كان يا مكان فقديم الزمان فبلاد من البلدان معروفة بالامن والامان وبنزاهة وعدل حاكمها سيدي يعقوب السلطان فقصر كبيير ماتحدو العين ضاير بيه صور طويل فبيت من بيوت القصر كانت جالسة قدام مراياتها بعد ما تعدلات وتزينات شافت فوصيفتها لي كتمشط ليها سالفها وقالت ـ كي جيت أمغنية تبسمات ليها مغنية وقالت بمجاملة ـ تبارك الله ألالة كمرة مضوية وسط سما مغيمة الزين و الشعر الطويل والعين وعاد القلب لحنين و التربية و الدين سعدات لي فاز بيك نقرة صافية كاملة مكمولة الزين والعقل والأصل الله يحجبك من العين قهقهات الأخرى بدلع وقالت ـ هادشي عارفاه أمغنية ولايني الزهر ماكاينش حطات مغنية المشط من يدها وقالت ـ يهديك الله ألالة شكون بحالك تولدتي أميرة وبنت السلطان لي بغيتيها تحضر لعندك وخا يقطعو عليها البحور والوديان كلمتك مسموعة فالبلدان تبسمات بسخرية وقالت ـ هاني عندي الأصل والمال ولايني فين راحت البال كل نهار كنفيق وأنا خايفة نلقا راسى وحدي ويضورو بيا العديان الحرب فالبلاد قايمة وكل نهار قلبي كيبغي يسكت إلى تقطعات خبار مولاي السلطان قالت مغنية وهي كتحاول تطمانها ـ لاواه ألالة رآه ماشي غير نتي البلاد كلها عايشة فنفس الحال كولشي خايف وعايشين فالحزان ولايني ماتخافيش نشاالله نربحو الحرب ويرجع الحال كيما كان ـ تنهدات بعمق ـ نشأ الله أمغنية هزات قفطانها علي رجليها خارجة من جناحها تبعاتها وصيفطها وقصدو الجليسة لي كاينة فالجيهة الخلفية للقصر بعدما وجدوها ليها بطلبها من طبعها عزيز تخرج وتفوج كلسات كان المنضر زين ويسحر العين صوت الطيور والما النازل من النافورة قبالتها عاطي رونق وجمال للجو وريحة الورد والشجر لى كيسيفط من بين أغصانو ريح خفيفة نعشات روحها وخلاتها تسهااا فخيالها فيقاتها وصيفطها من سهوتها بعدما حطات صنية أتاي من ايدها كتقول ـ لآلة بنت سيدى شنو لي شاغل عقلك ومطير الراحة من بالك وليتي غير ساهية وكتخممي شافت فيها وبتاسمات بسخرية وهي كتقول ـ ساهية كنخمم فحوال البلاد لي تقلب سفاه على علاه البلاد لي كان يتضرب بيها المتال فالسلم والامان وشعبها مرتاح البال تغير فيها الحال دخلات فالحروب وضارو بيها العديان ترملو نساها وتيتمو فيها الصبيان وتشردو فتيان قربات حداها مغنية ـ هدا هو الزمان تبات فحال وتصبح فحوال نشاالله يسالي الحرب وترجع البلاد لسالف عهدها كيما كانت تنهدات عنبر بعمق عنبر : انا أمغنية تنفكر فحال الشعب الضعيف والمحتاج معرفت اش جاري وطاري فالبلاد و فالناس الضعاف وماعيشتهم كيىف ولات خايفة فغياب مولاي الضغات يتماداو ويزيدو فطغيانهم وضلمهم بعد صمت دام دقائق نطقات مغنية وهي كتقول ـ وعلاش متخرجيش ألالة بنت سيدي تجيبي الخبار وبعينك تشوفي الحوال منها نيت تريحي وتهني بالك داز الوقت واليل سدل ستارو كانت عنبر جالسة هي ومرت باها السلطانة قطر الندى فالسفرة كي عادتهم كايتعشاو مجموعين مطبقين أمر السلطان حتي فغيابو والخديم واقفين عليهم كيلبية طلباتهم حطات السلطانة قطر الندى الكاس من يدها وقالت ـ بنت راجلي العزيزة فين وليتي كتغبري مابقيتش كنشوفك وليتي مقابلة غير النعاس شوفي وجهك كي ولا وعينيك كي منفوخين ميقات فيها عنبر وقالت بسخرية ـ اللهم الخلا والنعاس ولا كمامر شي ناس وقريني كيما موقرا لدابة دايرة بوجه مولاي وحتي فغيابو ملتازمة.بعهدي ليه متجبديشعيبي حسن ليك ضحكات سلطانة قطر الندى بإستفزاز وقالت ـ إوى لواه ابنتي راني فمقام مك زعما اش دانا لشي عداوا وحنا مشاركين طبلة وحدة سكتات عنبر متجاهلاها مخليها كتشوف فيها بعدما سلاو هزات عنبر قفطانها علي رجليها و دازت مخلية السلطانة قطر الندى متبعاها العين وكتميق فيها
