليك لدرجة كتمنى الموت ومتلقاهاش..وهادشي بالظبط لي وقع دابا مع سدن كلشي كيشوفها بنت قوية وقاصحة وعنيدة ومعرفوش بلي غير كتصطانع القوة باش تقدر تعيش وباش تقدر تنسى لي دازت منو وباقي كدوز...ماشي ساهلة أبدا بنت ف 17 عام تحرم من أبسط حقوقها نتيجة غلطة العائلة فالماضي.
