تزوجت انا وراجلي عن حب وصحبة ديال خمس سنين .... كنحماق عليه وكيحماق عليا ، قررنا منودلوش حتى نعيشو حياتنا مزيان بطولها وعرضها .. انا كاتبة مع واحد المحامي كبير ومعروف وراجلي عندو اعمال حرة ودرس التسيير وادارة الاعمال .. دار مقاولة هوا وشي واحد صاحبو على عينين الناس وفتح وزين فالنوار ديال الحوايج والجملة بلا وراق بلا خبار الدولة . المهم كان اللي غيفهم طبيعة العمل ... تيسرات الامور الحمد لله وكيخدم مزيان ومطور .. قدر فخمس سنين يفتح جوج مكازات كبار ديال العصري ديال البنات فيهم 3 ديال ليطاج .. لاكاف فيه السطوك و الفوقي ديال الحوايج ... وبنا دار كبيرة فموقع زوين فيها 3 ديال الطبقات فرشتهم على دوقي وبشهوتي وخدا طموبيل كبيرة وساوية وسرا ليا وحدة صغيرة كنمشي بيها لخدمة؛ عيا فيا نخدم معاه ونقابل ليه شي واحد فيهم مابغيتش حيت مرتاحة فخدمتي وعندي المعارف وكولشي كيعرفني فميدان القانون وكنفضل نخدم بالورقة وستيلو على نبقا مقابلة البنات وندير فالخاطر لمن لوالا ونصدع راسي ومجهودي وطاقتي بمشيو غير فديك الضحكة الصفرا مع الكليان وحريق الراس . وحتى المشاكل مابغيتهمش معاه قلت احسن ليا هاكا . المهم كنت خدامة وبيخير وهوا كيثابر ويخدم هنا ولهيه بلا مير كريديات وعندو الريزو ديالو كبير كيفرقو السلعة من الوزين بالجملة على المحلات وغادي مزيان حتى لواحد النهار خرجت من الخدمة عيط ليا قالي نتغداو بجوج قلت ليه واخا فينك قالي فالمكازا راه الدروج وقع فيهم مشكل جبت المعمل يعاودهم وقرب يسالي اجي عندي ونخرجو نتغداو . قلت ليه واخا ومشيت لقيت فيها الولد اللي مقابل تما والبنات اللي كيبيعو كيحتارموني كيعطو ليا مدام صفاء . المهم سلمت عليه ومفتاخرة براسي مرت السي فلان وكنغير عليه من نسمة الهواء مع هوا تبارك الله عاطي للعين وكيتهلا فراسو وزوين .. كنضل تابعاه وكنتعصب فاش كيخرج مفركس ومقاد كيطرطق ليا مرارتي بالغدادي كنوضها انا وياه ديما وشي مرات كيزيد ويخليني .. المهم ميكت واخا ريحتو تعطعط خليتو مع المعلم مشغول وجلست درت رجل على رجل كنشوف فالناس اللي داخلين خارجين حتى لواحد اللحضة دخلات واحد البنت ...انا اللي مرا طاح فمي فاش شفتها وتصدمت حيت ديك البنت عمرني فحياتي شفت بحالها ... فيها واحد القبول عجيب وكتجدب وشديدة الجمال وكتبان بعقلها .. كانت لابسة الابيض ولا مانعرف اشنو داكشي لابسة بحال شي عباية ولا فوقية ومحلولة من القدام ولايحة على راسها شال باج مرخوف وشعرها من لداخل كيبان زعر وشوفاتها فالمحل بحال الى موالفة تجي ليه ولا منعرف ليها المهم مللي دخت فيها ودوخاتني خفت على راجلي حيت انا اللي مرة وبقيت حالة فمي مابالك هوا اللي راجل . جريتو من يدو قلت ليه اجي نقول ليك قالي مشغول مع المعلم دابا تسناي وانا نجرو بزز قلت ليه والله تاتجي وجريتو بسيف عليه طلعنا لفوق وبقيت كنطل جهة الزاج كنشوف لتحت وكنخاق ليه فالقصص شوية قلت ليه ماعرفت مالي جاتني الدوخة .. كان غيهبط يجيب الماء قلت ليه صافي فاتني غير جلست وبقيت ندخل ونخرج ليه فالهضرة ونشوف لتحت كنتسنى ديك خيتي تخرج وهي كدور بين الحوايج بشوية عليها .. ضرت عندو كنهضر معاه ونألغ ليه قصص باش مايهبطش ورجعت شفت لتحت بانت ليايك خيتي طارت مابقاتتش كتبان .. قلت صافي راه خرجات مشات بحال احسن هنية وراحة .. انا جيت ندور ونرد النفس تا شفتها قدامي طلعات مع الدروج وشافت فينا وحتى راجلي دور وجهه شاف فيها وهي كدور حدانا وتشوف الحوايج .. بقا غير كيشوف وانا دمي بدا يغلي ماشعرتش براسي حتى حتى دفعتو من كتفو قلت ليه نمشي نجيب ليك نمرتها !!!! ... لالا نمشي نجيبها ليك احسن
